Дар чанд ҷумла
Ҷонибдории кумитаи порлумони Қирғизистон аз гаронтар кардани иҷораи пойгоҳи Русия
Аъзои кумитаи умури байналмилалӣ, дифоъ ва амнияти порлумони Қирғизистон лоиҳаи қонуни ворид кардани тағйиру иловаҳо ба созишномаи ин кишвар бо Русияро дар бораи шароити будубоши пойгоҳи низомӣ баррасӣ ва қабул карданд.
Русия барои пойгоҳи низомии худ дар Қирғизистон 866,2 га заминро ба иҷора гирифта, солона 4,5 миллион доллар медод. Ҷониби Қирғизистон дар пайи як санҷиш муайян кардааст, ки низомиёни рус 100 га замини бештар истифода мебаранд.
Баъди ба иҷро даромадни тағйиру иловаҳо пули иҷораи замин $291,6 бештар шуда, Русия ҳаққи истифодаи замини зиёдатиро аз соли 2012 ба ин сӯ пардохт хоҳад кард.
Русия дар ҳудуди Қирғизистон чаҳор иншооти низомӣ: пойгоҳи ҳавоии "Кант"; пойгоҳи озмоишӣ дар шаҳри Қаракӯл; пойгоҳи иртиботӣ дар шаҳраки Чалдовар; нуқтаи худкори зилзилашиносӣ дар шаҳри Майлуу-Суу дорад. Пештар ҳар кадом аз ин иншоот дар алоҳидагӣ баррасӣ мешуд, аммо соли 2012 Қирғизистон ва Русия тасмим гирифтанд, ки ҳамаи онҳоро ба пойгоҳи муттаҳидаи Русия табдил диҳанд.
Пойгоҳи Русия дар Қирғизистон ягона иншооти низомии хориҷӣ ба ҳисоб меравад. То соли 2014 дар ин кишвар пойгоҳи ҳавоии амрикоии "Манас" амал мекард.
Ҳамаи хабарҳои имрӯзро дар инҷо бихонед
Президенти собиқи Қирғизистон ба фасодкорӣ гунаҳкор шуд
Додгоҳе дар шаҳри Бишкек, пойтахти Қирғизистон Алмосбек Отамбоев, собиқ раиси ҷумҳури ин кишварро ба фасодкорӣ гунаҳкор кард, аммо бо сабаби гузаштани муҳлати даъво ҷазо надод.
Президенти собиқро ба он гунаҳкор карданд, ки дар вақти ғайриқонунӣ озод кардани соҳибнуфузи ҷиноӣ Азиз Батукаев ба фасод даст задааст.
Отамбоев солҳои 2011-2017 президенти Қирғизистон буд. Вай соли 2020 дар доираи парвандаи ғайриқонунӣ озод кардани Батукаев ба 10 соли зиндон маҳкум шуда буд. 30 ноябри соли 2020 Додгоҳи олии Қирғизистон ҳукми зинаҳои поёниро бекор ва парвандаро ба баррасии иловагӣ фиристод. Президенти собиқи Қирғизистонро соли 2023 озод карданд.
Азиз Батукаев соли 2006 бо иттиҳоми қочоқи маводи мухаддир, нигоҳдории ғайриқонунии силоҳ ва ташкили бетартибӣ ба 16 солу 8 моҳи зиндон маҳкум шуда буд. Аммо ӯро соли 2013 бо сабаби гирифтори “бемории табобатнашаванда” будан аз зиндон озод карданд.
Ба ҷуз Алмосбек Отамбоев, чанд мансабдори баландпояи дигари Қирғизистон ҳам дар ғайриқонуни озод кардани Азиз Батукаев гунаҳкор эълон шуданд. Додгоҳ Индир Ҷолдубаев, собиқ додситони куллро ҷарима кард, аммо чанд мақомдори дигар ба далели гузаштани муҳлати даъво ҷазо нагирифтанд.
"Фарзандонро дар хона бастаанд." Вокуниши пулиси Душанбе ба навори баҳсбарангез
Пулиси Душанбе ба навори бастани ду кӯдак дар хона вокуниш карда гуфт, нисбати волидайни онҳо чораҳои қонунӣ меандешад.
