Дар гузориш омадааст, ки тайи як соли ахир вазъи озодиҳои мазҳабӣ зиёд тағйир нахурдааст, ҳукумат чун пештара фаъолияти гурӯҳҳои мазҳабиро таҳти назорат қарор дорад, то онҳо ба сиёсат ваё гурӯҳҳои ифротгаро напайванданд. Дар ин давра Кумитаи дини Тоҷикистон аз теъдоди зиёди масоҷиди бидуни иҷоза бунёдшуда хабар дод ва бархе аз онҳоро баст. Айни ҳол дар Тоҷикистон 2885 масҷид ва аз ҷумла 238 масҷиди ҷомеъ мавҷуд аст.
Дар гузориш омадааст, соли равон пайравони гурӯҳи сабти номнашудаи "Салафия" аз худ дарак доданд ва ба намозгузорӣ дар масоҷиди Душанбе ва Хатлону Суғд шурӯъ карданд. Дигар гурӯҳҳои мазҳабӣ ва ҳукумат дар баробари фаъолияти салафиён аз таҳаммул кор гирифтанд.
Ҳикматулло Сайфуллозода - узви раёсати Ҳизби Наҳзати Исломи Тоҷикистон мегӯяд, ҳарчанд ҷомеъа ин гурӯҳро таҳаммул мекунад, вале бархе аз мазҳабиён мутмаинанд, ки ҳадафи аслии ин гурӯҳ - барангехтани низоъ миёни мардуми суннимазҳаб аст:

Салафи солеҳин, яъне ҷонибдорӣ аз исломи замони ҳазрати Паёмбар, аз ҳамон исломи поку покиза. Назари ман ин аст, ки онҳо фақат номи худро Салафӣ гуфтаанд, манбаъ аз он ҷо манша мегирад, вале худи онҳо дастнишондаи гурӯҳҳое ҳастанд, ки маблағ пардохт мекунанд ва ворид мекунанд ба ҷомеъаи муслимин, ки як гуна ихтилоферо бар заминаи мазҳаби аҳли суннат ба вуҷуд оварад. Салафиҳо ҳамин аз ҳамин мазҳаб ҳастанд, метавонанд ҳанафӣ бошанд, шофеъӣ бошанд, моликӣ бошанд, вале пайравӣ аз ҳамон мактаби Салафӣ кунанд. Он гуна, ки Ҳизбуттаҳрир дастнишондаи Ғарб ҳаст, Салафия низ метавонад чунин як дастнишонда бошад.

Дар гузориши Бюрои масоили демократия, ҳуқуқи башар ва кори Иёлоти Муттаҳида омадааст, айни ҳол Кумитаи дини Тоҷикистон 84 гурӯҳи ҷонибдорони адёни дигарро сабти ном кардааст. Дар кишвар 230 ҳазор масеҳиён ба сар мебаранд ва бештари онҳо маросимҳои мазҳабии худро дар Калисои русӣ анҷом медиҳанд. Ҳамчунин дар Тоҷикистон панҷ ибодатгоҳи баптистҳо, ду калисои католикӣ, ибодатгоҳи протестантҳои куриёгӣ, ҳамчунин гурӯҳҳои Баҳоиён, зардуштиҳо, кришнаиҳо ва яҳудиён номнавис шудаанд. Бештари пайравони адёни дигар дар пойтахт ва шаҳрҳои бузурги Тоҷикистон ба сар мебаранд.
Ва аммо, тибқи гузориш, дар Тоҷикистон хушунат алайҳи намояндагони дигар адён низ мушоҳида мешавад. Аз ҷумла, соли равон ягона канисо ваё синагогаи яҳудиҳо дар маркази шаҳр тахриб шуд. Канисо дар минтақае ҷойгир буд, ки он ҷо Кохи Миллат бунёд мешавад. Шаҳрдорӣ барои канисо дар дигар минтақаи шаҳр замин ҷудо кард ва аммо бо далели он ки дин аз давлат ҷудост, аз пардохти маблағи ҷуброни бинои тахрибшуда сарпечӣ намуд.
Муаллифони гузориш ҳамчунин аз сарнавишти паноҳандагони масеҳиҳои Эрон ёд оварданд, ки зимистони соли 2005 ум ба кишвар омаданд. Мақомоти Тоҷикистон ба онҳо барои зист дар Душанбе иҷоза надоданд ва онҳо дар канори пойтахт мустақар шуданд. Паноҳандагон пайваста мавриди таҳдиди сокинони маҳаллӣ ва атфолашон дар мактаб мавриди таҳқир ва ҳатто лату кӯби ҳамсолонашон қарор мегирифтанд. Сафорати Эрон дар Тоҷикистон низ бо паноҳандагон бо лаҳни таҳдид ҳарф мезад. Ва аммо ҳукумат ин ҳамаро нодида мегирифт. Паноҳандагони иронӣ моҳи апрели соли равон бо кумаки барномаи муҳоҷирати ҳукумати Иёлоти Муттаҳида Тоҷикистонро тарк гуфтанд.
Дар гузориш оид ба вазъи озодиҳои мазҳабӣ дар Тоҷикистон омадааст, дар кишвар мубаллиғони дигар адён аз кишварҳои Ғарб ва Куриёву Ҳиндустону дигар мамолик низ ҳузур дорад, ҳарчанд теъдодашон бузург нест. Баъд аз истиқлоли Тоҷикистон, ба иттилоъи Кумитаи дин, ҳудуди 3 ҳазор нафар ба дини масеҳӣ ва дигар адён пайвастаанд. Ҳамзамон, тибқи гузориши Бюрои масоили демократия, ҳуқуқи башар ва кори Иёлоти муттаҳида, далелҳои ҷилавгирӣ аз фаъолияти мубаллиғони дигар адён низ мавҷуданд - аз ҷумла, моҳи майи соли равон кормандони милиса нӯҳ тан аз мубаллиғони гурӯҳи "Шоҳидони Иеҳова"-ро бо як мошин адабиёти таблиғотӣ боздошт карданд. Онҳо фақат баъди се чор соати бозпурсӣ раҳо шуданд. Ва аммо, дар маҷмӯъ, ба гуфтаи ҳамсӯҳбати мо Ҳикматулло Сайфуллозода, ҳукумат ба таблиғи мазҳабҳои дигар мухолиф нест.

