Идомаи музокирот барои поён додани ҷанги Русия дар Украина зери суол уфтодааст.
Раисҷумҳури Украина мегӯяд, дар пасманзари хашми мардум аз рафтори бераҳмонаи нерӯҳои Русия баҳси сулҳ мушкил аст. Вазири корҳои хориҷии Русия иддао дорад, ки таҳримҳои Ғарб ва интиқоли силоҳ ба Украина монеи сулҳ мешавад.
Ин изҳорот дар ҳоле садо дод, ки барои берун бурдани ғайринизомиён аз шаҳри муҳосирашудаи Мариупол ноумед шудаанд.
Русия ба ҳамлаи худ дар шарқи Украина идома медиҳад. Маскав 30-юми апрел иддао кард, ки дар идомаи талош барои назорати комил бар Луҳанск ва Донетск дар шабонарӯз ба беш аз 380 ҳадаф зарба зад. Ситоди кулли нерӯҳои мусаллаҳи Украина гуфт, талоши артиши Русия номуваффақона буд ва ҷанг идома дорад.
Раисҷумҳури Украина рӯзи 29-уми апрел дар паёми телевизионӣ ба мардум гуфт, нерӯҳои Киев дар минтақаи шарқии Донбасс "пирӯзиҳои тактикӣ" ба даст оварданд.
Владимир Зеленский ҳамон рӯз ба хабарнигорони лаҳистонӣ гуфт, мардуми Украина барои рафтори ваҳшиёна ба нерӯҳои Русия ҷазо мехоҳанд ва "вақте чунин муносибат вуҷуд дорад, дар бораи чизҳои дигар суҳбат кардан душвор аст."
Сергей Лавров, вазири корҳои хориҷии Русия, 30-юми апрел ба “Синҳуа”, хабаргузории расмии Чин, гуфт, музокироти "мушкил" бо Киев идома дорад. Вай ҳамзамон афзуд, Русия ба бекор кардани таҳримҳо пофишорӣ дорад ва аз Амрикову НАТО мехоҳад, фиристодани силоҳро ба Украина бас кунанд.
