Маъмурони пулис дар шаҳри Маскав, пойтахти Русия, сиёсатмадори мухолиф Алексей Навалнийро боздошт кардаанд. Кира Ярмиш, сухангӯи Навалний, рӯзи 25-уми август дар Твиттер навишт, ки ин ҳодиса рӯзи шанбе рух дод.
“Навалнийро дар даромадгоҳи манзилаш боздошта, телефонашро гирифтанд. Маъмурони пулис сабаби боздоштро нагуфтанд”, - навишт Ярмиш.
Қаблан гуфта шуда буд, ки мақомоти Маскав аризаи тарафдорони Навалнийро барои баргузории гирдиҳамоӣ алайҳи тағйири қонуни нафақа баррасӣ хоҳанд кард. Интизор меравад, ин гирдиҳамоӣ рӯзи 9-уми сентябр баргузор шавад.
Ҳукумати Русия пешниҳод кардааст, ки синни нафақа дар он кишвар барои занон аз 63-солагӣ ва барои мардон аз 65-солагӣ муқаррар шавад. Дар ҳоли ҳозир занон дар русия аз 55-солагӣ ва мардон аз 60-солагӣ ҳаққи ба нафақа баромаданро доранд.