Пайвандҳои дастрасӣ

Хабари нав

Дар чанд ҷумла

Президенти Радиои Озодӣ ҳамла ба хабарнигоронро дар Душанбе маҳкум кард

Ҷейми Флай

Президенти Радиои Аврупои Озод/Радиои Озодӣ ҳамлаҳои ҷудогона ба хабарнигорони Радиои Озодӣ ва телевизиони “Настояшее Время”-ро дар Душанбе шадидан маҳкум кард.

Ҷейми Флай рӯзи 17-уми май дар изҳороте гуфт, “борҳо аз мақомоти Тоҷикистон хостем, ки фишорро алайҳи расонаҳои озод бас кунанд.”

“Бори охир, моҳи феврали имсол, дар номае ба вазири корҳои хориҷии Тоҷикистон Сироҷиддин Муҳриддин дар бораи ҳолатҳои аз парвонаи кор маҳрум шудан, озор ва таҳдидҳо ба зидди хабарнигорони Радиои Озодӣ муфассал навишта будам,” – афзудааст ӯ.

Президенти Радиои Озодӣ мегӯяд, “вақти он расида, ки ҳукумати Тоҷикистон кӯшиши халалдор кардани гузоришдиҳии мустақилро, ки ба нафъи мардуми тоҷик аст, бас кунад.”

Шахсони ношинос рӯзи 17-уми май ба хабарнигорону наворбардорони Радиои Озодӣ ва телевизиони "Настояшее Время" дар Душанбе ҳамла карда, дастгоҳи наворгирӣ ва телефонҳояшонро кашида гирифтанд.

Ҳодиса баъди он рӯй дод, ки хабарнигорон барои гирифтани шарҳи Улфатхонум Мамадшоева, яке аз фаъолони ҷомеаи мадании Бадахшон, ба хонааш дар пойтахт рафтанд.

Вазорати корҳои дохилии Тоҷикистон 17-уми май ӯро дар қатори Маҳмадбоқир Маҳмадбоқиров ва Алим Шерзамонов ба ташкили эътирози 16-уми май дар Хоруғ, ки дар натиҷа як нафар кушта ва чандин кас захмӣ шуданд, айбдор кард.

Ҳамлаварон нагуфтаанд, кӣ ҳастанд ва чӣ мехоҳанд, аммо ба қавли ҳамкорони мо, “журналистонро хуб мешинохтанд ва ҳадафмандона дурбину телефонҳоро мехостанд”.

Дар умум, ба иттилои хабарнигорони Радиои Озодӣ ва “Настояшее Время” аз онҳо ҳафт телефон ва як дастгоҳи наворгириро гирифтаанд. Мақомот то ҳанӯз дар ин бора хабаре надоданд.

Ҳамаи хабарҳои имрӯзро дар инҷо бихонед

Туркия ба далели вобастагии энержиаш зидди Русия таҳрим эълом намекунад

Иброҳим Калин

"Ҷорӣ кардани таҳрим зидди Русия ба иқтисоди Туркия зиён мерасонад," -- гуфт Иброҳим Калин, намояндаи президенти Туркия.

Анкара манфиатҳои худро ҳифз мекунад ва ба ҳамин хотир ба маҳдудиятҳое шомил нашуд, ки баъди ҳамлаи Русия ба Украина бисёре аз кишварҳои зидди Русия ҷорӣ карданд. Ба гуфтаи Калин, Ғарб ин мавқеъро дарк кард.

Намояндаи Анкара гуфт, ки Туркия аз манобеи энержии хориҷӣ вобастагӣ дорад ва ба ҳамин хотир "муносибатҳояшро ҳам бо Русия ва ҳам бо Эрон густариш медиҳад".

Зидди Русия баъди ҳамлааш ба Украина, кишварҳои Ғарб шаш бастаи таҳримҳоро ҷорӣ карданд. Бархе аз кишварҳо маводи сӯхти Русияро таҳрим карданд.

Интизор меравад, ба зудӣ воридоти тилои Русия ҳам маҳдуд шавад. Ба иттилои сарвазири Бритониё, Борис Ҷонсон, ин маҳдудият ба ҷайби олигархҳои Русия зарба мезанад, ки вақтҳои охир сармояи худро ба тило табдил медиҳанд.

Ҷонсон гуфт, маҳдудияти воридоти тилои Русия ба "мошинаи низомии Путин" низ таъсир мерасонад.

Владимир Зеленский аз G7 силоҳи вазнин мехоҳад

Дар ҳоле ки Русия ба ҳамлаҳои худ ба шаҳрҳои гуногуни Украина идома медиҳад, интизор меравад, президенти Украина Владимир Зеленский 28-уми июн аз сарони G7 (ҳафт кишвари саноатии ҷаҳон) фиристодани силоҳҳои вазнинро бихоҳад.

Фармондеҳии низомии Украина рӯзи 27-уми июн гуфт, минтақаи Одесса дар ҷануби Украина ҳадафи ҳамлаи нерӯҳои Русия қарор гирифтааст.

Як рӯз пеш нерӯҳои русӣ шаҳри Киев ва минтақаҳои дигарро ҳадаф қарор дода буданд.

"Зарбаҳо ба минтақаҳои аҳолинишин чанд биноро дар масоҳати 500 метр вайрон кард", -- омадааст дар хабари фармондеҳӣ. Ба иттилои манбаъ, оташнишонҳо ҳанӯз талош доранд, ки алангаҳои оташро хомӯш кунанд.

Рӯзи 26-уми июн Украина хабар дод, ки Русия ҳамлаҳои мушакии худро афзоиш дод ва минтақаҳои гуногун аз Лвов то Киев зери ҳамла монданд.

Бар асари ҳамлаи рӯзи 26-уми июн ба Киев ва шаҳри Черкасий дастикам 2 нафар ҷон бохта, 11 нафари дигар, аз ҷумла як духтари 7-сола захмӣ шуданд.

