Пайвандҳои дастрасӣ

Хабари нав

Хабарҳо

Ба туркманҳо гуфтанд, дар бораи мушкили гармидиҳӣ дар ҷое ҳарф назананд

Бо фарорасии фасли сармо шикояти сокинони шаҳру навоҳии Туркманистон аз низоми гармидиҳӣ дар манзилҳои зист афзоиш ёфтааст.

Тайи ҳафтаи гузашта мақомот низоми гармидиҳӣ ва таъминоти гази мактабҳои миёнаи вилояти Лебапи Туркманистонро аз санҷиш гузаронданд. Дар ҳайати санҷишгарон дар баробари кормандони маориф маъмурони амнияти миллӣ низ буданд. Ин санҷиш пас аз матлаби бахши туркмании Радиои Озодӣ дар бораи мушкили низоми гармидиҳӣ дар мактабҳои мазкур гузаронида шуд.

Мансабдорони туркман гуфтаанд, ки нақшаи барқарорсозии лӯлаи интиқоли газро доранд. Комиссия ҳамчунин пешниҳод кардааст, ки барои гарм кардани синфхонаҳо аз балонҳои газ истифода шавад.

Ба иттилои хабарнигори радио, мақомот аз омӯзгорони мактаб талаб кардаанд, ки дар бораи мушкилоти марбут ба низоми гармидиҳӣ дар ҷое гап назананд. "Намояндагони Вазорати амнияти миллии Туркманистон бо ваъдаи ҳалли мушкили низоми гармидиҳӣ амр карданд, ки онро ифшо накунанд",-иттилоъ дод хабарнигор.

Дар ҳамин ҳол баъзе аз сокинони биноҳои баландошёнаи зисти вилояти Марии Туркманистон низ аз мушкилоти низоми гармидиҳӣ шикоят доранд. "Ҳаво дар Марӣ ҳоло сард аст. 23 ноябр барф борид. Низоми гармидиҳии биноҳои баландошёна тавони гарм кардани хонаҳоро надорад",-изҳор дошт як ҳамсуҳбати мо аз Марӣ.

Ҳамаи хабарҳои имрӯзро дар инҷо бихонед

Нишасти паймони манъи густариши силоҳҳои ҳастаӣ ба таъхир уфтод

Созмони Милали Муттаҳид гуфт, нишасти баррасии паймони манъи густариши силоҳҳои ҳастаӣ ба таъхир уфтодааст ва сабабашро ба сирояти бемории ҳамагири КОВИД-19 рабт дод. Қарор буд, нишаст аз 27-уми март то моҳи май дар Ню-Йорк баргузор шавад. Ин конфронс дар панҷ сол як дафъа баргузор мешавад. Стефан Дуйарич, сухангӯи Созмони Милал, гуфт, баробари мусоид шудани шароит нишаст баргузор мешавад. Паймони манъи силоҳҳои ҳастаӣ панҷоҳ сол пеш такмил шуд. Бар асоси он, аъзои паймон, ки силоҳи ҳастаӣ надоранд, аҳд кардаанд то ба он дастрасӣ пайдо накунанд ва кишварҳои соҳиби силоҳи ҳастаӣ ба нобудии он кӯшиш мекунанд.

Аъмоли раиси додгоҳи шаҳри Нурсултонро тафтиш карданд

Додгоҳи шаҳри Нурсултон (Остона)

Хадамоти зиддифасоди Қазоқистон рӯзи 27-уми март хабар дод, ки тафтиши аъмоли Тлектес Барпибоев, раиси додгоҳи шаҳри Нурсултонро шуруъ кардааст.

Расонаҳо пештар навиштанд, ки Барпибоев аз хизматрасонии ҳавопаймои хусусӣ истифода кардааст.

Оҷонси мубориза бо фасод дар Қазоқистон гуфт, тафтишот муайян кард, ки Барпибоев аз ҳавопаймои хешонаш барои парвоз ба Олмон истифода кардааст.

Додгоҳи шаҳри Нурсултони Қазоқистон хабар дод, ки раиси ин додгоҳ охири ҳафтаи гузашта ба рухсатӣ баромадааст.

Барпибоеви 60-сола дар соли 2013 раиси додгоҳи шаҳри Нурсултон таъйин шуд. То он замон вай раиси додгоҳи Алмато буд.

Борис Ҷонсон гирифтори коронавирус шуд

Борис Ҷонсон, нахуствазири Бритониё, ҳангоми суҳбат дар бораи бемориаш. 27-уми марти 2020

Би-би-сӣ хабар дод, ки ташхиси тиббии сарвазири Бритониё, Борис Ҷонсон, "мусбат" баромад ва ӯ бо сабаби олудагӣ ба коронавирус ба "карантин" гузашт.

Ҷонсон ҳам рӯзи 27-уми март инро тасдиқ кард ва гуфт, "нишонаҳои сабук"-и гирифторӣ ба вирусро эҳсос мекунад ва қарор кард, корро дар хона идома диҳад.

Нахуствазири Бритониё дар саҳифааш дар Твиттер ба пизишкон, ходимони полис, ихтиёриён ва онҳое, ки ба ҷабҳаи мубориза бо коронавирус ҳамроҳ шудаанд, сипосгузорӣ кард. Ӯ изҳори бовар намуд, ки агар шаҳрвандони кишвар ба машварати табибон гӯш кунанд, Бритониё ба пандемия пирӯз мешавад.

Дар Бритониё шумори олудашудаҳо ба вирус то имрӯз наздик ба 12 ҳазор нафарро ташкил додааст. Бар асари гирифторӣ ба ин вирус дар Бритониё 580 нафар фавтидаанд.

Борис Ҷонсон аввалин раҳбари ҷаҳонӣ аст, ки гирифтори коронавирус шудааст, вале пандемияи КОВИД-19 дар умум ба зиндагиву кори бисёре аз раҳбарон таъсир гузоштааст.

Масалан, садри аъзами Олмон Ангела Меркел баъд аз он ки духтури ӯро эмкарда худ гирифтори коронавирус баромад, ба карантин гузашт ва корро аз хона идома медиҳад.

Ҷастин Трюдо, нахуствазири Канада, баъди ошкоршавии вирус дар ҷисми ҳамсараш Софӣ баъди сафаре ба Лондон ҳамчунин ба карантини хонагӣ гузашт.