Рӯзи 19-уми апрел наворе ба шабакаҳои иҷтимоӣ роҳ ёфт, ки дар он дида мешавад, ду кӯдакро дар хона маҳкам кардаанд. Дар ин видео, ки зоҳиран аз сӯи ҳамшираи тиббӣ дар як хобгоҳ сабт шудааст, дида мешавад, ки як кӯдак дар гаҳвора ва дуввумиро бо ресмон бастаанд. Ҳамшираи тиббии маҳалла дар ин видео мегӯяд, ин бори чандум волидайни ин ду кӯдак фарзандони худро дар хона баста, ба кор мераванд. Ба гуфтаи муаллифи навор, падару модари ин кӯдакон дар идораи нигоҳдории роҳ (ДЭУ) кор мекунанд. Дар навор писарбаччаи хурдсол мегӯяд, падараш ӯро бо ресмон бастааст.
Ин навор вокунишҳои зиёдро дар шабакаҳои иҷтимоӣ ба миён овард ва даҳҳо корбар аз мақомот хостанд, нисбати ин қазия чора андешанд.
Раёсати корҳои дохилии Душанбе 20-уми апрел дар хабарномае навишт, волидайни ин кӯдаконро пайдо кардааст. Онҳо Нуралихон Менгибоеви 58-сола ва Шаҳноза Қурбоноваи 32-сола будаанд. Назари ин афрод дар бораи қазия маълум нест.
Дар хабарномаи расмӣ омадааст, ин падару модар дар тарбияи фарзандонашон “бемасъулиятӣ зоҳир намудаанд.”
Пулиси Душанбе гуфтааст, “бо назардошти ҳолати воқеии вазъи зиндагонии номбурдагон” нисбати ин волидайн “чораҳои дахлдор андешида хоҳад шуд.” Аммо мақомот дар бораи вазъи зиндагии ин афрод ва муҷозоти онҳо чизе нагуфтаанд.
Ин бори аввал нест, ки ҳодисаҳои бадрафтории волидайн бо фарзандон расонаӣ мешавад.
Дар ҳамлаҳои Исроил ба Ғазза 90 кас кушта шудааст
Мақомоти беҳдоштии Ғазза мегӯянд, давоми 48 соати гузашта дар пайи ҳамлаҳои Исроил беш аз 90 нафар дар ин борика кушта шудаанд. Дар ин бора хабаргузории “Ассошиэйтед пресс” 19-уми апрел хабар додааст.
Ба қавли ин манбаъ, бархе аз кушташудаҳо занон ва кӯдакон буданд, ки ба “минтақаи инсонӣ” паноҳ бурда буданд.
Артиши Исроил пас аз ду моҳ оташбас, 18-уми март бори дигар ҳамла ба Навори Ғаззаро оғоз кард, то гуруҳи “Ҳамос”-ро аз байн бурда, гаравгонҳоро озод кунад. Амрико ва Иттиҳоди Аврупо гуруҳи «Ҳамос»-ро созмони террористӣ медонанд.
Бар асоси гузоришҳо, дар 48 соати гузашта дастикам 11 кас дар Хон-Юнус дар хайма кушта шудаанд.
Исроил пештар эълон кард, ки ҳамлаҳои худро дар саросари Ғазза шиддат бахшида, бахши бузурге аз ин борикаро ба унвони “минтақаи амниятӣ” зери назорат мегирад. Исроил ҳамчунин барои шаш ҳафта Ғаззаро муҳосира карда ва монеи вуруди кумакҳои башардӯстона шудааст.
Рӯзи 18-уми апрел доктор Ҳанон Балхӣ, намояндаи Созмони ҷаҳонии беҳдошт аз сафири нави Амрико дар Исроил хост, то Исроилро ба рафъи муҳосираи Ғазза тарғиб кунад, то дору ва кумакҳои дигар вориди минтақа шаванд.
Талаби шаҳрдории Душанбе аз сокинон: панҷара ва "кондитсионер"-ҳоро барчинед
Шаҳрҳдори Душанбе бо ирсоли як огоҳинома, аз сокинони пойтахт талаб кардааст, ки панҷараи тирезаҳо ва сардкунак (кондитсионер)-ҳоро барчинанд.
Дар номаи Раёсати назорати сохтмони шаҳрдорӣ ба сокинони ноҳияи Фирдавсӣ аз рӯзи 17-уми апрел омадааст, "Шуморо уҳдадор менамоем, ки кондитсионерҳо ва панҷараҳои дар намои бино насбшударо пурра бартараф намоед."
