Дориюши Раҷабиён хабарнигори шинохтаи тоҷик сазовори ҷоизаи байналмилалии “Қанди порсӣ” шудааст. Ҷоизаро рӯзи 23-уми феврал дар Рӯзи байналмилалии забони модарӣ дар шаҳри Лондон, дар Ҳамоиши байналмилалии порсизабонон ба Дориюши Раҷабиён супурданд.
Конуни ҳамёрии порсизабонон аз баргузоркунандагони ҳамоиш ҷоизаро барои таъсиси гурӯҳи “Забони порсӣ” дар Фейсбук ва маҷаллаи “Забони порсӣ” дар Тоҷикистон ба хабарнигори тоҷик сазовор донистааст.
Дар гурӯҳи “Забони порсӣ” дар Фейсбук, ки бештар аз 12 ҳазор узв дорад ва 9 сол пеш таъсис ёфтааст, доир ба забони форсӣ, мушкилот дар забон дар Тоҷикистон ва рафъи хатоҳои роиҷ баҳс мешавад. Дориюши Раҷабиён айни замон дар бахши форсии Би Би Си дар Лондон кор мекунад. Ҷоизаи “Қанди порсӣ” ба афроде дода мешавад, ки дар ҳифзу ривоҷи забони форсӣ саҳм мегиранд.