Песков аз мулоқоти "як ба як"-и Путину Раҳмон гуфт

Эмомалӣ Раҳмон ва Владимир Путин. Акс аз соли 2018

Сухангӯйи Кремлин гуфт, раисиҷумҳури Русия Владимир Путин рӯзи 28-уми июн бо президенти Тоҷикистон Эмомалӣ Раҳмон дар Душанбе вомехӯрад.

Ба гузориши РИА Новости, Дмитрий Песков рӯзи 27-уми июн ба хабарнигорон гуфтааст, раҳбарони ду кишвар мулоқоти "як ба як" хоҳанд дошт, вале нагуфтааст, ки дар бораи чӣ гап мезананд.

Ҷониби Тоҷикистон низ барномаи сафари Путинро ба Душанбе ошкор накард. Ин номуайянӣ фарзияҳоеро дар бораи сафари аввалини хориҷии Путин аз замони ҳамлаи бедалели кишвараш ба Украина ба бор овардааст.

Путин ва Раҳмон бори охир 16-уми майи имсол, дар ҳошияи нишасти сарони СПАД ва ҳамагӣ ду рӯз пеш аз амалиёти мақомот дар ноҳияи Рӯшон дар Маскав суҳбат доштанд.

Ба хабари расмӣ, онҳо ҷараёни иҷрои таҷдид ё азнавсозии нерӯҳои мусаллаҳи Тоҷикистон ва вазъ дар сарҳади Афғонистонро баррасӣ кардаанд.

Русияву Тоҷикистон, ду кишвари пасошӯравӣ, ки ба нақзи ҳуқуқи одамон ва саркӯби мухолифон муттаҳам ҳастанд, солҳо боз шарики стратегиянд.

Ду кишвар дар моҳҳои охир аз афзоиши додугирифт мегӯянд, вале ҷузъиёт намедиҳанд. Қурби рубли русӣ дар ҳафтаҳои охир дар Тоҷикистон дар муқоиса ба доллар рӯ ба боло ниҳодааст.

Садҳо ҳазор шаҳрванди Тоҷикистон дар Русия кору таҳсил мекунанд. Русия дар Тоҷикистон пойгоҳи низомӣ дорад.

Ду кушта ва ёздаҳ захмӣ. Ҳамлаҳои мушакии Русия ба Киев

Дар натиҷаи ҳамлаҳои мушакӣ ба Киев ва шаҳри Черкасий дар рӯзи 26-уми июн камаш ду нафар кушта ва 11 тани дигар захмӣ шудаанд.

Баъди зарар дидани ду бинои истиқоматӣ, Виталий Кличко, шаҳрдори Киев ба маҳалли ҳодиса рафт ва гуфт, дар инҷо як нафар кушта ва 6 тани дигар ба шумули як кӯдаки 7-сола захмӣ шудаанд.

Русия гуфт, гузоришҳо дар бораи ҳамла ба ҷойҳои аҳолинишин “бофта” ҳастанд ва низомиёни рӯз як корхонаи аслиҳасозиро ҳадаф гирифтаанд.

Виталий Кличко ҳамлаҳои мушакиро як талоши Русия барои “тарсонидани украиниҳо” дар остонаи нишасти сарони НАТО номид, ки қарор аст, рӯзҳои 28-30-юми июн дар Мадрид баргузор шавад.

Шаҳри Черкасий, ки то ҳол аз ҳамлаҳои Русия эмин монда буд, рӯзи 26-уми июн шоҳиди чанд таркиш шуд. Ба гуфтаи мақомот, дар инҷо 1 нафар кушта ва 5 тани дигар маҷруҳ шудаанд.

Э.Раҳмон аз сулҳ гуфт, вале ба мухолифон ишорае накард

Эмомалӣ Раҳмон

Имрӯз, 27-уми июн, аз замони имзои созишномае, ки ба ҷанги хунин ва панҷсолаи дохилӣ дар Тоҷикистон поён дод, 25 соли расо гузашт.

Дар ҳамин рӯз дар соли 1997 ҳукумати Тоҷикистон ва Иттиҳоди нерӯҳои мухолифон дар Маскав созишномаи истиқрори сулҳ ва ризоияти миллиро имзо карданд. Он заминаро барои хатми даргирӣ ва ташкили ҳукумати фарогир муҳайё кард.

Аз он рӯз то кунун 27-уми июн ҳамчун Рӯзи ваҳдати миллӣ дар Тоҷикистон ҷашн гирифта мешавад.

Эмомалӣ Раҳмон, раисиҷумҳури Тоҷикистон, дар як паём бахшида ба ин рӯз гуфтааст, ҳифзи суботу оромӣ ҳоло яке аз муҳимтарин вазифаи ҳар як сокини кишвар аст.

Дар ин паём аз 26-уми июн омадааст, “дар шароити ниҳоят ҳассоси ҷомеаи башарӣ, яъне торафт мураккаб гардидани авзои сиёсиву иқтисодии ҷаҳон ҳифзи сулҳу суботи ҷомеа аз ҷумлаи вазифаҳои муқаддаси ҳар як фарди бонангу номуси миллат ба шумор меравад.”

Эмомалӣ Раҳмон дар ин паём ҳеч ишорае ба мухолифон накардааст, ки ҳоло теъдоде аз онҳову тарафдоронашон дар хориҷа зиндагӣ мекунанд. Ӯро барои аз саҳнаи сиёсӣ рондани мухолифони пешин ва дигарандешон дар чанд соли ахир сахт танқид мекунанд.

СММ: Дар заминларзаи Афғонистон 155 кӯдак ҷон бохтаанд

Пактико баъди заминларза, 25-уми июни 2022

Созмони Милали Муттаҳид рӯзи 26-уми июн гуфт, дар заминларзаи ҳафтаи гузашта дар Афғонистон "дастикам 155 кӯдак ҷон бохтанд".

