Пайвандҳои дастрасӣ

Хабари нав

Дар чанд ҷумла

"Нерӯи Сухан" дубора ба дасти хонандагонаш расид

Баъд аз таваққуфи қариб нимсола шумораи навбатии ҳафтаномаи мустақили сиёсиву иҷтимоии «Нерӯи Сухан» нашр шуд. Мухтор Боқизода, муассис ва сардабири ин ҳафтанома ба саҳифаи интернетии радиои Озодӣ гуфт, нашри дубораи «Нерӯи Сухан» бо бардоштани мӯҳр аз дари чопхонаи «Кайҳон» аз ҷониби маъмурони пулиси молиёт имконпазир гашт. «Кайҳон» танҳо чопхонае буд, ки нашрияи «Нерӯи Сухан»-ро нашр мекард ва ин чопхона низ ба сардабири нашрия Мухтор Боқизода тааллуқ доштааст. Мухтор Боқизода гуфт, ҷурмҳое, ки қаблан далели боздошти фаъолияти чопхонаи «Кайҳон» ва нашрияи «Нерӯи Сухан» гашта буд, тасдиқи худро наёфтааст. Аммо дар мавриди тӯл кашидани иҷозаи нашри дубораи ҳафтанома, Мухтор Боқизода гуфт, "Ин муаммо то ба имрӯз барои худи ман низ маълум нест. Агар ман худам пофишорӣ намекардам ва аз паси ин кор намедавидам, шояд ин то ба як солу ду сол тӯл мекашид."


Дар охири моҳи январи соли ҷорӣ маъмурони пулиси молиёт фаъолияти чопхонаи «Кайҳон» ва нашри нотамоми ҳамон шумораи «Нерӯи Сухан»-ро, ки дар ин чопхона ба табъ мерасид, боздоштанд. Маъмурин он замон, бидуни қарордод ва иҷозати расмӣ дар ин чопхона нашр шудани "Нерӯи Сухан" ва аз пардохти молиёт сар печидани кормандони онро далели аслии иқдоми худ бар зидди нашрия хонда буданд. Он бори саввум буд, ки «Нерӯи Сухан» ҳадафи таъқиби мақомоти полиси молиёт қарор мегирифт. Ҳангоми боздошти фаъолияти чопхона ва нашрия худи Мухтор Боқизода дар хориҷ аз Тоҷикистон қарор дошт.

Ва аммо дар шумораи тозанашри «Нерӯи Сухан» матолибе аз қабили «Интизорӣ бадтар аз марг буд», «Демократия ва мафкураи ғуломӣ», «Камбудиҳо ислоҳ мехоҳанд», «Убайдуллоев ба кӣ «панҷ» ва ба кӣ «ду» монд?», «Овораҳои бепул» ва маводи дигар ба табъ расидааст.
Ҳумоюни Шаҳриёр, Душанбе

Ҳамаи хабарҳои имрӯзро дар инҷо бихонед

Баъди авҷгирии сафари русҳо, Тоқаев ваъдаи гуфтугӯ бо Маскавро дод

Қосимҷомарт Тоқаев

Президенти Қазоқистон Қосимҷомарт Тоқаев ваъда дод, ки дар робита ба авҷгирии сафари русиягиҳо ба Қазоқистон бо ҷониби Русия гуфтугӯ хоҳад кард.

"Зарбулмасали қазоқӣ ҳаст, ки мегӯянд: "Муносибатҳои нек бо ҳамсояҳо - кафили оромӣ аст". Нигаҳ доштани созиш бо ҳамсояҳо хеле муҳим аст. Мо аз ин зиёне намебинем. Дар рӯзҳои ахир аз Русия одамони зиёде ба кишвари мо меоянд. Бисёрии онҳо маҷбур шудаанд, ки ба далели вазъи пешомада сафар кунанд. Мо бояд нисбати онҳо ғамхорӣ изҳор намоем ва амнияташонро таъмин кунем. Ин масъалаи сиёсӣ ва башарӣ аст. Ман ба ҳукумат дастури чораандешӣ додаам", - гуфт Тоқаев рӯзи 27-уми сентябр.

"Мо гирифтори буҳрон нестем ва мушаввашӣ ҳам надорем. Ҳукумат бояд корашро анҷом диҳад. Ба онҳое ки аз хориҷ омадаанд, кӯмак расонида мешавад, аммо онҳо ҳеч имтиёзе дарёфт нахоҳанд кад. Мо бо ҷониби Русия гуфтугӯ мекунем ва ин масъаларо ба манфиати кишвари худ ҳал менамоем", - гуфт Тоқаев.

Баъди он ки рӯзи 21-уми сентябр Владимир Путин, президенти Русия фармони басиҷро содир кард, ҳазорон шаҳрванди он кишвар талоши ба хориҷ рафтанро карданд. Дар натиҷа дар марзи Русия бо Қазоқистон навбатпойии тӯлонӣ ташкил шуд.

Ба 82 шаҳрванди Қирғизистон дипломи тақаллубӣ додаанд

Додситонии кулли Қирғизистон дар Донишгоҳи давлатии Ҷалолободи он кишвар тафтиш анҷом ва ошкор кардааст, ки ба 82 донишҷӯи он донишгоҳ дипломи қалбакӣ додаанд.

Додситонӣ хабар додааст, ки ин донишҷӯҳо дар риштаи "Омӯзгорӣ" таҳсил ва дар бораи 2-3 сол дарс додан дар мактабҳои миёни ҳуҷҷатҳои тақаллубӣ пешниҳод ва ба ин тартиб, диплом гирифтаанд.

"Мудирони бархе аз мактабҳо дар вилояти Ҷалолобод фармонҳои дурӯғин содир ва ба 82 донишҷӯ бидуни фаъолият дар мактаб дафтарчаи меҳнатӣ додаанд. Дар натиҷа ба давлат дар ҳаҷми 8,5 млн сом зиёни молӣ расидааст", - омадааст дар хабари додситонии он кишвар.

Дар пайи ин ҳодиса парвандаи ҷиноӣ боз ва тафтишот давом дорад.

Ҷанҷоли дипломатии Ҷопону Русия

Вазири умури хориҷии Ҷопон Ҳаяшӣ Йошимаса

Вазорати корҳои хориҷии Ҷопон сафири Русия дар он кишвар Михаил Гулизинро ба вазорат даъват кард.

Ба сафир эътирози Ҷопон дар робита ба боздошти консули ин кишвар дар Владивостоки Русия расонида шуд. Хадамоти амниятии Русия рӯзи якшанбе консули Ҷопонро ба гумони ҷосусӣ боздошт кард.

Вазорати корҳои хориҷии Ҷопон аз Русия талаб кардааст, ки дар робита ба боздошти консул Мотоки Татсунорӣ расмаен узр пурсад. Вазири Ҷопон гуфт, дипломат ҷинояте содир накардааст.