Дар нома зикр шудааст, ки барчидани панҷара ва сардкунакҳо бо дастури Раиси шаҳри Душанбе амалӣ мешавад.
Намояндагони идораи назорати сохтмон дар Душанбе нагуфтаанд, ки дар сурати накандани панҷараи тирезаҳо, сокинонро чӣ интизор аст.
Барчидани панҷараҳои оҳанин аз баландошёнаҳои Душанбе аз аввали имсол оғоз шуда буд. Самӣ Азизиён, сармеъмори Душанбе моҳи феврали имсол гуфта буд, ҳадаф аз барчидани панҷараҳои оҳанин беҳтар кардани симои шаҳр аст. Аммо сокинони пойтахт мегӯянд, ин панҷараҳо барои бехатарӣ ва наафтидани кӯдакон ба поён муҳим аст. Мақомот ба бошандагони пойтахт тавсия додаанд, барои таъмини бехатарӣ аз дохили хона симтурҳои махсус насб кунанд.
Қаблан мақомоти Душанбе мавҷгирҳоро аз боми биноҳо барчида, изҳор дошта буданд, ки онҳо симои зоҳирии шаҳрро коста мегардонанд.
Путин оташбаси муваққат эълон кард. Зеленский: ҷанг идома дорад
Президенти Украина мегӯяд, агар Русия ҳамлаҳоро қатъ кунад, Киев низ айни корро хоҳад кард. "Оромӣ дар баробари оромӣ, ҳамла дар муқобили ҳамла," -гуфтааст Владимир Зеленский.
Владимир Путин, раиси ҷумҳури Русия як рӯз пеш эълон кард, ки ба муносибати иди Пасха, ҳамла ба Украинаро 30 соат қатъ мекунанд. Ба гуфтаи Путин, оташбас аз соати 18-и 19-уми апрел то 00-и 21 апрел идома мекунад. Дар Вазорати мудофиаи Русия гуфтаанд, низоми оташбас танҳо дар сурате иҷро мешавад, ки агар Украина ҳам онро риоя кунад.
Вале Владимир Зеленский мегӯяд, бо вуҷуди эълони Путин, неруҳои Русия дар чанд ҷабҳа ҷангро идома медиҳанд. “Барои ҳамин ба ҳарфҳои Маскав боварӣ нест. Мо хеле хуб медонем, ки Русия одамонро ба гумроҳӣ мебарад ва барои ҳама гуна ҳолат омода аст. Неруҳои дифоии Украина оқилона амал карда, ба чунин ҳамлаҳо айнан посух хоҳанд дод,"-гуфтааст Зеленский.
Раиси ҷумҳури Украина ҳамчунин пешниҳод кардааст, ки низоми оташбас баъди иди Пасха ҳам идома ёбад.
Ба гуфтаи Зеленский, “30 соат оташбас танҳо барои хабарҳо кофӣ аст, на барои нишон додани эътимоди воқеӣ." Президенти Украина ҳамчунин гуфтааст, Маскав то ҳол ба пешниҳоди Амрико дар бораи оташбаси 30 рӯза посух надодааст.
Сафари вазири корҳои хориҷии Покистон ба Афғонистон
Вазири корҳои хориҷии Покистон Исҳоқ Дор 19 апрел бо сафари якрӯза ба Кобул сафар кардааст. Вазорати корҳои хориҷии Покистон мегӯяд, ки дар ин сафар шуморе аз вазирони дигар Исҳоқ Дорро ҳамроҳӣ мекунанд.
Дар назар аст, ки ҳайати покистонӣ бо мақомоти баландпояи ҳукумати Толибон, аз ҷумла, нахуствазири ин гурӯҳ Мулло Ҳасан Охунд, дидор кунад.
Пеш аз ин гузориш шуда буд, ки меҳвари ин сафар, густариши ҳамкориҳо миёни Толибон ва Покистон дар заминаҳои "амният, тиҷорат, робитаҳои минтақавӣ ва робитаҳои мардумӣ", мебошад.
Вазири корҳои хориҷии Покистон дар ҳоле ба Афғонистон сафар мекунад, ки ин кишвар дар камтар аз 20 рӯзи гузашта даҳҳо ҳазор афғони муҳоҷирро аз хокаш берун кардааст.