Мубаллиғони адёни дигар ваё миссионерҳо дар Тоҷикистон зиёданд ва метавон гуфт, ки чунин як мушкил дар ҷомеъаи Тоҷикистон мавҷуд аст. Мақомоти ҳукуматро наметавон гуфт, ки ҷонибдор ҳастанд ё зидди ин кор. Дар баъзе маврид эҳсос мешавад, ки баъзе аз мақомот ба ин гуна таблиғот мухолифат доранд ва аммо дар маҷмӯъ Кумитаи дин дарро ба рӯи онҳо боз кардааст ва ҳавасмандӣ ҳам намоиш медиҳад, ки миссионерҳо бошанд, то ки коҳиш диҳанд нуфузи исломро дар ҷомеъаи Тоҷикистон. Аммо имрӯз ин Кумита, ки ба мушкил мувоҷеҳ шудааст, дар тарҳи ахиран таҳия ва ба ҳукумат пешниҳодшуда (тарҳи нави Қонуни дин ва созмонҳои мазҳабӣ - РО) маҳдудиятҳо дар робита ба ин мубаллиғон ҷой дода шудааст.

Ва аммо масъулони Кумитаи дини Тоҷикистон аз сӯҳбат дар мавриди он ки ба тарҳи қонуни нав чӣ гуна тағйирот ва аз ҷумла, кадом маҳдудиятҳо ворид шудаанд, сарпечӣ карданд. Муовини раиси кумита Тоҳир Рашидов ҳатто мавҷудияи ин гуна тарҳро инкор кард:

Ягон хел лоиҳа тайёр нашудааст, ба ягон ҷо пешниҳод нашудааст. Ягон хел лоиҳа ҳам нест, ягон қонун ҳам нест.