Хадамоти амнияти федеролии Русия ё ФСБ рӯзи якшанбе аз боздошти консули Ҷопон хабар дод. ФСБ гуфт, Татсунорӣ дар ивази маблағ маълумоти махфиеро дар бораи робитаҳои Русия бо кишварҳои дигар ва таъсири таҳримҳо ба иқтисоди Русия дарёфт кардааст.

Хадамоти матбуотии ФСБ навореро нашр кард, ки дипломат дар қаҳвахонае ҳуҷҷатҳоеро дарёфт мекунад ва баъди боздошт ба амалҳои ғайриқонунии худ иқрор менамояд.

Татсунорӣ "персона нон грата" эълом ва ба тарки Русия вазифадор шудааст. Эҳтимол меравад, Ҷопон ҳам як дипломати Русияро ихроҷ кунад.

Муносибатҳои Маскав ва Токио ба бадтарин сатҳ расидаанд. Баъди ҳамлаи Русия ба Украина Ҷопон ба таҳримҳои Ғарб нисбати Русия пайваст.

ВКД-и Қазоқистон гуфт, русҳои фирориро ба Русия намефиристанд

Навбат дар сарҳади Русия ва Қазоқистон

Қазоқистон шаҳрвандони Русияро, ки аз басиҷи низомӣ фирор кардаанд, ба Русия истирдод намекунад. Дар ин бора рӯзи 27-уми сентябр вазири корҳои дохилии Қазоқистон Марат Ахметҷонов хабар дод.

Вай афзуд, миёни Қазоқистон ва Русия дар мавриди табодули зиндониён ва истирдоди ҷинояткорон созишнома амал мекунад. "Муҳимтарин нукта дар шартнома ин аст, ки ҳам дар кишвари мо ҳам дар Русия амали шаҳрванд ҷиноят дониста шавад", - гуфт Ахметҷонов.

Вай илова кард, асос барои истирдоди шаҳрванди хориҷӣ - парвандаи ҷиноие аст, ки дар кишвараш нисбати вай боз кардаанд.

"Агар комиссариатҳои ҳарбӣ дархости истирдод кунанд, пас ин барои истирдод асос шуда наметавонад", - гуфт вазир.

Баъди он ки рӯзи 21 сентябр Владимир Путин, президенти Русия фармони басиҷро содир кард, ҳазорон шаҳрванди он кишвар талоши ба хориҷ рафтанро карданд. Дар натиҷа дар марзи Русия бо Қазоқистон навбатпойии тӯлонӣ ташкил шуд.

Дар Қирғизистон истеъфои Қамчибек Тошиевро талаб карданд

Қамчибек Тошиев

Як созмони мухолиф дар Қирғизистон истеъфои раиси Кумитаи давлатии амнияти миллии он кишвар Қамчибек Тошиевро талаб кардааст.

Масъулони "Ҷунбиши муттаҳидаи демократӣ" рӯзи 27-уми сентябр гуфтанд, аз қарори бардоштани чаҳор посгоҳ дар минтақаҳои сарҳадии Қирғизистон бо Тоҷикистон норозиянд.

Раисони кумитаҳои давлатии амнияти миллии Тоҷикистону Қирғизистон рӯзи 25-уми сентябр дар пайванд ба сарҳад санади нав имзо карданд. Ҷониби Тоҷикистон онро "қатъи муноқиша дар марз" номид. Қамчибек Тошиев дар бораи бардоштани ҳашт посгоҳ (чаҳор посгоҳӣ аз ду тараф) хабар дод.

Гап дар бораи "Бедак", "Кех", "Қарачиқум" ва "Шаршара"-и Тоҷикистон ва "Тамдиқ", "Булак-Бошӣ", "Катта-Туз" ва "Дача"-и Қирғизистон меравад.

Дар ҳоле ки мақомоти Тоҷикистону Қирғизистон бовар доранд, бо бардоштани посгоҳҳо манбаи низоъро аз байн мебаранд, "Ҷунбиши муттаҳидаи демократӣ" гуфтааст, "сокинони Бодканд бе ҳимоят монданд".

"Дар 30 соли истиқлол кишвари мо ҳеч гоҳ ба чунин вазъи душвор дучор наомада буд, ки ҳоло рӯбарӯ шудааст. Қарорҳои қабулшуда ва санадҳои имзокардаи Тошиев бо мавқеи президент дар Созмони Милал мухолифанд," -- омадааст дар эъломияи Ҷунбиш.

Масъулони созмон дар баробари истеъфои Қамчибек Тошиев ба ҷавобгарии ҷиноӣ кашидани ӯро низ хостаанд.

Раиси Кумитаи давлатии амнияти миллии Қирғизистон Қамчибек Тошиев изҳороти "Ҷунбиши муттаҳидаи демократӣ"-ро шарҳ надодааст.

Рӯзҳои 14-17-уми сентябри имсол дар сарҳади Тоҷикистону Қирғизистон задухӯрди мусаллаҳона сар зад.

Вазири корҳои хориҷии Тоҷикистон гуфт, беш аз 40 ғайринизомӣ кушта ва дусад нафари дигар захмӣ шуданд, вале омори низомиёни ҳалокшударо нагуфт. Радиои Озодӣ бо такя ба манобеи худ, мақомоти маҳаллӣ ва шабакаҳои иҷтимоӣ рӯйхати 74 қурбониро таҳия кард.

Мақомоти Қирғизистон мегӯянд, дар ин ҳодиса 62 кас кушта, тақрибан 200 нафар захмӣ ва садҳо иншоот қисман ё пурра вайрон шуданд.

Ду тараф якдигарро ба таҷовузи низомӣ гунаҳкор мекунанд.

  • Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.
  • Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.

“Душанбе сити банк” хидматрасонӣ ба кортҳои бонкии "Мир"-и Русияро қатъ кард

"Душанбе Сити" баъди сар задани нуқси техникӣ хидматрасониро ба кортҳои бонкии "Мир"-и Русия бас кард. Дар ин бора расонаҳои Русия хабар медиҳанд.

"Душанбе Сити" то чанд вақти охир, дар баробари "Амонатбонк" ба кортҳои "Мир" хидматрасонӣ мекард.

Дар "Душанбе сити" хабар доданд, ки нуқси техникӣ 23 сентябр сар задааст. Ин дар ҳолест, ки бонкҳои Узбекистон низ хидматрасонӣ ба кортҳои "Мир"-ро қатъ кардаанд.

Хидматрасонӣ тавассути кортҳои низоми пардохтии "Мир"-и Русия дар Узбекистон аз 23-юми сентябр қатъ шудааст.

