Пайвандҳои дастрасӣ

Хабари нав

Дар чанд ҷумла

Сарвазири Исроил ба Имороти Муттаҳидаи Араб сафар мекунад

Бенямин Нетаняҳу, нахуствазири Исроил.

Бенямин Нетаняҳу, нахуствазири Исроил рӯзи 11-уми март нахустин сафари расмии худро ба Имороти Муттаҳидаи Арабӣ аҷном медиҳад. Ин аввали бор пас аз оддисозии робитаҳои Иморот ва Исроил дар шаш моҳи ахир аст, ки Иморот мизбони расмии нахуствазири Исроил хоҳад буд.

Ба навиштаи расонаҳо, интизор меравад, ки Нетаняҳу бо валиаҳди Имороти Муттаҳидаи Арабӣ Шайх Муҳаммад бин Зоид Ан-Наҳён дар фурудгоҳи Абу Забӣ мулоқот кунад ва худи ҳамин рӯз ба Исроил баргардад.

Дафтари нахуствазири Исроил таъйид кардааст, ки Нетаняҳу ба унвони меҳмони расмии валиаҳди Иморот мулоқот хоҳад кард. Ин сафар аз қабл тарҳрезӣ шуда буд, аммо бинобар пандемияи фарогири коронавирус ба таъхир афтод.

Бо миёнҷигарии Амрико, Исроил дар моҳи сентябри соли гузашта бо Имороти Муттаҳидаи Арабӣ ва Баҳрайн робитаҳои расмӣ барқарор кард. Ин ду кишвар ҳоло пас аз Миср ва Урдун кишварҳои арабие ба ҳисоб мераванд, ки бо Исроил робитаҳои дипломатӣ барқарор мекунанд. Судон ва Мағриб низ чанд ҳафта баъд ба раванди оддисозии робитаҳо бо Исроил пайвастанд.

Расонаҳои Исроил исрори Нетаняҳу барои анҷоми ин сафарро 12 рӯз монда ба интихобот бо корзори таблиғоти сиёсии ӯ, ки раҳбари ҳизби Лику низ ҳаст, рабт медиҳанд. Расонаҳои исроилӣ навиштанд, ки Нетаняҳу барномаи сафарро қасдан ба ин таърих вогузор кард то аз он бештарин баҳраи сиёсӣ барад ва худро наҷотдиҳандаи дастоварди сулҳ бо кишварҳо муаррифӣ кунад.

Нетаняҳу ин ҳафта дар гуфтугӯ бо радиои артиши Исроил ба раъйдиҳандагон ваъда дод, ки агар дубора интихоб шавад, созишномаҳои дигари сулҳ миёни Исроил ва дигар кишварҳо имзо хоҳад кард.

Ҳамаи хабарҳои имрӯзро дар инҷо бихонед

Дар Исфара сокинонро аз хатари мина ҳушдор доданд

Эълони ҳушдор аз хатари мина дар Исфара

Мақомоти тоҷик ба сокинони чанд деҳа дар Исфара, ки дар марзи Тоҷикистон бо вилояти Бодканди Қирғизистон, зиндагӣ мекунанд, ҳушдор додаанд, ки аз хатари таркиши минаҳо эҳтиёт кунанд.

Дар канори роҳҳо бо акси намудҳои мина ва бо навиштаи “Дур истед!”, ”Эҳтиёт кунед!”, “Дар хотир доред”, “Хабар диҳед” эълон насб шудааст.

Як намояндаи маҳаллаи “Сомониён”-и шаҳри Исфара ба Радиои Озодӣ гуфт, ин эълонҳоро чанд рӯз қабл барои огоҳии мардум аз хатари минаҳо нашр карданд. “Мардум вақте ба чарогоҳҳо ё теппаҳо мераванд, минаро аз дигар чиз фарқ намекунанд. Барои ҳамин дар масҷидҳо ва мактабҳо бо нишон додани акси минаҳо эълон нашр кардем,”-- гуфт ҳамсуҳбати мо

Толибхон Умаров, як сокини Исфара гуфт, ҳушдор барои эҳтиёт аз мина дар маҳаллаи “Сомониён”, “Сурх”, “Чоркуҳ” насб карда шудааст.

Ҳушдор аз хатари мина пас аз муноқиша дар марзи Тоҷикистон бо Қирғизистон пайдо шуд. То кунун дар ин ноҳия таркиши мина ва зиён дидани сокинон сабт нашудааст.

Дар пайи даргириҳои марзии 14-17 сентябр дар сарҳади Тоҷикистон ва Қирғизистон даҳҳо хона валангор ва садҳо нафар бехонумон гаштаанд. Сокинон ҳоло дар хонаи хешу табор ё иҷора зиндагӣ мекунанд. Мақомоти Тоҷикистон то ҳол ҳаҷми зарарро пурра нагуфтаанд.

Дар Душанбе ба сафири Қирғизистон нотаи эътирозӣ супурданд

Эрлан Абдилдаев, сафири Қирғизистон дар Тоҷикистон

Вазорати корҳои хориҷии Тоҷикистон ба сафири Қирғизистон дар Душанбе дар робита ба изҳори назари як мансабдори қирғиз нотаи эътирозӣ супурдааст.

Дар хабарномае Вазорати корҳои хориҷии Тоҷикистон эълон кард, ки рӯзи 7-уми октябр Эрлан Абдилдаев, сафири Қирғизистон дар Тоҷикистон ба Вазорати корҳои хориҷии Тоҷикистон даъват шуд. Вазорат аз паёми фейсбукии Чингиз Кустабаев, сухангӯи Вазорати корҳои хориҷии Қирғизистон норизоӣ кардааст.

Чингиз Кустабаев рӯзи 6-уми октябр дар паёми фейсбукии худ бо номи “Ҷоиза гунаҳкоронро ёфт” аз тарафи президенти Русия Владимир Путин бо ордени “Барои хидмати шоиста ба меҳан дараҷаи III” мукофотонида шудани раисиҷумҳури Тоҷикистон Эмомалӣ Раҳмонро танқид кард.

Вазорати корҳои хориҷии Тоҷикистон навиштаи Кустабаевро “изҳороти паст” номида, онро “далели аз миён рафтани фарҳанги сиёсӣ ва набудани ахлоқи одии дипломатӣ” донистааст. Дар хабарномаи Вазорат гуфта шудааст, ки амали мансабдори қирғиз “кӯшиши дағалонае барои таҳмили ақидаи бардурӯғ ба афкори умум доир ба сабабҳои аслии таҷовузи мусаллаҳонаи Қирғизистон бар зидди Тоҷикистон” аст.