Ба иттилоъи Бюрои масоили демократия ва ҳуқуқи башари Иёлоти Муттаҳида, тибқи тарҳи Қонуни нави дин ва созмонҳои мазҳабӣ аз ҷумла, теъдоди намозгузороне, ки барои сабти номи масҷиди ҷомеъ зарур аст, боло бурда мешавад, ба атфоли то 7 сола омӯхтани дин мамнӯъ хоҳад шуд ва созмонҳои мазҳабӣ дар маросимҳои сиёсӣ ширкат нахоҳанд кард.
Дар гузориш ҳамчунин омадааст, ки Кумитаи дини Тоҷикистон ширкати шаҳрвандон дар маросими ҳаҷро таҳти назорати қатъӣ қарор дорад. Пеш аз сафар зоирин бояд дар Кумитаи дин сабти ном шаванд. Барои ҳар ноҳия, ба таври ғайрирасмӣ, теъдоди мушаххаси зоирон муқаррар шудааст ва аз ин рӯ мақомоти масъули сабти номи зоирин даст ба ришватхорӣ задаанд.
Бюрои масоили демократия, ҳуқуқи башар ва кори Иёлоти Муттаҳида ишора мекунад, ки дар Тоҷикистон дигар далелҳои помолшавии ҳуқуқи афроди мазҳабӣ низ ошкор шудаанд. Аз ҷумла, рад шудани бо ҳиҷоб барои шиноснома акс гирифтани занон. Кумитаи дини Тоҷикистон мегӯяд, ки теъдоди ин гуна занҳо андак аст. 19 октябри соли 2005 вазорати маорифи Тоҷикистон бо ҳиҷоб ба мактаб рафтани духтаронро манъ кард. Дар баъзе манотиқ духтарони ҳиҷобпӯшро аз мактаб хориҷ карданд. Ҳамзамон талошҳое барои аз масҷид дур кардани толибилмон низ сурат гирифтанд. Кормандони пулис толибилмонро дар даромадгоҳи масҷидҳо боздошт мекарданд. Дар гузориш гуфта мешавад, ин амали пулис бо изҳороти ҳукумат баста дошт, ки кудакон бояд давоми рӯз дар мактаб ба таҳсил фаро гирифта шаванд.
Муаллифони гузориш нигоштаанд, ки раиси ҷумҳури Тоҷикистон Эмомалӣ Раҳмонов аз ғояи давлати дунявӣ пуштибонӣ мекунад, ки ин вожа дар Тоҷикистон бештар чун "давлати зиддиифротгароӣ" ва "давлати ҷудо аз мазҳаб" ташреҳ мешавад. Дар ҳоле, ки бештари аҳолии кишвар худро мусалмон мехонанд, миёни ҳукуматдорон ва мардуми оддӣ ҳаросе аз ифтрогароии исломӣ ба чашм мерасад. Ва шояд аз ин ҷост, ки ҳукумат ба ҷуз, Қуръони Шариф, чопи дигар китобҳо бо ҳуруфи арабиро мамнӯъ эълон кардааст.

Тоҷикистон дар сарҳад бо Афғонистон, ки дар як моҳи охир шоҳиди дастикам ду ҳамла ва куштаву захмӣ шудани даҳ коргар аз Чин буд, чор дидбонгоҳи навро ба истифода додааст.

Вебсайти президент навишт, ки раисҷумҳур Эмомалӣ Раҳмон рӯзи 24-уми декабр дар ин маросим ба таври маҷозӣ ё онлайн ширкат кард.

Ба нигоштаи манбаъ, дидбонгоҳҳои сарҳадӣ дар минтақаи баландкӯҳ ва душворгузари сарҳад бо Афғонистон бори аввал сохта шудаанд. Минтақаҳое, ки қаблан ба таври зарурӣ муҳофизат намешудааст.

“Барои фаъолияти бемонеаи онҳо ба масофаи зиёда аз 70 километр роҳи нави мошингузар бунёд ёфта, дигар инфрасохтори ёрирасон низ фароҳам оварда шуд,” – гуфта шудааст дар хабар.

Солҳои охир, ба иттилои расмӣ, 80 дидбонгоҳи марзӣ сохта шуда, дар бунёди баъзе аз онҳо созмону кишварҳои гуногун саҳм гирифтаанд.

Дар ҳамин рӯз як майдони тонкронӣ дар тамрингоҳи Ҳарбмайдон низ фаъол шуд. Ҳарбмайдон дар наздикии сарҳад бо Афғонистон ҷойгир аст.

Тоҷикистон бо Афғонистон тақрибан 1400 километр марз дорад. Бо вуҷуди ваъдаҳои "Толибон" дар бораи истифода нашудани хоки Афғонистон аз сӯи гурӯҳҳои террористӣ, мақомоти тоҷик аз он тарафи марз нигаронӣ доранд. Ҷое, ки ба гуфтаашон қочоқчиёни маводи мухаддир ва ҷангҷӯён камин гирифтаанд.

Дар натиҷаи фурӯ рехтани теппаи азиме дар як маҳалли заршӯӣ дар ноҳияи Шамсиддини Шоҳин 2 нафар ҳалок шудаанд.

