Пайвандҳои дастрасӣ

Хабари нав

Хабарҳо

Р. Зойиров: "Дар Тоҷикистон тақрибан ҳазор маҳбуси сиёсӣ ҳаст"

Ҳизби сотсиал-демократии Тоҷикистон (ҲСДТ) бо интишори як гузориш аз афзоиши мавориди маҳкумиятҳои сиёсӣ дар ин кишвар ибрози нигаронӣ кардааст. Раҳматулло Зойиров-раиси ҲСДТ, ки дар нишасте ба ифтихори ҳаштумин солгарди таъсиси ин ҳизб сухан меронд, гуфт, ҳоло дар Тоҷикистон ҳудуди ҳазор нафар барои ақидаҳои сиёсиашон маҳкум ба зиндон шудаанд. Ба гуфтаи оқои Зойиров, ҳамакнун дар Тоҷикистон 5 % зиндониёни кишварро ононе ташкил медиҳанд, ки барои ақидаи сиёсӣ равонаи зиндон шудаанд: «Мо дар ҳоли таҳияи санади махсус доир ба маҳбусини сиёсӣ дар Тоҷикистон ҳастем. Дар робита бо ин мавзӯъ қасд дорем, рӯзҳои наздик баёнияи вижае омода сохта, дар ин замина як нишасти алоҳида баргузор намоем. Фикр мекунам, чунин баёния на дертар аз 8-уми апрели соли равон таҳия ва интишор меёбад.»
Оқои Зойиров зимни ишора ба мавориди мушаххаси маҳкумиятҳои сиёсӣ дар Тоҷикистон гуфт:
«Бо таваҷҷӯҳ ба ҳабси пурсару садои рӯзноманигор Ҷумъабой Толибов метавон аз ӯ ба унвони маҳбуси сиёсӣ ёд кард. Ҳабси Файзинисо Воҳидова, мақоми аршади ҲСДТ дақиқан ҷанбаи сиёсӣ дошт. Бидуни шубҳа вуҷуди ангезаи сиёсӣ дар қазияи Муҳаммадрӯзӣ Искандаров, раҳбари Ҳизби демократии Тоҷикистон низ аён аст. Ҳамчунин Ёқуб Салимов, агар иддаъои раиси ҷумҳурӣ ва ташкили ҳизб намекард, ӯ низ ба зиндон кашида намешуд. Маҳкум ба зиндон шудани Рустам Файзиев, муовини раиси Ҳизби сабти номнашудаи "Тараққиёт" ҳам ғайр аз ҷанбаи сиёсӣ асоси дигаре надорад».

Ҳамаи хабарҳои имрӯзро дар инҷо бихонед

Таҷаммӯи мухолифони Имрон Хон дар Исломобод

6 январ, шимолуғарби Покистон. Намоиши эътирозии мухолифон Имрон Хон

Мухолифони Покистон рӯзи 19 январ дар Исломобод, пойтахти кишвар барои ширкат дар раҳпаймоии азими зидди ҳукумати нахуствазир Имрон Хон таҷаммӯъ карданд. Ӯро дар дарёфти ғайриқонунии маблағ аз хориҷа гунаҳгор мекунанд. Эътилофи нӯҳ ҳизби мухолифи ҳукумат Комиссиюни интихоботии Покистонро фишор меоранд, то ки дар заминаи шикояти шаш соли пеши зидди Имрон Хон дар бораи дарёфти маблағҳо аз ИМА тасмим бигирад. Мақомот дар муқобил ҳазорҳо нирӯҳои амниятиву полисро сафарбар карданд. Аксар нирӯҳо барои ҳимоят аз биноҳои муҳими ҳукуматӣ, инчунин Додгоҳи олӣ ва парлумон саф кашиданд. Ҳуқуқшиносон гуфтанд, ки ҳизби ҳокими “Таҳрики инсоф” барои аз хориҷа дастрас кардани маблағ метавонад манъ шавад. Як собиқ ёвари Имрон Хон, ки чанде баъд аз ӯ ҷудо шуд, соли 2014 бо иттиҳоми дарёфти маблағ аз хориҷа зидди нахуствазир шикояте бурд ва гуфт, ки ин маблағҳо бо роҳҳои ғайриқонунӣ ба кишвар ворид шудаанд. Бар асоси қонунҳои Покистон, ҳизби сиёсӣ ҳақ надорад, ки аз хориҷа маблағгузорӣ шавад.

Тихановская аз САҲА дар бозгашти амни мухолифон ба Беларус кӯмак хост

8-уми январ, Литва

Раҳбари мухолифони Беларус Светлана Тихановская, ки баъди интихоботи баҳсбарангези президентии моҳи августи порсол кишварро тарк карда ба Литва рафт, аз САҲА дархост кард, ки барои бозгашти амни мухолифони режими Александр Лукашенко ба Беларус мусоидат кунад. Тихановская рӯзи 18 январ дар вебсайташ навишт, ки дар ин бора дар мулоқот бо сафирони ИА дар САҲА дархосте кардааст. Тихановская гуфт, бо нигоҳ ба вазъи Алексей Навалний, ки баъди бозгашт ба Русия боздошт гардид, зарурати кӯмаки САҲА-ро дар бозгашти амни худ ба Беларус бисёр муҳим медонад. Ӯ гуфт, “барои бозгашти ман ба ватан замонати махсус лозим аст”. Баъди интихоботе, ки ба қавли мухолифон, бо пирӯзии Тихановская анҷомид, мардум дар саросари Беларус даст ба эътироз заданд ва мақомот ба саркӯби эътирозгарон рӯ оварданд. Даҳҳо раҳбарони мухолифон дар боздошт буда, бархе дигарҳо ба хориҷа паноҳ бурданд.

