Пайвандҳои дастрасӣ

Хабари нав

Хабарҳо

Қазоқистон дар феҳристи кишварҳои маҳдудкунандаи озодиҳои мазҳабӣ

Маркази пажуҳишие дар Вашингтон Қазоқистонро ба гуруҳи кишварҳое шомил кардааст, ки озодиҳои мазҳабиро маҳдуд мекунанд. Дар гузориши маркази пажуҳишии Pew Research, ки рӯзи 15 июл нашр шуд, озодиҳои мазҳабии 198 кишвар таҳлил шудааст.

Қазоқистон дар ин гузориш дар рӯйхати "маҳдудсозиҳои густарда" (6,6 ва болотар аз он) шомил шудааст. Дар ин рӯйхат Чину Эрон пешсафтар ҳастанд. Арабистони Саудӣ, Озарбойҷон, Туркманистон, Узбекистон ва Русия низ дар ин рӯйтах шомиланд.

Дар гузориш омадааст, ки дар Қазоқистон бидуни мувофиқат ба мақомоти расмӣ таҳия, нашр ва паҳнсозии адабиёти динӣ манъ аст.

Дар ҳамин ҳол, Қазоқистон дар қатори кишварҳое шомил шудааст, ки камтарин низоъҳои иҷтимоиро бо баҳонаҳои мазҳабӣ доранд. Таҳлилгарони маркази мазкур менависанд, низоъҳои иҷтимоӣ дар заминаи мазҳабӣ сар аз соли 2007 ба ин тараф дар ҷаҳон бештар шудааст.

Pew Research Center - маркази таҳлилии мустақилест, ки ҷомеаро дар бораи мушкилот ва тамоюлҳои ИМА ва ҷаҳон огоҳ месозад

Ҳамаи хабарҳои имрӯзро дар инҷо бихонед

Дар таркиши Бейрут консул ва бинои сафорати Қазоқистон осеб дидааст

Намое аз шаҳри Бейрут пас аз таркиш. 5 август, 2020.

Вазорати умури хориҷии Қазоқистон хабар дод, ки дар натиҷаи таркиш дар шаҳри Бейрути Лубнон консули ин кишвар "захми на он қадар ҷиддӣ" бардоштааст. Кормандони боқӣ он замон бинои сафоратро тарк карда буданд, зеро соати корӣ ба поён расида буд. Бинои худи сафорат низ осеб дидааст.

Дар шаҳри Бейрут 4 август таркиши бузурге рух дод, ки дар натиҷаи он даҳҳо нафар кушта ва ҳазорон тани дигар захмӣ шудаанд.

Ҳасан Ҳамад, вазири тандурустии Лубнон ва мақомҳои дигари ин кишвар гуфтаанд, ҳадди ақал 78 нафар дар пайи ин таркиш кушта шуда, наздик ба чаҳор ҳазор нафар захм бардоштаанд. Ҳасан Ҳамад афзудааст, омори талафот афзоиш хоҳад ёфт ва ин омори ибтидоӣ аст.

Ба гузориши хабаргузориҳо, садои таркиш ба андозае шадид будааст, ки дар ҳама гӯшаҳои шаҳр ва минтақаҳои атрофи он шунида шудааст. Шабакаҳои хабарӣ мегӯянд, шумори зиёде аз хонаҳо дар наздикии маҳали таркиш комилан вайрон шудаанд.

Генерал Аббос Иброҳим, мудири кулли Идораи амнияти умумии Лубнон дар бораи ин таркиш ба шабакаи телевизионии Ал-Ҷазира гуфтааст, "Ончи дар Бейрут рух дод, инфиҷори маводи таркандаи оташбозӣ ё тарфгарӣ (хлопушка) набуд, балки таркиш дар маҳали нигаҳдории маводи қобили таркиш буд, ки тайи солҳои ахир дар инҷо нигоҳ дошта мешуд".

Дар ҳамин ҳол, расонаҳо ва мақомҳои лубнонӣ мегӯянд, бори ду ҳазору 750 тоннаии нитрати аммоний, ки тайи шаш соли гузашта дар бандари Бейрут боз дошта шуда буд, боиси таркиши бузург дар пойтахти Лубнон шудааст. Генерал Аббос Иброҳим таъкид кард, ки бидуни анҷоми таҳқиқот наметавон иддао кард, ки таркиш як иқдоми террористӣ будааст.

Маҳбусони фирории узбек дар Қирғизистон боздошт шуданд

Марзи Қирғизистон-Узбекистон. Акс аз бойгонӣ.

Марзбонони Қирғизистон ба ҳамтоёни узбеки худ дар боздошти ду маҳбуси фирорие кумак карданд, ки мехостанд Узбекистонро тарк кунанд.

Ба огаҳии Хадамоти марзбонии Қирғизистон, маҳбусони фирорӣ ҳангоми кушиши убур аз марз дастгир ва ба ҷониби Узбекистон таслим шудаанд.

Ҳодиса дар деҳаи Бел-Согот ноҳияи Оқсойи вилояти Ҷалолободи Қирғизистон рух додааст. Ду шаҳрванди Узбекистон, 24 ва 29-сола дар натиҷаи амалиёти муштараки марзбонони қирғиз бо Вазорати умури дохилии Узбекистон дастгир шуданд.

Ҷониби Узбекистон пештар Қирғизистонро огаҳ карда буд, ки ду маҳбус аз зиндони Зангиотаи вилояти Тошканд фирор кардаанд ва эҳтимол дорад, ба он кишвар паноҳ баранд.

Медведев сахттар кардани қоидаҳои вуруди муҳоҷирон ба Русияро пешниҳод кард

Дмитрий Медведев.

Сарвазири пешин ва муовини раиси Шӯрои амнияти Русия Дмитрий Медведев даъват кард, ки тартиби вуруди муҳоҷирони корӣ ба ин кишвар бозбинӣ шавад. Ба гуфтаи ӯ, ба муҳоҷирон бояд танҳо баъди пешниҳоди қарордоди корӣ бо корфармо иҷозати вуруд ба Русия дода шавад.