“Зикр гардид, ки чунин изҳороти риёкорона ба ҳолат ва ҳарфи протоколҳое, ки ҷонибҳо 19 ва 25 сентябри соли 2022 имзо кардаанд, мувофиқат намекунад,”—гуфта шудааст дар хабарномаи Вазорати корҳои хориҷии Тоҷикистон.

Ба гуфтаи мақомот, ба сафири Қирғизистон дар Тоҷикистон мавзуи “ҷилавгирӣ аз пайдо шудани паёмҳо дар фазои иттилоотӣ, ки метавонанд ҷомеаи ҳарду кишварро ба иштибоҳ андозанд,” баҳс шудааст. Рӯзи 14-уми сентябр дар марзи Тоҷикистон бо Қирғизистон муноқиша сар зад ва он рӯзи 17-уми сентябр ба поён расид. Ду ҷониб барои риояи оташбас ба созиш расиданд, вале баҳси мақомдорони ду кишвар дар матбуот ҳанӯз поён наёфтааст.

Мақомоти Тоҷикистон гуфтанд, дар ин ҳодиса беш аз 40 ғайринизомӣ кушта ва дусад нафари дигар захмӣ шуданд. Радиои Озодӣ номи беш аз 70 кушташударо гирд овард.

Қирғизистон дар бораи 62 кушта ва беш аз дусад захмӣ гузориш дод.

Ҷанҷоли ду тараф барои хати сарҳад аст, ки дарозияш ба тақрибан ҳазор километр мерасад, вале садҳо километри он аз пошхӯрии Шӯравӣ то ҳоло таъину нишонагузорӣ нашудааст. Тоҷикистону Қирғизистон бар асоси харитаву санадҳои гуногун ба ҳақ будани худ пофишорӣ доранд.

Шӯрои СММ вазъ дар Шинҷони Чинро баррасӣ накард

Шӯрои ҳуқуқи башари СММ 6 октябр дар пайи раъйдиҳии кишварҳои узв тасмим гирифт, ки гузориши комиссари олии ин созмон дар бораи вазъи ақалиятҳои миллӣ ва мусалмонро дар минтақаи Шинҷони Чин баррасӣ накунад.

Қаблан Бритониё, Туркия, ИМА ва чандин кишвари дигар пешниҳод карданд, ки вазъи ҳуқуқи уйғурҳои мусулмон ва ақалиятҳои дигар дар Шинҷон ба баҳс кашида шавад.

Ин пешниҳод бо 17 раъйи ҷонибдор, мухолифати 19 кишвар ва 11 раъйи бетараф рад карда шуд. Қазоқистон, Узбекистон, Покистон, Имороти Муттаҳидаи Араб, Қатар, Чин, Непал, Индонезия, Камерун, Эритрея, Габон, Мавритания, Намибия, Сенегал, Судон, Боливия, Венесуэла ва Куба аз зумраи кишварҳое ҳастанд, ки зидди баррасии вазъ раъй доданд.

Вазорати умури хориҷии Чин баъди раъйгирӣ бо нашри изҳороте гуфт, "ИМА ва баъзе кишварҳои дигари ғарбӣ як муддат мешавад, ба ҷомеа дар бораи Шинҷон маълумоти нодуруст медиҳанд ва мехоҳанд бо баҳонаи ҳуқуқи башар обрӯи Чинро хатчадор ва ифротгароиро барангезанд".

"Мемориал", Алес Билятский ва Маркази озодиҳои шаҳрвандии Украина - барандаи ҷоизаи сулҳи Нобел

Намунаи Ҷоизаи сулҳи Нобел

Ҷоизаи имсолаи сулҳи Нобел насиби се ҷониб – фаъоли беларусӣ Алес Билятский, созмони “Мемориал”-и Русия ва Маркази озодиҳои шаҳрвандии Украина мегардад. Қарори Кумитаи норвежии Нобел 7-уми октябр эълон шуд.

Ҷоизаи имсолаи сулҳи Нобел насиби се ҷониб – фаъоли беларусӣ Алес Билятский, созмони “Мемориал”-и Русия ва Маркази озодиҳои шаҳрвандии Украина мегардад. Қарори Кумитаи норвежии Нобел 7-уми октябр эълон шуд ва дар он омадааст, ки “барандаҳои ҷоизаи сулҳ намояндагони ҷомеаи маданӣ дар кишварҳои худ мебошанд. Онҳо давоми солиёни дароз ҳуқуқ ба танқиди қудрат ва ҳимоят аз ҳуқуқҳои бунёдии шаҳрвандонро ташвиқ кардаанд”.

Кумитаи Нобел мегӯяд, ин нафарон ва созмонҳо “ҷиноятҳои ҷангӣ, поймолшавии ҳуқуқи инсон ва нақзи қудратро ҳуҷҷатгузорӣ кардаанд. Дар ҳамроҳӣ онҳо аҳамияти ҷомеаи маданиро барои сулҳу демократия ба намоиш мегузоранд”.

Соли гузашта ин ҷоиза насиби ду нафар – журналистони филиппинӣ ва рус - Мария Ресса ва Дмитрий Муратов шуд, ки “барои ҷасораташон дар мубориза барои озодии баён” қадрдонӣ шуданд.

Соли 2020 Барномаи ғизои Созмони Милали Муттаҳид, идораи воқеъ дар Руми Итолиё барои муборизааш бо гуруснагӣ дар ҷаҳон барандаи ин ҷоиза шуданд. Ба баранда нишони тиллои ҷоизаи Сулҳи Нобел ва беш аз 1.4 миллион доллар дода мешавад.

Ҷоизаро соҳибкору саноатчии швед Алфред Нобел дар соли 1895 таъсис дода буд.

Тоқаев гуфт, аз номи "эътилофи мардумӣ" номзад мешавад

Қосимҷомарт Тоқаев, раиси ҷумҳури Қазоқистон.

Президенти амалкунандаи Қазоқистон Қосимҷомарт Тоқаев гуфт, ки дар интихоботи пешорӯи президентӣ аз номи "эътилофи мардумӣ" номзад мешавад. Се созмони ҷамъиятӣ ва се ҳизби сиёсӣ дар Қазоқистон рӯзи 6 октябр аз таъсиси эътилофи ягона хабар доданд.

