Дар мавориде афроди дигарандеш тарсонда мешаванд, то қодир ба баёни дидгоҳҳои интиқодомези худ набошанд. Ба навиштаи ин гузориш, мудохилаи давлат дар ин замина ба вижа дар давраи интихоботи саросарии моҳи феврал мушоҳида мешуд. Дар остонаи интихобот давлат монеъ аз суханрониҳои телевизионии ҳизбҳои мухолиф шуд ва чандин нашрияро, ки дидгоҳҳои мутафовит аз давлат доштанд, таътил кард.

Гузориши Вазорати хориҷаи Амрико меафзояд, ки расонаҳои мустақил дар Тоҷикистон тайи соли 2005 фаъол буданд, аммо ҳамвора бо шеваҳои мухталифи назорат ва фишор рӯбарӯ мешуданд. Дар натиҷа тайи соли гузашта давлат бар расонаҳои гурӯҳӣ назорати бештаре эъмол кард. Вазорати хориҷаи Омрико бо истинод ба суханони нозирони байналмилалӣ ва гурӯҳҳои нозири вазъияти матбуот мегӯяд, ки ин чархиши саду ҳаштод дараҷаӣ дар бархурди давлат бо озодии баён бахше аз талоши давлат барои таҳкими қудрату нуфузи худ дар остонаи интихоботи раёсати ҷумҳурӣ дар соли 2006 будааст. Дар ин давра давлати Тоҷикистон танҳо ба як расонаи мустақилли сиёсӣ муҷаввизи фаъолият содир кард, ки ҳамакнун ба номи "Миллат" мунташир мешавад. Дар кулл, 8 нашрия парвонаи кор дарёфт карданд, ки аксари онҳо ғайрисиёсӣ ва тафреҳианд. Дархости рӯзномаи "Имрӯз" барои фаъолият тавассути Вазорати адлия ё додгустарии Тоҷикистон рад шуд. Ҳамаи нашрияҳои умдаи мухолиф таҳти фишори давлат аз чоп бозмонданд.

Моҳи сентябр шабакаи дуввуми саросарӣ ба номи "Сафина" оғоз ба кор кард, ки як шабакаи давлатист.

Дар идомаи гузориш мехонем, ки аз 18 шабакаи талевизюнии мустақил танҳо маъдуде воқеъан аз истиқлол бархурдоранд ва фаъолияти шуморе аз онҳо қатъ мешуд.

Гузориши вазорати хориҷаи Амрико ҳамчунин ба мушкилоти созмони ғайридавлатии "Интернюз" дар заминаи сабти ном дар Тоҷикистон ишора мекунад, ки қасд дошт таҳти ҳимояти худ панҷ шабакаи родюии роҳандозӣ кунад.

Давлат ба бахши аъзами расонаҳо ёрона ё субсид мепардохт. Бархе аз истгоҳҳои мустақилли родю ва телевизюн дорои имконоти худии забту пахш ҳастанд, аммо аксаран барои пахши барномаҳои худ аз фиристандаҳои давлатӣ кор мегиранд. Вазорати хориҷаи Амрико муътақид аст, ки давлати Тоҷикистон дар раванди пахши ин барномаҳо ихтилоле иҷод накардааст.

Сипас ин гузориш ба мавориди ҷузъии азияту озори рӯзноманигорон мепардозад. Аз ҷумла ба қазияи Ҷумъабой Толибов – узви Иттиҳодияи Рӯзноманигорони Тоҷикистон ва як мақоми давлатӣ дар ноҳияи Айнӣ, ки ба хотири интиқоди ошкор аз мақомоти маҳаллӣ ва ифшои камбудҳои минтақа маҳкум ба зиндон шуд. Иттиҳомоти матруҳа алайҳи вай авбошӣ, вуруди ғайримуҷоз ба як сохтмон ва сӯиистифода аз мақом буд, аммо гузориши вазорати хориҷаи Омрико бо истинод ба Анҷумани расонаҳои мустақилли Тоҷикистон мегӯяд, ки ин боздошту маҳкумият мустақиман бо фаъолияти рӯзноманигории оқои Толибов иртибот дошт. Ин гузориш меафзояд, ки пас аз моҷарое тӯлонӣ саранҷом рӯзи 16 декабр Ҷумъабой Толибов аз зиндон озод шуд.

