Имрӯз президенти Косово Беҳҷет Паколлӣ ба истеъфо рафт. Ин иқдом баъд аз он эълон шуд, ки Додгоҳи конститутсионии Косово интихоби ӯ ба курсии президентро ғайришаръӣ унвон дода, истеъфои фаврии ӯро талаб кард. Додгоҳи конститутсионии Косово мегӯяд, Паколлӣ ягона номзад ба курсии раёсатҷумҳурӣ буд, ки тибқи қонун манъ аст. Додгоҳ бар ин назар аст, ки шумораи номзадҳои президентӣ бояд беш аз як нафар бошад ва дар овоздиҳӣ камаш аз се ду ҳиссаи вакилони мардумӣ иштирок кунанд. Ба қавли додгоҳ ҳангоми интихоби Паколлӣ аз миёни 120 вакили мардумӣ ҳамагӣ 67 нафар ҳузур доштанд. Вакилони мухолифи ҳукумат ба нишони эътироз аз интихоби ин соҳибкори сарватманд аснои раъйдиҳӣ толори парламентро тарк карда буданд.