Бино ба хабари бахши қирғизии Радиои Озодӣ, мақомоти Тоҷикистон рӯзи 3-юми декабр дар мулоқот бо намояндагони Қирғизистон пешниҳод кардаанд, ки шумораи ҳарбиён дар сарҳади ду кишвар кам карда шавад.

Ҷониби Тоҷикистон ба таври расмӣ дар ин бора хабар надодааст.

Ба қавли муовини ваколатдори президенти Қирғизистон дар вилояти Бодканд, Маъруфхон Туллаев, ҷониби Тоҷикистон пешниҳод кардааст, тартибот дар минтақаҳои наздимарзӣ “тавассути нерӯҳои пулис таъмин карда шавад”.

“Ҳамчунин пешниҳод шуд, ки корҳои сохтмонӣ дар наздикии сарҳад танҳо бо розигии тарафҳо анҷом дода шавад,” – афзудааст ӯ.

Мулоқоти Раҷаббой Аҳмадзода, раиси вилояти Суғд ва Абдикарим Алимбоев, раиси вилояти Бодканд, рӯзи 3-юми декабр дар чорроҳаи Зарафшон, дар наздикии деҳаи Сомониён, макони баҳсӣ баргузор шудааст.

Рӯзи якуми декабр сокинони деҳаи Сомониёни ҷамоати Чоркӯҳи Исфара дар бораи рабуда ва латукӯб шудани як омӯзгори 59-сола дар марз бо Қирғизистон хабар доданд. Раиси деҳаи Куктоши ноҳияи Бодканди Қирғизистон баръакс иддао кард, ки шаҳрвандони Тоҷикистон як сокини ин деҳаро ҳангоми ҷустуҷӯи чорво задаанд.

ИНЧУНИН, БИХОНЕД:

Муаллим гуфт, "ба сару рӯ ва дасту поям заданд". Ду даъво дар бораи як ҳодиса дар марзи Тоҷикистону Қирғизистон. ВИДЕО

Хадамоти марзбонии Қирғизистон шаби 1-уми декабр аз тирпарронӣ дар сарҳад хабар дод. Мақомоти Тоҷикистон ҳанӯз дар мавриди ҳарду ҳодиса ва ҷузъиёти музокирот шарҳе надодаанд.

Марзи Тоҷикистону Қирғизистон солҳо боз ба далели номуайян будани бахше аз сарҳад доғ ва мояи ҷанҷолу задухӯрдҳост. Низои мусаллаҳонаи моҳи апрели имсол, ки аз ду ҷониб даҳҳо кушта ва захмӣ бар ҷой гузошт, робитаи ду кишвари болооби Осиёи Марказиро сарду печида кард. Ҳарду тараф ҳамвора якдигарро ба сар задани муноқиша ва кӯшиши ноором кардани вазъ гунаҳкор мекунанд.

Беш аз чиҳил шаҳрванди Тоҷикистонро рӯзи 19-уми март ба Русия роҳ надода, дар Фурудгоҳи “Жуковский”-и шаҳри Маскав нигоҳ доштаанд.

Яке аз муҳоҷирон бо шарти фош нашудани номаш ва фиристодани чанд аксу видео ба Радиои Озодӣ гуфт, онҳо аз шаҳри Душанбе омаданд, вале бидуни сабаб дар як ҳуҷраи хурди фурудгоҳ маҳкам карда шуданд.

Дар наворҳо низ дида мешавад, ки баъзе аз муҳоҷирон дар катҳои оҳанӣ хобида, баъзеи дигар рост истодаанд ё дар замину курсиҳо нишастаанд. "Мо дар ин ҷо қадр надорем. Ҳар соат 5-6 нафар ба сафи мо мепайвандад," – навишт яке аз муҳоҷирони тоҷик дар паёми хатӣ ба Радиои Озодӣ.

Ӯ афзудааст, марзбонҳои Русия танҳо шаҳрвандони Тоҷикистонро зери заррабин қарор додаанд, вале муроҷиати телефонии онҳо ба сафорати кишвар дар Маскав натиҷаи мусбат надодааст. "Моро ба мисли ҳайвон маҳкам карданд. Идии мо ҳамин аст магар?" – навиштааст яке аз муҳоҷирон.

Шарҳи ҷониби Русия дастрас нест. Рӯшан нест, ин гурӯҳи муҳоҷирон баъд аз тафтиш ба Русия роҳ дода мешаванд ё бо қарори додгоҳ ба Тоҷикистон пас баргардонда хоҳанд шуд.

