Пайвандҳои дастрасӣ

Хабари нав

Хабарҳо

Марзбонони Узбекистон 13 шаҳрванди Қирғизистонро боздошт карданд

Марзбонони Узбекистон дар наздикии вилояти Ботканд 13 шаҳрванди Қирғизистонро боздошт карданд. Хадамоти давлатии марзбонии Қирғизистон гуфт, ки сокинони деҳаи Чекелик дар водии Фарғона рӯзи 19 феврал ба ҳангоме боздошт шуданд, ки “ногаҳон вориди хоки Узбекистон шуданд”. Намояндагии Хадамоти марзбонии Қирғизистон дар вилояти Ботканд гуфт, ки “ҳуввияти шаҳрвандони Қирғизистон, ки аз ҷониби марзбонони узбек боздошт шуданд, мушаххас шуда, музокирот барои озод кардани онҳо ҷараён дорад”.

Водии Фарғона дар ҳудуди се кишвари ба ҳам ҳамсояи Қирғизистон, Узбекистон ва Тоҷикистон ҷойгир аст ва як мушкили баъди пошхӯрии Шӯравӣ дар соли 1991 ин номуайн будани хатҳои марз дар миёни кишварҳо мебошад. Бисёр қаламравҳои баҳсӣ дар макони зисти аҳолии зиёд ҷойгир мебошанд.

Қисмати марзии наздики деҳаи Чекелик баҳсӣ нест, вале як макони убуру мурури бисёр сокинони маҳаллӣ ба шумор меравад.

Моҳи гузашта баъди он ки дар марзи Тоҷикистону Қирғизистон як моҷарои миёни сокинони ду кишвар бархост, мақомоти Қирғизистон беш аз 250 сокини деҳоти вилояти Боткандро ба макони дарунтар ба кишвар интиқол доданд. Дар моҷарои марзии декабри соли гузашта ҳам ҳудудан даҳ нафар аз сокинони Тоҷикистону Қирғизистон маҷрӯҳ шуданд ва дар хушунатҳои марзии моҳи сентябри порсол чор нафар кушта шуд.

Ҳамаи хабарҳои имрӯзро дар инҷо бихонед

Ҳушдори нави Доналд Трамп ба Эрон ва ҳампаймононаш

Доналд Трамп

Доналд Трамп, президенти Амрико, ба Эрон ҳушдор дод ва гуфт, агар Эрон ё ҳампаймононаш ба нерӯҳои Иёлоти Муттаҳида ва дороиҳояш дар Ироқ ҳамла кунанд, бо баҳои гарон пардохт хоҳад кард.

Трамп рӯзи 1-уми апрел дар Твиттер навишт, "аз рӯи маълумот ва бовар, Эрону гуруҳҳои наздик ба он дар ҳоли тарҳрезии ҳамлаи ғофилгиронае ба нерӯҳои ИМА ва дороиҳояш дар Ироқ ҳастанд."

Вай афзудааст: "Агар чунин шавад, дар ҳақиқат Эрон бо баҳои гарон пардохт хоҳад кард!"

Аммо ҳамоно рӯшан набуд, ки оё Трамп гуфтанӣ аст, Иёлоти Муттаҳида воқеан дар бораи ин нақша маълумоти кофӣ дорад, ё не. Иёлоти Муттаҳида дар давоми соли гузашта шибҳанизомиёни таҳти ҳимояти Эронро дар ҳамла ба пойгоҳҳои низомии Ироқ айбдор кард, ки мизбони нерӯҳои эътилофӣ ва сафоратхонаҳои хориҷӣ, бахусус намояндагии Иёлоти Муттаҳида мебошад.

Чанд соат пеш аз навиштаҳои Трамп, ёрдамчии калони раҳбари олии Эрон Оятуллоҳ Алии Хоманаӣ Иёлоти Муттаҳидаро аз оқибатҳои "амалҳои иғвогаронааш" дар Ироқ ҳушдор дода буд.

11-уми март аз ҳамлаи мушакӣ ба пойгоҳи Ироқ ду сарбози ИМА ва як сарбози бритониёӣ кушта шуданд, ки шиддатро дар минтақа афзуд. Касе масъулияти ин ҳамларо ба дӯш нагирифт. Ин ҳамла пас аз ҳуҷуми ҳавоии ИМА ба гурӯҳи тарафдори Эрон “Катойиби Ҳизбуллоҳ" буд.

Президенти Филиппин: дар сурати муқобила нишон додан, гирифторони вирус "кушта шаванд"

Родриго Дутерте, раиси ҷумҳури Филиппин.

Родриго Дутерте, президенти Филиппин гуфт, ки ба пулис ва артиш дастур додааст, дар сурати муқобила нишон додан ва таҳдид ба ҳаёти кормандони мақомот, гирифторони вируси корона "кушта шаванд".

"Фармони ман ба пулис ва артиш: агар чунин мушкиле мавҷуд аст ва агар чунин ҳолат пеш ояд, ки онҳо муқобила нишон диҳанд ва ба ҳаёти шумо хатар эҷод кунанд - кушед. Фаҳмост? Кушед", - гуфт Дутерте дар як муроҷиати телевизионӣ.

Вай шарҳ дод, чунин дастур ба касоне ҳам дахл дорад, ки ба карантин фиристода шуданд, аммо онро риоя накарданд.

Роҳбари пулиси миллӣ гуфт, президент дар суханрониаш "ҷиддӣ будани интизоми ҷамъиятиро ба намоиш гузошт" ва дар воқеъ пулис ба сӯи касе тир нахоҳад кушод.