Ба иттилои манбаъ, дар ин ҳодиса дар наздикии сарҳади Покистон "250 кӯдак маҷруҳ шуда, 65 кӯдак ятим ё танҳо монданд".

Бунёди атфоли СММ рӯзи 27-уми июн гуфт, барои дубора ба ҳам овардани кӯдаконе талош дорад, ки дар пайи заминларза аз хонаводаҳояшон ҷудо шуда буданд.

Заминларзаи 6,1-дараҷаӣ рӯзи 22-юми июн вилоятҳои Пактико ва Хусти Афғонистонро ларзонд. Ҳукумати Толибон шумораи умумии қурбониёни заминларзаро 1150 нафар шумурдааст.

Ин ҳодиса барои ҳукумати Толибон, ки дар натиҷаи сиёсати сахтгиронаи исломгароёнааш нисбат ба занон ва духтарон дар инзиво қарор гирифтааст, чолишбарангез шуд.

Мақомоти тандурустии Толибон рӯзи 26-уми июн гуфтанд, ҳазорон нафар "ба хӯроку оби ошомиданӣ сахт эҳтиёҷ доранд". Ҳамчунин, ба гуфтаи онҳо, ба сокинони зарардида беморӣ таҳдид мекунад, "чун ҷойи муносибе барои зист надоранд."

Як нақби пинҳонии дигар дар марзи Узбекистону Қирғизистон

Дар ноҳияи Риштони Узбекистон нақби пинҳониеро пайдо карданд, ки Узбекистонро бо Қирғизистон мепайвандад. Ин нақб дорои лифт, нерӯи барқ ва дурбинҳои назоратӣ будааст.

Рӯзи 23-юми июн дар манзили Т.М., сокини ноҳияи Риштони Узбекистон нақбе пайдо шуд, ки ба ноҳияи Қадамҷойи Қирғизистон пайвандӣ дошт. Дар ин бора мақомоти махсуси Узбекистон хабар медиҳанд.

Нақб 1,5 метр паҳнӣ, 2 метр баландӣ ва наздик ба 130 метр дарозӣ доштааст.

Дар хабари мақомоти Узбекистон гуфта шудааст, ки нақби мазкур барои интиқоли молу маҳсулот аз Қирғизистон ба Узбекистон, бо давр задани гумрук, истифода мешуд. Аз рӯи ин ҳодиса парвандаи ҷиноӣ боз шудааст.

Пештар мақомоти Узбекистону Қирғизистон аз пайдо шудани се нақби ба ин монанд хабар дода буданд.

Пешгирӣ аз интиқоли ғайриқонунии 30 тонна шакар ба Қазоқистон

Акс аз бойгонӣ.

Рӯзи 25-уми июн дар гузаргоҳи "Чон-Капка"-и байни Қирғизистону Қазоқистон ронандаи мошини боркаше боздошт шуд, ки мехост, 30 тонна шакарро ғайриқонунӣ аз Қирғизистон ба Қазоқистон барад.

Мақомоти марзбонии Қирғизистон хабар доданд, ки ҳангоми тафтиши Камази таҳти идораи ронанда А.К., соли таваллудаш 1984, шаҳрванди Қазоқистон, марзбонон дар халтаҳои нуриҳои минералӣ шакарро ошкор кардаанд. Ронанда ба марзбонон ҳуҷҷатҳоеро пешниҳод кардааст, ки дар он интиқоли шакар нишон дода шудааст.

Ин ронанда ба ихтиёри мақомоти масъули Қирғизистон супорида шудааст.

Қирғизистон шуруъ аз 1-уми июн содироти шакарро муваққатан манъ кард. Девони вазирони Қирғизистон гуфт, ин тасмим ба хотири таъмини амнияти озуқавории кишвар ва нигаҳ доштани қимати шакар дар бозор гирифта шудааст.

Қазоқистон низ ба далели талаботи зиёд ва камчинии шакар содирони онро аз 23 май манъ кардааст.

Роҳбарони G7 рақобат бо Чин ва ёрӣ ба Украинаро баррасӣ мекунанд

Сарони "Ҳафтгонаи бузург" дар Олмон. 26-уми июни 2022

Роҳбарони "Ҳафтгонаи бузург" (G7)-ро буҳрони сартосарӣ ва уфти рушди иқтисод нигарон кардааст. Дар ин бора садри аъзами Олмон Олаф Шолтс баъди нишасти саммити G7 изҳори назар кард.

Кишварҳои "Ҳафтгонаи бузург" тасмим доранд, то соли 2027 барои рушди зерсохтори кушварҳои дар ҳоли тавсеа 600 миллиард доллар равона кунанд. Ин тасмим дар доираи ташаббуси рақобат бо тарҳи чандтриллионии Чин "Як камарбанд, як роҳ" гирифта шудааст. ИМА дар доираи ташаббуси тарҳи мазкур 200 миллиард доллар ҷудо мекунад.

Маблағгузорӣ ба кишварҳои дар ҳоли рушд дар самтҳое монанди иқлим ва амнияти энержӣ, алоқаи рақамӣ, тандурустӣ ва баробарии ҷинсӣ равона мешавад.

Ба илова, Шолтс ва Ҷо Байден, президенти ИМА дар мулоқоти як ба як барои идомаи кӯмаки низомӣ ба Украина ба созиш расиданд. Расонаҳо менависанд, дар эъломияи "Ҳафтгонаи бузург" омадааст, роҳбари ҳафтгона ба Украина то ҳадде, ки лозим аст, кӯмаки низомӣ, башарӣ, дипломатӣ мерасонанд.