ИНЧУНИН, БИХОНЕД:

Ихроҷи даҳҳо муҳоҷири тоҷик аз Русия дар як рӯз

Мақомоти Русия дар бештар аз ду соли охир борҳо монеи вуруди шаҳрвандони Тоҷикистон ба хоки ин кишвар шуда, гурӯҳеро бо қарори додгоҳ аз ин кишвар берун кардаанд.

Ба иттилои расмӣ, мақомоти Русия дар соли 2025 беш аз 54 ҳазор хориҷиро, ки дар миёнашон шаҳрвандони Тоҷикистон низ ҳастанд, аз ин кишвар ихроҷ кардаанд.

Раисҷумҳури Иёлоти Муттаҳида гуфт, қасд надорад, ки ба Эрон нерӯи низомӣ фиристад.

Доналд Трамп ин суханонро рӯзи 19-уми март ҳангоми дидор бо сарвазири Ҷопон ва дар гуфтугӯ бо хабарнигорон баён дошт.

Трамп дар посух ба суоле дар бораи эҳтимоли эъзоми нерӯҳои Амрико ба дохили Эрон гуфт: “Не, ман нерӯҳои низомиро ба ҷое намефиристам. Агар ҳам мехостам ин корро кунам, ба шумо намегуфтам.”

Чанд соат пеш аз ин изҳорот, хабаргузории “Рейтерс” навишта буд, ки маъмурияти Доналд Трамп дар ҳоли баррасии эъзоми ҳазорон нерӯи низомӣ ба Ховари Миёна ва густариши доманаи амалиёт ба зидди Эрон аст.

Раисҷумҳури Иёлоти Муттаҳида ҳамчунон гуфт, ба сарвазири Исроил гуфтааст, ба таъсисоти энержии Эрон ҳамла накунад ва афзуд, Бенямин Нетаняҳу низ розӣ шудааст.

Иди Фитр ё Рамазон дар Тоҷикистон, ки тибқи омор беш аз навад дарсади аҳолияш мусалмон ҳастанд, рӯзи 20-уми март таҷлил шуд.

Як рӯз пеш аз он раисҷумҳур Эмомалӣ Раҳмон дар паёме аз вазъи ба гуфтааш “бисёр нобасомону ҳассоси ҷаҳони муосир” ёд овард, ки “боиси боз ҳам шиддат гирифтани норасоии маводи ғизоӣ ва болоравии минбаъдаи нархҳо мегардад”.

“Бинобар ин, кишоварзонро зарур аст, ки рӯзҳои мусоиди баҳориро самаранок истифода карда, барои ба даст овардани ҳосили фаровон кӯшиш намоянд,” – гуфтааст ӯ.

Аз соли 1991 ба ин тараф ҷашнҳои мазҳабие чун Иди Фитр ва Иди Қурбон дар Тоҷикистон расман таҷлил мешавад ва бар асоси тақвим рӯзи таътил аст.

Арабистони Саудӣ, Имороти Муттаҳидаи Араб, Баҳрайн, Қатар, Кувайт, Яману Лубнон ва Ироқ низ рӯзи 20-уми март Иди Фитрро ҷашн гирифтанд.

Аммо дар Афғонистон бар асоси эъломи ҳукумати “Толибон” Иди Рамазон рӯзи 19-уми март таҷлил шуд.

Раиси пешини Кумитаи давлатии амнияти миллии Қирғизистон пас аз намози Иди Фитр аз мардум узр пурсид. Қамчибек Тошиев ҳамзамон изҳор дошт, ки нисбат ба ӯ “овоза” ва “дурӯғ” паҳн гаштааст.

“Аз ҳар мусалмоне, ки ӯро ранҷондам ё муносибати нодуруст кардам, узр мехоҳам. Ва ҳар касеро, ки овозаву дурӯғ паҳн кард, бахшидам. Бигзор онҳо дигар сухани бад нагӯянд, маълумоти бад паҳн накунанд,” – гуфт ӯ, вале аз ягон кас ном нагирифт.

Тошиев рӯзи 19-уми март аз хориҷа ба Қирғизистон баргашт.

Ба навиштаи бахши қирғизии Радиои Озодӣ, ӯро дар робита ба моҷарои фасод дар “Қирғизнефтегаз” ва “муроҷиати 75 нафар” бозпурсӣ кардаанд.

