Аввалин ғалабаи Баҳодур Усмонов дар бокси ҳирфаӣ

Баҳодур Усмонов, муштзани маъруфи тоҷик, дорандаи роҳхат ба Бозиҳои тобистонаи олимпӣ дар Токио, дар аввалин рақобати худ дар бокси ҳирфаӣ пирӯз шуд.

Ӯ дар доираи мусобиқаи Shamo Boxing Promotions, ки рӯзи 24-уми декабр дар Маскав доир гардид, дар вазни сабук (61,23 кг) бар Вилдан Минасови русиягӣ ғалаба кард. Қувваозмоӣ шаш раунд идома ёфт ва Баҳодур аз рӯи имтиёзҳо пирӯзӣ ба даст овард.

Бояд гуфт, ки дар оғози мубориза Баҳодур дар нокдаун қарор дошт, аммо зуд ба худ омад ва бо зоҳир кардани ирода аз рақиби ботаҷрибааш зиёдтар имтиёз ба даст овард.

Баҳодур Усмонов, ки қаҳрамони феълии бокси ҳаваскорӣ дар Осиё мебошад, имсол ба Олимпиадаи Токио-2020 роҳхат гирифт ва беҳтарин варзишгари сол дар Тоҷикистон эълон шуд.

Баҳодур тасмим гирифт дар бокси ҳирфаӣ низ ширкат варзад, ки тибқи қоидаҳои нав барои дар Бозиҳои олимпии Токио дар бокси ҳаваскорӣ ширкат варзаидани ӯ халал намерасонад.

Ёдовар мешавем, Баҳодур Усмонов, ки моҳи марти имсол дар мусобиқаи интихобии олимпӣ дар минтақаи Осиё/Уқёнус дар шаҳри Аммони Урдун дар даври бокс-офф дар вазни то 63 кило миёни мардон бар варзишгари эронӣ Ашкон Ризоӣ бо ҳисоби 5:0 пирӯз шуд, соҳиби роҳхат ба Олимпиадаи Токио-2020 гардид.

Дастоварди бузурги варзишии соли 2019 низ ба ин муштзани 23-солаи тоҷик марбут аст. Ӯ дар қаҳрамонии бокси Осиё дар шаҳри Бангкоки Тайланд ба унвони қаҳрамонӣ даст ёфта, бо медали тилло сарфароз гашт.