Нашрия: Коҳиши муҳоҷирон дар Русия нархи хонаҳоро арзон кард

Як меҳмонхонаи иҷтимоӣ дар Маскав

Кам шудани муҳоҷирон дар Русия дар замони пандемияи COVID-19 нархи иҷораи хонаҳоро дар шаҳрҳои бузурги ин кишвар аз ҷумла Маскаву Санкт-Петербург аз 10 то 14 фойиз арзон кардааст. Коршиносон гуфтаанд, аз як тараф тарки Русия кардани муҳоҷирон, бекор мондани теъдоде аз шаҳрвандони хориҷӣ ва ё ба кори фосилавӣ гузаштани қисмати дигари одамон ба ин раванд боис шудааст. Нашрияи “Московский комсомолец“ менависад, ҳоло нархи иҷораи хонаи якҳуҷрагӣ дар Маскав ҳудуди 38 ҳазор рубли русӣ, манзили дуҳуҷрагӣ 45 ҳазор рубл ва сеҳуҷрагӣ 55 ҳазор рубли русӣ арзиш дорад.

Боздошти ду корманди ВКД бо гумони содир кардани ҷиноят

Оҷонсии зидди фасоди Тоҷикистон аз боздошти ду корманди вазорати корҳои дохилӣ бо иттиҳоми гирифтани пора хабар дод. Ба қавли манбаъ, гумонбарон Зебуниссо Исматшозода, сардори шуъбаи таҳлил ва назорати Раёсати таҳқиқи вазорати корҳои дохилӣ ва корманди дигари ҳамин ниҳод Қумригули Раҷаб бо гумони содир кардани ҷиноят боздошт шудаанд. Боздоштшудаҳо барои аз бойгонии маълумотии вазорати корҳои дохилӣ тоза кардани иттилоъ дар бораи доғи судии як шаҳрванд аз ӯ 1200 доллари амрикоӣ хостаанд ва 10-уми сентябри соли 2020 ҳангоми гирифтани маблағи мазкур дастгир гардиданд. Дар нисбати ин ду нафар парвандаи ҷиноятӣ оғоз ва барои баррасӣ ба додгоҳ ирсол шудааст. Назари гумонбарон ба иттиҳоми эълоншуда дар нисбаташон дастрас нест.

Садама дар роҳи Ваҳдат - Душанбе боис ба марги як нафар шуд

Садамае дар роҳи Балҷувон. Акс аз моҳи апрели соли 2019

Рӯзи 17-уми январ дар садамае дар роҳи Ваҳдат - Душанбе як нафар ҷон бохтааст.

Вазорати корҳои дохилӣ гуфт, ронандаи мошини "Опел-Вектра" Акмалҷон Гулаеви 27-сола, сокини ноҳияи Темурмалик, ҳангоми ҳаракат дар ҳудуди ҷамоати деҳоти Баҳори шаҳри Ваҳдат "аз уҳдаи идораи нақлиёт набаромада", пиёдагардон Гулизор Мирзокаримоваи 45-сола ва Нозигул Маҳмадиеваи 20-соларо пахш намудааст.

"Дар натиҷа, Нозигул Маҳмадиева дар ҷойи ҳодиса ба ҳалокат расидааст. Зани дигар маҷрӯҳ шудаву дар беморхона бистарӣ аст", - гуфтанд дар вазорат.

Садамаҳои нақлиётӣ дар фасли зимистон дар роҳҳои Тоҷикистон ҳодисаи камназир нест. Дар ҳоле ки мақомот аз эҳтиёткорӣ суҳбат мекунанд, бисёре аз ронандаҳо ба ноҳамвор ва хатарзо будани роҳҳо ишора мекунанд.

Пешгӯии сардшавии ҳаво дар Тоҷикистон

2 январи соли 2020, як қитъаи роҳи Душанбе-Хуҷанд

Маркази обуҳавошиносии Тоҷикистон дар чанд рӯзи оянда сард шудани ҳавои кишварро пешгӯӣ мекунад. Эҳтимол меравад, ки ҳарорати ҳаво то охири ҳафта даҳ дараҷа сард шуда барфу борон меборад. Аз ҷумла дар Душанбе баъди гармиҳои 16-дараҷаӣ ҳароратсанҷ то 2 даарҷаи зери сифр пойин хоҳад омад. Дар роҳи Душанбе-Чаноқ аз шоми дирӯз аллакай боридани барф шурӯъ шудааст. Ширкати IRS мегӯяд, роҳро бо маводи зиддилағзиш коркард доранд. Ҳамчунин ба қавди ин ширкати масъули нигоҳубини шоҳроҳ барои тоза кардани барф техникаҳо ба минтақаҳои осебпазир сафарбар шудаанд. Шоҳроҳи Душанбе – Хуҷанд аз масирҳои душворгузар дар фасли зимистон ба шумор меравад. Солҳои гузашта дар ин масир чанд нафар зери тарма монда ва ҷон бохта буданд.

Барои низомиёни рус дар Тоҷикистон ваксинаи зидди COVID-19 овардаанд

"Sputnik V", ваксинаи зидди коронавирус дар дасти як табиби серб

Низомиёни Русия дар Тоҷикистон ваксинаи зидди коронавирус дарёфт карданд. 1100 воя (доза) ваксинаи COVID-19 тавассути ҳавопаймо аз Русия ба пойгоҳи 201 расонида шудааст.

Хадамоти округи ҳарбии марказӣ мегӯяд, дар навбати аввал ваксина ба кормандони тиббӣ, низомиёне, ки дар навбатдории ҳолати омодабош қарор доранд ва ҳайати фармондеҳӣ гузаронида мешавад.

Эмкунӣ ба таври ихтиёрӣ сурат мегирад. Қабл аз он ба хидматчиёни ҳарбӣ дар бораи ваксина, таъсири дору ба бадани инсон ва таъсири эҳтимолии он маълумот дода мешавад.