Пештар мақомоти Қирғизистон аз таҳқиқи фасод дар “Қирғизнефтегаз” хабар дода буданд, ки дар натиҷаи он, тибқи фарзияи расмӣ, ба давлат беш аз 34 миллион доллар зиён расидааст.

Қамчибек Тошиев моҳи феврали имсол, дар ҳоле ки дар Олмон қарор дошт, бо фармони раисҷумҳури Қирғизистон Содир Ҷабборов аз мансаб ронда шуд. Худаш фармони барканориро ногаҳонӣ номид.

Пас аз он чанде аз ҳамсафонаш аз вазифаҳо барканор ва баъзе шахсони наздик ба ӯ боздошт шуданд.

Исроил шаби 18-уми март ҳамлаҳояшро болои Эрон афзоиш дода, гуфт, ба қисмати шимолии ин кишвар зарбаҳои мушакӣ зад. Расонаҳои Исроил хабар доданд, ки киштиҳои эронӣ дар соҳилҳои Баҳри Хазар мавриди ҳадаф қарор гирифтанд. Феълан тасдиқи дурустии ин гузоришҳо имкон надорад ва таъсири ҳамлаҳо ҳамчунон маълум нест.

Дар ҳамин ҳол, бисёриҳо дар дохили Эрон аз идомаи ҷанги Исроилу Амрико алайҳи Ҷумҳурии Исломӣ эҳсоси ноумедиву тарс доранд. Як сокини Теҳрон гуфт, бисёр чиз дар ин шаҳр дигар шудааст.

Embed ба дигарон фиристед

Афзоиши ҳамлаҳо. Як сокини Теҳрон: "Ҳама чиз ба ҳам рехт"

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:03:54 0:00

Дар поёни ҳафтаи сеюми ҷанг ҳамлаҳои Эрон алайҳи ҳадафҳои Амрико дар кишварҳои арабии Халиҷи Форс ҳам бештар мешаванд. Эрон баъди он ки гуфт, майдони гази минтақаи Порси Ҷанубӣ рӯзи 18-уми март мавриди ҳамлаҳои шадид қарор гирифт, таҳдид намуд, ки муассисаҳои энержиро дар саросари минтақа ҳадаф қарор медиҳад.

Матбуоти исроилӣ гузориш дод, ки ҳамла аз ҷониби Исроил ва бо ризоияти Амрико сурат гирифтааст, вале президент Доналд Трамп каме дертар дар шабакаи Truth Social навишт, ӯ дар бораи ин ҳамла аз пеш хабар надошт.

Эрон дар посух ба чанд муассисаи нафтӣ дар саросари Арабистони Саудӣ, Имороти Муттаҳидаи Араб ва Қатар ҳушдори изтирорӣ фиристода гуфт, “соатҳои наздик ин муассисаҳо мавриди ҳамла қарор мегиранд”.

Пас аз муддати кӯтоҳе Қатар гузориш дод, ки дар натиҷаи ҳамлаи мушакии эҳтимолан Эрон дар як майдони газ сӯхтор сар зад ва ходимони ёрии изтирорӣ дар ҷойи ҳодиса кор мекунанд. Ширкати QatarEnergy аз “хисороти азиме” гузориш дод.

Арабистони Саудӣ гуфт, ки чор мушаки баллистикиеро нобуд кард, ки ба самти Риёз ҳаракат мекард ва аз як талоши ҳамлаи мушакӣ болои муассисаҳои газӣ дар шарқи ин кишвар хабар дод. Вазири корҳои хориҷии Арабистони Саудӣ гуфт, “агар Эрон билофосила бас накунад, чун ман ҳам шунидам, ки ҳамингуна рӯҳияе вуҷуд дорад – дигар чизе барои барқарор кардани эътимод намемонад.”

Дар майдони гази Ҳабшани Имороти Муттаҳидаи Араб баъд аз он ки аз асобати ду мушак пешгирӣ шуд, фаъолиятҳои ин муассиса боздошта шудааст. Матбуоти Абузабӣ рӯзи 19-уми март хабар дод, ки баъди ба кони гази Боб афтодани пораҳое аз мушак корхонаи истихроҷи газ баста шуд.

Дар ҳамин ҳол, дар пешорӯи нигарониҳо аз бӯҳрон дар соҳаи истихроҷи нафт нархи он боз ҳам афзоиш меёбад. Нархи навъи “Брент” беш аз 5 дарсад афзуда, барои ҳар бушка 112 доллару 84 сент нархгузорӣ шудааст.

