Толибон мегӯянд, ки Мулло Ҳайбатуллоҳ Охунзода, раҳбари онҳо дар Кандаҳор аст ва дар вақти муносиб худро ба мардум нишон хоҳад дод. Баъд аз тақрибан панҷ сол, Толибон аввалин бор дар мавриди маҳали ҳузури раҳбари ин гурӯҳ маълумоти дақиқ доданд. Ин дар ҳолест, ки аз дохил шудани Толибон ба Кобул ду ҳафта мегузарад ва аз тарафи Охунзода ҳеҷ паёмӣ савтӣ ё хаттӣ ба расонаҳо нарасидааст.
Забеҳуллоҳ Муҷоҳид, сухангӯи Толибон 29-уми август ба Радиои Озодӣ тасдиқ кард, ки Мулло Ҳайбатуллоҳ Охунзода дар Кандаҳор аст ва дар як замони муносиб худро ба мардум нишон хоҳад дод. Ин сухангӯи Толибон гуфт, "Ҷаноби Охунзода дар Кандаҳор аст. Иншоаллоҳ баъдан ҳар чизе, ки мегӯянд, аз ҳамонҷо нашр хоҳад шуд". Ба гуфтаи оқои Муҷоҳид, Мулло Ҳайбатуллоҳ қаблан ҳам дар Кандаҳор буд ва дар вилоятҳои мухталифи Афғонистон будубош дошт.
Мақомоти ҳукумати Афғонистон дар гузашта гуфта буданд, ки раҳбарони Толибон, аз ҷумла Охунзода дар Покистон ба сар мебарад ва аз онҷо амалиётҳои низомиро алайҳи Афғонистон тарҳрезӣ мекунад. Аммо Покистон ҳамвора ин гуфтаҳои мақомоти Кобулро рад карда буд.
Мулло Ҳайбатуллоҳ Охунзода севумин раҳбари гурӯҳи Толибон аст, ки дар соли 2016 пас аз кушта шудани Мулло Ахтар Мансур дар ҳамлаи як ҳавопаймои бесарнишини амрикоӣ, раҳбари ин гурӯҳ таъйин шуд.
Дар он вақт Толибон бо нашри як эъломия гуфтанд, ки аъзои Шӯрои раҳбарии онҳо Мулло Ҳайбатуллоҳро ба ҳайси раҳбар ва Сироҷиддин Ҳаққонӣ ва Муҳаммад Яъқубро муовинони вай интихоб карданд. Сироҷиддин Ҳаққонӣ фарзанди Ҷалолиддин Ҳаққонӣ, бунёдгузори "Шабакаи Ҳаққонӣ" ва Муҳаммад Яъқуб, фарзанди Мулло Умар, бунёдгузор ва раҳбари пешини гурӯҳи Толибони Афғонистон аст. Мақомоти Афғонистон "Шабакаи Ҳаққонӣ"-ро омили хунбортарин ҳамлаҳои террорисӣ дар он кишвар медонанд.
Толибон дар ҳоле маҳали будубоши Мулло Ҳайбатуллоҳро эълом мекунанд, ки дар гузашта ниҳодҳои кашфии ҳукумати Афғонистон хабари кушта шудани вайро нашр карда буданд. То ҳол маълум нест, ки ин раҳбари дараҷаи аввали сиёсии Толибон дар низомии баъдии Афғонистон чӣ нақшеро ба ӯҳда хоҳад дошт.
Толибон дар гузашта ҷойи будубоши раҳбарони худро пинҳон нигоҳ медоштанд. Онҳо дар соли 2012 марги раҳбари пешини худ Мулло Умарро ду сол баъд эълон карданд. Дар ин байн гурӯҳи Толибон ҳамвора аз номи Мулло Умар баёнияҳо ва табрикот ба муносибати Идҳои Қурбон ва Фитр нашр мекарданд.
Толибон рӯзи 15-уми август Кобул - пойтахти Афғонистонро ишғол карданд. Бо гузашти беш аз ду ҳафта, онҳо ҳануз натавонистаанд ҳукумати худро ташкил диҳанд.
Дар ҳоли ҳозир тақрибан аксари минтақаҳои Афғонистон ба ҷуз вилояти Панҷшер дар ихтиёри Толибон қарор дорад. Дар дараи Панҷшер ҳамакнун Ҷабҳаи муқовимати миллӣ бо раҳбарии Аҳмад Масъуд, писари фармондеҳи шаҳир Аҳмадшоҳи Масъул ташкил шудааст. Аҳмад Масъуд гуфтааст, ки омодаи музокирот бо Толибон аст, аммо дар сурати ҳамлаи онҳо ба Панҷшер, нерӯҳои таҳти фармонаш ба дифоъ хоҳанд пардохт.