Ба иттилои расмӣ, то ин замон дар Филиппин 96 сокин аз вируси корона фавтида ва бештар аз 2300 кас ба он гирифтор шудааст. Аммо ин омор метавонад, ба далели камбуди дастгоҳҳои ташхис, нокомил бошад.

"Вазъ бадтар мешавад. Аз ҳамин хотир ман бори дигар аз ҷиддӣ будани мушкил ёдовар мешавам ва шумо бояд ба ҳарфи ман гӯш диҳед", - гуфт Дутерте дар муроҷиати телевизиониаш.

Дутерте пештар аз ин ҳам ба содир кардани хушунат даъват карда буд. Барои мисол, вай дар як мусоҳиба дар соли 2015 гуфта буд: "Агар зарурати куштан (-и одам) пеш ояд - ман мекушам".

Узбекистониҳои аз 65-сола болоро аз ҳаққи кӯча баромадан маҳрум карданд

Кӯчаҳои холии Тошканд.

Дар Узбекистон сар аз 1-уми апрел афроди аз 65-сола боло иҷозаи аз хона баромаданро надоранд. Ба наздиктарин мағоза ва ё дорухона рафтан истисност.

Комиссияи махсуси ҷумҳуриявии мубориза зидди вируси корона чунин қарор қабул кард.

"Сар аз 1 апрел шаҳрвандони аз 65-сола боло хонаҳояшонро набояд тарк кунанд. Ба мағоза ва ё дорухонаи наздики манзил рафтан истисност", - хабар додааст комиссия.

Ба иттилои вазорати тандурустии Узбекистон, 190 шаҳрванди ин кишвар мубтало ба коронавирус шудаанд. Аз ин шумор 12 кас шифо ёфт, ду тан вафот кардааст.

Шумораи гирифторони коронавирус дар Қазоқистон аз 400 нафар гузашт

Яке аз бемористонҳои Қазоқистон.

Вазорати тандурустии Қазоқистон аз сабти 16 ҳолати нави гирифторӣ ба коронавирус дар ин кишвар хабар дод. Дар маҷмӯъ, то 2-юми рӯзи апрел дар Қазоқистон 402 ҳолати гирифторӣ сабт шудааст.

Дар пайи гирифторӣ аз вируси нав дар Қазоқистон се кас фавтида ва дар маҷмӯъ 26 каси дигар шифо ёфтааст.

Ҳамзамон, нахустин кӯмаки башарии Чин ба фурудгоҳи шаҳри Алматои Қазоқистон расид. Чин васоили тиббӣ ва таҷҳизот ирсол кардааст. Интизор меравад, ки рӯзҳои наздик қисмати дувуми кумаки Чин ба Қазоқистон расад.

Таби баланди писари табиб дар таваллудхонаи Андиҷон ҳангома барпо кард

Беморхонаи вилоятии Андиҷон. Акс аз бойгонӣ.

Сардори шуъбаи эҳёгарии беморхонаи вилояти Андиҷони Узбекистон 27 март писари 29-солаи худро бо таби баланд барои табобат ба таваллудхона бурдааст. Дар ин бора яке аз табибони беморхона иттилоъ дод.

"Ҳамкори мо дониста ҷони табибон, ҳамшираҳо, модарон ва тифлони навзодро дар таваллудхона зери хатар гузошт. Ӯ 27 март писарашро бо нишонаҳои гирифторӣ ба коронавирус ба беморхона оварда, 15 соат дар утоқи корияш нигаҳ дошт. Ҳамшираҳоро маҷбур кард, ки барои поин бурдани таби писараш сӯзандору кунанд. Ҳарчанд мо медонистем, ки ҳамсари ӯ аз 25 март бо гумони мубталошавӣ ба вирус дар карантин аст", - изҳор дошт ҳамсуҳбати мо.

Як ҳамшира аз беморхонаи Андиҷон ба шарти ифшо нашудани номаш гуфт, баъди он ки сардори бахш писарашро бо таби баланд овард, дар миёни кормандони бемористон ҳангома бархост.

"Ҳамкорон ба маркази санитарӣ-эпидемиологӣ занг заданд. Кормандони марказ ба беморхона омада, чандин бор ба сардори бахш занг заданд, вале ӯ телефонро набардошт. Хостанд, ба утоқи корияш дароянд. Вале дари он баста буд. Кормандони марказ ҳамаи табибону ҳамшираҳоро ба карантин гирифта, як рӯз баъд пас аз ташхис ҷавоб доданд. Ҳоло талош доранд, ки ин ҳодисаро пинҳон кунанд",-афзуд ӯ.

Сардухтури беморхонаи вилояти Андиҷон Гулмира Қаюмова рух додани ҳодисаи мазкурро дар бахши эҳёгарӣ тасдиқ кард. ​"Бале, сардори бахш бо овардани писараш дар он ҳолат ба бемористони мо кори нодуруст кардааст. Ин масъала мавриди баррасӣ қарор дорад", - изҳор дошт ӯ.

Иктишофии ИМА: Чин роҷеъ ба коронавирус воқеиятро нагуфт

Як марди чинӣ дар Вуҳани Чин, 30 март, 2020.

Хадамоти иктишофии ИМА дар як гузориши махфии худ ба Кохи Cафед гуфтааст, маълумоти расмии мақомоти Чин дар бораи шумори мубталоён ва қурбониёни коронавирус дур аз ҳақиқат аст. Дар ин бора Bloomberg иттилоъ додааст.

Манбаъҳои Bloomberg иттилои бештареро дар бораи гузориш пешниҳод накардаанд. Мақомоти Чин гуфтанд, ҷамъан 82 ҳазор сокини ин кишвар ба коронавирус, ки охирҳои моҳи декабри соли гузашта дар Вуҳан ошкор гашт, мубтало шуда, 3 ҳазору 300 кас ҷон бохтаанд.