Сӯхтор дар қароргоҳи беруни Вашингтон ҳолати асабониятро ба вуҷуд овард

Сӯхтор дар зери як пули Вашингтон рӯзи 18-уми январ рух дод. Акс аз шабакаҳои иҷтимоӣ: Edward Daniels via REUTERS

Сӯхтор дар як қароргоҳи афроди бехонумон дар Вашингтон дар фазои омодагии ИМА барои баргузории маросими савгандёдкунии Ҷо Байден дар мақоми президент, ки 20-уми январ баргузор мешавад, ҳолати асабониятро эҷод кард. Сӯхтор рӯзи 18-уми январ дар қароргоҳи воқеъ дар фосилаи яккилометрии Капитол – бинои Конгресс рух дод ва дуди сиёҳи ғализе ба ҳаво печид. Дар натиҷаи ин ҳодиса, нақшаи тамрину омодагӣ ба савгандёдкунӣ бекор карда шуд. Қароргоҳ баста гардид. Ба макони сӯхтор чархболҳои марбут ба хадамоти ёрии изтирорӣ ва сӯхторхомӯшкунӣ сафарбар шуданд. Мақомот гуфтанд, ки сӯхтор ҳеҷ таҳдиде ба мардум ваё ҷараёни савгандёдкунӣ надошт. Дар Вашингтон, ки ҳанӯз 6-уми январ шоҳиди ҳамлаи издиҳоми тарафдорони президент Доналд Трамп ба Капитол шудааст, як танише эҷод шудааст. Хадамоти амниятии ИМА гуфтанд, ки дар остонаи савгандёдкунии Ҷо Байден аз эҳтимоли сар задани ҳамлаҳо нигарон ҳастанд ва бо кӯмаки 25 ҳазор сарбози Горди миллӣ атрофи Капитол ва шаҳри Вашингтонро иҳота намуданд. Азбаски маълум шуд дар миёни ҳамлагарон ба бинои Конгресс бархе низомиёни собиқу амалкунанда буданд, хадамоти амниятӣ аз ҳамлаҳо дохилӣ нигарон ҳастанд. Хадамоти амниятӣ нирӯҳои Горди миллиро бо ҳамин сабаб аз санҷиш мегузаронанд.

Туркманистони "орӣ аз COVID" ваксинаи "Sputnik-V"-ро ба қайд гирифт

Истгоҳи автобус дар Ашқобод

Бунёди сармоягузории мустақими Русия гуфтааст, Туркманистон ваксинаи "Sputnik V"-ро, ки ба зидди COVID-19 мебошад, барои истифода дар ин кишвар ба қайд гирифтааст. Ин дар ҳолест, ки ин кишвари Осиёи Марказӣ ҳанӯз ҳам мегӯяд, ки ҳеч мавриди олудагӣ ба COVID-19 дар қаламраваш номнавис нашудааст.

Бунёди сармоягузории мустақими Русия дар изҳороти расмиаш рӯзи 18-уми январ навишт, “Туркманистон нахустин кишвари Осиёи Марказӣ аст, ки расман ваксинаи "Sputnik-V"-ро барои истифода дар қаламраваш сабт кардааст. Аз ин ваксина дар ҳолатҳои фавқулода ба кор бурдан иҷозат дода шудааст”.

Туркманистон ягона кишвари Осиёи Марказӣ аст, ки то ҳол ба Созмони Ҷаҳонии Тандурустӣ дар бораи олуда шудани шаҳрвандонаш ба коронавирус хабар надода, оморро дар сифр нигоҳ медорад. Моҳи августи соли гузашта СҶТ дар бораи афзудани ҳодисаҳои гирифтории сокинон ба пневмонияи ғайримуқаррарӣ хабар дод ва созмон борҳо, вале беҳуда аз Ишқобод хостааст, ки иҷоза диҳад дар ин кишвар санҷиши рӯйирости коронавирусро ба роҳ монад.

Инкори ҳодисаҳои гирифторӣ ба COVID-19 дар ҳолест, ки зиндону мактабҳо ва беморхонаҳо пур аз бемор ҳастанд. Ба шаҳрвандони бисёре гуфта шудааст, ки аз хона набароянд ва агар бемор шуданд, беҳтараш ба марказҳои тиббӣ нараванд, то сабаби олуда шудани кормандони тиб нашаванд.

Дар Туркманистон одамони бисёре ба хабарнигорони Радиои Озодӣ гуфтаанд, ки фавтидагони пневмонияи ғайриоддиро дар халтаҳои пластикии махсус барои ба хок супоридан медиҳанд.

То кунун ба таври расмӣ иҷозат дода шудааст, ки аз ваксинаи русии "Sputnik-V" дар чанд кишвар, аз ҷумла, Алҷазоир, Аргентина, Белорус, Боливия, Фаластин ва Парагвай истифода баранд.

Навалний дар боздоштгоҳи "Матросская тишина" нигоҳдорӣ мешавад

Боздоштгоҳи "Матросская тишина"

Раҳбари мухолифони Русия Алексей Навалнийро, ки ба 30 рӯз ҳабс маҳкум шудааст, ба боздоштгоҳи "Матросская тишина" интиқол доданд.

Ӯ рӯзи 17-уми январ ҳангоми бозгашт аз Берлин дар фурудгоҳи Шереметевои Маскав дастгир шуд. Навалний моҳи августи соли гузашта заҳролуд шуда, дар Берлин муолиҷа мегирифт.

Мақомоти Русия ӯро ба поймол кардани қоидаҳои адои зиндони шартӣ ва берун нарафтан аз Русия муттаҳам донистанд. Алексей Навалнийро соли 2014 бо иттиҳоми тақаллуби молӣ ба зиндони шартӣ маҳкум карда буданд. Бар асоси қонун, мумкин аст, Алексей Навалнийро то ба 3.5 соли зиндон маҳкум кунанд ва ин мавзуъро додгоҳ баъди як моҳи дигар баррасӣ мекунад.

Алексей Навалний, ки мегӯяд, амри заҳролуд кардани ӯро президент Владимир Путин додааст, аз замони боздошт, 2 рӯз пеш, бе дастрасӣ ба ҳуқуқшиносон муҳокима шуд.

Алексей Мелников, котиби Кумисюни ҷамъиятии назорати ҳуқуқи башар дар Телеграм навишт, 18-уми январ Навалнийро дар утоқи боздоштгоҳ дид. Ӯ гуфт, бо сабаби ин ки Навалний бояд баъди бозгашт аз сафар дар карантин бошад, дар утоқи иборат аз се кати хоб танҳо нигоҳ медоранд.