Медведев ҳангоми суханронӣ дар ҷаласаи Шӯрои амнияти Русия гуфт, то 40 дарсади муҳоҷирони кории хориҷӣ дар натиҷаи ҳамагир шудани коронавирус ҷои кори худро аз даст додаанд ва ҳоло дар як вазъи сахти иқтисодӣ дар кишвараш қарор доранд. Ба назари ӯ, ин падида ба афзоиши ҳолатҳои ҷинояткорӣ дар Русия мусоидат мекунад.

Аз ин рӯ, Медведев пешниҳод кард, ки тартиботи вуруди муҳоҷирони корӣ ба Русия ба монанди кишварҳои арабӣ бозбинӣ шавад. Барои намуна, хориҷиҳо танҳо баъд аз пешниҳоди қарордоди корӣ бо корфармо иҷозати вуруд ба Русияро дарёфт кунанд.

"Дар кишварҳои арабӣ қарори дигаре низ ҳаст, ки масъулияти тамоми амалҳои коргари хориҷиро бар зиммаи корфармо мегузорад. Ин чораи сахт аст, вале бояд онро омӯхт",-афзуд муовини раиси Шӯрои амнияти Русия.

Вале коршиносоне, ки бо ҳимояти ҳуқуқи муҳоҷирон машғул ҳастанд, аз пешниҳоди Медведев ҷонибдорӣ намекунанд. Онҳо мегӯянд, бар асоси омори Вазорати умури дохилии Русия сатҳи ҷинояткорӣ дар миёни муҳоҷирон дар давраи коронавирус назар ба соли гузашта поин рафта, нигаронии Медведев асос надорад.

Ҳамчунин барномае, ки Медведев пешниҳод кардааст, аллакай дар Русия амал мекард, вале комёб нашуд. Соли 2017 миёни Русия ва Узбекистон қарордод дар бораи "интихоби кадрҳо" имзо шуд.

Дар доираи ин барнома корфармо бояд пешакӣ бо муҳоҷир қарордоди корӣ имзо кунад, то дар оянда ҳуқуқҳояш ҳимоят шаванд. Давоми се сол тавассути ин барнома танҳо 10 ҳазор нафар барои кор ба Русия рафтааст.

FBI дафтарҳои ширкати "рафиқ"-и раиси ҷумҳури Украинро тафтиш кард

Игор Коломойский раиси вилояти Днепропетровск ҳам буд.

Муфаттишони FBI ва ё Хадамоти Федеролии Таҳқиқоти Амрико идораҳои ширкатҳои як сармоядори сарватманди украиниро ҷустуҷӯ кардаанд, ки ба раиси ҷумҳур Володимир Зеленский робита дорад. Тафтиши дафтарҳои ширкати Игор Коломойский дар Кливленд ва Маямӣ рӯзи 4-уми август сурат гирифтааст, ки расонаҳои ӯ ҳангоми маъракаҳои интихоботӣ дар соли 2019 ғайрирасмӣ ба Зеленский кӯмак мекарданд.

Яке аз мақомҳои Хадамоти Федеролии Таҳқиқоти Амрико ба Радиои Озодӣ гуфт, ки дар воқеъ муфаттишон дар идораҳои ширкат буданд, вале касе дастгир нашудааст ва ҷузъиёти тафтишот ҳам ошкор карда намешавад. Коломойский ва ҳамкори украиниаш Геннадий Боголюбов дар Маямӣ чанд ширкат доранд. Расонаҳои Амрико моҳи апрели соли 2019 ва моҳи майи имсол гузориш доданд, ки FBI парвандаи пулшӯии Игор Коломойскийро тафтиш мекунанд, вале хадамот ин хабарҳоро тасдиқ накарда буд.

Коломойский ва Боголюбов ду сармоядори бонуфузи Украина ҳастанд ва баъди ба қудрат расиданди Владимир Зеленский аз хориҷ ба кишварашон баргаштанд. Иртиботи наздики Коломойский бо Зеленский мояи нигаронии шарикони ғарбии Украина аст, ки гуфтаанд, ба шарти кам кардани нуфузи сармоядорон дар ислоҳоти иқтисодӣ ба Киев кӯмак мекунанд.

Луя Ҷирга сарнавишти Толибони зиндониро баррасӣ мекунад

Луя Ҷирга қабиласолорон ва шахсиятҳои шинохтаи Афғонистонро дар бар мегирад. Ҷаласаи моҳи майи соли 2019

Ҳукумати Афғонистон ҷаласаи Луя Ҷирга, шӯрои қабиласолоронеро даъват кард, ки бояд сарнавишти садҳо зиндонии Толиберо баррасӣ кунанд, ки раҳбаронашон мехоҳанд, пеш аз оғози музокироти сулҳ озод карда шаванд. Ҷаласа рӯзи 7-уми август сурат мегирад.

Раиси ҷумҳур Ашраф Ғанӣ ҳафтаи гузашта амр дод, ки 500 зиндонии Толибон ба нишонаи ҳусни ният озод карда шаванд. Толибон қабл аз Иди Қурбон барои се рӯз оташбас эълон карданд ва ҳукумат ба он розӣ шуд. Оташбас рӯзи 31-уми июл ба иҷро даромад.

Ашраф Ғанӣ рӯзи 31-уми июл зимни суханроние дар телевизион гуфт, ки ҳукумат 4600 зиндониёни Толибро раҳо кардааст. Бар асоси созиши Амрикову Толибон, ки моҳи феврал имзо шуд, ҳукумат бояд 5 000 Толибро аз зиндонҳо озод кунанд.

Ашраф Ғанӣ гуфт, ки бар асоси Қонуни Асосӣ ҳукумат ҳақ надорад, 400 Толиби боқимондаро озод кунад, чун онҳо барои ҷиноятҳои ҷиддие паси панҷара рафтаанд. Ӯ гуфт, ки барои таъйини сарнавишти ин гуруҳи зиндониён ҷаласаи Луя Ҷиргаро даъват мекунад. Толибон мегӯянд, бар асоси аҳди додаашон бо Амрико ҳамаи 1000 корманди ҳукуматиро, ки дар асорат доштанд, озод кардаанд.