Тоҷикистон аз 25 то 28-уми майи имсол мизбони як нишасти байнулмилалӣ дар мавриди об хоҳад буд. Саноӣ Бойзода, муовини вазири корҳои хориҷии Тоҷикистон, рӯзи 18-уми март дар як нишасти хабарӣ дар Душанбе ҳадафи онро баён дошт.

“Бо вуҷуди пешрафти назаррас миллиардҳо нафар ба оби ошомидании бехатар дастрасӣ надоранд. Тағйирёбии иқлим, афзоиши аҳолӣ ва хатари афзояндаи офатҳои табиӣ ба захираҳои об фишори бесобиқа меоранд,” – гуфт ӯ.

Тоҷикистон нишастро дар ҳамкорӣ бо Созмони Милал баргузор мекунад. Рустам Абдуллоев, намояндаи Вазорати энергетика ва захоири оби Тоҷикистон, мегӯяд, “конфронс ба ҳама шарикон имкони вижа медиҳад, ки саҳми худро дар ҳалли масоили калидии об дар сатҳи ҷаҳонӣ пешниҳод кунанд.”

Ба иттилои Вазорати корҳои хориҷии Тоҷикистон дар конфронс беш аз 2500 намоянда аз 31 кишвар ва 33 ниҳоди байнулмилалӣ ширкат мекунанд.

Тоҷикистон аз соли 2003 ба ин сӯ дар ҳамоҳангӣ бо Созмони Милал ташаббусҳои гуногуни ҷаҳониро дар соҳаи обу иқлим дар миён мегузорад, ки ҳадафи онҳоро ҷалбаи таваҷҷуҳи ҷомеаи ҷаҳонӣ ба мушкилоти об дар сайёра маънидод мекунад.

ИНЧУНИН, БИХОНЕД:

Нақшаи нави Тоҷикистон дар мавриди об. Кӣ 324 миллион доллар медиҳад?

Тоҷикистон, ки 60 дарсади оби кишварҳои Осиёи Марказӣ ва хонаи 80 миллион нафар аз он сарчашма мегирад, сол ба сол гарму хушку тафсон мешавад. Ҳазорон пиряхи кишвар бухору нопадид шудааст ва мақомот як сабаби аслии камбуди нерӯи барқро дар соли 2025 кам шудани маҷрои об ба обанбори нерӯгоҳи “Норак” хондаанд.

Аломати дигари тағйири иқлим, ки имсол дар Тоҷикистон ҳувайдо шуд, рӯзи 25-уми октябри соли гузашта як пораи азими якунимкилометрии пиряхи Деҳдал дар қаторкӯҳҳои Исмоили Сомонӣ поён лағзид. Идораи ҳавошиносӣ гуфт, сабаби аслии канда шудани пирях "ҳарорати ҳаво ва дер боз наборидани барфу борон” будааст.

Доналд Трамп, раисҷумҳури Амрико, эълом кард, ки ҳамла ба майдони гази Порси Ҷанубии Эрон тавассути Исроил анҷом шуд ва Иёлоти Муттаҳида ва Қатар ҳеч нақше дар он надоштаанд.

Трамп дар шабакаи иҷтимоиаш навишт, Вашингтон аз ин ҳамла иттилоъ надошт ва Қатар низ комилан бехабар буд.

Раисҷумҳури Амрико ҳушдор дод, ки дар сурати ҳамлаи дубораи Ҷумҳурии Исломӣ ба Қатар, Амрико майдони гази Порси Ҷанубиро “ба таври густарда” ҳадаф қарор хоҳад дод.

Ба гуфтаи ӯ, Исроил низ дигар ба ин таъсисот ҳамла нахоҳад кард, магар инки Эрон иқдоми тозае анҷом диҳад.

Бештар бихонед: Дар Эрон чӣ мегузарад?

Рӯзи 18-уми март маълум шуд, ки нерӯҳои Исроил ба иншооти муҳими истихроҷи гази Порси Ҷанубӣ ҳамла кардааст. Эрон дар посух ба зерсохтҳои энержии Қатар ва Арабистон зарба зад.

Ширкати давлатии Қатар рӯзи 18-уми март эълом кард, ки ҳамлаи Эрон ба таъсисоти газ дар шаҳри саноатии Рас Лаффан “хисороти густурдае” дар пай дошт.

Вазорати дифои Қатар эълон кард, ки Эрон ба сӯи ин кишвар панҷ мушаки баллистикӣ партоб кард, ки чор адад роҳ раҳгирӣ ва нобуд шудааст.