Дар ин бора Маркази ягонаи ҷумҳуриявии "Uzcard" хабар дода, гуфтааст, он "бо сабабҳои техникӣ" қатъ гашт.

Хабари бо мушкил рӯбарӯ шудани соҳибони кортҳои "Мир" дар Узбекистон чанд рӯз пеш дар шабакаҳои иҷтимоӣ нашр шуда буд. "Uzcard" 21-уми сентябр бо нашри изҳороте гуфта буд, ки қабули кортҳои "Мир"-ро идома медиҳад.

Қаблан Бонки "Halyk Bank"-и Қазоқистон ҳам қабули кортҳои "Мир"-ро қатъ карда буд ва чандин бонки туркӣ, аз ҷумла бузургтарин бонки хусусии Туркия - "Iş Bankası" эълом кард, ки ҳамкориро бо низоми пардохтии русии "Мир" қатъ кардааст.

ИМА ва шариконаш хоҳони ҷаласаи вижа дар бораи уйғурҳо шуданд

Маркази бозтарбия дар Чин

Амрико ва чанд ҳампаймони ғарбияш пешниҳод кардаанд, ки Шӯрои Ҳуқуқи Башари СММ дар пайванд ба бадрафтории эҳтимолии Чин бо уйғурҳо ва ақаллияти дигари мусулмон дар Шинҷон як баҳси вижа даъват кунад.

Дипломатҳо гуфтанд, дархост аз ҷониби Иёлоти Муттаҳида, Канада, Бритониё, Дания, Финландия, Исландия, Норвегия ва Шветсия фиристода шуд.

Ҷаласаи навбатии Шӯрои Ҳуқуқи Башари Созмони Милали Муттаҳид дар аввали соли оянда баргузор хоҳад шуд.

Сафири Бритониё дар Созмони Милал гуфт: "Мо наметавонем чунин нақзи шадид ва муназзами ҳуқуқи башарро нодида бигирем. Шӯрои Ҳуқуқи Башар сокит буда наметавонад ва набояд хомӯш биистад."

Иёлоти Муттаҳида мақомоти Чинро ба наслкушӣ муттаҳам кардааст.

Мишел Бачелет пеш аз рафтанаш аз мақоми Комиссари Олии Ҳуқуқи Башари СММ гузориши тундлаҳнеро нашр кард. Бино бар он, мақомоти Чин дар маъракаи давомдоре, ки онро бозтарбия ва пешгирӣ аз ифротгароии хушунатомез дар Шинҷон меномад, "ҷиноят алайҳи башарият" содир кардааст.

Тошканду Бишкек ба имзои созишномаи нави марзӣ омода мешаванд

Абдулло Орипов (рост) ва Қамчибек Тошиев

Ҳайатҳои ҳукуматии Қирғизистону Узбекистон оид ба таъйин ва аломатгузории хати марзи давлатӣ 26-уми сентябр дар ҷаласаи навбатии худ санадеро имзо карданд.

Ба огаҳии хадамоти матбуотии Девони вазирони Қирғизистон, санади имзошуда имкон медиҳад, ки расмиёти мувофиқаи лоиҳаи созишномаи нав дар бораи қитъаҳои алоҳидаи марзи ин кишвар бо Узбекистон оғоз шавад.

Санадро раиси Кумитаи амнияти миллии Қирғизистон Қамчибек Тошиев ва сарвазири Узбекистон Абдулло Орипов имзо кардаанд.

Қирғизистону Узбекистон 1378 километр марзи муштарак доранд ва то ҳол 85 дарсад ё 1170 километри он муайян шудааст. Моҳи феврали соли 2021 хабар дода шуд, ки ҷонибҳо роҷеъ ба 13 дарсади боқӣ ба созиш расидаанд.

Расонаҳо моҳи августи имсол хабар доданд, ки Бишкек ва Тошканд тасмим доранд, то охири сол баҳсҳои марзиро ба поён расонанд.

Эътирози сокинони Доғистон зидди сафарбаркунӣ ба ҷанги Украина

Эътирозҳо зидди сафарбаркунӣ ба ҷанги Украина дубора дар Доғистон оғоз гашта, дар ҷараёни онҳо 90 кас дар Махачқалъа ва Хасавюрт дастгир шудааст.

Ба иттилои тарҳи "Қафқоз.Воқеӣ", садҳо сокини Махачқалъа зидди сафарбаркунӣ ба ҷанги Украина ба кӯча баромада, миёни онҳо ва кормандони пулис задухӯрд сурат гирифтааст.

Дертар маъмурони пулис ва Горди миллӣ майдони марказии шаҳр ба номи Ленинро муҳосира, ҷавононро боздошт ва телефонҳои онҳоро тафтиш кардаанд.

Ҳудуди 200 кас дар Хасавюрт ҳам зидди басиҷ эътироз кардааст. Дар натиҷа пулис чандин нафарро дастгир кард. Дар миёни онҳо рӯзноманигори расонаи "Новое дело" Идрис Юсупов ва сармуҳаррири "RusNews" Сергей Айнбиндер низ ҳастанд. Айнбиндер гуфт, ҳангоми боздошт ӯро латтукӯб ва техникаҳояшро мусодира карданд.

Эътирозҳо зидди сафарбаркунӣ ба ҷанги Украина дар Махачқалъа бори нахуст 25 сентябр баргузор шуд. Он замон ҳудуди 120 нафар дастгир гашта буд.

НАСА барномасозони тоҷикро ба озмун даъват мекунад

Барои иштирок дар озмуни байналмилалии "NASA Space Apps 2022" сабти ном оғоз шудааст.

"Гӯшаи амрикоӣ" дар Душанбе бо нашри хабарномае иттилоъ додааст, ки ҳакатони бузургтарин дар ҷаҳон дар Душанбе рӯзҳои 1-2 октябр баргузор мешавад. Барои иштирок дар озмун хоҳишмандон бояд қаблан худро дар сомонаи ин озмун сабтином кунанд.

Дар хабарнома гуфта шудааст, "Space Apps ин чорабинии ҷаҳонӣ барои барномасозон, илмомӯзон, тарроҳон, ҳикоянависон, созандагон, технологҳо ва ғайра дар шаҳрҳои саросари ҷаҳон аст, ки дар он дастаҳо маълумоти ройгон ва дастраси NASA -ро барои ҳалли мушкилоти мавҷуда дар Замин ва кайҳон истифода мебаранд".

Хароҷоти ҳамаи иштирокчиён аз ҷониби баргузоркунандагони озмун пардохт карда мешавад. Маблағи умумии ҷоизаҳои ҳакатон 2500 долларро ташкил медиҳад ва агар дастае ба 10 тими беҳтарини ҷаҳон дохил шавад, метавонад ба қароргоҳи NASA дар Амрико равад.