Баъд аз ҳукми ҳабси 30-рӯза Навалний дар паёми видеоӣ аз шаҳрвандони Русия хост, киэътирозҳои хиёбонӣ ташкил кунанд.

Гузоришҳо: Трамп дар рӯзи охири президентиаш мехоҳад даҳҳо нафарро афв кунад

Доналд Трамп рӯзи 19-уми январ охирин рӯзи пурраи корӣ дар мақоми президенти ИМА кор хоҳад кард

Интизор меравад, ки Доналд Трамп дар охирин рӯзи пурраи кориаш дар мақоми президенти ИМА қарори афви даҳҳо нафар, аз ҷумла ҷинояткорони маҳкумшударо содир кунад. Ин дар ҳолест, ки мизони маҳбубияти Трамп дар поинтарин сатҳ - 34 дарсад қарор дорад. Матбуот бо такя ба манбаъҳо дар Кохи Сафед менависад, ки эҳтимолан аз 60 то 100 нафар, аз ҷумла, бархе гурӯҳҳо бахшида шаванд. Дар миёни онҳо матбуот аз исми як репсаро ва як духтури зиндон ёд мекунад, ки барои тақаллуб ҷазо гирифтааст. То ҳол маълум нест, ки оё собиқ муттафиқи наздики Трамп – Стив Беннон ва аъзои тими ӯ, ки барои тақаллуб дар тарҳи сохтмони девори Мексика ба ҷавобгарӣ кашида шудаанд, афв мешаванд ё на. Худи Беннон гуфтааст, ки бегуноҳ аст. Ҳамчунин, маълум нест, ки оё Трамп талош хоҳад кард, ки исми худ ва фарзандони калониашро дар ин феҳрист ҷойгир кунад ё на. Қарори афв дар ин сурат хусусияти пешгирикунанда хоҳад дошт, чунки то ҳол ба Трамп ваё наздиконаш дар заминаи содир кардани ҷиноят айб пешниҳод нашудааст. Бисёр донишмандон мегӯянд, ки афви шахсан худаш қонунӣ нахоҳад буд ва аз назари ин ки шахс наметавонад дар арзёбии рафторҳои худ беғараз бошад, ғайриқонунӣ ҳисобида мешавад.

Олмон дар фикри тамдиди маҳдудиятҳои марбут ба пандемия аст

13-уми январ Ангела Меркел дар ҷаласаи парлумон оид ба шурӯи маъракаи эмкунӣ зидди коронавирус иштирок кард

Интизор меравад, ки мақомот дар Олмон рӯзи 19-уми январ маҳдудияти марбут ба коронавирусро то охири моҳи январ тамдид кунанд. Ин тасмим зоҳиран бо сабаби бисёр зуд паҳн шудани шакли нави вирус гирифта мешавад ва айни замон, барномаи эмгузаронии аҳолӣ ҳам босуръат идома дорад. Қарор дар бораи тамдиди маҳдудиятҳо дар ҷаласаи садри аъзам Ангела Меркел ва раҳбарони 16 минтақаи федеролии кишвар гирифта шавад. Мақомот гуфтанд, ки дар роҳи муқовимат ба вирус натиҷаҳои муайяни мусбат ба даст меояд ва бархе бемороне, ки дар ҳолати сангин қарор доранд, аз ин ҳолат кам-кам раҳо мешаванд. Мақомот дар Олмон мегӯянд, ки қарори бастани тарабхонаву муассисаҳои варзишиву тафреҳӣ аз моҳи ноябр ба ин сӯ натиҷа медиҳад. Илова ба ин, аз миёнаҳои моҳи декабр ба ин сӯ мактабу фурӯшгоҳҳои маҳаллӣ ҳам баста боқӣ мемонанд.

Дар нуқоти дигари ҷаҳон ҳам барномаи эмкунӣ шурӯъ шудааст. Аз 18-уми январ дар Бразилияву Озарбойҷон ҳам маъракаи сартосарии эмкунӣ зидди коронавирус ба роҳ монда шуд.

Олмон дар фикри тамдиди маҳдудиятҳои марбут ба пандемия аст

13-уми январ Ангела Меркел дар ҷаласаи парлумон оид ба шурӯи маъракаи эмкунӣ зидди коронавирус иштирок кард

Интизор меравад, ки мақомот дар Олмон рӯзи 19-уми январ маҳдудияти марбут ба коронавирусро то охири моҳи январ тамдид кунанд. Ин тасмим зоҳиран бо сабаби бисёр зуд паҳн шудани шакли нави вирус гирифта мешавад ва айни замон, барномаи эмгузаронии аҳолӣ ҳам босуръат идома дорад. Қарор дар бораи тамдиди маҳдудиятҳо дар ҷаласаи садри аъзам Ангела Меркел ва раҳбарони 16 минтақаи федеролии кишвар гирифта шавад. Мақомот гуфтанд, ки дар роҳи муқовимат ба вирус натиҷаҳои муайяни мусбат ба даст меояд ва бархе бемороне, ки дар ҳолати сангин қарор доранд, аз ин ҳолат кам-кам раҳо мешаванд. Мақомот дар Олмон мегӯянд, ки қарори бастани тарабхонаву муассисаҳои варзишиву тафреҳӣ аз моҳи ноябр ба ин сӯ натиҷа медиҳад. Илова ба ин, аз миёнаҳои моҳи декабр ба ин сӯ мактабу фурӯшгоҳҳои маҳаллӣ ҳам баста боқӣ мемонанд.

Дар нуқоти дигари ҷаҳон ҳам барномаи эмкунӣ шурӯъ шудааст. Аз 18-уми январ дар Бразилияву Озарбойҷон ҳам маъракаи сартосарии эмкунӣ зидди коронавирус ба роҳ монда шуд.

