Пайвандҳои дастрасӣ

Хабари нав

Хабарҳо

Монеаи нави Узбакистон дар роҳи сохтмони Роғун

Хабаргузории КазТАГ иттилоъ додааст, ки ҳукумати Узбакистон барои ташкили Кумитаи миллии сарбандҳои бузург қароре ба тасвиб расондааст. Ҳадафи кумитаи мазкур ҳимоят аз манофеи Узбакистон ва таъмини бехатарӣ дар баробари обанборҳои бузурги минтақа ва истифодаи самарбахши захоири обии рӯдхонаҳои фаромарзӣ мебошад. Тибқи ин санади ба тасвибрасида мақоми раиси кумитаи миллии сарбандҳои бузург ба мақоми муовини вазири кишоварзӣ ва обёрии Узбакистон баробар хоҳад буд. Дафтари матбуотии вазорати мазкур гуфтааст, яке аз ҳадафҳои ин кумита ҷалби таваҷҷуҳи маҳофили байналмиллалӣ ба сохтмони обанборҳои бузург дар Осиёси Марказӣ, аз ҷумла обанбори Роғун хоҳад буд. Дар хабари КазТАГ омадааст, Тоҷикистон то ҳол натавонистааст, барои сохтмони Роғун сармоягузор пайдо кунад, зеро Узбакистон бар зидди сохтмони ин ниругоҳ аст.

Ҳамаи хабарҳои имрӯзро дар инҷо бихонед

Барканорӣ ва таъйини раисони чанд ноҳия ва ниҳодҳои давлатӣ дар Тоҷикистон

Таъйини кадрҳои нав дар баъзе аз ниҳодҳои давлатӣ ва ҳукуматҳои маҳаллӣ дар Тоҷикистон

Раисони чанде аз ноҳияҳои вилояти Суғд ва Хатлон "бо сабаби ба кори дигар гузаштан" аз мақомҳои худ озод ва дар вазифаҳои нав таъйин шудаанд. Ҷойивазкунии кадрҳо рӯзи 27-уми январ сурат гирифтааст. Мунтақидон ҳамвора аз чунин ҷобаҷогузорӣ интиқод мекунанд.

Бар асоси фармонҳои раиси ҷумҳур

Сиҷоуддин Саломзода аз вазифаи раиси Исфара,

Акрам Сулаймонзода аз вазифаи раиси ноҳияи Спитамен,

Комил Салимзода аз вазифаи раиси ноҳияи Ҷаббор Расулов,

Муҳаммадҷобир Раҷабзода аз вазифаи раиси ноҳияи Кӯҳистони Мастчоҳи вилояти Суғд,

Абдуалим Исмоилзода аз вазифаи раиси шаҳри Бохтар,

Маърифат Зоирзода аз вазифаи раиси ноҳияи Балҷувони вилояти Хатлон

озод шудаанд.

Сиҷоуддин Саломзода ҳамагӣ моҳи декабри соли 2018 ба мансаби раиси шаҳри Исфара расида буд. Ин минтақа ба сабаби номуайянии хатти марз бо вилояти Бодканди Қирғизистон яке аз маҳалҳои муноқишахез ба шумор меравад. Ҳафтаи гузашта сардори Идораи умури дохилии Исфара низ иваз шуд.

Хадамоти матбуоти президенти Тоҷикистон рӯзи душанбе хабар дод, ки Сиҷоуддин Саломзода иҷрокунандаи вазифаи раиси шаҳри Бохтар, маркази вилояти Хатлон таъйин шудааст.

Инчунин, дар ин рӯз

Акрам Сулаймонзода – иҷрокунандаи раиси шаҳри Исфара,

Темур Нуъмонзода – иҷрокунандаи раиси ноҳияи Спитамен,

Тоҳир Қудратзода – иҷрокунандаи раиси ноҳияи Ҷаббор Расулов,

Хайрулло Бобозода иҷрокунандаи вазифаи раиси ноҳияи Кӯҳистони Мастчоҳи вилояти Суғд,

Шералӣ Ҷалилзода – иҷрокунандаи вазифаи раиси ноҳияи Балҷувони вилояти Хатлон таъйин гардиданд.

Дар тағйироти дигар, Амонулло Салимзода ба ҷойи Изатулло Сатторӣ вазири кишоварзӣ ва Олимҷон Муҳаммадҷонзода ба ҷойи Гавҳар Шарофзода раиси Кумитаи забону истилоҳот тайъин шудаанд.

Сабаби аз мансаби вазири кишоварзӣ рафтани Сатторӣ "ба кори дигар гузаштан" гуфта шудааст.

Шарофзода, ки бо баҳсҳояш бо расонаҳо ва соҳибони фурӯшгоҳҳо дар бораи забон ва баъзе истилоҳҳои байналамилалӣ маъруф буд, номзади ҳизби ҳоким ба мақоми вакили порлумон дар интихоботи моҳи март аст.

Ширин Амонзода раиси нави Кумитаи рушди сайёҳӣ ва Абдулло Раҳмонзода раиси нави Кумитаи ҷавонон ва варзиш шудаанд. Курсии раиси Кумитаи ҷавонон баъди ба дастгоҳи иҷроияи президент рафтани раҳбари пешинаш Аҳтам Абдуллозода чанд рӯз боз холӣ буд. Абдулло Раҳмонзода дар гузашта ба ҳайси раиси дафтари ҳизби ҳоким дар Хатлон кор кардааст.

Ҳамасола дар остона ва баъд аз ҷаласаи солонаи ҳукумат дар сохторҳои давлатӣ тағйиротҳои кадрӣ сурат мегирад. Мунтақидон аксаран чунин тағйиротро танқид мекунанд, ки ба гуфтаи онҳо асосан аз ҷойивазкунии кадрҳои куҳна ва содиқ ба ҳукумат иборат аст.

Болтон шарҳ дод, ки чаро Трамп кӯмаки низомӣ ба Украинаро ба таъхир андохт

Доналд Трамп (аз чап) ва Ҷон Болтон (аз рост). 9-уми апрели соли 2018.

Раиси ҷумҳури Амрико Доналд Трамп моҳи август гуфтааст, мехоҳад, то замоне, ки Украина дар таҳқиқи фаъолиятҳои рақибони сиёсиаш кӯмак накунад, ихтисоси кӯмаки низомӣ ба онро боздоранд. Дар ин бора рӯзи 26-уми январ нашрияи "Ню-Йорк Таймс" гузориш дод.