Дар миёни раҳбарони дигаре, ки аз санҷиши тиббӣ гузашта, гуфтанд, ки натиҷааш “манфӣ” баромад, раҳбарони Амрико, Бразилия ва Филиппин мебошанд. Муддате пеш баъди он ки ҳайати ҳукуматии Бразилия ба раҳбарии президент Жаир Болсонаро аз Иёлоти Муттаҳида баъди мулоқот бо Доналд Трамп баргаштанд, маълум шуд, ки чанд узви ҳукумати Бразилия гирифтори КОВИД-19 шудаанд.

Матбуот ва мунтақидон ба ин ҳодиса таваҷҷӯҳ карда, аз Трампу Болсонаро талаб карданд, ки ба карантин бираванд. Айни чунин даъват аз Созмони Ҷаҳонии Тандурустӣ ҳам садо дод. Вале онҳо баъди гузаштан аз санҷиши тиббӣ корро ба шеваи маъмулӣ идома доданд.

Рӯзи 27-уми март Кремлин хабар дод, ки як узви маъмурияти президенти Русия Владимир Путин ба коронавирус олуда шудааст, вале ин нафар бо президент дар тамоси мустақим набуд.

Сухангӯи Путин Дмитрий Песков бо нашри ин хабар гуфт, ки "тамоми тадбирҳо барои поккории санитарӣ ба роҳ монда шудааст".

Изҳорот дар ҳоле нашр шуд, ки шурӯъ аз 28-уми март дар сартосари Русия маҳдудияти шадид ҷорӣ шуда, тамоми тарабхонаву қаҳвахонаҳо баста мешаванд. Рӯзи 27-уми март шумори олудашудаҳо дар Русия беш ҳазор нафар ва ҳалокати инсонҳо бар асари гирифторӣ ба КОВИД-19 – 4 нафарро ташкил дод.

511 -- телефони боварии мақомоти тоҷик барои пешгирӣ аз коронавирус

Вазорати тандурустӣ ва ҳифзи иҷтимоии аҳолии Тоҷикистон ба ҳадафи пешгирӣ ва назорати сирояти коронавирус, телефони боварӣ фаъол кардааст. Тибқи иттилои ин вазорат, ин телефон таҳти рақами 511, бисту чаҳор соат фаъол мебошад. Ин вазоратхона мегӯяд, ки сокинон метавонанд бо ин шумора дар тамос шуда, ба суолҳои худ посух дарёфт кунанд.

Вируси нави корона, ки то ин дам боис ба марги беш аз бист ҳазор нафар шуд, нигарониҳои ҷиддиро дар саросари ҷаҳон, аз ҷумла дар Тоҷикистон ба миён овардааст. Мақомоти тоҷик мегӯянд, ки то имрӯз дар кишвар гирифторшавӣ ба коронавирус ошкор нашудааст ва ба ин хотир зарурати эълони вазъи фавқулодда нест.

Мақомот барномаи пешгирӣ аз вируси нави корона ва вокуниши эҳтимолӣ дар сурати пайдо шудани бемориро таҳия карда, барои амалӣ кардани он аз созмонҳои молии ҷаҳонӣ кӯмак хостаанд. Ин дар ҳолест, ки дар кишварҳои ҳамсояи Тоҷикистон мавридҳои гирифтории сокинон ба коронавирус ошкор шуда, дар бархе аз ин кишварҳо вазъи фавқулода ва карантин эълон шудааст.

САҲА аз боздошти журналисти беларус “хеле нигарон” аст

Сатсук сардабир ва раҳбари вебсайти хабарии ej.by дар бораи фасод дар низоми беҳдошти Беларус ва бархӯрди бади мақомот ба хуруҷи коронавирус навиштааст

Вебсайти хабарии ej.by дар Беларус хабар дод, ки раис ва сардабири ин расона бо иттиҳоми порагирӣ боздошт шуд. Департаменти таҳқиқоти молӣ рӯзи 26 март дар изҳороте хабар дод, ки Сергей Сатсук рӯзи 25 март дар як амалиёти вижаи ин ниҳод боздошт шуд.

Анҷумани журналистони Беларус гуфт, ки баъди боздошти Сатсук идораи вебсайти хабарӣ ҳам кофтукоб шуд ва мақомот санадҳоеро мусодира карда бо худ бурданд.

Аляксандр Сатсук, бародари Сергей Сатсук иттиҳомотро “дурӯғин ва беҳуда” номида, дар сӯҳбат бо хабарнигори Радиои Аврупои Озод/Радиои Озодӣ гуфт, ки эҳтимолан боздошти ӯ ба гузориши таҳқиқотии бародараш дар бораи фасод дар вазорати беҳдошти кишвар ба ҳангоми воридоти маводи дорувори тиббӣ рабт мегирад.

Ҳарлем Дезир, намояндаи САҲА дар масоили озодии матбуот дар изҳороти рӯзи 26 марташ гуфт, ки аз боздошти Сатсук “хеле нигарон”аст.

Дезир гуфт, ки хабарнигори боздоштшуда дар гузашта ҳам дар мавзӯи фасод дар бахши беҳдошт гузоришҳо навишта, батозагӣ дар гузоришҳояш бархӯрди мақомоти Беларус ба хуруҷи коронавирусро ба боди интиқод кашида буд.

Намояндаи САҲА таъкид кард, ки журналистон набояд барои пӯшиши хабарии масоили мавриди таваҷҷӯҳи ҷомеа ва ҳам вазъи атрофи Ковид-19 “таҳдид, таъқиб ё боздошт шаванд”. Ӯ гуфт, ки журналистон дар нашри гузориш оид ба пандемияи коронавирус ва ироаи иттилои муҳим барои ҷомеа нақши муҳим мебозанд.

ИМА ширкатҳову шахсиятҳои марбут ба Сипоҳи посдоронро таҳрим кард

6 январи соли 2020 маросими дафни Қосим Сулаймонӣ баргузор шуд

ИМА гуфт, ки алайҳи 20 ширкати воқеъ дар Эрону Ироқ ва ҳам чанд мақомдору шахсиятҳои ҷудогона, ки барои пуштибонӣ аз гурӯҳҳои террористӣ муттаҳам мешаванд, таҳрим ҷорӣ мекунад.

Рӯзи 26 март вазорати молияи ИМА гуфт, ки таҳримҳо ширкату мақомдорони баландпоя ва шарикони тиҷоратии Сипоҳи посдорони инқилоби исломии Эрон ва ҳам бахши хориҷии он – нирӯҳои Қудсро ҳадаф қарор додаанд.