Саммити G7 рӯзҳои 26-28 июн дар қасри Элмауи Алпи Бавария баргузор мешавад. Ба G7 Бритониё, Олмон, Италия, Канада, Фаронса, Ҷопон ва ИМА шомил ҳастанд. Соли ҷорӣ ба саммит намояндагони Индонезия ва Ҳинд даъват шудаанд.

Матни нави Қонуни асосии Узбекистон мухторияти Қарақалпоқистонро бекор мекунад

Шавкат Мирзиёев дар Қарақалпоқистон. Акс аз бойгонӣ.

Дар тарҳи нави Конститутсияи Узбекистон, ки матнаш дар дастраси умум қарор дорад, пешниҳод шудааст, мақоми мухтори Қарақалпоқистон бекор карда шавад.

Дар Конститутсияи амалкунандаи Узбекистон Қарақалпоқистон ҳамчун ҷумҳурии мухтор нишон дода шудааст, ки истиқлолаш аз сӯи Узбекистон муҳофизат мешавад. Ба илова, тибқи Конститутсияи амалкунанда, Қарақалпоқистон ҳақ дорад, аз ҳайати Узбекистон хориҷ шавад. Дар матни нави Конститутсия пешниҳод доранд, Қарақалпоқистон аз ин ҳақ маҳрум гардад.

Нашрияҳои Узбекистон бо такя ба комисияи ислоҳоти Конститутсия менависанд, ин пешниҳод аз сӯи вакилони порлумони Қарақалпоқистон таҳия шудааст.

Тарҳи ислоҳот ба Конститутсияи Узбекистон рӯзи 25 июн ба муҳокимаи умум гузошта шуд. Шавкат Мирзиёев, президенти Узбекистон моҳи декабри соли 2021 пешниҳод кард, ки ба Конститутсияи он кишвар тағйиру иловаҳо ворид карда шавад. Дар тарҳи тағйиру иловаҳо ҳамчунин пешниҳод шудааст, ки муҳлати президентӣ аз 5 соли кунунӣ ба 7 сол тамдид шавад, инчунин ду давраи роҳбарии президенти кунунӣ "ба сифр" баробар карда шавад. Ин маънои онро дорид, ки Мирзиёев бори дигар метавонад, номзадиашро ба мақоми президентӣ пешбарӣ кунад.

Қарақалпоқистон аз се як қисми Узбекистонро ташкил медиҳад. Вилояти мухтори Қарақалпоқистон соли 1930 аз ҳайати Қазоқистон Шӯравӣ берун шуда, мустақиман ба итоати Иттиҳоди Шӯравӣ шомил гардид. Аз соли 1936 то соли 1990 дар ҳайати Узбекистони Шӯравӣ буд.

Соли 1990 порлумони ҷумҳурии автономии Қарақалпоқистон дар ҳайати Узбекистон эъломияи давлати мустақилро қабул кард. Аммо ҳукумати Узбекистон дар соли 1993 бо Қарақалпоқистон шартномаи 20-солаи байнидавлатӣ баст ва ин кишварро шомили Узбекистон кард.

Дар соли 2013, вақте ки муҳлати шартнома ба поён расид, онро фаромӯш карда буданд. Аъзои ҳаракати "Алға, Қарақалпоқистон", ки ин масъала бардоштанд, ҳоло фирорӣ ҳастанд.

Толибон гуфтанд, мардуми осебдида ба обу хӯрок ниёз доранд

Пактико

Мақомоти тандурустии Толибон рӯзи 26-уми июн гуфтанд, ҳазорон нафаре, ки бар асари заминларзаи маргбор дар Афғонистон осеб дидаанд, "ба хӯроку оби ошомиданӣ сахт эҳтиёҷ доранд".

Ҳамчунин, ба гуфтаи онҳо, ба сокинони зарардида беморӣ таҳдид мекунад, "чун ҷойи муносибе барои зист надоранд."

Заминларзаи 6,1-дараҷаӣ рӯзи 22-юми июн вилоятҳои Пактико ва Хусти Афғонистонро ларзонд. То кунун марги 1150 нафар тасдиқ шудааст.

Ин ҳодиса барои ҳукумати Толибон, ки дар натиҷаи сиёсати сахтгиронаи исломгароёнааш нисбат ба занон ва духтарон дар инзиво қарор гирифтааст, чолишбарангез шуд. Мардуми Афғонистон аз фақр ранҷ мекашанд ва мушкилоти иҷтимоӣ ҳам баъди ба қудрат расидани Толибон дар моҳи августи соли 2021 бештар шудааст.

Шарофат Замон, сухангӯйи Вазорати тандурустии Толибон, рӯзи 26-уми июн ба хабаргузории "Рейтерс" гуфтааст, "аз ҷомеаи ҷаҳонӣ ва созмонҳои имдодрасон мехоҳем, ба мо хӯроку дору диҳанд."

Як бахши Созмони Милали Муттаҳид, ки умури башардӯстонаро ҳамоҳанг мекунад, аллакай аз эҳтимоли сар задани вабо дар минтақаҳои офатзадаи Афғонистон ҳушдор додааст.

Матбуоти Русия: Путин ба Душанбе меравад

Эмомалӣ Раҳмон ва Владимир Путин

Расонаҳои Русия рӯзи 26-уми июн хабар доданд, ки Владимир Путин, президенти он кишвар, ҳафтаи оянда ба Душанбе меояд.

Дар барномаи "Москва. Кремл. Путин" дар телевизиони "Россия 1" рӯзи якшанбе гуфтанд, Путин бо раисиҷумҳури Тоҷикистон "гуфтугӯи муҳим" ва хӯроки нисфирӯзии корӣ хоҳад дошт.

Мавзӯи суҳбати раҳбарони Тоҷикистону Русия маълум нест. Душанбе дар бораи сафари Путин тафсилот надодааст.

Ин сафари нахустини хориҷии Путин аз замони ҳамлаи бедалели кишвараш ба Украина дар 24-уми феврали имсол хоҳад буд. Дар ин ҷанг, ки ҳанӯз идома дорад, ҳазорҳо кас кушта ва миллионҳо нафар беҷову овора шудаанд.