Наҷоти кӯдакон аз зарурати кӯмак ба атфоли Афғонистон хабар дод

18- уми январ, Кобул. Оилаи ин кӯдак аз хонаводаҳои муҳоҷирони дохилӣ аст, ки ба сарпаноҳ ниёз дорад

Як созмони ҳомии ҳуқуқи кӯдакон мегӯяд, мумкин аст, имсол бештар аз 10 миллион кӯдаки афғон нимгурусна монанд ва аз ҷомеаи байналмилалӣ хост, барои пешгирӣ аз ин хатар миллиардҳо доллар кумаки молӣ расонад. Созмони Наҷоти Кӯдакон (СНК) рӯзи 19-уми январ бо нашри як муроҷиатномае гуфт, дар Афғонистон 18 миллион кӯдак ва аз ҷумла 9.7 миллион нафари онҳо ба маҳсулоти ниёзи аввал, мисли хӯрок эҳтиёҷ доранд. Созмон гуфтааст, ки барои кӯмак ба онҳо ба 3 миллиард доллар дар соли 2021 ниёз дорад. Крис Нийамандӣ, яке аз мудирони созмони СНК, ки дар Лондон қароргоҳ дорад, гуфт: “Вазъ фавқуллода бад аст ва зарур аст, ки ҷомеаи байналмилал ба он фавран таваҷҷуҳ кунад.” Бо вуҷуди он ки ҳукумати Афғонистон ва Толибон барои хотима додан ба ҷанг музокира мекунанд, дар кишвар хунрезиву ҷанг зиёдтар шудааст ва пандемия ба вазъи зиндагии миллионҳо хонавода таъсири фалокатбор гузоштааст. Ба сабаби коҳиши воридот, аз ҷумла маводи ниёзи аввалия зиндагии мардум бадтар шудааст. Беқонунӣ ва фасоди густурда дар кишвар як балои дигаре барои иқтисоди ин кишвари ҷангзада ва ҳамсоя бо Тоҷикистон шудааст.

Псаки қарори Трампро дар бораи иҷозаи сафари аврупоиҳо рад кард

Терминали 1-уми Фурудгоҳи ба номи Кеннедии шаҳри Ню-Йорк

Сухангӯи президенти мунтахаб Ҷо Байден рӯзи 18-уми январ як эълони президент Доналд Трампро рад кард, ки гуфт, базудӣ манъи сафари мусофирон аз Аврупову Бразилия бо сабаби пандемия бекор мешавад. Ҷен Псаки, ки қарор аст бо сари кор омадани маъмурияти нав аз 20-уми январ ба ҳайси сухангӯи Ҷо Байден кор кунад, дар Твиттер навишт, ки “бо машварати тими табибони мо, маъмурият ҳоло дар фикри бекор кардани маҳдудиятҳо нест”. Ӯ афзуд, ки маъмурияти Байден ният дорад тадбирҳои сиҳҳатии оммавиро дар заминаи парвозҳои байналмилалӣ тақвият диҳад. Изҳороти Псаки дар Твиттер якбора баъди эълони Трамп нашр шуд, ки гуфт, манъи сафар барои аврупоиҳо аз қаламрави Шенген, кишварҳои Бритониё, Ирландия ва Барзилия бардошта мешаванд. Манъи сафар барои онҳое, ки аз Чину Эрон меоянд, пойбарҷо мемонад. Дар эълони Трамп гуфта мешавад, ки он аз 26-уми январ ба иҷро медарояд ва аз ҳама мусофирон тақозо мешавад, ки бо худ тести манфии COVID-19 дошта бошанд.

Беморхонаҳои Ишқободро барои гирифторони COVID-19 омода мекунанд

Беморхонаҳои шаҳри Ишқободи Туркманистонро барои гирифторони нави вабои коронавирус омода мекунанд. Ба ин тартиб, бемороне ки вазъашон беҳтар аст, ба хонаҳояшон рухсат дода мешаванд.

Шоҳидон мегӯянд, дар беморхонаҳои Ишқобод ҷойи холӣ боқӣ намондааст ва ба ҳамин далел, мақомоти тандурустӣ дастур додаанд, ки бархе аз беморон ба манзилҳояшон рухсат дода шаванд.

Дар ибтидои моҳи декабри соли гузашта сокинони Ишқобод гуфтанд, касонеро, ки нишонаҳои коронавирусро доранд, иҷборан дар беморхона бистарӣ мекунанд.

Ин ҳам дар ҳолест, ки мақомоти Туркманистон мегӯянд, расман дар ин кишвар ҳеч ҳолати гирифторӣ ба вабои коронавирус сабт нашудааст.

Мансабдорони узбек ба давлат беш аз 500 млрд сӯм зарар расондаанд

Яке аз муассисаҳои давлатии Узбекистон.

Додситонии кулли Узбекистон иттилоъ дод, ки соли гузашта дар он кишвар 1723 мансабдор ба ҷавобгарӣ кашида шудааст.

Ба огаҳии додситонӣ, 132 нафари ин мансабдорон дар фасодкорӣ айбдор гаштаанд.

Ҳамчунин 58 мансабдор барои сӯистифода аз мақом, 227 кас барои қаллобӣ ва 835 тани дигар ба хотири азхудкунии амволи ғайр ба ҷавобгарӣ кашида шудаанд.

Бештари муҷозотшудаҳо (1669 кас) дар бахшҳои ноҳиявию шаҳрии вазорату идораҳои давлатии Узбекистон кор мекардаанд.

Додситонии Узбекистон мегӯяд, дар натиҷаи ҷинояткории мансабдорони мазкур давлат 500,1 млрд сӯм ($47,6 млн) зарар дидааст. Дар натиҷаи тафтишот 355, 7 млрд сӯм ($33,8 млн) ба давлат баргардонида шудааст.

Коршикании ронандагони мусофирбарҳо дар Бишкек

Дар шаҳри Бишкек, пойтахти Қирғизистон 18 январ садҳо ронандаи микроавтобусҳои мусофирбар дар эътироз ба арзон будани ҳаққи роҳкиро ба кор набаромаданд. Онҳо талаб доранд, нархи роҳкиро 50 дарсад боло бурда шавад.

Ронанда Тургунбек улуу Калис мегӯяд, рӯзона ҳудуди 12 доллари амрикоӣ кор мекунад ва тақрибан ними ин пул дар пардохти пули андоз, сӯзишворӣ ва таъмири нақлиёташ сарф мешавад.