Ширкату шахсиятҳои алоҳида “инчунин барои ирсоли ёриҳои марговар ба террористон дар Ироқ, назири гурӯҳҳои Катойиб Ҳизбуллоҳ ва Асойиб Аҳл-ал-Ҳақ, ки аз Эрон пуштибонӣ мебинанд” муттаҳам шудаанд. Вазорати молияи ИМА гуфт, дар қатори фаъолиятҳои дигар ин шахсон ва ширкатҳо, аз ҷумла, барои қочоқи силоҳ ба Яман, фурӯши нафти аз сӯи ИМА таҳримшудаи Эрон ба ҳукумати Сурия, роҳандозии таблиғот дар Ироқ ва азияти сиёсатмадорон дар Ироқ муҷозот мешаванд.

Вазири молия Стивен Мнучин гуфт, ки Эрон “шабакаи ширкатҳоеро барои маблағгузории гурӯҳҳои террористӣ дар ҷаҳон ба кор гирифта, мардумро аз захираҳо маҳрум мекунад ва ба террористон бартарият қоил аст”.

Дар байни ширкатҳои таҳримшуда Созмони бозсозии маконҳои муқаддаси Ироқ ҳам ҳаст, ки ба қавли вазорати молияи ИМА, аз ҷониби нирӯҳои Қудс назорат мешавад. Дар миёни шахсони таҳримшуда инчунин Муҳаммад Ҷалолмаоб ҳам ҳаст, ки соли гузашта аз ҷониби Қосим Сулаймонӣ ба мақоми раиси иҷроияи ин созмон таъин шуд. Сулаймонӣ - фармондеҳи нирӯҳои Қудс моҳи январи имсол дар ҳамлаҳои ҳавоии амрикоиҳо дар Бағдод кушта шуд.

Шумораи мубталоёни коронавирус дар Қазоқистон ба 124 тан расид

Шаҳри Алмато, Қазоқистон, 24 март, 2020.

Вазорати тандурустии Қазоқистон иттилоъ дод, ки дар шаҳри Атирауи ин кишвар се ҳолати нахустини мубталошавӣ ба коронавирус сабт шудааст.

Мақомоти қазоқ имрӯз дар бораи ошкор шудани 8 ҳолати нави дигар дар шаҳри Алмато низ хабар дода буданд. Ба огаҳии Вазорати тандурустии Қазоқистон, то нимаи рӯзи 27-уми март шумори мубталоён ба коронавирус дар ин кишвар ба 124 нафар расидааст.

Мақомоти қазоқ дирӯз хабар доданд, ки зани 64-сола бар асари гирифторӣ ба коронавирус фавтидааст. Даурен Абаев, вазири иттилоот ва рушди иҷтимоии Қазоқистон шоми 26-уми март дар нишасти матбуотӣ гуфт, ин мавриди нахустини марги сокинон бар асари бемории КОВИД-19 дар ин кишвари Осиёи Марказӣ аст.

Вай афзуд, "ин ҳолат бори дигар моро аз хатарнокии коронавирус огоҳ мекунад. Он чи ки ҳоло мегузарад, имтиҳоне барои ҳамаи мост."

Афғонистон ба хотири коронавирус 10 ҳазор маҳбусро озод мекунад

Зиндони шаҳри Қандаҳори Афғонистон. Акс аз бойгонӣ.

Президенти Афғонистон Ашраф Ғанӣ фармон дод, ки ба хотири пешгирӣ аз паҳни коронавирус то 10 ҳазор маҳбус аз зиндонҳо озод карда шаванд.

Додситони кулли Афғонистон Муҳаммад Фарид Ҳомидӣ 26-уми март дар як нишасти хабарӣ дар шаҳри Кобул гуфт, тасмими мазкур "бо мақсади ҳифзи саломатии мардум" гирифта шуда, ба занон, беморони вазнин ва маҳбусоне дахл хоҳад дошт, ки синашон аз 55 боло аст.

Фармон маҳбусонеро фаро намегирад, ки зидди амнияти давлат ва байналмилалӣ ҷиноят содир кардаанд.

Фармони Ашраф Ғанӣ дар пасманзари гуфтугӯҳои ҳукумати Афғонистон бо гуруҳи даҳшатафкани Толибон дар бораи табодули асирон дар доираи раванди гуфтугӯи сулҳ бо миёнаравии ИМА содир шудааст.

Дар Афғонистон то 26 март 90 ҳолати мубталошавӣ ба коронавирус сабт шуда, ду кас аз он ҷон бохтаанд. Вале нигарониҳо вуҷуд дорад, ки шумораи мубталоён эҳтимол аст, аз омори расмӣ бештар бошад.

Фармони президенти Афғонистон ҳамчунин ташкили кумитаи махсусеро барои таҳияи рӯйхати маҳбусони озодшаванда пешбинӣ мекунад.

Дар Узбекистон барои нақзи карантин то 10 сол зиндонӣ мекунанд

Узбекистон дар карантин ба сар мебарад.

Президенти Узбекистон Шавкат Мирзиёев 26-уми март фармони ворид кардани тағйиру иловаҳо ба кодексҳои маъмурӣ ва ҷиноии ин кишварро имзо кард. Дар ин бора Вазорати адлияи Узбекистон иттилоъ додааст.

Тағйироти ахир барои паҳни иттилои бардурӯғ аз 4,7 ҳазор доллар то 9,4 ҳазор доллар ҷарима, ё уҳдадор шудан ба иҷрои корҳои ҷамъиятӣ ба муҳлати аз 300 то 360 соат, ё корҳои ислоҳӣ ба муддати аз 2 то 3 сол, ё то 3 сол маҳрум шудан аз озодиро пешбинӣ мекунад.

Ҳамчунин барои нақзи талаботи қонунгузорӣ, ки хатари воқеии беморшавӣ ё заҳролудшавии дастаҷамъиро дар пай дорад, то 5 соли зиндон муқаррар карда шудааст.

Барои амале, ки боиси марги 1 одам мешавад, аз 5 то 7 соли зиндон ва агар талафоти ҷонии беш аз 1 нафар дар пай дошта бошад, аз 7 то 10 соли зиндон пешбинӣ шудааст. Пештар он аз 3 то 5 соли зиндон буд.

Вазорати тандурустии Узбекистон ахиран гуфт, шумори умумии мубталоёни коронавирус дар ин кишвар ба 83 нафар расидааст. Ба иттилои манбаъ, як зани 72-сола низ аз коронавирус ба ҳалокат расид, ки нахустин қурбонии он дар ин кишвар шумурда мешавад.