Манобеи огоҳ аз ҳодиса рӯзи 24-уми декабр ба Радиои Озодӣ гуфтанд, ки фалокат 20-уми декабр ҳангоми кор дар маҳалли Сари Ғор рух додааст. Дар онҷо чанд ширкат машғули заршӯӣ ҳастанд.

Як корбар низ видеоро ба Радиои Озодӣ фиристод ва ҳодисаро тасвир кард.

Бино ба гузоришҳо, чанд рӯз пештар аз ин ҳодиса дар маҳалли Шугнов дар ноҳияи Ховалинг, яке аз маҳалҳои бузурги заршӯӣ низ як нафар зери хок монда ҷон додааст.

Риоя накардани меъёрҳои амниятӣ ва беэҳтиётӣ ҳангоми корро яке аз сабабҳои асосии ҳалокати коргарон дар Тоҷикистон медонанд. Соли гузашта дар корхонаҳои саноатӣ ва истихроҷи маъдан 30 нафар кушта ва 26 каси дигар захмӣ шудаанд.

Як додгоҳи сайёр ҳафт занро аз ҷамоати Язгуломи ноҳияи Ванҷ ҷазо додааст.

Ҳукумати ноҳияи Ванҷ рӯзи 24-уми декабр дар саҳифааш дар Фейсбук хабар дод, ки онҳо ба "таълими ғайрирасмии динӣ" гунаҳкор ва аз кардаашон "пушаймон" ҳастанд.

Мавқеи занон маълум нест.

Дар аксҳое, ки мақомот нашр карданд, онҳо бо сари хам ва дар ҳузури як гурӯҳ аз сокинони ҷамоати Язгулом, муовини раиси ноҳияи Ванҷ, сардорони шуъбаҳои амнияту корҳои дохилӣ, додситон ва намояндаҳои дигари мақомоти қудратӣ тасвир ёфтаанд.

Додгоҳи сайёр занҳоро, ки ному насабашон ифшо нашудааст, бар асоси моддаи 474-и Кодекси ҳуқуқвайронкунии маъмурии Тоҷикистон ҷарима бастааст. Ин банди қонун аз 1125 то 1500 сомонӣ ҷаримаро пешбинӣ мекунад.

Шонздаҳ сол боз дар Тоҷикистон гирифтани таълими динӣ танҳо дар назди волидон ва ё муассисаҳои расмӣ, ба мисли Донишкадаи исломӣ иҷозат аст.

Созмонҳои ҳомии ҳуқуқ ҳамвора мақомоти Тоҷикистонро барои маҳдуд кардани озодиҳои динӣ танқид мекунанд. Намояндагони Кумитаи дин гуфтаанд, озодиҳои мазҳабӣ дар кишвар таъмин аст.

Ҷамояти Язгулом дар ноҳияи Ванҷ чанд соли охир дар пайванд ба боздошти сокинони он бо иттиҳоми ифротгароӣ дар сархати расонаҳо қарор дорад.

Ҳафтаи гузашта Қорӣ Зоҳид (Қувватов), сокини 30-солаи деҳаи Жамаки Язгулом, бо иттиҳоми ҳамкорӣ бо созмонҳои ифротгаро 5 сол зиндонӣ шуд. Аз ин пештар наздик ба 27 сокини ин ҷамоат боздошт ва бархеи онҳо ба солҳои гуногуни зиндон маҳкум гаштанд.

Дар Тоҷикистон аз ин пас барои шикори бабри барфӣ, як ҷонвари зебои нодир дар кишвар, мумкин аст, гунаҳкорро то ба 8 сол зиндон маҳкум кунанд.

Бабр, ё паланги барфӣ, ки онро паланги осиёимиёнаӣ меноманд, дар кӯҳистонҳои Помир дар Тоҷикистон сукунат дорад ва ҷонвари дар вартаи нобудӣ аст.

Дар Кодекси ислоҳшудаи ҷиноӣ, ки раисҷумҳур Эмомалӣ Раҳмон рӯзи 17-уми декабр имзо кардааст, барои фурӯхтани паланги барфӣ ҳам ҷазо таъйин шудааст.

Бар асоси Кодекси пешинаи ҷиноӣ барои шикору куштани ин ҷонвари зебо аз 3 то ба 5 сол ҷазо медоданд. Бар асоси санади нав, барои шикору куштану фурӯхтани бабрӣ барфӣ аз соли оянда ҷаримаҳои бузурги то 220 000 сомонӣ ва 8 сол зиндон пешбинӣ шудааст.