"Ин мошин солҳои 2005-2002 истеҳсол шудааст. Ин гуна мошинҳо аллакай 16-18 сол доранд. Онҳо низ таъмирталаб мешаванд. Мо дирҳам кор мекунем. Баъзан, рӯзе, ки мошин вайрон шавад, хона бе пул, қарздор меравем", - изҳор дошт ӯ.

Вале мақомоти шаҳрдории Бишкек мегӯянд, пушти ин корпартоии ронандагон "иғвогарон" меистанд.

"Дар миёни ронандагон иғвогароне ҳастанд, ки нафарони ба кор баромадаро таҳдид мекунанд. Гуфтаанд, агар ба кор бароед, латтукӯб мекунем ва шишаҳои мошинро мешиканем", - изҳор дошт сухангӯи шуъбаи нақлиёти пойтахти Қирғизистон Бекжан Акматбеков.

Дар ҳоли ҳозир нархи роҳкиро барои як одам дар дохили шаҳри Бишкек 10 сом, тақрибан 12 сент аст. Ронандагон талаб доранд, ки он то ба 15 сом боло бурда шавад. Вале на ҳама мусофирон ба ин розӣ ҳастанд.

Узбекистон имсол 6 маҳбаси сукунатияшро мебандад

Узбекистон 12-уми январ нахустин маҳбаси сукунатиеро дар вилояти Қашқадарё, ки тобеи Раёсати иҷрои ҷазои Вазорати умури дохилии он кишвар буд, пурра баст.

Зиндониёне, ки дар ин маҳбас адои ҷазо мекарданд, ба муассисаҳои ислоҳии дигар интиқол дода шуданд.

Президенти Узбекистон Шавкат Мирзиёев 29-декабри соли гузашта дар паёми худ ба порлумон гуфта буд, ки тасмим доранд, шумори маҳбасҳои сукунатиро дар он кишвар 25 адад кам кунанд.

"Имсол қарор аст, шаш маҳбаси сукунатӣ дар вилоятҳои Тошканд, Ҷиззах, Қашқадарё ва Сурхандарё баста шавад. Бештари зиндониён озод хоҳанд шуд. Вале дар миёнашон онҳое низ ҳастанд, ки ба зиндонҳои дигар интиқол дода мешаванд", - изҳор дошт Мирзиёев.

Дар ҷаласаи Кумита порлумони Узбекистон дар умури дифоъ ва амният хабар дода шуд, ки дар ин кишвар аз ҳар 100 ҳазор нафар 68 кас дар муассисаҳои ислоҳӣ адои ҷазо мекунад. Бино ба иттилои расмӣ, дар ин кишвар 18 зиндони дорои низоми сахт, 25 муассисаи ислоҳӣ ва 11 боздоштгоҳи муваққатӣ фаъолият мекунад.

Бар пояи омори Вазорати умури дохилии Узбекистон, дар зиндонҳои он кишвар беш аз 22 ҳазор зиндонӣ нигаҳдорӣ мешавад. Беш аз 14 ҳазори онҳо дар зиндонҳои низомашон сахт адои ҷазо мекунанд.

Алексей Навалний ба 30 рӯзи ҳабс маҳкум шуд

Акс аз додгоҳ

Раҳбари мухолифони Русия Алексей Навалнийро, ки баъд аз муолиҷа аз Олмон баргашт, 18-уми январ бо қарори додгоҳ ба 30 рӯзи ҳабс маҳкум карданд. Вакили мудофеи ӯ Вадим Кобзев гуфт, ин ҳукм бо дархости Хадамоти Федеролии Зиндонҳои Русия (ФСИН) содир шудааст.

Мурофиа дар Идораи корҳои дохилии шаҳри Химки гузашт. Навалнийро ба ин муассиса шоми 17-уми январ аз фурудгоҳи Шереметево оварданд.

Дар бораи баргузории мурофиаи додгоҳӣ на Навалний ва на ҳомиёни ӯ пешакӣ огоҳ карда нашуданд. Вакилонро танҳо иҷозати вуруд ба мурофиа доданд, вале пеш аз ин ба онҳо имкон надоданд, ба бино дароянд.

Дар раёсати корҳои дохилии вилояти Маскав баъди шурӯи додгоҳ гуфтанд, сабаби ба шуъбаи умури дохилӣ интиқол додани ӯ дар он буд, ки ӯ тести коронавирусро насупурда буд. Бар асоси қонун, ҳар касе, ки ба Русия ворид мешавад, бояд давоми 72 соат аз санҷиши коронавирус гузарад.

Мақомот гуфтанд, бо ҳадафи таъмини амнияти санитарию эпидемиологӣ ворид шудан ба дохили биное, ки дар он ҷо мурофиа барпо шуд, манъ аст. Дар назди бинои Шуъбаи умури дохилӣ беш аз 100 тарафдори Навалний, инчунин, хабарнигорон ҷамъ шуданд. Бо ин ки мурофиа боз эълон шуд, нагузоштанд, тарафдорони ӯ ба дохил ворид шаванд.

Худи Навалний дар дақиқаҳои аввали мурофиа гуфт: “Намефаҳмам, ки чӣ мегузарад. Як дақиқа пеш маро барои мулоқот бо вакилон ба берун бароварданд. Ман ин ҷо биёям, ин ҷо додгоҳи Химки будааст. Кадом шахсоне маро навор мегиранд, касоне дар толор нишастаанд. Номи он – “додгоҳи бози Химки аст”. Масъалаи баррасишаванда – ҳабси ман бар асоси қарори раиси полис аст. Чаро мурофиаи додгоҳи Химки дар идораи полис мегузарад? Ман намефаҳмам. Чаро касеро огоҳ накарданд? Ин як... Ман аз ин пеш ҳам истеҳзои низоми адлияро шоҳид шудаам, вале зоҳиран он пирамард дар паноҳгоҳаш чунон аз ҳама чиз метарсад, ки онҳо ҳоло Кодекси ҷиноиро намоишкорона лахт-лахт карда, ба ахлот андохтанд. Имкон надорад, чунин коре, ки ҳоло мегузарад, бишавад. Ин беқонунии дараҷаи олӣ аст, ман дигар сифатро ба кор бурда наметавонам.”

