Хуруҷи неруҳои Созмони паймони амнияти дастаҷамъӣ (СПАД) аз Қазоқистон рӯзи 19 январ комилан ба поён расид. Дар ин бора Олжас Ҳусайнов, як масъули вазорати мудофиаи Қазоқистон рӯзи сешанбеи 19 январ хабар дод.

"Дар ҳоли ҳозир дар ҳудуди Қазоқистон неруи хориҷӣ ҳузур надорад", - гуфт вай. Ба иттилои ин Олжас Ҳусайнов, 6 январ Русия "бештар аз 2 ҳазор низомӣ" ва 250 техникаи низомӣ ба Қазоқистон овард.

Неруҳои СПАД, ки бештари онҳоро низомиёни рус ташкил медоданд, баъди даъвати президенти Қазоқистон Қосимҷомарт Тоқаев ба ин кишвар ирсол шуданд. Тоқаев ҳаводиси ибтидои моҳи январро талоши табаддулоти давлатӣ унвон кард, ки гӯё пушти он "террористони хориҷӣ" меистанд. Ҳеч далели мавҷудияти "ҳазорон ҷангҷӯи хориҷӣ" дар Қазоқистон пешниҳод нашуда ва ҳадафи онҳо низ то кунун номаълум аст.

Хуруҷи неруҳои СПАД аз Қазоқистон 13 январ шуруъ шуда буд. Дар ин созмон Русия, Белорус, Арманистон, Қазоқистон, Қирғизистон ва Тоҷикистон аъзо ҳастанд.

Шоҳида Маҳмадҷонова, пизишки собиқ ва модари блогер Шерзод Маҳмадҷонов, ки бо номи "Абдураҳмон 09" маъруф асту пайваста ҳукумати Тоҷикистонро барои маҳдудияти озодиҳои сиёсӣ ва динӣ танқид мекунад, аз зиндони занона дар шаҳри Норак озод шудааст.

Ӯ моҳи феврали соли 2022 дастгир ва дертар бо иттиҳоми ҷонибдорӣ аз мавқеъ ва ақидаи созмонҳои фаъолияташон мамнуъ дар Тоҷикистон, аз ҷумла "Гурӯҳи 24" ва Ҳизби наҳзати исломӣ ба шаш сол зиндон маҳкум шуда буд. Чизе, ки наздиконаш инкор карданд.

Шерзод Маҳмадҷонов, ки дар Аврупо қарор дорад, рӯзи 22-юми июн дар суҳбат бо Радиои Озодӣ гуфт, модараш пас аз чаҳор солу панҷ моҳи боздошту ҳабс бар асоси қонуни нави афв озод шудааст.

"Модарамро як рӯз пеш раҳо кардаанд. Аз ин хабар хушҳол шудам. Ӯ 49-сола аст. Ҳангоми дар маҳбас буданаш аз дарди сутунмуҳра ранҷ мекашид ва шароити дурусти табобаташ набуд. Акнун табобаташ хоҳем кард," – гуфт Шерзод Маҳмадҷонов ба Радиои Озодӣ.

Талоши Радиои Озодӣ барои суҳбат бо худи Шоҳида Маҳмадҷонова то ин дам натиҷа надод. Мақомот низ дар бораи раҳоии ӯ гузориш надоданд.

Ба зиндон маҳкум шудани Шоҳида Маҳмадҷонова дар соли 2022 танқидҳои зиёдеро дар дохил ва хориҷи кишвар ба миён оварда буд. Иддае навиштанд, ки мақомот ӯро барои танқидҳои писараш ҷазо доданд.

Қонуни нави афв рӯзи 16-уми июн дар пайванд ба 35-умин солрӯзи истиқлоли Тоҷикистон қабул шуд. Ин санад нисбат ба 18 ҳазор нафар татбиқ хоҳад шуд. Муҳлати ҳабси теъдоде кам шуда, бархеи дигар аз боздоштгоҳу зиндонҳои Тоҷикистон пупра озод ё парвандааш қатъ хоҳад шуд.