Мавриди дигар марбут ба Мухтор Боқизода - сардабири рӯзномаи мустақилла "Нерӯи сухан" мешавад, ки ба хотири истифодаи ғайримуҷоз аз нирӯи барқ барои сохтмони чопхонааш ба ду сол кори иҷборӣ маҳкум шуд. Муҷозоти ҷароими мушобеҳ дар Тоҷикистон маъмулан ҷарима аст. Нашрияи оқои Боқизода ба хотири интиқодоташ алайҳи давлат ва раисиҷумҳурӣ шинохташуда буд. Гузориши Вазорати хориҷаи Амрико дар як ҷумла менависад, ки дар таҳқиқи қазияи зарбу ҷарҳ ё лату кӯби Раҷаб Мирзо - сардабири нашрияи "Рӯзи нав" дар соли 2004 низ ҳич пешрафте воқеъ нашуд.

Дигар шеваҳои озори рӯзноманигорон дар Тоҷикистон, ба навиштаи Вазорати хориҷаи Амрико, муҳокимаҳо барои бим додани дигар хабарнигорон, "ҳушдор"-ҳои телефунӣ ва рӯёрӯ дар додситонӣ ё дар дафтари нашрияҳо, бозрасиҳои молиётии гузинишӣ, бозҷӯиҳои наздику дақиқи расонаҳои нисбатан мустақил, ба монанди бозшумории теъдоди нусхаҳои як нашрия ва муқоисаи он бо теъдоди расмии нашрия будааст.

Тайи соли 2005 давлат бештари чопхонаҳо ва лавозими пахши барномаҳоро таҳти кунтрул дошт. Бино ба ин гузориш, Вазорати додгустарӣ ё адлияи Тоҷикистон дастуре дарёфт кард, ки ба созмонҳои ғайридавлатии дорои нашрия ҳаққи фаъолият надиҳад. Моҳи январ давлат чопхонаи "Кайҳон"-ро таътил кард. Нашрияҳои мустақилли "Нерӯи сухан", "Адолат", "Рӯзи нав" ва "Одаму олам" имкони интишор дар ҳеч чопхонаи давлатӣ ё хусусиро наёфтанд. Баъд аз он "Одаму олам" ва "Нерӯи сухан" муваффақ шуданд танҳо як бор мунташир шаванд. Дигар рӯзномаҳои мустақил низ бо мушкилоти ҳамсоне рӯбарӯ шуданд.

Дар поёни фасли озодии баён ва матбуъот дар ин гузориш омадааст, ки дар соли 2005 сиёсатмадорони мухолифон ба телевизюни давлатӣ дастрасии бисёр маҳдуд доштанд. Пас аз дастрасии маҳдуди онҳо дар давраи интихоботи саросарӣ дигар хич садои мухолифе аз родю ва телевизюни давлатӣ пахш намешавад. Гузориши Вазорати хориҷаи Амрико меафзояд, ки давлат чандин сомонаи интернетиро дар қаламрави Тоҷикистон масдуд кардааст, аз ҷумла сомонаи TajikistanTimes.ru, ки мутаъаллиқ ба Додоҷони Атоуллоҳ - рӯзноманигори норозии муқими Москов аст.

Дар пайи фаромадани тумани сахт дар шаҳри Душанбе, парвозҳо аз фурудгоҳи пойтахт муваққатан қатъ шудааст.

Аз шоми 22 декабр Душанберо туман фаро гирифтааст ва вазъ субҳи 23-уми декабр низ чунин буд.

Бар асоси онлайн-лавҳаи фурудгоҳи Душанбе, ҳамаи парвозҳо, аз ҷумла парвозҳо ба самти Маскав, Дубай, Екатеринбург ва баръакс аз соати 12-и шоми 22 ба 23-юми декабр қатъ шудаанд.

Парвоз ба шаҳри Хоруғ, ки тибқи ҷадвали фурудгоҳ имрӯз, соати 12:20 ба нақша гирифта шуда буд, низ лағв шудааст.

Ҳавошиносон аз 22 то 24 декабр дар ҷумҳурӣ, фаромадани туман ва яхбандиро пешгӯӣ карда буданд.

Маълум нест, ки парвозҳои ба таъхир афтода кай барқарор мешаванд.

Мақомоти Оҷонсии назорат дар соҳаи энергетика аз ошкор шудани як ҳолати дуздии барқ аз сӯйи корманди муассисаи тақсимоти барқ хабар доданд.

Бино ба иттилои ин ниҳод, корманди зеристгоҳи барқӣ дар минтақаи Кӯлоб аз бинои навбатдорӣ то хонаи истиқоматиаш, пинҳонӣ хатти барқ кашида, бидуни пайвасткунӣ ба ҳисобкунак барқ истифода мекардааст.