Мақомот нагузоштанд, Тихановская гирдиҳамоӣ баргузор кунад

Мақомоти интизомӣ рӯзи 4-уми август иҷоза надоданд дар шаҳри Салигорск, гирдиҳамоии мухолифон сурат бигирад.

Мақомоти Беларус дигарбора иҷоза надодаанд, ки Светлана Тихановская, номзад ба мақоми раиси ҷумҳур чорабиниҳои таблиғотӣ баргузор кунад, чун ба гуфтаи онҳо дар маҳалли гирдиҳамоиҳо корҳои сохтмонӣ сурат мегирад. Интихоботи раёсати ҷумҳурӣ рӯзи 9-уми август баргузор мешавад.

Дар шаҳри Слутск, 100 километрии ҷануби Минск мақомот рӯзи 4-уми август гуфтанд, маҳалле, ки бояд гирдиҳиҳамои мухолифон сурат мегирифт, ба таъмири фаврӣ зарурат дорад. Маркази ҳуқуқии “Весна” гуфт, ки маъмурони амниятӣ ва пулис камаш 17 нафар аз тарафдорони мухолифонро дастгир карданд, ки барои ширкат дар гирдиҳамоӣ ҷамъ омада буданд.

Светлана Тихановская ҳамчунин маҷбур шуд, як ҳамоиши дигареро дар шаҳри Салигорск лағв кунад. Дар майдони варзишие, ки гирдиҳамоӣ сурат мегирифт, мақомот экскаватор оварда ва нақб кандаанд. Пулис инҷо омада, мардумро пароканда карда ва 5 нафарро бурдааст.

Амрикои Лотинӣ аз назари талафот аз вирус Аврупоро гузашт

Табиби мексикоӣ ба бемори шифоёфтае менигарад.

Амрикои Лотинӣ аз назари талафот аз бемории COVID-19 аз Аврупо гузашт ва дар умум шумораи фавтидагон дар саросари ҷаҳон аз 700 ҳазор нафар гузашт. Дар Амрикои Лотинӣ марги 206 000 нафар аз коронавируси нав сабт шудааст, ки 30 дар сади талафот дар ҷаҳонро ташкил медиҳад.

Ҳафтаи гузашта теъдоди сироятшудагон дар Амрикои Лотинӣ ба 5 миллион нафар расид, ки бештар аз ҳар қораи дигар аст. Дар Бразилия, ки аз назари талафот пас аз Амрико дар мақоми дуввум аст, то кунун 95 800 нафар ҷон бохтаанд.

Мексика бо 49 ҳазор фавтида дар зинаи саввум аст. Баъзе аз кишварҳои минтақа пеш аз онки ҷилави бемориро бигиранд, барои ба ҳаракат даровардани иқтисод, маҳдудиятҳои равуо ва фаъолиятҳои иқтисодиро сабуктар карданд.

Дар саросари ҷаҳон то кунун бештар аз 18 миллиону 500 ҳазор нафар ба COVID-19 сироят кардааст. Дар бисёре аз кишварҳои Аврупо, ки бо маҳдуд кардани равуову фаъолиятҳои иқтисодӣ роҳи густариши босуръати вирусро гирифтанд, дар чанд ҳафтаи гузашта сироят зиёдтар шудааст.

Туркманистониҳоро барои напӯшидани ниқоб ҷарима мекунанд

Занони туркман дар яке аз хиёбонҳои Ишқобод.

Дар Туркманистон ҷарима кардани сокинонро барои напӯшидани ниқоби тиббӣ оғоз карданд. Ин дар ҳолест, ки мақомоти туркман мегӯянд, дар ин кишвар ҳанӯз ягон ҳолати мубталошавӣ ба коронавирус сабт нашудааст.

"Маъмурони пулис одамони бениқобро боздошт карда, зуд ба шуъба мебаранд ва 60 манат (17 доллар) ҷарима мекунанд", - иттилоъ медиҳад хабарнигори бахши туркмании Радиои Озодӣ.

Ба гуфтаи хабарнигор, аз боздоштшудаҳо ҳамчунин баёнот гирифта мешавад, ки дар оянда бидуни ниқоб ба кӯча намебароянд.

Ронандагони бениқобро ҳам дастгир карда, ба шуъбаи пулис мебаранд. Онҳоро дар ҳаҷми 50 манат ҷаримаи иловагӣ хоҳанд кард.

Бино ба иттилои расмӣ, дар Туркманистон то ҳол мубталошавӣ ба коронавирус ба қайд гирифта нашудааст. Вале Вазорати тандурустии он кишвар ба сокинон тавсия додааст, ки ниқоб пӯшанд ва фосилаи иҷтимоиро дар ҷойҳои ҷамъиятӣ риоя кунанд.

Аз президенти Қирғизистон хостанд, пеши роҳи "низоми қабилавию олигархӣ"-ро бигирад

Мухолиф ва вакили пешини порлумони Қирғизистон Бектур Асанов бо нашри як муроҷиатномаи видеоӣ аз президент Сооронбой Ҷеенбеков хост, нисбат ба муовини пешини раиси Хадамоти гумруки ин кишвар Райимбек Матраимов, маъруф ба "Райим миллион" чора андешад.

Асанов гуфт, фасодкорие, ки дар солҳои аввали истиқлоли Қирғизистон оғоз шуда буд, дар давраи ҳукумати кунунӣ низ идома дорад.

"Мутаассифона, фасодкории олигархӣ, роҳзанона ва қабилавие, ки дар давраи президентии Аскар Акаев ташкил шуда буд, дар давраи Сооронбой Ҷеенбеков низ идома дорад. Аз президент даъват мекунем, фавран нисбат ба раҳбари ин гуруҳ "Райим миллион" чораи қонунӣ андешад. Мо талаб дорем, ки президент то порлумони интихоботӣ ошкоро эълом кунад, ки аз кӣ - мардуми Қирғизистон ё гуруҳи роҳзанҳо ҷонибдорӣ менамояд",-изҳор медорад Асанов.

Дастгоҳи президенти Қирғизистон то ҳол ин муроҷиатномаро шарҳ надодааст.

Ғарби Туркманистонро бо ҳавопаймо зиддиуфунӣ карданд

Шаҳри Туркманобод.