Дар Тоҷикистон беш аз даҳ ҳазор нафар, аз ҷумла зиёда аз 500 зан дар зиндон ҳастанд. Мухолифони ҳукумат дар берун аз кишвар ва намояндагони созмонҳои байнулмилалӣ ҳамвора мақомотро барои зиндонӣ кардани теъдоди зиёди одамон ва он ҳам ба солҳои тӯлонӣ танқид мекунанд.

Як марди ниқобпӯш дар шаҳри Подолски Русия як шаҳрванди Тоҷикистонро бераҳмона латукӯб карда ва бинии ӯро буридааст.

Иброҳимхон Ҳусейнови 21-сола аз Душанбе, ки дар як корхонаи халтабарорӣ дар Русия кор мекард, айни замон дар шифохона муолиҷа мегирад.

Яке аз наздикони Ҳусейнов ба Радиои Озодӣ гуфт, фарди ниқобпӯш шаби 20 ба 21-уми июн дар шаҳри Подолск ҳангоми бозгашт аз хонаи хоҳараш ногаҳонӣ ба ӯ дарафтодааст. Дар натиҷаи ин ҳамла муҳоҷири кории тоҷик аз гӯшу бинӣ ва пояш захмӣ шудааст.

"Ёрии таъҷилӣ омад ва ӯро ба шифохонаи марказии Подолск бурд. Пизишкон гуфтанд, ки хуни зиёд рафтааст. Полис ҳам омаду пурсишҳои аввалияро барпо кард. Маълум нест, ки то куҷо ин ҳамла ангезаҳои нажодпарастона дошт, чун ҳамлавар ҳеч ҳарфе ба забон наовард," – гуфт мусоҳиби Радиои Озодӣ рӯзи 22-юми июн.

Сабабҳои ҳамла маълум нест. Худи Иброҳимхон Ҳусейнов ба полис гуфтааст, ҳамлаварро намешиносад, чун чеҳрааш пинҳон буд.

Ба гуфтаи пайвандонаш, Иброҳимхон Ҳусейнов чанд сол боз қонунӣ дар Русия кору зиндагӣ мекунад.

Мақомоти Русия солҳои охир ва бавижа баъд аз ҳамла ба толори консертии "Крокус" муҳоҷирони кориро сабаби мушкилоту бадбахтиҳои ин кишвар номида, сабаби афзоиши бегонаситезӣ ва аз ҷумла афзудани ҳамла ба муҳоҷирон аз Осиёи Марказӣ шудаанд.

Ҳоло як нигаронии наздикони Иброҳимхон Ҳусейнов ин аст, ки оё ҳодиса беғаразона ва ҳамаҷониба таҳқиқ хоҳад шуд ё не.

Кир Стармер, нахуствазири Британия эълон кард, ки аз мақомаш канорагирӣ мекунад, аммо то интихоби сарвазири нав аз сӯи Ҳизби коргар, корашро давом медиҳад.

Стармер 22-юми июн дар муроҷиате гуфт, бо подшоҳи Бритониё дар бораи истеъфо суҳбат кардааст ва тамоми талошашро "барои интиқоли муназзам"-и қудрат анҷом хоҳад дод.

Ба гуфтаи нахуствазири Бритониё, раванди интихоби раҳбари нави Ҳизби коргар дар моҳи июл оғоз мешавад ва дар моҳи сентябр номи сарвазири нав маълум хоҳад шуд.

Пештар расонаҳо гузориш доданд, ки Ивет Купер, вазири корҳои хориҷӣ ва беш аз 100 намояндаи маҷлиси Бритониё хоҳони истеъфои Кир Стармер шудаанд.

Шаҳрдори Манчестер Энди Бёрнем, ки ахиран дар интихобот барои курсии холишудаи маҷлис пирӯз шуд, аз номзадҳои аслӣ барои курсии нахуствазирии Бритониё гуфта мешавад.

Баъди марги ногаҳонии Алишер Мирзонабот, иҷрои вазифаҳои раиси Вилояти Мухтори Куҳистони Бадахшон ба уҳдаи муовини аввали раиси вилоят Шарифхон Сафарзода гузошта шудааст.

