Дар ин бора намояндаи расмии вазорат Ирина Волк дар паёмакрасони Телеграм хабар додааст.
Ба гуфтаи ӯ, дар 8 моҳи соли равон 1117 нафар барои "анҷоми амалҳои ғайриқонунӣ" аз шаҳрвандии Русия маҳрум шудаанд.
Думаи Давлатӣ ё порлумони Русия рӯзи 31-уми июл тарҳи қонунеро қабул кард, ки тибқи он агар соҳибони шиносномаи русӣ худро дар комиссариатҳои ҳарбӣ сабтином накунанд, аз шаҳрвандии ин кишвар маҳрум хоҳанд шуд. Президенти Русия Владимир Путин 8 август ин қонунро имзо кард.
Ин тағйирот бо ташаббуси як гурӯҳ аз вакилони порлумони Русия пазируфта шуд. Илова ба ин, барои содир кардани ҷиноят ва ё амале, ки ба амнияти миллии Русия хатар дорад, шаҳрвандии шахс бекор карда мешавад.
Бар асоси тағйироти нав, шуъбаҳои корҳои дохилӣ ҳам маълумотро дар бораи мардони хостори гирифтани шаҳрвандӣ ба феҳрист ё реестри қайди ҳарбӣ мефиристанд.
Мардони хориҷие, ки соҳиби шиносномаи Русия мешаванд, вазифадоранд ҳамон замон аз рӯйи суроғаи зисташон ба қайди ҳарбӣ гирифта шаванд.