Нашрия як дастхати Ҷон Болтон, мушовири собиқи амниятии ҳукумати Доналд Трампро тасвир кардааст, ки барои арзёбии қабл аз нашр ба ҳукумати Кохи Сафед фиристодаанд. Дар Амрико агар мақоми собиқе китобе нашр карданӣ бошад, бояд барои арзёбӣ ва мутолиаи пешакӣ ба ҳукумат бидиҳад.

Чарлз Купер, вакили дифои Ҷон Болтон рӯзи 26-уми январ ба расонаҳои Амрико гуфтааст, ки ӯ дастхатро рӯзи 30-уми декабр ба Шӯрои Амнияти Миллии Амрико фиристодааст. Кохи Сафед ҳанӯз ин масъаларо шарҳ надодааст.

Гурӯҳи вакилони дифои Доналд Трамп рӯзи 25-уми январ дар муҳокимаи парвандаи эълони нобоварӣ дар Сенати Амрико гуфтаанд, ки ҳеҷ далеле вуҷуд надорад, ки Доналд Трамп аз Украина хостааст, фаъолиятҳои рақибони сиёсии ӯ, аз ҷумла Ҷо Байден, рақиби эҳтимолиаш дар интихоботи ояндаи раиси ҷумҳурро таҳқиқ кунад. Писари Ҷо Байден дар гузашта узви Шӯрои мудирони як ширкати энержии Украина будааст.

Ҳалокати 7 нафар дар ҳамлаҳои ҳавоӣ дар Балх

Мақомоти Афғонистон мегӯянд, дар натиҷаи ҳамлаҳои ҳавоӣ дар вилояти Балх 7 нафар кушта шуданд. Ба гуфтаи мақомот, дар натиҷаи зарбаҳои ҳавоӣ Балх дар рӯзи 25-уми январ 3 зан ва 4 кӯдак ҷон додаанд.

Садҳо нафар баъди ин ҳодиса роҳи аслӣ ба ноҳияро баста ва дар назди қароргоҳи ҳукумат ҷамъ омадаанд ва талаб кардаанд, ки ҳодиса таҳқиқ шавад.

Хайбар Амирӣ, яке аз баргузоркунандагони тазоҳурот ба Радиои Озодӣ гуфт, нерӯҳои ҳукуматӣ бо ҳадаф гирифтани хонаҳои "мардуми оддӣ дар байни онҳо ваҳшат бармеангезанд".

Нерӯҳои Афғонистон ба зидди ҷангҷӯёни Толиб дар вилояти Балх амалиёт анҷом медиҳанд. Ин вилоят бо Тоҷикистону Узбекистон ҳаммарз аст.

Вазорати дифои Афғонистон гуфт, ки як гуруҳи ҳақиқатёбро барои таҳқиқи гузоришҳо дар бораи марги ғайринизомиён ба Балх фиристодааст. Ба гуфтаи вазорат, дар амалиётҳо ба зидди Толибон дар 24 соати гузашта 51 нафар аз ҷангҷӯёни ин гурӯҳро куштанд.

Узбекистон гуфт, 30 донишҷӯро аз Чин бармегардонад

Абдулазиз Комилов, вазири корҳои хориҷии Узбекистон рӯзи 25-уми январ хабар дод, ки 30 тан аз донишҷӯёни узбек, ки дар шаҳри Вуҳани Чин - маркази хуруҷи вируси нав - боқӣ мондаанд, ба кишвар баргардонида мешаванд.

"Дар ҳоли ҳозир вазорати корҳои хориҷӣ ва вазорати тандурустӣ дар ин маврид талош доранд", - гуфт Комилов. Вай санаи дақиқи баргардонии донишҷӯёнро зикр накард.

Ба иттилои вазорати корҳои хориҷии Узбекистон, дар Вуҳани Чин ҳудуди 250 тан аз шаҳрвандони Узбекистон истиқомат доранд, ки асосан донишҷӯ ҳастанд. Бисёре аз онҳо дар даври таътилҳои зимистонӣ ба Узбекистон баргаштаанд.

Пештар аз ин даҳҳо донишҷӯи узбек аз мақомоти кишварашон хостанд, ки онҳоро ба Узбекистон баргардонанд.

Бино ба маълумоти ахир, аз вируси нав аллакай дар ҷаҳон 56 кас ҷон бохта, ҷамъан 1975 нафар ба он гирифтор шудааст. Ин вирус нахуст дар шаҳри Вуҳони Чин пайдо шуда буд, ки 11 миллион аҳолӣ дорад.

Дар баробари Чин, вируси нав дар Австралия, Кореяи Ҷанубӣ, Ҷопон, Ҳонгконг, ИМА, Канада, Фаронса ва Тайван низ ошкор шудааст.

Майк Помпео дар Тошканд бо Сироҷиддини Муҳриддин мулоқот мекунад

Котиби давлатии ИМА Майк Помпео тасмим дорад, ҳафтаи равон дар доираи як сафар аз Бритониё, Украина, Белорус, Қазоқистон ва Узбекистон дидан кунад. Интизор меравад, дар ҷараёни ин сафар дидори ӯ бо вазири корҳои хориҷии Тоҷикистон Сироҷиддини Муҳриддин дар шаҳри Тошканд баргузор шавад. Дертар, дар моҳи март мулоқоти дигари онҳо дар чаҳорчӯби машваратҳои сиёсии ИМА ва Тоҷикистон дар Вашингтон сурат гирад.

Помпео дар Қазоқистон барои "таъйиди сулҳ, шукуфоӣ ва амният дар Осиёи Марказӣ" бо президент Қосимҷомарт Тоқаев, президенти пешин Нурсултон Назарбоев ва вазири умури хориҷии он кишвар Мухтор Тлеубердӣ дидору гуфтугӯ мекунад.

Котиби давлатии ИМА рӯзҳои 2-3 феврал барои "изҳори ҷонибдории Вашингтон аз ислоҳоти ҷорӣ дар Узбекистон, соҳибихтиёрӣ ва тамомияти арзии ин кишвар" бо президент Шавкат Мирзиёев ва вазири умури хориҷӣ Абдулазиз Комилов мулоқот хоҳад кард.