Номи Сафарзода зери қароре дар бораи "даъвати Иҷлосияи шашуми Маҷлиси вакилони халқи вилоят" ҳамчун иҷрокунандаи вазифаи раиси ВМКБ дарҷ ёфтааст.

Ин қарорро "Рӯзномаи Бадахшон" рӯзи 19-уми июн нашр кард.

Як масъули ҳукумати Вилояти Мухтори Куҳистони Бадахшон 22-уми июн бо шарти фош нашудани номаш ба Радиои Озодӣ гуфт, Шарифхон Сафарзода тибқи қонун то таъйин шудани раиси нави вилоят вазифаҳои ӯро иҷро мекунад.

Шарифхон Сафарзода аз соли 2023 дар мақоми муовини аввали раиси вилоят кор мекард. Пеш аз он раиси ноҳияи Варзоб буд. Дар ҳукумати ноҳияи Исмоили Сомонӣ дар Душанбе ҳам кор кардааст.

Навор дар Инстаграм:

Мошини Алишер Мирзонабот, раиси Вилояти Мухтори Кӯҳистони Бадахшон бо зану як кӯдакаш ва ёвару ронандааш рӯзи 17-уми июн дар ҳудуди ноҳияи Дарвоз ба дарёи Панҷ афтод, вале то ҳол пайкари ғарқшудагон ва ҳам мошин дарёфт нашудаанд. Ҳукумати Тоҷикстон дар номае навишт, ки Алишер Мирзонабот ба ҳалокат расидааст.

Алишер Мирзонабот, ки дар гузашта дар Кумитаи давлатии амнияти миллии Тоҷикистон кор кардааст, 46-сола буд ва аз соли 2021 идораи вилояти Бадахшонро бар уҳда дошт.

Ҳарчанд мақомот аз шеваи раҳбарӣ ва амалкардҳояш дар панҷ соли гузашта ситоиш кардаанд, гурӯҳе аз фаъолони зодаи Бадахшон ӯро дар саркӯби норозиён ва боздошту ҳабси дигарандешон дар минтақа танқид мекунанд.

ИНЧУНИН, БИХОНЕД:

"Наметавон баҳои яксон дод." Нигоҳҳо ба корномаи Алишер Мирзонабот

Рӯзи 20-уми июн баъди анҷоми бозии дастаҳои "Ҳосилот"-и Фархор ва "Равшан"-и Кӯлоб миёни мухлисони ду даста занозанӣ рух додааст.

Бозии ду тим дар ноҳияи Фархор баргузор шуд ва бо пирӯзии тими "Равшан" тамом шуд. Дар наворҳо дида мешавад, ки баъди анҷоми бозӣ мухлисон ба ҳам дарафтода, ба сӯи якдигар сангпартоӣ мекунанд. Дар видеои паҳншуда дар шабакаҳои иҷтимоӣ шишаҳои шикастаи як автобус ҳам дида мешавад.

Сабаби сар задани ин ҷанҷол маълум нест ва пулиси Хатлон ҳам дар ин бора шарҳе надодааст.

Дафтари матбуоти Федератсияи футболи Тоҷикистон 22-юми июн ба Радиои Озодӣ гуфт, Кумитаи тартибу интизоми федератсия ин қазияро омӯхта, қарори лозимро қабул мекунанд.

Дар Федератсияи футбол гуфтанд, бозии дастаҳои "Равшан" ва "Ҳосилот" дар доираи мусобиқа барои дарёфти Ҷоми Тоҷикистон анҷом шуд.

Занозании мухлисони футбол дар Тоҷикистон пештар ҳам рух дода буд ва барои ин кор ҳам дастаҳо ва ҳам мухлисонро ҷазо додаанд.

Вазорати корҳои дохилии Қатар рӯзи 22 июн хабар дод, ки дар пайи таркиш дар минтақаи саноатии Раъс Лаффон 52 нафар захмӣ шудаанд ва 18 нафар ҳамчунон нопадид ҳастанд.