Мақомоти вилояти Балкани Туркманистон тавассути ҳавопаймо ба шаҳри Туркманобод маводи зиддиуфунӣ пошиданд.

Ба иттилои хабарнигори бахши туркмании Радиои Озодӣ, шаҳрро дар рӯзҳои Иди қурбон "безарар" гардонданд. Давоми се рӯз сокинон ҳақ надоштанд, ки аз хона берун бароянд. Маводи зиддиуфуниеро, ки ҳавопаймо пошидааст, бо пули кормандони муассисаҳои буҷавӣ ва низомиён харидаанд.

Шаҳри Туркманбошӣ беш аз 70 ҳазор аҳолӣ дорад ва он маркази саноати коркарди нафт дар Туркманистон шумурда мешавад.

Мақомоти Туркманистон ҳамоно иддао доранд, ки дар ин кишвар коронавирус ба қайд гирифта нашудааст. Дар ҳоле ки аз охирҳои моҳи июл ба ин сӯ дар Туркманистон фаъолияти марказҳои бузурги савдо, бозору театр, боғ ва ширкатҳои хидматрасонӣ қатъ гаштааст. Ҳаракати қатораҳои мусофирбар ва парвози ҳавопаймо низ қатъ шуда буд.

Ҳайати Созмони ҷаҳонии тандурустӣ миёнаҳои моҳи июл дар поёни сафараш ба Туркманистон ба Ишқобод андешидани чораҳоеро тавсия дода буд, ки дар давраи ҳамагир шудани коронавирус лозиманд.

Баъд аз гузорише дар бораи Раҳмон, хабарнигори "Настоящее Время" бе парвонаи кор монд

Эмомалӣ Раҳмон, раиси ҷумҳурии Тоҷикистон ҳангоми сафараш ба ноҳияҳо

Вазорати корҳои хориҷии Тоҷикистон Анӯшервон Орифов, хабарнигори телевизиони "Настоящее Время", як бахши Радиои Аврупои Озод/Радиои Озодиро аз аккредитатсия ё парвонаи кор маҳрум кард. Дар ин бора мақомот рӯзи 4-уми август намояндаи дафтари Радиои Озодиро дар Душанбе расман огоҳ намуданд.

Муҳлати иҷозаи кори Анӯшервон Орифов рӯзи 1-уми август ба поён расид, вале масъулони вазорат онро дароз накарданд.

Мақомоти Тоҷикистон аз нашри ду матлаби вобаста ба равишҳои таблиғи эҳтимолии пеш аз интихоботи президентӣ дар пойгоҳҳои Радиои Аврупои Озод/Радио Озодӣ норозӣ ҳастанд ва онро "муғризона" медонанд. Муаллифи яке аз ин матлабҳо Анӯшервон Орифов аст.

Қарор аст, тирамоҳи имсол дар Тоҷикистон интихоботи президентӣ баргузор шавад, аммо санаи дақиқи он ҳанӯз эълон нашудааст. Новобаста аз ин, дар ин давра сафарҳои президент Эмомалӣ Раҳмон ба минтақаҳои кишвар афзуд ва бозтоби сафарҳои ӯ дар расонаҳо ва шабакаҳои иҷтимоӣ бештар шуд.

Соли 2016 баъд аз нашри хабаре дар бораи соҳиби мақом шудани яке аз духтарони раиси ҷумҳур дар Вазорати умури хориҷӣ, парвонаи кори хабарнигорони Радиои Озодиро дар Душанбе бозхонд карда буданд.

Дар ҳоли ҳозир вазорат аз додани парвонаи кор ба чандин корманди Радиои Озодӣ дар Тоҷикистон худдорӣ мекунад.

Албания як ҷавони тоҷикро ба Душанбеву Маскав надод, ба Олмон супурд

Фурудгоҳи Франкфурт. Олмон. Акс аз бойгонӣ.

Албания шаҳрванди 24-солаи Тоҷикистон Комрон Зуҳуровро, ки ба узвият дар гурӯҳи тундрави "Давлати исломӣ" ё ДОИШ муттаҳам мешавад, ба мақомоти Олмон таслим кардааст. Додситонӣ рӯзи сешанбе гуфт, ин гурӯҳ қасд дошт ба муассисаҳои низомии Амрико дар Олмон ҳамла кунад.

Додгоҳе дар Тирана, пойтахти Албания моҳи июни имсол гуфта буд, Зуҳуровро "бо сабаби эҳтимолан мавриди шиканҷа қарор гирифтанаш" ба Русия ва Тоҷикистон намефиристад.

Чаҳор шаҳрванди дигари Тоҷикистон дар миёнаҳои моҳи апрели имсол дар Олмон боздошт шуда буданд ва раҳбари эҳтимолии онҳо аз моҳи марти соли 2019 ба ин тараф дар боздошт ба сар мебарад.

Тафтишот мегӯяд, Комрон Зуҳуров ва гумонбарони дигар дар моҳи январи соли 2019 ба сафи ДОИШ пайваста, ният доштанд ба Тоҷикистон сафар кунанд ва бо ҳукумати он кишвар мубориза баранд.

Комрон Зуҳуровро моҳи майи имсол бо дархости Олмон дар Албания боздошт карданд.

Вакили дифои Зуҳуров – Аслан Додҷанӣ дар додгоҳ гуфтааст, нафари зери ҳимояти ӯ иттиҳоми тафтишоти Олмонро рад кардааст. Додҷанӣ гуфтааст, пеш аз ҳабсаш Зуҳуров давоми ду сол дар Олмон зиндагӣ мекард ва моҳи феврали имсол ба Албания барои дидани холааш рафт.

Вакили дифои ҷавони тоҷик гуфтааст, ӯ худро ихтиёран ба полис таслим кард.

Мақомоти Олмон рӯзи 15-уми апрел эълон карданд, ки панҷ шаҳрванди Тоҷикистонро бо гумони тарҳрезӣ ва қасди ҳамлаи террористӣ дар сарзамини Рейни Шимолӣ-Вестфалия боздошт кардаанд. Яке аз ин гумонбарон як сол пеш боздошт шуда дар зиндон қарор дошт.