Назари гумонбар дар дуздии барқ маълум нест.

Оҷонсии назорат дар соҳаи энергетика дар пайи як санҷиш дар шаҳру ноҳияҳо аз ғайриқонунӣ истифода шудани нерӯи барқ аз сӯйи сокинон нигаронӣ кардаасӣ.

Бино ба гузориши ин ниҳод, дар пайи санҷиши зеристгоҳҳои барқӣ дар шаҳру навоҳии кишвар, чандин ҳолати қонуншиканӣ, аз ҷумла ду ҳолати истифодаи ғайриқонунии нерӯи барқ дар ноҳияҳои Варзоб ва Рӯдакӣ ошкор шудааст.

Мақомоти Тоҷикистон ахиран мубориза бо дуздии барқро сахттар карданд. Аз ҷумла, ба Кодекси ҷиноӣ тағйирот ворид шуд, ки барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндонро пешбинӣ кардааст.

Барномаи ғизои Созмони Милал гуфт, ки ба миллионҳо ниёзманди хӯрок дар Афғонистон ёрӣ расонда наметавонад. Дар ин кишвари ҳамсояи Тоҷикистон эҳтимоли афзоиши маргумир, бахусус дар миёни кӯдакон ва он ҳам бо сабаби камбуди маводи озуқа бештар мешавад.

Баъди соли 2021 ва ба қудрат баргаштани “Толибон”, ёриҳои байналмилалӣ ба Афғонистон хеле кам шуд ва илова ба ин офатҳои зиёди табиие ба мисли зилзила зиндагии бе ин ҳам риққатбори мардуми одиро сангинтар кард.

Солеҳа, як зани афғонистонӣ, гуфт: "Зимистон давраи сахт аст. Мо имкони харидани хӯрокро надорем. Ҳар пуле шавҳарам ба даст меорад, барои харидани ғизо сарф мешавад. Мо наметавонем хонаро гарм кунем. Агар касе хайр кард, танҳо он вақт оташдони мо рӯшан мешавад. Мо ҳатто як плита харида наметавонем."

Ба ҳисобҳои Барномаи ғизои СММ, дар миёни 17 миллион мардуми Афғонистон, ки бо гуруснагӣ дучор ҳастанд, се миллион нафар аз муҳоҷирони рондашуда аз Покистону Эрон мебошанд.

Ҷон Айлиефф, раиси Барномаи ғизои СММ дар Афғонистон, мегӯяд, “афзоиши якбораи камбуди ғизо ҳаёти миллионҳо кӯдакро дар хатар мегузорад. Мо шоҳиди коҳиши фоҷеабори кумакҳои ғизоӣ мешавем ва бенавотарин афғонистониҳо намедонанд ин зимистонро чӣ гуна пуштисар хоҳанд кард. Бозгашти маҷбурӣ аз кишварҳои ҳамсоя, хушксолӣ ва коҳиши фоҷеабори ёриҳои ғизоӣ дар саросари кишвар як бӯҳрони харобиовари гуруснагиро барои 17 миллион аҳолӣ ба вуҷуд овардааст”.

Барномаи ғизои СММ мегӯяд, “аввалин бор дар даҳсолаҳои охир наметавонад маъракаи ёрӣ дар мавсими зимистонро ба роҳ монад”. Ин созмон мегӯяд, барои ёрӣ ба мардум на камтар аз ним миллиард доллар зарур аст.

Ҳукумати “Толибон” ёздаҳ касро бо иттиҳоми фурӯш ва қочоқи маводи нашъадор шаллоқ задааст.

Ин кор рӯзи 22-юми декабр дар шаҳри Кобул сурат гирифт.

Додгоҳи олии “Толибон” дар эъломияе гуфт, ин афрод ҳамчунин аз 7 моҳ то 3 сол дар зиндон хоҳанд монд.

Гурӯҳи тундрави “Толибон” пас аз бозгашт ба қудрат дар Афғонистон (августи 2021) чандин нафарро дар пеши назари мардум ҷазо додааст.

Гузоришгари вижаи Созмони Милал дар умури ҳуқуқи башари ин сиёсати “Толибон”-ро танқид карда, хоҳони боздоштани он шудааст.

Намояндагони Амрико ва Украина музокироти Флорида барои поён додан ба ҷанги Украинаро "самарабахш ва созанда" хонданд.