Ба гуфтаи мақомҳои қатарӣ, ин ҳодиса шоми якшанбе бар асари як "нуқси фаннӣ" рух додааст ва боиси таркиш ва сӯхтор дар иншооти таъмини гази маҳалии "Барзон" шудааст.

Ба навиштаи хабаргузории "Франс-пресс", шӯълаи оташ аз дурии ҳудуди 20 километр қобили мушоҳида буд. Раъс Лаффон маҳали калонтарин маркази тавлиди гази моеи ҷаҳон ба шумор меравад.

Ширкати давлатии "Қатар энержӣ" эълон кард, ки таҳқиқот дар бораи сабабҳои дақиқи сар задани ҳодиса идома дорад. Вазорати корҳои дохилии Қатар низ аз оғози амалиёти ҷустуҷӯ барои ёфтани 18 фарди нопадидшуда хабар дод.

Минтақаи Раъс Лаффон пештар низ дар ҷараёни ҷанг миёни Амрико ва Эрон осеб дида буд ва ҳамлаҳои паҳбодии Эрон ба зерсохтҳои энержии Қатар боиси қатъи тавлиди гази моеъ дар ин кишвар шуда буд.

Расонаҳои Эрон ва хабаргузории Ройтерз аз поёни даври аввали музокироти Амрико ва Эрон дар Швейтсария хабар доданд.

Ин гуфтугӯ 21-уми июн бо миёнаравии Покистон ва Қатар баргузор шуд.

Хабаргузориҳои эронии Форс ва ИРНА аз тамом шудани аввалин нишасти чаҳорҷониба хабар доданд. Хабаргузории Ройтерз низ ба нақл аз як манбаи эронии наздик ба музокира айни хабарро пахш кард.

Ба гузориши хабаргузории Форс, даври аввали нишаст "пас аз 80 дақиқа ва барои гузарондани машваратҳои дохилӣ мутаваққиф шуд".

Як дипломат ба шабакаи хабарии CNN гуфт, ки гуфтугӯҳои рӯзи якшанбe бар ҷанг дар Лубнон, вазъияти тангаи Ҳурмуз ва захираи ураниуми Эрон тамаркуз дорад.

Ҳайати амрикоиро муовини президенти ин кишвар Ҷей Ди Ванс ва ҳайати эрониро раиси порлумони он кишвар Муҳаммад Боқир Қолибоф роҳбарӣ мекунанд.

Ванс пеш аз оғози музокирот гуфт, ин як нишасти таърихӣ аст ва Амрико омода аст, ки равобит бо Эронро ба шакли бунёдӣ дигар кунад.

Ба гузориши чанд расонаи Бритониё, нахуствазири ин кишвар Кир Стармер эҳтимол рӯзи душанбеи 22-юми июн истеъфои худро эълон мекунад.

Нашрияи Observer бо такя ба манобеи худ навишт, фишор болои Стармер аз ҷониби раҳбарияти Ҳизби коргар, аз ҷумла бархе аз аъзои кобинаи худи ӯ бештар шудааст.

Ҳамзамон теъдоди вакилоне, ки аз номзадии шаҳрдори Манчестер Энди Бёрнем барои раҳбарии Ҳизби коргар ва курсии нахуствазирӣ ҷонибдорӣ мекунанд, бештар шудааст.

То ҳол на худи Кир Стармер ва на дафтари сарвазир дар бораи эҳтимоли истеъфои ӯ чизе нагуфтаанд.

Дар айни замон ба навиштаи расонаҳо, Стармер рӯзи душанбе аз мақомаш фавран канор намеравад ва эҳтимол то таъйини сарвазири нав корашро давом медиҳад.

Ҳанӯз маълум нест, ки Энди Бёрнем барои роҳбарии Ҳизби коргар ва нахуствазирии Бритониё то куҷо дастгирии лозимро дорад.

Рӯзи 18-уми июн Бёрнем дар интихоботи миёндаврӣ барои курсии холишудаи порлумони Бритониё бо бартарии комил пирӯз шуд.