Тоқаев дар ҷамъомади "эътилофи мардумӣ" аз ҳимояти номзадиаш сипосгузорӣ карда, бори дигар ваъдаи баргузории интихоботи "одилона ва воқеӣ"-ро дод.

Интихоботи пеш аз муҳлати Қазоқистон рӯзи 20 ноябри имсол баргузор хоҳад шуд. То ҳол номзадии раҳбари Пажӯҳишгоҳи иқтисодии маҷмааи байналмилалии илмии Остона Майрам Кажикен аз сӯи Иттиҳодияи иттифоқҳои касабаи “Аманат”, Нурлан Ауесбоев аз ҷониби Ҳизби умумимиллии сотсиал-демократии Қазоқистон, ки худро мухолиф унвон мекунад ва Жигули Дайрабоев аз ҳизби ҳукуматгарои "Ауил" ба мақоми президентӣ пешбарӣ шудаанд.

Пеш аз таъйини рӯзи интихобот ба Конститутсияи Қазоқистон тағйирот ворид карданд, ки акнун президент барои як давраи 7-сола интихобот мешавад ва ҳаққи дубора интихобот шуданро надорад.

Нахустин раводиди муҳоҷиратӣ дар Сафорати ИМА дар Душанбе содир шуд

Як хонаводаи тоҷик бори аввал раводиди муҳоҷиратро ба Иёлоти Муттаҳида аз Сафорати Амрико дар Душанбе дарёфт кард. Сафорат рӯзи 7-уми октябр бо нашри ин хабар иттиллоъ дод, ки аз ин пас тамоми виза ё раводиди муҳоҷират ба ин кишвар аз Душанбе дода мешавад. Қаблан шаҳрвандони Тоҷикистон барои дарёфти раводид ба Алматои Қазоқистон мерафтанд.

Сафорати Амрико дар Душанбе бо нашри акси ин хонаводаи тоҷик ба онҳо сафари хубу зиндагии навро дар Амрико хостааст. Аммо Сафорат номи ин хонаводаро эълон накардааст.

Рӯзи 3-юми октябр Тодд Ҳюз консули Иёлоти Муттаҳидаи Амрико дар Тоҷикистон, ба Радиои Озодӣ гуфта буд, "аз 4-уми октябр ба баррасии раводиди муҳоҷират дар Душанбе шуруъ мекунем. Мусоҳиба бо онҳое, ки соҳиби "грин-корт" шудаанд, инҷо мегузарад. Ягона комёбие, ки ҳоло барои шаҳрвандони Тоҷикистон аст, дигар ниёз нест, ба Алмато раванд ва онҷо дар меҳмонхона зиста мунтазир бимонанд. Акнун ҳамаашро метавонанд, дар сафорати Амрико дар Душанбе анҷом диҳанд”.

Мавсими якмоҳаи озмуни дарёфти ҳаққи муҳоҷират ба Амрико, ки ҳамчун озмуни лотореяи “грин-корт” маъруф аст, рӯзи 5-уми октябр шурӯъ шуд. ИМА соле барои 55 ҳазор нафар дар сартосари дунё имкони дарёфти ҳаққи иқомату кор дар ин кишварро тавассути корти сабз фароҳам меорад.

Ҳар сол ба ҳисоби миёна тавассути ин барнома беш аз 500 нафар аз Тоҷикистон ҳам барандаи ин лотерея шуда, ба Амрико мекӯчанд. Тибқи арзёбиҳои расмӣ, танҳо бар асоси корти сабз дар давоми панҷ соли охир ба Амрико аз Тоҷикистон ҳудуди 3 ҳазор шаҳрванди ин кишвар ворид шудааст.

Сокинони Узгени Қирғизистон барои обанбори Кампиробод гирдиҳамоӣ доранд

Дар ноҳияи Узгени Қирғизистон наздики 50 сокини деҳаи Қизил-Октябр барои обанбори Кампиробод гирдиҳамоӣ ташкил карданд. Онҳо талаб доранд, мутахассисон биёянд ва қитъаҳоеро нишон диҳанд, ки ба ҷониби Узбекистон дода шудааст.

"Бо ҷамъомадагон пулис гуфтугӯ дорад. Пулис мегӯяд, хайма задан иҷозат нест. Пулис шабона хаймаеро барканд, ки сокинон сохта буданд", - гуфт сокини маҳаллӣ Қодирбек Қарабоев.

Ахиран сокинони маҳаллӣ гуфтанд, даст ба гирдиҳамоии бемуҳлат мезананд. Аммо пулис талаби қатъи гирдиҳамоиро дорад.

Ахиран президенти Қирғизистон Содир Ҷабборов дар саҳифаи худ дар шабакаи иҷтимоии "Фейсбук" вохӯрияшро бо сокинони ноҳияи Узген дар робита ба тақдири обанбори Кампиробод шарҳ дод.

Ба гуфтаи Ҷабборов, қаблан обанбор пурра таҳти назорати Узбекистон қарор дошт ва минбаъд ду кишвар тасмим гирифтаанд, ки барои "идораи баробари сарбанд" корхонаи муштарак таъсис диҳанд.

"Шартномаро пас аз баррасӣ шудан дар порлумон ба мардум пешниҳод мекунем ва дар бораи заминҳое, ки моликияти мо шудаанд, маълумот медиҳем. Шумо бояд сабр кунед. Зиёда аз 99%-и ҳудудҳои баҳсӣ аз мо шуданд. Мо сатҳи обро паст кардем. Дар натиҷа 1246 ҳектар замини назди соҳили обанбор озод шуд ва ҳудудҳо ба ихтиёри мо гузаштанд. Заминҳоро сокинони маҳаллӣ барои обёрии заминҳои кишоварзӣ истифода хоҳанд бурд. Мо дертар дар бораи манотиқи боқимондаи марзӣ маълумот медиҳем”, - навиштааст президент.

Рӯзи 4 октябр президенти Қирғизистон Содир Ҷабборов бо сокинони ноҳияи Узгени вилояти Ӯши кишвараш мулоқот кард. Хабар дода мешавад, ки бархе аз сокинон гирдиҳамоӣ ташкил ва талаби мулоқоти боз бо ҳамаи сокинони ноҳияро карданд. Онҳо ҳамчунин талаб карданд, ки обанбори Кампиробод ба Узбекистон дода нашавад.