Ӯ ҳамчунин дар шаҳри Тошканд бо вазирони умури хориҷии Қазоқистон, Қирғизистон, Тоҷикистон, Туркманистон ва Узбекистон вохӯрда, ҷонибдории ИМА-ро аз рушди Осиёи Марказӣ дар доираи шакли "С5+1" баён мекунад.

Қарор буд, сафари Пампео ба ин кишварҳо аввали моҳи январ сурат гирад, вале ба далели ташаннуҷи авзоъ дар Ховари Миёна ба таъхир афтод.

Табибони қирғиз барои наҷоти бабри барфӣ талош доранд

Дар Қирғизистон чандин ҳафта мешавад, табибон барои наҷоти бабри барфие талош доранд, ки бо захми тир дар вилояти Талас пайдо шуда буд. Вазъи сиҳатии бабр оҳиста-оҳиста барқарор мешавад, вале зоҳиран ӯ ба муҳити зисти пештарааш баргашта наметавонад.

"Таваҷҷуҳи мардум одамро хушҳол месозад. Одамони зиёде занг мезананд. Бархеҳо пешниҳод мекунанд, ки гӯшт биёранд ва бархеҳо омада, пул медиҳанд",-афзуд раҳбари бунёди ҷамъиятии "Бугу-Эне" Салтанат Сеитова.

Ин бабри барфиро сокинони вилояти Талас дар ҷангал бо захми тир пайдо карданд. Ӯро зуд ба бемористон интиқол доданд. Мутахассисон муайян карданд, ки бабри барфи ду сол дорад. Ҳоло ӯро Жаабарс ном мондаанд.

Онҳое ки Жаабарсро парондаанд, ҳоло ҳам ҷустуҷӯ мешаванд. Дар робита ба шикори ғайриқонунии бабри барфӣ парвандаи ҷиноӣ боз шудааст. Дар Қирғизистон номи ин ҳайвон ба Китоби сурх ворид карда шудааст. Ба ҳисоби коршиносон, дар он кишвар ҳудуди 7 ҳазор бабри барфӣ боқӣ мондааст.

Дастури Тоқаев барои пешгирии вируси "чинӣ"

Президенти Қазоқистон Қосимҷомарт Тоқаев дар Твиттер навишт, ки ба ҳукумат дастур додааст, барои пешгирии паҳншавии вируси нав - "коронавирус" аз Чин ба ин кишвар тамоми чораҳои қатъиро биандешад.

Фаъолияти бахши қазоқистонии маркази байналмилалии ҳамкориҳои назди марзии "Хоргос" муваққатан қатъ ва назорат дар фурудгоҳ ва дар марз бо Чин сахттар шудааст. Ин тасмими 26-уми январ дар ҷаласаи ҳукумати Қазоқистон ба раҳбарии сарвазир Аскар Мамин гирифта шуд.

Дар ҷаласа қарор шуд, "назорати санитарию эпидемиологӣ ва муҳоҷирон дар гузаргоҳҳои марзӣ, аз ҷумла дар истгоҳҳои роҳи оҳан ва фурудгоҳҳо сахттар карда шавад".

Бино ба маълумоти ахир, аз вируси нав аллакай дар ҷаҳон 56 кас ҷон бохта, ҷамъан 1975 нафар ба он гирифтор шудааст. Ин вирус нахуст дар шаҳри Вуҳони Чин пайдо шуда буд, ки 11 миллион аҳолӣ дорад.

Дар баробари Чин, вируси нав дар Австралия, Куриёи Ҷанубӣ, Ҷопон, Ҳонгконг, ИМА, Канада, Фаронса ва Тайван низ ошкор шудааст.

Баскетболбози машҳури амрикоӣ Кобӣ Брайант ба ҳалокат расид

Кобӣ Брайант

Кобӣ Брайант, баскетболбози машҳури амрикоӣ, узви дастаи “Лос-Анҷелис Лейкерс” дар садамаи чархбол дар Калифорния ба ҳалокат расид. Ба гузориши расонаҳои амрикоӣ ҳамроҳи ӯ духтарчаи 13-солаш низ дар ин тасодуф ҷон додааст.

Чархболе, ки дар он Брайанту духтараш ва се нафари дигар барои ширкат дар мусобиқа парвоз мекарданд, дар шимоли Лос-Анҷелис, дар наздикии шаҳри Калабасас сарнагун шудааст.

Брайант 41 сол дошт.

Вай пас аз хатми мактаби миёна дар соли 1996 узви лигаи баскетболбозони касбии ИМА шуд ва ҷавонтарин бозигар дар таърихи ин иттиҳод ба шумор мерафт.

Брайант дар 20 мавсим дар ҳайати "Лэйкерс" бозӣ карда, панҷ бор қаҳрамони ҷаҳон шуд. Бо қадди 198 сантиметр ва маҳорати хоси бозӣ Брайант ду дафъа арзишмандтарин бозигари Иттиҳоди баскетболбозони Амрико ва як дафъа арзишмандтарин бозигари ҷоми қаҳрамонӣ пазируфт шуда буд.

Вай дар ҳайати дастаи миллии ИМА ду дафъа унвони қаҳрамон ва нишони тилои олимпӣ ба даст оварда буд.

Дар соли 2018 Брайант барои таҳияи филми амниматсионии кутоҳи "Баскетболи азиз" Ҷоизаи “Оскар” гирифт. Маҷаллаи амрикоии Sports Illustrated ӯро яке аз панҷ варзишгари беҳтари даҳа эълон намудааст.

Хабарнигорони тоҷик дар интихобот ба чӣ ҳақ (на)доранд?

Акс аз интихоботҳои гузаштаи Тоҷикистон

Масъулони Кумисюни марказии интихобот ва раъйпурсии Тоҷикистон (КМИРТ) гуфтанд, ки хабарнигорон метавонанд ҷараёни овоздиҳиро дар интихоботи порлумонии моҳи март сабт кунанд, вале дар ҳудуди нуқтаҳои ройдиҳӣ назарсанҷӣ ё «экзит пол» манъ аст.

Академик Носирҷон Салимӣ, узви доимии КМИР, рӯзи 24-уми январ дар нишасте дар Душанбе гуфт, «аммо хабарнигорон ё намояндагони созмонҳо метавонанд берун аз ҳудуди қитъаи раъйдиҳӣ назари овоздиҳандаро бипурсанд.»