Ба гуфтаи манбаъ, хоҳишмандон метавонанд ба таври гуруҳӣ дар озмун ширкат кунанд. Шарти асосӣ ин аст, ки дастаро дар саҳифаи интернетии Space Apps: spaceappschallenge.org сабти ном кунанд.

Лоиҳаҳои таҳияшуда аз ҷониби доварони маҳаллӣ барои муайян кардани номзадҳои ҷаҳонӣ аз Тоҷикистон баҳогузорӣ хоҳанд шуд ва сипас коршиносони NASA онҳоро баррасӣ карда, барандагони ҷоизаи ҷаҳониро эълон мекунанд.

Қазоқистон тартиби додани иҷозати иқоматро тағйир медиҳад

Вазорати корҳои дохилии Қазоқистон тасмим гирифтааст, ба қоидаҳои додани иҷозати зисти муваққат ё доимӣ барои хориҷиён ва шахсони бешаҳрвандӣ дар он кишвар тағйирот ворид кунад.

Лоиҳаи тағйиру иловаҳо дар сомонаи "Open NLA" нашр шудааст. Тибқи тағйиру иловаи пешниҳодӣ, ҳангоми дархости иҷозати зист дар Қазоқистон бояд шиносномаи хориҷӣ пешниҳод карда шавад, зеро бар асоси банди 13-и қонун "Дар бораи ҳуҷҷатҳои тасдиқкунандаи шахсият", Қазоқистон танҳо шиносномаи хориҷиро эътироф кардааст.

Ин лоиҳаи қонун 6 рӯз баъд аз фармони президенти Русия Владимир Путин дар бораи басиҷ, ки боиси афзоиши сафари русиягиҳо ба Қазоқистон шуд, пешниҳод мешавад. Лоиҳа то 10 октябр дар баррасии ом қарор дорад.

Ба иттилои "Pasportist", дар соли 2022 танҳо 30 дарсади шаҳрвандони Русия шиносномаи хориҷӣ доранд.

Бародарзодаи Нурсултон Назарбоев 6 сол зиндонӣ шуд

Кайрат Сатибалдӣ.

Додгоҳи ноҳияи Байконури шаҳри Остонаи Қазоқистон Кайрат Сатибалдӣ, бародарзодаи президенти пешин Нурсултон Назарбоевро барои 6 сол зиндонӣ кард.

Бародарзодаи Назарбоев дар азхудкунии 12,7 миллиард тангаи "Қазоқтелеком" ва 28,6 миллиард тангаи "Маркази хадамоти нақлиёт"-и Қазоқистон айбдор мешуд. Худи ӯ пештар дар додгоҳ ғорати маблағҳои ширкатҳоро эътироф карда буд.

Хадамоти мубориза зидди фасоди Қазоқистон 13 марти имсол Кайрат Сатибалдиро, ки ба гуфтаи мақомот, мехост, кишварро ба қасди Дубай тарк кунад, дастгир кард. Он замон гуфта мешуд, ки Сатибалдии 51-сола дар "сӯистифода аз мақом ва дуздии дороиҳои ширкати мухобиротии "Қазоқтелеком" дар ҳаҷми махсусан калон" айбдор мешавад.

Дар хадамот гуфта буданд, ки Кайрат Сатибалдӣ "ба халалдор кардани амнияти давлат" низ айбдор мешавад.

Қаблан расонаҳо Кайрат Сатибалдиро ягона муассиси ширкати оффшории "Skyline Investment Company S.A." номида буданд. Forbes Kazakhstan дороии Сатибалдиро 163 миллион доллар арзёбӣ ва ӯро ба рӯйхати бонуфузтарин соҳибкорони Қазоқистон ворид карда буд.

Хадамоти марзбонии Қирғизистон хабари Радиои Озодиро рад кард, аммо...

Исфара, марзи Тоҷикистону Қирғизистон

Хадамоти марзбонии Кумитаи давлатии амнияти миллии Қирғизистон хабари Радиои Озодиро дар бораи он ки сарҳадбонони қирғиз ба деҳаи Сомониён (ҷамоати Чоркӯҳи Исфара) аз миномёт оташ кушодаанд, рад кард. Раёсати иттилоот ва иртибототи ин ниҳод мегӯяд, сокини деҳаи Сомониён дар минае таркидааст, ки марзбонони Тоҷикистон дар наздикии сарҳад гузоштаанд.

Дар изҳорот гуфта мешавад, вазъ дар марзи миёни ду кишвар то соати 21:00-и 26-уми сентябри соли 2022 муътадил буда, ҷониби Қирғизистон созишҳои дуҷонибаи бадастомадаро эҳтиром ва риоят мекунад. Дар идома гуфта шудааст, аз мақомоти Тоҷикистон мехоҳанд, таваҷҷуҳро ба расонаҳое, ки бо пахши "маълумоти бардурӯғ, ки боиси барангехтани низоъҳои қавмӣ ва иғвогарона дар сарҳади муштаракан ҳифзшаванда мегардад, ҷалб кунанд."

Хадамоти марзбонии Кумитаи амнияти миллии Қирғизистон ҳамчунин гуфтааст, ки “маълумоти дар сомонаи Ozodi.org нашршуда аз ҷониби намояндагони мақомоти исфарагии марзбонии Ҷумҳурии Тоҷикистон ва намояндагони дигар мақомоти салоҳиятдор тасдиқ нашудаанд.”

Ин ниҳод ҳамчунин иттилоъ додааст, ки шаҳрванди Тоҷикистон дар минаи насбкардаи марзбонони Тоҷикистон таркида маҷруҳ гаштааст. Аммо шарҳ дода нашуд, ки ду таркиши дигар аз кадом ҳисоб ба амал омадаанд.

Пас аз нимирӯзии 26-уми сентябр Радиои Озодӣ хабар дода буд, ки ба самти деҳаи Сомониён дар ҷамоати Чоркӯҳи Исфара, ҳаммарз бо Бодканди Қирғизистон, аз миномёт се зарба зада шуд. Чанд ҳамсуҳбати Радиои Озодӣ дар деҳаи Сомониён гуфтанд, мушакҳо соати даҳи рӯз афтоданд.

"Бахтиёр, писари омӯзгор Олимҷон Орифов, захмӣ шуд ва ӯро ба шифохона бурданд," – гуфт яке аз мусоҳибони мо. Ба гуфтаи шоҳидон, Бахтиёр дар ҳоле захмӣ шуд, ки бо гуруҳи калони мардони деҳа ба тоза кардани шикастпораҳои хонаҳо машғул буданд.

"Издиҳоми одамон ё ҳашарчиён дар Сомониёни Боло калонтар буд ва ба ин ҷо ду мина афтода таркид. Як минаи дигар ба Сомониёни Поён исобат кард," -- гуфт ҳамсуҳбати мо.

