Интихоботи раёсати ҷумҳури Узбакистон оғоз шуд

Дар интихобот 4 номзад, аз ҷумла раисҷумҳури феълии Узбакистон Ислом Каримов, ки 18 соли ахир дар сари қудрат будааст, Дилором Тошмуҳаммадова ва Аслиддин Рустамов, ҷонишинҳои раиси парлумони Узбакистон ва Акмал Саидов, раиси Маркази миллии ҳуқуқи башар, ширкат меварзанд.

Раванди интихоботро нозирон аз 30 кишвари ҷаҳон, аз ҷумла 26 намояндаи Созмони ҳамкорӣ ва амнияти Аврупо, назорат мекунанд. Ҳукумати Узбакистон қабл аз интихобот аксарияти намояндагиҳои созмонҳои байнулмилалии ҳуқуқи башар дар ин кишварро бастааст ва ба хабарнигорони хориҷӣ иҷозати вуруд ба Узбакистонро надодааст.

Ҳамчунин Кумитаи марказии интихоботи Узбакистон ҳини интихобот гузаронидани ҳар гуна назарпурсиҳои ғайрирасмиро, ки дар интихоботҳои кишварҳои демократӣ маъмул аст, манъ кардааст ва эълон намудааст, ки натиҷаҳои муқаддамотии интихоботи раисҷумҳур танҳо фардо, 24 декабр, маълум хоҳад гашт.

Ҳамзамон таҳлилгарони сиёсӣ ва созмонҳои байнулмилалӣ бе чуну чаро интихоб шудани Ислом Каримовро пешгуӣ кардаанд. Ба гуфтаи онҳо, се нафар рақибони Ислом Каримов гумоштагони худи ӯ мебошанд ва аз сиёсати Каримов ҷонибдорӣ мекунанд. Аҳзоби мухолиф, ба мисли «Бирлик», «Эрк» ва «Озод деҳқон» ба ин интихобот роҳ дода нашудаанд.