Дар ИМА беш аз 200 ҳазор нафар ба коронавирус гирифтор шуда, зиёда аз 4 ҳазор одам ҷон бохтаанд. "Гап сари он аст, ки агар Чин воқеиятро мегуфт, ҳоло вазъ беҳтар буд", - изҳор дошт муовини президенти ИМА Майк Пенс рӯзи чоршанбе дар суҳбат бо CNN. Ба гуфтаи ӯ, эҳтимолан, ҷаҳон як моҳ баъд огаҳ шуд, ки ин вирус дар Чин ошкор шудааст.

Муовини президенти ИМА изҳор дошт, ки гузориши хадамоти иктишофиро то ҳол дарёфт накардааст, вале ба гуфтаи ӯ, омори пешниҳодии Пекин дар бораи қурбониёни коронавирус "шубҳанок" менамояд.

Рӯзҳои ахир хабарҳое паҳн мешаванд, ки аз бештар будани шумораи қурбониён назар ба омори пешниҳодии Пекин дарак медиҳанд. Бино ба баъзе аз хабарҳо, шумори қурбониён дар Чин беш аз 4 ҳазор нафар аст.

Додгоҳи Покистон ҳукми марг барои куштори Даниэл Перлро бекор кард

Вакили дифои Саидшайх - Хваҷа Навид рӯзи 2 апрел ба журналистон ҳукми додгоҳро хабар дод

Рӯзи 1 апрел як додгоҳи покистонӣ ҳукми қаблии марг ва иттиҳоми кушторро барои як ҷангҷӯи зодаи Бритониё дар қазияи қатли журналисти амрикоӣ Дениэл Перл бекор кард. Вакили дифоъ Хваҷа Навид гуфт, ки бар асоси қарори бозбинишуда дар Додгоҳи Олии вилояти Синдҳ, Аҳмад Умар Саидшайх барои одамрабоӣ гунаҳгор ва ба 7 соли зиндон маҳкум шудааст. Азбаски Саидшайх аз соли 2002 дар зиндон буд, интизор меравад, ки озод шавад, вале ҳанӯз ҳукми додгоҳ дар ин замина содир нашудааст.

Даниэл Перл 38 сол дошт, ки ваҳшиёна кушта шуд. Масъулияти кушторро ба ифротгароҳои исломӣ вогузор карданд
Даниэл Перл 38 сол дошт, ки ваҳшиёна кушта шуд. Масъулияти кушторро ба ифротгароҳои исломӣ вогузор карданд


Перли 38-сола раиси дафтари намояндагии Осиёи Ҷанубии нашрияи The Wall Street Journal буд. Ӯ соли 2002 аз ҷониби ҷангҷӯёни ифротӣ рабуда ва сараш аз тан ҷудо карда шуд. Саидшайх худи ҳамон соли 2002 боздошт ва аз ҷониби додгоҳи зиддитеррористӣ ба ҳукми марг маҳкум шуд. Се нафари дигар аз рӯи ин қазия ҳукми зиндони абад гирифтанд. Ба гуфтаи Навид, ин се нафар ҳам бар асоси қарори нави додгоҳ аз иттиҳом озод шуданд.

Сенатори амрикоӣ Ҳизби коммунистии Чинро дар “дурӯғгӯӣ” муттаҳам кард

Бен Сасс намояндаи ҷумҳурихоҳҳо аз Небраска ва узви Кумитаи иттилооти Сенат аст

Як сенатори амрикоӣ Ҳизби коммунисти Чинро дар дурӯғгӯиву пахши “таблиғоти ифлос” дар бораи хуруҷи коронавирус муттаҳам кард. Сенатор Бен Сасс дар изҳороте рӯзи 1 апрел гуфт, “иддаои ин ки дар ИМА шумори марги инсонҳо дар паи коронавирус бештар аз Чин аст, як дурӯғ аст”. Ин намояндаи ҷумҳурихоҳҳо аз Небраска ва узви Кумитаи иттилооти Сенат изҳороти худро баъди он нашр кард, ки оҷонсии Блумберг гуфт, ҳафтаи гузашта Кумитаи иттилооти Сенат ба Кохи Сафед гузорише ироа кард. Сасс гуфт, ки иттилооти махфиро шарҳ намедиҳад, вале “воқеияти дарднок ин аст, ки Ҳизби коммунисти Чин ба хотири ҳимояти режим дурӯғ мегуфт, мегӯяд ва хоҳад гуфт”. Сасс гуфт, ки “таблиғоти ифлоси” Чин набояд аз ҷониби Созмони ҷаҳонии беҳдошт, журналистони мустақил ваё “эпидемиологҳои амрикоӣ, ки дар паи мубориза бо ин вирус ҳастанд, ҷиддӣ қабул шавад”.