Манбаи дигар дар мақомоти вилояти Суғд низ мушакпарониро тасдиқ кард. Вай гуфт, барояш чунин маълумот расондаанд, вале тафсилот надорад. "Ҳоло низомиён ва маъмурони милиса ба ҷои ҳодиса рафта, пайи баррасии воқеа ҳастанд. Ҳашарчиёнро муваққатан аз минтақа берун бурданд," – афзуд ӯ.

Пас аз нашр шудани изҳороти Хадамоти марзбонии Кумитаи амнияти миллии Қирғизистон, Радиои Озодӣ бо як намояндаи мақомоти давлатӣ дар ин ҷо дар тамос шуд ва ӯ партоби снаряди минометро тасдиқ кард. "Сокинони инҷо дар муайян кардани навъи силоҳе, ки аз он оташ кушода мешавад, таҷрибаи бой доранд ва шунидаанд, ки пеш аз таркиш садои партоб шудани мина баланд гаштааст", - гуфт ӯ ва афзуд, "раддия барои он аст, ки иҷро накардани шартнома боиси шармсории тарафест, ки ба қувваҳояш назорат карда наметавонад."

Ҳарчанд тарафи Қирғизистон мегӯяд, гуё мақомоти марзбонии Тоҷикистон дар шаҳри Исфара низ зарбаи минометро рад кардаанд, чунин раддия аз номи онҳо ба Радиои Озодӣ ворид нашудааст.

Тоҷикистону Қирғизистон рӯзи 25-уми сентябр санади қатъи муноқишаро дар марз имзо карда, барои бардоштани ҳашт посгоҳи ба гуфтаашон "дардисарсоз" аз ду тараф розӣ шудаанд. Ҳамчунин, ҷонибҳо созиш кардаанд, ки дар қитъаҳои марзие, ки бештари вақт низоъ онҷо рух медиҳад, дурбинҳои назоратӣ насб кунанд.

"40 000 шаҳрванди Русия тавассути Қазоқистон ба ҷойи дигар рафтанд"

Марзи Русия ва Қазоқистон. 22-юми сентябри 2022

Дар рӯзҳои охир наздик ба 40 ҳазор шаҳрванди Русия тавассути Қазоқистон ба кишварҳои дигар рафтаанд. Самти асосии сафари шаҳрвандони Русия Қирғизистон ва Узбекистон будааст.

"Дар 5 рӯзи охир қариб 6 ҳазор шаҳрванди Русия аз Қазоқистон тавассути фурудгоҳҳо ба кишварҳои дигар рафтаанд," -- хабар дод Аслан Аталиқов, як намояндаи Вазорати корҳои дохилии Қазоқистон.

Афзоиши сафари русиягиҳо ба Қазоқистон ба далели ҳамсоя будани Русия бо Қазоқистон аст, гуфтанд дар Вазорати корҳои дохилии Қазоқистон.

То рӯзи 21-уми сентябри имсол ҳудуди 9/12 ҳазор русиягӣ ба Қазоқистон ворид ва аз он хориҷ мешуданд. Рӯзи 22-юми сентябр ин нишондод якбора ду баробар афзудааст.

Эътироз дар даҳҳо шаҳри Эрон доман паҳн кардааст. ВИДЕО

Тазоҳуроти норозиён дар Эрон

Эътирозҳо дар шаҳру вилоятҳои Эрон идома доранд. Дар наворҳо дида мешавад, ки пулиси Эрон ба самти тазоҳургарон тир меандозад.

Эътирозҳо рӯзи 16-уми сентябр, баъди марги Маҳсо Аминии 22-сола шуруъ шуд. Ӯро пулис барои “бадҳиҷобӣ” дастгир карда буд. Манбаъҳои расмӣ шумори кушташудаҳоро дар эътирозҳо 41 нафар гуфтаанд, аммо ҳомиёни ҳуқуқ мегӯянд, теъдоди онҳо бештар аст.

Нед Прайс, сухангӯйи Вазорати корҳои хориҷии Амрико, гуфт, зӯроварӣ як нишонаи ҷумҳурии мардсолори Эрон аст.

“Ин як воқеияти одист. Маҳсо Аминӣ бояд зинда мемонд. Ягона сабаби марги ӯ шиканҷаи бераҳмонаи пулиси ба ном ахлоқ аст. Онгуна, ки мебинем саркӯб ва бераҳмиро ҳукумати Эрон алайҳи шаҳрвандони худ идома медиҳад,” – афзуд ӯ.

Ба нишони эътироз ба марги Маҳсо Аминӣ занони эронӣ дар шабакаҳои иҷтимоӣ наворҳое нашр карданд, ки дар он мӯйи худро қайчӣ мезананд.

Насиба Шамсоӣ, фаъоли ҳуқуқи зан, дар назди консулгарии Эрон дар Истанбул бо шиори “Озодӣ” мӯйи худро бурид. Тибқи қонунҳои Ҷумҳурии Исломии Эрон занон бояд дар ҷойҳои ҷамъиятӣ мӯйи худро намоиш надиҳанд.

Наворро дар инҷо бинед:

Эътироз дар Эрон дар даҳҳо шаҳр доман паҳн кардааст
лутфан мунтазир бошед

Феълан кор намекунад

0:00 0:02:52 0:00

Иброҳим Раисӣ, президенти Эрон, дар ҷаласаи Созмони Милал гуфт, аз ҳуқуқи шаҳрвандони худ ҳимоя мекунад. Роберт Менедес, вакили Маҷлиси Намояндагони Амрико, мегӯяд, Раисӣ дар дунёи дигар зиндагӣ мекунад.

Ӯ афзуд: “Медонед, марги зани 22-сола аз ҷониби пулиси ахлоқ як намунаи он аст, ки дар Эрон ҳуқуқи инсон аҳамият надорад ва занони эронӣ наметавонанд, аз ҳуқуқи худ дар ҷомеа баҳра баранд. Ин ба он маъно аст, ки пулро на барои таъмини аҳолӣ, балки барои мусаллаҳ кардани гурӯҳҳое сарф менамоянд, ки амалҳои террористӣ анҷом медиҳанд.”

Сенатор Роб Портман изҳороти президент Ҷо Байденро дар Маҷмааи Умумии Созмони Милал шарҳ дод, ки гуфт, дипломатия беҳтарин роҳи бархӯрд бо Теҳрон аст.

Дар ҳоли ҳозир таваҷҷӯҳи ҷаҳониён ба эътирозҳои Эрон, аз ҷумла дар Ню-Йорк нигаронида шудааст. Эътирозҳое, ки бар асари марги Маҳсо Аминӣ сар зад. Теҳрон мегӯяд, ӯ аз сактаи дил фавтид, вале хонаводааш бовар надоранд.

