Пайвандҳои дастрасӣ

Хабари нав

Боздошт ва муҷозоти наврасону ронандагони парчамдори рӯзи ҷашн


Боздошти ҷавонони парчамбадаст
Боздошти ҷавонони парчамбадаст

Як гуруҳ аз шаҳрвандоне, ки зимни таҷлили Рӯзи парчами миллӣ дар кӯча ва хиёбонҳои Душанбе мошинсавор, ҳаракатҳои хатарнок карда буданд аз ҷониби пулиси пойтахт боздошт шудаанд.

Раёсати корҳои дохили шаҳри Душанбе рӯзи 26-уми ноябр хабар дод, ки “ҳодисаи мазкур 24-уми ноябр, тахминан соати 13:30 дақиқа, дар кӯчаҳои А.Сино ва Маяковский рух додаааст.

Дар ҳаракати гуруҳӣ 11 ронанда ва 13 хонандаи мактабҳои ноҳияи Рудакӣ ва шаҳри Душанбе будаанд.” Назари худи ҷавонон ва волидони онҳо дастрас нест.

Раёсати корҳои дохилӣ аз ҳеч мактабу хонанда ва ронандагон ном набурдааст. Аммо дар наворҳое, ки дар Интернет нашр шуд 17 мошин дида мешавад ва 27 нафари дигар тани худро аз тирезаи мошин берун бароварда, парчамафшонӣ карданд.

Мошинҳо дар ин корвонҳо бо суръати баланд ва бидуни эътино ба қоидаҳои роҳ ҳаракат карда, ҳолати хатарнок ба миён оварданд. Нашри ин навор дар шабакаҳои иҷтимоӣ сабаби баҳсҳои зиёд шуд.

Хабари ҷазо дидани наврасон низ бархе аз шореҳонро норозӣ кардааст, ки корвонҳои худҷӯшро нишонаи ватандӯстии саворонашон номидаанд. Бархеи дигар дар шабакаҳои иҷтимоӣ талаб кардаанд, ки ҷавонон тибқи қонун муҷозот шаванд.

Пулиси Душанбе гуфтааст, нисбат ба 11 нафар ронанда, 5 хонандаи мактаб ва 8 падару модар барои ҳуқуқвайронкунии маъмурӣ санад тартиб додааст.

XS
SM
MD
LG