Вазири корҳои дохилии Покистон 18 апрел дар як нишасти хабарӣ гуфт, ки аз оғози моҳи апрел то кунун 85 ҳазор афғон аз Покистон ба Афғонистон бозгаштаанд.
Ҳукумати Толибон омори паноҳандагони бозгашта аз Покистонро 71 ҳазор нафар гуфтааст.
Шумори кушташудагони ҳамлаи Амрико ба Яман ба 74 тан расид
Гурӯҳи "Ансоруллоҳ"-и Яман (ҳусиҳо) мегӯяд, шумори кушташудаҳо дар ҳамлаҳои артиши Амрико дар рӯзи 18 апрел ба як бандари муҳими маводи сӯхт, ба 74 нафар расид.
Ба гуфтаи ҳусиҳо, дар ин ҳамлаҳо 170 нафар захмӣ шудаанд. Мақомоти амрикоӣ эълон карданд, ки ҳамла ба бандари "Раъс Исо" дар соҳилҳои Баҳри Сурх, ба ҳадафи қатъи таъмини энержӣ ва пул барои ҳусиҳо анҷом шуд.
Иёлоти Муттаҳида рӯзи 15-уми марти имсол ҳамларо алайҳи шӯришиёни ҳусии Яман сар кард. Амрико шӯришиёни ҳусиро як гурӯҳи террористӣ медонад.
Қабл аз он Доналд Трамп, раисҷумҳури Амрико, ҳушдор дода буд, ки агар ҳусиҳо ҳамларо ба киштиҳои Иёлоти Муттаҳида ва мушакпарониро ба хоки Исроил бас накунанд, дӯзах ба сарашон чаппа хоҳад шуд.
Шӯришиёни ҳусӣ тайи тақрибан ду соли охир даҳҳо бор ба киштиҳо ҳамла кардаанд, ки ду киштӣ ғарқ ва чаҳор киштибон кушта шуданд.
Ин амр ҷараёни тиҷорат аз роҳи Баҳри Сурхро бисёр коҳиш додааст. Ҳусиҳо ҳамчунин чандин ҳамлаҳо алайҳи киштиҳои ҷангии Амрико анҷом додаанд.
Яҳё Сареъ, сухангӯи ин гурӯҳ, рӯзи 18 апрел иддао кард, ки нерӯҳои он бо истифода аз паҳбод ва мушак, бори дигар киштиҳои ҳавопаймобари Амрикоро ҳадаф қарор доданд.
Амрико ё манбаъҳои мустақил ин иддаоро тасдиқ накардаанд.
Амрико нерӯҳои худро дар Сурия коҳиш медиҳад
Вазорати дифои Амрико эълон кардааст, ки ин кишвар нерӯҳои худро дар Сурия ба камтар аз як ҳазор коҳиш медиҳад. Вашингтон солҳост, ки неруҳои худро барои мубориза бо гурӯҳи "ДОИШ" дар Сурия, ҷобаҷо кардааст. Мақомот дар Вашингтон ба ин бовар ҳастанд, ки ин гурӯҳ дар Сурия ва Ироқ ҳанӯз ҳам таҳдиди бузург ба шумор меравад.
Сухангӯи Пентагон мегӯяд, вазири дифои Амрико дастур додааст, ки нерӯҳои амрикоӣ дар Сурия коҳиш ёбанд ва бояд дар чанд минтақаи хос ҳузур дошта бошанд. Ҳарчанд ӯ дар бораи маҳали дақиқи ҷобаҷойии ин нерӯҳо чизе нагуфт, аммо афзуд, "ин раванд санҷидашуда аст ва тибқи шароит, ҳузури нерӯҳои амрикоӣ дар Сурияро дар моҳҳои оянда ба камтар аз 1000 нафар коҳиш хоҳад дод".
Доналд Трамп, раисҷумҳури Амрико дар давраи аввали президентии худ дастури хуруҷи нерӯҳои ин кишвар аз Сурияро дода буд, аммо дар ниҳоят бахше аз нерӯҳои амрикоӣ дар онҷо боқӣ монданд.
Пас аз сарнагунии ҳукумати Башор Асад дар Сурия дар моҳи декабри соли гузашта аз сӯи гурӯҳҳои мухолиф бо раҳбарии "Таҳрир Аш-Шом", Трамп эълон кард, ки Вашингтон "набояд дахолат кунад".