Ӯ афзуд, Кумисюн талош мекунад интихобот шаффоф баргузор шавад ва «хабарнигорон дар инъикоси ин раванди муҳими сиёсии Тоҷикистон нақши умда доранд».

Аммо Аваз Назаров, коршиноси КМИР гуфт, тибқи қонунгузории Тоҷикистон мудохилаи хабарнигорон ба раванди интихобот, бахусус таблиғи раъйдиҳандагон барои овоздиҳии номзаде ҷурм дониста шуда, хабарнигорон бо тасмими комиссияи интихоботӣ аз маҳалли овоздиҳӣ берун карда хоҳанд шуд.

Ӯ афзуд, «хабарнигорон бояд 15 рӯз пеш аз баргузории интихобот дар КМИР ҳуҷҷатҳои худро барои сабти ном супоранд. Хабарнигорони хориҷиро зарур аст аввал дар Вазоарти корҳои хориҷӣ сабти ном шаванд.»

Алишери Муҳаммадӣ, хабарнигори мустақил аз ҷануби Тоҷикистон, ки дар ин нишаст ширкат дошт, гуфт, ҳамасола хабарнигорон ва нозирон нақзи қоидаҳои овоздиҳӣ дар нуқтаҳои ройдиҳиро ошкор мекунанд ва ҳузури онҳо муҳим аст. Маъмулан, як намояндаи хонавода ба ҷойи чанд узви оила овоз медиҳад ва масъулони кумисюнҳои интихоботӣ аз чунин вайрон шудани қоидаи овоздиҳӣ сарфи назар мекунанд.

Ба таъкиди намояндаҳои КМИР, як рӯз қабл аз баргузории интихобот “рӯзи хомӯшӣ” эълон мешавад ва то замони раъйдиҳӣ ҳама гуна таблиғоти номзадҳо ва ҳизбҳои сиёсӣ манъ карда мешавад. Муҳаммадӣ Ибодуллоев, роҳбари Бунёди ҷамъиятии "Ташаббуси шаҳрвандии сиёсати интернет" дар ин нишаст гуфт, ба эҳтимоли зиёд риояи ин муқаррарот дар шабакаҳои иҷтимоӣ душвор хоҳад буд. Зеро, ба гуфтаи вай, “таблиғоти номзадҳо, ки рӯзҳои пеш нашр шуда буд, метавонад ба таври ғайричашмдошт дубора дар “рӯзи хомӯшӣ” дар саҳифа пайдо шавад”.

Дар Тоҷикистон барои интихоботи порлумонии рӯзи якуми март 3410 маркази раъйгирӣ ташкил шудааст. Ба гуфтаи Носирҷон Салимӣ, дар баъзе аз марказҳои раъйгирӣ сокинон ҳамзамон вакилони порлумон ва вакилони маҷлисҳои маҳаллиро интихоб мекунанд.

То интихоботи порлумонӣ дар Тоҷикистон беш аз як моҳи дигар мондааст. Интизор меравад, раванди интихоботи порлумониро ҳудуди 500 нозири хориҷӣ назорат кунанд.

Дар гузашта созмонҳо ва кишварҳои ғарбӣ интихоботҳои Тоҷикистонро ғайриозод ва ғайришаффоф эълом кардаанд, бар хилофи нозирони кишварҳои пасошӯравӣ ва Чин, ки аз шеваи баргузории интихоботҳои Тоҷикистон ҳамеша ситоиш кардаанд.

Паёми мухталифи Тоҷикистону Узбекистон ба донишҷӯёнашон дар Чин

Шаҳри Вуҳани Чин. Акс аз 22-юми январи 2020

Абдулазиз Комилов, вазири корҳои хориҷии Узбекистон, гуфт, 30 донишҷӯи узбекро, ки дар шаҳри Вуҳан, маркази кашфи вируси нав дар Чин мондаанд, ба кишвар бармегардонанд.

Ӯ дар ин бора рӯзи 25-уми январ дар ҷаласаи навбатии пресс-клуб ваъда дод. Комилов гуфт, "ҳоли ҳозир Вазорати умури хориҷӣ ва Вазорати тандурустӣ дар ин замина кор мекунанд", аммо санаи дақиқи овардани донишҷӯёнро аз Чин нагуфт.

Ба иттилои Вазорати корҳои хориҷии Узбекистон дар Вуҳан тақрибан 250 шаҳрванди ин кишвар, асосан донишҷӯён, ба сар мебаранд. Бисёре аз донишҷӯён баъди адои даври дигари таҳсил ба кишвар баргашта будаанд.

Дар ҳамин ҳол, масъулони сафорати Тоҷикистон дар Чин рӯзи 26-уми январ дар паёме аз донишҷӯёни тоҷик дар он кишвар хостаанд, "талаботи мақомоти Чинро дар бораи риояи тартиботи ҷорӣ" дар бораи "коронавирус" бечунучаро иҷро кунанд.

Дар паёми масъулони сафорат гуфта шудааст, "агар зарурати воқеии баровардани донишҷӯёни хориҷӣ аз музофоти Хубей ба миён ояд ва чунин тасмим дар сатҳи мақомоти чинӣ гирифта шавад, Сафорати Тоҷикистон ин масъаларо бо Ҳукумати Чин ҳаллу фасл хоҳад кард."

Мақомоти сафорат шумораи донишҷӯёни тоҷикро дар музофоти Хубей ошкор накардаанд.

Қаблан бархе аз донишҷӯёни тоҷик дар Вуҳан ба Радиои Озодӣ гуфтанд, ки бештари вақти худро дар хобгоҳ мегузаронанд.

Задухӯрди нирӯҳои амниятӣ ва норозиён дар Бағдод

Яке аз иштирокдорони тазоҳуроти зиддиҳукуматӣ дар Ироқ. Акс аз 20-уми январи соли 2020

Дар пайи задухӯрди нирӯҳои амниятӣ бо эътирозгарон дар Бағдод, пойтахти Ироқ, дастикам 17 нафар маҷруҳ шудаанд.

Ҳодиса рӯзи 26-уми январ рӯй додааст. Ҳангоме ки, ба гуфтаи манобеи пулис ва шоҳидон, нирӯҳои амниятӣ барои пароканда кардани таҷаммӯи норозиён дар майдони Таҳрир тир кушодаанд.