ИМА вуруди маводи тиббӣ аз Русияро тасдиқ кард

Ҳавопаймои нирӯҳои ҳавоии Русия дар фурудгоҳи Ҷон Кеннедии Ню-Йорк фуруд омад. 1 апрел

ИМА тасдиқ кард, ки дар паи сӯҳбати телефонии оғози ҳафтаи ҷории президентони ИМА ва Русия - Доналд Трамп ва Владимир Путин - ҳавопаймое бо маводи тиббӣ аз Русия ба Амрико расид. Департаменти давлатии ИМА дар изҳороташ рӯзи 1 апрел гуфт, ки дар миёни ёриҳои ба Оҷонсии мудирияти изтирории ИМА супурдашуда дар Ню-Йорк васоили нафаскашӣ ва ҳифозати инфиродӣ мебошад. Морган Ортагус, сухангӯи Департаменти давлатӣ гуфт, ки ин кӯмакҳо баъди сӯҳбати рӯзи 30 марти Трамп ва Путин фиристода шуд ва гуфт, ки ин кишварҳо дар гузашта ҳам дар ҳолатҳои бӯҳронӣ ба ҳамдигар ёриҳои башардӯстона карда, “бешубҳа, дар оянда ҳам ироа хоҳанд кард”. Дар изҳороти ӯ гуфта нашуд, ки оё ИМА барои ин ёриҳо ба Русия чӣ миқдор маблағ пардохт кардааст ва то куҷо ба интиқодҳо дар заминаи ин ки Русия ёриро барои паҳн кардани хабарҳои дуруғини таблиғотӣ истифода мекунаду аз ин роҳ обрӯи Путинро дар дохил боло мебарад, вокуниш кардаанд.

Вазирони хориҷаи НАТО пандемияи коронавирусро баррасӣ мекунанд

Қароргоҳи НАТО дар Брюссел

Дар як ҷаласаи вазирони хориҷаи кишварҳои узви НАТО рӯзи 2 апрел вокуниши кишварҳо ба пандемияи коронавирус баррасӣ мешавад. Паймони низомии Атлантикаи Шимолӣ, ки аввалин бор дар таърихи 70-солааш ҷаласаро тавассути видео-конфронс барпо мекунад, гуфтааст, ки барои ҳимояти худ аз ҳама таҳдидҳо омода аст. Формати интернетии ташкили ҷаласа бо сабаби маҳдудият дар ҳаракату тамосҳои рӯбарӯи мардум интихоб шудааст. 30 вазири хориҷӣ қарор аст вокуниши ҳамоҳангшуда ба таҳдидҳои пандемияро баррасӣ бикунанд. Йенс Столтеберг, дабири кулли НАТО дар изҳороти рӯзи 1 апрелаш гуфт, “ҳадафи аввалиндараҷаи мо ин аст, ки бӯҳрони беҳдоштӣ ба як бӯҳрони амниятӣ табдил нашавад”. НАТО дар самти мубориза бо паҳншавии хабарҳои дурӯғини таблиғотӣ ҳам кор мекунад, чун бисёриҳо ангушти иттиҳомро ба сӯи Русияву Чин баланд кардаанд. Дар ҷаласаи НАТО ҳамчунин вазъ дар Ироқу Афғонистон баррасӣ шуда, узвияти Македонияи Шимолӣ дар ҳайати ин паймон шурӯъ аз ҳафтаи гузашта истиқбол хоҳад шуд.

Қирғизистон барои вайронкунандагони ҳолати фавқулодда ҷарима таъйин кард

Порлумони Қирғизистон, 1 апрел,2020.

Порлумони Қирғизистон рӯзи 1-уми апрел ба Кодекси ҷиноӣ, Кодекс дар бораи бадрафторӣ ва Кодекс дар бораи қонуншиканиҳо, тағйирот ворид кард. Бар асоси ин тағйирот, ҳамакнун барои вайронкунандагони тартиботи ҳолати фавқулодда ҷарима ва дигар навъи муҷозот таъйин шуд.

Ба ин тартиб, барои вайронсозии барқасдона ва ё ноогоҳонаи талаботи санитариву беҳдоштӣ, ки боиси мубталошавии дастаҷамъӣ, заҳролудшавии оммавӣ ва ё зиёни ҷиддӣ мегардад, аз 120 ҳазор сом (наздики 1,5 ҳазор доллар) то 300 ҳазор сом ҷарима ва ё аз 1,5 то 5 соли зиндон пешбинӣ шудааст.

Ин дар ҳолест, ки Памирбек Асанов, муовини вазири корҳои дохилии Қирғизистон гуфт, то кунун касе барои вайрон кардани талаботи ҳолати фавқулодда ҷарима нашудааст, зеро дар қонунгузории он кишвар то ҳол чунин меъёре мавҷуд набуд.

Дар се шаҳр ва се ноҳияи калонтарини Қирғизистон сар аз 25-уми март ҳолати фавқулодда эълом шудааст. Рӯзона гардиши одамон ва нақлиёт маҳдуд ва шабона - аз соати 20:00 то 07:00 қуюди шабгардӣ эълом шудааст.

Дар Узбекистон болоравии қимати аз пеш таъйиншудаи бензину газ бекор шуд

Як нуқтаи фурӯши сӯзишворӣ дар Узбекистон.

Дар Узбекистон қимати бензин, сӯзишвории дизелӣ ва газ то охири сол боло бурда нахоҳад шуд. Дар ин бора вазорати молияи он кишвар иттилоъ дод.

"То охири сол ҳаҷми кунунии андози аксизии машрубот, маҳсулоти алкулӣ, аз ҷумла шаробу оби ҷав, инчунин аксиз аз истифодаи бензин, сӯзишвории дизелӣ ва газ нигаҳ дошта мешавад",-омадааст дар хабари вазорат.

Ин ҳам дар ҳолест, ки қарор буд аз 1-уми апрели соли 2020 қимати ин маҳсулот боло равад.

Бори охир дар Узбекистон қимати газ, барқ, оби гарм, инчунин нақлиёти ҷамъиятӣ, 15-уми августи соли 2019 боло рафта буд.

Дар Андиҷон бо вуҷуди карантин кӯчаҳоро барои омадани Мирзиёев тоза мекунанд

Андиҷон, Узбекистон.

Садҳо сокини шаҳри Андиҷони Узбекистон бо вуҷуди эъломи карантин аз 27-уми марти соли равон ба ин сӯ иҷборан ба ҳашари умумӣ мебароянд.