Дар Тоҷикистон теъдоди бабри барфӣ, ё осиёмиёнаӣ андаке афзуда, аз марзи 500 сар гузаштааст.

Агарчӣ то кунун гузорише дар бораи шикори бабри барфӣ дар Тоҷикистон нарасидааст, ҳамлаи онҳо ба чорвои мардум дар Бадахшон ва видеоҳои дастгиру озор додани онҳо дида шудааст.

Танг кардани муҳити зисти ин ҷонваронро, ки фақат дар 12 кишвар боқӣ мондаанд, як сабаби барои шикор ба хонаҳои мардум омадани онҳо медонанд.

Вазорати корҳои дохилии Тоҷикистон аз як ҷинояти мудҳиш ва ё қатли падар ба дасти писар хабар дод.

Вазорат рӯзи 23-юми декабр бо нашри баёнияе гуфт, як падари 69-сола ва писари 40-солааш зоҳиран ҳангоми сархушӣ бо ҳам ҷангу даъво кардаанд, ки бо фоҷиа поён ёфтааст.

Ба иттилои вазорат, ҳодиса рӯзи 20-уми декабр дар ноҳияи Ишкошим дар Вилояти Мухтори Кӯҳистони Бадахшон рух додааст.

Дар баёния омадааст, падар ҳангоми даъво бо белча ба дасти писараш зад ва писари хашмгин дар ҷавоб падарро бо чангаки оҳанин кӯфт, ки “ӯ рӯи оташдон афтода баъд аз чанд соат ҷон дод”.

Ному насаби падару писарро зикр накардаанд ва назари муттаҳам ба ҷиноят ҳам маълум нест, ки ҳоло дар боздошт аст.

Дар Тоҷикистон қатли падар ба дасти писар аҳёнан рух медиҳад ва ҷинояте ғайриқобили тасаввур дониста мешавад.

Доналд Трамп, раисҷумҳури Амрико президентҳои Узбекистон ва Қазоқистон Шавкат Мирзиёев ва Қосимҷомарт Тоқаевро ба ҳамоиши кишварҳои бистгона ё G-20, даъват кард.

Президенти ИМА бо раҳбарони ин ду кишвари Осиёи Марказӣ телефонӣ сӯҳбат карда, онҳоро барои ширкат дар саммити "бистгонаи бузург", ки соли оянда дар Майамии Амрико баргузор мешавад даъват намуд.

Трамп дар шабакаи Truth Social навиштааст, ки дар дар ин гуфтугӯҳо масъалаи "тавсеаи ҳамкорӣ миёни ин кишварҳоро баррасӣ кардаанд".

Маъмурияти Тоқаев гуфтааст, сӯҳбати телефонии Трамп бо Тоқаев "давомдор" буд.

Доналд Трамп барои иҷрои созишномае, ки моҳи ноябр дар доираи ҳамоиши "Осиёи Марказӣ - ИМА" тасвиб шуд, изҳори омодагӣ кардааст.

Дар сомонаи раисиҷумҳури Узбакистон гуфта шудааст, ки Мирзиёев ва Трамп ҷараёни иҷрои созишномаҳои ҳосилшуда ва дурнамои рушди равобити Узбакистону Амрикоро баррасӣ кардаанд.

Мирзиёев ва Тоқаев Трампро ба кишварҳои худ даъват кардаанд.

Президенти феълии Амрико ҳеч гоҳ ба кишварҳои Осиёи Марказӣ сафар накардааст.

Лоиқ Раҷабов, варзишгари шинохтаи тоҷик дар намуди муҳорибаҳои омехта, аз ташкилоти маъруфи UFC берун шудааст. Рӯзи 23-юми декабр чанд сомонаи варзишӣ хабар доданд, ки ташкилоти UFC шартнома бо чанд размкор, аз ҷумла Лоиқ Раҷабовро бекор кардааст.

Худи Лоиқ Раҷабов дар сӯҳбат ба Радиои Озодӣ ин хабарро тасдиқ карда гуфт, шартномаи ӯ бо ташкилоти UFC тамдид ё дароз карда нашуд.

Лоиқ Раҷабов 35 сол дошта, соли 2023 барои чор муҳориба бо ташкилоти UFC шартнома баста буд. Ин варзишгари тоҷик аз чор муҳорибаи гузарондааш дар UFC дар ду муҳориба ғалаба ба даст оварда, ду рақобати дигарро бохтааст.

Ҳанӯз маълум нест, ки чаро ташкилоти UFC шартнома бо Лоиқ Раҷабовро тамдид накард.