Ҳамлаҳои ДОИШ дар соли 2014 боис шуд, Амрико барои ҳимоят аз нерӯҳои маҳаллӣ дар Сурия ва Ироқ, мудохила кунад. Ҳарчанд гуфта мешавад, ки фаъолияти ДОИШ дар Сурия ва Ироқ коҳиш ёфтааст, аммо таҳдидҳои ин гурӯҳ аз байн нарафтааст.
Пас аз оғози ҷанг дар Ғазза дар моҳи октябри соли 2023, нерӯҳои амрикоӣ дар Ироқ ва Сурия чандин бор ҳадафи ҳамлаҳои гурӯҳҳои вобаста ба Эрон қарор гирифтанд, аммо дар пайи зарбаҳои ҷавобии Амрико, ин ҳамлаҳо коҳиш ёфтаанд.
Дар ҳоле, ки Вашингтон пештар аз ҳузури 900 сарбози худ дар Сурия хабар дода буд, Пентагон дар моҳи декабри соли 2024 эълон кард, ки шумори онҳо ба ҳудуди 2000 нафар расида буд.
Акнун Амрико дар ҳоли коҳиши нерӯҳояш дар Сурия аст. Ҳамзамон Ироқ низ хостори поёни ҳузури эътилоф ба раҳбарии Амрико шуда, ду кишвар ба созиш расидаанд, ки ин ҳузур то поёни соли 2025 дар Ироқ ва то декабри соли 2026 дар Курдистон, поён ёбад.
"Агар музокироти сулҳи Украина пеш наравад..." Дар Фаронса чӣ гуфтанд?
Эммануэл Макрон, президенти Фаронса ва раҳбарони воломақоми Аврупо рӯзи 17-уми апрел дар Порис (Париж) бо ҳайати баландпояи ҳукумати Амрико роҳҳои хатми ҷанг дар Украинаро баррасӣ карданд.
Ҳадаф аз музокирот ошкор намудани ташвиши кишварҳои аврупоӣ аз он буд, ки маъмурияти Доналд Трамп талош дорад, мавқеъгирии Русияро дар ҷанги Укрина сафед кунад. Ба назар мерасад, Иёлоти Муттаҳида ҳам шартҳои худро доштааст.
Котиби давлатии Амрико Марко Рубио гуфт, агар дар чанд рӯзи оянда нишонаҳои пешрафт дар ҳалли низоъ ҳосил нашавад, кишвараш миёнаравиро барои сулҳи Русия ва Украина канор мегузорад.
Марко Рубио гуфт, масъалаҳои дигари миқёси ҷаҳонӣ ҳастанд, ки Иёлоти Муттаҳида ба онҳо бартарӣ хоҳад дод.
"Ба фикрам, муҳим аст, ба ҳама ёдовар шавам, ки ҷанг дар Украина амали ваҳшатбор аст, аммо ҷанги мо нест. Мо онро шурӯъ накардаем. Амрико тӯли се сол ба Украина кумак расонд ва ҳоло мехоҳад ба ин кор хотима бахшад,” -- афзуд ӯ.
Сарфи назар аз ваъдаи хатми босуръати ҷанг маъмурияти Трамп то кунун ба натиҷаи назаррасе дар ҳалли ин низоъ даст наёфтааст.
Украина моҳи март ба пешниҳоди Трамп дар бораи оташбас мувофиқат кард, вале Маскав онро напазируфт.
Он замон ҷонибҳо розӣ шуданд, ки аз ҳамла ба пойгоҳҳои энергетикӣ ва ҷанг дар баҳр худдорӣ мекунанд, вале то имрӯз Маскав ва Киев якдигарро бо вайрон намудани ин созиш муттаҳам мекунанд.
Видео дар инҷост:
Як зодаи Тоҷикистонро дар Русия ба ҳамкорӣ бо ДОИШ муттаҳам карданд
Мақомоти амниятии Русия як зодаи 24-солаи Тоҷикистонро ба ҳамкорӣ бо гурӯҳи террористии "Давлати исломӣ" ё ДОИШ муттаҳам карданд.
Аз ӯ Исроилҷон Қурбонов ном бурда мешавад.