Моҳи марти соли ҷорӣ раиси Кумитаи давлатии амнияти миллии Қирғизистон Қамчибек Тошиев гуфта буд, дарғот ё садди обанбор таҳти назорати ҷониби Узбекистон қарор мегирад, аммо захираи обро ҷонибҳо муштаракан истифода мекунанд. Баъди ин изҳорот сокинони Қирғизистон борҳо талаби бекорсозии тасмими мазкурро карданд.

Дар Тайланд пулиси пешин бештар аз 30 касро дар як боғча парронд

Акси гуонбар ба ҳамлаи хунин ба як кӯдакистон дар Тайланд.

Дар шимолу шарқи Тайланд рӯзи 6 октябр ба як кӯдакистон ҳамлаи мусаллаҳона сурат гирифт. Дар натиҷа 34 кас, аз ҷумла 22 кӯдак кушта шудааст.

Гумонбар корманди пешини пулис аст, ки бо таппонча, корд ва дигар аслиҳа мусаллаҳ шуда ба кӯдакистон ҳамла кардааст. Расонаҳо менависанд, вай ҳамсар ва се фарзандашро низ кушта дар ниҳоят худкушӣ кардааст.

Ин корманди пешини пулис ба далели истифодаи маводи мухаддир аз сафи пулис ронда шудааст. Вай ҳамчунин ба далели истеъмоли маводи мухаддир дар додгоҳ муҳокима мешуд.

Моҳи феврали соли 2020 як сарбози артиши Тайланд фармондеҳ ва ду ҳамхизмати худро кушта, баъдан вориди маркази тиҷорие шуд ва 26 каси дигарро онҷо ба ҳалокат расонд. Он замон сарбозро кормандони пулис кушта буданд.

Эмомалӣ Раҳмон ба Санкт-Петербург сафар кард

Эмомалӣ Раҳмон, раиси ҷумҳури Тоҷикистон.

Эмомалӣ Раҳмон, раиси ҷумҳури Тоҷикистон субҳи 7-уми октябр ба шаҳри Санкт-Петербурги Русия рафтааст. Дафтари матбуоти раёсати ҷумҳури Тоҷикистон навишт, ки ҳадаф аз ин сафар, ширкат дар вохӯрии ғайрирасмии сарони давлатҳои иштирокчии Иттиҳоди Давлатҳои Мустақил аст. Дар бораи ҷузъиёти мулоқоти роҳбарони кишварҳои узви ИДМ феълан иттилои зиёде дар даст нест. Дмитрий Песков, сухангӯи президенти Русия дар суҳбат бо расонаҳои русӣ, ин дидорро муҳим хонд. Президенти Қирғизистон гуфтааст, ки ба ин ҳамоиш намеравад.

Дар Санкт-Петербург 27 қирғизистонӣ заҳролуд шуданд

Дар шаҳри Санкт-Петербурги Русия 27 шаҳрванди Қирғизистон бо нишонаҳои заҳролудшавӣ дар бемористон бистарӣ шудаанд.

Аз вазорати корҳои хориҷии Қирғизистон гуфтанд, ин 27 тан муҳоҷири корӣ буданд ва аз ғизое заҳролуд шудаанд, ки ширкати сохтмонӣ ба онҳо медод.

"Вазъи онҳо қаноатбахш унвон мешавад. Мақомоти Русия таҳқиқи ҳодисаро шуруъ кардаанд", - омадааст дар хабари вазорати корҳои хориҷии Қирғизистон.

Бино ба иттилои расмӣ, бештар аз 1 миллион муҳоҷири корӣ аз Қирғизистон дар Русия қарор доранд.

Баҳси Қирғизистону Тоҷикистон дар бораи ордени Путин ба Раҳмон

Эмомалӣ Раҳмон ва Владимир Путин. Акс аз бойгонӣ

Сухангӯйи Вазорати корҳои хориҷии Тоҷикистон Шоҳин Самадӣ дар вокуниш ба шарҳи ҳамтои қирғизи худ Чингиз Кустабаев изҳороти ӯро хилофи одоби дипломатӣ, нафратпароканӣ ва поймол кардани созишҳои ҳосилшудаи миёни Тоҷикистону Қирғизистон пас аз даргириҳои 14-17 сентябри имсол номид.

Чингиз Кустабаев рӯзи 6-уми октябр дар паёми фейсбукии худ бо номи “Ҷоиза гунаҳкоронро ёфт” аз тарафи президенти Русия Владимир Путин бо ордени “Барои хидмати шоиста ба меҳан дараҷаи III” мукофотонида шудани раисиҷумҳури Тоҷикистон Эмомалӣ Раҳмонро танқид кард.

Ӯ навишт, ин ҷоиза “барои таъмини субот ва амният дар минтақа” дода шудааст ва ҷолиб он аст, ки “вақте мақомоти Тоҷикистон сулҳу оромии мардуми кишварҳои Осиёи Марказиро вайрон мекунанд, дар ин минтақа аз чӣ гуна амният сӯҳбат кардан мумкин аст”.

“Ин иқдом ба он чизе, ки мо дар марзи Қирғизистону Тоҷикистон дидем, мувофиқ нест,” — навиштааст Кустабаев.

Раиси Департаменти иттилоот ва матбуоти ВКХ-и Тоҷикистон Шоҳин Самадӣ дар посух ба ин навиштааст, ки “мансабдорони қирғиз мехоҳанд, бо изҳороти иғвоангези худ хол ба даст оранд.”

“Ҳамзамон таваҷҷуҳи ҷомеаи ҷаҳонӣ, созмонҳои байналмилалӣ ва минтақавиро ба он ҷалб менамоям, ки мақомоти Қирғизистон пас аз таҷовузи мусаллаҳона алайҳи Тоҷикистон ва ҳамчунин бо мақсади пинҳон доштани амалҳои ҷиноии худ алайҳи кишвари мо бо фактҳои тасдиқнашуда ва дурӯғи нангин ҳамлаи пурқудрати иттилоотӣ анҷом доданд, ки то имрӯз қатъ нашудааст,” — навиштааст Самадӣ дар Фейсбук.

Вай ҳамчунин ишора кардааст, ки Қирғизистон дастрасӣ ба сомонаҳои Тоҷикистонро маҳдуд карда, он расонаҳои худро, ки аз ҳарду ҷониб иттилоъ додаанд, зери фишор гирифтааст. Аз ҷумла, зидди расонаи мустақили Kaktus.media барои нашри "маълумоти нодуруст" дар бораи муноқиша дар марзи Қирғизистону Тоҷикистон парвандаи ҷиноӣ боз шудааст.