Лоиқ Раҷабов дар муҳорибаҳои омехта (ММА) аз 25 рақобат дар 18-тоаш пирӯз шуда, шаштоашро бохтааст ва яктоашро мусовӣ кардааст. Ӯ, ки дар дар муҳорибаҳои ММА аз соли 2012 ширкат мекунад, бо ташкилоти UFC барои чор муҳориба шартнома баста буд.

Бо берун шудани Лоиқ Раҷабов акнун дар ташкилоти UFC се варзишгар аз Тоҷикистон монд. Муҳаммад Наимов, Нурулло Алиев ва Муин Ғафуров аз Тоҷикистон дар UFC баромад мекунанд. Аммо ҳеч яке аз ин варзишгарон то ҳол ба рӯйхати 15 варзишгари беҳтарини вазни худ шомил нашудаанд.

Наҷотбахшони тоҷик дар Норак ҷасади се ҷавонеро аз дарё берун оварданд, ки зимни қаиқронӣ ғарқ шудаанд.

Бино ба иттилои Кумитаи ҳолатҳои фавқулода, шаби 21-уми декабр як гурӯҳи 7-нафара мехостанд ба воситаи қаиқи дорои муҳаррик аз як деҳа ба деҳаи дигар гузаранд. Дар роҳ дар наздикии соҳил қаиқ чаппа шуда, ҳама ғарқ мешаванд.

Кумита хабар додааст, ки 4 нафари онҳо, ки сокинони шаҳри Норак буданд, наҷот ёфтанд, аммо се нафари дигар ҷон доданд ва ҷасадҳои се нафари дигар баъди ҷустуҷӯҳо пайдо ва берун оварда шудааст.

Дар пайи ин ҳодиса наҷотбахшон аз сокинон хостааст, ки зимни қаиқронӣ қоидаҳои бехатариро риоя карда, қаиқҳои худро ба фасли зимистон омода кунанд ва аз истифодаи қаиқҳое, ки барои фасли сармо мувофиқ нестанд, худдорӣ намоянд.

Ҳамасола мақомот аз марги даҳҳо нафар дар дарёҳо хабар медиҳанд. Аммо ба гуфтаи онҳо, маъмулан ин ҳодисаҳо дар тобистон ва ҳангоми оббозӣ рух медиҳанд.

Ҳукумати “Толибон” консулгарии Афғонистонро дар шаҳри Хоруғи Вилояти Мухтори Кӯҳистони Бадахшон, ки зери назари ин гурӯҳ кор мекард, бастаанд.

Рӯзномаи “Ҳашти субҳ”-и Кобул дар ин бора бо такя ба як манбааш дар Душанбе хабар дод.

Ба навиштаи рӯзнома, "Толибон" ҳамчунин консул Нақибуллоҳ Деҳқонзодаро низ барканор кардаанд. Деҳқонзода пас аз суқути ҳукумати пешини Афғонистон эълон карда буд, ки ниҳоди онҳо зери ҳокимияти "Толибон" кор мекунад.

Дар Вазорати корҳои хориҷии Тоҷикистон хабари баста шудани консулгарии Афғонистонро дар Хоруғ на тасдиқ карданд ва на рад, танҳо гуфтанд, ки "ин тасмими ҳар кишвар аст".

Як манбаи Радиои Озодӣ дар шаҳри Хоруғ рӯзи 23 декабр ба шарти ифшо нашудани номаш гуфт, як ҳафта мешавад дари ин консулгарӣ баста аст ва фаъолият намекунад. Ба гуфтаи ин манбаъ, Нақибуллоҳ Деҳқонзода ва муовинаш ба Кобул рафтаанд.

“Ҳашти субҳ” навиштааст, ки Деҳқонзода даромадҳои ҳосилшуда аз хадамоти консулиро, ки беш аз 100 ҳазор доллар будааст, низ бо худ ба Кобул бурдааст.

Тоҷикистон то кунун ҳукумати "Толибон"-ро ба расмият нашинохтааст ва сафорати Афғонистон дар Душанбе дар ихтиёри сафири ҳукумати пешини Кобул қарор дорад. Масъулони консулгарии Хоруғ борҳо эълон карда буданд, ки аз ҳукумати "Толибон" намояндагӣ мекунанд.

Хабари баста шудани консулгарии Афғонистон дар Хоруғ дар ҳолест, ки равобити Душанбе бо ҳукумати "Толибон" дар пайи сафару боздиди ҳайатҳои ду тараф рӯ ба гармшавӣ дорад.