Як корманди ҳукумати вилояти Андиҷон гуфт, қарор аст, президенти Узбекистон Шавкат Мирзиёев барои иштирок дар маросими ифтитоҳи нахустин корхона дар минтақаи озоди иқтисодии "Андиҷон-фарм" ба он вилоят сафар кунад.

Минтақаи озоди иқтисодии "Андиҷон-фарм" соли гузашта дар масоҳати 52 гектар дар ноҳияи Андиҷони Узбекистон ташкил шудааст.

Яке аз соҳибкорони наздик ба ҳукумати вилояти Андиҷон ва огаҳ аз рафти корҳо дар минтақаи озоди иқтисодии мазкур гуфт, аз ҳамаи лоиҳаҳои ваъдашуда то ҳол дар он минтақа танҳо як озмоишгоҳ бунёд шудааст.

Чанд рӯзи ахир дар кӯчаи марказии Андиҷон, ки қарор аст аз он президенти Узбекистон гузарад, корҳои тозакунӣ ва ободонӣ идома доранд.

Bloomberg: Русия истихроҷи нафтро афзоиш намедиҳад

Русия сар аз 1-уми апрел истихроҷи нафтро афзоиш нахоҳад дод. Дар ин бора Bloomberg бо истинод ба манбаъҳои худ иттилоъ додааст. Ба гуфтаи ҳамсуҳбатони Bloomber, ин тасмим дар "ҷанги нархгузорӣ" бо Арабистони Саудӣ, ишораи сулҳомез хоҳад буд.

Ҳамсуҳбатони Bloomberg гуфтаанд, Риёз истихроҷи нафтро пас аз ба ҳам задани созишномаи ОПЕК дар ибтидои моҳи март афзоиш медиҳад. Арабистони Саудӣ коҳиши истихроҷи нафтро ба хотири ҳифзи иқтисод дар пасманзари сирояти коронавирус пешниҳод карда буд. Вале Русия ин пешниҳодро рад кард. Дар натиҷа арзиши нафт то 50 дарсад поин рафт.

Як мақоми баландпояи Русия дар суҳбат бо Bloomberg изҳор доштааст, ки дар вазъияти кунунӣ афзоиши истихроҷи нафт аз сӯи кишвараш маъно надорад. Ин дар ҳолест, ки вазири энержии Русия Александр Новак пештар гуфта буд, ин кишвар истихроҷи нафтро то ба 200-300 ҳазор бушка дар як рӯз зиёд мекунад.

Президенти ИМА Доналд Трамп рӯзи 3-юми март гуфта буд, Вашингтон ба хотири пешгирӣ аз поинравии нархи нафт бо Москва ва Риёз гуфтугӯ мекунад. Ӯ аллакай ин масъаларо дар суҳбати телефонӣ бо ҳамтои русаш Владимир Путин ва валиаҳди Саудӣ Муҳаммад ибни Салмон матраҳ кард. Ба гуфтаи Трамп, ҷонибҳо барои гуфтугӯ омодаанд.

Барканории ду мансабдори қирғиз барои нокомӣ дар пешгирӣ аз коронавирус

Космосбек Чолпонбоев, собиқ вазири тандурустии Қирғизистон.

Сооронбой Ҷеенбеков, раиси ҷумҳури Қирғизистон, муовини нахуствазири ин кишвар Олтиной Омурбекова ва вазири тандурустӣ Космосбек Чолпонбоевро аз мақомҳояшон барканор кард. Фармони барканории ин ду мақоми баландпояи қирғиз рӯзи 1-уми апрел имзо шуд.

Оқои Ҷеенбеков рӯзи 31-уми март дар як ҷаласа аз фаъолияти Ситоди ҷумҳуриявӣ ва вазорати тандурустӣ дар умури пешгирӣ аз густариши вируси корона, интиқод кард. Ӯ афзоиши шумораи гирифторон ба ин бемориро натиҷаи талошҳои номуваффақи масъулин донист.

Тибқи иттилои расмӣ, то субҳи 1-уми апрел дар Қирғизистон 111 ҳолати гирифторӣ ба вируси нав сабт шудааст. 11 нафари ин гирифторон кӯдакон мебошанд. Бештари аз гирифторон дар ҷануби он кишвар қарор доранд.

Дар ҳамин ҳол, дар Қазоқистон -- ҳамсоякишвари Қирғизистон, севумин ҳолати фавт бар асари коронавирус сабт шуд. Вазорати тандурустии Қазоқистон рӯзи чоршанбеи 1-уми апрел иттилоъ дод, ки дар вилояти Қарағандаи ин кишвар як нафар бар асари коронавирус ҷон бохт.

Ин севумин шаҳрванди Қазоқистон аст, ки аз коронавирус ба ҳалокат мерасад. Дирӯз як марди 50-сола дар шаҳри Нурсултон ва рӯзи 26-уми март як зани 64-сола аз вилояти Акмолин ҷон бохта буданд.

Дар Узбекистон -- кишвари дигар дар Осиёи Миёна, таҳқиқот алайҳи як вакили маҷлиси маҳаллии Қӯқанд ба иттиҳоми паҳн кардани маълумоти нодуруст дар шабакаҳои иҷтимоӣ роҷеъ ба коронавирус оғоз шудааст.

Узбекистон рӯзи 1-уми апрел шумораи гирифторони коронавирус дар ин кишварро 173 тан эълон кард. Мақомот тандурустии Узбекистон мегӯянд, ки ду нафар бар асари ин беморӣ ҷон бохтаанд.