Додситонии ин кишвар аз онҳо Азизҷон Б., Муҳаммадалӣ Г., Фарҳодшоҳ К., Суннатуллоҳ K. ва Равшан Б. ном бурд.

Додситонҳо мехоҳанд, ҳисоботҳои молиявии Доналд Трампро тафтиш кунанд

Сайрус Ванес аз додгоҳ хостааст, ки амр бидиҳад,то санадҳои дигари Доналд Трампро барои тафтиш дар ихтиёри додситонҳо бигузоранд.

Яке аз додситонҳои Ню Йорк мегӯяд, ки таҳқиқи парвандаи тиҷоратҳои раиси ҷумҳур Доналд Трампро васеътар кардааст ва ҳоло тақаллубҳои эҳтимолии бонкӣ ва бимаи ширкатҳои ӯро тафтиш мекунанд. Сайрус Ванс, додситони Манҳеттен рӯзи 3-уми август гуфт, аз тариқи додгоҳ талаб кардаанд, ки санадҳои хусусии раиси ҷумҳур ва ҳисоботи молиёти ширкатҳояшро дар ихтиёри додситонҳо гузорад.

Дархост аз додгоҳ бахше аз тафтишоти парвандаи Трамп аст, ки ба пардохти “ҳаққи сукут” ба ду зане, муттаҳам мешавад, ки гӯё Доналд Трамп бо онҳо робитаи маҳрамона доштааст ва қабл аз интихоботи раёсати ҷумҳурӣ ба онҳо пул додааст, ки ин сирро пинҳон доранд. Доналд Трамп ин иддаоро рад кардааст.

Вакилонаш аз додгоҳ тақозо кардаанд, ки дархости додситонро рад кунад. Додситонҳои Ню Йорк ҷузъиёти дархост аз додгоҳро ошкор накардаанд, вале гузоришҳои матбуотиеро ёдрас шудаанд, ки дар онҳо омадааст, Доналд Трамп, барои камтар пардохтани молиёт доир ба арзиши моликияту тиҷоратҳояш иттиллои нодуруст додааст.

Медведев гуфт, ҷинояткорӣ дар байни муҳоҷирон зиёд шудааст

Дмитрий Медведев гуфтааст, ки 40 дар сади муҳоҷирон бекор мондаанд.

Дмитрий Медведев, муовини раиси Шӯрои Амнияти Миллии Русия гуфт, ба сабаби пандемияи коронавирус, ҷинояткорӣ дар байни муҳоҷирон дар кишвараш зиёд шудааст. Медведев ҳангоми ҷаласаи шӯро дар рӯзи 3-уми август гуфт, ки дар натиҷаи пандемия 40 дар сади муҳоҷирон дар Русия аз ҷойи корашон маҳрум шудаанд.

Ӯ афзудааст, чунин шароит “бешубҳа барои афзоиши ҷиноят замина месозад”. Вазорати умури дохилии Русия рӯзи 25-уми июл муҳоҷиронро ба афзоиши ифротгароӣ, вайрон кардани тартиботи ҷамъиятӣ ва тазоҳуроти беиҷоза муттаҳам кард. Ду рӯз баъд аз ин Хадамоти Федеролии Амнияти Русия гуфт, ки як муҳоҷири тоҷикро, ки қасди ҳамлаи террористӣ дар Маскав дошт, куштааст.

Аксари муҳоҷирон дар Русия аз кишварҳои Осиёи Марказӣ аз ҷумла Тоҷикистон ҳастанд, ки дар сохтмонҳо кор мекунанд ва ба поккории кӯчаву хиёбон ва хонаҳо машғуланд. Дмитрий Медведев гуфт, мумкин аст, ки Русия муқаррароти қабули муҳоҷиронро сахттар кунад ва дар сурати қонуншиканиҳои онҳо, ҷавобгарии ширкатҳои кордиҳандаро бештар кунад.

Сапкало мегӯяд, Лукашенко аз тазоҳургарон метарсад

Валерий Сапкало аз ҳаққи ширкат дар интихобот маҳрум шудааст.

Валерий Сапкало яке аз рақибони табъидии Александр Лукашенко, раиси ҷумҳури Беларус мегӯяд, дар сурати тазоҳуроти бузург баъд аз интихобот, ин раҳбари худкома ба зидди тазоҳургарон аз нерӯ истифода нахоҳад кард.

Мухолифат ба Лукашенко, ки 26 сол аст, Беларусро раҳбарӣ мекунад, дар арафаи интихоботи рӯзи 9-уми август зиёд шудааст, бо вуҷуди онки таҳлилгарон мегӯянд, ки ӯ дигарбора бо истифода аз тақаллуб ва саркӯби мухолифон дар интихобот пирӯз мешавад.

Валерий Сапкало, тоҷири шинохта ва сафири собиқ, ки аз рақибони ҷиддии Лукашенко ба ҳисоб меравад, гуфтааст, ки дар сурати тазоҳуроти садҳо ҳазор нафар ҳангоми интихобот ва баъди он мумкин аст, ки Александр Лукашенко аз кишвар бигурезад. Ӯ дар суҳбат бо телевизиони “Настояшее Время” гуфт, ки ӯ шояд Лукашенко ба ҳавопаймо нишаста ва ягон ҷо биравад.

Мақомоти Беларус Валерий Сапкало ва видеоблоггери шинохта Сергей Тихановскийро аз ҳаққи ширкат дар интихобот маҳрум карданд. Сапкала, аз тарси онки мисли ду довталаби мақоми курсии раиси ҷумҳур боздошт шавад, аз Беларус гурехт.

Коршиносони СММ гуфтаанд, Куриёи Шимолӣ бомби хурди атомӣ сохтааст

Куриёи Шимолӣ то кунун 6 дафъа озмоиши атомӣ анҷом додааст.