Раҳбари FBI гуфт, кор барои маълум кардани тақдири агенти собиқ дар Эрон идома мекунад

Крис Рей, раҳбари Бюрои федеролии тафтишот

Раҳбари Бюрои федеролии тафтишот Крис Рей гуфт, ин ниҳоди интизомӣ ҳеҷ гоҳ талошашро барои пайдо кардани иттилоъ дар бораи сарнавишти агенти собиқ Роберт Левинсон аз даст намедиҳад. ИМА бовар дорад, ки Левинсон дар зиндони Эрон даргузашт.

Дар як имейле, ки хабарнигори оҷонсии Ассошейтед Пресс рӯзи 26 март дидааст, Рей ба кормандони Бюрои федеролии тафтишоти ИМА навиштааст, ки бо оилаи Роберт Левинсон мулоқот карда ба онҳо шарҳ додааст, ки “бар асоси далелҳои ҷамъшуда дар давоми 13 соли гузашта мо ба хулосае омадем, ки ба эҳтимоли зиёд Боб дар боздошт даргузашт».

Рей навиштааст, ки “расонидани ин хабар барои ман дарднок аст, вале ман ба ин бовар ҳастам, ки мо вазифадорем ба хонаводаи Боб маълумоти муфассалро дар бораи бозёфтҳои худ пешкаш кунем”.

Ӯ афзуд, ки кор барои мушаххас кардани ҷузъиёти рабуда шудани ӯ ва ҳам вазъаш дар боздошт идома меёбад.

Левинсон, ки моҳи марти соли 1948 таваллуд шудааст, моҳи марти соли 2007 замони сафараш ба ҷазираи Кеши Эрон нопадид шуд. Ӯ он замон барои Оҷонсии марказии истихборот ба ҳайси коргари қарордодӣ кор мекард. ИМА борҳо ба Эрон муроҷиат карда, дархост кардааст, ки барои маълум кардани макони будубош ва бозгардони Левинсон мусоидат кунанд. Вале як расонаи рӯ ба давлати Эрон баъди нопадидшавии Левинсон гузорише нашр кард, ки дар он гуфта шуд, “Левинсон дар дасти нирӯҳои амниятии Эрон”аст.

Рӯзи 26 март Теҳрон бо нашри изҳороте гуфт, ки Левинсон “муддатҳо пеш” Эронро тарк кард ва онҳо дар бораи будубошаш хабаре надоранд. Ин изҳорот ҳамчунин иттиҳоми дар зиндони Эрон даргузаштани Левинсонро рад кардааст. Дирӯз Аббос Мусавӣ, сухангӯи вазорати хориҷаи Эрон дар изҳороташ инчунин гуфт, ки мақомот тамоми тадбирҳоро барои пайдо кардани иттилоъ дар бораи сарнавишти Левинсон ба кор андохтанд, вале Эрон шаҳодати “зинда будани Левинсон”-ро пайдо накардааст.

СБП барои муқобила бо Ковид-19 ба Қирғизистон $121 миллион медиҳад

Дар як кӯчаи Бишкек поккории санитарӣ ба роҳ монда шудааст

Шӯрои мудирони Сандуқи байналмилалии пул розӣ шуд, ки ба таври оҷил ба Қирғизистон дар амри муқобила бо паҳншавии коронавирус ёрии молӣ ироа кунад. Ин аввалин қарор аст, ки кӯмак ба як кишварро дар заминаи паҳншавии пандемияи сартосарӣ пешбинӣ мекунад. Кристалина Георгиева, мудири иҷроияи СБП бо нашри изҳороте рӯзи 26 март гуфт, пандемияи коронавирус ба иқтисоди Қирғизистон таъсири амиқ мерасонад ва ҳолати изтирории тавозуни хароҷотро ба миён овардааст.

Ӯ гуфт, дар шароите, ки барои хатми паҳншавии вирус тамоми нирӯҳо равона шудааст, “ҳамаи бахшҳо осеб мебинанд”. СБП мегӯяд, умедвор аст ин маблағҳо ба иқтисоди Қирғизистон дар эҷоди эътимод мусоидат мекунад.

Иқтисодшиноси зодаи Булғористон Георгиева гуфт, ки дар дурнамои иқтисоди Қирғизистон як тафовути тавозуни пардохтҳо дар ҳаҷми 400 миллион доллар эҷод шудааст.

Дар Қирғизистон бо аҳолии 6,2 миллион аҳолӣ то ҳол олудагии 58 нафар тасдиқ шудааст.

Георгиева мегӯяд, ки ба СБП даҳҳо кишвар бо дархости гирифтани кӯмак муроҷиат кардаанд ва ин ниҳод омода аст то 1 триллион долларро барои иқтисодҳои дучори мушкилшуда дар шароити паҳншавии коронавирус ҷудо кунад.

Пешниҳоди таъсиси гурӯҳҳои волонтёрҳо дар Тоҷикистон барои пешгирӣ аз коронавирус

Бинои Вазорати тандурустии Тоҷикистон.

Вазорати тандурустии Тоҷикистон ба зарурати таъсиси гурӯҳҳои волонтёрҳо барои пешгирӣ аз паҳншавии бемории коронавирус, таъкид кардааст. Ин мавзӯъ дар ҷаласаи Ситоди ин вазорат оид ба пешгирии сирояти коронавирус, ки 26-уми март баргузор шуд, матраҳ шудааст.

Тайи ҳафтаҳои ахир мухолифон ва намояндагони ҷомеаи шаҳрвандӣ пешниҳодҳое ироа карданд, ки аз эълони таътил дар мактабҳо то сабукии андоз ва пардохтҳоро дар бар мегирифт. Аммо мақомот гуфтанд, то ҳол дар кишвар ҳолатҳои сироят ёфтани одамон ба вируси нав сабт нашудааст ва вазъ зери назорат мебошад. Мақомот ҳамчунин таъкид доранд, ки барои пешгирӣ аз ин беморӣ, ба пули зиёд эҳтиёҷ доранд.

Дафтари матбуоти Вазорати тандурустӣ ва ҳифзи иҷтимоии Тоҷикистон ҷузъиёти нишасти рӯзи 26-уми мартро шарҳ дод ва гуфт, ки дар ин ҷаласа масъалаи омодагии муассисаҳои тиббӣ дар ҳолати хуруҷи эҳтимолии коронавирус ва дар сурати карантин эълон намудан дар саросари кишвар, баҳсу баррасӣ шуданд. Манбаъ мегӯяд, ки дар ин нишаст ҳамчунин дастур шудааст, ки дар ҳолати эълон шудани карантин дар кишвар, бояд гурӯҳҳои волонтёрон таъсис шуда, миёни мардум корҳои фаҳмондадиҳӣ бигузаронанд.