Ҳар ду тараф рӯзи 21 декабр дар як баёнияи муштарак аз ин гуфтугӯҳо истиқбол карданд, аммо ҳеч нишонаи рӯшане аз даст ёфтан ба поёни ин бӯҳрон, ки наздик ба чаҳор сол мешавад идома дорад, ироа нашуд.

Ин музокирот ба муддати се рӯз дар шаҳри Майами дар аёлати Флорида баргузор шуд ва Стиф Виткофф, намояндаи вижаи Амрико барои Ховари Миёна, мизбонии онро ба ӯҳда дошт.

Дар ҷараёни ин гуфтугӯҳо, музокиракунандагони Русия ва Украина ба таври алоҳида бо Виткофф мулоқот карданд.

Ин дидорҳо бахше аз тозатарин талошҳои идораи Доналд Трамп, раисҷумҳури Амрико барои поён додан ба ҷанги Русия ва Украина ба шумор меравад.

Дар ҳамин ҳол, Кремл мегӯяд, ки эҳтимоли даст ёфтан ба созиши сулҳ дар ҷанги Украина дар рӯзҳои таътилоти Соли Нав андак аст.

Эмомалӣ Раҳмон, раиси ҷумҳури Тоҷикистон, рӯзи 21-уми декабр барои ширкат дар мулоқоти ғайрирасмии кишварҳои муштаракулманофеъ ба шаҳри Санкт-Петербурги Русия сафар кардааст. Дар ин бора дафтари матбуоти раёсати ҷумҳурӣ хабар дод ва гуфт, ки Сироҷиддини Мӯҳриддин ва ҳайате аз мақомоти расмии дигар ӯро дар ин сафар ҳамроҳӣ мекунанд.

Сафари Эмомалӣ Раҳмон ба зодгоҳи Владимир Путин, раиси ҷумҳури Русия 5 рӯз баъд аз қатли Қобилҷон Алиев, як навраси 10-солаи тоҷик дар Русия сурат мегирад, ки ҷомеаи Тоҷикистону кишварҳои Осиёи Марказиро такон дод. Қобилҷон Алиев, рӯзи 16-уми декабр, дар натиҷаи ҳамлаи як ноболиғи рус ба мактабе дар ноҳияи Одинтсово дар вилояти Маскав кушта шуд.

Ҳамлавари ноболиғ бо корд ба мактаб ворид шуда, аввал посбони мактаб ва сипас Қобилҷонро наврасро теғ задааст ва тамоми ҷараёни ҳамлаашро ҳам ба навор гирифтааст. Маълум нест, ки Эмомалӣ Раҳмон дар ҷараёни нишаст, қатли навраси тоҷик ва мушкили нафратпароканӣ ба муҳоҷирони тоҷикро дар Русияро бо Владимир Путин дар миён мегузорад ва ё не.

Дмитрий Песков, сухангӯи раиси ҷумҳури Русия гуфтааст, қарор аст, дар ҳошияи ҳамоиши сарон ба Эмомалӣ Раҳмон, раиси ҷумҳури Тоҷикистон, Шавкат Мирзиёев, раиси ҷумҳури Узбекистон ва Содир Ҷабборов аз Қирғизистон “Ҷоизаи Толстой” ва ё ҷоизаи сулҳи Русия дода шавад. Ба раҳбарони се кишваре, ки миллионҳо нафар аз шаҳрвандонашон дар Русия кор мекунанд ва бадрафтории маъмурони милиса ва қатли онҳо ба дасти миллатгароёни рус зуд-зуд расонаӣ мешавад.

Дар пайи кушта шудани як навраси тоҷик дар мактабе дар Русия, намояндагии ЮНИСЕФ ё Бунёди кӯдакони СММ дар Тоҷикистон гуфтааст, "мактабҳо бояд ҷойи амният, омӯзиш ва рушд бошанд".

Ин созмон 19-уми декабр дар изҳороти кутоҳе ба хонавода ва наздикони Қобилҷон Алиев, навраси кушташудаи тоҷик ҳамдардӣ кардааст.

"Ҳар як кӯдак ҳуқуқ дорад дар муҳити амн, бо эҳтиром ва ғамхорӣ ба воя расад. Зӯроварӣ нисбат ба кӯдакон ҳеҷ гоҳ ва ҳеҷ ҷо қобили қабул нест”, - омадааст дар изҳороти Бунёди кӯдакони Созмони Милал.

Қобилҷон Алиев, навраси 10-солаи тоҷик, ки дар мактаби ба номи Успенская дар шаҳри Одинтсовои вилояти Маскав таҳсил мекард, рӯзи 16-уми декабр кушта шуд. Бо гумони қатли ин наврас, Тимофей К. боздошт шудааст. Рӯзи 18-уми декабр додгоҳ Тимофейи 15-соларо барои ду моҳ ба ҳабс гирифт.