Дар Тоҷикистон ва Туркманистон - ду кишвари дигари Осиёи Марказӣ, ҳанӯз ҳолатҳои гирифторӣ ба ин беморӣ сабт нашудааст.

Муҳлати "карантин" дар Ҷумҳурии Чех то 11 апрел дароз карда шуд

Ҷавоне бо ниқоби тиббӣ дар Прага. 16-уми марти 2020

Субҳи 1-уми апрел ҳолатҳои тасдиқшудаи гирифтории сокинон ба коронавирус дар Ҷумҳурии Чех ба 3330 кас расид. То ин дам дар ин кишвари аврупоӣ 32 нафар аз бемории ҳамагири КОВИД-19 ба ҳалокат расидаанд.

Сарвазири Ҷумҳурии Чех Андрей Бабиш рӯзи 30-юми март гуфт, ҳукумат "карантин"-ро то 11-уми апрел дароз кардааст.

Рӯзи 27-уми март Бабиш гуфта буд, ки интизор аст ҳукумат вазъияти фавқулодаро барои 30 рӯзи дигар дароз кунад.

Маҷлиси Намояндагон бояд ҳаргуна дароз кардани ҳолати фавқулодаро тасдиқ кунад.

Элис Уеллс аз ҳукумат хост, ба кормандони Радиои Озодӣ иҷозаи кор бидиҳад

Элис Уеллс зимни сафараш ба Тоҷикистон дар моҳи январи соли 2019

Як дипломати баландпояи Амрико аз ҳукумати Тоҷикистон хост, ба тамоми кормандони дафтари Радиои Озодӣ иҷоза бидиҳад, ки бе маҳдудият кор кунанд. Элис Уэллс, муовини аввали дастёри вазири умури хориҷӣ дар як баёнияе, ки сафорати Амрико дар Фейсбук рӯзи 1-уми апрел нашр кард гуфтааст, "Рӯзноманигорони далеру сарсупурдае чун кормандони хабаргузории Радиои Озодӣ иттилооти муҳиму наҷотбахш дар бораи бемории дунёгири COVID19-ро ба мардум мерасонанд. Ман аз ҳукумати Тоҷикистон даъват мекунам, ки маҳдудиятҳои дастрасӣ ба иттилоотро лағв кунад ва бедиранг ба ҳама кормандони Радиои Озодӣ эътиборнома (аккредитатсия) диҳад".

Баёнияи дипломати амрикоӣ дар остонаи тасмимгирии вазорати умури хориҷии Тоҷикистон барои тамдид ва ҳам додани парвонаи кор ба хабарнигорони дафтари Радиои Озодӣ дар Душанбе нашр шуд. Қарор буд, вазорат ба дархости деринаи Радиои Озодӣ барои иҷозаи яксолаи кор додан ба 13 хабарнигор ва корманди дафтараш дар Душанбе рӯзи 1-уми апрел ҷавоб бидиҳад.

Вазорат аз моҳи майи соли гузашта аз додани парвонаҳои кории яксола ба кормандони Радиои Озодӣ худдорӣ кардааст. Мӯҳлати эътибори парвонаҳои баъзе аз кормандон сипарӣ шудааст ва ё вазорат онҳоро бозпас гирифтааст. Вазорати умури хориҷии Тоҷикистон рӯзи 21-уми январ гуфт, ки ба 4 корманди Радиои Озодӣ аз ҷумла ронандаи он иҷозаи кор додааст. Аккредитатсияи 7 корманди дигар, аз ҷумла ду раиси собиқи дафтар дар Душанбе ба гуфтаи вазорат баррасӣ мешавад.

Радиои Озодӣ ба сабаби надоштани аккредитатсияи мудирони дафтар, вазифаҳои онҳоро ба дӯши хабарнигорони дигар гузошт. Пештар аз баёнияи Элис Уэллс, муовини аввали вазири умури хориҷӣ, Ҷемӣ Флай, мудири Радиои Озодӣ низ ҳукумати Тоҷикистонро барои монеагузорӣ дар фаъолияти хабарнигоронаш дар Душанбе танқид кард.

Ӯ дар номае ба Сироҷиддини Муҳриддин, вазири корҳои хориҷӣ гуфт, талошҳои монеагузорӣ дар замони пандемияи коронавирус ва замоне сурат мегирад, ки теъдоди корбарони Радиои Озодӣ дар ҳоли афзоиш аст ва ин нишон медиҳад, ки мардум ҳоло "беш аз ҳар вақти дигар ба дарёфти хабару гузоришҳои он ниёз доранд". Мақомоти Тоҷикистон ҳарчанд ҳамеша гуфтаанд, хостори ҳузури Радиои Озодӣ дар Тоҷикистонанд, аммо таъкид кардаанд, ки бо намояндагони гуруҳ ва созмонҳои мухолифи давлат мусоҳиба анҷом дода нашавад.

Шумори қурбониёни COVID-19 дар Амрико аз 4000 нафар гузашт 

Афроди бехона дар шаҳри Лас-Вегас талош доранд, ки фосилаи байни ҳамдигариро риоя кунанд

Шумори қурбониён аз бемории ҳамагири коронавирус дар Амрико рӯзи якуми апрел аз 4000 нафар бештар шуд. Ин рақам як рӯз пас аз он эълон шуд, ки президент Доналд Трамп ба амрикоиҳо гуфт, "ду ҳафта бисёр сахт хоҳад гузашт".

Бино ба гузоришҳои Донишгоҳи Ҷон Ҳопкинс, дар Амрико 4079 нафар аз COVID-19, бемории роҳи нафас, фавтидаанд.

Камтар аз 190 ҳазор одам ба ин вирус олуда шудаанд.