Як рӯз пеш аз ин дар натиҷаи даргирии эътирозгарон ва нирӯҳои амниятӣ дар шаҳри Носирия 3 нафар кушта шуд.

Набуди ҷойи кор ва хадамоти зарурӣ барои мардум ва фасоди густарда моҳи октябри соли 2019 пойи норозиёнро ба кӯчаҳои Ироқ кашонд. Аз он замон то кунун ба камияш 500 нафар кушта шудаанд.

Эътирозгарон хоҳони ташкили ҳукумат ва порлумони нав дар кишвар ҳастанд.

Вируси нав дар Чин. 56 нафар ҷон бохта, 2 ҳазор кас гирифторанд

Роҳи оҳани Пекин. 24-уми январи соли 2020

Си Ҷинпин, раиси ҷумҳури Чин, гуфт, кишвараш дар вазъияти бади густариши вируси нав қарор дорад. Вай дар ин бора рӯзи 25-уми январ дар нишасти раҳбарони Ҳизби коммунисти Чин ибрози назар кард.

Вирус бори аввал дар шаҳри Вуҳан ошкор шуд. Ин беморӣ то кунун ҷони 56 нафарро гирифта ва наздик ба 2 ҳазор кас дар Чин ба он гирифтор шудаанд.

Сӣ Ҷинпин гуфт, кишвараш тавоноии инро дорад, ки дар набард ба зидди ин беморӣ муваффақ шавад.

Ин буҳрон сабаб шудааст, ки аз соли нави чинӣ, ки таътили бузурге дар ин кишвар ба шумор меравад, таҷлил нашавад. Анҷумани хадамоти мусофирбарии Чин ба ҳама оҷонисҳо гуфтааст, ки сафари гуруҳи сайёҳонро боздоранд.

Ин дар ҳолест, ки миллионҳо нафар дар ин кишвар дар ҷараёни таътили соли нав сафар мекунанд ва имкон дорад равуои онҳо паҳн шудани бемориро суръат бахшад.

Тоҷикистон сафари шаҳрвандонашро ба Чин маҳдуд ва парвози ҳавопаймоҳоро аз Душанбе ба он кишвар муваққатан қатъ кардааст.

Писари Маҳмурод Одинаевро дар боздоштгоҳи Сахарово ёфтаанд

Ҳоҷиакбар Одинаев

Ҳоҷиакбар Одинаев, писари 19-солаи Маҳмурод Одинаев, муовини раиси Ҳизби сотсиал-демократи Тоҷикистонро дар боздоштгоҳи "Сахарово" дар Маскав пайдо кардаанд.

Пештар Одинаев хабар дода буд, ки писараш аз 19-уми январ боз бедарак аст. Нигаронии ӯ аз он буд, ки чанд ҳафта қабл гӯиё мақомоти Тоҷикистон аз дӯстони писараш дар бораи Ҳоҷиакбар маълумот хостаанд. Мақомот дар ин бора чизе нагуфтанд.

Раҳматилло Зоиров, раиси Ҳизби сотсиал-демократи Тоҷикистон, рӯзи 26-уми январ дар баёнияи расмӣ "ба ҳамаи онҳое, ки дар кофтукоби Ҳоҷиакбар Маҳмуродов иштирок кардаанд", изҳори сипос кард. Аммо айни замон гуфт, "эҳсоси падарии Маҳмурод Одинаевро дуруст дарк кунед, ки бисёр суханони нохуш изҳор дошт."

Ба иттилои Зоиров, Ҳоҷиакбар Одинаев то даҳ рӯзи дигар дар боздоштгоҳ монда, сипас имкон пайдо мекунад, ки билет харад ва ба ҷойи зисти доимиаш - Тоҷикистон баргардад.

Бо ин ҳол, дақиқ нест, ки писари Маҳмурод Одинаев бо чӣ иттиҳом ба боздоштгоҳи "Сахарово" бурда шудааст. Мақомоти Русия асосан муҳоҷирони тоҷикро бо иттиҳоми ҳуқуқвайронкунии маъмурӣ, аз ҷумла нақзи қоидаҳои будубош ба ин марказ интиқол медиҳанд.

Маҳмурод Одинаев аз ҳисоби Ҳизби сотсиал-демократи Тоҷикистон номзадиашро ба интихоботи порлумонии моҳи марти имсол пешниҳод кардааст.

Шумори қурбониёни заминларзаи Туркия ба 31 нафар расид

Имдодгарон дар маҳалли заминларза дар Туркия

Шумори қурбониёни зилзилаи ахир дар Туркия ба 31 нафар расидааст. Замиинларзаи 6,8-дараҷаӣ шоми 24-уми январ шарқи Туркияро такон дод. Дар ин ҳодиса беш аз 1200 нафар захмӣ шудаанд.

Ҳукумати Туркия мегӯяд, дар пайи зилзила, ки шабона иттифоқ афтод, баъзе аз хонаҳо хароб шуда, мардум дар зери вайронаҳо мондаанд.

Ба гуфтаи мақомоти Вазорати умури дохилии Туркия, гуруҳҳои наҷот қурбониёни зилзиларо аз зери вайронаҳо берун кашидаанд, аммо то ҳанӯз даҳҳо нафар нопадид ҳастанд.

Зилзиларо дар Сурия, Лубнон ва Эрон ҳам эҳсос кардаанд.

Туркия дар минтақаи зилзилахез қарор дорад. Дар соли 1999 дар натиҷаи як заминларзаи шадид ҳазорҳо нафар ҷон бохта ва хонаҳояшонро аз даст дода буданд.

Роҳи Душанбе - Хуҷанд дигарбора боз шуд

Роҳи Душанбе-Чаноқ. Акс аз моҳи январи соли 2019

Роҳи Душанбе - Чаноқ, ки рӯзи 26-уми январ бо сабаби фаромадани тарма муваққатан баста шуда буд, дигарбора боз гардид.

Далери Абдулло, сухангӯи ширкати IRS, масъули нигоҳубин ва ҷамъоварии пул дар ин роҳ, 26-уми январ ба Радиои Озодӣ гуфт, субҳи якшанбе дар ин масир (аз километри 48 то километри 80-ум) миқдори зиёди тарма фаромада, ҳаракати мошинҳоро ғайримумкин кард, аммо ҳоло роҳ аз тарма пок карда шудааст.