Полис Навалнийи 44-соларо баъди расиданаш аз Берлин дар назди посгоҳи назорати шиносномаҳои фурудгоҳ боздошт кард. Мақомоти рус гуфтанд, Навалний барои нақзи чандкарати шароити ҳукми шартии зиндон аз соли 2014 аз рӯи иттиҳоми тақаллуб боздошт шуд. Навалний гуфт, қонунро вайрон накардааст ва парванда дорои ангезаҳои сиёсӣ мебошад.

Навалний додгоҳро “баландтарин дараҷаи беқонунӣ” номид

Алексей Навалний, раҳбари мухолифони Русия дар идораи полиси шаҳри Химки, ки он ҷо мурофиаи додгоҳӣ мегузарад

Мақомоти Русия саросемавор Алексей Навалнийро мавриди муҳокима қарор доданд ва худи сиёсатмадори мухолифи Кремлин ин мурофиаро “баландтарин дараҷаи беқонунӣ” номид. Навалний аз моҳи август дар Олмон осори заҳролудшавиро муолиҷа мекард. Ба қавли муҳаққиқони мустақил, Навалнийро бо заҳри низомии навъи “Новичок” заҳролуд карданд. Баъди расидан ба хоки Маскав ӯро боздошт намуда ба идораи полиси шаҳри Химки, воқеъ дар ҳудуди Подмосковйе интиқол доданд. Навалнийро дар ҳоле ба мурофиаи додгоҳӣ ба идораи полиси шаҳри Химки оварданд, ки ҷомеаи ҷаҳонӣ, ҳукуматҳои Ғарбу Аврупо боздошти ӯро маҳкум ва озодии билофосилаи ӯғро тақозо мекарданд. Додгоҳ бояд дар заминаи ҳабси ӯ ба мӯҳлати 3,5 сол ҳукм содир кунад.

Ёваронаш гуфтанд, ки Навалний дар замони боздошт аз дастрасӣ ба вакилу ёвари ҳуқуқӣ маҳрум буд ва аз толори мурофиа Кира Ярмиш, сухангӯи Навалний видеонавори ӯро нашр кард, ки дар он президент Владимир Путинро дар ҳолати рӯйдода гунаҳгор мекунад. Аз ҷумла, Навалний гуфт:

“Ман намефаҳмам, ки чӣ мегузарад. Як дақиқа пеш маро барои мулоқот бо вакилон берун бароварданд. Ман ин ҷо биёям, ин ҷо додгоҳи Химки будааст. Кадом нафароне маро навор мегиранд, касоне дар толор нишастаанд. Номи он – “додгоҳи бози Химки аст”. Масъалаи баррасишаванда – ҳабси ман бар асоси қарори раиси полис аст. Чаро мурофиаи додгоҳи Химки дар идораи полис мегузарад? Ман намефаҳмам. Чаро касеро огоҳ накарданд? Ин як... Ман аз ин пеш ҳам истеҳзои низоми адлияро шоҳид шудаам, вале зоҳиран он пирамард дар паноҳгоҳаш чунон аз ҳама чиз метарсад, ки онҳо ҳоло Кодекси ҷиноиро намоишкорона лахт-лахт карда ба ахлот андохтанд. Имкон надорад, ки чунин коре, ки ҳоло мегузарад, бишавад. Ин беқонунии дараҷаи олӣ аст, ман дигар сифатро ба кор бурда наметавонам”.

Полис Навалнии 44-соларо баъди расиданаш аз Берлин дар назди посгоҳи назорати шиносномаҳои фурудгоҳ боздошт кард. Мақомоти рус гуфтанд, ки Навалний барои нақзи бисёркаратаи шароити ҳукми шартии зиндон аз соли 2014 аз рӯи иттиҳоми тақаллуб боздошт шуд. Навалний гуфт, ки қонунро вайрон накардааст ва парванда дорои ангезаҳои сиёсӣ мебошад.

Навалнийро рӯзи 17-уми январ созмони Amnesty International як “маҳбуси эътиқодӣ” номид. Ӯро 20-уми августи соли 2020 баъди он ки маълум гашт заҳролуд шудааст, барои муолиҷа ба як беморхонаи шаҳри Берлин интиқол доданд. Қабл аз он Навалний дар ҳавопаймое аз Сибир ба Маскав худро бад ҳис карда беҳуш шуда аз по афтод.

Навалний, ки борҳо бо нишони эътироз аз ҳукумати Русия намоишҳои эътирозии зиддиҳукуматӣ ташкил кардааст, дар заҳролуд шуданаш мақомоти Русияро айбдор кард. Маскав дахолаташ дар ин қазияро рад мекунад.

Барканории раиси як додгоҳ ва таъини ду муовини раиси Бонки Миллӣ дар Тоҷикистон

Кохи Миллат

Маъруфҷон Бурҳониён аз мансаби раиси Додгоҳи ноҳияи Бобоҷон Ғафурови вилояти Суғд барканор карда шудааст. Дар ин бора рӯзи 18-уми январ фармони раиси ҷумҳури Тоҷикистон содир гардид. Сабаби барканории ӯро нагуфтаанд.

Бар асоси фармонҳои дигар, Мирҳаёт Ёқубзода ва Фирдавс Толибзода муовинони раиси Бонки Миллии Тоҷикистон таъин шудаанд. Фарҳод Восидиён муовини вазири рушди иқтисод ва савдо шуд.

Инчунин раҳбарони идораи мубориза бо фасодро дар Вилояти Мухтори Кӯҳистони Бадахшон ва вилояти Хатлон иваз кардаанд. Хадамоти матбуотии президенти Тоҷикистон навишт, Эмомалӣ Раҳмон ҳангоми суҳбат бо онҳое, ки мансабҳои нав гирифтанд, ба ислоҳи "камбудҳо дар системаи идораи бонкӣ, пешгирӣ аз қонуншиканиҳо дар бахши замин, роҳ надодан ба қочоқи молу маҳсулот, мубориза бар зидди фасод” даъват кард.