Владимир Путин ва Эмомалӣ Раҳмон бори охир 16-уми майи имсол, дар ҳошияи нишасти сарони СПАД ва ҳамагӣ ду рӯз пеш аз амалиёти мақомот дар ноҳияи Рӯшон дар Маскав суҳбат доштанд.

Ба хабари расмӣ, онҳо ҷараёни иҷрои таҷдид ё азнавсозии нерӯҳои мусаллаҳи Тоҷикистон ва вазъ дар сарҳади Афғонистонро баррасӣ кардаанд.

Русияву Тоҷикистон, ду кишвари пасошӯравӣ, ки ба нақзи ҳуқуқи одамон ва саркӯби мухолифон муттаҳам ҳастанд, солҳо боз шарики стратегиянд.

Ду кишвар дар моҳҳои охир аз афзоиши додугирифт мегӯянд, вале ҷузъиёт намедиҳанд. Қурби рубли русӣ дар ҳафтаҳои охир дар Тоҷикистон дар муқоиса ба доллар рӯ ба боло ниҳодааст.

Садҳо ҳазор шаҳрванди Тоҷикистон дар Русия кору таҳсил мекунанд. Русия дар Тоҷикистон пойгоҳи низомӣ дорад.

Президенти Амрико ба ягонагии Ғарб даъват кард

Ҷо Байден ва Олаф Шолтс

Раисиҷумҳури Амрико Ҷо Байден дар муроҷиати тозааш бори дигар ба мутаҳиддӣ ё ягонагии Ғарб алайҳи Русия даъват кард.

"Мо бояд якҷоя бошем," -- гуфт Байден дар суҳбат бо Олаф Шолтс, садри аъзами Олмон ва пеш аз нишасти дурӯзаи сарони G7 ё ҳафт кишвари саноатии ҷаҳон. Нишаст 26-уми июн дар Олмон оғоз шуд.

Вай афзуд, Владимир Путин, раисиҷумҳури Русия, орзу дорад, ки "НАТО ва G7 ба навъе пароканда мешаванд... вале мо ин корро накардаем ва нахоҳем кард."

Байден аз садри аъзами Олмон барои мизбонӣ аз нишасти муҳими G7, ки дар он таҳримҳои зидди Русия ва пайомадҳои ҷанг дар Украина баррасӣ хоҳад шуд, ситоиш кард.

Нахуствазири Бритониё Борис Ҷонсон низ Шолтсро таъриф кард. Ӯ гуфт, дар тӯли умраш ҳеч гоҳ бовар намекард, ки садри аъзами Олмон ба мардуми Украина барои дифоъ аз худу қаламравашон силоҳ мефиристад.

Дар ҳамин ҳол, Дмитрий Кулеба, вазири корҳои хориҷии Украина, аз сарони G7 хостааст, ба зидди Русия таҳримҳои бештар ҷорӣ карда, ба Украина силоҳҳои сангин бидиҳанд.

Бритониё ва муттаҳидонаш тиллои Русияро таҳрим мекунанд

Борис Ҷонсон

Чаҳор кишвари узви G7 ё ҳафт кишвари саноатии ҷаҳон – Бритониё, Амрико, Канада ва Ҷопон – гуфтаанд, ки ба зудӣ воридоти тиллои Русияро манъ мекунанд.

Ин бахше дигар аз таҳримҳо алайҳи Русия барои ҷанги бедалелаш дар Украина аст. Дар ин бора Борис Ҷонсон, нахуствазири Бритониё, 26-уми июн, дар рӯзи ифтитоҳи нишасти сарони G7 дар Олмон хабар дод.

Пештар Reuters бо такя ба манобеи худ иттилоъ дода буд, ки кишварҳои G7, ки ба он Фаронсаву Олмон ва Итолиё низ шомиланд, ба манъи воридоти тилло аз Русия розӣ шудаанд.

Чарлз Мишел, раиси Шӯрои Аврупо гуфт, Иттиҳоди Аврупо масъалаи манъи воридоти тиллоро аз Русия меомӯзад. Вай таъкид кардааст, ки бояд арзёбӣ шавад, ин тасмим ба иқтисоди Иттиҳоди Аврупо зиёне дорад ё на.

Дар ҳамин ҳол, як мансабдори баландпояи Амрико рӯзи якшанбе гуфт, дар пайи ин нишаст тасмими муштараки кишварҳои G7 дар бораи таҳрими тиллои Русия дар назар аст.

Ба гуфтаи Борис Ҷонсон, нахуствазири Бритониё, манъи харидории тиллои Русия ба сарватмандони ин кишвар, ки ахиран дороиҳои худро ба тилло табдил додаанд ва "мошини низомии Путин" зарба хоҳад зад.

Гуфта мешавад, содироти тилло дар соли 2021 ба иқтисоди Русия зиёда аз 15 миллиард доллар фоида овардааст.

Путин гуфт, Маскав ба Беларус "Искандар-М" медиҳад

Сохтори мушакии Русия - "Искандар-М". Акс аз соли 2016

Раисиҷумҳури Русия рӯзи шанбе дар мулоқот бо раҳбари худкомаи Беларус Александр Лукашенко дар Санкт-Петербург гуфт, Маскав тасмим гирифтааст, ба ин ҳампаймонаш маҷмаи мушакии "Искандар-М" бидиҳад.

Ба қавли Владимир Путин, маҷмаи мушакӣ моҳҳои наздик ба Минск супурда хоҳад шуд.

Путин ва Лукашенко ба муносибати 30-юмин солгарди барқарории равобити дипломатӣ миёни кишварҳояшон вохӯрданд.