Бар асоси назарсанҷиҳо, маҳбубияти Энди Бёрнем аз сарвазири кунунӣ Кир Стармер бамаротиб бештар аст.

Ҳизби коргар ду сол пеш дар интихоботи порлумонии Бритониё пирӯз шуд. Аммо дар пасманзари мушкилоти иқтисодӣ ва афзоиши танишҳо вобаста ба муҳоҷирати ғайриқонунӣ, обрӯи ҳизб ба таври назаррас коҳиш ёфт.

Додгоҳи Эрон амр додааст, Парасту Аҳмадӣ, яке аз овозхонҳои ҷавони кишварро барои як консерташ, ки дар Ютуб нашр шуд, 74 зарби шаллоқ бизананд. Навори консерти ӯро, ки бе ҳиҷоби ҳатмӣ месарояд, дар муддати 2 соли ахир тақрибан 3 миллион бор тамошо кардаанд.

Парасту Аҳмадӣ дар як саҳнаи холие дар шаҳри Қум таронаи "Аз хуни ҷавонони ватан лола дамидаст"-ро сароид, ки дар Эрон бисёр маъруф аст. Ӯву ҳашт ромишгари дигарро барои "халалдор кардани ахлоқи ҷомеа" ҷазои яксон додан ва ду соли дигар аз ҳаққи "фаъолиятҳои ҳунарӣ" маҳрум карданд.

Дар Эрон пӯшидани ҳиҷоб барои занон ҳатмист. Онҳо аз соли 1979 аз замони Инқилоби исломӣ ҳақ надоранд, дар мазҳари ом бисароянд.

Парасту Аҳмадӣ замони эътирозҳои соли 2022 дар Эрон бо шиори "зан, зиндагӣ, озодӣ" шӯҳрат ёфт.

Ӯ соли 2024 дар як саҳнаи театрии холӣ дар шаҳри Қуми Эрон тарона хонд.

Видеои консерташро дар Ютуб тақрибан 3 миллион бор тамошо кардаанд.

Бонки Ҷаҳонӣ ва Иттиҳоди Аврупо барои таъмини сокинони се ноҳияи вилояти Хатлон бо оби ошомиданӣ, ба Тоҷикистон зиёда аз 20 милион доллар медиҳанд.

Намояндагии Бонки Ҷаҳонӣ 19-уми июн дар хабарномае навишт, 12,5 милион евро аз ҷониби Иттиҳоди Аврупо ва 5,9 миллион долари дигар аз сӯи Ассотсиатсияи байналмилалии рушди Бонки ҷаҳонӣ ҷудо шудааст.

Шарту шароити додани ин маблағ эълон нашудааст.

Манбаъ мегӯяд, "ҳадафи лоиҳа фароҳам овардани дастрасии шумораи бештари аҳолӣ" дар ноҳияҳои Вахш, Ҷалолиддини Балхӣ ва Восеъ ба оби ошомиданӣ аст. Таҳкими иқтидори муассисаҳои таъмини об ва беҳдоштӣ аз мақсадҳои дигари ин тарҳ гуфта мешавад.

Ба иттилои Бонки Ҷаҳонӣ, татбиқи лоиҳаи сармоягузорӣ дар соҳаи обтаъминкунӣ ва санитарияи Тоҷикистон соли 2022 оғоз шуда, ҳадафаш таъмини 280 ҳазор аҳолии деҳот бо оби ошомиданӣ эълон шудааст.

Бино бар омори расмӣ, ҳоло танҳо 41 дарсади аҳолӣ ва асосан сокинони шаҳрҳо ба шабакаи оби ошомиданӣ пайвастанд.

Дар ҳамлаҳои артиши Русия ба шаҳри Запорожеи Украина панҷ кас кушта шуда, даҳ нафари дигар захм бардоштаанд.

Гузориш шудааст, ки неруҳои Русия рӯзи шанбеи 20-уми июн ба болои шаҳри Запороже 9 бомби ҳавоӣ партоб карданд.

Ба гузориши мақомоти Украина, артиши Русия ҳамчунин ба вилоятҳои Сумск ва Днепропетровск зарба задааст.