Давлат кӯшиш дорад, дар наздикии шаҳрҳои бузург бемористонҳои муваққатӣ созад, то вазниниро ба муассисаҳои тандурустӣ сабук кунад. Чун раҳбарон пешбинӣ мекунанд, ки авзоъ дар ҳафтаҳои оянда бисёр бад хоҳад шуд.

Дар шаҳри Ню-Йорк дар як толори ҳамоишии густарда, дар Central Park ва дар ҷое, ки мусобиқаи кушоди тенниси Амрико гузаронида мешавад, беморхонаҳои саҳроӣ сохта шуданд.

Як киштии беморхонаи нирӯҳои баҳрӣ бо 1000 кат низ ба бандари Ню-Йорк расид ва интизор меравад, беморонро ба зудӣ қабул кунад.
Ин бемории ҳамагир сабаби марги беш аз 1700 нафар дар ин шаҳр шудааст.

Намояндагони соҳаи тандурустии Иёлоти Муттаҳида тахмин мезаданд, ки ҳатто агар амрикоиҳо дар хона монанд ва бо дигарон камтар муносибат дошта бошанд ҳам, шумораи мурдаҳо дар ин кишвар метавонад ба 240 ҳазор нафар расад.

Дар таркиши бомбаи сарироҳӣ дар Ҳилманд дастикам 8 нафар кушта шуд

Нирӯҳои ҳукуматӣ аз роҳе дар Гиришк убур мекунанд. Акс аз соли 2017

Рӯзи 1 апрел дар натиҷаи бархӯрди мошине ба бомбаи сарироҳӣ дар вилояти ҷанубии Ҳилманди Афғонистон, дастикам 8 мулкӣ, аксар кӯдакон кушта шуданд. Умар Звак, сухангӯи волии Ҳилманд гуфт, бомба замоне таркид, ки автобуси хурде бо мусофирон аз роҳе дар ноҳияи Гиришк убур мекард.

Звак гуфт, ки ҳадди аққал ду нафар маҷрӯҳ шудаанд ва эҳтимоли афзоиши шумори қурбониҳо вуҷуд дорад. Тамоми қурбониҳо аъзои як хонавода буданд ва шаш нафари кушташуда кӯдак мебошанд.

То ҳол касе масъулияти ин ҳодисаро ба дӯш нагирифтааст, вале дар ин минтақа ҷангиёни ҳарду гурӯҳи шӯришӣ – ҳам Толибон ва ҳам “Давлати исломӣ” фаъол ҳастанд. Дар Ҳилманд нирӯҳои давлатӣ шаш ноҳия, аз ҷумла Лашкаргоҳро назорат мекунанд, дигар 14 минтақа, аз ҷумла Гиришк зери контроли Толибон аст.

Теъдоди гирифторон ба коронавирус дар Узбекистон ба 173 тан расид

Дар Узбекистон шумораи гирифторон ба коронавирус ба 173 нафар расид. Дар ин бора Нурмат Отабеков, сартабиби беҳдоштии он кишвар рӯзи чаҳоршанбеи 1-уми апрел хабар дод.

Ба ҷуз шаҳри Тошканд, гирифторони вируси корона дар вилоятҳои Фарғона, Андиҷон, Намангон, Навоӣ, Бухоро, Қашқадарё ва Хоразм табобат мешаванд.

Ба иттилои расмӣ, дар Узбекистон аз коронавирус 8 нафар шифо ёфта, 2 тан вафот кардааст.

Ҳалокати шаҳрванди севуми Қазоқистон аз коронавирус

Алмато, Қазоқистон, 27-уми марти 2020.

Вазорати тандурустии Қазоқистон рӯзи чоршанбеи 1-уми апрел иттилоъ дод, ки дар вилояти Қарағандаи ин кишвар як нафар бар асари сирояти коронавирус ҷон бохт.

Ин севумин шаҳрванди Қазоқистон аст, ки аз коронавирус ба ҳалокат мерасад. Дирӯз як марди 50-сола дар шаҳри Нурсултон ва рӯзи 26-уми март як зани 64-сола аз вилояти Акмолин ҷон бохта буданд.

Ба огаҳии Вазорати тандурустии Қазоқистон, дар маҷмӯъ дар ин кишвар 369 ҳолати мубталошавӣ ба коронавирус ба қайд гирифта шудааст. Бештари онҳо дар шаҳрҳои Нурсултон ва Алмато сабт шудаанд.

Ҳолатҳои гирифторӣ ба коронавирус дар ҳамаи минтақаҳои Қазоқистон, ба ҷуз аз вилояти Костаной, сабт шудааст. Ба иттилои вазорат, 24 бемори мубтало ба коронавирус аллакай шифо ёфтаанд.

Туркия ба мошинҳои ҳомили пахта аз Узбекистон иҷозати вуруд надод

Гузаргоҳи марзии "Сарпӣ" дар марзи Гурҷистон бо Туркия.

Беш аз 150 мошини боркаши ҳомили пахтаи Узбекистон дар гузаргоҳи марзии "Сарпӣ"-и Гурҷистону Туркия дармондаанд. Ин гурӯҳи ронандагон 30-юми март муроҷиатномаи видеоиеро ба номи президенти Узбекистон Шавкат Мирзиёев пахш карданд.

Дар сафорати Узбекистон дар Гурҷистон гуфтанд, ки ҳоло бо мақомоти Туркия гуфтугӯ доранд, то ба мошинҳои ҳомили пахтаи Узбекистон иҷозати вуруд диҳанд. "Рӯзи ҳаштум аст, ки мо дар марзи Гурҷистон бо Туркия ҳастем. Ҳар рӯз маҷбурем пули таваққуфгоҳро низ диҳем. Ба Узбекистон низ баргашта наметавонем",-гуфт яке аз ронандаҳои дармонда.