Шарҳи ҷониби Тоҷикистон ва ё наздиконаш то ҳол дастрас нест.
Бино ба гузориши расонаҳои Русия, Қурбонов рӯзи 16-уми апрел ва ҳамагӣ чанд соат пеш аз як барномаи ҳунарӣ дар кохи фарҳанги "София" дар Пятигорск дастгир шуд.
Ба нигоштаи онҳо, ӯ гуё ба воситаи интернет аз намояндагони ДОИШ дастур гирифта, қасди оташ задани кохи фарҳангро дошт ва барои ин чанд рӯз омодагӣ дидааст.
Тасдиқи он аз манобеи мустақил имконпазир нест, аммо расонаҳои давлатии Русия мегӯянд, "аз дасти ӯ се "коктейли Молотов", ду корду як табар ва бел гирифта шуд."
Додгоҳи низомии Русия дар моҳи апрели имсол сокини вилояти Томск Иля Катукияро барои омодагӣ ба ҳамлаи террористӣ ба 13 сол зиндон маҳкум кард.
Пештар як сокини вилояти Херсони Украина барои ҷосусӣ ва омодагӣ ба ҳамлаи террористӣ 18 сол зиндонӣ шуда буд.
Артиши Амрико як бандари муҳими шӯришиёнро дар Яман вайрон кард
Артиши Амрико як бандари муҳими сӯзишвориро дар Яман, ки дар ихтиёри шӯришиёни ҳусӣ буд, вайрон кардааст, то ин гурӯҳи зери ҳимояти Эронро аз даромади молӣ маҳрум кунад.
Шӯришиён дар навбати худ гуфтанд, ки дар ҳамлаҳои ҳавоӣ 20 кас кушта ва 50 тани дигар захмӣ шуданд.
Фармондеҳии марказии артиши Амрико рӯзи 17-уми апрел дар баёнияе эълон кард, ки "ҳамла ба мардуми Яман набуд".
"Ҳадафи ҳамла аз байн бурдани сарчашмаи молии ҳусиҳо буд, ки ҳамчунон ба истисмор ва эҷоди дарду ранҷ бар ҳамватанони худ идома медиҳанд," – гуфта шудааст дар баёния.
Иёлоти Муттаҳида рӯзи 15-уми марти имсол ҳамларо алайҳи шӯришиёни ҳусии Яман сар кард. Амрико шӯришиёни ҳусиро як гурӯҳи террористӣ медонад.
Қабл аз он Доналд Трамп, раисҷумҳури Амрико, ҳушдор дода буд, ки агар ҳусиҳо ҳамларо ба киштиҳои Иёлоти Муттаҳида ва мушакпарониро ба хоки Исроил бас накунанд, дӯзах ба сарашон чаппа хоҳад шуд.
Шӯришиёни ҳусӣ тайи тақрибан ду соли оъир даҳҳо бор ба киштиҳо ҳамла карда, иддао доранд, ки дар ҷанги Исроил бо “Ҳамос” (аз сӯи Амрико ва Иттиҳоди Аврупо созмони террористӣ дониста шудааст) дар Ғазза аз дувумӣ ҳимоят мекунанд.
Трамп гуфт, ки чаро ба иқдоми низомӣ алайҳи Эрон шитоб надорад
Доналд Трамп, раисҷумҳури Амрико, гуфт, ба назари ӯ Эрон ба музокирот моил аст ва биноан барои иқдоми низомӣ алайҳи ин кишвар шитоб надорад.
Вай рӯзи 17-уми апрел ин мавзуъро ҳангоми суҳбат бо сарвазири Итолиё баён кард.
Трамп бо ишора ба гузориши "Ню Йорк Таймз" дар мавриди мухолифаташ бо ҳамлаи Исроил ба таъсисоти ҳастаии Эрон гуфт, "намегӯям, ки ҳамларо рад кардам, аммо барои анҷоми он шитоб надорам."
Раисҷумҳури Амрико бо ишора ба музокироти ахири миёни Эрону Иёлоти Муттаҳида дар Умон афзуд, беҳтар медонад, ки масъала бо гуфтушунид ҳал шавад.
“Танҳо хостаи мо ин аст, ки Эрон ба силоҳи ҳастаӣ даст наёбад,” – афзуд ӯ.
