Тибқи гузориши ин созмон, дар ҳашт кишвар - Бирма, Куба, Либия, Кореяи Шимолӣ, Сомалӣ, Судон, Туркманистон ва Узбакистон озодиҳои сиёсӣ ва шаҳрвандӣ дар сатҳи поинтарин қарор доранд. Дар ин кишварҳо аҳзоби мухолиф ва созмонҳову расонаҳои хабарии мустақил мамнӯъ ва ё саркӯб шудаанд, мардум ҳамарӯза хатари муҷозот барои ибрози андешаи ғайрро эҳсос мекунанд. Ба рӯйхати 17 кишвари мустабиди олам Фридом Ҳауз ҳамчунин Белорус, Чин, Кот д Ивуар, Гвинея, Эритрея, Лаос, Арабистони Саудӣ, Сурия ва Зимбабверо шомил кардааст. Мақомоти ин кишварҳо низ озодиҳои сиёсиро поймол мекунанд, ба ташкили созмонҳои мустақил иҷоза намедиҳанд, рӯзномаҳои мустақилро таҳти тафтиш қарор додаанд ва мунаққидони ҳукуматро муҷозот мекунанд.

Фридом Ҳауз дар робита ба вазъи ҳуқуқи башар дар Узбакистон навиштааст, ки баъд аз ошӯб дар шаҳри Андиҷон дар соли 2005, ҳукумати Ислом Каримов ба зиндон афкандани дигарандешон ва фишор болои расонаҳои мустақилро ташдид бахшид, созмонҳое, ки бо сармояи кишварҳои хориҷӣ фаъолият мекарданд, баста ва ё аз кишвар ронда шуданд. Фридом Ҳауз бори дигар аз ҳаводиси Андиҷон ёд овардааст, ки моҳи майи соли 2005 ба саҳнаи муқовимати неруҳои мусаллаҳ ва мардуми аз ситами ҳукумату фақру нодорӣ ба дод омада табдил шуд. Ҳудуди се ҳазор сокини Андиҷон, аз ҷумла, занону кудакон бо шиорҳои зиддиҳукуматӣ дар маркази шаҳр ҷамъ омаданд. Ҳукуматдорон ба хотири пароканда кардани тазоҳурот ва аз эътирозгарон холӣ кардани як бинои қаблан тасарруфшуда аз истифодаи неру кор гирифтанд.

Фридом Ҳауз бо такя ба иттилоъи шоҳидони ҳодиса навиштааст, ки сарбозон сӯи мардум оташ кушоданд, ҳатто сӯи онҳое, ки аз майдон фирор мекарданд ва ё ҷароҳат бардошта буданд. Ба иттилоъи расмии Тошканд, дар ин ҳодиса 187 нафар ба ҳалокат расиданд ва аммо манбаъҳои ғайрирасмӣ теъдоди кушташудагон дар ошуби Андиҷонро қариб 800 нафар ҳисоб кардаанд.

Олег Панфилов, раиси Маркази журналистикаи экстрималии Русия ва коршиноси масоили минтақа дар ташреҳи гузориши Фридом Ҳауз ба мо гуфт:

«Кишварҳое, ки он ҷо режимҳои худкома на фақат расонаҳои хабарӣ, балки ҳама талошҳои ташкили ҷомеъаи шаҳрвандиро таҳти назорат мегиранд, ҳамеша аз он доду фиғон мекунанд, ки созмонҳои байнулмилалӣ аз помолкунии ҳуқуқи башар дар ин кишварҳо ҳарф мезананд. Ва аммо худи онҳо барои ислоҳи вазъ иқдоме намекунанд ва чизеро тағйир намедиҳанд, аз ҷумла, баъд аз сари қудрат омадани раисиҷумҳури нави Туркманистон чизе тағйир наёфт, дар Узбакистон бошад, баъд аз ҳаводиси Андиҷон саркӯбкунӣ афзоиш ёфт ва на фақат ҳомиёни ҳуқуқи башар, на фақат хабарнигорон, балки ҳамкори мо Умеда Ниёзоваро низ ба зиндон афканданд.»

