Вокуниши Маскав ба гузоришҳо дар мавриди кушта шудани ҷангҷӯёни рус дар Сурия

Ҳукумати Русия мегӯяд, ки ҳеҷ хабаре аз кушта шудани ҷанҷӯёни қарордордӣ ё "зархарид"-и ин кишвар дар ҷараёни ҳамлаҳои эътилоф бо раҳбарии Амрико дар минтақаи Дайр-аз-Зури Сурия надорад. Бархе аз расонаҳо мегӯяд, ки дар ҳамлаи "пешгирона"-и эътилоф ба нерӯҳои тарафдори Башор Асад, чанд шаҳрванди Русия кушта шудаанд. Тибқи бархе гузоришҳо, даҳҳо нафар аз ҷангиёни қарордодии Русия дар ин ҳамлаҳо кушта шудаанд.

Изҳороти сухангӯи раёсати ҷумҳури Русия дар вокуниш ба гузоришҳое мунташир шуд, ки аз кушта шудани шуморе аз ҷангиёни қарордодии Русия дар вилояти Дайр-аз-Зур дар чанд рӯзи пеш, хабар медиҳанд. Эътилоф бо раҳбарии Амрико рӯзи 7-уми феврал дар баёнияе гуфта буд, дар вокуниш ба "ҳамлаи ғайримунтазира" аз сӯи "нерӯҳои тарафдори ҳукумати Сурия" ба маркази "Нерӯҳои демократии Сурия", шаш ҳамлаи ҳавоӣ алайҳи нерӯҳои тарафдори Башор Асад анҷом додааст. Ин даргирӣ дар 8-километрии шарқи минтақаи бетарафи низомӣ дар атрофи дарёи Фурот, воқеъ дар вилояти Дайр-аз-Зур рух дода буд.

Ду рӯз пас аз он баёния, Ҷим Мэттис, вазири дифои Амрико изҳор дошт, ки ҳамлаҳои ҳавоӣ комилан "дифоӣ" буд ва дар вокуниш ба ҳамлаи нерӯҳои тарафдори Башор Асад анҷом шудааст. Шумораи дақиқи кушташудагон маълум нест. Аммо як мақоми амрикоӣ рӯзи сешанбеи гузашта аз кушта шудани "беш аз 100 нафар аз нерӯҳои тарафдори Асад" хабар дода буд.

Бархе аз расонаҳои мегӯянд, дар ҳамлаҳо шаҳрвандони Русия кушта шудаанд. Шабакаи хабарии "Блумберг" рӯзи 13-уми феврал гузориш дода буд, ки шуморе аз нафарҳои рус кушта шуданд, ки "мумкин аст маргбортарин рӯёрӯии Амрико ва Русия аз замони поёни Ҷанги Сард ба ин сӯ бошад". Шабакаи ҷаҳонии Бӣ-Бӣ-Сӣ ба нақл аз ҳамкорони сарбозони қарордодӣ гуфт, ҳадди ақал ду нафар аз онҳо кушта шудаанд.

Аммо ин танҳо шабакаҳои ғарбӣ нестанд, ки гузоришҳое дар ин маврид нашр кардаанд ва хабаргузории русии РИА Новости низ ба нақл аз ҳамоҳангкунандаи "Гурӯҳи Русия дигар" гуфтааст, "шаҳрвандони рус дар ҷараёни ҳамлаҳои Дайр-аз-Зур кушта шудаанд."

Ин мусоҳиби РИА Новости дар мавриди яке аз кушташудагон гуфтааст, "ӯ узви расмии артиш набуд, ва қаблан ба унвони довталаб дар Донбасс ҳузур дошт." Минтақаи Донбасс дар шарқи Украина воқеъ аст ва ниманизомиён ва ҷудоиталабони тарафдори Русия ва нерӯҳои украинӣ аз чанд сол ба ин тараф дар ин минтақа бо ҳам даргир мебошанд.

Дмитрий Песков, сухангӯи раёсати ҷумҳури Русия рӯзи сешанбеи 13-уми феврал гуфтааст, "мо аз русҳои дигаре, ки мумкин аст дар Сурия ҳузур дошта бошанд, хабар надорем". Хабаргузории "Рейтерз" гузориш додааст, ки Ҷим Мэттис, вазири дифои Амрико, ки дар ҳоли ҳозир дар Рим -- пойтахти Италия ба сар мебарад, низ гуфтааст, ки гузоришҳоеро дар ин бора дидааст. "Мо маълумоте дар ин маврид аз Ситоди фармондеҳии марказӣ дар Пентагон дарёфт накардаем",-гуфтааст вазири дифои Амрико.