Пайвандҳои дастрасӣ

Медали тиллои Комроншоҳ дар мусобиқаи қаҳрамонии ҷудои Осиё


Комроншоҳи Устопириён

Комроншоҳи Устопириён, паҳлавони маъруфи тоҷик, дар мусобиқаи қаҳрамонии ҷудо (дзюдо)-и Осиё дар Ҳонконг ба унвони қаҳрамонӣ даст ёфт ва соҳиби медали тилло гардид. Ӯ рӯзи 27-уми май дар қувваозмоии ниҳоӣ дар вазни зери 90 кило бар Ислом Бозбоев аз Қазоқистон пирӯз шуд.

Соли гузашта дар мусобиқаи қаҳрамонии ҷудои Осиё, ки моҳи апрел дар пойтахти Узбакистон баргузор шуда буд, паҳлавони тоҷик Комроншоҳи Устопириён дар вазни зери 90 кило ҳамаи рақибонашро шикаст дод ва соҳиби медали тилло гардид.

Ин паҳлавони тоҷик баъди ду пирӯзӣ дар даврҳои муқаддамотӣ бар Алдикан Ғанам, ки таҳти парчами Федератсияи байналмилалии ҷудо (IJF) ба майдон омад ва Муҳаммадкарим Хуррамов аз Узбакистон, ба дар даври ниманиҳоӣ роҳ ёфта ва Шоичиро Мукаи аз Ҷопонро мағлуб кард.

Паҳлавони дигари тоҷик Саидҷалол Саидов рӯзи27 май дар вазни зери 100 кило, ки дар даври аввал озод буд, дар даври баъдӣ аз Ҳусейн Шоҳи покистонӣ шикаст хӯрд. Сипас ӯ бар Иван Ремаренко (Аморати Муттаҳидаи Араб) пирӯзӣ ба даст овард. Баъдан Саидҷалол Саидов барои медали биринҷӣ аз Шералӣ Ҷӯраеви узбакистонӣ шикаст хӯрд ва дар натиҷа мақоми панҷумро соҳибӣ кард.

Имрӯз боз як варзишгари тоҷик Садр Боев дар вазни зери 81 кило дар нахустин қувваозмоияш бар Лояд Деннис Катипон аз Филиппин ғолиб омад, вале дар даври баъдӣ аз Владимир Золоеви қирғизистонӣ мағлуб шуд.

Дар мусобиқаи қаҳрамонии ҷудои Осиё дар Ҳонконг ҳамагӣ 244 варзишгар (140 мард ва 104 зан) аз 28 кишвар ширкат дорад. Ба ҳайати мунтахаби Тоҷикистон ҳафт гуштигир дохил аст.

Комроншоҳи Устопириён 7-уми январи соли 1993 дар ноҳияи Кӯҳистони Мастчоҳи вилояти Суғд таваллуд шудааст. Факултаи тарбияи ҷисмонии Донишгоҳи давлатии Хуҷандро соли 2015 хатм кардааст. Ӯ аз сулолаи паҳлавонон Устопировҳо мебошад. Вай аз соли 2012 ба ҷудо машғул аст. Аввалин мураббиаш падараш Усто Устопиров мебошад. Баъдан таҳти раҳбарии Владимир Елчанинов тамрин кардааст. Ҳоло бо раҳбарии бародараш Фаридун Устопиров ва Воҳид Фарлак, шаҳрванди эронитабори Олмон, машқ мекунад.

Устоди дараҷаи байналмилалӣ Комроншоҳи Устопириён соли 2013 дар Ҷоми Аврупо дар Киеви Украина ҷойи аввал, дар Ҷоми Владимир Путин дар Хасавюрти Доғистон, дар Гран-прии Алматии Қазоқистон, дар Гран-прии Тошканди Узбакистон ҷойҳои сеюм, соли 2014 дар Ҷоми Осиё дар Тайван ҷойи дуюм, дар Бозиҳои XVII осиёӣ дар Инчони Кореяи Ҷанубӣ ҷойи панҷум, дар Гран-прии Остонаи Қазоқистон ҷойи аввал, соли 2015 дар мусобиқоти қаҳрамонии Осиё дар Кувайт ҷойи сеюм, дар Ҷоми Осиё дар Тайван ҷойи дуюм, дар мусобиқоти қаҳрамонии ҷаҳон дар Остона ҷойи панҷум, дар Гран-прии Тошканд ҷойи дуюм, соли 2016 дар мусобиқоти қаҳрамонии Осиё дар Тошканд ҷойи аввал, соли 2017 дар Гран-прии Дюсселдорфи Олмон ҷойи ҳафтум, дар Гран-прии Анталияи Туркия ҷойи дуюм ва дар мусобиқоти қаҳрамонии Осиё дар Ҳонконг ҷойи аввалро соҳиб шудааст.