Мухолифон ҳамвора тағйироти кадриро дар ниҳодҳои расмии Тоҷикистон танқид мекунанд. Ба гуфтаи онҳо, ин тағйирот асосан аз ҷойивазкунии кадрҳои куҳна иборат аст, ки аз ин курсӣ ба он курсӣ кӯчиданашон чизеро тағйир намедиҳад.

Алексей Навалний дар шаҳри Химки. ВИДЕО

18-уми январ, додгоҳи шаҳри Химки

Мунаққиди Кремлин Алексей Навалний дар фосилаи камтар аз як рӯзи баъди бозгашташ аз Олмон дар фурудгоҳи Маскав боздошт шуд ва ҳоло дар як додгоҳ посух медиҳад. Мурофиаи додгоҳӣ оид ба таъини ҳабс ё озод кардани Навалний дар идораи полиси шаҳри Химки мегузарад. Навалний дар як беморхонаи Берлин баъди заҳролудшавии моҳи август муолиҷа гирифтааст. Сухангӯи Навлний Кира Ярмиш дар навори видеоие, ки аз толори додгоҳ нашр кард, гуфт, ки дар мурофиа тадбирҳои сахттарини амниятӣ ҷорӣ шудаанд ва журналистонро ба дохил роҳ надоданд.

Полис Навалнии 44-соларо дар нуқтаи санҷиши паспортҳои фурудгоҳи Шереметево рост ба идораи полиси шаҳри Химки интиқол дод. Навалний гуфт, ки ӯ дар Олмон буд, аз осори заҳролудшавӣ, ки бино ба иттиҳоми ӯ, як амри презиент Владимир Путин буд, муолиҷа гирифт. Аз замони боздошт шуданаш бо касе сӯҳбат накардааст ва мақомот нагузоштанд, ки вакилони дифоъ ба наздаш дароянд. Навалний августи порсол дар дохили як ҳавопаймо аз ҳуш рафт ва маълум шуд, ки ӯ заҳролуд шудааст. Се озмоишгоҳи мустақили аврупоӣ гуфтанд, ки раҳбари мухолифони Русия бо заҳри низомии навъи “Новичок” заҳролуд шудааст.

Урсула вон дер Лейен, раҳбари Иттиҳоди Аврупо дар изҳороте рӯзи 18 январ гуфт, “боздошти Алексей Навалнийро маҳкум мекунам”. Ӯ гуфт, мақомоти Русия бояд ӯро билофосила озод ва амнияташро ҳам таъмин бикунанд. Бритониё ҳам ба ин даъватҳо ҳамроҳ шуд ва тақозо кард, ки Русия шеваи заҳролуд шудани Навалнийро бо як силоҳи кимиёии давраи Шӯравӣ шарҳ диҳад. Русия, дар ҳамин ҳол, талош дорад интиқодҳои Ғарбро нодида бигирад. Рӯзи 18-уми январ вазири хориҷаи Русия Сергей Лавров гуфт, Ғарб бояд бо ҳалли мушкилоти худаш банд бошад.

7 нафар барои иттилои дурӯғ дар бораи 167 ҳазор муҳоҷир дар додгоҳ посух медиҳанд

Соли 2015. Гурӯҳи муҳоҷирон дар додгоҳи ноҳияи Первомайскии шаҳри Ростови лаби Дон

Ҳафт узви гурӯҳи ҷиноӣ, ки ба ташкили будубоши ғайриқонунии беш аз 167 ҳазор шаҳрвандони хориҷӣ дар Русия айбдор мешаванд, дар додгоҳи Маскав ҷавоб хоҳанд гуфт. Хабаргузории Тасс дар ин бора бо такя ба хадамоти матбуоти прокуратураи Маскав менависад. Аъзои гурӯҳи боздоштшуда, ҳангоми дар шакли электронӣ дар қайди муҳоҷират гузоштани исми шаҳрвандони хориҷӣ дар бораи макони будубоши онҳо маълумоти бардурӯғ додаанд. Дар ҳуҷҷатҳо ширкатҳои тиҷоратӣ ва соҳибкорони инфиродӣ ҳамчун ҷониби қабулкунанди муҳоҷирон зикр шуда, як биное дар хиёбони Октябр ҳамчун макони будубоши онҳо нишон дода шудааст. Барои чунин хидмат боздоштшудаҳо аз муҳоҷирон аз дуюним то 5 ҳазор рубли русӣ мегирифтаанд. Ба ҳамин шева гумонбарон аз моҳи сентябри соли 2018 то моҳи ноябри соли 2019 ба қайди ғарйиқонунии 167 ҳазор шаҳрвнади хориҷӣ дар ҳудуди Русия мусоидат кардаанд. Нафаре, ки ин ҷиноятро тарҳрезӣ намудааст, дар ҷустуҷӯ қарор дорад.

Болоравии нархи гази моеъ дар шимоли Тоҷикистон

Чанд рӯзи охир дар шаҳри Хуҷанд, нархи гази моеъ баланд рафтааст. Ҳоло дар нуқтаҳои фурӯши сӯзишворӣ дар маркази вилояти Суғд як литри он 4 сомониву 40 дирам нарх дорад, ки нисбати рӯзҳои гузашта аз 30 то 40 дирам бештар аст. Аз ин пештар, арзиши ин навъи маводи сӯхт аз 4 то 4 сомониву 10 дирам нарх дошт. Сабаби баланд шудани нархи гази моеъ дар шимоли Тоҷикистон шарҳ дода нашудааст. Тибқи оморҳои расмӣ, 60 фисади нақлиёт дар Тоҷикистон маҳз аз ҳамин намуди сӯзишворӣ истифода мекунад. Дар гузашта баъди ҳар болоравии нархи гази моеъ қимати маҳсулоти хӯрокворӣ дар бозорҳои кишвар ҳам афзоиш ёфтааст.

Ёфтҳои бештар

XS
SM
MD
LG