Тифлеро, ки зери садои тиру туфанг ба дунё омад, Сулҳия ном гузоштанд. ВИДЕО

Сулҳия зери садои тиру туфанг ба дунё омад
лутфан мунтазир бошед

Феълан кор намекунад

0:00 0:02:11 0:00

Тифлеро, ки шаби 16-уми сентябр, ҳангоми даргирӣ дар марзи Тоҷикистону Қирғизистон, дар Чашмасори Чоркӯҳ ба дунё оад, Сулҳия ном гузоштаанд. Ба хотире, ки дигар ҷанг такрор нашавад.

Шероз Ҷамолов, тағои Сулҳия, рӯзи 26-уми сентябр гуфт, "ҳамон шаб хоҳарам занг зад. Рӯшноии мошинро хомӯш карда, ҷонамро дар хатар гузоштаму омадам. На барқ буд на ҳеч чиз. Ба рӯшноии чароғи телефон таваллуд шуд. Бо миномёту гранатомёт мезаданд."

Хонаводаи Сулҳия мегӯянд, он шаб дар таҳхона пинҳон шуданд ва умед доштанд, ки тирандозӣ бас мешавад, вале то рӯзи 17-уми сентябр идома кард. Он рӯз на ҳар кас имкони аз деҳа берун шудан дошт.

Муноқишаи рӯзи 14-17-уми сентябр дар сарҳади Тоҷикистон бо Қирғизистон риштаи умри даҳҳо нафарро бурид.

Дар миёни садои мотам аз хонаводаҳои қурбониён гиряи Сулҳия умед ба зиндагиро дар ин хонавода бештар кардааст.

Дар Қирғизистон “дурӯғбофон”-ро барои хидмат дар марз мефиристанд

Содир Ҷабборов (Жапаров), президенти Қирғизистон, ба Вазорати дифои кишвараш дастур додааст, "шаҳрвандонеро, ки дар шабакаҳои иҷтимоӣ дар бораи бардоштани дидбонгоҳҳо ва гуё додани замин хабари нодуруст паҳн мекунанд, ба сафи нерӯҳои захиравӣ ҷалб кунанд". Дар ин бора Эрбол Султонбоев, сухангӯи президенти Қирғизистон, рӯзи 26-уми сентябр хабар дод.

Ба гуфтаи Султонбоев, дастур шудааст, ки "ба дасти онҳо силоҳ дода, то анҷоми муайянсозиву аломатгузории марз ба адои хидмати ҳарбӣ фиристанд".

"Агар мо ҳатто як метр заминро дода бошем, бигзор аз ҳамон ҷо инро исбот кунанд. Бигзор касоне, ки иттилои нодуруст паҳн мекунанд, шахсан аз ҳаводис огоҳ шаванд. Ду ҷониб дидбонгоҳҳоеро бардоштанд, ки дар наздикии ҳам ҷойгир буданд. Онҷо ба далелҳои ночиз доим тирпарронӣ рух медод, ки баъзан боиси низои бузург мешуд,” -- гуфтааст Ҷабборов.

Ахиран мақомоти Тоҷикистон гуфтанд, ки бо ҷониби Қирғизистон санади "қатъи муноқишаи марзиро" имзо карданд, вале тафсилоташро ошкор накарданд. Вохӯрии ҷонибҳо рӯзи 25-уми сентябр дар гузаргоҳи "Қизилбел" баргузор шуд.

Раиси Кумитаи давлатии амнияти миллии Қирғизистон гуфт, ду тараф ҳашт посгоҳро “мебардоранд”.

Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.

Бонки Ҷаҳонӣ ба зарардидагони Покистон $2 млрд. ёрӣ мекунад

Осебдидагон аз борону сел дар Покистон

Бонки Ҷаҳонӣ ба осебдидагон дар Покистон 2 миллиард доллар ёрӣ хоҳад кард.

Борону сели чанд моҳи охир дар он кишвар боис ба марги тақрибан 1600 кас шуда, ҳазорҳоро нафари дигарро бехонаву дар кардааст. Ҳукумати Покистон имкон надорад, ба ҳамаи зарардидагон ёрӣ расонад.

Ноиб-президенти Бонки Ҷаҳонӣ Мартин Райзер рӯзи 24-уми сентябр ба Покистон рафт ва бо вазъи офатзадагон шинос шуд. Райзер ваъда дод, ки мадади Покистонро аз 850 миллион доллар ба 2 миллиард доллар хоҳад расонд.

Дар вилоятҳои Синд ва Балуҷистони Покистон 33 миллион кас аз офатҳо зарар диданд. Роҳҳо ва дигар зерсохторҳо тахриб шуданд. Заминҳои кишт зери обу лой монданд. Созмони Ҷаҳонии Тандурустӣ аз хатари паҳншавии бемориҳо ҳушдор дод.

Рӯзи 23-юми сентябр дар вилояти Синд ба ҳукумати марказии Покистон муроҷиат карда, хоҳони ирсоли пизишкон барои мубориза бо вараҷаву дарунравӣ шуданд.

Ба иттилои мақомоти маҳаллӣ, дар ин вилоят 600 нафар аз бемориҳои гуногун фавтида, 300 каси дигар ба вараҷа мубтало шудааст. Дар вилоят 25 ҳазор кӯдак гурусна аст.

Пештар аз ин, дабири кулли Созмони Милал Антонио Гутерриш гуфта буд, ки барои барқарории Покистон 30 миллиард доллар зарур аст.

Зеленский гуфт, кишвараш шоҳиди "натиҷаҳои мусбат" аст.

Владимир Зеленский

Владимир Зеленский, раиси ҷумҳури Украина, рӯзи 25-уми сентябр гуфт, дар ҷабҳаи ҷанг бо Русия набардҳои сахте идома доранд, вале кишвараш шоҳиди “натиҷаҳои мусбат” аст.

Ӯ дар муроҷиати шабонаи видеоиаш гуфт, ки нерӯҳои Украина дар вилоятҳои Донетск, Харков, Миколаев ва Запорожйе пешравӣ доштаанд.

Мақомоти дастнишондаи Русия дар вилоятҳо барои ҳамроҳ шудан ба қаламрави Русия ба истилоҳ раъйпурсӣ баргузор мекунанд.

Ҷомеаи байнулмилалӣ ин раъйпурсиро “сохта” хондаанд.

Айни замон Ҷейк Салливан, мушовири амнияти миллии ҳукумати Амрико, гуфтааст, агар Русия дар Украина аслиҳаи атомӣ ба кор барад, ба “посухи қотеона”-и Амрико ва “пайомадҳои фалокатбор” рӯ ба рӯ хоҳад шуд.