Ӯ аввалин бор дар Бозиҳои тобистонаи олимпии соли 2016 дар Рио-де-Жанейрои Бразилия ширкат кардааст.

Ёдовар мешавем, дар рӯзи аввали мусобиқа - 26 май - чаҳор варзишгари тоҷик барои медалҳо мубориза бурд. Сӯҳроб Боқиев дар рақобатҳо дар вазни зери 60 кило баъди се пирӯзӣ бар Чон Ҳу Лио (Макао), Янг Вей Янг (Тайван) ва Ёнг Нам Пак (Кореяи Шимолӣ), дар даври ниманиҳоӣ аз Наоҳиса Такатои ҷопонӣ мағлуб гашт. Баъдан Сӯҳроб барои медали биринҷӣ аз Мӯҳриддин Тилавови узбакистонӣ шикаст хӯрд ва мақоми панҷумро ишғол кард.

Варзишгари дигари тоҷик Беҳрӯзи Хоҷазода дар вазни зери 73 кило пас аз ду пирӯзӣ бар Шатлук Ҷумъаниёзов (Туркманистон) ва Мирзоҳид Фармонов (Узбакистон) дар даври севум аз Сайинҷиригала (Чин) мағлуб шуд. Хоҷазода муборизаро барои медал идома дод, вале аз Муҳаммад Муҳаммади Боримонлуи эронӣ шикаст хӯрд ва дар натиҷа мақоми ҳафтумро касб намуд.

Ду намояндаи дигари Тоҷикистон – Хушқадам Хусравов ва Саидмухтор Расулов – дар даврҳои муқаддамотӣ ноком шуда, аз идомаи мубориза барои медалҳо маҳрум гаштанд. Хусравов дар вазни зери 66 кило дар нахустин қувваозмоияш бар Чун Синг Чуй (Ҳонконг) ғолиб омад, вале баъдан аз Бектур Рисмамбетови қирғиз шикаст хӯрд. Расулов бошад, дар вазни зери 73 кило пас аз пирӯзӣ дар даври аввал бар Тити Кумпапани тайландӣ, дар даври баъдӣ аз Батгерел Баттсетсеги муғул мағлуб шуд.

Дар мусобиқаи қаҳрамонии ҷудои Осиё дар ҳисоби умумидастаӣ мунтахаби Ҷопон бо касби 12 медал (8 медали тилло, як медали нуқра ва 3 биринҷӣ) ғолиб шуд. Мунтахаби Кореяи Ҷанубӣ, ки 14 медал (3 медали тилло, 4 нуқра ва 7 биринҷӣ) ба даст овард, дар ҷойи дувум қарор гирифт. Мунтахаби Муғулистон бо касби 9 медал (1 медали тилло, 3 нуқра ва 5 биринҷӣ) дар ҷойи севум мебошад. Мунтахаби Қазоқистон бо касби 7 медал (як медали тилло, 3 нуқра ва 3 биринҷӣ) ҷойи чорумро азони худ кард. Дастаи Тоҷикистон бо як медали тилло, инчунин ду ҷойи панҷум ва як ҷойи ҳафтум мақоми панҷумро соҳиб шуд.

Дар рӯзи охирини мусобиқаи қаҳрамонии ҷудои Осиё дар Ҳонконг -28 май - қувваозмоиҳои пешакӣ ва ниҳоӣ миёни дастаҳои занонаю мардона баргузор мешавад.

Соли гузашта дар мусобиқаи қаҳрамонии ҷудои Осиё, ки моҳи апрел дар пойтахти Узбакистон баргузор шуда буд, паҳлавони тоҷик Комроншоҳи Устопириён дар вазни зери 90 кило ҳамаи рақибонашро шикаст дод ва соҳиби медали тилло гардид. Зимнан, ӯ нахустин намояндаи Тоҷикистон аст, ки дар таърихи ҷудои тоҷик ба унвони қаҳрамони Осиё даст ёфтааст.

Мусобиқаи қаҳрамонии Осиё оид ба ин намуди олимпии варзиш аз соли 1966 доир мешавад ва варзишгарони тоҷик то кунун дар ин мусобиқоти қитъавӣ ҳамагӣ 15 медал – 2 тилло, 5 нуқра ва 8 биринҷӣ – ба даст овардаанд.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG