Пайвандҳои дастрасӣ

Хабари нав

Хабарҳо

Хоҷагиҳои деҳқонӣ аз қарз раҳо меёбанд

Ҳукумати Тоҷикистон тасмим гирифтааст қарзи воҳидҳои кишварзии пахтакорро, ки аз ширкатҳои сармоягузор доранд, пардохт намояд. Муродалӣ Алимардонов, райиси Бонки миллии Тоҷикистон тайи баргузории як нишасти матбуотӣ гуфт, аз соли 1997 ба ин сӯ хоҷагиҳои деҳқонии кишвар ба далели заъфи коргузорӣ ва адами маблағгузории давлат баъди ҷанги шаҳрвандӣ аз ширкатҳои фючерсӣ 400 миллион доллар қарздор шудаанд.


Оқои Алимардонов гуфт, Бонки ҷаҳонӣ ва Бонки Осиёии рушд мувофиқа кардаанд, ки як маротиба ба ҳукумати Тоҷикистон кӯмак кунанд, то воҳидҳои кишоварзӣ аз ин қарзҳо озод шавад. Райиси Бонки миллии Тоҷикистон афзуд: «қарзи хоҷагӣ сифр мешавад, аммо мо маблағи сармоягузорро медиҳем. Сад фоиз не, қисми муайянашро. Масалан, аудит маълум мекунад, ки 10 фоиз кам мешавад ё 20 фоиз. Худи онҳо ба ин розӣ ҳастанд. Аз дигар тараф сектори хусусиро мо набояд кушем, дарро набандем. Агар мо як бор пули онҳоро надиҳем, инвесторҳо намеоянд, пагоҳ мегӯянд, ки Тоҷикистон пули моро ҳам намедиҳад»


Оқои Алимардонов гуфт, барои танзими ин раванд як оҷонсие рӯйи кор хоҳад омад, ки масоили марбут ба қарзро баррасӣ хоҳад кард. Тибқи иттилои Бонки миллии Тоҷикистон, соҳаи пахтакориии кишварро 52 ширкати фючерсӣ маблағгузорӣ мекунанд ва аксари онҳо ширкатҳои муштарак мебошанд.
Муродалӣ Алимардонов, райиси Бонки миллии Тоҷикистон гуфт, дар авохири моҳи май Ҳукумати Тоҷикистон эълом хоҳад дошт, ки аз ин ба баъд ҳеҷ як хоҷагии деҳқонӣ аз ширкатҳои фючерсӣ қарздор намебошад.

Фарҳоди Мелод, Душанбе

Ҳамаи хабарҳои имрӯзро дар инҷо бихонед

Хадамоти кашф сабаби ба бемории мармуз гирифтор шудани дипломатҳои Амрикоро меҷӯяд

Вилям Бернс, раиси Хадамоти иктишофии Амрико (СIA)

Вилям Бернс, раиси Хадамоти иктишофии Амрико (СIA) гуфт, ки ин ниҳод талошҳои худро, ҷиҳати муайян кардани сабаби ба бемории мармуз гирифтор шудани дипломатҳои ИМА-ро ба беморие, ки "Синдроми Гавана" гуфта мешавад, афзоиш додааст.

Ин беморӣ, ки боиси ранҷуриҳои гуногун, аз ҷумла чарх задани сар, дилбеҳузурӣ, дарди сар ва аз даст рафтани ҳофиза мешавад "Синдроми Гавана" ном дорад, зеро он бори аввал соли 2016 дар сафорати ИМА дар Гавана пайдо шуда, даҳҳо дипломатҳоро мубтало кард. Аз он замон инҷониб, даҳҳо ҳолати гирифтории дипломатҳои ИМА ба ин бемории мармуз дар Чин, Русия, Аврупо ва кишварҳои Осиёи Марказӣ мушоҳида шудааст. Ҳафтаи гузашта маъмурияти президент Ҷо Байден эълон кард, ки гузоришҳои афсарони иктишофӣ, дипломатҳо ва дигар шахсони расмиро дар Вена таҳқиқ мекуна, ки аз нишонаҳои Синдроми Гавана шикоят кардаанд.

Рӯзи 22-юми июл, Бернс дар суханрониаш гуфт, ки " ба эҳтимоли хеле қавӣ" сабаби бемории пайдошуда барқасдона аст ва афзуд шумораи маҳдуди "гумонбарон" қобилияти амалӣ кардани чунин амалиётро дар саросари ҷаҳон доранд. Бернс инчунин гуфт, як афсари баландпояро, ки амалиёти раҳбари «Ал-Қоида» Усома бин Лодинро сарварӣ мекунад, сарварии як гурӯҳи фаврии муфаттишони ин синдром таъин кард. Ҳайати мутахассисони тиб, ки дар ин амалиёт иштирок мекунанд се баробар афзоиш дода шуд.

Тоҷикистону Русия тарҳи созишномаи нафақаи муҳоҷиронро ниҳоӣ кардаанд

Тоҷикистону Русия дар мавриди пардохти нафақа ба муҳоҷирони корӣ ба мувофиқа расидаанд.

Дилмурод Давлатзода, раиси Оҷонсии суғуртаи иҷтимоӣ ва нафақаи Тоҷикистон ҳафтаи равон зимни суҳбат бо хабарнигорон гуфт, лоиҳаи созишномае, ки ҳаҷми нафақаро танзим мекунад, барои баррасӣ ба ҳукумат пешниҳод шудааст. Интизор меравад баъд аз имзо шудани ин созишнома миёни Тоҷикистон ва Русия ҳар муҳоҷири корие, ки дар Русия андози иҷтимоӣ месупорад, бо расидан ба сини бознишастагӣ, метавонад ба нафақа умед бандад.

Тарҳи созишномаи миёни Тоҷикистону Русия дар бораи танзими нафақаи муҳоҷирони корӣ ҳанӯз ҳафт сол пеш ниҳоӣ шуда буд. Аммо ҷонибҳо то охир ба мувофиқа нарсиданд, Тоҷикистон мехоҳад Русия пули нафақаро ба оҷонсии нафақа гузаронад ва кишвар худ ба муҳоҷирони бознишаста нафақа диҳад. Русия ба ин шарт розӣ нашуда буд ва мехост худ нафақаи муҳоҷиронро пардозад.

Дар сурати имзои ин созишнома муҳоҷирони тоҷик дар Русия ҳаққи дарёфти нафақаро пайдо хоҳанд кард. Муҳоҷирати кории шаҳрвандони Тоҷикистон ба Русия бештар аз ду даҳсола пеш оғоз ёфта буд ва ҳоло онҳое, ки ба синни нафақа расидаанд, танҳо нафақаи иҷтимоӣ мегиранд. Ҳоло ҳаҷми нафақаи иҷтимоӣ 187 сомониро ташкил медиҳад.

Мақомоти қазоқ гӯш кардани телефони роҳбарони он кишварро шарҳ доданд

Даврон Абаев, муовини аввали раиси дастгоҳи президенти Қазоқистон.

Даврон Абаев, муовини аввали раиси дастгоҳи президенти Қазоқистон хабари гӯш кардани телефони роҳбарон, фаъолон ва чанде аз рӯзноманигорони кишварашро шарҳ дод. "Душвор аст, ҳарфе гуфтан, вақте чизе рушан нест. Ба мо хабари пурсарусадое доданд, вале далеле пешниҳод накарданд ва акнун пешниҳод доранд, ки ба он бовар кунем", - гуфт Даврон Абаев.

Пештар аз ин ҳукумати Қазоқистон хабари истифодаи барномаи ҷосусии Pegasus-ро барои гӯш кардан ва хондани муколамаҳои чанде аз қазоқистониҳо "пуч" унвон карда буд.

Маркази пажуҳиши фасод ва ҷиноятҳои созмонёфта (OCCRP) рӯзи 20 июл чанд тани дигарро аз Қазоқистон ба рӯйати барномаи ҷосусии "Pegasus" (Пегас) шомил кард. Дар ин рӯйхат ҳамакнун президенти Қазоқистон Қосимҷомарт Тоқаев, сарвазири он кишвар Асакар Мамин ва ҳокими шаҳри Алмато Бакитҷон Сагинтаев шомил ҳастанд. Дар ин рӯйхат дар ибтидо аз Қазоқистон панҷ кас шомил буданд - ду рӯзноманигор ва се фаъоли иҷтимоӣ.

Pegasus Project 17 созмони ғайридавлатӣ ва даҳҳо рӯзноманигорро муттаҳид мекунад, ки иттилои аз ширкати исроилии NSO Group беруномадаро омӯхтаанд. Ин иттилоъ аз рақами телефонҳое иборат аст, ки ба эҳтимоли зиёд тавассути барномаи ҷосусии Pegasus рахна шудаанд. Рахнасозии телефонҳоро ҳукуматҳои кишварҳои гуногуни дунё фармоиш додаанд. Тарҳи Pegasus Project ба иттилои ҷамъовардааш 18 июл шуруъ кард. Дар ҳоли ҳозир маълумот дар бораи рахна шудани телефонҳо 18 роҳбари кишварҳои дунё аз Аврупо, Африқо, Осиё ва Шарқи Наздик, аз ҷумла президентҳои Фаронса Эммануэл Макрон, шоҳи Марокаш Муҳаммади Шашум ва президенти Мексика нашр шудааст.

OCCRP менависад, ки рахна кардани телефони президент ва сарвазири Қазоқистонро эҳтимолан мақомоти худи Қазоқистон супориш додаанд.

Ба ҷуз аз Қазоқистон, ба иттилои пажуҳишгарон, барномаи Pegasus-и ширкати NSO Group-ро мақомоти Озарбойҷон, Маҷористон, Мексика, Баҳрайн, Ҳинд, Индонезия, Марокаш, Руанда, Ҷумҳурии Конго, Арабистони Саудӣ - дар маҷмуъ наздики 50 давлат истифода кардаанд.

Барномаи Pegasus имкон дорад, тавассути паёмакҳои одӣ вориди телефон шуда, маълумотро рабояд ва муколамаҳоро хонад.

Дар Узбекистон маъракаҳои интихоботи президентӣ оғоз шуданд

Интихобот дар Узбекистон. Акс аз бойгонӣ.

Комиссияи марказии интихобот ва раъйпурсии Узбекистон 23 июл қарор кард, ки маъракаҳои интихоботи президентии он кишвар оғоз карда шаванд. Дар ин бора расонаҳо бо истинод ба раиси комиссия Зайниддин Низомхоҷаев иттилоъ доданд.

"Бар асоси банди 90 ва 117-и Конститутсияи Узбекистон тасмим гирифта шуд, маъракаҳои интихоботи президентии кишвар, ки қарор аст, 24 октябр баргузор гардад, аз 23 июл оғоз карда шаванд", - изҳор доштааст Низомхоҷаев дар як нишасти хабарӣ дар Тошканд.

Тибқи Кодекси интихоботии Узбекистон, ҳаққи пешбарии номзад ба мақоми президентиро ҳизбҳои сиёсие доранд, ки на дертар аз шаш моҳ пеш аз интихобот дар Вазорати адлияи он кишвар сабтином шудаанд.

Пешбарии номзадҳо ба мақоми президентии Узбекистон дар интихоботи моҳи октябри имсол аз 20 август то 9 сентябр идома меёбад.

Ду ҳизб -- "Эрк" ба раҳбарии сиёсатмадори мухолиф Муҳаммад Солеҳ ва Ҳизби нави "Ҳақиқат ва Тараққиёт", ки онро Хидирназар Аллақулов раҳбарӣ мекунад, талош карданд, барои иштирок дар интихоботи президентии Узбекистон худро сабти ном кунанд, вале аз Вазорати адлияи он кишвар борҳо ҷавоби рад гирифтанд.

Тоҷикистон барои назорати сарбанди кӯли Сарез дастгоҳҳои нав насб мекунад

Кӯли Серез, акс аз кайҳон. NASA

Тоҷикистон дар кӯли Сарез низоми нави огоҳсозӣ аз хатарро насб карданист, ки ба иттилои мақомот, арзиши он беш аз як миллион доллар аст.

Эмомалӣ Иброҳимзода, муовини раиси Кумитаи ҳолатҳои фавқулоддаи Тоҷикистон рӯзи 23-юми июл гуфт, ки "дастгоҳҳои низоми нави маниторинг ва огоҳсозӣ моҳи август дар кӯли Сарез насб хоҳанд шуд."

Ба қавли ӯ, дастгоҳҳои низоми нав бо маблағгузории Бонки Осиёии Рушд аз сӯи як ширкти итолиёвӣ дастрас шудааст. Насби дастгоҳҳо дар доираи тарҳи миллӣ оид ба мудирияти хатари фалокатҳои ногаҳонӣ, ки Бонки Осиёии Рушд онро маблағгузорӣ мекунад, сурат мегирад.

"Қаблан ҳам дастгоҳҳо буданд, вале ин дастгоҳҳо сад маротиба аз онҳо беҳтар аст, дар як муддати кутоҳ, мардумро аз фалокат, огоҳ мезозад",-афзуд, Эмомалӣ Иброҳимзода.

Кӯли Сарез соли 1911 бар асари кӯчиши кӯҳ миёни навоҳии Рӯшону Мурғоби имрӯз ба вуҷуд омада, ҳудуди 17 миллиард метри мукааб об дорад. Мутахассисон мегӯянд, ки дар сурати рахнашавии оби Сарез, на танҳо сокинони рустоҳои Бадахшони Тоҷикистон, балки сокинони дигар кишварҳои поёноби минтақаи Осиёи Марказӣ низ бо хатар рӯ ба рӯ мешаванд.

Озарбойҷон ба Тоҷикистон 40 ҳазор воя ваксинаи AstraZeneca туҳфа кард

Озарбойҷон ба Тоҷикистон 40 ҳазор воя ваксинаи AstraZeneca -ро ҳамчун кӯмаки башардӯстона фиристод.

Вазорати тандурустии Тоҷикистон мегӯяд, бастаҳои ваксинаҳо тариқи ҳавопаймо аз Боку ба Душанбе интиқол ёфта, дар анбори махсуси вазорат нигаҳдорӣ ва тибқи нақша байни аҳолии кишвар тақсим мегардад.

Тоҷикистон моҳи марти соли ҷорӣ дар доираи барномаи COVAX зери назари Созмони Ҷаҳонии Тандурустӣ 192 ҳазор воя ваксинаи AstraZeneca дарёфт карда буд. Ҳамчунин дар охири моҳи июн Чин ба Душанбе 300 ҳазор воя ваксинаи Коронавакро ройгон тақдим намуд. Тибқи омори расмӣ, то ҳафтаи гузашта дар Тоҷикистон беш аз 421 ҳазор нафар зидди бемории коронавирус эм карда шуданд.

Мавлавӣ Абдуллобеки Язғуломиро аз боздоштгоҳи Душанбе ба Хоруғ бурданд

Мақомоти тафтишотӣ рӯҳонии шинохта Абдуллобек Қувватбеков, маъруф ба Мавлавӣ Абдуллои Язғуломиро барои таҳқиқи парвандааш, яъне гумони “Даъвати ифротгароӣ тариқи Интернет” (моддаи 307, қисми 1) аз Душанбе ба Хоруғ овардаанд.

Бо тасдиқи ин хабар як манбаъ дар Додситонии Хоруғ рӯзи 23-уми июл ба Радиои Озодӣ гуфт, азбаски иттиҳомоти мавриди тафтиш дар Язгулом ва Ванҷ рӯй додаанд, айбдоршаванда Қувватбеков як ҳафта пеш ба ин ҷо интиқол дода шуд ва то анҷоми тафтиш дар боздоштгоҳи муваққатӣ нигоҳ дошта мешавад.

Наздикони рӯҳонӣ мегӯянд, аз интиқол ёфтани Қувватбеков онҳоро огоҳ накардаанд ва айни ҳол дар борааш иттилое надоранд.

Қувватбек Қувватбеков бародари Абдуллобек рузи 23-уми июл ба Радиои Озодӣ гуфт, кӯчондани рӯҳонӣ ба Хоруғ аз оғоз низ эҳтимол дошт, чунки мақомот ҳанӯз ҳангоми боздошташ гуфта буданд, ки парвандаро мақомоти интизомии Вилояти Мухтори Куҳистони Бадахшон боз кардааст.

Ин манбаъ ҳамзамон меафзояд, Абдуллобек Қувватбеков аз замони боздошташ дар моҳи гузашта то ҳоло вакили мудофеъ надорад.

Қувватбек Қувватбеков мегӯяд, “фақат як маротиба ҳамроҳ бо писари Абдуллобек дар боздоштгоҳ бо вай мулоқот кардем, вале ҳеҷ натавонистем суҳбати озод кунем ва фаҳмем, ки чӣ масъала аст. Дар вақти суҳбати мо се намояндаи тафтишот ҳузур дошт, фақат аҳволпурсӣ кардем тамом."

Абдуллобек Қувватбеков, рӯзи 18-уми июн ҳамроҳи бародараш Иззатулло Қувватбеков дар шаҳри Душанбе боздошт шуда буданд ва баъди як ҳафта Иззатулло раҳо карда шуд.

Пас аз раҳоии яке аз бародарон, мақомот муҳлати ҳабси Абдуллои Язғуломиро барои ду моҳи дигар дароз карданд ва ӯро ба боздоштгоҳи муваққатии рақами аввал (СИЗО) интиқол додаанд.

Дар авохири моҳи гузашта дар ҷамоати Язғуломи ноҳияи Ванҷ, зодгоҳи Абдуллобек Қувватбеков чанд сокин барои раҳоии ӯ гирдиҳамоӣ кардаанд. Як тан аз сокинони ноҳияи Ванҷ дар суҳбат ба Радиои Озодӣ гуфта буд, ки эътирозгарон аз тарафи кормандони милиса пароканда шуданд ва се нафар аз онҳо боздошт шудаанд, вале пас аз се рӯз раҳо шуданд.

Дар навори видеоие, ки дар шабакаҳои иҷтимоӣ нашр шудааст, дида мешавад, онҳо аз мақомоти Тоҷикистон мехоҳанд, Мавлавиро раҳо кунанд.

Ба гуфтаи Қувватбеков гурӯҳи 8-нафараи кормандони мақомоти интизомӣ субҳи рӯзи 18-уми июн ба манзили зисти Мавлавӣ Абдуллоҳи Язғуломӣ омада ӯро ҳамроҳи бародараш Иззатулло ва бо китобҳои мазҳабиву динӣ ва 80 ҳазор доллар маблағ бо худ бурданд.

“Чанд нафар хонаро тагуру карданд ва ҷуз Қуръон китобҳои дигари диниро ҷамъ карданд ва пулеро, ки бародарам барои фарзандонаш мехост, дар Душанбе хона харад, 80 ҳазор доллар ҳам гирифтанду бо ҳардуи бародарам бурданд”, -- иброз дошт Қувватбеков.

Боздошти Мавлавӣ Абдуллои Язғуломӣ дар ҳоле сурат гирифтааст, ки наворҳои зиёди ӯ бо мавъизаҳои пуршӯри динӣ ва даъватҳои ваҳдати динию миллӣ дар шабакаҳои иҷтимоӣ паҳн шудаанд. Манбаъҳои дигар мегӯянд, ин рӯҳонӣ бештар бо табобати беморони рӯҳӣ ва дуохонӣ машғул будааст.

Раиси Бонки миллӣ гуфт, қарзҳои ду бонки муфлисшуда назди муштариён коҳиш ёфтааст

Ҳоким Холиқзода, раиси Бонки миллии Тоҷикистон.

Раиси Бонки миллии Тоҷикистон гуфт, ду бонки муфлисшудаи Тоҷикистон -- "Тоҷиксодиротбонк" ва "Агроинвестбонк" беш аз 52 дарсади маблағҳои амонатгузоронро баргардониданд. Ҳоким Холиқзода рӯзи 22-юми июн зимни нишасти хабарӣ гуфт, ҳамакнун шумораи амонатгузорони "Тоҷиксодиротбонк" аз 56 ҳазор нафар то наздики шаш ҳазор нафари ҳозира, яъне қариб 10 маротиба коҳиш ёфта, қарзи умумии "Агроинвестбонк" назди муштариён аз 2,4 миллиард сомонӣ то 1, 38 миллиард сомонӣ коҳиш ёфтааст. Ин ду бонки як замон азим ва ба истилоҳ "низомсоз", соли 2015 дучори буҳрон гашта, дар пардохти амонатҳои мардум оҷиз монданд. Ҳукумати Тоҷикистон соли 2016 барои наҷоти ин ду бонки дучори мушкил беш аз се миллиард сомонӣ қарз дод, аммо мушкили ин бонкҳо ҳал нашуданд.

Чин нахост, фарзияи хуруҷи коронавирус аз озмоишгоҳи Вуҳон санҷида шавад

Озмоишгоҳи вирусшиносии шаҳри Вуҳани Чин.

Мақомоти Чин аз ҳамкорӣ дар рафти таҳқиқоти Созмони ҷаҳонии тандурустӣ (СҶТ) дар бораи манбаи хуруҷи коронавируси нав даст кашиданд.

Қарор буд, дар марҳалаи дувуми тафтишот фарзияи хуруҷи коронавируси нав аз озмоишгоҳе дар Вуҳони Чин санҷида шавад. Пекин ин фарзияро комилан рад карда, пешниҳод дорад, ки фарзияи аз хориҷ ба Чин ворид кардани вирус таҳқиқ карда шавад.

Хабаргузории Reuters навишта, ки мақомоти Чин рӯзи панҷшанбе аз иштирок дар марҳалаи дувуми тафтишот даст кашидаанд. "Нақша ақли солимро нодида гирифта, ба илм таҳдид мекунад", - иқтибос овардааст хабаргузорӣ аз суханҳои муовини раиси Кумитаи давлатии Чин оид ба умури тандурустӣ ва беҳдоштӣ Сзеня Исиня.

Пажуҳишгарони байналмилалӣ мебоист, дар рафти марҳалаи дувуми таҳқиқот ба бозору озмоишгоҳҳои Вуҳон, ки аз онҷо вирус ба тамоми ҷаҳон паҳн гаштааст, дастрасӣ пайдо кунанд.

Фарзияи хуруҷи коронавируси нав аз озмоишгоҳе баъди паҳншавии беморӣ ба миён омад. Ҷонибдорони фарзия назари худро ба он асоснок мекунад, ки дар Вуҳон яке аз бузургтарин марказҳои пажуҳишии коронавирусҳо мавҷуд аст. Аз ҷумла, дар он шаҳр вируси "SARS", ки ба коронавируси нав - COVID-19 наздик аст, омухта мешавад.

Нашрияи The Wall Street Journal моҳи майи имсол бо истинод ба санадҳои махфии мақомоти иктишофии Амрико навишт, ки се донишманди Маркази вирусшиносии Чин моҳи ноябри соли 2019, пеш аз паҳншавии коронавируси нав сахт бемор шуданд. Телевизиони Fox ҳам моҳи апрели соли 2020 гузориш дод, ки нахустини шахси мубтало ба COVID-19 корманди озмоишгоҳ буд.

Додситонии Туркия хост, Орхан Инандӣ то 22,5 сол зиндонӣ шавад

Орхан Инанди дар Қирғизистон нопадид шуд.

Додситонии шаҳри Анқараи Туркия барои президенти муассисаҳои байналхалқии омӯзишии "Сапат" дар Қирғизистон Орхан Инандӣ аз 15 то 22,5 соли зиндон талаб кард.

Ба иттилои расонаҳои туркӣ, Инандӣ ба "идораи созмони мусаллаҳи террористӣ" айбдор мешавад. Расонаҳои Туркия навиштанд, ки Орхан Инандӣ гӯё дар рафти бозпурсӣ айби эъломшударо эътироф кардааст.

Раҷаб Эрдуғон, президенти Туркия рӯзи 5 июл хабар дода буд, ки Орхан Инандӣ аз Қирғизистон ба Туркия бурда шудааст.

Ба гуфтаи Эрдуғон, амалиёти ба Туркия овардани Инандиро Созмони миллии иктишофӣ анҷом додааст. Эрдуғон аз Орхан Инандӣ "мудири ФЕТО дар Осиёи Марказӣ" ном бурд. "Мо ба ҳеч сохторе иҷоза намедиҳем, ки камин гирад, хун резад ва ё зарари моливу маънавӣ орад ва мавҷудияташро идома диҳад", - гуфт Эрдуғон.

Вай илова кард, ки то кунун бештар аз 100 кас аз кишварҳои дигар ба Туркия истирдод шудааст.

Президенти мактаби байналмилалии "Сапат" шаби 1 июн дар Қирғизистон нопадид шуд. Мошини ӯро дар роҳ пайдо карданд. Писари Инон гуфт, он шаб падараш занг зада гуфтааст, дар роҳ ба сӯи хонаашон мебошад.

Орхан Инон зодаи Туркия ва яке аз бунёдгузорони шабакаи мактабҳои "Сапат"-у донишгоҳи "Отатурк Ала-Тоо" мебошад. Ӯ шаҳрвандии Қирғизистонро дорад.

Дар Узбекистон се наврас ронандаи таксиро бераҳмона куштаанд

Узбекистон. Акс аз бойгонӣ.

Мақомоти ҳифзи ҳуқуқи Фарғонаи Узбекистон чаҳор нафареро дастгир карданд, ки ба куштори бераҳмонаи ронандаи 45-солаи таксӣ айбдор мешаванд. Се нафари онҳо наврас мебошад.

Додситонии кулли Узбекистон гуфт, дар робита ба ин ҳодиса бо бандҳои "Куштори барқасдона бо маслиҳати пешакӣ" ва "Ғоратгарӣ, ки боиси расонидани зарари сахти ҷисмонӣ мешавад", парванда боз шудааст.

Ба иттилои манбаъ, чаҳор нафар, аз ҷумла се навраси аз 16 то 17-сола шаби 20 июл, тақрибан соатҳои 2:00 маслиҳат кардаанд, ки таксиеро даъват карда, ба ҷои беодам мебаранд ва ронандаи онро кушта, амволашро ғорат менамоянд. Онҳо ба ширкати Eva Taxi дар Фарғона занг зада, барои рафтан ба ноҳияи Кувин таксӣ фармоиш додаанд.

Соати 2:58 ба назди онҳо ронанда А. А. (соли таваллудаш 1975) бо мошини навъи Nexia-3 ҳозир шуда, барои интиқоли гумонбарон то ба обанбори "Каркидон" розӣ шудааст. Ҳангоми наздик шудани мошин ба заминҳои хоҷагии деҳқоние онҳо ба ронанда ҳамла карда, ӯро куштаанд.

Гумонбарон мошин, 50 ҳазор сӯм ва телефони "Xiaomi Mi Note Pro"-и ронандаро рабудаанд.

Насрин Сутуда барои панҷ рӯз аз зиндон раҳо шуд

Насрин Сутуда

Насрин Сутуда, ҳомии ҳуқуқи башар дар Эронро, ки се сол боз зиндонист, барои муолиҷа панҷ рӯз аз маҳбас ҷавоб додаанд. Ин иқдом пас аз он рӯйи даст гирифта шуд, ки дар бораи бад шудани вазъи саломати ӯ дар зиндон гузоришҳо нашр шуд.

Ризо Хандон, шавҳари Насрин Сутуда, дар бораи озодии муваққатии ӯ хабар дод. Фаъолони эронӣ бо нигаронӣ аз вазъи саломати Насрин Сутуда, хоҳони раҳоии ӯ аз зиндон шуданд.

Сутуда бо гуноҳи ҷосусӣ, таблиғоту тавҳин ба зидди раҳбари олии Эрон дар соли 2018 ба 38 сол зиндон ва 148 шаллоқ маҳкум шуд.

Ӯ дар охирҳои соли гузашта барои муддати кӯтоҳ аз банд раҳо гардид, вале дар аввали соли 2021 дубора ба зиндон рафт.

Толибон иддао доранд, ки 90% аз марзҳои Афғонистон ба дасти онҳост

Сухангӯйи гуруҳи Толибон рӯзи 22-юми июл ба расонаҳои Русия гуфтааст, Толибон 90 дарсад аз марзҳои Афғонистонро дар ихтиёр доранд.

Дар ҳоле ки берун рафтани нерӯҳои хориҷии зери раҳбарии Амрико аз Афғонистон дар остонаи анҷомёбист, ҷангҷӯён дар саросари ин кишвар ба "пешрафтҳои худ" идома медиҳанд.

Забеҳуллоҳ Муҷоҳид ба хабаргузории РИА Новости гуфтааст, "марзҳои Афғонистон бо Тоҷикистону Узбекистон, Туркманистон ва Эрон, ё тақрибан 90 дарсади сарҳадҳо, таҳти назорати мо ҳастанд." Тасдиқи мустақилонаи ин иддао феълан номумкин аст.

Даъвои Муҷоҳид як рӯз баъди он садо дод, ки генерали амрикоӣ гуфт, Толибон нисфе аз тақрибан 420 маркази ноҳияҳои кишварро зери назорат доранд. Марк Милли, раиси ситоди муштараки артиши Амрико, 21-уми июл гуфт, "пирӯзии ҷангҷӯён аз эҳтимол дур аст”.

Илова ба ин, Милли гуфт, ҷангҷӯён ҳеч яке аз шаҳрҳои асосии Афғонистонро зери назорат надоранд ва нерӯҳои ҳукуматӣ барои муҳофизат аз сокинони шаҳрҳои бузург "муттаҳид мешаванд".

Вазорати адлия хост, Иттиҳоди рӯзноманигорони Беларус баста шавад

Борис Гаретский, муовини раиси Иттиҳоди рӯзноманигорони Беларус

Вазорати адлияи Беларус дар пасманзари афзоиши фишорҳо ба расонаҳо ва ҷомеаи шаҳрвандӣ талош дорад, ки Иттиҳоди рӯзноманигорони он кишварро бандад.

Ин ниҳод 21-уми июл аз Додгоҳи олии Беларус расман дархост кардааст, ки Иттиҳоди рӯзноманигорони он кишварро барои "батакрор поймол кардани қонун" барҳам диҳад.

Дархости мазкур пас аз он сурат гирифта, ки мақомоти Беларус як ҳафта пеш дафтари Иттиҳоди рӯзноманигоронро кофтукоб ва 20-уми июл ҳисобҳои бонкии онро бастанд.

"Маълум аст, ки ин як маъракаи шадиди таъқибгароёна ба зидди Иттиҳод мебошад", -- гуфтааст муовини раиси Иттиҳоди рӯзноманигорони Беларус Борис Гаретский.

Вазорати адлияи Беларус дархости худро чунин шарҳ дода, ки Иттиҳод талаботро дар бораи пешниҳоди як қатор санадҳои марбут ба иҷораи коргоҳҳояш иҷро накард. Аммо масъулони Иттиҳод мегӯянд, вазорат ба онҳо вақти кофӣ надод, то санадҳоро омода ва пешниҳод кунанд.

Дархости барҳам додани Иттиҳоди рӯзноманигорон дар пасманзари афзоиши фишори Минск ба расонаҳои мустақил сурат мегирад. Ба иттилои Иттиҳод, дар давоми як ҳафтаи охир дар Беларус 66 коргоҳи расонаву хонаи рӯзноманигор кофтукоб ва 32 хабарнигор ҳабс шудааст.

Дар Қирғизистон эмкунии сокинон бо ваксинаи AstraZeneca оғоз шуд

Пизишкон дар Қирғизистон рӯзи 22-уми июл эмкунии сокинонро бо ваксинаи AstraZeneca оғоз карданд.

Гулбара Ишенаписова, як масъули Вазорати тандурустии Қирғизистон, ба бахши қирғизии Радиои Озодӣ хабар дод, ки қарор аст, охирҳои моҳи июл дар доираи барномаи COVAX 220 ҳазор моя ваксинаи AstraZeneca бигиранд.

Пештар Озарбойҷон ҳамчун кумаки башардустона ба Қирғизистон 40 ҳазор моя ваксинаи AstraZeneca дода буд. То ин дам сокинони Қирғизистон бо ваксинаҳои Sinopharm ва Sputnik V зидди коронавиру эм мешуданд.

Захираи Қирғизистон дар ҳоли ҳозир ба беш аз 1 миллион моя мерасад. Қирғизистон эмкунӣ ба зидди коронавирусро 29-уми марти соли равон оғоз кард ва то ҳол беш аз 391 ҳазор шаҳрванди он кишвар ваксина гирифтаанд.

Коргардони маросими ифтитоҳи Бозиҳои Токио барои шӯхияш дар бораи Ҳолокост барканор шуд

Вазири олимпии Ҷопон, Сэйко Ҳашимото

Коргардони маросими ифтитоҳи Бозиҳои тобистонаи олимпӣ дар шаҳри Токио Кэнтаро Кобаясӣ дар пайи баҳсҳо атрофи як шӯхияш дар мавзӯи Ҳолокост дар соли 1998, ки сабти он ахиран дар Интернет нашр гашт, аз мақоми худ барканор шуд.

Дар ин бора кумитаи тадорукотии Бозиҳои олимпӣ дар Токио хабар дод.

"Тавре маълум шуд, Кобаясӣ дар гузашта дар баромадҳояш як қисмати ғамангези таърихро масхара кардааст", - гуфт вазири олимпӣ Сэйко Ҳашимото. Худи коргардон барои суханҳои 30 сол пешаш узр пурсида, эътироф кардааст, ки ҳарфҳои ӯ номуносиб буданд ва пушаймон аст.

Дар Интернет ахиран наворе нашр шуд, ки нишон медиҳад Кобаясӣ дар ҳайати гуруҳи ҳаҷвнигор пешниҳод мекунад, ки Ҳолокостро "бозӣ кунанд". Вай коғазпораҳоеро, ки дар онҳо акси намояндагони қурбониёни қатли ом кашида шудааст, ба ҳар тараф мепартояд.

Чанд рӯз пеш оҳангсози маросими ифтитоҳи Бозиҳои олимпӣ Кэйго Оямадаи 52-сола ҳам аз мақомаш истеъфо дода буд. Ин тасмими Оямада ба як мусоҳибааш рабт дошт, ки дар он мегӯяд, дар айёми мактабӣ ҳамсинфони маъюбашро масхара кардааст.

Номи 10 қурбонии офати табиӣ дар Панҷакент эълон шуд. Ду занро ҳанӯз наёфтаанд. ВИДЕО

Сел дар Панҷакент боис ба марги 12 кас шуд. Ҷустуҷӯйи ду ҷасад идома дорад
лутфан мунтазир бошед

Феълан кор намекунад

0:00 0:03:23 0:00

Идораи ҳолатҳои фавқулода дар Суғд ҷузъиёти сели 19-уми июл дар шаҳри Панҷакент ва номи даҳ қурбонии офати табииро эълон кард. Аммо мақомот гуфтанд, ду занро, ки эҳтимол ҳангоми омадани сел нопадид шудаанд, то ҳанӯз наёфтаанд. Офати табиӣ рӯзи 19-уми июл дар ноҳияҳои Айниву Кӯҳистони Мастчоҳ ва Деваштич низ чандин хонаву роҳро вайрон кардааст.

Зиён аз офати табиии маргбор дар вилояти Суғд ҳисоб мешавад
лутфан мунтазир бошед

Феълан кор намекунад

0:00 0:02:52 0:00

Номи онҳое, ки ҳангоми омадани сел дар Панҷакент қурбон шудаанд:

  • Мусаллама Эгамбердиева, 1968
  • Ором Эралиева, 1959
  • Парвина Исмоилова, 1989
  • Сафина Исмоилова, 2010
  • Эзоҳ Исмоилов, 2011
  • Озод Исмоилов, 2015
  • Нигина Исмоилова, 2017
  • Ҳасан Исмоилов, 2018
  • Сабрина Исмоилова, 2005
  • Ҳабиб Ёқубов, 2002.

Инҳо сокинони деҳаи Киштудаки ҷамоати Ёрии Панҷакент буда, 7 нафар узви як оила мебошанд. Мақомот мегӯянд, дар умум ҳангоми омадани сел дар Панҷакент дувоздаҳ кас қурбон шуданд, вале ҷасади ду нафари онҳоро ҳанӯз наёфтаанд.

Як қурбонӣ дар Айнӣ

Он рӯз дар Урметану Вашанги ноҳияи Айнӣ дар натиҷаи борони сел чандин қитъаи роҳ, хатти барқу оби ошомиданӣ ва пули мошингузар вайрон шудааст. "Ҳангоми бартарафсозии пайомадҳои офати табиӣ дар Патруддарё ҷасади Боронбой Боронови 64-сола ёфт шуд", -- гуфтанд дар идораи ҳолатҳои фавқулодаи Суғд.

Рӯзи 19-уми июл ноҳияҳои Кӯҳистони Мастчоҳ ва Деваштич ҳам шоҳиди боронҳои шадид ва омадани сел буданд, ки ба гуфтаи мақомот, "хисороти молӣ дар пай дошт". Тибқи иттилои Идораи ҳолатҳои фавқулода, ҳоло кумисюни вижа ба таҳқиқи зарари расида аз офати табиӣ оғоз кардааст.

Дар гузашта дар чунин мавридҳо мақомот асосан сокинонро ба беэҳтиётӣ ва мардум мақомотро ба бепарвоӣ гунаҳкор кардаанд.

Анвар Қосимов, муовини сардори Идораи ҳолатҳои фавқулода дар Суғд, гуфт, дар шимоли Тоҷикистон тақрибан сесад мавзеи хатарнок вуҷуд дорад, ки ноҳияҳои Ашту Деваштич, Ҷаббор Расулов, Спитамен, шаҳри Исфара ва водии Зарафшон аз ҷумлаи онҳо ҳастанд.

Ба иттилои расмӣ, дар нимаи аввали имсол дар Суғд беш аз 330 ҳолати фавқулода сабт гардидааст, ки бар асари онҳо 67 кас ҷони худро аз датс додаанд. Зиёни расида тақрибан 22 милион сомонӣ, муодили наздик ба 2 миллион доллари амрикоӣ, ҳисоб шудааст.

Тоҷикистон яке аз кишварҳои осебпазир дар баробари фалокатҳои табиист. Аз аз соли 1992 то соли 2020, обхезиву селу заминларза ва лағжиши хок ба 7 миллион нафар осеб ва ба иқтисоди кишвар тақрибан 2 миллиард доллар зарар расондааст.

Амрикову Олмон дар мавриди "Ҷараёни Шимол-2" ба созиш расиданд

Сохтмони "Ҷараёни шимол - 2" дар ибтидои соли 2021 дубора шурӯъ шуд

Иёлоти Муттаҳид ва Олмон дар мавриди такмили тарҳи "Ҷараёни шимол - 2" бидуни таҳримҳои амрикоӣ ба созиш расиданд. Дар ин бора муовини котиби давлатии Амрико Виктория Нуланд хабар дод.

Ба гуфтаи ӯ, Вашингтон ва Берлин тамдиди созишномаи транзити гази русиро тавассути қаламрави Украина барои 10 сол ҳосил хоҳанд кард. Муҳлати созишномаи мавҷуда соли 2024 ба поён мерасад.

Нуланд гуфт, Амрико ва Олмон талош меварзанд, ки вобастагии иқтисодии Украина аз транзит ва интиқоли гази русӣ кам гардад. Ба ҷуз ин, мақомоти Олмон талош мекунанд, дар сурате, ки агар Русия захираҳои энержиашро барои фишор ба кишварҳои дигар истифода кунад, зидди Маскав таҳримҳои нав ҷорӣ шавад.

Владимир Путин, президенти Русия, дар гуфтугӯи телефонӣ бо Ангела Меркел, садри аъзами Олмон дар мавриди ба охир расидани сохтмони "Ҷараёни шимол - 2" изҳори қаноатмандӣ кард.

Сохтмони "Ҷараёни шимол - 2" соли 2016 шуруъ шуд. Интизор мерафт, лӯлаи мазкур дар охири соли 2019 мавриди истифода қарор гирад. Васли лӯлаҳо моҳи декабри соли 2019 дар пайи таҳдиди таҳримҳои Амрико барои як сол боздошта шуд.

Ибтидои соли 2021 сохтмони "Ҷараёни шимол - 2" дубора шуруъ шуд.

Ҳукумати Амрико мегӯяд, лӯлаи мазкур ба амнияти энержии Иттиҳоди Аврупо ва Украина хатар дорад. Дар иваз Вашингтон ба Аврупо захираҳои энержии худро пешниҳод карда буд.

Идигул Қосимзода даргузашт. Манбаъ: "Аз COVID ранҷ мекашид". Сабаби расмии фавт эълон нашуд

Идигул Қосимзода аз моҳи марти соли 2020 узви Маҷлиси Намояндагон буд

Идигул Қосимзода, вакили порлумони Тоҷикистон ва раиси собиқи Кумитаи кор бо занон, рӯзи 22-юми июл дар синни 53-солагӣ даргузашт.

Баъзе аз ҳамкорони собиқаш ба "Озодӣ" гуфтанд, Қосимзода чанд рӯзи охир бо нишонаҳои монанд ба бемории ҳамагир дар шифохонаи "Советский 1" дар Душанбе бистарӣ буд.

Як масъули Маркази тиббии рақами яки шаҳри Душанбе, маъруф ба "Советский 1", рӯзи 22-юми июл ба Радиои Озодӣ гуфт, "Идигул Қосимзода гирифтори коронавирус шуда буд ва чаҳор рӯз пеш ӯро дар ҳолати вазнин ба беморхона оварданд."

"Дар аввал дар шароити хона табобат гирифта, ба беморхона рафтанро қабул накардааст. Баъдан, ки ҳолаш вазнин шуд, ба беморхона оварданд. Дар зери дастгоҳи нафасдиҳии сунъӣ гузоштем. Хеле талош кардем, аммо наҷот дода натавонистем. Вирус шушашонро тамом карда буд", -- афзуд мусоҳиби мо бо шарти зикр нашудани номаш.

Ин пизишк ҳамчунин гуфт, ҷасади Идигул Қосимзодаро аз беморхона гирифта, ба зодгоҳаш ноҳияи Вахш бурдаанд. Қосимзода дар баробари дигар вакилони Маҷлиси намояндагон, ваксинаи зидди COVID-19 гирифта буд.

Сабаби расмии марги ӯ то ҳанӯз эълон нашудааст.

Идигул Қосимзода аз моҳи марти соли 2020 узви Маҷлиси Намояндагони Тоҷикистон буд. Аз он пеш, тақрибан чаҳор сол, ҳамчун раиси Кумитаи кор бо занон ва оилаи назди ҳукумати Тоҷикистон кор кард.

Дар замони раҳбарии ӯ номи Кумитаи занон вобаста ба қарору чораҳои мухталиф ва гоҳе баҳсбарангез бисёр расонаӣ шудааст. Яке аз ин танқидҳо ба ташкили амалиёти "фаҳмондадиҳӣ ба занон" дар бораи "фарҳанги либоспӯшии миллӣ" рабт дошт.

Қосимзода моҳи январи соли 2020 дар суҳбат бо Озодӣ гуфта буд, ки ӯ "тарғиби фарҳанги миллии либоспӯширо ҳадаф қарор дода" буд.

"Дар тӯли се сол аксарият нафаҳмиданд. Соли чорум баъд гуфтанд, ки раиси Кумитаи кор бо занон намегӯяд, ки Шумо дигару дигар пӯшед, танҳо талқин дорад, ки тоҷикона пӯшед", -- афзуда буд ӯ.

Идигул Қосимзода дар гузашта дар мансаби раиси Донишкадаи забонҳо ба номи Сотим Улуғзода низ кор кардааст.

Масҷиди калонтарини Тоҷикистонро кай ба истифода медиҳанд?

Мақомот мегӯянд, ин масҷиди бузургтарин дар Осиёи Марказӣ хоҳад буд

Сохтмони масҷиди калонтарини Тоҷикистон бо сармояи Қатар "пурра ба охир расида", аммо замони ба истифода доданаш ҳанӯз мушаххас нест.

Сулаймон Давлатзода, раиси Кумитаи дин, танзими анъана ва ҷашну маросими миллии Тоҷикистон, рӯзи 22-юми июл гуфт, "вазъи беҳдоштӣ сафари меҳмононро аз Қатар ба таъхир гузошт. Лоиҳа дуҷониба аст. Ҳангоми ба истифода доданаш бояд тарафи дигари ҳам иштирок кунад."

Масҷиди бузургтарин дар Тоҷикистон дар майдони 12 гектар замин ҷойгир шуда, аз чаҳор манораи баландиашон 65-метрӣ, гунбази 47-метрӣ, толори бузург, толорҳои хурди намозгузорӣ, китобхона ва нишеману утоқҳои сершумор барои ҷаласаҳо иборат аст.

Сохтмони масҷидро соли 2009, дар рӯзҳои таҷлил аз 1310-солагии Имоми Аъзам, пешвои мазҳаби ҳанафӣ оғоз карда буданд.

Дар гузашта мақомот мегуфтанд, сармоягузори асосии тарҳ Қатар аст, ки барои сохтмони он 70 миллион доллар ҷудо кард. Тоҷикистон ҳам гуфт, барои бунёди ин масҷид 30 миллион доллар додааст.

Бунёди масҷиди бузургтарин дар ҳолест, ки созмону кишварҳои ғарбӣ ба камияш даҳ соли охир Тоҷикистонро барои бастани баъзе ибодатхонаҳо ва маҳдуд кардани озодиҳои динии сокинон танқид мекунанд. Мақомот ҳамвора тасмимҳои худро барои пешгирӣ аз ифротгароӣ муҳим хондаанд.

Литва метавонад, муҳоҷирони ғайриқонуниро ним сол нигаҳ дорад

Паноҳҷӯён дар Литва

Гитанас Науседа, президенти Литва, тағйиротро ба қонун дар бораи вазъи ҳуқуқии хориҷиён имзо кард. Ин тарҳи қонун дар пайи буҳрони марбут ба муҳоҷирони ғайриқонунӣ таҳия шуд.

Тағйироти нав муҳлати баррасии дархости паноҳандагиро то 10 рӯз кам ва муҳоҷиронро аз ҳаққи шикоят кардан аз болои посухи рад маҳрум месозад.

Ба ҷуз ин, дархосткунандагони паноҳандагиро метавонанд, то 6 моҳ ба ҳабс гиранд ва иҷозаи тарки иқоматгоҳи муваққатро надиҳанд.

Литва ахиран хабар дод, теъдоди муҳоҷироне афзудааст, ки тавассути қаламрави Белорусу вориди Иттиҳоди Аврупо мешаванд. Бештари муҳоҷирон ба Минск аз Туркияву Ироқ меоянд.

Ҳукумати Литва мегӯяд, Минск аз фирориён ҳамчун василаи фишори сиёсӣ ба Иттиҳоди Аврупо истифода мекунад. “Ин фишорҳо дар посух ба таҳримҳои зидди ҳукумати Александр Лукашенко ҳастанд”, -- мегӯянд дар ҳукумати Литва.

Аз Қазоқистон хостанд, хабари рахнашавии телефонҳои сокинонашро таҳқиқ кунад

Барномаи Pegasus имкон дорад, тавассути паёмакҳои одӣ вориди телефон шавад

Бунёди байналмилалии ҳимоят аз озодии баён ва Иттиҳоди рӯзноманигорони Қазоқистон ба таҳқиқи хабари эҳтимоли рахна шудани телефони сокинони ин кишвар тавассути барномаи ҷосусии "Pegasus" даъват карданд.