Қатли Қобилҷон Алиев вокунишҳои зиёдеро дар дохили Тоҷикистон ва берун аз он ба миён овард.

Маҷлиси миллӣ, палатаи болоии порлумони Тоҷикистон тағйирот ба Кодекси ҷиноиро тасвиб кард, ки бар асоси он барои рафтан ба назди фолбин ва ҷодугарҳо ҷазо таъйин мешавад.

Бар асоси қарори Маҷлиси миллӣ, минбаъд муштариёни фолбин ва ҷодугарҳо аз 50 то 60 нишондиҳанда барои ҳисобҳо (3750-4500 сомонӣ) ҷарима мешаванд.

Маҳмадалӣ Ватанзода, узви Маҷлиси миллӣ гуфтааст, ҳадаф аз тасвиби ин қонун "пешгирии густариши мафкураи ифротӣ ва болоравии хурофотпарастӣ" аст.

Тағйирот ба Кодекси ҷиноӣ, ки бар асоси он мизоҷони фолбинҳо ҷазо мегиранд, қаблан аз сӯи Маҷлиси намояндагон, палатаи поёнии порлумон қабул шуда буд. Акнун баъди имзои ин санад аз сӯи раиси ҷумҳур, қонун иҷроӣ мешавад.

Мақомоти Тоҷикистон борҳо ба сокинон ҳушдор додаанд, ки аз рафтан ба назди фолбин ва ҷодугарҳо худдорӣ кунанд. Вазорати корҳои дохилии Тоҷикистон соли гузашта хабар дода буд, ки мизоҷони фолбинҳо ба шуъбаҳои ВКД даъват шуда, номашон дар махзанҳои алоҳида бо расмҳояшон гузошта мешавад.

Қаблан ҷазо барои худи фолбинҳо низ сахтар шуда буд.

Мақомоти Тоҷикистон давоми як соли ахир маъракаи мубориза бо фолбинон ва ҷодугаронро оғоз кардаанд. Вале пайвандони бархе аз ин боздоштшудаҳо гуфтанд, хешовандони онҳо ҷодугар ё фолбин набуданд, балки танҳо дуохонӣ мекарданд.

Мақомоти қудратии Исроил як шаҳрванди Русияро бо иттиҳоми ҷосусӣ барои Эрон боздошт кардаанд.

Созмони амнияти дохилии Исроил ва Вазорати дифои ин кишвар 19-уми декабр дар баёнияи муштарак аз фарди боздоштшуда Виталий Звягинтсев ном бурданд.

Ба гуфтаи мақомоти Исроил, Звягинтсев 35 сол дошта, бо раводид ё визаи корӣ ба Исроил омада буд.

Ба гуфтаи манбаъ, ин шаҳрванди Русия аввали моҳи декабри имсол бо иттиҳоми ҳамкорӣ бо як маъмури амниятии Эрон дастгир шудааст.

Виталий Звягинтсев ба он муттаҳам шудааст, ки дар ивази гирифтани маблағ, аз бандар ва киштиҳо дар саросари Исроил акс гирифта ба Эрон мефиристод.

Мақомоти қудратии Исроил дар моҳҳои ахир беш аз 50 шаҳрванди ин кишварро бо иттиҳоми ҷосусӣ ба фоидаи Эрон дастгир кардаанд.

Роҳбарони кишварҳои узви Иттиҳоди Аврупо тавофуқ карданд, ки барои Украина 90 миллиард евро қарзи бефоиз ҷудо кунанд.

Антониу Кошта, раиси Шӯрои Аврупо хабар дод, ки қарз давоми солҳои 2026-2027 ба Украина дода мешавад. "Мо ин уҳдадорӣ қабул кардем ва онро иҷро мекунем", - гуфт ӯ.

Роҳбарони ИА рӯзи 19-уми декабр нахуст масъалаи додани даҳҳо миллиард евро дороиҳои Русияро ба Укрина баррасӣ карданд. Вале маҳдудиятҳои қонунӣ боис шуданд, ки баъзе кишварҳои узви Иттиҳоди Аврупо, аз ҷумла Белгия ба ин қарор розӣ нашаванд. Белгия, ки бахши асосии дороиҳои Русия дар онҷо нигоҳдорӣ мешаванд аз тасмими ҷавобии Маскав ва бад шудани фазои сармоягузорӣ дар Авупо нигаронӣ кард.