Муноқишаи хунин дар сарҳади Тоҷикистону Қирғизистон рӯзи 14-уми сентябри имсол сар зад ва 17-уми сентябр ба поён расид.

Мақомоти Тоҷикистон гуфтанд, дар ин ҳодиса беш аз 40 ғайринизомӣ кушта ва дусад нафари дигар захмӣ шуданд. Радиои Озодӣ номи беш аз 70 кушташударо гирд овард.

Қирғизистон дар бораи 62 кушта ва беш аз дусад захмӣ гузориш дод.

Ҷанҷоли ду тараф барои хати сарҳад аст, ки дарозияш ба тақрибан ҳазор километр мерасад, вале садҳо километри он аз пошхӯрии Шӯравӣ то ҳоло таъину нишонагузорӣ нашудааст. Тоҷикистону Қирғизистон бар асоси харитаву санадҳои гуногун ба ҳақ будани худ пофишорӣ доранд.

Шаҳрдори Тирмиз баъди фармони барканорияш боздошт шуд

Исроил Худойбердиев

Шаҳрдори Тирмизи вилояти Сурхандарёи Узбекистон Исроил Худойбердиев, ки 21-уми сентябри имсол аз мақом барканор гашт, бо гумони азхудкунии пулҳои буҷет дастгир шудааст.

Бахши узбекии Радиои Озодӣ бо истинод ба манбаи худ дар шаҳрдории Тирмиз хабар дода, ки зидди шаҳрдори ҳамакнун собиқ Исроил Худойбердиев ва муовини ӯ Ғайрат Эламанов бо банди “Дуздӣ ё азхудкунии пулҳои буҷаи давлат” парванда боз кардаанд.

Ба гуфтаи манбаъ, парванда дар робита ба сохтмони бозори “Яшил дунё” дар маркази Тирмиз боз гаштааст. Ин бозори маҳсулоти ғизоӣ ду сол пеш мавриди истифода қарор гирифта буд.

Мақомоти интизомии узбек гуфтанд, дар сохтмони бозор, ки арзиши умумии он 14 млрд ва 800 млн сӯм аст, пулҳои зиёди буҷа ғайриқонунӣ сарф карда шудааст.

Исроил Худойбердиев аз соли 2017 то 21 сентябри имсол шаҳрдори Тирмиз буд. Боздошти ӯ дар пасманзари барканории беш аз даҳ раиси шаҳру ноҳия сурат мегирад. Президенти Узбекистон Шавкат Мирзиёев дар давоми даҳ рӯзи ахир 14 раиси шаҳру ноҳияи он кишварро барканор кард.

Садҳо басеҷшудаи рус ба нишони эътироз аз қатора поин шуданд

Қрим. 27-уми сентябри 2022

Ҳудуди панҷсад шаҳрванди Русия, ки барои иштирок дар ҷанги Украина басеҷ шудаанд, бо нашри видеое гуфтанд, дар “як шароити ҳайвонӣ” нигаҳдорӣ мешаванд.

Ин видео шоми чоршанбе, 5-уми октябр, ба шабакаҳои иҷтимоӣ роҳ ёфт. Дар навор анбуҳи низомиёни мусаллаҳ дида мешавад, ки мегӯянд, аз қатораи Белгород поин шудаанд.

Басеҷшудаҳо гуфтанд, намедонанд, ки ба кадом қисми низомӣ тааллуқ доранд ва онҳоро ба куҷо мефиристанд. Ҳамчунин ҳамаи лавозимоти заруриро аз ҳисоби худ харидаанд.

Макон ва замони дақиқи сабти навор маълум нест. Хабарнигори бахши русии Радиои Озодӣ Марк Кротов мегӯяд, наворро сокини шаҳри Маскав Сергей Сурков, ки қаблан низ дар бораи мушкилоти артиши Русия видео нашр карда буд, дар наздикиҳои Белгород сабт кардааст.

Дар миёни ин басеҷшудаҳо нафаре бо рамзи ширкати низомии хусусии "Вагнер" низ дида мешавад. Ин ширкатро ба Евгений Пригожин, яке аз соҳибкорон ва шахсони наздик ба президенти Русия Владимир Путин рабт медиҳанд.

Низомиёни Русия, ки дар асоси фармони Путин басеҷ мешаванд, пайваста аз шароити бад дар артиши ин кишвар ва норасоии лавозимоти ҷангӣ шикоят мекунанд.

Тавре маълум шуд, аксари басеҷшудаҳо дар қисмҳои низомӣ дар рӯи фарш хобанд ва бо ғизои хуб таъмин нестанд.

Президенти Қирғизистон қазияи Кампирободро шарҳ дод

Уш, Қирғизистон

Президенти Қирғизистон Содир Ҷабборов (Жапаров) дар саҳифаи худ дар Фейсбук вохӯрияшро бо сокинони ноҳияи Узген дар робита ба тақдири обанбори Кампиробод шарҳ дод.

Ба гуфтаи Ҷабборов, қаблан обанбор пурра таҳти назорати Узбекистон қарор дошт ва минбаъд ду кишвар тасмим гирифтаанд, ки барои "идораи баробари сарбанд" корхонаи муштарак таъсис диҳанд.

"Шартномаро пас аз баррасӣ шудан дар порлумон ба мардум пешниҳод мекунем ва дар бораи заминҳое, ки моликияти мо шудаанд, маълумот медиҳем. Шумо бояд сабр кунед. Зиёда аз 99%-и ҳудудҳои баҳсӣ аз мо шуданд”, - навиштааст президенти Қирғизистон.

Ӯ афзудааст, “мо сатҳи обро паст кардем. Дар натиҷа, 1246 ҳектар замини назди соҳили обанбор озод шуд ва ҳудудҳо ба ихтиёри мо гузаштанд. Заминҳоро сокинони маҳаллӣ барои обёрии заминҳои кишоварзӣ истифода хоҳанд бурд. Мо дертар дар бораи манотиқи боқимондаи марзӣ маълумот медиҳем.”

Рӯзи 4-уми октябр президенти Қирғизистон Содир Ҷабборов бо сокинони ноҳияи Узгени вилояти Ӯши кишвараш мулоқот кард.

Хабар дода мешавад, ки баъзе аз сокинон гирдиҳамоӣ карда, мулоқоти боз бо ҳамаи сокинони ноҳияро талаб намуданд. Онҳо ҳамчунин талаб карданд, ки обанбори Кампиробод ба Узбекистон дода нашавад.