Аз нигоҳи Фридом Ҳауз, дар Туркманистон вазъи озодиҳои сиёсиву шаҳрвандӣ баъди сари қудрат омадани раисиҷумҳури нав Қурбонгулӣ Бердимуҳаммадов низ тағйир нахӯрдааст. Туркманистон, ба Иттилоти созмони Транспаренси Интернешнл, дар миёни 163 кишвари гирифтори фасод дар хати 142 қарор дорад. Дар ин кишвар озодии баён маҳдуд шудааст - ҳама расонаҳои хабарӣ ва садову симо таҳти назорати ҳукумат қарор доранд. Айни ҳол, дар Туркманистон теъдоди ками хабарнигорони хориҷӣ фаъолият мекунанд, зеро ҳукумат як гурӯҳи онҳоро аз кишвар берун кардааст. Аз ҷумла, соли 2005 хабарнигори оҷонси русии РИА Новости Виктор Панов бо иттиҳоми ҷосусӣ аз Туркманистон берун карда шуд. Соли гузашта хабарнигори Радиои Озодӣ Оғулсафар Муродова низ бо иттиҳоми ҷосусӣ маҳкум ба зиндон шуд ва бо сабабҳои то ҳол норӯшан дар маҳбас аз дунё даргузашт. Кристоф Уокер - раҳбари бахши пажуҳиши Фридом Ҳауз низ дар як сӯҳбат бо Радиои Озодӣ вазъи озодиҳои сиёсӣ, аз ҷумла, озодии матбуот дар Туркманистонро бадтарин дар минтақа арзёбӣ кард:

«Туркманистон дар пажуҳишҳои мо миёни кишварҳои бештар аз ҳама мустабид ҷойгир аст. Марги раисҷумҳур албатта дарро ба рӯи тағйирот боз кард ва аммо аз рӯи пажуҳишҳои ахир душвор аст гуфтан, ки ин дар то кай боз хоҳад монд. Албатта, афзоиши иттилоъ аз кишвар ва иҷозаи озодии матбуот барои кишвари фақиру дарбастае чун Туркманистон гоми басо муҳиме мебуд.»

Ба иттилоъи Фридом Ҳауз, ҳукумати Туркманистон озодиҳои мазҳабии шаҳрвандонро низ маҳдуд мекунад ва бархе аз гурӯҳҳои мазҳабӣ таҳти фишори шадид қарор доранд. Мақомот таълиму тадриси диниро назорат мекунанд, теъдоди масоҷид дар кишвар солҳои ахир ба карат коҳиш ёфт. Ҳукумат аз масоҷид ва ибодатгоҳҳои дигар адён тақозо дорад, ки китоби Сафармурод Ниёзов "Рӯҳнома"- ро ҳамеша рӯи даст дошта бошанд. Ҳарчанд Қонуни асосӣ баргузории намоишу гирдиҳамоиҳои осоиштаро иҷоза медиҳад, дар асл ин озодиҳо қариб ки комилан аз байн рафтаанд, омадааст дар гузориши Фридом Ҳауз.

Пас аз ҳафт рӯзи нопадид шудан ҷасади Маннон Содиқов ё Домулло Абдуманнони 60-сола, соҳибкор ва собиқ фаъоли Ҳизби мамнӯи наҳзати исломии Тоҷикистон дар Исфара пайдо шудааст.

Ҷасади ӯро рӯзи 4-уми май дар зодгоҳаш, деҳаи Сурхи Исфара, ба хок супурданд.

Мақомот расман сабаби марги сокини Исфараро шарҳ надодаанд, вале наздиконаш мегӯянд, "дар бадани ӯ 11 осори корд дида мешуд."

Абдусалом, яке аз пайвандони ӯ рӯзи 4 уми май дар суҳбат бо Радиои Озодӣ гуфт, ки ду нафар рӯзи 27-уми апрел бо ваъдаи он ки писарашро аз зиндон озод мекунанд, ӯро бо худ бурда буданд. Ба гуфтаи ӯ, он рӯз Абдуманнон ҳамроҳаш 100 ҳазор доллар доштааст.

ҲНИТ дар паёми таслият ба хонаводаи Маннон Содиқов рӯзи 4-уми май дар саҳифаи Фейсбукаш навиштааст, ки ӯ “аз ҷониби як гурӯҳи ҷинояткорон ба таври ваҳшиёна ба қатл расонида шудааст”.

Наздикони ӯ мегӯянд, Абдусалом Содиқов, писари Маннон Содиқов бо ҷурми интиқоли пул ба Муҳаммадиқболи Садриддин, як тан аз мухолифони тундлаҳни ҳукумати Тоҷикистон дар хориҷ аз кишвар боздошт ва соли 2024 ба ҳафт соли зиндон маҳкум шуда буд.

Наздикони Маннон Содиқов мегӯянд, он ду нафаре, ки ӯро бо худ бурданд, ба ӯ гуфтаанд, ки “бо сад ҳазор доллар писарашро аз маҳбас озод мекунанд ва ӯ ҳам ба ин пешниҳод розӣ шудааст.”

Ӯ ба пофишории наздикон, ки ба ин пешниҳод розӣ нашавад, гӯш надодааст.

Ба гуфтаи наздикон, ҳанӯз ҳеч хабаре аз боздошти қотил ё қотилонро ба онҳо нарасондаанд.

ҲНИТ дар паёми таслияташ гуфтааст, ки пас аз баста шудани ҳизб дар Тоҷикистон дар соли 2015 ин фаъоли ҳизб таъқибу боздошт ва як сол зиндонӣ шуда буд.

ҲНИТ соли 2015 дар Тоҷикистон гурӯҳи ифротӣ ва террористӣ эътироф шуд. Даҳҳо узви фаъоли он боздошту зиндонӣ ва гурӯҳи дигаре аз Тоҷикистон фирор карданд.

Мошинҳои калон ва гаронвазни боркаш дар Тоҷикистон акнун бештар шабона ҳаракат хоҳанд кард.

Аз 1 май ҳаракати онҳо дар ҳоли беш аз 25 дараҷа гарм шудани ҳаво аз соати 10-и саҳар то ҳашти шом манъ мешавад.

Мақомот гуфтаанд, ин маҳдудият аз 1 май то 31-уми август давом хоҳад кард.

Мошинҳои гаронвазн ба он боркашҳое гуфта мешавад, ки вазни онҳо аз 6 тонна зиёд бошад.

Хадамоти назорат дар соҳаи нақлиёт ба ронандагон ҳушдор додааст, ки дар сурати вайрон кардани ин қоида ҷарима хоҳанд шуд.

Барои риоя накардани ин маҳдудият аз 50 то 70 нишондиҳанда барои ҳисобҳо (3900-5460 сомонӣ) ҷарима таъйин шудааст.

Мақомот мегӯянд, ҳадаф аз ин тасмим, пешгирӣ аз вайроншавии роҳҳо зери бори вазнин дар ҳавои гарм аст.

Маҳдудияти ҳаракат дар роҳҳои кишвар ҳамасола дар фасли гармо амалӣ мегардад.

Ронандаҳо гоҳе шикоят кардаанд, ки ин қарор баъзан сабаби ҳолатҳои коррупсионӣ гаштааст.

Як сокини шаҳри Турсунзода аз зарбаи раъду барқ ҷон бохта, ду каси дигар маҷрӯҳ шудаанд. Ҳодиса баъд аз зуҳри 3-юми май дар деҳаи Кадучӣ рух додааст.

Кумитаи ҳолатҳои фавқулодаи Тоҷикистон мегӯяд, соати 19:10 ҷасади шахси баҳалокатрасида ва ҷароҳатбардоштагон ба беморхонаи марказии шаҳри Турсунзода интиқол дода шуданд".

Дар Беморхонаи марказии шаҳри Турсунзода 4-уми май ба Радиои Озодӣ гуфтанд, шахси фавтида як ҷавони 17-сола будааст.

Ба гуфтаи ин манбаъ, захмиёни раъду барқ яке 18 ва дуввумӣ 27-сола мебошанд ва феълан зери назорати пизишкон қарор доранд. Аҳволи онҳо хуб гуфта мешавад.

Ин ҷавонон дар сӯҳбат ба пизишкон гуфтаанд, барои чидани чукрӣ ба кӯҳ рафта буданд, ки онҳоро раъду барқ зад.

Дар гузашта ҳам ҳалок шудани сокинон аз раъду барқ сабт шудааст. Тоҷикистон аз рӯзи 1-уми май ба ин тараф шоҳиди боронҳои зиёд ва омадани сел аст.

Рӯзи 2-юми май се сокини шаҳри Кӯлоб баъди омадани сел ба ҳалокат расида, се каси дигар захмӣ шудаанд.

Ҷудокорони тоҷик дар мусобиқаи "Dushanbe Grand Slam 2026" ҳамагӣ 4 медал гирифтанд. Ин мусобиқа рӯзҳои 1-3 май бо иштироки 240 ҷудокор аз 34 кишвари ҷаҳон баргузор шуд.

Тоҷикистонро дар ин мусобиқа 40 ҷудокор намояндагӣ карданд, аммо аксари онҳо дар аввалин сабқатҳо шикаст хӯрда, аз идомаи рақобат бенасиб монданд.

Аз миёни варзишгарони тоҷик, Эмомалӣ Нуралӣ дар вазни то 66 килограм, Муҳиддин Асадуллоев дар вазни то 73 ва Сомон Маҳмадбеков дар вазни то 81 килограм барандаи медалҳои тилло шуданд.

Лоиқ Қутбиддинов, ҷудокори тоҷик дар вазни то 60 килограм соҳиби медали биринҷӣ гардид.

Медалҳои соҳибшудаи варзишгарони тоҷик дар мусобиқаи "Dushanbe Grand Slam 2026" дар қиёс ба соли гузашта хеле камтар аст.

Соли 2025 ҷудокорони тоҷик дар ин мусобиқа 11 медал гирифта буданд.

Кумитаи ҳолатҳои фавқулодаи Тоҷикистон мегӯяд, ки бар асари боронгариҳои сахти шоми 2 май ва субҳи 3 май ва омадани сел, даҳҳо хона дар минтақаҳои гуногуни ҷануби кишвар осеб дида, ба роҳҳо ва киштзорҳо осеб расидааст.

Ба иттилои КҲФ, аз ҷумла, субҳи 3 май дар ҷамоати деҳоти Ҳаёти Нави ноҳияи Ёвон замин фурӯ рафтааст. Дар натиҷа як хонаи истиқоматӣ пурра фурӯ рафта, анбори нигаҳдории ангиштсанги як мактаб зарар дидааст. Ҳамчунин 9 хонаи истиқоматӣ ва як бунгоҳи тиббӣ зери хатари фурӯравӣ қарор гирифтаанд.

Кумитаи ҳолатҳои фавқулода ҳамчунин мегӯяд, ки шоми 2 май бар асари фаромадани сел дар деҳаи Фурқати ҷамоати Дустии ноҳияи Абдураҳмони Ҷомӣ як канал ба масофаи 100 метр рахна шуда, 50 метр роҳи мошингузари маҳаллӣ фурӯ рафтааст. Ҳамчунин 7 хонаи истиқоматӣ дар маърази хатар қарор гирифтаанд ва 7 хонаводаи дигар ба ҷойҳои амн интиқол дода шудаанд.

Видеоро инҷо бинед:

Дар ноҳияи Панҷ ҳам субҳи 3 май сел ба заминҳои кишоварзӣ зарар расонидааст.

Тоҷикистон рӯзи 30 апрел ба ин тараф шоҳиди боронгариҳои сахт мебошад. Дар рӯзҳои гузашта боронгариҳо ва омадани сел дар Тоҷикистон талафоти ҷонӣ низ дар пай дошт.

Аз ҷумла, ба дунболи омадани сели рӯзи 1-уми май дар шаҳри Кӯлоб се нафар ба ҳалокат расида, панҷ каси дигар дар беморхона бистарӣ шудаанд. Мақомот мегӯянд, 450 кӯдак ва пиронсолро дар Кӯлоб ба ҷойи бехавф бурдаанд.

Рӯзи 30-юми апрел баъди боридани борони зиёд муассисаҳо, даҳҳо хонаҳои истиқоматӣ ва заминҳои наздиҳавлигӣ аз обу лойқа пур шудаанд. Аз ҷумла, ба таҳхонаи чандин манзил дар Душанбе об даромада, сокинон аз барқ ва оби ошомиданӣ маҳрум шуданд.

Маркази обуҳавошиносӣ ҳушдор додааст, ки то 4-уми май дар минтақаҳои гуногуни Тоҷикистон, аз ҷумла Душанбе, боронҳои сахт ва сел пешбинӣ мешавад. Аз мардум ҳам хостаанд, ки дар ин рӯзҳо эҳтиёткор бошанд.

Низоми бераводид ё виза байни Тоҷикистону Молдова нигоҳ дошта шудааст. Дар ин бора Вазорати корҳои хориҷии Тоҷикистон рӯзи 2 май хабар дод.

Ин дар ҳолест, ки моҳи декабри соли гузашта порлумони Молдова созишномаи сафари бидуни раводид бо кишварҳои Иттиҳоди давлатҳои мустақил, аз ҷумла Тоҷикистонро бекор карда буд. То ин замон танҳо дорандагони шиносномаҳои дипломатӣ метавонистанд, бе раводид вориди Молдова шаванд.

Дар Вазорати корҳои хориҷии Молдова пештар хабар дода буданд, ки давоми панҷ соли ахир зиёда аз 16 ҳазор тоҷикистонӣ вориди Молдова шудаанд.

Солҳои ахир чандин мавриди ба мушкил дучор шудани шаҳрвандони Тоҷикистон ҳини ворид шудан ба ин кишвар, сабт шуда буд.

Ҳоло, ба иттилои Вазорати корҳои хориҷии Тоҷикистон, бино ба мувофиқаи бадастомада, аз 1 апрели соли 2026 низоми бераводид байни Ҷумҳурии Тоҷикистон ва Ҷумҳурии Молдова барои дорандагони ҳама намуди шиносномаҳои хориҷӣ нигоҳ дошта мешавад.

Дар пайи интиқоли Наргис Муҳаммадӣ, барандаи Ҷоизаи сулҳи Нобел аз зиндони Занҷон ба бемористоне дар ҳамин шаҳр, Бунёди Наргис Муҳаммадӣ эълон кард, ки вазъи саломатии ӯ "бад" аст.

Ҳамидризо Муҳаммадӣ, бародари Наргис, рӯзи 2 май ба Радиои Аврупои Озод/Радиои Озодӣ гуфт, баъд аз интиқоли хоҳараш ба бахши назорати вижаи қалбӣ дар бемористони Занҷон, хонаводааш тавонистаанд ӯро бубинанд ва афзуд, ҳоли ӯ "вахим" аст ва бо истифода аз дастгоҳ нафас мекашад.

Ҳамидризо Муҳаммад, ки дар Норвегия зиндагӣ мекунад, ҳамчунин мегӯяд, шаш нафар аз табибон тайи як моҳи ахир, ки вазъи саломатии хоҳараш дар зиндон бад шудааст, иҷозат додаанд , ки ӯ бояд дастикам як моҳ дур аз шароити зиндон бошад.

Бунёди Наргис Муҳаммадӣ рӯзи 1 май хабар дод, ин фаъоли ҳуқуқи башар ва барандаи Ҷоизаи сулҳи Нобел бинобар бад шудани вазъи саломатиаш ба таври фаврӣ ба бемористоне дар Зиндон интиқол дода шудааст.

Бар асоси эълони ин бунёд, ӯ ду бор дучори аз даст додани ҳушёрӣ ва як бӯҳрони сахти қалбӣ шуда, вазъияташ "ниҳоят бад" аст.