Русия таҳдид кардааст, ки дар сурати ба Украина додани дороиҳояш ба додгоҳ муроҷиат мекунад.

Дороиҳои Русия дар Аврупо 210 миллиард евро ҳисоб шудааст. Бештари ин маблағҳо дар ҳисоби бонкии Euroclear дар Белгия нигаҳдорӣ мешаванд.

Истгоҳи таксиҳо дар Хуҷанд, ҷое, ки мусофиронро ба Душанбе мебаранд, мисли рӯзҳои пешина серодам нест. Ронандагон мегӯянд, шояд боридани барфу фаромадани ярч ё тарма мардумро тарсондааст.

Теъдоди ками мусофироне ҳам, ки ба роҳ баромадаанд, сафари худро ба Душанбе муҳиму зарурӣ хонданд. Бархе дигар натавонистаанд, ки ба ҳавопаймо билет гиранд.

“Рости гап, хостем, ки бо ҳавопаймо равем, афсӯс гуфтанд, ки парвоз ҳам нест, билет ҳам нест. Бинобар ин, зарур шуморидем, ки аз роҳи заминӣ ба Душанбе равем,” – гуфт Садриддин Саидов, сокини Хуҷанд.

Чанд мусофир иддао карданд, ки дар чунин рӯзҳои сард нархи роҳкирои таксӣ аз Хуҷанд ба Душанбе низ гарон шудааст.

Ронандагон сабабро афзоиши харҷ дар зимистон номиданд. Чун, ба гуфтаи онҳо, бо сабаби гоҳе баста шудани роҳ маҷбуранд, ки соатҳо дар як ҷой биистанд ва барои гарм шудани мусофирон мошини худро хомӯш накунанд.

Ронанда Баҳриддин Аюбов гуфт: “Дар тобистон агар 30 литр бензин сарф шавад, ҳоло 40 литр сарф мешавад. Меистӣ, гарм мекунӣ.”

Дар ҳамин ҳол, Маркази обу ҳавосанҷӣ дар Тоҷикистон аз эҳтимоли фаромадани селу ярч дар минтақаҳои кӯҳистонӣ ҳушдор додааст. Ба иттилои ин ниҳод, эҳтимол дар рӯзҳои оянда ин вазъ идома кунад ва аз сокинон хоста шудааст, ки аз сафарҳои бидуни зарурат худдорӣ намоянд.

Ширкати IRS, масъули нигоҳубин ва ҷамъоварии пул дар роҳи Душанбе-Чаноқ, ки солҳо боз номи моликонаш расман эълон нашудааст, шаби 17-уми декабр аз фаромадани тарма хабар дод. Ҳоло ин ягона роҳе, ки шимоли кишварро бо пойтахт мепайвандад, боз аст, агарчӣ убуру мурур аз он мисли баҳору тобистон осон нест.

Вазири амнияти дохилии Амрико гуфт, бо дастури президент Доналд Трамп додани раводид ё визаи “DV-1” ба ғолибони бахтозмоии “Green Card” боздошта шуд.

Кристи Ноэм 19-уми декабр дар шабакаи “Х” навишт, “бо фармони раисҷумҳур Трамп фавран ба Хадамоти шаҳрвандӣ ва муҳоҷират (USCIS) дастур медиҳам, ки “DV1”-ро боздорад, то боварӣ ҳосил шавад, ки амрикоиҳо дигар аз ин барномаи фоҷиабор осеб набинанд.”

Тасмим баъди он эълон шуд, ки Клаудио Мануэл Невес Валенте, касе, ки соли 2017 ба воситаи “DV1” ба Амрико ворид шудааст, дар Донишгоҳи Браун дар Род-Айленд тирпаронӣ кард. Дар ин ҳодиса рӯзи 13-уми декабри имсол ду кас кушта ва нуҳ нафар захмӣ шуданд.

Ҷасади Валентеи 48-соларо дертар пайдо карданд. Муфаттишон бовар доранд, ки ӯ дар қатли як донишманди ҳастаӣ низ даст дорад.

Кристи Ноэм, вазири амнияти дохилии Амрико мегӯяд, Доналд Трамп дар соли 2017 ва пас аз он ки як узви гурӯҳи террористии “Давлати исломӣ” ё ДОИШ мошини борбарро ба рӯи одамон дар Ню-Йорк ронд ва ҳашт касро кушт, барои қатъи ин барнома мубориза бурд. Ба гуфтаи Ноэм, ин ронанда низ тавассути барномаи “DV1” ба Амрико рафтааст.

