Мақомоти Тоҷикистон шояд ба зудӣ барои воридоти аккумулятор ва батареяҳои барқӣ ба кишвар аз соҳибкорон "пардохти нобудсозӣ" ё утилизатсия ситонанд. Қонун дар ин бора ҳафтаи гузашта дар нишасти Маҷлиси намояндагон қабул шудааст. Пардохтро ҳангоми воридоти ҳама навъи аккумуляторҳо, аз ҷумла батареяҳои мошинҳои барқӣ меситонанд, аммо батареяҳои телефон ва соатҳо истисно шудаанд.
Хуршед Каримзода, сардори Хадамоти гумруки Тоҷикистон, зимни муаррифии лоиҳаи қонун "Дар бораи дигар пардохтҳои ҳатмӣ ба буҷет" дар парлумон гуфтааст, ки ҳадаф аз ин кор "таъмини амнияти экологӣ ва пешгирӣ аз зарари партовҳои хатарнок аст.»
Ба гуфтаи ӯ маблағ ҳангоми расмиёти гумрукӣ ва як маротиба ситонида мешавад ва ба буҷаи давлат меравад. Тибқи тарҳ, ҳаҷми пардохтҳо вобаста ба вазни аккумулятор муқаррар шудааст.
Масалан агар аккумулиятор аз 0,5 кило то 10 кило бошад, 37,5 сомонӣ пардохти ҳатмӣ хоҳад дошт. Барои воридоти аккумуляторҳои бештар аз 10 ва то 30 килограм 75 сомонӣ меситонанд ва агар аз 30 кило бештар бошад, пардохти он сари ҳар килограм 2.6 сомонӣ хоҳад буд. Ба ин феҳраст, аккумуляторҳои мошин, батареяҳои электромобилҳо ва дастгоҳҳои захиракунандаи нерӯи офтобиву бодӣ шомиланд.
Хуршед Каримзода гуфтааст, ки барои "наовардани сарбории иловагӣ ба мардум", дастгоҳҳои вазнашон то ним кило аз ин пардохт озод карда шудаанд ва манзур батареяҳои телефонҳои мобилӣ, ноутбук ва планшетҳо ва батареяҳои хурди дигар барои бозичаву абзорҳои электронист.
Дар ҷаласаи порлумон гуфтаанд, ки таҷрибаи ситонидани боҷ барои нобудсозии аккумуляторҳо дар дигар кишварҳои муштаракулманофеъ низ роиҷ аст. Ҳоло маълум нест, ки ин тасмим то чӣ андоза ба нархи аккумуляторҳо дар бозорҳои Тоҷикистон таъсир мерасонад, аммо бешак онҳоро боло хоҳад бурд.
Ҳукумати Тоҷикистон 26-уми феврали имсол, пардоҳти нобудсозӣ ва ё "утилизатсия"-и ҳамаи мошинҳоро боло бурд, ки сабаби нигаронии зиёди соҳибкорону мардум шуд. Барои намуна, соҳибони мошинҳои сабукрав ҳоло бояд 10 ҳазору 800 сомонӣ пардозанд. Афзоиши пардохтҳоро он замон дар шабакаҳои иҷтимоӣ "як роҳи дигари пулканӣ" барои буҷа хонда буданд.