Рас-Лафан бузургтарин маркази тавлиди гази моеъ дар ҷаҳон аст, ки 20 дарсади талаботи ҷаҳонро бо ин навъ сӯзишворӣ таъмин мекунад.

ИНЧУНИН, БИХОНЕД:

Зарбаҳои интиқомҷӯёнаи Эрон ва идомаи ҳамлаҳои Исроилу Амрико

Покистон ва ҳукумати "Толибон" дар Афғонистон гуфтанд, ки бо дархости Арабистони Саудӣ, Қатар ва Туркия ба муносибати Иди Фитр муваққатан оташбас карданд.

Атоуллоҳ Тарар, вазири иттилооти Покистон, рӯзи 18-уми март гуфт, ин оташбас аз панҷшанбе то нимашаби душанбе иҷро хоҳад шуд. Ӯ дар шабакаи "Х" навишт, "Покистон ин иқдомро ҳамчун ҳусни ният ва дар ростои риояи арзишҳои исломӣ анҷом медиҳад".

Аммо Атоуллоҳ Тарар ҳушдор дод, ки "дар сурати ҳар гуна ҳамлаи фаромарзӣ, ҳамлаи паҳподӣ ё ҳар ҳодисаи террористӣ дар дохили Покистон, амалиёт фавран оғоз хоҳад шуд".

Андаке пас аз ин эълони Покистон, Забеҳуллоҳ Муҷоҳид, сухангӯйи ҳукумати "Толибон" низ аз қатъи муваққати даргирӣ миёни ду тараф хабар дод. Аммо сухангӯи "Толибон" ба замони поёни ин оташбас ишора накард.

Вай дар баёнияе гуфт, онҳо ба муносибати Иди Фитр ва низ ба дархост ва миёнравии кишварҳои исломӣ, аз ҷумла Арабистони Саудӣ, Туркия ва Қатар, амалиёти дифоии "Радди зулм"-ро ба таври муваққат бас мекунанд.

Дар идома омадааст, ки ҳукумати "Толибон" ҳифзи амнияти миллӣ, ҳокимият ва ҷони шаҳрванди Афғонистонро вазифаи худ медонад ва дар сурати таҳдид ба ҳар гуна ҳамла посух хоҳад дод.

Оташбаси муваққат миёни ду тараф дар ҳоле эълон мешавад, ки рӯзҳои охир даргирӣ миёни ду тараф боло гирифт ва ба гуфтаи масъулони ҳукумати "Толибон", дар як ҳамлаи ҳавоии Покистон ба як бемористони нигаҳдории муътодони маводи мухаддир дар Кобул садҳо нафар кушта шуданд. Покистон иддао дорад, ки ба як корхонаи паҳподсозӣ ва анборҳои аслиҳа ҳамла кард.

ИНЧУНИН, БИХОНЕД:

Толибон: Дар ҳамлаҳои Покистон ба Кобул садҳо нафар кушта шуданд

Тоҷикистон дар соли 2025-ум 187 миллион доллар қарзи хориҷияшро кам кардааст.

Вазорати молия дар гузорише навишт, то 1-уми январи соли 2026 қарзи хориҷии Тоҷикистон 3 миллиард долларро ташкил медиҳад, ки ба 17,1 дарсади Маҷмӯи Маҳсулоти Дохилӣ баробар аст.

Соли гузашта Тоҷикистон асосан қарзашро дар назди "Эксимбонк"-и Чин ва аз ҳисоби евробондҳо кам кардааст.

Аз ҷумла, қарзи Душанбе аз "Эксимбонк"-и Чин аз 820 миллион доллар ба 737 миллион доллар кам шудааст. Ин бонки чинӣ бузургтарин қарздиҳандаи Тоҷикистон мебошад. Қарзҳои зиёди Чин қаблан нигарониҳоеро ба миён оварда буд.

Бар асоси гузориши Вазорати молия, Тоҷикистон аз 500 миллион доллар пули евробондҳо, ки барои сохтмони нерӯгоҳи "Роғун" ҷалб шуда буданд, 170 миллион доллари онро баргардондааст. Боқимонда 333 миллион доллари дигар бояд имсол бозпас дода шаванд.

Вале қарзи Тоҷикистон дар назди созмонҳои молие чун Бонки ҷаҳонӣ, Бонки осиёии рушд ва Бонки исломии рушд каме зиёд шудааст. Аз ҷумла, қарзи кишвар дар назди Бонки ҷаҳонӣ аз 364 ба 379 миллион доллар расид.