Мақомоти тоҷик мегӯянд, ки то ба ҳол дар кишвар ҳолатҳои сироят ёфтани одамон ба коронавирус сабт нашудааст. Ҷаласаи Вазорати тандурустӣ қарор кардааст, ки ҳама муассисаҳои тиббӣ барои ҳолати эҳтимолии хуруҷи ин беморӣ, омода бошанд. Ин вазорат мегӯяд, ки рӯзи 25-ум март Русия ба Тоҷикистон барои муайян намудани коронавирус 20 ҳазор тестҳои оҷилӣ ҷудо кардаааст.

Дар ҳамин ҳол, рӯзи 26-уми март ҳаракати ҷамъиятии "Авангард", ки бо иқдомҳои худ бар зидди мухолифони давлати Тоҷикистон шӯҳрат ёфтаанд, бо пахши навори видеоӣ дар шабакаҳои иҷтимоӣ, аз тақсими ниқобҳои тиббӣ ба сокинони шаҳри Душанбе хабар доданд.

Маъмурони пулиси шаҳри Душанбе низ тӯли чанд рӯзи ахир бо ниқобҳои тиббӣ машғули хидмат ҳастанд. Аз ин қабл, хадамоти таксии "Максим" дар шаҳри Хуҷанд низ ба муштариёни худ ҳазор дона ниқоби тиббӣ ройгон тақсим карда, мехоҳанд баъд аз анҷоми таътили наврӯзӣ дар Душанбе низ ин иқдомро рӯйи даст бигиранд.

Тибқи омори мақомоти Тоҷикистон дар кишвар то ҳол сироят ба вируси нав ба қайд гирифта нашудааст, вале гуфта мешавад, ҳамаи сохторҳо барои пешгирӣ аз ин вирус омода шудаанд. Дар назди нахуствазир ситоди доимоамалкунанда ташкил шуда, роҳбарони аввали мақомот, Додситони кул ва Дабири Шӯрои амният ҳам ба ин ситод дохиланд.

Ин ситод ба гуфтаи масъулини Вазорати тандурустӣ ҳамарӯза ду ҷаласа баргузор карда, масъалаҳои пешгирӣ аз хуруҷи вируси навро баҳс мекунад.

Мунтақидон аз баъзе амалкардҳои мақомот дар баробари вируси нав танқид мекунанд. Онҳо мегӯянд, дар шароите ки кишварҳои ҷаҳон талош мекунанд аз ҷамъшавии одамон пешгирӣ кунанд, баръакс, мақомоти Тоҷикистон ҷашни Наврӯзро бо ширкати ҳазорон нафар баргузор карданд.

То ҳол дар саросари ҷаҳон коронавирус ё бемории шабеҳи илтиҳоби шуш ба беш аз 500 ҳазор нафар сироят карда, ҳудуди 23 ҳазор нафар фавтидаанд. Дар ин миён беш аз 122 ҳазор нафар шифо ёфтаанд. Дар Қазоқистону Узбекистон ва Қирғизистон, кишварҳои ҳамсояи Тоҷикистон, даҳҳо мавриди сирояти одамон ба ин беморӣ ошкор шудааст.

Бунёди беморхонаи вижа барои гирифторони коронавирус дар Узбекистон

Як бемористон дар Узбекистон.

Дар Узбекистон барои карантин ва муолиҷаи гирифторони вируси корона ба таври фаврӣ беморхонаҳои махсус бунёд мекунанд. Ин беморхонаҳо дар шаҳри Тошканд ва чаҳор вилояти Узбекистон сохта мешаванд.

Дар пойтахти Узбекистон сохтмони се муассисаи махсуси тиббӣ ҷараён дорад. Гуфта мешавад, ин муассисаҳо дар моҳҳои оянда ба қабули беморон шуруъ мекунанд.

Дар ноҳияи Юкоричи вилояти Тошканд 55 га замин барои бунёди муассисаи карантинӣ ҷудо шудааст. Муассисаи дигар дар ноҳияи Зангиота дар майдони 27 га ва барои 10 ҳазор кас бунёд мешавад.

Биноҳои дигар дар вилоятҳои Андиҷон, Навоӣ ва Сурхандарё бунёд хоҳанд шуд.

Ба иттилои вазорати тандурустии Узбекистон, дар ин кишвар 65 ҳолати гирифторӣ ба вируси корона сабт ва бештар аз 20 ҳазор кас ба карантин гирифта шудааст. Вазъи гирифторон вазнин арзёбӣ мешавад. Панҷ бемор аз шумори умумии гирифторон дар марҳилаи шифоёбӣ қарор дорад.

Путин дар ҷаласаи G20 пешниҳод кард, ки таҳримҳо бекор шаванд

Владимир Путин дар ҷаласаи видеоии раҳбарони G20. 26 март, 2020.

Президенти Русия Владимир Путин дар ҷаласаи видеоии раҳбарони кишварҳои "Бистгонаи бузург" (G20) пешниҳод кард, ки таҳримҳои байналмилалӣ дар робита ба воридоти дору, маҳсулоти ғизоӣ, таҷҳизот ва техникаҳо бекор карда шаванд.

"Мо бояд ба маҳдудиятҳое, ки ба маҳсулоти ниёзи аввал ё интиқоли пул барои хариди онҳо рабт доранд, моратория эълом кунем", - афзуд Путин.

Дар Русия аз соли 2014 таҳримҳои ҷавобие амал карда, воридоти маҳсулот, аз ҷумла ғизоиро аз кишварҳое манъ мекунад, ки зидди Москва ба иллати ғасби Қрим ва низои Донбасс таҳрим эълом кардаанд.

Путин ҳамчунин пешниҳод кард, ки институтҳои байналмилалӣ ба хотири муассиртар шудани муборизаҳо бо буҳрон аз нав таъсис дода шаванд. Вале идеяи дақиқеро пешниҳод накард.

Ба гуфтаи сухангӯи президенти Русия Дмитрий Песков, дар сӯҳбати Путин бо ҳамтои фаронсавияш Эммануэл Макрон, масъалаи бекор кардани таҳримҳо баррасӣ нашудааст.