Моҳи марти имсол раиси Кумитаи давлатии амнияти миллии Қирғизистон Қамчибек Тошиев гуфта буд, дарғот ё садди обанбор таҳти назорати ҷониби Узбекистон қарор мегирад, аммо захираи обро ҷонибҳо якҷоя истифода мекунанд. Баъди ин изҳорот сокинони Қирғизистон борҳо талаби бекорсозии тасмими мазкурро карданд.

Ба хабаргузории "Orda" дар Қазоқистон сари хук фиристодаанд

Сардабир ин ҳодисаро ба матлабе дар бораи президенти пешини Қазоқистон пайванд додааст

Хабаргузории қазоқии "Orda.kz" шоми 5-уми октябр дар каналаш дар Телеграм хабар дод, ки шахси ношиносе ба идораи расона сари хукро фиристодааст.

"Ин шахс барои ошкор нагардидани шахсияти худ аз хидматрасонии хаткашони хусусӣ истифода бурдааст. Ӯ дар як қуттӣ сари хук ва ба болояш акси даридаи сармуҳаррири расона Гулнора Бажкеноваро гузошта, фиристодааст", - омадааст дар хабари "Orda.kz".

Бажкенова ин ҳодисаро ба матлаби ахири расона рабт дод.

"Агар бо ман ё аъзои хонаводаам, чизе шавад, қотеъона мегӯям, ки он матлаб дар бораи президенти пешини Қазоқистон Нурсултон Назарбоев, бунёди ба номи ӯ ва Алия Назарбоева рабт дорад. Ҳамаи ин корҳо бо супориши онҳо мешаванд. Онҳо бо як даст блогеронро ташкил мекунанд ва бо дасти дигар метарсонанд", - афзуд ӯ.

Намояндагони бунёди ба номи Назарбоев то ҳол ба иддаои сармуҳаррири расона вокуниш нишон надодаанд.

Медали нуқраи гуштигири тоҷик дар қаҳрамонии ҷаҳон миёни собиқадорон

Ҷамшед Мақсудов дар мусобиқоти қаҳрамонии ҷаҳон оид ба гуштии варзишӣ (гуштии озод ва гуштии юнонию румӣ) миёни собиқадорон, ки 4-уми октябр дар шаҳри Пловдиви Булғористон шуруъ шуд ва то рӯзи 9-уми октябр идома меёбад, медали нуқра ба даст овард. Дар ин бора сомонаи Кумитаи миллии олимпии Тоҷикистон хабар додааст.

Ба иттилои манбаъ, дар ин мусобиқот ҳудуди 300 варзишгари аз 35 то 60-сола аз 40 кишвари ҷаҳон дар панҷ гурӯҳ вобаста ба синну солашон (дар ҳар гурӯҳ шаш вазн) иштирок доранд. Тоҷикистонро дар мусобиқоти ҷаҳонии собиқадорон ду нафар – бародарон Ҷамшед ва Зайниддин Мақсудовҳо - намояндагӣ карданд. Ҳарду дар рақобатҳо оид ба гуштии юнонию румӣ ширкат варзиданд.

Ҷамшед Мақсудов дар вазни 70 кило дар гурӯҳи “D” ба гирифтани ҷойи дуюм мушарраф шуд. Рақобатҳои ин вазн нахуст ба таври даврӣ сурат гирифт. Ҷамшед дар даври аввал аз Шамше Тлашадзеи гурҷистонӣ мағлуб шуда, дар ду даври баъдӣ бар Гунар Спрунк (Олмон) ва Ивайло Саров (Булғористон) пирӯз гардид ва ба даври ниманиҳоӣ роҳ ёфт. Дар нимфинал Убайдулло Эргашеви узбекистониро шикаст дод. Ҷамшед дар финал боз ҳам бо варзишгари Гурҷистон Шамше Тлашадзе рӯбарӯ шуда, мағлуб гардид. Ҷои сеюмро намояндаи Олмон Стефан Биттменн гирифт.

Зайниддин Мақсудов бошад, дар вазни 78 кило дар гурӯҳи “С” ҷойи панҷумро касб кард. Вай дар чорякфинал бар намояндаи Қазоқистон Владимир Овсяников ғолиб омад, вале дар нимфинал аз варзишгари Словакия Атилла Райз ва дар қувваозмоӣ барои ҷойи сеюм аз намояндаи Албания Мираш Палӣ шикаст хӯрд.

Ҳайати Қирғизистон ба нишасти минтақаӣ дар Душанбе "наомадааст"

Ҳайати Қирғизистон барои иштирок дар нишасти роҳбарони кумитаҳои ҳолатҳои фавқулодаи Осиёи Марказӣ ба Душанбе "наомадааст".

Умеда Юсуфӣ, сухангӯйи Кумитаи ҳолатҳои фавқулодаи Тоҷикистон, рӯзи 6-уми октябр гуфт, ки "сабабаш маълум нест".

Муносибати Тоҷикистону Қирғизистон баъди муноқишаи моҳи сентябри имсол, ки аз ду тараф даҳҳо куштаву захмӣ ба ҷой гузошт, ба сардӣ гароид.

Нишасти намояндагони идораи ҳолатҳои фавқулодаи минтақа рӯзи панҷшанбе дар пойтахти Тоҷикистон баргузор шуд. Намояндагони созмонҳои байнулмилалии идодрасон ҳам буданд.

Иштирокдорон масоили "таҳкими устувории минтақа ба офатҳои табииро" баррасӣ карданд.

Мунтахаби Тоҷикистон дар радабандии нави FIFA як зина боло шуд 

Дастаи мунтахаби миллии футболи Тоҷикистон дар радабандӣ ё рейтинги нави FIFA (Федератсияи байналмилалии футбол), ки 6-уми октябр дар сомонаи расмии ин созмон нашр шудааст, дар байни 211 кишвар бо 1185,7 имтиёз дар ҷойи 108-ум қарор гирифтааст.

Дар ин феҳрист Бразилия бо 1841,3 имтиёз дар ҷойи аввал аст. Белгия бо 1816,71 имтиёз дар зинаи дувум ва Аргентина бо 1773,88 имтиёз дар зинаи севум мебошанд.

Аз байни кишварҳои пасошӯравӣ зинаҳои баландро дар феҳристи FIFA Украина (27-ум, 1536,99 имтиёз), Русия (33-юм, 1496,11 имтиёз) ва Узбекистон (77-ум, 1309,98 имтиёз) ба даст овардаанд.