Амрико барои муҳоҷирон кишвари фурсатҳо ва ҷойи кору ояндаи хубе арзёбӣ мешавад, аз ин рӯ, аз ҳар гӯшаи дунё, аз ҷумла Тоҷикистон бо ҳар роҳе талош мекунанд, ба ин кишвар бирасанд. Аз Тоҷикистон соли гузашта наздик ба се ҳазор кас барандаи "Green Card” шуданд.

Владимир Путин, президенти Русия, мулоқоти солонаашро бо хабарнигорони дохилӣ ва хориҷӣ бо тасвири пешрафти артиши Русия дар ҷабҳаи ҷанг дар Украина оғоз намуд. Вай ҳеч ишора накард, ки Кремл барои расидан ба сулҳ ба кадом созише ё гузаште омода аст.

Раҳбари Русия дар мулоқоти солонааш дар бораи қатли бераҳмонаи як навраси тоҷик дар вилояти Маскав, ки сокинони Тоҷикистон ва баъзе аз гӯшаҳои дунёро такон дод, ёде накард. Суол дар бораи ин ҳодиса аз ҷониби хабарнигори тоҷике ҳам, ки дар толор ва дар рӯ ба рӯи Путин қарор дошт, дода нашуд. Қобилҷон Алиеви даҳсола 16-уми декабр дар мактабе дар вилояти Маскав аз дасти ноблоиғи 15-солаи рус ба қатл расид. Ӯро дар ноҳияи Шаҳринав дафн карданд. Муттаҳам ба ҳабс гирифта шудааст.

Мулоқоти Владимир Путин рӯзи 19-уми декабр доир ва чанд соат мустақим дар шабакаҳои телевизионии Русия пахш шуд. Дар он Путин бори дигар такрор кард, ки кишвараш дар ҷанг бо Украина пешдастӣ дораду Маскав тамоми вазифаҳои дар наздаш гузоштаро иҷро хоҳад кард.

Ӯ ҷониби Украинаро сабабгори бунбасти музокироти сулҳ номид: "Ибтидо мувофиқ буданду ба санадҳо имзо гузоштанд. Сипас аз ҳамаи созишҳо даст кашиданд. Ҳозир ҳам аз хатми низоъ ба воситаи ташаббусҳои осоишта худро канор мекашанд."

Дар ҳар сурат, ба гуфтаи Путин, "аз тарафҳои гуногун ва аз ҷумла режими Киева баъзе ишораҳоро ба зарурати муколама мебинему эҳсос мекунем. Мехоҳам бигӯям, ки мо ҳам омода ҳастем ва мехоҳем, ки низоъ бар пояи тақозоҳое, ки дар моҳи июни соли гузашта дар Вазорати корҳои хориҷии Русия матраҳ намудаем, хотима ёбад. Яъне рафъи сабабҳои ибтидоии сар задани низоъ бояд бартараф карда шаванд."

Ин дар ҳолест, ки Владимир Зеленский, раисҷумҳури Украина, борҳо гуфтааст, ки кишвараш барои музокироти сулҳ омодааст, вале Маскав корро кашол дода, барои поён додан ба ҷанг майле нишон намедиҳад.

Доналд Трамп, раисҷумҳури Амрико, талош дорад, ки таҷовузи наздик ба чорсолаи Русияро ба хоки Украина хотима бахшад.

Иттиҳоди Аврупо чанд соат пеш аз мулоқоти Путин дар мавриди истифодаи пулҳои ҳабсшудаи Русия ба мувофиқат нарасид. Тибқи пешниҳод мебоист ин пулҳо барои иқтисоди Украина сарф мешуданд. Ба ҷойи он, Иттиҳоди Аврупо тасмим гирифт, ки ба Киев қарзи боимтиёзи баробар бо 90 миллиард евро бидиҳад.

Видеоро дар инҷо бинед:

Як манбаъ дар ҳукумати "Толибон" даргирии ду шаб пеш дар вилояти Бадахшони Афғонистонро тасдиқ карда, гуфтааст, ки сарбозони онҳо бар як махфигоҳи ҷангҷӯёни ДОИШ ё гурӯҳи террористии "Давлати исломӣ" ҳамла карданд.

Ин манбаъ, ки нахост номаш ифшо шавад, ба бахши афғонистонии Радиои Озодӣ гуфт, ин махфигоҳ ба касоне марбут буд, ки дар ҳамлаҳои охир бар шаҳрвандони Чин дар Тоҷикистон даст доштаанд.