Вазири умури хориҷии Украина Дмитрий Кулеба пештар изҳори нигаронӣ карда буд, ки эҳтимол дорад, Русия аз паҳнишавии коронавирус сӯистифода карда, сабуктар ё лағви таҳримҳоро аз Иттиҳоди Аврупо дархост кунад.

Дар ҷаласаи видеоии раҳбарони кишварҳои "Бистгонаи бузург" изҳороти муштараке қабул шуда, дар он аз ҷумла омадааст, кишварҳои мазкур омодаанд, барои мубориза бо коронавирус 5 триллион доллар ҷудо кунанд. Ҳамчунин ваъда дода шудааст, ки ҷустуҷӯи ваксинаро зидди коронавирус ҳамоҳанг хоҳанд кард.

То шоми 26-уми март дар ҷаҳон беш аз 520 ҳазор одам ба коронавирус мубтало шудааст. Дар давоми як шабонарӯзи ахир шумори онҳо тақрибан 50 ҳазор афзоиш ёфтааст, ки рекордӣ мебошад. Беш аз 23 ҳазор одам аз он ҷон бохтаанд.

Шумори гирифторон ба коронавирус дар ҷаҳон аз 500 000 нафар гузашт

Катҳоро ба "карантин" дар Босния ва Ҳерзоговина омода кардаанд. 26-уми марти 2020

Бар асоси омори охирини нашршуда аз тарафи Донишгоҳи Ҷон Ҳопкинс, беш аз ним миллион нафар дар саросари ҷаҳон ба коронавирус олуда шуда, наздик ба 23 ҳазор кас ҷон бохтаанд.

Раиси Созмони Ҷаҳонии Тандурустӣ рӯзи 26-уми март ҳушдор дод, ки "коронавирус буҳрони ҷаҳонӣ аст ва вокуниши ҷаҳониро тақозо мекунад".

Бино ба омори Донишгоҳи Ҷон Ҳопкинс, рӯзи 26-уми март теъдоди мубталоён ба коронавирус ба 510 ҳазор нафар расид.

Итолиё бо беш аз 8 ҳазор қурбонӣ яке аз кишварҳои асосии ҷабрдида аз коронавирус аст. Шумори фавтидагон дар инҷо тақрибан сеяки қурбониёни коронавирус дар ҷаҳонро ташкил медиҳанд.

Аз рӯйи шумори қурбониҳо Испания дар ҷойи дувум аст. Дар ин кишвар бар асари гирифторӣ ба КОВИД-19 беш аз 4 ҳазор кас ҷон бохтаанд.

Омори навтарин баъди он нашр шуд, ки раҳбарони бист кишвари иқтисоди бузурги ҷаҳон гуфтанд, ки аз пандемияи коронавирус ҷиддан нигарон ҳастанд ва бо паёмадҳои он якҷо мубориза мекунанд.

Раҳбарони G20 ҳамчунин гуфтанд, ки ба иқтисоди ҷаҳон беш аз 5 триллион доллар сармоягузорӣ мекунанд.

Теҳрон гуфт, агенти собиқи FBI "муддатҳо пеш" Эронро тарк кардааст

Акси Роберт Левинсон

Теҳрон мегӯяд, Роберт Левинсон, агенти собиқи FBI ё Хадамоти кашфи Амрико "хеле пештар" Эронро тарк кардааст ва онҳо намедонанд, ки ӯ дар куҷост.

Ин дар ҳолест, ки хонаводаи Левинсон мепиндоранд, вай дар маҳбасе дар Эрон даргузаштааст.

Аббос Мӯсавӣ, сухангӯи Вазорати корҳои хориҷии Эрон, рӯзи 26-уми март дар изҳороте гуфт, "бар асоси шавоҳид ё далелҳои собитшуда ӯ чанд сол пеш Эронро тарк карда, ба самти номаълум рафтааст."

Вай афзуд, мақомоти расмӣ ҳама кори мумкинро карданд, то мушаххас намоянд, ки баъди аз Эрон рафтани Левинсон чӣ иттифоқ уфтод, вале дар бораи вуҷуди ӯ ҳеч иттилоъ наёфтанд.

Алиризо Мирюсуфӣ, сухангӯи маъмурияти доимии Эрон дар Созмони Милали Муттаҳид гуфт: "Эрон ҳамеша тасдиқ кардааст, ки мақомоташ дар бораи дар куҷо будани Левинсон чизе намедонанд. Ва ӯ дар маҳбаси Эрон ҳам нест. Ин фактҳо тағйир накардаанд".

Левинсон сездаҳ сол пеш, вақте 58-сола буд, дар Эрон рабуда шуд.

Мушовири амнияти миллии Кохи Сафед дар эъломияе гуфт, пеш аз ин ки Вашингтон таҳқиқотро дар мавриди Левинсон оғоз кунад, Теҳрон бояд дар ин замина маълумоти пурра диҳад.

Марги як зан бар асари гирифторӣ ба коронавирус дар Қазоқистон

Акс аз бойгонист

Як зан дар Қазоқистон бар асари гирифторӣ ба коронавирус фавтидааст. Даурен Абаев, вазири иттилоот ва рушди иҷтимоии Қазоқистон, шоми 26-уми март дар нишасти матбуотӣ гуфт, ин мавриди нахустини марги сокинон бар асари бемории КОВИД 19 дар ин кишвари Осиёи Марказӣ аст. Вай афзуд, "ин ҳолат бори дигар моро аз хатарнокии коронавирус огоҳ мекунад. Он чи ки ҳоло мегузарад, имтиҳоне барои ҳамаи мост." Бино ба иттилои навтарин, дар Қазоқистон 109 мавриди гирифторӣ ба коронавирус сабт шудааст. Аз ин шумора 61 нафар дар шаҳри Нурсултон, 40 тан дар Алмато ва ҳашт тани дигар дар Қарағандаву Чимкент, Оқтпеппа, Ҷамбул ва вилоятҳои шимолии Қазоқистон ҳастанд.

Дар Тоҷикистон 5460 нафарро ба "карантин" фаро гирифтаанд

Яке аз маконҳои каратин. Аксро аз маҳалли Зимчуруд фиристоданд

Мақомоти Вазорати тандурустии Тоҷикистон хабар доданд, ки бо ҳадафи пешгирӣ аз хуруҷи коронавирус аз моҳи феврал то 25-уми март 5460 нафар​ро ба "карантин" фиристодаанд.

Ин афрод аз хориҷ ба кишвар омада, ду ҳафта зери назорати пизишкон хоҳанд буд.

