Раҳмон 1-уми сентябр дар маросиме бахшида ба оғози соли таҳсил дар Душанбе бидуни инки аз ҳеч кишваре ном барад гуфт, "ҳазорон одами бегуноҳ қурбони манфиатҳо ва бозиҳои геосиёсии кишварҳои абарқудрат шуда истодаанд."
Президенти Тоҷикистон ҳамчунин аз ҷанг дар Навори Ғазза ёд кард, ки ба гуфтаи ӯ боис ба кушта шудани беш аз 40 ҳазор кас, аз ҷумла 17 ҳазор кӯдак гардидааст.
Ҷанг дар Навори Ғазза 7-уми октябри соли 2023 баъд аз ҳамлаи ҷангҷӯёни "Ҳамос" ба Исроил оғоз шуд ва то ҳол идома дорад. Амрико ва Иттиҳоди Аврупо гурӯҳи фаластинии "Ҳамос"-ро созмони террористӣ медонанд.
Раиси ҷумҳури Тоҷикистон пештар гуфта буд, ки кишвараш хоҳони давлати мустақили Фаластин бар асоси қатъномаҳои пешини Созмони Милали Муттаҳид аст.