Тоҷикистон дар байни кишварҳои Шӯравии собиқ аз Қазоқистон (113-ум), Озарбойҷон (123-юм), Латвия (134-ум), Туркманистон (135-ум), Литва (144-ум) ва Молдова (174-ум) пеш аст, вале дар миёни кишварҳои Осиёи Марказӣ пас аз Узбекистон (77-ум) ва Қирғизистон (95-ум) ҷойгир шудааст.

Феҳристи FIFA аз соли 1993 ба ин сӯ тартиб дода мешавад. Натиҷаи беҳтарини мунтахаби Тоҷикистон дар тамоми таърихаш дар радабандии FIFA ҷойи 106-ум дар соли 2013 ва натиҷаи пасттаринаш ҷойи 180-ум дар соли 2003 мебошад.

Баҳси ташкили гуруҳҳои мусаллаҳи ихтиёрӣ дар марзи Қирғизистон

Ин хона дар муноқишаи марзии моҳи сентябр вайрон шудааст. Ноҳияи Бобоҷон Ғафуров

Пас аз муноқишаи моҳи сентябр дар марзи Тоҷикистону Қирғизистон, ки аз ду тараф даҳҳо куштаву захмӣ ба ҷой гузошт, порлумони Қирғизистон тарҳи қонунеро баррасӣ кард, ки тибқи он дар минтақаҳои наздисарҳадӣ гурӯҳҳои муссалаҳи ихтиёрӣ таъсис дода мешавад.

Онҳо дар ҳолатҳои сар задани низоъ ба марзбонон кумак хоҳанд кард.

Дар сурати қабул шудани тағйирот ба қонун шаҳрвандони Қирғизистон метавонанд, ба гурӯҳҳои ихтиёриён дар минтақаҳои наздимарзӣ шомил шаванд ва силоҳ ба даст бигиранд.

Ба гуфтаи муаллифони тарҳ, дар сурати ҳамла ба ин кишвар ихтиёриён ҳам дар баробари марзбонон аз қаламрави худ ҳимоя хоҳанд кард.

Мухолифони тарҳ мегӯянд, ин кор метавонад сабаби хушунату хунрезии зиёд дар марз шавад.

Пешравии артиши Украина дар минтақаҳои зери назари Русия

Херсон

Нерӯҳои Украина пешравиро дар манотиқе идома доданд, ки Русия ишғол кардааст ва дар замоне ки раиси ҷумҳур Владимир Путин гуфт, интизор дорад, вазъи чаҳор вилоят “ба эътидол меояд.”

Владимир Зеленский, раиси ҷумҳури Украина, шаби 5-уми октябр гуфт, се маҳаллаи дигари шаҳри Херсонро озод кардаанд.

Херсон маркази яке аз вилоятҳоест, ки Русия дар баробари вилояти Донетск, Луганск ва Запорожйе аз они худ кард, вале на ҳамаи қисматҳои онро зери назорат дорад.

Александр Старух, раиси вилояти Запорожйе рӯзи 6-уми октябр гуфт, дар натиҷаи ҳамлаҳои Русия дар шаби гузашта ду нафар кушта шудаанд ва чандин хона комилан аз байн рафтанд ва ё осеб диданд.

Гузориши намояндагони ҳукумати Тоҷикистон дар Женева

Акс аз бойгонӣ

Ҳукумати Тоҷикистон рӯзи 5-уми октябр дар шаҳри Женева ба Созмони Милал гузориш дод, ки дар чанд соли гузашта барои риояи ҳуқуқи иҷтимоӣ, иқтисодӣ ва фарҳангии мардум чӣ корҳое анҷом додааст.

Намояндагони ҳукумат дар ҳузури коршиносони байнулмилалӣ дар Кумитаи ҳуқуқи иқтисодӣ, иҷтимоӣ ва фарҳангии Созмони Милал гуфтанд, ки дар панҷ соли гузашта музди кори миёнаи мардум аз 442 сомонӣ ба ҳазору 540 сомонӣ расид.

«Ҳуқуқи инсон ҳаматарафа риоят мешавад ва ҳукумат дар ин замина тамоми чораҳоро меандешад,» -- гуфтаанд онҳо.

Гузориши ҳукумат ба Созмони Милал дар бораи иҷрои аҳдномаи байнулмилалӣ дар замоне мувофиқ омадааст, ки ҳукумат барои зери по кардани ҳуқуқи мардум, нотавонӣ дар таъмини шароити муносиб барои кору зиндагӣ ва таъқиби дигарандешон сахт танқид мешавад.

Дар Варшава аз бетаваҷҷуҳӣ ба қазияи Муяссар ва Ифтихор шикоят карданд

Муяссар Саъдоншоев

Дар арзёбии вазъи ҳуқуқи башар дар Варшава қазияи ду зодаи Бадахшон – шоиру наворбардор Муяссар Саъдоншоев ва узви «Комиссияи 44» Ифтихор Саидбековро баҳс кардаанд. Онҳо тобистони имсол ба муддати дароз зиндонӣ шуданд.

Абдусаттор Бобоев, раиси Кумитаи наҷоти зиндониён, рӯзи 5-уми октябр дар нишасти Варшава гуфтааст, ҳардуи онҳо бо иттиҳоми бофта аз озодӣ маҳрум шуданд, вале «на ягон фаъоли ҷомеаи шаҳрвандӣ ва на ягон созмони ҳомии ҳуқуқи инсон дар Тоҷикистон садое баланд накард».

«Ҳама хомӯширо ихтиёр карданд. Созмони Амният ва Ҳамкорӣ дар Аврупо ҳар сол барои рушди демократия ва шаклгирии ҷомеаи шаҳрвандӣ дар Тоҷикистон маблағ ҷудо мекунад ва чорабиниҳо мегузаронад. Оё ҳамаи ин ба хотири намоиш нест?» -- пурсидааст ӯ.

Бобоев хостааст, намояндагони созмонҳои дифоъ аз ҳуқуқи башар ва рӯзноманигорони байнулмилалӣ барои таҳқиқи қазияи аъзои "Комиссияи 44" ба Тоҷикистон бираванд. "Баъдан ҷомеаи ҷаҳонӣ бар асоси гузориши онҳо метавонад, ба Тоҷикистон фишор биорад, то парвандаҳо ошкор ва беғараз баррасӣ шаванд," – гуфтааст ӯ.