Пеш аз ин, расонаҳои наздик ба "Толибон", аз ҷумла, "Ал-Мирсод" гузориш доданд, ки нерӯҳои "Толибон" шаби сешанбе амалиётеро алайҳи як махфигоҳи ДОИШ дар шаҳри Файзобод, маркази вилояти Бадахшон анҷом доданд.

Маълум нест, амалиёт талафоте дар пай доштааст ё не.

Тасдиқи хабар аз манбаъҳои дигар номумкин аст.

Дар ҳамлаҳои рӯзҳои 26 ва 30 ноябр дар ноҳияҳои Шамсиддин Шоҳин ва Дарвози Тоҷикистон панҷ коргари чинӣ кушта ва панҷ тани дигар захмӣ шуданд.

Ҳукумати Тоҷикистон гуфта буд, ки ин ҳамлаҳо аз хоки Афғонистон тарҳрезӣ шудааст.

Пас аз ин ҳодиса, намояндаи Чин дар Созмони Милали Муттаҳид аз ҳукумати "Толибон" хост, то гурӯҳҳои даҳшатафкан дар Афғонистон, аз ҷумла Ҳаракати исломии Туркистони шарқӣ ва Таҳрики Толибони Покистонро саркӯб кунад.

Гурӯҳи "Толибон" дар пайи ҳамлаи шоми 30 ноябр ба роҳсозони чинӣ дар ҳудуди ноҳияи Дарвози Вилояти Мухтори Кӯҳистони Бадахшон гуфт, ду танро дар пайванд ба ин ҳодиса дар ноҳияи Моймайи Бадахшони Афғонистон боздошт кардаанд. Ин гурӯҳ иддао кардааст, ки таҳқиқот дар ин бора оғоз шудааст.

Бо гузашти наздик ба як моҳ аз ин ҳамлаҳо, то кунун ҳеч гурӯҳе масъулияти онҳоро ба дӯш нагирифтааст. "Толибон" ҳам ҳарчанд ваъда додаанд, ки ҳодисаро таҳқиқ мекунанд, то кунун аз натиҷаҳои он хабаре нашр накардаанд.

Дар пайи вокунишҳои густурда ба қатли Қобилҷон Алиев, Вазорати маориф ва илми Тоҷикистон ҳамлаи "дорои хусумати миллӣ" ба ин шаҳрванди Тоҷикистонро маҳкум кард.

Раҳим Саидзода, вазири маорифи Тоҷикистон дар нома ба ҳамтои русаш навиштааст, "содир гардидани чунин ҷинояти ниҳоят мудҳиш дар мактаб боис ба норозигӣ ва ташвиши амиқ гардида, метавонад ба ҳолати иҷтимоии кӯдакон, волидон ва омӯзгорон" таъсири бад расонад.

Ӯ аз ҷониби Русия хостааст, "барои таъмини амният ва ҳифзи ҳуқуқи хонандагон дар муассисаҳои таълимӣ, новобаста аз мансубияти миллӣ ва шаҳрвандӣ" чораҳои бештар андешанд.

Рӯзи 18-уми декабр Омбудсмен ё Ваколатдори ҳуқуқи инсон дар Тоҷикистон қатли навраси тоҷик Қобилҷон Алиевро дар заминаи бегонаситезӣ дар Маскав маҳкум карда, аз мақомоти Русия хост, онро одилона таҳқиқ кунанд ва ҳар касеро, ки дар ин ҷиноят нақш дошт, ба ҷавобгарӣ бикашанд.

Расонаҳои давлатӣ гузориш доданд, ки Юсуф Раҳмон, дабири Шӯрои амнияти Тоҷикистон, низ бо ҳамтои русаш Сергей Шойгу ва сафири Русия дар Душанбе қатли Қобилҷон Алиевро дар миён гузошта, гуфтааст, ин ҷинояти мудҳиш дар ҷомеа нигаронии ҷиддӣ ва вокуниши васеъ ба бор овард.

Рӯзи 17-уми декабр Вазорати корҳои хориҷии Тоҷикистон ва ҳам Вазорати корҳои дохилӣ аз Русия хостанд, ки қатли навраси тоҷикистонӣ пурра ва ҳаматарафа таҳқиқ шавад.

Мария Захарова, сухангӯи Вазорати корҳои хориҷии Русия дар посухи умумӣ ба ин талаби Тоҷикистон танҳо ба хонаводаи навраси фавтида ҳамдардӣ карда гуфт, ҳодиса таҳқиқ мешавад.