Додгоҳи ноҳияи Якуми майи шаҳри Бишкек 20 ноябр раиси Бунёди иҷтимоии Қирғизистон Медер Ирсалиевро то 17 январи соли 2021 ҳабс кард.
Дар хадамоти матбуотии Додгоҳи олии Қирғизистон гуфтанд, ки Ирсалиев ду моҳ дар боздоштгоҳи муваққатии Кумитаи давлатии амнияти миллии ин кишвар нигаҳдорӣ мешавад.
Ирсалиевро 18 ноябр дар доираи парвандаи тамаъҷуии мунтазам аз воҳидҳои Бунёди иҷтимоӣ дастгир карданд.
Пештар хабар дода шуд, ки як гуруҳи мансабдорони баландпояи Бунёди иҷтимоии Қирғизистон ба таври мунтазам ва иҷборӣ аз мудирони воҳидҳои ин ниҳод маблағ талаб мекардаанд.
Медер Ирсалиев моҳи майи соли 2018 бо қарори сарвазири вақти Қирғизистон Муҳаммад Абилғозиев раиси бунёди мазкур таъйин шуда буд. Ӯ то ин дам муовини аввали раиси бунёд буд.