Ҳамсуҳбатони мо мегӯянд, марзбонони Туркия танҳо ба мошинҳои дорои рақамҳои узбекӣ иҷозати вуруд намедиҳанд. "Мошинҳои Русия, Гурҷистон ва Озарбойҷон озод вориди Туркия мешаванд. Вале ба мо мегӯянд, ки карантин аст, мумкин нест",-изҳор дошт як ронанда.

Вазорати умури хориҷӣ ва ниҳодҳои дахлдори дигари Узбекистон қазияро шарҳ намедиҳанд

Тими Толибон барои назорат аз озодкунии зиндониҳо ба Кобул рафт

Толибон дар зиндони Пули Чархии Кобул

Се узви Толибони Афғонистон ба Кобул барои назорат аз ҷараёни озодкунии Толибони зиндонӣ рафтанд. Ин бахше аз созиши сулҳи ИМА ва Толибон аст, ки моҳи феврал имзо шуд.

Забеҳулло Муҷоҳид, сухангӯи Толибон гуфт, ки рӯзи 31 март як тими “фаннӣ” ба Кобул ворид шуда, ният дорад дар ҷараёни озодкунии зиндониҳо тавассути шиносоии онҳо ва ҳам дар интиқоли онҳо ёрӣ расонад. Ин аввалин бор аст, ки баъди ноябри соли 2011 аз қудрат дар Афғонистон дур карда шудани Толибон ҳайати расмии онҳо вориди Кобул мешавад.

Як мақоми аршади ҳукумати Афғонистон дар сӯҳбат бо Ройтерс гуфт, ки “онҳо ҳамин ҷо ҳастанд” ва “агар ҳама чиз аз рӯи нақша пеш равад, озодкунии зиндониҳо дар чанд рӯзи баъдӣ шурӯъ мешавад”. Нақшаи бар асоси созиши сулҳи 29 феврал мувофиқашуда ин буд, ки Толибон як ҳазор зиндонии узви нирӯҳои ҳукуматӣ ва ҳукумати Афғонистон 5000 зиндонии Толибонро озод мекунанд.

Инчунин бар асоси тавофуқи ҷонибҳо, Толибон қарор аст бо ҳукумати Афғонистон вориди муколамаи мустақим шаванд.

Мақомот: Мавридҳои гирифторӣ ба коронавирус дар Тоҷикистон сабт нашудааст

Вазорати тандурустӣ ва ҳифзи иҷтимои аҳолии Тоҷикистон мегӯяд, ки аз аввали моҳи феврал то охири моҳи март 6222 шаҳрвандоне, ки аз хориҷ ба Тоҷикистон омаданд, ба карантин фаро гирифта шуданд. Ин вазорат рӯзи 1-уми апрел хабар дод, ки аз ин шумора 2145 нафари онҳо ба хонаҳояшон рухсат дода шуда, айни замон 4077 тани дигар дар беморхонаҳо дар карантин қарор доранд.

Вазорати тандурустӣ ҳамзамон хабар додааст, ки то 31-уми март дар кишвар ҳолатҳои гирифторӣ ба коронавирус сабт нашудааст. Вазорати тандурустии Тоҷикистон мегӯяд, сарфи назар аз ин, чораҳои пешгирикунанда тақвият бахшида шудааст. Аз ҷумла, ҳамаи парвозҳои байналмилалӣ манъ шуда, афроде, ки аз берун меоянд барои ду ҳафта ба карантин фиристода мешавад.

Коронавирус дар моҳи декабри соли гузашта дар Чин пайдо шуд. То кунун дар саросари ҷаҳон беш аз 861 ҳазор нафар ба ин беморӣ гирифтор шуда, беш аз 42 ҳазор тани дигар ҷон бохтаанд.

Украина гуфт, як шабакаи ҷосусии афсари нирӯҳои баҳрӣ ва ФСБ-и Русияро ошкор кард

Хадамоти амнияти Украина

Хадамоти амнияти Украина гуфт, ки як канали ҷосусии муколамаи миёни афсари баландпояи нирӯҳои баҳрии Украина ва Хадамоти амнияти федеролиро, ки дар нимҷазираи Қрими аз ҷониби Русия ишғолшуда қарор дорад, ошкор кардааст.

Дар изҳороти рӯзи 31 марти СБУ ё Хадамоти амнияти Украина омадааст, ки ҷараёни аз дастрасӣ ба иттилои махфӣ ва аз рутбаҳои низомӣ маҳрум кардани ин афсар шурӯъ шудааст.

Дар изҳорот ҷузъиёти марбут ба ному рутба ва ҳолати кунунии ин афсар оварда намешавад.

СБУ гуфт, ки соли 2014, замони дар хидмати низомӣ дар Қрим буданаш, ки давраи аз ҷониби Русия ишғол шудани нимҷазира аст, ин афсар барои Киев савганди вафодорӣ хонда буд. Дар ин матн омадааст, ки афсар он замон дар академияи баҳрии шаҳри бандарии Севастопол ироаи кӯмак ба нирӯҳои амниятии Русияро рад кард. Вале баъди ин, ба навиштаи СБУ, бо вуҷуди ба Украина кӯчиданаш, ӯ бо афсарони ФСБ-и Русия дар тамоси доимӣ будааст.

Ин афсар, ба изҳороти СБУ, ба иттилои махсусан махфии марбут ба масоили дифоӣ дастрасӣ дошт.

Ёфтҳои бештар

XS
SM
MD
LG