Баъзе аз кишварҳо бовар доранд, ки Куриёи Шимолӣ бомби хурди атомие сохтааст, ки метавонад, ба мушакҳои баллистикӣ насб ва партоб кунад. Ин хулосаи гуруҳе аз коршиносони Созмони Милали Муттаҳид аст, ки дар як гузорише ба Шӯрои Амният пешниҳод кардаанд. Хабаргузориҳои “Ройтерс” ва Хабаргузории Олмон гуфтанд, ки гузориши мазкурро рӯзи 3-уми август ба 15 узви Шӯрои Амният пешниҳод кардаанд ва онро бар асоси иттилооте таҳия кардаанд, ки аз кишварҳои узви Созмони Милал омода шудааст.

Дар гузориш омадааст, ки Куриёи Шимолӣ ҳамчунон барномаҳои атомиашро идома медиҳад, аз ҷумла ураниуми ғализ истеҳсол карда ва як реактори таҷрибавии оби сабук месозад. Куриёи Шимолӣ то кунун 6 дафъа озмоишҳои атомӣ анҷом додааст ва охирини он моҳи сентябри соли 2017 буд. Ким Ҷонг Ун, раҳбари Куриёи Шимолӣ ҳафтаи гузашта гуфт, ки бомби атомӣ амният дар кишварашро замонат медиҳад.

Доналд Трамп, раиси ҷумҳури Амрико ва раҳбари Куриёи Шимолӣ аз соли 2018 то кунун се дафъа бо ҳам мулоқот кардаанд, вале ба ҳеҷ пешрафте ноил нашудаанд. Амрико аз Куриёи Шимолӣ мехоҳад, аз сохтани силоҳҳои атомӣ даст бикашад, Пхенян мехоҳад, таҳримоти байналмилалӣ ба зидди онро бардоранд. Бинобар ҳамин барномаҳои атомӣ ва сохти мушакҳои баллистикӣ Куриёи Шимолӣ аз соли 2006 то ҳол зери таҳримоти Созмони Милал қарор дорад.

Бонки авросиёии рушд ба Тоҷикистон $50 млн қарз дод

Акс аз бойгонӣ.

Бунёди авросиёии рушд барои мубориза бо оқибатҳои бемории COVID-19 ба Тоҷикистон 50 миллион доллар қарзи боимтиёз ҷудо кард. Дар изҳороти созмон аз 3-уми август гуфта мешавад, ки Шӯрои роҳбарон чунин қарор қабул кард.

Гуфта мешавад ин маблағ барои иҷрои барномаи ҳукумат ва Бонки миллии Тоҷикистон барои муқобила бо оқибатҳои иқтисодӣ, иҷтимоӣ ва молиявии кишвар ихтисос дода шудааст.

Қарз ба муҳлати 20 сол ба Тоҷикистон дода шудааст ва муҳлати имтиёзноки он 10 сол мебошад. Пас аз ин муҳлат кишвар барои бозгардони ин қарз шурӯъ мекунад. Баҳраи солонаи қарз 1 фоиз дар сол муайян шудааст.

Мақомот дар Тоҷикистон мегӯянд, то кунун аз созмонҳои байналмилалӣ барои мубориза бо COVID-19 ва оқибатҳои иҷтимоиву иқтисодии он 260 миллион доллар ҷалб кардаанд.

Ба ҳисоби мақомот Тоҷикистон барои рафъи таъсири манфии ношӣ аз COVID-19 дар умум ба 650 миллион доллар ниёз дорад.

Дар Қирғизистон як марди 101-сола аз COVID-19 шифо ёфтааст

Қирғизистон. Акс аз бойгонӣ.

Вазири тандурустии Қирғизистон Айнура Акматова рӯзи душанбе 3-уми август гуфт, ки дар ин ҷумҳурӣ як марди 101-сола аз бемории COVID-19 шифо ёфта, аз бемористон раҳо шуд. Акматова афзуд, дар 24 соати гузашта 410 ҳодисаи нави сирояти COVID-19 дар ин кишвар ба қайд гирифта шудааст. Шумораи умумии сироятёфтагон ба 37 ҳазору 129 нафар расид. Ӯ афзуд, бар асари бемории коронавирус 1427 нафар дар Қирғизистон ҷони худро аз даст додаанд..

Дар Қазоқистон занон барои кудакозорӣ ҳукми қатл талаб доранд

Таҷаммуи занон дар шаҳри Нурсултон зидди кӯдакозорӣ. 3 август, 2020.

Ҳудуди 20 зан рӯзи 3-юми август дар маркази шаҳри Нурсултон ҷамъ омада, талаб карданд, ки барои озору азияти ҷинсии кӯдакон дар Қазоқистон ҳукми қатл пешбинӣ шавад.

Занон гуфтанд, шумораи ин навъи ҷиноят дар Қазоқистон афзоиш ёфта, ҳукумат нисбат ба он "бетаваҷҷуҳӣ" мекунад. Ба гуфтаи ҷамъшудаҳо, ҷазое, ки ҳоло барои ҷинояти мазкур дар қонунгузорӣ пешбинӣ шудааст, "ба андозаи кофӣ сангин нест".

"Ман талаб мекунам, ки кӯдакозорҳо (педофилҳо) ба қатл маҳкум шаванд. Вақте кӯдаконро ҳимоят карда наметавонем, пулис ва нерӯҳои мусаллаҳ барои чӣ лозиманд? Агар вазъи равонии кӯдакон ва ҳаёти онҳоро ҳимоят карда наметавонем, пас ҳукумат барои чӣ лозим аст?", - изҳор дошт яке аз занон бо номи Молдир Сарсенбаева, ки модари панҷ фарзанд аст.

Бонувони норозии қазоқ ҳудуди ду соат ҷамъ шуда, талабҳои худро ба мақомот ироа карданд. Вазъро пулис назорат мекард. Намояндагони маъмурияти ноҳияи Есил ба назди занон рафта, гуфтанд, дар шаҳр карантини сахт ҷорӣ аст ва бояд пароканда шаванд.

Лаҳистон "Газпром"-ро 50 миллион евро ҷарима кард

Қароргоҳи марказии "Газпром" дар Маскав.

Идораи ҳифзи рақобат ва ҳимояти ҳуқуқи истеъмолкунандагони Лаҳистон ширкати "Газпром"-ро барои ироа накардани маълумот дар бораи лоиҳаи "Ҷараёни шимол-2" ҷарима кард. Дар иттилоияи ниҳоди зиддиинҳисории Лаҳистон ҳаҷми ҷарима 50 миллион евро гуфта шудааст. Ин ҳадди аксари ҷаримаест, ки қонунҳои Лаҳистон пешбинӣ мекунанд.