Тибқи маълумоти аввалия, як нафар ҳам дар вилояти Сумск кушта шуда шуда, се каси дигар маҷруҳ гардиданд.

Президенти Украина Владимир Зеленский шоми 20-уми июн гуфт, аз мавҷи нави ҳамлаи Русия ҳушдор дод. "Русиягиҳо ба мавҷи нави ҳамлаҳои густурда омода мешаванд. Лутфан худро эҳтиёт кунед", - гуфт Зеленский дар муроҷиати телевизионӣ.

Дар пайи як таркиш дар минтақаи Бану дар аёлати Хайбар-Пахтунхоҳи Покистон дастикам ҳафт нафар ҷон бохтаанд.

Ба гузориши хабаргузории Олмон, мақомҳо гуфтаанд, ки ин афрод субҳи 20 июн дар натиҷаи як таркише кушта шуданд, ки мошиши шахсии ҳомили мусофиронро бо истифода аз як бамби дастсоз ҳадаф қарор дод.

Яке аз мақомҳои маҳаллии пулис гуфтааст, се нафари дигар низ ба шиддат захмӣ ҳастанд.

Ӯ афзуд, ки нерӯҳои амниятӣ минтақаро муҳосира кардаанд ва таҳқиқот дар бораи ин ҳодиса оғоз шудааст.

Шаҳбоз Шариф, нахуствазири Покистон ин ҳамларо маҳкум карда, бори дигар бар ӯҳдадории ҳукуматаш барои мубориза бо терроризм, таъкид кардааст.

То кунун ҳеч гурӯҳе масъулияти ин ҳамларо ба ӯҳда нагирифтааст.

Нахустин мурофиаи додгоҳии куштори Саломатшо Ғалчаев, сокини 34-солаи ноҳияи Ванҷ, рӯзи 19 июн дар Додгоҳи ҳарбии Хоруғ оғоз шуд.

Ба нақли шоҳидон, дар ин мурофиа айбдоршаванда Ивазмад Қодиров, афсари Вазорати корҳои дохилӣ ва наздикони Саломатшо Ғалчаев ҳузур доштанд.

Неъмат Ғалчаев, бародари Саломатшо Ғалчаев рӯзи 19 июн ба Радиои Озодӣ гуфт, яке аз шоҳидон, ки дар вақти муноқишаву куштор ҳамроҳи афсари милиса Ивазмад Қодиров дар ҷои ҳодиса будааст, ба мурофиа ҳозир нашуд ва бинобар ҳамин, муҳокима ба вақти дигар гузошта шуд.

"Ин мурофиа ошноӣ бо парванда буд ва шарҳ дода шуд, ки дар вақти рух додани муноқиша ҳамроҳи афсари милиса ду нафари дигар низ буданд ва яке аз онҳо дар ҳамон рӯзи ҳодиса билети ҳавопаймо дошта, ба Маскав парвоз кардаааст. Мақомоти додгоҳӣ барои ширкати ӯ даъватнома фиристода, рӯзи мурофиаро ба сешанбеи ҳафтаи дигар гузошт",-афзуд бародари Саломатшо Ғалчаев.

Дар ин парванда Ивазмад Қодиров, афсари Вазорати корҳои дохилии Тоҷикистон тибқи моддаи 104, қисми яки Кодекси ҷиноӣ ба иттиҳоми "одамкушӣ", муҳокима мешавад. Ин моддаи Кодекси ҷиноӣ барои айбдоршаванда аз 8 то 15 сол зиндон пешбинӣ мекунад.

Дар ҳоли ҳозир мавқеи фарди муттаҳам ва наздиконаш ба қазия маълум нест. Додгоҳи ҳарбии Хоруғ дар робита ба ин қазия ба зангҳои мо посух надод.

Дар ҳоли ҳозир Ивазмад Қодиров, афсари Вазорати корҳои дохилии Тоҷикистон дар Боздоштгоҳи шаҳри Хоруғ қарор дорад.