Мулоқоти онҳо дар пасманзари изҳороти мансабдорони Украина сурат гирифт. Киев мегӯяд, аз ҳарими ҳавоии Беларус мавриди ҳамлаи мушакии густурда қарор гирифтааст.

Хадамоти истихборотии Украина рӯзи шанбе гуфт, "зарбаи имрӯза ба талошҳои Кремл барои кашидани пойи Беларус ба ҷанги Украина рабт дорад".

Байден тарҳи ҷанҷолиро дар мавриди силоҳ қабул кард

Ҷо Байден

Ҷо Байден, раисиҷумҳури Амрико, рӯзи 25-уми июн ба тарҳи ҷанҷолии манъи истифода аз аслиҳа дар хушунатҳо имзо гузошт.

Ин лоиҳа солҳо боз мавриди баҳс қарор дошт, вале дар мавриди он тавофуқи ҳамаҷониба ҳосил нашуда буд.

Созиши Ҳизби Демократ ва Ҳизби Ҷумҳурихоҳ дар бораи лоиҳа пеш аз тирандозиҳои ахир, аз ҷумла қатли 19 хонанда ва ду муаллим дар як мактаби Техас, низ ғайри қобили тасаввур ба назар мерасид.

Байден бо ишора ба мулоқот бо оилаи қурбониёни ин тирандозиҳо гуфт, "паёми онҳо ин буд, ки як кореро анҷом диҳед ва мо имрӯз ин корро кардем."

Маҷлиси Намояндагони Амрико лоиҳаро рӯзи 24-уми июн қабул кард.

Ҳодисаи Ослоро ҳамлаи эҳтимолии "террористони исломӣ" меноманд

Осло

Дар Норвегия маросими ёдбуди қурбониёни тирпаронии 25-уми июн дар Осло баргузор хоҳад шуд.

Бар асари ҳамла ба се маҳал, аз ҷумла як клуби ҳамҷинсгароён, 2 нафар кушта ва 21 кас маҷруҳ шуданд.

Мақомоти Норвегия ин рӯйдодро ҳамлаи эҳтимолии "террористони исломӣ" меноманд.

Ба гузориши расонаҳои давлатии Норвегия, намояндаи калисои Осло, Кристин Гунлейксруд Раум, гуфтааст, "ин ҳодиса ҷомеаи моро ба ларза овард."

Тирпарронӣ сабаб шуд, ки пулис ҳамоиши ҳамҷинсгароёнро, ки қарор буд, дар Осло баргузор шавад, бекор кард.

Гумонбарро пас аз чанд лаҳзаи ҳодиса дастгир кардаанд. Аз ӯ як марди 42-солаи норвежии эрониасл ном бурда мешавад.

Ҳамлаи мушакии Русия ба пойтахти Украина

Киев, 26-уми июни 2022

Бар асари ҳамлаҳои мушакии Русия ба маҳалли аҳолинишин дар пойтахти Украина ба камияш ду бино вайрон шуда, баъзе аз сокинон дар зери харобаҳо мондаанд. Дар як бинои нӯҳошёна сӯхтор сар зад. Ҳодиса субҳи 26-уми июн рӯй дод.

Виталий Кличко, шаҳрдори Киев, ба маҳалли ҳодиса рафт. Он дар яке аз минтақаҳои таърихии пойтахти Украина ҷойгир аст.

Кличко гуфт, баъзе аз сокинон дар бемористон ҳастанд, иддае дигар дар зери харобаҳо мондаанд. Вай амалкарди Русияро кӯшиши "тарсондан"-и украиниҳо дар остонаи нишасти сарони НАТО донист. Онҳо 28-30-юми июн ҷаласа доранд. Яке аз мавзуъҳои мавриди баҳс идомаи ёрӣ ба Украина хоҳад буд.

Як рӯз пеш, нерӯҳои Украина гуфтанд, аз шаҳри Северодонетск берун рафтаанд ва онро "тактикае" номиданд, ки ҷараёни муборизаро дар шарқи Украина тағйир медиҳад.

Президент Владимир Зеленский дар паёме ваъда дод, Украина дар ниҳоят шаҳрҳоеро, ки аз оғози ҳамлаи Русия дар рӯзи 24-уми феврали имсол аз даст додааст, бозпас хоҳад гирифт.

Дар ҳамин ҳол, нигарониҳо аз густариши ҷанг дар Украина бештар шудааст. Мақомоти Украина аз сар додани мушакҳое аз қаламрави Беларус хабар доданд. Маскав ҳам гуфтааст, Беларусро бо системаи пешрафтаи мушакӣ таъмин хоҳад кард.

Низомиёни Украина дар ҷанг дар як шаҳри муҳим "ақибнишинӣ" кардаанд

Низомиёни Украина дар шаҳри Северодонетск. Акс аз 20-уми июни 2022

Низомиёни украинӣ шаҳри Северодонетскро дар вилояти Луҳанск, ки ҳафтаҳо боз майдони даргирии сахт буд, пурра тарк кардаанд. Дар ин бора Александр Стрюк, шаҳрдори Северодонетск, хабар дод.

Вазорати мудофиаи Украина хабарро расман тасдиқ ё рад накардааст. Вазорати мудофиаи Русия низ ҳанӯз аз тасарруфи шаҳр хабар надод, вале Рамазон Қодиров, раҳбари Чеченистон, эълон кард, ки "шаҳр зери назорати низомиёни рус аст".

Қисми зиёди вилояти Луҳанскро солҳо боз ҷудоиталабони рӯ ба Русия ба даст доштанд. Северодонетск дар ихтиёри Украина буд.

Пештар Сергей Ҳайдай, волии низомии Луҳанск, гуфта буд, ки низомиён барои он берун шудаанд, ки дар ҷои беҳтаре муқобили низомиёни рус сангар бигиранд.

Рӯзи шанбе дар бораи задухӯрд дар Лисичанск хабар нашр шуд, ки охирин шаҳри зери назорати Украина дар вилояти Луҳанск аст.