Тазоҳуроти зиддиҳукуматӣ дар Эрон идома кард

Эътирозгарон дар кӯчаҳои Теҳрон

Тазоҳуроти зиддиҳукуматӣ дар Теҳрон ва дигар шаҳрҳои Эрон шаби гузашта ҳам идома кард ва бо вуҷуди онки мақомот гуфтаанд, саркӯби тазоҳургаронро сахттар мекунанд.

Тазоҳурот 10 рӯз пеш ва баъди он сар зад, ки як духтари эронӣ дар натиҷаи латукӯби пулис, ки ӯро барои ба гуфтаи онҳо “бадҳиҷобӣ” боздошт кард, даргузашт.

Шоми 25-уми сентябр донишҷӯён дар Донишгоҳи Теҳрон ҷамъ омада ва бо шиори “озодӣ, озодӣ” тазоҳурот карданд.

Раҳбари Қувваи қазоӣ ё Вазорати адлияи Эрон гуфт, ки ба тазоҳургарон амон намедиҳанд ва онҳоро саркӯб хоҳанд кард.

Дар натиҷаи тазоҳуроти 10-рӯза то кунун ба гуфтаи мақомот 41 нафар кушта шудаанд, вале ҳомиёни ҳуқуқ мегӯянд, теъдоди қурбониён зиёдтар аст, зеро эътироз ба 80 шаҳру маҳаллаҳои кишвар доман задааст.

Истеъфои Равшанбек Собиров: "Шарҳҳои манфӣ" ё "ҷанҷоли марзӣ"?

Равшанбек Собиров (аз тарафи чап)

Равшанбек Собиров, вакили пешин ва раиси ҷомеаи тоҷикони Қирғизистон, дар бораи истеъфояш аз мансаби раиси Оҷонси миллии сармоягузории он кишвар изҳори назар кард.

Сомонаи президенти Қирғизистон рӯзи 26-уми сентябр навишт, ки ӯ “бо хоҳиши худ” аз мақом рафт. Худаш ба бахши қирғизии Радиои Озодӣ гуфт, ки баъди як силсила “шарҳҳои манфӣ” дар шабакаҳои иҷтимоӣ тасмим гирифт, мақомашро тарк кунад.

“Вақтҳои охир дар шабакаҳои иҷтимоӣ маълумоти манфии зиёд паҳн мешавад. Намехоҳам, бо айби ман ба кори роҳбарияти кишвар соя афтад. Аз ин рӯ, тасмим гирифтам, ихтиёрӣ аз вазифаи раиси Оҷонси миллии сармоягузорӣ истеъфо диҳам,” – гуфт Равшанбек Собиров. Вале тафсилот надод, ки дар бораи чӣ гуна шарҳҳои манфӣ гап мезанад.

Тасмими сиёсатмадор дар пасманзари муноқиша дар марзи Тоҷикистону Қирғизистон эълон шуд, вале худаш гуфтааст, истеъфои ӯ ба даргирии мусаллаҳона дар марз рабт надорад. “Ман то ҳадди мумкин кор кардам. Ҳоло мехоҳам, саломатиамро беҳбуд бахшам,” – илова кардааст ӯ.

Равшанбек Собирови 52-сола, раиси созмони тоҷикони Қирғизистон, дар оилаи тоҷик дар ноҳияи Қаросуи вилояти Уш ба дунё омадааст.

Дар соли 2011 аввалин вазири тоҷик дар ҳукумати Қирғизистон буд, аммо дар соли 2013 боздошт ва бо гуноҳи ришваситонӣ ба зиндон маҳкум шуд. Собиров, ки ҳамеша парвандаашро сохтакорӣ ва дорои ангезаҳои сиёсӣ донистааст, моҳи марти соли 2014 бар асоси қонуни афв раҳо гардид.

Аз 11-уми марти соли 2022 дар мансаби раиси Оҷонси миллии сармоягузории Қирғизистон кор мекард. Пештар аз ҷониби ҳизби "Ота Ҷурт" вакили порлумон интихоб шуда, пас аз ҳаводиси моҳи октябри соли 2020 ва то замони таъини ҳукумати нав дар Қирғизистон дар соли 2021 дар вазифаи муовини нахуствазир кор кардааст.

13 кушта дар тирпарронӣ дар як мактаби Ижевск

Маҳалли ҳодиса

Бар асари тирпарронӣ дар як мактаби миёна дар Ижевски Русия 13 нафар, аз ҷумла 7 хонандаи мактаб, ду маъмури амният ва ду омӯзгор кушта шудаанд.

Ҳодиса рӯзи 26-уми сентябр рӯй дод. Ҳамлавар худкушӣ кардааст. Вазорати корҳои дохилии вилояти Ижевск дар бораи 20 осебдида хабар дод.

Дар саҳифаи "Baza" дар Телеграм иттилоъ доданд, ки ҳамлагар аз ду туфангчаи Макаров тир холӣ кардааст.

Дар минтақа мотами серӯза эълон карданд. Ҳодисаро Сарраёсати тафтишотии Кумитаи тафтишот дар Маскав таҳқиқ мекунад.

Сабабҳои тирпарронӣ дар мактаб маълум нест.

Пас аз чанд ҳамла ба мактабҳои Русия, хадамоти амниятии он кишвар пайваста дар бораи боздошти шахсони гумонбар ба тарҳрезии ҳамлаҳои монанд гузориш медиҳанд.

Сокинон аз зарбаи мушакӣ ва захмӣ шудани як нафар дар Чоркӯҳ хабар доданд

Исфара, марзи Тоҷикистону Қирғизистон

Сокинони деҳаи Сомониён дар ҷамоати Чоркӯҳи Исфара, ҳаммарз бо Бодканди Қирғизистон, гуфтанд, ки рӯзи 26-уми сентябр бар асари зарбаи мушакӣ як нафар захмӣ шудааст.

Мақомоти Тоҷикистону Қирғизистон ҳанӯз ҳодисаро шарҳ надодаанд. Сокинони деҳаи Сомониён мегӯянд, "аз тарафи Қирғизистон се мушак омад."

Хадамоти марзбонии Қирғизистон шаби 25-уми сентябр вазъро дар сарҳад бо Тоҷикистон муътадил арзёбӣ карда буд, вале дар бораи ҳодисаи рӯзи душанбе ҳанӯз чизе нагуфтааст. Дар гузашта ду тараф якдигарро барои таҳрик додану тирпаронӣ гунаҳкор кардаанд.

Се ҳамсуҳбати Радиои Озодӣ дар деҳаи Сомониён гуфтанд, мушакҳо соати даҳи рӯзи душанбе афтоданд. "Бахтиёр, писари омӯзгор Олимҷон Орифов, захмӣ шуд ва ӯро ба шифохона бурданд," – гуфт яке аз мусоҳибони мо.