Бархе аз сокинон аз баста будани роҳ ва зуд пок нашудани масир аз тарма танқид карда буданд. Онҳо ҳамчунин аз гаронии нархи билети ҳавопаймо аз Хуҷанд ба Душанбе норизоянд.

Роҳи Душанбе-Чаноқ ягона роҳи заминист, ки пойтахтро бо шимоли кишвар мепайвандад. Ҳар сол дар фасли зимистон ба сабаби фаромадани тарма дар ин роҳ чандин нафар ҷон мебозанд.

Нигоҳубини роҳ аз соли 2009 дар ихтиёри ширкати офшории IRS - Инновейтив роуд солюшнз аст. Бо вуҷуди сару садо ва баҳсҳо дар ҷомеа соҳиби асосии он ба сокинон маълум нест. Дар ин роҳ чанд плазаи толлингӣ – марказҳои пулчинӣ - насб шудааст, ки барои истифодаи роҳ аз мошинҳои сабукрав ва боркашон ҳаққи хидмати роҳ мегирад.

Ин роҳ бо 281 миллион доллар қарзи Чин ва аз тарафи "Корпоратсияи сохтмони роҳу пулҳои Чин" ва ё "China road" сохта шудааст. Тоҷикистон ин маблағро бо 2 дар сад баҳраи солона барои 20 сол аз Чин қарз гирифта ва дар ин муддат онро бояд пурра баргардонад.

Писари фаъоли сиёсии тоҷик дар Русия гум шудааст

Ҳоҷиакбар Одинаев, писари Маҳмурод Одинаев, фаъоли сиёсӣ дар Тоҷикистон

Маҳмурод Одинаев,муовини раҳбари Ҳизби сотсиал демократи Тоҷикистон мегӯяд, писараш дар Русия гум шудааст.

Ҳоҷиакбар Одинаеви 19 сола бори охир 19-уми январ бо хоҳараш телефонӣ сӯҳбат кардааст.

Маҳмурод Одинаев мегӯяд, писараш ба хоҳараш гуфтааст, ки кору зиндагиаш хуб аст ва аз ҳеҷ чиз шикоят надорад.

Ӯ мегӯяд, чанд ҳафта пеш мақомоти Тоҷикистон аз дӯстони писараш дар бораи ӯ маълумот хоста буданд.

«Аниқ намедонам, ки писарам куҷост, вале дар ин ҳолат ҳазор гумон мекунӣ. Пештар дар бораи писарам мақомот аз дӯстонаш пурсида буданд, ки ӯ дар куҷо ҳаст ва чӣ кор мекунад. Ҳайрон шуда будам, ки чаро ба писарам таваҷҷӯҳ кардаанд»,--гуфт ӯ.

Мақомоти Тоҷикистон ва Русия то ба ҳол дар бораи нопадид шудани писари фаъоли сиёсӣ изҳори назар накардаанд.

Манобеи «Независимая газета», нашрияи чопи Русия гуфтаанд, эҳтимол писари Одинаевро барои фишор болои ӯ рабуда бошанд.

Маҳмурод Одинаев аз ҳисоби Ҳизби сотсиал демократи Тоҷикистон номзадиашро ба интихоботи порлумонии моҳи марти имсол пешниҳод кардааст.

Дар ҳамлаи мушакии Эрон 34 низомии амрикоӣ ҷароҳат бардоштааст

Пойгоҳи "Айн-ул-Асад" дар Ироқ пас аз ҳамлаи мушакии Эрон

Вазорати мудофиаи ИМА рӯзи 24-уми январ эълон кард, ки дар ҳамлаи мушакии Эрон ба пойгоҳҳои амрикоӣ дар Ироқ 34 низомӣ ҷароҳати мағзӣ бардоштаанд.

Хабаргузории Рейтерз хабар дод, ки ин рақам дар қиёс ба эълони пештараи фармондеҳи Марказии Амрико бештар аст.

Фармондеҳии марказии Амрико 16-уми январ эълон карда буд, ки дар пайи ҳамлаи мушакии Эрон ба пойгоҳи низомии "Айн-ул-Асад" дар Ироқ, 11 сарбози амрикоӣ таҳти муолиҷа қарор гирифтаанд.

Аз ин пештар Доналд Трамп, президенти Амрико ва дигар мансабдорони баландпояи ин кишвар эълон карда буданд, ки дар ҳамлаи мушакии Эрон ягон низомии амрикоӣ осеб надидааст.

Ҳафтаи гузашта Пентагон эълон кард, ки 11 низомии амрикоӣ дар ин ҳамла осеби мағзӣ дидаанд.

Сипоҳи посдорони Эрон субҳи 8-уми январ эълом кард, ки дар интиқом ба қатли фармондеҳи нерӯи "Қудс" Қосим Сулаймонӣ, ки 3-юми январ бо дастури Доналд Трамп дар Бағдод кушта шуд, ба ду пойгоҳи низомии мавриди истифодаи Амрико дар Ироқ, ҳамла кард.

Мақомоти амрикоӣ таъйид карданд, ки беш аз 12 мушак ба пойгоҳи Айн-ул-Асад ва як пойгоҳи дигар дар Арбили Курдистони Ироқ, партоб шудааст

Аз макони сухтор дар Томски Русия ҷасади як муҳоҷири дигар пайдо шуд

Макони сухтори манзили муҳоҷирон дар Томски Русия

Аз макони сӯхтори рӯзи 21-уми январ дар вилояти Томски Русия ҷасади як муҳоҷири дигар аз Узбекистон пайдо шудааст.

Шумораи қурбониёни ин сухтор ба 12 нафар расид.

Рӯзи 24-уми январ мақомоти Узбекистон гуфтанд, ки қурбонии охир Музаффарҷон Муҳаммадҷонов, сокини шаҳри Андиҷон аст, ки барои кор ба Русия рафтааст.

Аз 12 нафари фавтида дар ин сухтор 11 нафараш шаҳрванди Узбекистон ва як нафар шаҳрванди Русия будааст.

Пештар дар бораи ҳалокати даҳ муҳоҷир хабар дода буданд.

Мақомоти ҳолатҳои фавқулодаи Русия гуфтанд, ки ин муҳоҷирони корӣ аз ноҳияи Қизилтеппаи вилояти Навоии Узбекистон буда, дар миёни онҳо бародарон низ ҳастанд.