Муяссар Саъдоншоев, маъруф ба тахаллуси Муяссари Кӯҳистонӣ, 28-сола аст ва ҳукмашро рӯзи 24-уми июни имсол дар Хоруғ эълон кардаанд. Ифтихор Саидбеков 27-сола ва узви «Комиссияи 44» баҳори имсол дар Бадахшон дастгир шуда буд.

"Комиссияи 44"-ро дар пайи эътирозҳои моҳи ноябри соли 2021 дар маркази вилояти Бадахшон ташкил карданд. Шаш узви он шомили гуруҳе буданд, ки аз муфаттишони Додситонии кул ва Додситонии ҳарбии Тоҷикистон таркиб ёфта, ҳодисаҳои моҳи ноябри соли гузаштаро дар Хоруғ таҳқиқ мекард.

Танишҳо дар Бадахшон моҳи ноябри соли гузашта, баъди он авҷ гирифт, ки дар натиҷаи амалиёти нерӯҳои амниятӣ Гулбиддин Зиёбеков, як сокини Роштқалъа, кушта шуд. Дар ҷараёни тазоҳуроте, ки баъди он бархост, ду нафари дигар ба ҳалокат расиданд ва 17 нафар ҷароҳат бардоштанд.

Дар пайи ҳодисаи моҳи майи имсол дар Хоруғу Рӯшон, ки даҳҳо нафар кушта шуданд, фаъолияти «Комиссияи 44» мамнуъ ва аъзояш боздошт шуданд. Қисме аз онҳо ба муддати тӯлонӣ зиндонӣ шуданд.

Вазири рус: Маскав хоҳони идомаи кор дар "Помир-Чақалтой" аст

Валерий Фалков

Вазири маориф ва илми Русия гуфтааст, Маскав "манфиатдори идомаи кор" дар Маркази байнулмилалии илмӣ ва таҳқиқотии “Помир-Чақалтой” аст.

Муассисаи мазкурро солҳои 1940 дар баландии 4,5 ҳазор метр аз сатҳи баҳр сохтаанд.

Валерий Фалков рӯзи 4-уми октябр дар суҳбат бо сафири Тоҷикистон дар Маскав гуфтааст, “донишҳое, ки мо ба шарофати дастгоҳҳои астрофизикии ин марказ ба даст меорем, барои тамоми инсоният муҳим аст.”

Маркази байнулмилалии “Помир-Чақалтой” то соли 1991 моли Иттиҳоди Шӯравӣ ба ҳисоб мерафт. Соли 2008 моликияти муштараки Тоҷикистону Русия шинохта шуд.

Тибқи низомномаи Марказ, раҳбарони калидии он бояд аз ҳарду ҷониб таъйин карда шаванд. Ҳамчунин ҳамаи амволи Марказ, “бо шумули замини он” моликияти баробари Русияву Тоҷикистон аст.

Қаблан мақомоти Тоҷикистон иддао доштанд, ки марказ бо 12 гектар замин, бо амволи манқул ва ғайриманқул, аз қабили сохтмонҳо, таҷҳизот ва садҳо тонна фулузоти гаронбаҳо, ба шумули 3000 тонна қӯрғошим, моликияти Тоҷикистон аст.

Дидбони Ҳуқуқи Башар ҳукумати Эронро танқид кард

Нерӯҳои амниятии Эрон тазоҳургаронро саркӯб мекунанд

Дидбони Ҳуқуқи Башар (Human Rights Watch) рӯзи 5-уми октябр мақомоти Эронро ба чораҳои аз ҳад сахтгирона, аз ҷумла истифодаи нерӯву силоҳ, алайҳи эътирозгарон дар он кишвар муттаҳам кард.

Тазоҳуроти норозиён дар Эрон моҳи сентябри имсол ва пас аз марги як духтари 22-сола сар шуд.

Маъмурони пулиси ахлоқ Маҳсо Аминиро ба гумони “бадҳиҷобӣ” дастгир карданд ва ӯ баъди се рӯз дар ҳоли беҳушӣ дар бемористон даргузашт.

Бо вуҷуди ҳушдорҳои ҳукумат дар бораи саркӯби шадид, мавҷи эътирозҳо дар гӯшаҳои гуногуни Эрон идома дорад.

Ба иттилои Дидбони Ҳуқуқи Башар, дар 18 рӯзи тазоҳурот дастикам 154 нафар, аз ҷумла бо зарби тир, кушта шудаанд. Дар миёни онҳо занону духтарон ва кӯдакон низ ҳастанд.

Тоқаев тасмим дорад, "аз номи эътилофи нерӯҳои мардумӣ" номзад шавад

Қосимҷомарт Тоқаев

Президенти Қазоқистон Қосимҷомарт Тоқаев бар ин назар аст, ки дуруст мебуд, агар вай "на аз кадом ҳизби мушаххас", балки аз "эътилофи васеи неруҳои мардумиву сиёсӣ" ба интихобот мерафт.

Дар ин бора вай рӯзи 5-уми октябр дар сафари кориаш ба вилояти Павлодари Қазоқистон хабар дод.

"Ман мебинам, ки масълаи аз кадом ҳизб номзад шудани ман дар ҷомеа бо таваҷҷуҳи хос баррасӣ мешавад. Ошкоро мегӯям - эътилофҳои гуногуни ҷумҳурӣ ва ҳизбҳо пешниҳод доранд, ки аз номи онҳо номзад шавам. Фикр мекунам, дуруст мебуд, агар ман на аз номи ҳизби мушаххас, балки аз номи эътилофи васеи неруҳои мардумӣ ва сиёсӣ номзад мешудам", - гуфт Тоқаев.

Вай бори дигар ваъда кард: ҳамчун роҳбари давлат "кафолат медиҳад, ки интихоботи президентӣ бидуни тақаллуб, ошкоро ва боадолатона баргузор мешавад".

То ин замон дар Қазоқистон чаҳор нафар даъвогари курсии президентӣ шудаанд.

Президенти амалкунандаи Қазоқистон рӯзи 1-уми сентябри имсол интихоботи пеш аз муҳлати президентиро эълон кард. Ин интихобот рӯзи 20-уми ноябр баргузор хоҳад шуд.

Пеш аз таъйини рӯзи интихобот ба Конститутсияи Қазоқистон тағйирот ворид карданд, ки акнун президент барои як давраи 7-сола интихобот мешавад ва ҳаққи дубора интихобот шуданро надорад.

Ёфтҳои бештар

XS
SM
MD
LG