Даҳҳо тан аз моликони мошинҳои дорои рақами қайди давлатии хориҷӣ дар шаҳри Алматои Қазоқистон рӯзи 24-уми феврал аз мақомот хостанд, ки мошинҳои воридкардаи онҳоро афв ва пардохтҳои дигарро барояшон кам кунанд.
Онҳое, ки аз Қирғизистон ва Арманистон ба Қазоқистон мошин ворид кардаанд, аз раиси маҷлиси Қазоқистон Нурлан Нигматулин хостанд, ки иқдоми моликони мошинҳоро ҷонибдорӣ кунад.
"Кӣ ин пардохтҳои миллиониро фикр кардааст? Пардохтҳое, ки аз арзиши худи мошинҳо бештар ҳастанд. Ин ҳисобу китобҳо аз куҷо пайдо шудаанд? Сокинон имкони пардохти ин маблағҳоро надоранд. Ҳаҷми маош бо омори расмӣ мувофиқат намекунад. Талаби мардум чунин аст - ҳамаи мошинҳои то 1-уми феврал воридшуда қонунӣ гардонида шаванд ва ройгон дар сабти Қазоқистон гузошта шаванд",-гуфт Талгат Тилеубеков, яке аз моликони чунин мошинҳо.
Нурлан Нигматулин, раиси порлумони Қазоқистон оғози моҳи феврал аз тасмими мақомоти кишвараш дар мавриди мошинҳои дорои рақами қайди давлатии хориҷӣ интиқод карда буд.
Моҳи январи соли ҷорӣ мақомоти Қазоқистон аз моликони мошинҳои дорои қайди давлатии Қирғизистону Арманистон дархост карда буд, ки мошинҳояшонро дар қайди Қазоқистон гузоранд ва пардохтҳои гумрукӣ, андоз ва дигар навъи пардохтҳоро супоранд. Онҳое, ки чунин мошинҳоро ду соли пеш ворид кардаанд, мақомот пешниҳод намуданд, ки барои 30 рӯз ба хориҷ аз кишвар баранд ва ё дар хориҷ онҳоро фурӯшанд.
Аз он замон то кунун моликони мошинҳои дорои рақами қайди хориҷӣ аз мақомот талаб доранд, ки тасмимашонро бозбинӣ кунанд.
Ба иттилои мақомоти Қазоқистон, ба ин кишвар аз Арманистон, Қирғизистон, Белорус ва Русия - кишварҳои узви Иттиҳоди иқтисодии Авруосиё - бештар аз 170 ҳазор воситаи нақлиёт ворид шудааст.