Президенти Амрико борҳо таҳдид кардааст, ки агар ин созиш ҳосил нашавад, Эрон зери таҳримҳои дугона монда, бомбаборон хоҳад шуд ва дар ин роҳ Исроил низ шарик мешавад.
Намояндагони Эрон ва Амрико даври аввали гуфтугӯро дар Умон “созанда ва мусбат” хонданд. Даври дувум қарор аст дар пойтахти Итолиё баргузор шавад.
Русия "Толибон"-ро аз рӯйхати созмонҳои террористӣ берун кард
Додгоҳи олии Русия рӯзи 17-уми апрел пешниҳоди Додситонии кулли ин кишварро пазируфт ва гурӯҳи “Толибон”-ро аз феҳрасти созмонҳои террористӣ берун кард.
Ин қарор метавонад заминаи ҳуқуқиро барои ҳамкориҳои бештар ва сармоягузорӣ фароҳам биорад, аммо ба маънои эътирофи ҳукумати “Толибон” ё Аморати исломии Афғонистон нест.
Русия дар соли 2003 фаъолияти “Толибон”-и Афғонистонро дар қаламраваш манъ ва барои ҳама гуна ҳамкорӣ бо ин гурӯҳ ҷазо таъйин карда буд.
Ҷангҷӯёни “Толибон” дар тобистони соли 2021, пас аз хуруҷи нерӯҳои байнулмилалӣ, бори дувум зимоми қудратро дар Афғонистон ба даст гирифтанд.
То кунун ҳеч кишвару созмоне ҳукумати онҳоро ба расмият нашинохтааст. Аксар давлатҳо риояи ҳуқуқи одамон, бавижа иҷозаи таҳсилу кори занон, озодии баёну виҷдон ва ташкили ҳукумати фарогирро аз шартҳои асосӣ медонанд.
То кунун Қазоқистон ва Қирғизистон номи "Толибон"-ро аз қатори созмонҳои террористӣ гирифта, Туркманистону Узбекистон аз оғоз бо “Толибон” равобити нарм доранд ва ин гурӯҳро “террористӣ” ном намебаранд.
Шавкат Мирзиёев, раисҷумҳури Узбекистон, дар остонаи Нишасти сарони кишварҳои Осиёи Марказӣ ва Иттиҳоди Аврупо дар оғози моҳи апрел гуфт, Афғонистонро набояд танҳо гузошт ва ба он ёрӣ кард.
Тоҷикистон сарфи назар аз ҳамкориҳои ошкору пинҳоне, ки то кунун бо ҳукумати “Толибон” дар Афғонистон дорад, ҳанӯз ин ҳаракатро дар феҳрасти созмонҳои мамнуъ ва террористӣ нигаҳ медорад.
Изҳороти ВКХ-и Русия ва хашми фаъолони маданӣ дар Қирғизистон
Вазорати корҳои хориҷии Русия эълон кард, ки тафтиши ҳаммоме дар шаҳри Маскав зидди шаҳрвандони ягон кишвари мушаххасе равона нашуда буд. Ин амалиёт 10-уми апрел дар ҳаммоми "Бодрост" дар ноҳияи Тимирязеви пойтахти Русия гузашт.
Вазорат мегӯяд, он тибқи нақша доир шуда, 59 кас аз ҳаммом ба идораи полис интиқол ёфтанд. Аз ин байн 25 нафар барои вайрон намудани шароити будубоши шаҳрвандони хориҷӣ дар Русия ба ҷавобгарӣ кашида мешаванд.
Нашри наворҳои амалиёти полиси Русия дар ҳаммоми соҳибкори қирғиз, ки дар миёни муҳоҷирон маъруф будааст, боис ба эътирозҳои шадид дар ҷомеаи Қирғизистон шуд.
Фаъоли маданӣ Урмат Ҷонибоев гуфт: "Ман чун шаҳрвандони дигари Қирғизистон мунтазири вокуниши Вазорати корҳои хориҷии кишвар ҳастам. Ин худсарии мақомоти Русия нисбат ба шаҳрвандони мо ва умуман муҳоҷирон набояд ба ин ишакл идома кунад. Бо назардошти он чизе, ки дар Русия дар муқобили муҳоҷирон аз Осиёи Марказӣ раво дида мешавад. Бояд таъкид кунам, ки раҳоӣ аз натсизм на ба Украина, балки ба Русия зарур аст."