Вазорати мудофиаи Русия хабар дод, ки ин шаҳр аз ҷануб баста шудааст. Ҷониби Украина гуфт, ҳамлаи низомиёни русро пас гардондаанд ва шаҳр дар муҳосира нест.

Дар задухӯрдҳо дар Северодонетск ва Лисичанск хонаҳои зиёде вайрон шудааст. Теъдоди ҳалокшудагон дар миёни сокинони маҳаллӣ маълум нест.

Русия рӯзи 24-уми феврал бебаҳона ба Украина ҳамла кард ва то кунун ҷанг дар ин кишвар давом дорад. Ҳазорон нафар дар ин ҷанг кушта ва миллионҳо нафар беҷову овора шудаанд.

Чор рӯз пеш аз ҷанг Путин ва Макрон чӣ гуфтанд?

Путин ва Макрон

Рӯзноманигорони фаронсавӣ мӯҳтавои суҳбати президенти Русия ва Фаронсаро дар рӯзи 20-уми феврал, чор рӯз пеш аз ҳамла ба Украина, ошкор карданд.

Дар филми ҳуҷҷатии "Президент, Аврупо ва ҷанг", ки канали телевизионии France 2 намоиш дод, нӯҳ дақиқа суҳбати Владимир Путин ва Эммануел Макрон пахш шуд.

Суҳбати Макрон бо Путин субҳи 20-уми феврал дар пасманзари якбора бад шудани вазъ дар марзи Украина сурат гирифт. Он вақт теъдоди нерӯҳои русӣ якбора дар Донбас афзоиш ёфта буданд.

"Ман мехоҳам, ки шумо аввал ба ман назари худро дар бораи вазъият бигӯед ва шояд рӯирост, вақте ки мо як ба як суҳбат мекунем, бигӯед, ки ниятҳои шумо чист.",--бо ин суханон Макрон суҳбатро оғоз кард.

"Ман чӣ гуфта метавонам? Худатон бубинед, ки чӣ рӯй дода истодааст", - ҷавоб дод Путин ва баъд аз он раисиҷумҳури Украина Владимир Зеленскийро дар дурӯғгӯӣ ва худи Макронро дар он муттаҳам кард, ки мехоҳад созишномаҳои Минскро дар бораи Донбасс бознигарӣ кунад. Макрон бо ин шарҳ розӣ набуд, ки боиси баҳс гардид. Ба шикояти Путин, ки пешниҳодҳои ҷудоихоҳон "шунида намешаванд" Макрон мегӯяд, ки "мо пешниҳоди ҷудоихонро ҷиддӣ намегирем, чун онҳо бахше аз созишномаи Минск нестанд."

Дар ин суҳбат Путин ба пешниҳоди Макрон барои суҳбат бо Ҷо Байден, президенти ИМА розӣ мешавад, вале мегӯяд, ки ҳоло набояд рӯзи вохуриро эълон кард.

Суҳбати Путин бо чунин гап тамом мешавад: "Аз шумо пинҳон намекунам, ки ҳоло мехоҳам ҳоккей бозӣ кунам. Ҳоло бо шумо аз толори варзишӣ суҳбат дорам."

Дар хабарномаҳои Кремл дар бораи эҳтимоли суҳбат бо Ҷо Байден чизе гуфта нашудааст.

Як рӯз пас аз ин суҳбат Русия Луҳанск ва Донбас, ду минтақаи ҷудоиталабро ба расмият шинохт.

Макрон пас аз оғози ҷанг низ борҳо бо Путин суҳбати телефонӣ дошт. Ӯ гуфта буд, ки аз суҳбат бо Путин хушҳол намешавад, вале барои сулҳ бояд роҳ биҷӯяд.

Мақомоти Русия мегуфтанд, ки нияти ҳамла ба Украинаро надоранд, вале рӯзи 24-уми феврал низомиёни рус вориди ин кишвар шуданд.

Дар ҳамла ба клуби ҳамҷинсгароён дар Осло ду нафар кшута шудааст

Чандин нафар низ дар ин ҳамла захмӣ гардидааст.

Дар Осло, пойтахти Норвегия, дар ҳамлае ба клуби ҳамҷинсгароён шаби 25-уми июн ду нафар кушта ва даҳ нафар захмӣ гаштааст.

Пулис ин ҳодисаро ҳамчун ҳамлаи террористӣ таҳқиқ мекунад. Ҳамлагар чанд дақиқа пас аз ҳодиса боздошт шуд. Пулис номи боздоштшударо ошкор накардааст, вале гуфтааст, ӯ аз қабл дар рӯйхати афроди шубҳанок ҷой дошт.

Ҳадафи ҳамла ҳанӯз мушаххас нест. Ба гуфтаи мақомот, ҳамлагар танҳо амал кардааст ва касе ҳамроҳи ӯ набуд.

Пас аз ин ҳамла пулис ҳамоиши ҳамҷинсгароён, ки қарор буд, дар Осло баргузор шавад, манъ кард.

Писари сарвазири собиқи Доғистон барои қатли як донишҷӯ 13 сол равонаи зиндон шуд

Томирис Бойсофӣ донишҷӯ буд.

Як додгоҳ дар Маскав Муртузалӣ Маҷидов, писари сарвазири собиқи Доғистонро барои қатли Томирис Бойсофӣ, як донишҷӯи Донишгоҳи Маскав ба 13 соли зиндон маҳкум кард.

Ба навиштаи хабаргузории "Москва", Томирис Бойсофӣ моҳи апрели соли 2018 дар зери хобгоҳи донишҷӯён беҳуш пайдо шуд. Баъдан, аз зарбҳое, ки ба ӯ расида буд, дар беморхона ҷон дод. Тафтишот маълум кард, ки ӯро Маҷидов латтукӯб кардааст.