Ҳодиса шаби 17-уми март дар деҳаи Рохарви ноҳияи Ванҷ рӯй дод. Дар ҳоле ки мақомот тафсилот намедиҳанд, як манбаи боварбахши Радиои Озодӣ гуфт, моҷаро гуё бар сари робитаи афсари Вазорати корҳои дохилӣ бо як духтари мактабхон, ки хеши ҷавони кушташуда аст, сар задааст.

Неъматҷон Ашӯрматов моҳи марти соли ҷорӣ бо талаби дарёфти 280 ҳазор сомонӣ ҷуброни зарари маънавӣ ба додгоҳ шикоят бурда буд.

Ӯ ҳудуди дувуним сол пеш бо гумони қочоқи маводи мухаддир аз сӯи маъмурони пулис дар Хуҷанд боздошт ва ба гуфтааш, аз сӯи онҳо мавриди шиканҷа ва бадрафторӣ қарор гирифта буд.

Эътилофи зидди шиканҷа дар Тоҷикистон, ки аз ҳуқуқи Неъматҷон Ашӯрматов ҳимоят мекунад, рӯзи 19-уми июн хабар дод, ки Додгоҳи ноҳияи Исмоили Сомонӣ рӯзи 18-уми июн даъвои ӯро "қисман қонеъ кардааст".

Дар хабар гуфта нашудааст, ки додрас ВКД-ро ба пардохти чӣ миқдор ҷуброни зиён ба Неъматҷон Ашӯрматов вазифадор кардааст.

Вале вакилони дифои Неъматҷон Ашӯрматов мегӯянд, ки ният дорад бо дарёфти қарори додгоҳ онро баррасӣ карда, ба Додгоҳи шаҳри Душанбе шикояти кассатсионӣ баранд.

Вазорати корҳои дохилии Тоҷикистон то кунун дар ин бора ибрози назар накардааст. Додгоҳи ноҳияи Исмоили Сомонӣ ҳам мавзӯъро шарҳ надодааст.

Неъматҷон Ашӯрматов 22-юми феврали соли 2024 аз сӯи кормандони Шӯъбаи корҳои дохилӣ дар Хуҷанд ба гумони даст доштан дар муомилоти ғайриқонунии маводи мухаддир боздошт мешавад ва ба гуфтааш, ҳангоми дар бинои шӯъба қарор доштан, аз сӯи маъмурони пулис мавриди шиканҷа ва бадрафторӣ қарор мегирад.

Дар пайи ин ҳодиса, 29-уми апрели соли 2024 Додситонии вилояти Суғд алайҳи 4 корманди Шӯъбаи корҳои дохилии шаҳри Хуҷанд барои "сӯистифода аз ваколат" парвандаи ҷиноӣ боз кард. Ду корманд ба ҳабс гирифта шуда, ду нафари дигар дар пайгард қарор гирифтанд.

Баъдан бо дархости вакилони дифои Неъматҷон Ашӯрматов, амали кормандони милиса аз рӯи моддаи "шиканҷа" тафтиш шуд.

Ба иттилои вакилони дифои Неъматҷон Ашӯрматов, соли 2025 яке аз ин кормандони пулис Дилшод Нарзуллозода, бо чанд моддаи Кодекси ҷиноӣ ба 21 сол зиндон, 10 соли маҳрумият аз ишғоли мансабҳои муайян ва адои ҷазо дар колонияи ислоҳии низомаш шадид маҳкум шуд.

Корманди дигари пулис Абдуқодир Каримов ба 19 сол зиндон бо маҳрум сохтан аз ишғоли мансаб ба мӯҳлати 10 сол маҳкум шуд.

Истифода аз шиканҷа барои ҳосил кардани эътирофи "гуноҳ" дар Тоҷикистон яке аз мушкилоти ҷиддӣ дар мақомоти интизомӣ дониста мешавад.

Кумитаи маҳви шиканҷаи Созмони Милал аввали моҳи майи имсол аз "гузоришҳои пайваста дар бораи бадрафторӣ ва шиканҷа, бахусус аз тарафи афсарони милиса ва афсарони идораҳои амниятӣ дар боздоштгоҳ ва зимни бозпурсиҳо" изҳори нигаронӣ кард.