Тоҷикистон имсол ният дорад, ки аз кишварҳо ва созмонҳои хориҷӣ 6,3 миллиард сомонӣ ё қариб 680 миллион доллар қарз гирад. На ҳама созмонҳои молии ҷаҳонӣ ҳозиранд ба Тоҷикистон қарз диҳанд.

Аз ҷумла, чанде пеш Бонки осиёии рушд Тоҷикистонро ба рӯйхати кишварҳое шомил кард, ки танҳо ба гирифтани грант ҳақ доранд. Ҳамчунин Тоҷикистон солҳост, ки наметавонад аз Сандуқи байнулмилалии пул қарзи имтиёзнок гирад.

Вазири дифои Исроил гуфт, Исмоил Хатиб – вазири иттилоот ё разведкаи Ҷумҳурии Исломӣ дар ҳамлаҳои шаби 17 ба 18-уми март ба Эрон кушта шудааст.

Мақомот ва расонаҳои Эрон ҳанӯз ба ин хабар вокуниш нишон надодаанд.

Исроил Катс, вазири дифои Исроил, рӯзи 18-уми март бо эълони хабар гуфт, шиддати ҳамлаҳои артиши ин кишвар дар Эрон дар ҳоли афзоиш ва “ғофилгириҳои муҳиме дар ҳамаи ҷабҳаҳо” дар роҳ аст.

Ба гуфтаи Катс, ӯ ва сарвазири Исроил Бенямин Нетаняҳу ба артиши ин кишвар иҷоза додаанд, ки ҳар мансабдори баландпояи эрониро бе тасдиқи иловагӣ ҳадаф қарор диҳанд.

“Исмоил Хатиб чи дар робита ба боздошт ва чи куштани норозиён дар эътирозҳои охир дар Эрон нақши муҳим иҷро кардааст,” – навишт артиши Исроил дар эъломияе дар Телеграм.

Агар хабари кушта шудани Исмоил Хатиб тасдиқ шавад, ӯ дувумин вазири Ҷумҳурии Исломӣ аст, ки ба феҳрасти беш аз 40 мансабдор ва фармондеҳи кушташудаи Эрон дар тақрибан се ҳафтаи охир изофа мегардад.

Азиз Насирзода, вазири дифои Эрон, 28-уми феврал дар рӯзи нахустини ҳамлаҳои Амрико ва Исроил кушта шуда буд.

Тоҷикистон барои кумак ба мардуми осебдида дар Эрон дар 110 мошин ёрии башардӯстона фиристодааст.

Мақомот гуфтанд, ин ёрӣ аз 3610 тонна бор, аз ҷумла дору, маводи беҳдоштӣ, либоси кӯдакон, хӯрокворӣ, рахти хоб, хайма ва масолеҳи сохтмонӣ иборат аст.

Дафтари матбуоти президенти Тоҷикистон навишт, ки корвони мошинҳо рӯзи 18-уми март ба роҳ баромад ва "ба зудӣ дастраси мардуми ниёзманд мешавад".

Узбекистон, Туркманистон ва Озарбойҷон ҳам хабар доданд, ки барои мардуми зиёндида аз низоъ дар Эрон кумак фиристоданд.

Ҳамлаҳои ҳавоии Амрико ва Исроил дар тақрибан се ҳафтаи охир миллионҳо нафарро дар дохили Эрон овора карда, нигарониҳоро дар кишварҳои ҳамсоя дар бораи эҳтимоли сарозер шудани паноҳҷӯён ба вуҷуд овардааст.

Комиссариати олии паноҳандагони Созмони Милали Муттаҳид (UNHCR) эълон кард, ки барои ниёзҳои эҳтимолии башардӯстона дар минтақа омода мешавад. Арзёбии ин ниҳод нишон медиҳад, ки қариб се миллиону 200 ҳазор нафар дар дохили Эрон ба таври муваққатӣ овора шудаанд. Бештари онҳо аз Теҳрон гурехтаанд.

Исроил ва Иёлоти Муттаҳида рӯзи 28-уми феврал ба Эрон ҳамла карданд ва ин ҷанг то кунун идома дорад. Дар ҳамлаҳои Исроил ва Амрико шуморе аз раҳбарони олирутбаи Эрон ва фармондеҳони низомии ин кишвар кушта шуданд.

Эрон дар посух ба шаҳрҳои гуногуни Исроил ва кишварҳои арабии ҳавзаи Халиҷи Форс, ки мизбони пойгоҳҳои низомии Амрико мебошанд, ҳамла кард.