Ҳавопаймои ҳомили раисиҷумҳури Тоҷикистон шаби 22 ба 23 декабр бинобар номусоидии ҳаво дар шаҳри Хуҷанд нишасти изтирорӣ кардааст.

Эмомалӣ Раҳмон рӯзи гузашта дар нишасти ғайрирасмии сарони Иттиҳоди Давлатҳои Мустақил дар Санкт-Петербург иштирок кард ва баъди ин ҳамоиш бояд ба Душанбе бармегашт.

Бино ба иттилои дарёфтӣ, президент Эмомалӣ Раҳмон субҳи сешанбе ба бӯстонсарояш воқеъ дар шаҳри Гулистони вилояти Суғд рафтааст. "Аз ин рӯ, бозорҳои калони шаҳри Бӯстону Гулистон ва ноҳияи Бобоҷон Ғафуровро бастаанд", -- мегӯянд манбаъҳои Радиои Озодӣ дар Хуҷанд.

Як манбаъ дар Фурудгоҳи байнулмилалии Душанбе рӯзи 23 декабр ба Радиои Озодӣ гуфт, "ҳамаи ҳавопаймоҳоеро, ки аз Русия омаданд, ба шаҳри Хуҷанд фиристоданд. Бо сабаби туман фурудгоҳи Душанбе аз ними шаби 23 декабр то ними рӯз ҳавопаймоҳоро қабул карда натавонист".

Фуруди изтирории ҳавопаймои раисҷумҳури Тоҷикистон дар ҳоле аст, ки ҳавошиносон аз 22 то 24 декабр дар ҷумҳурӣ фаромадани меғ (туман) ва яхбандиро пешгӯӣ карда буданд.

Аз шоми 22 декабр Душанберо туман фаро гирифтааст ва вазъ субҳи 23 декабр низ чунин буд.

Дар пайи фаромадани тумани сахт дар шаҳри Душанбе, парвозҳо аз фурудгоҳи пойтахт муваққатан қатъ шудааст.

Аз шоми 22 декабр Душанберо туман фаро гирифтааст ва вазъ субҳи 23-уми декабр низ чунин буд.

Бар асоси онлайн-лавҳаи фурудгоҳи Душанбе, ҳамаи парвозҳо, аз ҷумла парвозҳо ба самти Маскав, Дубай, Екатеринбург ва баръакс аз соати 12-и шоми 22 ба 23-юми декабр қатъ шудаанд.

Парвоз ба шаҳри Хоруғ, ки тибқи ҷадвали фурудгоҳ имрӯз, соати 12:20 ба нақша гирифта шуда буд, низ лағв шудааст.

Ҳавошиносон аз 22 то 24 декабр дар ҷумҳурӣ, фаромадани туман ва яхбандиро пешгӯӣ карда буданд.

Маълум нест, ки парвозҳои ба таъхир афтода кай барқарор мешаванд.

Мақомоти Оҷонсии назорат дар соҳаи энергетика аз ошкор шудани як ҳолати дуздии барқ аз сӯйи корманди муассисаи тақсимоти барқ хабар доданд.

Бино ба иттилои ин ниҳод, корманди зеристгоҳи барқӣ дар минтақаи Кӯлоб аз бинои навбатдорӣ то хонаи истиқоматиаш, пинҳонӣ хатти барқ кашида, бидуни пайвасткунӣ ба ҳисобкунак барқ истифода мекардааст.

Назари гумонбар дар дуздии барқ маълум нест.

Оҷонсии назорат дар соҳаи энергетика дар пайи як санҷиш дар шаҳру ноҳияҳо аз ғайриқонунӣ истифода шудани нерӯи барқ аз сӯйи сокинон нигаронӣ кардаасӣ.

Бино ба гузориши ин ниҳод, дар пайи санҷиши зеристгоҳҳои барқӣ дар шаҳру навоҳии кишвар, чандин ҳолати қонуншиканӣ, аз ҷумла ду ҳолати истифодаи ғайриқонунии нерӯи барқ дар ноҳияҳои Варзоб ва Рӯдакӣ ошкор шудааст.

Мақомоти Тоҷикистон ахиран мубориза бо дуздии барқро сахттар карданд. Аз ҷумла, ба Кодекси ҷиноӣ тағйирот ворид шуд, ки барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндонро пешбинӣ кардааст.