Ба нақли ӯ, мушак замоне партоб шудааст, ки "мардуми Чоркӯҳ барои ба тартиб овардани мавзеъҳои зарардида ҷамъ омада буданд."

Вай гуфт, "се рӯз боз дар маҳаллаи Сомониён ҳашар идома дошт ва баъди мушакпаронӣ мардум пароканда шуданд."

Манбаи дигар дар мақомоти вилояти Суғд низ мушакпарониро тасдиқ кард, вале тафсилот надод. "Ҳоло низомиён ва маъмурони милиса ба ҷои ҳодиса рафта, пайи баррасии воқеа ҳастанд. Ҳашарчиёнро муваққатан аз минтақа берун бурданд," – афзуд ӯ.

Ҳодиса пас аз он рӯй дод, ки Тоҷикистону Қирғизистон рӯзи 25-уми сентябр санади қатъи муноқишаро дар марз имзо карда, барои бардоштани ҳашт посгоҳи ба гуфтаашон "дардисарсоз" аз ду тараф розӣ шудаанд.

Ҳамчунин, ҷонибҳо созиш кардаанд, ки дар қитъаҳои марзие, ки бештари вақт низоъ онҷо рух медиҳад, дурбинҳои назоратӣ насб кунанд.

  • Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.
  • Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.
  • Дар даргириҳои 14-17-уми сентябри имсол аз ду тараф даҳҳо нафар кушта ва захмӣ шуданд. Тоҷикистону Қирғизистон якдигарро ба таҷовузи низомӣ муттаҳам мекунанд.

Тоҷикистону Қирғизистон барои насби дурбинҳо созиш кардаанд

Марзи Тоҷикистону Қирғизистон

Хадамоти марзбонии Кумитаи давлатии амнияти миллии Қирғизистон нуктаҳои дигари санадеро шарҳ дод, ки рӯзи 25-уми сентябр миёни раиси КДАМ-и Тоҷикистон ва раиси КДАМ-и Қирғизистон Қамчибек Тошиев имзо шуд.

Ҷонибҳо ба созиш расидаанд, ки на танҳо марзбононро аз баъзе посгоҳҳо берун оранд, балки нигаҳдории марзро ба дӯши нерӯҳое гузоранд, ки дар сарҳад рафту омад кунанд.

Ҳамчунин ҷонибҳо созиш кардаанд, дар қитъаҳои марзие, ки бештари вақт низоъ онҷо рух медиҳад, дурбинҳои назоратӣ насб кунанд.

"Мақомоти маҳаллии ҳокимияти давлатӣ ба сокинони Тоҷикистону Қирғизистон дар амалисозии фаъолияти кишоварзӣ дар заминҳои пештар истифодашавандаи Тамдиқ (Қирғизистон) - Бедак (Тоҷикистон) ва Булак-Бошӣ" (Қирғизистон), Кех "Тоҷикистон" мусоидат хоҳанд кард. Кори гуруҳи муштарак барои берун бурдани неруҳо ва техникаи низомии изофӣ идома хоҳад кард", - омадааст дар хабарномаи КДАМ Қирғизистон.

Ахиран мақомоти Тоҷикистон гуфтанд, бо ҷониби Қирғизистон санади "қатъи муноқишаи марзиро" имзо карданд, вале тафсилоташро ошкор накарданд. Вохӯрии ҷонибҳо рӯзи 25-уми сентябр дар гузаргоҳи "Қизилбел" баргузор шуд.

Дар иттилоияи ҷудогонаи ҳукумати Суғд танҳо дар бораи берун бурдани техникаҳои иловагии ҳарбӣ аз марз суҳбат шудааст. Ҷонибҳо рӯзи 19-уми сентябр низ барои берун бурдани нерӯҳои изофӣ ва техникаҳои ҳарбӣ аз марз ба созиш расида буданд, вале маълум нест, чаро иҷро нашуд.

Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.

Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.

Дар даргириҳои 14-17-уми сентябри имсол аз ду тараф даҳҳо нафар кушта ва захмӣ шуданд. Тоҷикистону Қирғизистон якдигарро ба таҷовузи низомӣ муттаҳам мекунанд.

Ҳашт медали варзишгарони тоҷик дар қаҳрамонии Осиёи Марказӣ

Варзишгарони тоҷик дар мусобиқаи IV бози қаҳрамонии Осиёи Марказӣ оид ба варзиши сабук, ки рӯзҳои 23-25-уми сентябр дар маҷмааи варзишии “Афросиёб Арена”шаҳри Самарқанди Узбекистон баргузор шуд, ҳашт медал (се тило, ду нуқра ва се биринҷӣ) ба даст оварданд.

Дар ин мусобиқаи байналмилалӣ беш аз 300 варзишгар аз шаш кишвари Осиёи Марказӣ - Афғонистон, Қазоқистон, Қирғизистон, Туркманистон, Тоҷикистон, Узбекистон, инчунин Филиппин, Тайланд ва Малайзия ширкат варзиданд.

Варзишгарон дар давидан ба масофаҳои мухталиф, ҷаҳиш ба баландӣ, ҷаҳиш бо ходачӯб, ҷаҳиш ба дарозӣ, ҷаҳиши секарата, партоби диск, ҳаво додани найза, гулӯлапартоӣ ва гурзандозӣ рақобат карданд.

Ба ҳайати дастаи мунтахаби Тоҷикистон бо роҳбарии сармураббӣ Ғайрат Неъматов 15 варзишгар дохил буд.

Фаворис Музрапов дар давидан ба масофаи 200 метр бо натиҷаи 21,75 сония мақоми аввалро касб кард ва бо медали тило сарфароз гашт.

Илдар Аҳмадиев дар ҷаҳиш ба дарозӣ бо натиҷаи 7 метру 73 сантиметр ҷойи аввалро гирифт ва бо медали тило мукофотонида шуд.

Инчунин дастаи мардонаи Тоҷикистон дар эстафетаи 4Х100 метр бо натиҷаи 41,50 сония медали тило гирифт.

Ду медали нуқраро Илдар Аҳмадиев дар давидан ба масофаи 200 метр бо натиҷаи 21,97 сония ва Леонид Пронженко дар давидан ба масофаи 110 метр бо монеа бо натиҷаи 15,29 сония соҳиб шуданд.

Се медали биринҷиро бошад, Александр Пронженко дар давидан ба масофаи 200 метр бо натиҷои 22,17 сония, Зуҳуршоҳи Наҷмиддин дар давидан ба масофаи 3000 метр бо монеа бо натиҷаи 9 дақиқаю 44,32 сония ва дастаи мардонаи Тоҷикистон дар эстафетаи 4Х400 метр бо натиҷаи 3 дақиқаю 20,42 сония ба даст оварданд.

Ёфтҳои бештар

XS
SM
MD
LG