Ба қавли мақомоти Вазорати тандурустӣ, аз ин шумор аллакай ду ҳазор нафар ба хона ҷавоб шуда, наздики севуним ҳазор кас давраи карантинро паси сар мекунанд.

Дар миёни онҳо 107 шаҳрванди кишварҳои хориҷӣ будаанд.

Мақомот мегӯянд, нафарони аз хориҷ омада, давраи карантинро дар бемористони касалиҳои сироятӣ ва осоишгоҳҳо сипарӣ мекунанд.

Дар як ҳафтаи ахир шикоятҳо аз шароити нигоҳдорӣ дар маконҳои каратинӣ зиёд шуд. Ҳафтаи равон чанд нафари бозгашта аз Русия ва Дубай бо нашри аксу наворҳо дар шабакаҳои иҷтимоӣ аз он шикоят карданд, ки шароити нигоҳдориашон дар маконҳои карантинӣ тоқатфарсост.

Вазорати тандурустӣ дар пайи ин шикоятҳо ин нафаронро ба ҷойи дигар интиқол дод.

Мақомоти тоҷик мегӯянд, дар кишвар то ҳол сироятёбӣ ба коронавирус ба қайд гирифта нашудааст, аммо назорат ба хотири пешгирӣ аз ин вирус ҷиддист.

Аммо мунтақидон мегӯянд, Тоҷикистон то ҳол хатари вируси навро ҷиддӣ нагирифтааст ва аз таътили мактабу донишгоҳ ва ҷашнҳои пуриздиҳом худдорӣ намекунад.

Мулоқоти рӯ ба рӯ бо зиндониёни Узбекистон манъ шуд

Панҷараи зиндон

Тамоми маҳбасҳои Узбекистон ба "карантин" гирифта шуда, мулоқоти наздикон бо зиндониён манъ шуд.

Дар ин бора Шоҳрух Ғиёсов, намояндаи Вазорати корҳои дохилии Узбекистон ба расонаҳо хабар дод.

"Ҳамаи муассисаҳои ислоҳӣ ба карантин гирифта шудаанд. Мулоқоти наздикон бо зиндониён манъ гардид. Дар иваз ба зиндониён гуфтугӯи телефонӣ бо хешон иҷоза шудааст", - гуфт Ғиёсов.

Вай илова кард, ки вакилони мудофеъ, муфаттишон ва кормандони мақомоти қудратӣ дар сурати доштани нишонаҳои зуком ва ё шамолхӯрдагӣ ба боздоштгоҳҳо ва маҳбасҳо роҳ дода намешаванд.

"Вобаста ба вазъият тамоми раванди марбут ба тафтишот мумкин аст, ба таври фосилавӣ роҳандозӣ шавад", - афзуд намояндаи Вазорати корҳои дохилии Узбекистон.

Фаронса ва Чехия нирӯҳои худро аз Ироқ берун меоранд

Акс аз бойгонӣ

Мақомоти Фаронса гуфтанд, нирӯҳои худро аз Ироқ берун меоранд, то онҳо дар мубориза ба зидди густариши коронавирус дар кишвари худ саҳм гиранд. Ин иқдом 25-уми март, як рӯз пас аз он эълом шуд, ки Ҷумҳурии Чех, низ тасмими хуруҷи нирӯҳояш аз Ироқро гирифт. Ин нирӯҳо бахше аз маъмурияти зери раҳбарии Иёлоти Муттаҳидаи Амрико буда, ба омӯзиш ва машварат додан ба нирӯҳои ироқӣ ва кумак ба иҷрои амалиёти зиддитеррористии алайҳи ДОИШ дар Ироқ машғуланд.

Сенати Амрико ба ҷудо кардани 2 триллион доллар ризоият дод

Сенати Амрико

Сенати Амрико рӯзи 25-уми март тарҳи кумаки ду триллион доллариро қабул кард.

Тарҳ пас аз густариши коронавирус дар Амрико ба хотири ёрӣ ба иқтисод ва пуштибонӣ аз сохторҳои ин кишвар омода шудааст.

Тибқи он, имтиёзҳо барои бекорон афзоиш хоҳад ёфт. Ҳамчунин ин тарҳ 350 миллиард доллар кумак ба соҳибкории хурдро дар назар гирифтааст, то ба коргароне, ки ба хотири коронавирус хонанишин шудаанд, пул пардохта шавад.

Қарор аст, Маҷлиси Намояндагони Амрико рӯзи 27-уми март дар робита ба ин бастаи иқтисодӣ овоз диҳад. Доналд Трамп, раиси ҷумҳури Амрико, гуфтааст, тарҳро имзо хоҳад кард.

Ба ҳисоби Донишгоҳи Ҷон Ҳопкинс, дар ҳоли ҳозир беш аз ҳазор нафар бар асари гирифторӣ ба коронавирус дар Амрико ҷон бохта, тақрибан ҳафтод ҳазор каси дигар ба ин вирус олуда шудаанд.

Қабули қонуни баҳсбарангез дар бораи гирдиҳамоиҳо дар Қазоқистон

Пулис иштирокдорони гирдиҳамоии эътирозӣ дар шаҳри Нурсултонро дастгир мекунад. Акс аз бойгонӣ

Порлумони Қазоқистон дар ҷаласаи рӯзи панҷшанбе, 26-уми март, тарҳи қонун дар бораи гирдиҳамоиҳо ва эътирозҳоро қабул кард.

Ин дар ҳолест, ки ҳомиёни ҳуқуқ тарҳи қонуни мазкурро ба хотири “мутобиқ набудан ба меъёрҳои байналмилалӣ” танқид мекунанд.

Тарҳи қонуни нав талаб мекунад, ки барои ташкили гирдиҳамоӣ бо шумори зиёди одамон иҷозати расмӣ гирифта шавад ва гирдиҳамоиҳо дар ҷойҳое баргузор гарданд, ки мақомот пешниҳод мекунанд.

Қонун ҳамчунин “ҷазои сахтарро барои вайрон кардани талаботи баргузории гирдиҳамоиҳо” пешбинӣ намудааст.

Тарҳи қонуни мазкурро Вазорати иттилоот ва рушди умумии Қазоқистон моҳи феврали имсол дар баррасии умум гузошта буд. Ҳуқуқшиносон гуфтанд, мақомот тасмим доранд, ба қонуни мавҷуда дар бораи гирдиҳамоиҳо тағйирот ворид карда, ба ин тартиб, дар баргузории эътирозҳову гирдиҳамоиҳо маҳдудият ҷорӣ кунанд.