Ваҳдат Ҳаннонов, футболбози шинохта, тими миллии Тоҷикистонро тарк кардааст.

Ҳаннонов 17-уми март дар саҳифаи "Инстаграм"-аш бидуни овардани сабабҳои тарки тими миллӣ навишт, барояш ифтихор буд, ки Тоҷикистонро муаррифӣ кардааст.

Ин футболбоз навиштааст, рафтан аз тими миллӣ барояш тасмими сахт буд, аммо дар ин марҳилаи зиндагӣ онро қарори дуруст меҳисобад. "Вақти ба пеш ҳаракат кардан омадааст, бо ҳадаф ва имкониятҳои нав",-навиштааст Ваҳдат Ҳаннонов.

Федератсияи футболи Тоҷикистон ҳанӯз дар бораи аз тими миллӣ рафтани Ҳаннонов чизе нагуфтааст.

Федератсия 17-уми март ҳайати тими миллӣ барои бозӣ бо мунтахаби Филиппинро нашр кард ва дар он номи Ҳаннонов набуд.

Дар гузориши Федератсияи футбол омадааст, Ваҳдат Ҳаннонов, ҳимоятгари бошгоҳи "Сипоҳон"-и Эрон бинобар муддати тӯлонӣ надоштани таҷрибаи бозӣ, ба мунтахаби миллии Тоҷикистон даъват нашуд.

Ваҳдат Ҳаннонов 25 сол дошта, аз футболбозони маъруфи тими миллӣ буд. Ӯ солҳои ахир дар тимҳои "Персиполис" ва "Сипоҳон"-и Эрон бозӣ мекард.

Мудири маркази зиддитерористии Оҷонсии амнияти миллии Амрико дар мухолифат бо ҷанги зидди Эрон аз мақомаш истеъфо дод.

Ҷо Кент бо интишори баёния дар шабакаи X навишт, наметавон "бо виҷдони роҳат аз ҷанги феълӣ бо Эрон ҳимоят кунад".

Кент ҳамчунин навиштааст, "Эрон ҳеч таҳдиди фаврӣ барои Амрико набуд ва рӯшан аст, ки мо ин ҷангро таҳти фишори Исроил ва тарафдорони қудратмандаш дар Амрико шуруъ кардем".

Хабаргузории "Рейтерз" мегӯяд, Кохи Сафед ба дархости фаврӣ барои вокуниш ба ин истеъфо посух надод. Ҷо Кент бо вуҷуди истеъфо изҳори умедворӣ кардааст, ки Доналд Трамп роҳи худро тағйир медиҳад ва "масири наверо барои Иёлоти Муттаҳида дар пеш мегирад".

Ҷо Кент як собиқадори ҷанг аст, ки 20 сол дар сафи неруҳои вижа хидмат кардааст. Кент баландтарин мақомдори ҳукумати Трамп аст, ки дар эътироз бо ҷанг зидди Эрон аз мақомаш истеъфо медиҳад.

Исроил ва Иёлоти Муттаҳидаи Амрико рӯзи 28-уми феврал ба Эрон ҳамла карданд ва ин ҷанг то кунун идома дорад.

Президент Доналд Трамп гуфт, ҳадаф аз ин ҳамлаҳо аз байн бурдани имкониятҳои низомии Эрон ва пешгирӣ аз дастёбии Эрон ба силоҳи ҳастаӣ аст. Эрон мегӯяд, ки ҳадафи барномаи ҳастаияш сулҳомез аст.

Мақомоти Эрон тасдиқ карданд, ки Алии Лориҷонӣ, дабири Шӯрои амнияти миллии ин кишвар ва Ғуломризо Сулаймонӣ, фармондеҳи нерӯи Басиҷ дар ҳамлаи Исроил кушта шудаанд.

Дар бораи кушта шудани ин ду фармондеҳи баландпояи эронӣ нахуст Исроил Катс, вазири дифои Исроил 17-уми март хабар дода буд. Шӯрои амнияти миллии Эрон қариб 12 соат баъд кушта шудани Алии Лориҷониро тасдиқ кард.

Бар асоси баёнияи расмии Эрон, писар, муовин ва чанд муҳофизи Алии Лориҷонӣ низ ҳамроҳи ӯ кушта шудаанд.

Алии Лориҷонӣ 68 сол дошт ва аз чеҳраҳои наздик ба Оятуллоҳ Алии Хоманаӣ, роҳбари пешини Эрон гуфта мешуд.