Дар биное, ки сухтор сар зад, муҳоҷирони тоҷик низ зиндагӣ мекарданд. Бар асои иттилои расмӣ ягон муҳоҷири тоҷик дар ин сухтор зиён надидааст.

Кумитаи тафтишоти Русия нисбати ин ҳодиса парвандаи ҷиноятӣ боз кардааст.

Заминларзаи марговар дар Туркия

Харобиҳои заминларза дар шарқи Туркия

Бар асари заминларзаи шаби 24-уми январ дар вилояти Элязиги Туркия наздики 20 нафар ҳалок шуд.

Дар ин бора хабаргузории Анадолуи Туркия хабар дод.

Қувваи заминҷунби бар ассои ҷадвали Рихтер 6,8 балро ташкил додааст.

Манзили зисти сокинон хароб шудааст ва аксари сокинони ноҳияи Сивриҷи вилояти Элязиг бе ҷойи зист мондаанд.

Онҳо шабро дар боғҳо рӯз кардаанд. Дар бисёре аз навоҳӣ осебдидагонро дар толорҳои варзишӣ ҷой кардаанд.

Бар асоси иттилои Хадамоти геологии ИМА, заминларза қисамтҳое аз Туркия, Ироқ ва Сурияро такон додааст, вале аз ҳама бештар шарқи Туркия осеб дидааст.

Вирус дар Чин 25 нафарро кушт ва 830 нафарро бистарӣ кард

Дар 11 шаҳри Чин пӯшидани ниқоби нафаскашӣ ҳатмӣ шуд

Рафтуои одамон ба камияш дар 11 шаҳри вилояти марказии Ҳубеи Чин манъ гашт. Ин чора барои пешгирӣ аз паҳншавии вируси нав ҷорӣ гашт, ки дар натиҷаи сирояти он наздик ба 25 нафар кушта ва беш аз 830 каси бемор шудаанд.

Дар Вуҳан маркази вилояте, ки 11 миллион сокин дошта, вирус ё ангали беморӣ бори аввал дар он ҷо рӯ зад, субҳи 23 январ равуои аксарияти нақлиёт бас шуд. Аз рӯи гузоришҳо мақомот пӯшидани ниқобро дар шаҳр маҷбурӣ кардаанд ва ба мардум маслиҳат медиҳанд, ки аз издиҳом ва гирдиҳамоиҳо канорагирӣ кунанд.

Расонаҳои давлатӣ, гузориш медиҳанд, ки наздик ба 10 шаҳри дигар дар Ҳубей - Чибӣ, Личуан, Сиантао, Эчжоу, Хуангганг, Сианинг, Сянзян, Ҳуангшӣ, Ҷингжоу ва Дангян кам шудани нақлиёт дида мешавад ва пойтахти кишвар Пекин ҳамаи ҷашнҳои асосии Соли нави чиниро барҳам задааст. Ҳуангшӣ охирин шаҳрест, ки ба маҳдудият дучор шудааст, 24-уми январ нақлиёти ҷамъиятӣ боздошт шуда, пули болои дарёи Янтзе баста шуд. Бандари киштиронӣ низ баста шуд. Дар ҳамин ҳол, мақомоти тандурустии вилояти Ҳубей, дар наздикии Пекин гуфтанд, ки як марди 80-сола, ки ба ин вирус олуда шуда буд, вафот кард ва ин аввалин марги тасдиқшудаи берун аз вилояти Ҳубей мебошад. Дар худи пойтахт, мансабдорон чорабиниҳои бузургро ба мақсади пешгирӣ аз паҳн шудани вирус ба таъхир гузоштанд.

Трамп гуфт, барномаи сулҳи Ховари Миёнаро ошкор мекунад

Доналд Трамп, президенти ИМА

Президенти ИМА Доналд Трамп мегӯяд, ки нақша дорад то 28 январ, рӯзе, ки вай бо сарвазири Исроил Бенямин Нетаняҳу дар Вашингтон вохӯрӣ хоҳад кард, барномаи сулҳи Ховари Миёнаи худро ошкор кунад.

Трам рӯзи 23 январ ҳангоми баргаштан аз Швейтсария ба Флорида дар ҳавопаймо ба хабарнигорон гуфт: “Шояд мо онро каме пештар аз боздид нашр хоҳем кард.”

Вай афзуд: "Ин як барномаи олӣ аст. Ин барномаест, ки ҳақиқатан кор хоҳад кард.”

Фаластиниҳо, ки ҳанӯз ба ҷаласаи Кохи Сафед бо Нетаняҳу даъват нашудаанд, фавран ин эъломияро маҳкум карданд.

Набил Абу Рудина, сухангӯи президенти Фаластин Маҳмуд Аббос гуфт: "Мо Исроил ва давлати Амрикоро ҳушдор медиҳем, ки аз хатҳои сурх нагузаранд."

Фаластиниҳо аз ин амал хашмгин шуданд, чун онро амали президент ба тарфдории Исроил медонанд, монанд ба кӯчонидани сафорати Амрико аз Тел-Авив ба Байтулмуқаддас.

Фаластиниҳо мехоҳанд Байтулмуқаддаси Шарқӣ пойтахти давлати ояндаи онҳо шавад. Исроил Байтулмуқаддаси Шарқӣро ба худ ҳамроҳ кард ва тамоми шаҳрро пойтахти худ эълом кард, ки ин амал аз тарафи ҷомеаи ҷаҳонӣ шинохта нашудааст.

Дар Русия то 3300 муҳоҷири узбек дар идораҳои пулис нигаҳдорӣ мешавад

Ҳудуди 3323 муҳоҷири узбекистонӣ дар Русия аз сӯи мақомоти Русия боздошт шудааст. Дар ин бора рӯзи 23-юми январ Бахтиёр Турсунов, раиси Оҷонсии муҳоҷирати хориҷии Узбекистон хабар дод.

"Бисёре аз муҳоҷирон бидуни донистани забон ва ҳунаре ба хориҷ мераванд ва ба мушкил дучор мешаванд. Онҳо нохудогоҳ қонунҳои давлатеро поймол мекунанд, ки дар он ҳузур доранд. Дар натиҷа аз кишвари муҳоҷирпазир ихроҷ мешаванд",-гуфт Бахтиёр Турсунов.