Барномаи ғизои Созмони Милал гуфт, ки ба миллионҳо ниёзманди хӯрок дар Афғонистон ёрӣ расонда наметавонад. Дар ин кишвари ҳамсояи Тоҷикистон эҳтимоли афзоиши маргумир, бахусус дар миёни кӯдакон ва он ҳам бо сабаби камбуди маводи озуқа бештар мешавад.

Баъди соли 2021 ва ба қудрат баргаштани “Толибон”, ёриҳои байналмилалӣ ба Афғонистон хеле кам шуд ва илова ба ин офатҳои зиёди табиие ба мисли зилзила зиндагии бе ин ҳам риққатбори мардуми одиро сангинтар кард.

Солеҳа, як зани афғонистонӣ, гуфт: "Зимистон давраи сахт аст. Мо имкони харидани хӯрокро надорем. Ҳар пуле шавҳарам ба даст меорад, барои харидани ғизо сарф мешавад. Мо наметавонем хонаро гарм кунем. Агар касе хайр кард, танҳо он вақт оташдони мо рӯшан мешавад. Мо ҳатто як плита харида наметавонем."

Ба ҳисобҳои Барномаи ғизои СММ, дар миёни 17 миллион мардуми Афғонистон, ки бо гуруснагӣ дучор ҳастанд, се миллион нафар аз муҳоҷирони рондашуда аз Покистону Эрон мебошанд.

Ҷон Айлиефф, раиси Барномаи ғизои СММ дар Афғонистон, мегӯяд, “афзоиши якбораи камбуди ғизо ҳаёти миллионҳо кӯдакро дар хатар мегузорад. Мо шоҳиди коҳиши фоҷеабори кумакҳои ғизоӣ мешавем ва бенавотарин афғонистониҳо намедонанд ин зимистонро чӣ гуна пуштисар хоҳанд кард. Бозгашти маҷбурӣ аз кишварҳои ҳамсоя, хушксолӣ ва коҳиши фоҷеабори ёриҳои ғизоӣ дар саросари кишвар як бӯҳрони харобиовари гуруснагиро барои 17 миллион аҳолӣ ба вуҷуд овардааст”.

Барномаи ғизои СММ мегӯяд, “аввалин бор дар даҳсолаҳои охир наметавонад маъракаи ёрӣ дар мавсими зимистонро ба роҳ монад”. Ин созмон мегӯяд, барои ёрӣ ба мардум на камтар аз ним миллиард доллар зарур аст.

Ҳукумати “Толибон” ёздаҳ касро бо иттиҳоми фурӯш ва қочоқи маводи нашъадор шаллоқ задааст.

Ин кор рӯзи 22-юми декабр дар шаҳри Кобул сурат гирифт.

Додгоҳи олии “Толибон” дар эъломияе гуфт, ин афрод ҳамчунин аз 7 моҳ то 3 сол дар зиндон хоҳанд монд.

Гурӯҳи тундрави “Толибон” пас аз бозгашт ба қудрат дар Афғонистон (августи 2021) чандин нафарро дар пеши назари мардум ҷазо додааст.

Гузоришгари вижаи Созмони Милал дар умури ҳуқуқи башари ин сиёсати “Толибон”-ро танқид карда, хоҳони боздоштани он шудааст.

Намояндагони Амрико ва Украина музокироти Флорида барои поён додан ба ҷанги Украинаро "самарабахш ва созанда" хонданд.

Ҳар ду тараф рӯзи 21 декабр дар як баёнияи муштарак аз ин гуфтугӯҳо истиқбол карданд, аммо ҳеч нишонаи рӯшане аз даст ёфтан ба поёни ин бӯҳрон, ки наздик ба чаҳор сол мешавад идома дорад, ироа нашуд.

Ин музокирот ба муддати се рӯз дар шаҳри Майами дар аёлати Флорида баргузор шуд ва Стиф Виткофф, намояндаи вижаи Амрико барои Ховари Миёна, мизбонии онро ба ӯҳда дошт.

Дар ҷараёни ин гуфтугӯҳо, музокиракунандагони Русия ва Украина ба таври алоҳида бо Виткофф мулоқот карданд.

Ин дидорҳо бахше аз тозатарин талошҳои идораи Доналд Трамп, раисҷумҳури Амрико барои поён додан ба ҷанги Русия ва Украина ба шумор меравад.

Дар ҳамин ҳол, Кремл мегӯяд, ки эҳтимоли даст ёфтан ба созиши сулҳ дар ҷанги Украина дар рӯзҳои таътилоти Соли Нав андак аст.