Далели ҷарима он будааст, ки "Газпром" дар бораи созишномаҳои ширкати зертобеи худ - Nord Stream 2 бо ширкатҳои аврупоии сармоягузори тарҳ маълумот пешниҳод накардааст. Ниҳоди зиддиинҳисории Лаҳистон дар ҳоли ҳозир фаъолияти шаш ширкати аврупоӣ бо шумули "Газпром"-ро тафтиш дорад. Ширкатҳо ба он айбдор мешаванд, ки гӯё барои сармоягузории тарҳ бидуни иҷозати мақомоти Лаҳистон консирсиюм ташкил кардаанд. Пештар низ ширкати фаронсавии Engie ба хотири ироа накардани маълумот ҷарима шуда буд.

"Газпром" то ҳол қарори мақомоти Лаҳистонро шарҳ надодааст..

"Ҷараёни шимол-2"-ро расман на консирсиюм, балки ширкати зертобеи "Газпром" бо қарзи ширкатҳои аврупоӣ бунёд мекунад. Вале дар Варшава ҳамоно исрор мекунанд, ки барои иҷрои тарҳ консирсиюм ташкил шудааст, ки хилофи қонунҳои Лаҳистон мебошад.

"Ҷараёни шимол-2" қарор аст, аз баҳри Балтик убур карда, гази Русияро то Олмон расонад. Интизор меравад, сохтмони ду лулаи газ, ки иқтидори умумиашон 55 млрд метри мукааб газро дар сол дар бар мегирад, охири соли 2019 анҷом шавад.

Сохтмони лоиҳаро ширкати русии "Газпром" бар уҳда дорад ва ширкатҳои олмонии Uniper ва Wintershall, гуруҳи англисиву ҳолландии Royal Dutch Shell, ширкати фаронсавии Engie ва австрагии OMV дар ин сохтмон шариканд. Арзиши умумии сохтмон 9,5 миллиард евроро ташкил медиҳад.

Дар Узбекистон кумакпулии бекоронро мансабдорон гирифтаанд

Вилояти Намангони Узбекистон.

Мансабдорони вилояти Намангони Узбекистон 216,2 млн. сӯм ($21 ҳазор)-и пули буҷаро, ки барои сокинони бекор ҷудо шуда буд, азхуд кардаанд.

Ба иттилои расонаҳо, кормандони Маркази мусоидат ба шуғли аҳолӣ дар Намангон санадҳоро сохтакорӣ карда, нишон додаанд, ки дар корҳои ҷамъиятӣ 204 нафар иштирок намудаанд.

Шахсоне, ки номашон дар санадҳо зикр шудааст, барои пайдо кардани ҷои кор ба марказ муроҷиат накардаанд ва дар рӯйхати афроди бекор низ нестанд. Дар натиҷа мансабдорон 216,2 млн сӯмро азхуд кардаанд.

Зидди кормандони марказ бо ду банд, аз ҷумла "Дуздӣ ё азхудкунӣ" парвандаи ҷиноӣ боз шудааст.

Пештар расонаҳо хабар доданд, ки дар ноҳияи Сергелии Тошканд низ кормандони бунёди хайрияи "Маҳалла" 95,8 млн сӯми созмонҳои кумакрасонро, ки барои ниёзмандон ҷудо шудааст, азхуд кардаанд.

Дастури нав. Дар Хуҷанд арӯсу домод аз тести коронавирус мегузаранд

Пештар ҳангоми ворид шудан ба тӯйхонаҳо таби сокинонро месанҷиданд. Ҳамчунин пӯшидани ниқоби тиббӣ ҳатмист

Дар Хуҷанд, маркази вилояти Суғд, дастур шудааст, ки арӯсу домод ва иштирокдорони дигари тӯй пеш аз маросим аз ташхиси коронавируси нав гузаранд. Дар ин бора дафтари матбуоти ҳукумати шаҳри Хуҷанд рӯзи 3-юми август хабар дод.

Ба иттилои манбаъ, Маъруф Муҳаммадзода, раиси Хуҷанд, дар ҷаласаи Ситоди муқобила бо COVID-19 гуфтааст, "ин тадбир барои пешгирӣ аз паҳншавии беморӣ амалӣ карда мешавад."

Пештар ҳангоми ворид шудан ба тӯйхонаҳо таби сокинонро месанҷиданд. Ҳамчунин пӯшидани ниқоби тиббӣ дар чунин маъракаҳо ҳатмист.

Ин тасмим дар ҳоле гирифта шудааст, ки дафтари матбуоти ҳукумати Хуҷанд аз қавли Маъруф Ҳоҷибоев, муовини сардори Раёсати тандурустии вилояти Суғд, навишт, "таҳлили даҳрӯзаи охир нишон медиҳад, ки теъдоди беморони илтиҳоби шуш ва короновирус рӯ ба афзоиш ниҳодааст".

"Мутаассифона, ин беморӣ бидуни нишона зуҳур намудааст, ки ташвишовар гардидааст", -- гуфтааст ӯ.

Дар нишасти Ситоди муқобила бо COVID-19 дар маркази Суғд аз он нигаронӣ шудааст, ки дар баъзе аз марказҳои савдову бозорҳо ва ошхонаҳо чораҳои пешгирӣ аз бемории ҳамагир риоя намешавад. Маъруф Муҳаммадзода гуфтааст, "дар сурати иҷро нагардидани чораҳо, фаъолияти ин марказҳои савдо бе огоҳӣ қатъ карда мешавад, зеро саломатии шаҳрвандон аз ҳама манфиатҳо боло меистад."

Аз охири моҳи апрел то 3-юми август дар Тоҷикистон, ба иттилои расмӣ, беш аз 7500 кас ба бемории коронавируси нав гирифтор шуда, зиёда аз 6300 нафар шифо ёфтаанд. 61 ҳам ҷони худро аз даст додаанд. Омори ғайрирасмӣ аз ин бештар гуфта мешавад.