Кумитаи Созмони Милал барои маҳви шиканҷа гуфт, ҳарчанд дар қонунҳои Тоҷикистон барои бадрафториву шиканҷа ҷазои сахт таъйин шудааст, иҷрои он камтар ба назар мерасад ва теъдоди онҳое, ки барои шиканҷаи зиндонӣ ё боздоштшудае ҷазо гирифтаанд, бисёр кам аст.

Ба гуфтаи Вазорати адлияи Тоҷикистон, аз соли 2018 то соли 2025 танҳо 13 нафар барои шиканҷа ҷазо гирифтаанд, агарчӣ шикоятҳои расмӣ аз рафтори тарафи маъмурони амниятиву интизомӣ аз 100 адад ҳам зиёдтар будааст.

Нашри изҳороти Доналд Трамп, раисҷумҳури Амрико дар бораи Ҷорҷиа Мелони, нахуствазири Италия дар рузи 19 июн, боиси таниш дар робита миёни ин ду муттаҳид шуд ва Антонио Таяни, вазири корҳои хориҷии Италия сафари барномарезишудааш ба Вашингтонро бекор кард.

Бар асоси гуфтугӯе, ки шабакаи италиявии «La7» аз Доналд Трамп нашр кард, президенти Амрико гуфтааст, ки Ҷорҷиа Мелони дар нишасти ахири раҳбарони Гурӯҳи 7 дар Фаронса ба Трамп "илтимос кардааст", ки бо ӯ акс бигирад. Трамп гуфтааст, фақат ба ин далел, ки "дилаш барояш мезӯзад", бо ин дархост мувофиқат кардааст.

Раисҷумҳури Амрико ҳамчунин гуфтааст, ки Ҷорҷиа Мелони "эҳтимолан хушҳол будааст, ки бо ӯ сӯҳбат кардаам, маҷбур набудам бо ӯ сӯҳбат кунам".

Нашри ин изҳорот бо вокунишҳои густурдае дар Италия рӯбарӯ шуд ва Ҷорҷиа Мелони бо нашри видеое дар шабакаҳои иҷтимоӣ, сӯҳбатҳои Трампро сохтагӣ хонд ва гуфт, на ӯ ва на Италия "ҳаргиз илтимос намекунем".

Ӯ боз изҳори ҳайрат аз суҳбатҳои Доналд Трамп дар шабакаҳои иҷтимоии Х гуфт, "намедонам чаро раисҷумҳури Амрико бо муттаҳидони худаш ингуна рафтор мекунад".

Хонум Мелони афзуд, "фақат метавонам бигӯям, ҳайф аст, ки ӯ бо душманони Ғарб, душманони ИМА ва раҳбароне, ки дар иваз бо онҳо бисёр созишпазиртар аст, ҳамин қотеиятро нишон намедиҳад".

Дар вокуниши дигар, Антонио Таяни, вазири корҳои хориҷии Италия, суханони Трампро "сахт ва тавҳиномез" хонд ва илова кард, ки сафари барномарезишудааш ба Амрикоро лағв мекунад. Ин сафар қарор буд, рӯзҳои 21 ва 22 июн баргузор шавад.

Пештар Ҷорҷиа Мелони дар поёни нишасти Гурӯҳи 7 дар Фаронса аз "фазои бисёр мусбат" ва "бе бархӯрд" байни Трамп ва дигар раҳбарони ҳозир дар ин ҷаласа сӯҳбат карда буд. Ӯ чандин бор дар ин ҷаласа ҳам бо раисҷумҳури Амрико дида шуд.

Ҷорҷиа Мелони то пеш аз ҷанги ахири Амрико ва Исроил бо Эрон бо доштани робитаҳои гарм бо Доналд Трамп машҳур буд, аммо ин робитаҳо пас аз онки, Мелони аз изҳороти Попи Рум алайҳи ҷанг ҳимоят кард, ба сардӣ гароид.