Мақомоти муҳоҷирати Узбекистон гуфтанд, дар соли 2019 панҷ муассисаи консулӣ дар Русия таъсис додаанд, ки вазъи зиндагии муҳоҷирон, шароити кори онҳоро меомӯзанд ва ба онҳо кумаки ҳуқуқӣ мерасонанд.

Қирғизистон воридоти гӯшт аз Чинро манъ кард

Қирғизистон ба таври муваққат воридоти гӯшт ва маҳсулоти гӯштиро аз Чин манъ кард. Дар ин бора мақомоти байторӣ ва амнияти фитосанитарии он кишвар иттилоъ доданд.

Мақомоти байтории Қирғизистон ҳамчунин хабар медиҳанд, дар моҳи декабри соли 2019 аз вилояти Хенони Чин 48 тона гӯшти мурғобӣ ворид ва дар маркази ташхиси байторӣ санҷида шуд.

Вилояти Хенон дар фосилаи 500 километр аз вилояти Хубэй - маркази авҷгирии вируси нав - ҷойгир аст, вале дар ҳар сурат мақомоти Қирғизистон тасмим гирифтаанд, ки воридоти маҳсулоти гӯштиро аз Чин муваққатан қатъ кунанд.

Хабари паҳншавии вируси нав дар Чин бори аввал моҳи декабри соли гузашта расонаӣ шуд. То кунун аз таъсири ин вирус 25 кас ҷон бохта, ҷамъан 830 кас ба он мубтало шудаанд.

Дар марзу фурудгоҳҳои як қатор кишварҳо, аз ҷумла Қазоқистон, Узбекистон, Тоҷикистон ва Русия ба хотири пешгирӣ аз сирояту паҳни вируси чинӣ назорати санитарӣ пурзӯр карда шудааст.

Марди қазоқ барои таҷовузи мактабхон 25 сол зиндонӣ шуд

Додгоҳи шаҳри Тарози Қазоқистон 24 январ сокини маҳаллиеро, ки дар таҷовуз ба номуси хонандаи мактаб айбдор мешуд, 25 соли зиндонӣ кард. Додгоҳ ҳамчунин ҳукм кард, ки ӯро ахтаи кимиёӣ кунанд.

Марди 38-сола, ки ному насабаш ифшо намешавад, бар асоси бандҳои "Амалҳои хушунатомези шаҳвонӣ нисбат ба ноболиғ" ва "Таҷовузи ноболиғ" айбдор дониста шуд.

Бар асоси қарори додгоҳ, айбдоршуда ҳамчунин бояд ба ҷониби ҷабрдида 5 миллион танга (ҳудуди 13 ҳазор доллар) ҷуброн пардозад.

15 ноябр дар ҳоҷатхонаи яке аз мактабҳои шаҳри Тарози Қазоқистон, ки дар кӯча ҷойгир аст, хонандаи синфи 7-ум таҷовуз карда шуд. Дар робита ба ин ҳодиса мардеро боздошт карданд. Дурбинҳои назоратӣ гумонбарро ба навор гирифтаанд.

Президенти Қазоқистон Қосимҷомарт Тоқаев 21 ноябри соли гузашта дар Твиттер навишт, ки шаҳрдори Тароз Кайрат Досаев аз мақомаш барканор шуд. "Ба раиси вилояти Ҷамбил дастур дода шуд, шаҳрдори Тарозро дар робита ба ҳодисаи як мактаби ин шаҳр, ки дар он хонандаи 12-сола осеб дид, аз мақом барканор кунад. Ба худи раиси вилоят огоҳӣ дода шуд", - навишта буд президенти Қазоқистон.

Донишҷӯёни қазоқ наметавонанд, шаҳри Вуҳани Чинро тарк кунанд

Шаҳри Вуҳани Чин. 23-юми январи соли 2020.

Донишҷӯёни қазоқ дар пайи ошкор шудани вируси нав дар шаҳри Вуҳани Чин наметавонанд, он минтақаро тарк кунанд. Мақомоти Чин дар шаҳр карантин эълом ва баромадан аз онро манъ намудаанд.

Волидони донишҷӯён аз мақомоти Қазоқистон дархост доранд, ки дар баргардонидани фарзандҳояшон ба ватан кумак кунанд. "Чизе нахуред. Ками дигар тоқат кун, духтарам",-мегӯяд Рабига Сисенгалиева дар як сӯҳбати телефонӣ ба духтараш, ки дар Чин таҳсил мекунад.

Хабари ошкор шудани вируси нав дар Чин волидони даҳҳо донишҷӯи дигари қазоқ дар он кишварро низ нигарон кардааст. Ин донишҷӯён дар минтақае ба сар мебаранд, ки вируси нав дар онҷо ошкор шудааст. Волидон мегӯянд, фарзандонашон комилан сиҳат ҳастанд ва намехоҳанд, ки ба вирус гирифтор шаванд.

Дар ҳоли ҳозир мақомоти Қазоқистон дар робита ба ҳалли ин мушкил даст ба иқдоме нашудаанд. Сардухтури беҳдоштии Қазоқистон гуфт, бар асоси қоида, бояд донишҷӯён дар ҳамонҷо бимонанд.

Хабари паҳншавии вируси нав дар Чин бори аввал моҳи декабри соли гузашта расонаӣ шуд. То 22-юми январ аз таъсири ин вирус 17 кас ҷон бохта, ҷамъан 571 кас дар 13 вилоят ба он мубтало шудаанд.

Дар марзу фурудгоҳҳои як қатор кишварҳо, аз ҷумла Қазоқистон, Узбекистон, Тоҷикистон ва Русия ба хотири пешгирӣ аз сирояту паҳни вируси чинӣ назорати санитарӣ пурзӯр карда шудааст.

Ёфтҳои бештар

Суҳбати Сарвинози Рӯҳуллоҳ бо Нуриддин Саид
лутфан мунтазир бошед

Феълан кор намекунад

0:00 0:05:26 0:00
Гузоришҳои радиоӣ
ПОДКАСТ
Суҳбати Сарвинози Рӯҳуллоҳ бо Нуриддин Саид
Гузоришҳои радиоӣ

Гузоришҳои видеоӣ

Ҳушдор аз хатарноктар шудани вируси нави чинӣ
лутфан мунтазир бошед

Феълан кор намекунад

0:00 0:01:55 0:00
XS
SM
MD
LG