Мустафо Нилӣ, вакили Наргис Муҳаммадӣ пештар дар шабакаи Х навишта буд, ки ӯ рӯзи ҷумъа бар асари ногаҳон поин шудани фишори хун беҳуш шуд ва табибон тавсия доданд, ки ба бемористон интиқол дода шавад.

Наргис Муҳаммадӣ дар моҳи декабри соли гузашта дар маросими хоксупории Хусрав Аликурдӣ, як вакили Вазорати адлияи Эрон, дар шаҳри Машҳад боздошт ва сипас дар Додгоҳи инқилоби Машҳад ба зиндон маҳкум шуд.

Вакили дифои ӯ баъдан эълон кард, ки Наргис Муҳаммадӣ ба ҳафтуним сол зиндон ва ҳамчунин манъи хуруҷ аз кишвар ва табъид, маҳкум шудааст.

Ин ҳукм бо вокуниши сахти ниҳодҳои ҳуқуқи башар ва кишварҳои ғарбӣ рӯбарӯ шуд.

Пентагон хабар дод, ки Пит Ҳегсет, вазири ҷанги Амрико рӯзи 1 май дастур додааст, ҳудуди панҷ ҳазор нерӯи низомии ин кишвар давоми як соли оянда аз Олмон берун шаванд.

Ин тасмим дар ҳоле эълон мешавад, ки Доналд Трамп, раисҷумҳури Амрико низ хабар додааст, тарофа ё боҷҳо бар худравҳо ва мошинҳои воридотӣ аз Иттиҳоди Аврупо аз ҳафтаи оянда ба 25 дарсад афзоиш меёбад.

Ӯ Иттиҳоди Аврупоро муттаҳам кард, ки ба созиши тиҷории имзошуда дар тобистони гузашта пойбанд набудааст.

Трамп ҳамчунин бори дигар аз Фридрих Мертс, садри аъзами Олмон интиқод кард. Интиқод аз Мертс пас аз он оғоз шуд, ки ӯ рӯзи 27 апрел дар як суханронӣ гуфт, ки Эрон дар сари мизи музокирот, Вашингтонро "таҳқир" кардааст.

Мертс дар ин суханронӣ ҳамчунин мақомҳои ҳукумати Трампро муттаҳам кард, ки "бе як стратегияи рӯшан" вориди ҷанг шудаанд.

Трамп дар вокуниш гуфт, Мертс "фикр мекунад, доштани силоҳи ҳастаӣ барои Эрон мушкиле надорад, ӯ намедонад дар бораи чӣ гап мезанад".

Раисҷумҳури Амрико рӯзи 29 апрел эълон карда буд, ки Вашингтон дар ҳоли "баррасӣ ва арзёбии коҳиши эҳтимолӣ"-и нерӯҳои худ дар Олмон аст ва дар "муддате кутоҳе" тасмими ниҳоиро хоҳанд гирифт.

Шон Парнелл, сухангӯи Пентагон дар баёнияе рӯзи 1 май гуфт, интизор меравад ин хуруҷи нерӯҳо тайи шаш то дувоздаҳ моҳ такмил шавад.

Ӯ афзуд, ин тасмим пас аз "бозбиниии комил ороиши нерӯҳои Вазорати дифоъ дар Аврупо" ва бо дарназар гирифтани шароити майдонӣ рӯи даст гирифта шудааст.

Дар ҳамлаи паҳпод ё ҳавопаймоҳои бесарнишини Русия ба як мусофирбар дар шаҳри Херсон ду нафар ҷон бохтааст. Ин ҳамла субҳи шанбеи 2-юми май рух додааст.

Ярослав Шанко, волии Херсон гуфтааст, яке аз кушташудаҳо корманди идораи комуналӣ ва дуввумӣ зане буд, ки шахсияташ маълум нест. Ҳамчунин ҳафт мусофир, аз ҷумла чор корманди идораи комуналӣ захмӣ шудаанд.

Мақомоти украинӣ ҳамчунин аз ҳамлаи паҳподҳои русӣ ба як баландошёна дар вилояти Херсон хабар доданд. Як марди 23 сола дар ин ҳамла осеб бардоштааст.