Лориҷонӣ солҳои тӯлонӣ дар мақомҳои баланд, аз ҷумла, раиси порлумон ва мушовири роҳбари Ҷумҳури исломӣ кор карда буд.

Баъди кушта шудани Оятуллоҳ Алии Хоманаӣ дар рӯзи 28-уми феврал, Алии Лориҷонӣ аз муҳраҳои асосии қудрат дар Эрон гуфта мешуд.

Вазири дифои Исроил рӯзи 17-уми март иддао кард, ки раҳбари Шӯрои амнияти миллии Эрон Алии Лориҷонӣ дар натиҷаи як ҳамлаи ҳавоӣ дар Теҳрон кушта шудааст. Исроил Катс барои тасдиқи ин иддао ягон далел наовард.

Мақомоти эронӣ зоҳиран кӯшиш кардаанд, ин изҳоротро рад кунанд. Онҳо дастнависеро, ки гуфта мешавад Алии Лориҷонӣ рӯзи 17-уми март навиштааст, нашр карданд. Акси ин дастнавис дар саҳифаи Лориҷонӣ дар шабакаи "X" ҳам гузошта шудааст.

Бенямин Нетаняҳу, сарвазири Исроил, рӯзи сешанбе кушта шудани Алии Лориҷонӣ, дабири Шӯрои амнияти миллии Эронро "бахше аз талошҳо барои фурсат додан ба эрониён ҷиҳати канор задани раҳбаронашон" номид.

Ӯ дар баёнияи телевизионӣ гуфт, “субҳи имрӯз Алии Лориҷониро ҳазф кардем, раиси Сипоҳи посдоронро, ки дар амал Эронро идора мекунад.”

“Сарнагунии ҳукумати рӯҳониён якбора рух нахоҳад дод ва осон нахоҳад буд. Аммо агар мо ба ин роҳ идома диҳем, ба эрониён фурсат хоҳем дод, ки сарнавишти худро ба даст гиранд,” – афзуд Нетаняҳу.

Хабарҳо дар бораи кушта шудани Алии Лориҷонӣ дар ҳоле пахш мешаванд, ки Нерӯҳои дифои Исроил (IDF) дар эъломияе гуфт, рӯзи 16-уми март дар мавҷи ҳамлаҳои ҳавоӣ ба Теҳрон фармондеҳи "Басиҷ"-и Сипоҳи посдорон Ғуломризо Сулаймонӣ кушта шуд.

Дар ин баёния омадааст, "нерӯҳои дифои Исроил Ғуломризо Сулаймониро, ки шаш соли охир фармондеҳи воҳиди "Басиҷ" буд, аз байн бурданд."

Мақомоти Ҷумҳурии Исломӣ то кунун ин гузоришро тасдиқ ё рад накардаанд.

Аз ҳамлаи якҷояи Иёлоти Муттаҳида ва Исроил ба Эрон тақрибан се ҳафта мегузарад.

Артиши Исроил гуфт, дар мавҷи нави ҳамлаҳо ба шаҳри Теҳрон зербунёдҳои “режими Эрон”-ро ҳадаф қарор додааст. Ҳамчунин, ба гуфтаи онҳо, мавзеъҳое низ зада шудаанд, ки ба гурӯҳи “Ҳизбуллоҳ" рабт доранд. Иёлоти Муттаҳида ин гурӯҳро созмони террористӣ медонад.

Дар ҳамин ҳол, Эрон ҳамлаҳои мушакӣ ва паҳподии худро ба ҳадафҳо дар саросари Ховари Миёна, аз ҷумла Исроил идома медиҳад. "Камаш як паҳпод" ба дохили сафорати Амрико дар Бағдод афтодааст. Дар Давҳа низ аз таркишҳо хабар дода шуд ва Қатар гуфт, як ҳамлаи мушакиро раҳгирӣ кард.

Гулӯгоҳи муҳими Ҳурмуз, ки тақрибан панҷяки нафти ҷаҳон аз тариқи он мегузарад, бинобар ҳамлаҳо ба киштиҳо баста мемонад.

Доналд Трамп, раисҷумҳури Амрико, аз кишварҳои ҷаҳон даъват кард, ки барои бозкушоии тангии Ҳурмуз кумак кунанд. Ҳадаф қарор гирифтани кишварҳои тавлидкунандаи нафту газ дар Халиҷи Форс аз сӯи Эрон боис шудааст, ки нархи сӯзишворӣ дар бисёре аз кишварҳо ба таври назаррас боло равад.