Русия ҳамаи парвозҳои байналмилалиро манъ кард

Фурудгоҳи Шереметевои Маскав

Русия барои пешгирӣ аз паҳншавии ҳарчи бештари коронавирус парвози ҳавопаймоҳоро аз фурудгоҳҳояш ба хориҷа ва аз хориҷ ба ин кишвар манъ кард.

Мақомоти Русия гуфтанд, аз 27-уми март парвозҳои нақшавӣ ва ғайринақшавӣ (чартерӣ) аз Русия ба хориҷ манъ карда мешавад.

Бар асоси қарори ҳукумати Русия, аз фардо ба таври истисно танҳо ба овардани шаҳрвандони ин кишвар аз давлатҳои гирифтор ба коронавирус иҷозат дода мешаваду бас.

Шумори гирифторшудагон ба бемории COVID-19 дар Русия дар муқоиса ба бисёре аз кишварҳои собиқи Шӯравӣ зиёдтар аст.

Тибқи омори ахир, дар Русия 840 мубталои коронавирус ҳастанд. Гирифтории одамон ба ин вирус дар 56 минтақаи ин кишвар тасдиқ шудааст.

Владимир Путин, раиси ҷумҳури Русия, рӯзи 25-уми март дар пасманзари гирифториҳо ба коронавирус баргузории ҳамапурсӣ барои ислоҳи Конститутсияро ба таъхир андохт. Қарор буд, референдум 22-юми апрел баргузор шавад.

Ин ислоҳҳо ба Путин имкон медиҳад, ки то соли 2036 дар қудрат монад.

Садҳо узбекистонӣ ба сабаби СOVID-19 дар марз дармондаанд

Марзи Қазоқистону Узбекистон

Рӯзи 25-уми март дар марзи Қазоқистон бо Узбекистон беш аз 500 кас ва дар сарҳади Қирғизистону Узбекистон зиёда аз 150 узбекистонӣ ҷамъ шуданд. Мақомоти Узбекистон ба онҳо иҷозати даромадан ба кишварро намедиҳанд.

Мақомоти Қазоқистону Қирғизистон мегӯянд, ҳоло барои ҳалли мушкил бо ҷониби Узбекистон гуфтугӯ доранд. Ба қавли ҳамсуҳбатони мо, мақомоти Узбекистон гуфтаанд, ба шаҳрвандонашон танҳо пас аз омода шудани ҷойҳои карантин иҷозати даромадан медиҳанд.

Нуқус Пӯлоди 35-сола яке аз онҳое аст, ки дар шаҳри Атирауи Қазоқистон кор мекард ва ҳоло ҳангоми баргашт ба ватан дар марзи Қазоқистон бо Узбекистон банд мондааст.

"23-юми март тавассути гузаргоҳи "Тажен" хостам ба ватан баргардам, вале касеро даромадан намемонданд. Онҷо 400 кас ҷамъ шуда буд. Дар миёнашон онҳое буданд, ки аз Русия тавассути Қазоқистон ба Узбекистон бармегаштанд. Марз пурра бастааст. Тасмим гирифтам дубора ба Атирау баргардам. Бархе аз шиносҳоям низ баргаштанд, вале бисёриҳо мунтазири боз шудани марзанд", - гуфт ӯ.

Мақомоти Узбекистон шоми 24-уми март ба як гуруҳи пиронсолон, кӯдакон ва занон иҷозати вуруд ба кишварро додаанд.

Раиси ҷамъияти узбекони Қазоқистон Икром Ҳошимҷонов мегӯяд, дар ҳоли ҳозир ҳудуди 500 кас мунтазири иҷозати даромадан ба Узбекистон ҳастанд.

"Узбекистон аз 23-юми март марзҳои худро баст, бинобар ин, мардуми зиёд ҷамъ шудааст. Сабаб дар он аст, ки дар дохили Узбекистон барои ба карантин гирифтан ҷой омода доранд. 23-юми март 629 кас ва 24-уми март 800 кас марзи Қазоқистону Узбекистонро гузаштанд. Ҳамаашон ба карантин гирифта шудаанд. Ҳоло 500 каси дигар мунтазиранд", - афзуд Ҳошимҷонов.

Ба гуфтаи ӯ, дар миёни дармондаҳо 47 шаҳрванди Тоҷикистон низ ҳастанд, ки мехостанд, ба воситаи Узбекистон ба ватан баргарданд ва ҳоло сафорати Тоҷикистон барои ҳалли мушкили шаҳрвандони худ бо мақомоти узбек гуфтугӯ доранд.

Узбекистон аз 16-уми март ба далели ошкор шудани коронавирус ё худ СOVID-19 равуои ҳавоӣ ва заминиро бо кишварҳои хориҷ манъ кард. Аз он рӯз вуруди хориҷиҳо ба Узбекистон манъ шуда, аз шаҳрвандони ин кишвар даъват мешавад, ба ватан баргарданд.

Раҳоии маҳбусон дар суҳбати "рӯ ба рӯ"-и ҳукумат бо Толибон

Аъзои зиндонии Толибон ҳангоми суҳбат бо "Ассошиэйтед Пресс" дар маҳбаси Пули Чархӣ дар Кобул

Мансабдорони ҳукумати Афғонистон дар рӯзҳои наздик бо намояндагони ҷунбиши Толибон мулоқот карда, оғози раҳоии ҷангҷӯён аз маҳбусро баррасӣ мекунанд.

Дар ин бора Шӯрои амнияти миллии Афғонистон хабар дод.

“Дар рӯзҳои наздик тими Толибон бо ҳукумати Афғонистон мулоқоти рӯ ба рӯ анҷом дода, озодии 100 маҳбусро то 31-уми март муҳокима мекунад", - навишт намояндаи расмии Шӯро Ҷовид Файсал дар Твиттер.

Вай илова кард, аз Толибон кафолат гирифта мешавад, ки маҳсубони озодшуда дубора ба майдони ҷанг бар нахоҳанд гашт.

Суҳайл Шоҳин, намояндаи Толибон дар твиттер навишт, "озодии маҳбусон амалан аз охири моҳи март шуруъ мешавад".

Вай гуфт, тими Толибон ба самти маҳбаси "Багром" дар шимоли шаҳри Кобул равона мешавад, ки мақомоти Афғонистон Толибони зиёдеро дар онҷо нигаҳ медоранд.

Ёфтҳои бештар

XS
SM
MD
LG