Дар оғоз нисбат ба Маҷидов барои "ба худкушӣ овардан" парванда боз карданд, вале баъдан ӯро бо ҷурми куштор ба ҷавобгарӣ кашиданд.

Падари муттаҳам дар қатли донишҷӯ Мухтор Маҷидов моҳҳои январ-июли соли 2013 раҳбари ҳукумати Доғистон буд. То он замон ӯ дар вазифаҳои сарвазир ва вакили маҷлиси Доғистон кор мекард. Худи ӯро соли 2020 барои аз худ кардани моликияти Вазорати мудофиаи Русия боздошт карданд ва ҳоло нисбаташ тафтиш давом дорад.

Номи беш аз 4000 низомии кушташудаи Русия дар Украина ошкор шуд

Танкҳои харобшудаи Русия дар Украина.

Хабарнигорони Би-би-си мегӯянд, исми 4010 низомии Русияро ошкор кардаанд, ки дар ҷанги Украина кушта шудаанд.

Дар ин рӯйхат исми шаҳрвандоне низ ҳаст, ки ихтиёран барои ҷанг ба Украина рафтанд.

Ба гуфтаи журналистон, шаҳрвандоне, ки то замони ҷанг низомӣ набуданд, вале ихтиёран пас аз оғози ҷанг ба Украина рафтаанд, бештар кушта шудаанд.

Ҳар ҳафта аз кушта шудани 30 то 40 нафар аз чунин ихтиёриён хабар мерасад, ки 20 дарсадашон аз 50 сола боло ҳастанд.

17 дар сад дар миёни кушташудаҳо афсарон будаанд. Дар ин рӯйхати Би-би-си исми 42 халабони низомии кушташудаи русро низ овардааст.

Мақомоти рус охирон бор моҳи март гуфта буданд, ки 1351 низомиашон дар ҷанги Украина кушта шудааст. То кунун расман дар бораи талафот чизе намегӯянд.

Русия охири моҳи феврал ба Украина ҳуҷум кард ва ҷанг то кунун идома дорад.

Профессор Аҳмад Абдуллоев даргузашт

Аҳмад Абдуллоев дар овони ҷанги дохилии Тоҷикистон ба зодгоҳаш дар Узбекистон кӯчид

Профессор Аҳмад Абдуллоев, муҳаққиқи адабиёти форсу тоҷик, дар 86-солагӣ дар Узбекистон даргузашт. Дар ин бора рӯзноманигор Мирасрори Фарғонӣ рӯзи 24-уми июн дар саҳифааш дар "Фейсбук" хабар дод.

Абдуллоев солҳои 1980 бо мақолаҳои ҷасуронааш дар нашрияи "Маориф ва маданият"-и зери раҳбарии Бӯринисо Бердиева дар Тоҷикистон шуҳрат дошт. Ҳадаф аз онҳо бедории миллӣ, арҷгузорӣ ба таърих, забон ва фарҳанги миллии тоҷикон буд.

Ӯ бо сар задани ҷанги шаҳрвандии 1992-97 аз Тоҷикистон ба зодгоҳаш дар вилояти Сурхондарёи Узбекистон рафт ва солҳои охири умрашро дар онҷо гузаронд.

Бахши суханшиносӣ ё филологияи тоҷикро дар Донишгоҳи давлатии Тирмиз асос гузоштааст. Асари "Абуабдуллоҳи Рӯдакӣ"-ро соли 2013, дар авҷи сардии равобити Тоҷикистону Узбекистон, бо забони тоҷикӣ дар Тошканд нашр кард.

Донишкадаи омӯзгории Душанберо хатм карда, дар Академияи илмҳо ва Пажӯҳишгоҳи забон ва адабиёти ба номи Рӯдакӣ кор кардааст.

Бино ба маълумоти "Википедияи тоҷикӣ", асосан ба адабиёти қарнҳои 11-12 ва намояндагони он – Адиб Собири Тирмизӣ, Заҳири Форёбӣ, Унсурӣ, Фаррухӣ, Манучеҳрӣ ва дигарон – таваҷҷуҳ дошт. "Девони Адиб Собири Тирмизиро соли 2001 омода ва нашр кард," – омадааст дар "Википедия".

Фарзанди ӯ, доктори илм Масрури Абдуллоҳ, солҳои охир дар дастгоҳи раёсатҷумҳурии Тоҷикистон адои вазифа мекунад. Пештар дар созмони "Интернюс" ва Донишгоҳи славянии Тоҷикстону Русия фаъолият дошт.

Президенти пешини Туркманистонро ба додгоҳ кашиданд

Қурбонгулӣ Бердимуҳаммадов, президенти пешини Туркманистон.

Шаҳрвандони Туркманистон, ки дар Туркия паноҳанда ҳастанд, президенти пешини худ Қурбонгулӣ Бердимуҳаммадов ва як қатор мансабдоронро ба додгоҳ кашидаанд.

Онҳо президенти пешини Туркманистон ва мансабдрони кишвари худро ба нақзи ошкорои ҳуқуқи инсон айбдор кардаанд.

Вакили дифои паноҳандаҳои туркман Гюлден Сонмез бо нашри як видео дар Интернет хабар дод, ки зидди Бердимуҳаммадов, вазири умури хориҷии Туркманистон Рашид Мередов ва вазири умури дохилии он кишвар Муҳаммад Хидиров 21 июн ба додгоҳи шаҳри Истамбули Туркия расман шикоят карда шудааст.

Ба гуфтаи вакили дифоъ, президенти пешин ва мансабдорони баландпояи Туркманистон ба нақзи ҳуқуқи инсон, аз ҷумла “боздоштҳои ғайриқонунӣ, муҷозоти бидуни додгоҳ ва шиканҷаи дастгиршудаҳо” айбдор мешаванд.

Ёфтҳои бештар

XS
SM
MD
LG