Ҳамчунин Хадамоти ҳолатҳои фавқулодаи Украина аз ҳамлаи паҳподҳои русӣ ба маҳаллае дар Харков хабар додааст. Дар ин ҳамла шаш нафар, аз ҷумла як кӯдак захмӣ шуданд.

Ба ҳисоби Неруҳои мудофиаи ҳавоии Украина, шаби гузашта Русия бо 163 паҳпод ба Украина ҳамла кардааст, ки 142 ададаи он нобуд шуданд.

Хабарнигорони бахши русиии "Би-би-си" ва "Медиазона" номи беш аз 216 ҳазор низомии Русияро маълум кардаанд, ки дар ҷанг зидди Украина кушта шудаанд.

Хабарнигорон танҳо давоми ду ҳафтаи ахир номи зиёда аз 4600 низомии кушташудаи Русияро аниқ кардаанд.

Дар таҳқиқоти журналистӣ омадааст, талафоти воқеии Русия дар ҷанг метавонад бештар аз ин бошад. Рӯзноманигорон ба хулосае омадаанд, ки ҳудуди 40 дарсад аз кушташудагон онҳое ҳастанд, ки баъди оғози ҷанг бо Вазорати дифои Русия шартнома бастаанд. Бештари онҳо сокинони шаҳрҳои хурд ва рустоҳо будаанд.

Русия талафоти низомиёнаш дар ҷанг зидди Украинаро фош намекунад.

Коршиносони низомӣ ҳадс мезананд, ки таҳқиқи қабристонҳои Русия, бойгонии низомиён ва хабару эълонҳо танҳо аз 45 то 65 дарсади қурбониёни воқеиро фаро мегирад. Дар бораи на ҳамаи сарбозони кушташуда ошкоро хабар дода мешавад.

Доналд Трамп, раиси ҷумҳури Амрико, дар номае ба раҳбарони Конгресс навиштааст, ҷанг бо Эрон "ба поён расидааст".

Тибқи қонун дар Амрико, раиси ҷумҳур метавонад дар посух ба "таҳдиди зудҳангом" аз артиш истифода барад, аммо давоми 60 рӯз ё тасдиқи Конгресро гирад ё сарбозонро ба хона баргардонад.

Амрико ва Исроил рӯзи 28-уми феврали имсол ба Эрон ҳамла карданд ва ин ҷанг 40 рӯз давом кард. Барои идомаи ин ҷанг, Доналд Трамп бояд розигии Конгресро ба даст орад.

Аммо раиси ҷумҳури Амрико 1-уми май дар номааш ба қонунгузорон навиштааст, дигар ниёзе ба гирифтани розигии онҳо нест, чун ҷанг бо Эрон тамом шудааст.

Доналд Трамп навиштааст, "аз рӯзи 7 апрели 2026 миёни Иёлоти Муттаҳида ва Эрон табодули оташ рух надодааст. Ҷанге, ки рӯзи 28 феврали оғоз шуд, ба поён расидааст".

Бо гузашти беш аз як моҳ аз ҷанг ба хотири гуфтугӯ ва расидан ба як созиш ИМА оташбас эълон кард. Ҳанӯз ҳеч нишонае аз гуфтугӯ ва созиш миёни ду кишвар дида намешавад.

Дар пайи боридани борони сахт шоми 1-уми май ба шаҳри Кӯлоб сел омад. Хабарнигори Радиои Озодӣ мегӯяд, маҳаллаҳои асосии шаҳр зери об монданд ва дастикам як нафар ба ҳалокат расидааст. Мақомот дар бораи ин ҳодиса ва фавти ин сокин расман хабар надодаанд.

"Ин сокин зери девор монда, ба ҳалокат расидааст", - гуфт хабарнигори Радиои Озодӣ.

Дар наворҳое, ки ба дасти Радиои Озодӣ дида мешавад, ки ба ғайр аз роҳҳои калон сел ба ҳавлии сокинон даромадааст.

