Қодир Аднон, яке аз аъзои баландпояи гуруҳи тундрави "Ҷиҳоди исломӣ"-и Фаластин баъд аз 86 рӯзи гуруснанишинӣ дар зиндони Исроил ҷон бохт.
Хадамоти маҳбасҳои Исроил хабар дод, ки зиндониро дар ҳуҷрааш дар ҳолати беҳушӣ пайдо карданд ва ӯ дар бемористон даргузашт.
Аднон, ки пас аз эълони гуруснанишинӣ вазъаш бад шуда буд, ахиран "аз ёрии тиббӣ даст кашидааст".
Гуруҳи тундрави "Ҷиҳоди исломӣ" гуфтааст, Исроил барои марги ин узви баландпояаш "подоши бузург" хоҳад пардохт. Сарвазири Фаластин Муҳаммад Штийе мақомоти Исроилро дар куштори Аднон айбдор кардааст.
Қодир Аднон дар давоми 20 соли охир борҳо дар зиндони Исроил афтода, дар эътироз ба боздошти худ гуруснанишинӣ эълом намудааст. Ӯ бори ахир ҳудуди се моҳ қабл гуруснанишинӣ карда буд.
Гуфтугӯ