Созмонҳо ҳамчунин талаб кардаанд, номи ҳамаи қазоқистониҳое фош карда шавад, ки эҳтимол меравад, телефонҳояшон рахна шудааст, то "имкони муроҷиат барои ҳимоят аз ҳуқуқи конститутсионии худро дошта бошанд". Ҳомиёни ҳуқуқ сахттар кардани ҷазо барои ифшои маълумоти шахсиро ҳам хостор шудаанд.

Маркази пажуҳиши фасод ва ҷиноятҳои созмонёфта (OCCRP) рӯзи 20-уми июл рӯйхати нави қазоқистониҳоеро нашр кард, ки телефонҳояшон бо барномаи ҷосусии "Pegasus" (Пегасус) рахна гаштааст. Дар ин рӯйхат ҳамакнун президенти Қазоқистон Қосимҷомарт Тоқаев, сарвазири он кишвар Асакар Мамин ва ҳокими шаҳри Алмато Бакитҷон Сагинтаев шомил ҳастанд.

OCCRP менависад, рахна кардани телефони президент ва сарвазири Қазоқистонро эҳтимол мақомоти худи Қазоқистон супориш додаанд.

Ба ҷуз аз Қазоқистон, ба иттилои пажуҳишгарон, барномаи Pegasus-и ширкати NSO Group-ро мақомоти Озарбойҷон, Маҷористон, Мексика, Баҳрайн, Ҳинд, Индонезия, Марокаш, Руанда, Ҷумҳурии Конго, Арабистони Саудӣ - дар маҷмуъ наздики 50 давлат истифода кардаанд.

Барномаи Pegasus имкон дорад, тавассути паёмакҳои одӣ вориди телефон шуда, маълумотро рабояд ва муколамаҳоро хонад.

Мақомоти узбек ҷорӣ шудани соати комендантиро дар Тошканд рад карданд

Сухангӯи Вазорати адлияи Узбекистон Севара Уринбоева гуфт, хабари манъ шудани гаштугузори сокинон дар кӯчаҳои шаҳри Тошканд аз соати 20:00 то соати 8:00-и субҳ ҳақиқат надорад. Ба гуфтаи ӯ, шахсоне, ки ингуна хабари дуруғро паҳн мекунанд, ба ҷавобгарӣ кашида хоҳанд шуд.

Қонунгузории Узбекистон барои паҳн намудани хабари дуруғе, ки боиси сар задани воҳима хоҳад шуд, аз 66,9 то 89,2 млн сӯм ($6980-9306) ҷарима ё маҳрум шудан аз озодиро ба муҳлати аз 3 то 5 сол пешбинӣ мекунад.

Пештар дар гуруҳҳои узбекии паёмакрасони "Телеграм" хабарҳое паҳн шуд, ки гӯё дар пойтахти Узбекистон соати комендантӣ ҷорӣ шудааст. Рӯзҳои ахир вазъи марбут ба коронавирус дар Узбекистон бадтар шуда, бештари ҳолатҳои нави гирифторӣ ба он дар Тошканд ошкор гаштааст.

Теъдоди низомиёни фавтидаи туркман ба 30 кас расид

Артиши Туркманистон. Акс аз бойгонӣ.

Бархе аз ҷузъиёти марги 18 низомӣ дар Туркманистон дастраси расонаҳо шуд. Хешовандони фавтидагон гуфтанд, сабаби марги онҳо садамаи нақлиёт будааст. Манобеъ гуфтанд, дар он ҳодиса на 18, балки 30 низомӣ фавтидааст. "Ҳангоми аз нишебӣ фуруд омадан ронандаи КамАЗ аз уҳдаи идораи нақлиёт набаромада, бо суръати баланд ба мошине бархурдааст, ки аз муқобил меомад", - гуфтанд манобеъ. Дар пайи ин ҳодиса ҳамчунин 20 каси дигар дар бемористон бистарӣ шудааст. Ин ҳодиса рӯзи 18 июл рух дод.

Хоҷазода: Тоҷикистону Узбекистон дар масъалаи марз мушкил надоранд

Марзи Тоҷикистону Узбекистон

Раиси Кумитаи давлатии идораи замин хабар дод, ки нишонагузории марзи Тоҷикистону Узбекистон тақрибан ба поён расидааст. Ориф Хоҷазода рӯзи 21-уми июл ҳангоми нишасти хабарӣ дар Душанбе гуфт, Тоҷикистону Узбекистон 1326 километр марз доранд ва аз он 1319 километраш пурра муайян шудааст.

Хатти сарҳади боқимонда, ба гуфтаи раиси Кумитаи замин, қисматҳое ҳастанд, ки Тоҷикистону Узбекистон ва Қирғизистонро бо ҳам мепайвандад.

“Нисбат ба ин масъала аз 1 то 3-уми май дар Фарғона вохӯрӣ гузашт. Се кишвар пешниҳодҳои худро барои омӯзиш пешниҳод карданд. Барои ҳамин, агар ин нуқтаҳо муайян шаванд, ба пуррагӣ хатти сарҳад бо Узбекистон муайян мегардад”, -- шарҳ дод раиси Кумитаи идораи замини Тоҷикистон.

Узбекистон дар замони роҳбарии Ислом Каримов, президенти пешини ин кишвар, омодаи баррасиву имзои созишномаи марзӣ бо Тоҷикистон набуд. Танҳо баъди ба қудрат расидани Шавкат Мирзиёв ва сафари давлатии ӯ ба Тоҷикистон дар моҳи марти соли 2018, Душанбе ва Тошканд дар масъалаи аломатгузории марз ба созиш даст ёфтанд. Аз ҷумла, бар асоси ин созиш ду кишвари ҳамсоя аҳд карданд, обанбори “Фарҳод”-ро барои тақрибан ним асри дигар ҳамроҳ истифода баранд.

Ориф Хоҷазода, раиси Кумитаи давлатии идораи замин, рӯзи 21-уми июл дар посух ба суоли хабарнигори Радиои Озодӣ гуфт, дар минтақаи обанбори “Фарҳод2 як минтақаи хурде мондааст, ки делимитатсия нашудааст. Вале афзуд, “нисбат ба истифодабарӣ байни ду давлат шартнома вуҷуд дорад ва ягон баҳс дар миён нест.”

Тӯли 25 соли охир тасвиб нашудани қарордоди марзии миёни Тоҷикистону Узбекистон ба баҳсҳо дар атрофи моликияти ин нерӯгоҳ марбут буд. Тошканд даъво дошт, ки ин нерӯгоҳ моли Узбекистон аст ва Душанбе иддао мекард, он дар қаламрави Тоҷикистон воқеъ аст. Маҳз рӯшан набудани сарнавишти ин нерӯгоҳ, ба эътиқоди соҳибназарон, яке аз сабабҳои аслии мушкили марзии миёни Тоҷикистону Узбекистон будааст.

Ёфтҳои бештар

XS
SM
MD
LG