Тафтиши таҳқиромези муҳоҷирони қирғиз дар ҳаммоми Маскав вокуниши ҷиддии вакилони Қирғизистонро ҳам ба бор овардааст.
Ҷанар Оқоев, вакили "Жогорку Кенеш", мегӯяд, "мехоҳам латукӯби донишҷӯёни покистониро хотирнишон кунам, ки дар кишвари мо рӯй дода буд. Муовини сарвазири мо бо покистониҳо вохӯрда, аз онҳо узр хост. Фаъолони қирғиз ба онҳо ғизо бурда, маъзарат хостанд. Вазири умури хориҷии Покистон ба Бишкек омаду сарвазири Покистон ибрози нигаронӣ кард. Сарвазири мо чӣ кор кард? Ҳатто вақте покистониҳоро заданд, ман ҳам ба майдон баромада, гуфтам: "Ба хориҷиҳо нарасед! Агар табаҳкорӣ карда бошанд, тибқи қонун ҷавоб медиҳанд." Оё дар Русия ягон мансабдор чизе гуфт? Оё ягон нафари онҳо изҳори таассуф кардааст?"
Видеоро дар инҷо бинед:
Баъд аз юриши полис соҳиби ҳаммом наворҳоеро нашр намуда, ёдовар шуд, ки таҳқир ва латукӯби муҳоҷирон панҷ соат идома ёфт. Ҳамзамон бо он, афсарони рус ба мисли ғоратгарон хазинаи ҳаммомро боз ва таҷҳизоти онро тахриб кардаанд.
Хабаргузории "Интерфакс"-и Русия аз нақли Омбудсмен ё Ваколатдори ҳуқуқи башари Қирғизистон Ҷамила Ҷамонбоева навишт, ки амалиёт дар ҳаммоми Маскав аз тарафи Идораи додситонӣ ва хадамоти муҳоҷират тафтиш хоҳад шуд.
Ҷамонбоева ин масъаларо бо Ваколатдори ҳуқуқи башари Русия Татяна Москалкова баррасӣ кардааст. Вай ба мақомдори рус дар бораи муомилаи номуносиби хадамоти марзбонӣ ва гумруки Русия бо муҳоҷирон дар фурудгоҳҳо низ ишора кардааст.
"16 кас маҷруҳ шуд." Ҷаласаи изтирорӣ дар робита ба зилзилаи Рашт
Ҳукумати Тоҷикистон пас аз чор рӯзи заминларзаи вайронгар дар Рашту Тоҷикобод дар ҷаласае изтирорӣ эълон кард, ки "як кас ҷон бохт ва шонздаҳ нафар маҷруҳ шуд".
Бино ба омори нав, дар ин ду ноҳия 65 хона пурра ва 193 хона қисман вайрон шуда, ба 150 манзили дигар осеби сабук расидааст.
Инчунин, "193 иншоот, аз ҷумла як бемористони минтақаӣ, ду бунгоҳи тиббӣ ва ҳашт мактаб зарар диданд".
Эмомалӣ Раҳмон, раисҷумҳури Тоҷикистон, рӯзи 17-уми апрел хостааст, ба оилаҳое, ки хонаҳояшонро пурра аз даст доданд, дар маконҳои амн замин бидиҳанд. Ва манзили нави онҳо бояд то моҳи ноябри имсол бунёд шавад.
Тибқи навиштаи торнамо ё вебсайти президент, ширкати давлатии "Тоҷиксуғурта" якҷо бо ҳукуматҳои Рашту Тоҷикобод вазифадор шуданад, ки "ба ҳар зарардида маблағ диҳанд."
Минтақаи Рашт дар гузашта ҳам шоҳиди заминларзаҳои сахте шуда, соли 2020-2021 бар асари зилзила панҷ сокини Тоҷикобод ба ҳалокат расидаву наздик ба шаст хона дар чаҳор деҳаи ин ноҳия осеб диданд.
Заминҷунбиҳо дар ин минтақа фоҷиаи 10-уми июли соли 1949-ро ёдрас карданд, ки чун зилзилаи Ҳоит маъруф буда, сабаби марги 32 ҳазор нафар гашта буд. Аз он вақт бунёди манзил дар ин ҷо талаботи хос дорад, ки на ҳамеша риоят мешавад.