Рамазон Раҳимзода: То ҷасади Гулмурод Ҳалимовро набинем...

Рамазон Раҳимзода, вазири корҳои дохилии Тоҷикистон дар нишасти хабарии 3-юми августи 2020

Вазири корҳои дохилии Тоҷикистон мегӯяд, бар асоси иттилое, ки дастрас кардаанд, Гулмурод Ҳалимов – сардори пешини ОМОН – дар як амалиёт дар Сурия кушта шудааст. Рамазон Раҳимзода айни замон гуфт, то ҷасадашро набинанд, ин хабарро пурра тасдиқ карда наметавонанд.

"Аз рӯйи нишондоди дастгиршудаҳо ва ахбороти дигар ҳамроҳи аҳли оилааш дар амалиёти муштарак дар Сурия нобуд карда шудааст. Ин аз рӯйи шоҳидии шахсонест, ки дастгир шудаанд", -- гуфт вазир дар нишасти хабарии 3-юми август дар шаҳри Душанбе.

Аммо, ба қавли ӯ, "то мурдаашро набинем ва шахсияташ тасдиқ нашавад, онро пурра тасдиқ карда наметавонем."

Гулмурод Ҳалимов
Гулмурод Ҳалимов

Гулмурод Ҳалимов, фармондеҳи собиқи нерӯҳои вижаи Вазорати умури дохилии Тоҷикистон, соли 2015 ба сафи гурӯҳи тундрави "Давлати исломӣ" ё ДОИШ пайваст ва то ба сатҳи "вазири ҷанг"-и ин созмони террористӣ расид.

Аз соли 2017 ба ин сӯ дар бораи захмӣ шудан ва ҳалокати ӯ дар Ироқу Сурия чанд дафъа гузоришҳо нашр шудааст. Вазорати дифои Русия соли 2017 эълон кард, ки ӯ дар як ҳамла дар минтақаи Дейр-Аз-Зори Сурия “сахт захмӣ шуд”. Нашряи “Таймс” ҳамон сол дар бораи ҳалокати ӯ дар Ироқ хабар дод, вале марги ӯро ягон кишвар расман тасдиқ накардааст.

Гулмурод Ҳалимов дар Тоҷикистон ба “зархаридӣ ва ширкат дар ҷангҳои кишварҳои хориҷӣ” айбдор аст. Ӯ таҳти таҳрими Созмони Миллали Муттаҳид қарор дорад ва Амрико барои маълумоти арзишманд дар бораи макони ӯ 3 миллион доллар ваъда карда буд.

Ҷеенбеков қонун "Дар бораи дасткории иттилоъ"-ро имзо накард

Сооронбой Ҷеенбеков

Президенти Қирғизистон Сооронбой Ҷеенбеков ба қонун "Дар бораи дасткории иттилоъ", ки 25-уми июл аз сӯи порлумони ин кишвар қабул шуда буд, эътироз кард.

Ҷеенбеков, аз ҷумла пешниҳод кард, ки механизми иҷро ва ҷанбаҳои техникии назорати қонун бозбинӣ шавад. Ин кор бояд бо ҷалби намояндагони ҷомеа, коршиносон ва ниҳодҳои давлатӣ сурат гирад.

Президенти Қирғизистон афзуда, ки озодии изҳори назар ва озодии иттилоъ яке аз ҳуқуқҳои асосии инсонанд, ки Конститутсияи ин кишвар ва созишномаҳои минтақавию байналмилалӣ оид ба ҳуқуқи башар кафолат додаанд.

Ба ин тартиб, Ҷеенбеков қонуни мазкурро барои бозбинӣ баргардонд.

Дар Беларус ҷаласаи ғайринавбатии порлумон баргузор мешавад

Яке аз суханрониҳои Лукашенко дар ҳузури порлумон дар соли 2016

Александр Лукашенко, раиси ҷумҳури Беларус бо судури қароре, вакилони ин кишварро ба ҷаласаи ғайринавбатии порлумон даъват кард. Даъвати ҷаласа чанд рӯз пеш аз интихоботи раёсати ҷумҳурӣ сурат мегирад, ки қарор аст, рӯзи 9-уми август сурат бигирад.

Наталя Эйсмант, сухангӯи Лукашенко рӯзи 2-уми август гуфт, ки раиси ҷумҳур рӯзи 4-уми август дар ин ҷаласа дар ҳузури вакилони мардумӣ суханронӣ мекунад. Баъди авҷ гирифтани фишор ба раиси ҷумҳур аз тарафи рақибонаш Лукашенко ҷаласати ғайринавбатии порлумонро ба рӯзи 3-уми август таъйин кард.

Ӯ гуфт, ки ба сабаби эпидемияи коронавирус ҷаласаро, ки қарор буд, моҳи апрел баргузор шавад, ба рӯзҳои баъди гузошт. Светлана Тихановская, номзади мухолифон ба мақоми раиси ҷумҳур рӯзи 28-уми июл гуфт, ки ба ҳарду палатаи порлумон, Кумиссиёни марказии интихобот ва Кумитаи миллии телевизион ва радио дархост кардааст, ки ба ӯ ҳам иҷоза бидиҳанд, дар рӯзи нутқи Александр Лукашенко, ӯ ҳам суханронӣ кунад. Аммо ба эҳтимоли ғолиб ба ӯ чунин иҷозаро намедиҳанд.

Ҳафтаҳои гузашта даҳҳо ҳазор нафар дар шаҳри Минск ва дигар шаҳрҳои Беларус ба нишони ҳимоят аз ӯ ва мухолифи Александр Лукашенко эътироз карданд. Дар умум, Шӯрои Миллӣ ва ё порлумони Беларус салоҳиятҳои зиёде надорад ва ҳамаи қудрат дар дасти ҳукумати Александр Лукашенко аст, ки аз соли 1994 аз замони ба даст овардани истиқлол, раиси ҷумҳури Беларус аст. Мухолифат ба ӯ, ки номзадиашро бори шашум аст, ба мақоми раиси ҷумҳур пешниҳод мекунад, рӯ ба афзоиш овардааст .

Ёфтҳои бештар

XS
SM
MD
LG