Бино ба гузориши телевизиони Си Эн Эн, Амрико даҳҳо сарбози Арабистони Саудиро, ки барои омӯзиш омадаанд, ба ватанашон рондааст. Қарори рондани сарбозон ба ватанашон ба тирандозии маргбори як сарбози нерӯҳои ҳавоии Арабистони Саудӣ дар як пойгоҳи баҳрӣ дар шаҳри Флорида иртибот дорад. Дар тирандозии моҳи гузашта се сарбози амрикоӣ кушта шуданд.
Си Эн Эн рӯзи 11-уми январ аз қавли чанде аз манобеи беном гузориш дод, ки сарбозони рондашуда ба кӯмак ба лейтенанти Саудӣ, ки рӯзи 6-уми декабр сарбозони амрикоиро дар пойгоҳи Пенсакола кушт, муттаҳам намешаванд. Телевизион аз қавли ду манбаъ навиштааст, ки баъзе аз онҳо ба ҳаракатҳои ифротӣ иртибот доштаанд, аз компютер ва ё телефонҳои баъзеи дигар порнографияи кӯдакона ва ё аксҳои кӯдакони урёнро пайдо кардаанд.
Ин сарбозон гурӯҳе аз 850 донишҷӯёни Арабистони Саудӣ будаанд, ки барои таҳсилу тамрин ба Амрико омадаанд. Тирандозе, ки дар шаҳри Флорида баъди ҳамла ба сарбозони амрикоӣ дар маҳалли ҳодиса кушта шуд, Муҳаммад Саид Алшамронӣ ном дошта ва 21-сола будааст. Ба қавли мақомот, ӯ дар Интернет аз Усома бин Лодан, раҳбари кушташудаи созмони Ал-Қоида иқтибос оварда ва Амрикоро танқид мекардааст.
Ба қавли Си Эн Эн, қарори ихроҷи донишҷӯёни Саудӣ, баъди арзёбии васеи вазорати дифои Амрико аз шеваҳои интихоб ва тафтиши донишҷӯёни хориҷие қабул шудааст, ки барои таҳсили низомӣ ба Иёлоти Муттаҳида меоянд. Баъди тирандозӣ дар Флорида, вазорати дифои Амрико зери танқид қарор гирифт.
Вазорати мазкур қарор дар бораи ихроҷи донишҷӯёни Арабистони Саудиро ба Си Эн Эн шарҳ надода ва хостааст, ки ба вазорати адлияи Амрико муроҷиат кунанд. Сафорати Саудӣ дар Вашингтон ҳам ба дархостҳо барои шарҳи қазия то ҳол посух надодааст.