Давоми ду рӯзи ахир Тоҷикистон шоҳиди боронҳои сахт ва омадани сел аст. Рӯзи 30-юми апрел баъди боридани борони зиёд муассисаҳо, даҳҳо хонаҳои истиқоматӣ ва заминҳои наздиҳавлигӣ аз обу лойқа пур шудаанд. Аз ҷумла ба таҳхонаи чандин манзил дар Душанбе об даромада, сокинон аз барқ ва оби ошомиданӣ маҳрум шуданд.

Маркази обуҳавошиносӣ ҳушдор додааст, ки то 4-уми май дар минтақаҳои гуногуни Тоҷикистон, аз ҷумла Душанбе, боронҳои сахт ва сел пешбинӣ мешавад. Аз мардум ҳам хостаанд, ки дар ин рӯзҳо эҳтиёткор бошанд.

Дар баёнияи сафорат омадааст, шаҳрвандони ноболиғи кишварро рӯзи 29-уми апрел ба Тоҷикистон фиристоданд.

Интиқоли кӯдакони тоҷики дар Русия бесаробонмонда дар ҳамкорӣ бо вазорати корҳои дохилии Русия сурат гирифтааст.

Соли гузашта аз ин кишвар, ки мизбони садҳо ҳазор муҳоҷири кории тоҷик аст, на камтар аз 6 тифли тоҷикро, ки аз волидайн, ё парастор маҳрум шудаанд, ба Тоҷикистон фиристода буданд.

Соли 2024 аз Русия ба Тоҷикистон 54 тифли бесаробонмонда интиқол дода шуд.

Дар ин бора дар намояндагии ширкат хабар доданд. Ба гуфтаи онҳо, ин пойгоҳ хариду фурӯши криптоасъорро бар асоси қонун иҷоза медиҳад ва ин фаъолияти онҳо ба қонунгузории Тоҷикистон ҳам мутобиқат мекунад

Хадамоти табодули криптоасъор имкон медиҳад, ки шахс бо пули миллии Сомонӣ криптоасъор харида ваё чунин арзашаро бифурӯшад.

Дар ин пойгоҳ имкони муомила бо чунин навъҳои пули рақамии мисли Bitcoin, USDT ва Ethereum имконпазир мебошад.

Дар сомона гуфта шудааст, ки онҳо дафтари корие дар Душанбе доранд ва он ҷо бо забонҳои тоҷикиву русӣ хидматрасонӣ сурат мегирад. Муассиси ин хадамот - "Провайдери литсензиашудаи хизматрасониҳо дар соҳаи муомилаи активҳои рақамӣ — резиденти IT Park Душанбе" мебошад.

Ба навиштаи Бонки миллии Тоҷикистон, криптоасъор як шакли дороии рақамӣ буда, ба технологияи блокчейн асос ёфтааст. Криптоасъор дар шабакаи ғайримарказонидашуда бе иштироки мақомоти давлатӣ ё бонки марказӣ (миллӣ) сохта ва идора карда мешавад.

Қарор дар ин замина рӯзи 30 июн ба иҷро медарояд.

Ин қарор ба шаҳрвандони кишварҳои узви Ҷомеаи ҳамсуд ё СНГ, инчунин, шаҳрвандони Гурҷистон рабт дорад, ки ба хоки Русия бидуни виза ворид шуда, дар соҳаи интиқолҳои байналмилалӣ кор мекунанд. Аз ҷумла, қоидаҳои нав ба ронандагон аз кишварҳои Осиёи Марказӣ рабт мегирад.

Бино ба ин санад, ронандагон ҳақ доранд дар хоки Русия дар давоми як сол дар маҷмӯъ то 180 рӯз қарор дошта бошанд. Барои ворид шудан ва як муддат дар хоки Русия истодани онҳо бояд ариза дода шавад.

Мақомот мегӯянд, ки қарори мазкур барои коҳиши маҳдудиятҳои маъмурӣ, халал нарасонидан ба интиқоли борҳо ва содда кардани корҳои ташкилӣ дар ин соҳа равона шудааст.

Интиқолҳои байналмилалӣ муҳимтарин шабакаи таъминони бору маҳсулот ба бозорҳои дохил ва хориҷи кишварҳои Осиёи Марказӣ дониста мешавад.