Пайвандҳои дастрасӣ

Хабари нав

Хабарҳо

Пойтахти Озарбойҷон бори дуввум бе нерӯи барқ монд

Дар пойтахти Озарбойҷон барои дуввумин бор нерӯи барқ дар бисёре аз гӯшаҳои шаҳр қатъ шуд ва ҳазорон нафар дар дохили метро монданд. Инфиҷор дар як нерӯгоҳи барқи обӣ дар Озарбойҷон сабаби аз нерӯи барқ маҳрум шудани бисёре аз сокинони кишвар шуд. Ҳодиса 3-уми июл рух дод ва пойтахти Озарбойҷон шабона дар торикӣ монд.

Рӯзона, ки ҳарорат дар Боку гарми тоқатфарсо аст, нерӯи барқ дигарбора қатъ шуд. Чунин ҳодиса дар даҳсолаҳои ахир дар Озарбойҷон дида нашудааст. Баъди қатъи барқ, метро аз кор монд ва маъмурони наҷот маҷбур шуданд, ҳазорон нафарро аз қаторҳои зеризаминӣ берун кунанд.

Расонаҳои озарӣ мегӯянд, ки интиқоли нерӯи барқ рӯзи 4-уми июл дар тамоми қаламрави кишвар аз сар гирифта шудааст. Дафтари раёсати ҷумҳурии Озарбойҷон гуфтааст, ки истифодаи беш аз ҳадди таҷҳизоти сардкунӣ дар тобистон сабаби фишори зиёд ба шабакаҳои барқӣ ва таркиш дар нерӯгоҳи Мингачевир шудааст.

Ҳамаи хабарҳои имрӯзро дар инҷо бихонед

"Гӯши духтарашро бо анбӯр бурид..."ВИДЕО

Додгоҳе дар Алмаато рӯзи 18 феврал модареро, ки дар давоми шаш соли ахир духтарашро латукӯб мекард, ба шаш соли зиндон маҳкум намуд. Додгоҳ қарор кард, ки Анна Иванова духтараш Дианаро шадидан латукӯб мекард, масъулиятҳои модарии худро иҷро намекард ва ба ҳамин хотир барои ҳар як соли азият кардани духтараш яксолӣ дар зиндон мемонад.

Бори аввал дар Қазоқистон азиятҳои Диана соли 2011 расонаӣ шуд. Он замон модаркалонаш духтари хурдсолро бо асои бағалаш шадидан латукӯб кард ва кӯдакро ба бахши эҳёгарии бемористон интиқол доданд. Баъди ин модаркалонро аз ҳақи муошират бо кӯдак маҳрум карда ба Русия истирдод карданд. Диана дар тарбияи модараш монд. Баъди ин духтарак ба мактаб нарафт, ба гуфтааш, дар рӯи фарш мехобид ва вақте ба хона одамони бегона меомаданд, ӯро ё дар дохили ҷевон ё дар пушти дари ҳаммом пинҳон мекарданд.

Дар додгоҳ кӯдак нақл кард, ки модараш ӯро чигуна азият мекард: гӯшашро бо анбӯр бурида, дандонашро бо болға шикаста буд. Мутахассисон маълум кардаанд, ки Иванова аз бераҳмии шадид духтарашро ҳамеша ба як ҷояш мезад, ва ҷои дард сиҳҳат нашуда, боз ҷароҳат мебардошт.

Шаш соли зиндони модар барои шаш соли азиятҳои духтараш
лутфан мунтазир бошед

### Феълан кор намекунад ###

0:00 0:02:32 0:00

Анна Иванова гуноҳи худро қисман эътироф кард ва гуфт, ки ҳар вақте ба духтараш даст мебардошт, танҳо ба хотири гуноҳ кардани ӯ буд.

Анна Иванова ба ҷуз Диана боз ду духтари калонтари дигар дорад. Калониаш 18-сола аст. Дианаро дар ҷараёни тафтишот ва мурофиаҳои додгоҳӣ ба тарбияи волидони муваққатӣ ва ба шаҳри дигар интиқол доданд. Каме дертар қарор аст сохторҳои махсуси парасторӣ сарнавишти минбаъдаи кӯдакро муайян кунанд.

Дар қарори додгоҳ инчунин амр шудааст, ки масъулият ва кори хадамоти парасторӣ ҳам санҷида шавад. Онҳо бояд ба ин савол посух диҳанд, ки чаро вақте кӯдак бо нишонаҳои латукӯб ба мактаб ҳозир мешуд, касе чораҷӯӣ накард.

Кремлин қазияи мудири амрикоиро пайгирӣ мекунад

Сухангӯи президенти Русия Дмитрий Песков гуфт, ки Кремлин парвандаи марбут ба мудири ширкати сармоягузори амрикоиро, ки дар фасоди молӣ дар ҳаҷми калон муттаҳам шудааст, аз наздик пайгирӣ мекунад. Зимни суханрониаш бо матбуот дар Маскав рӯзи 18 феврал, Песков гуфт, ки ҳабси Майкл Калви, раиси ширкат сармоягузори Baring Vostok ҳеҷ рабте ба бад шудани муносибатҳои Русияву Амрико надорад. “Равобити Русия бо кишварҳои дигар ба фаъолиятҳои тиҷоратии сармоягузорон дар ин кишвар таъсире надорад”, гуфт Песков ва афзуд, ки Русия ҳамеша ба эҷоди “фазои мусоид барои сармоягузорони хориҷӣ” манфиатдор аст. Песков инчунин гуфт, ки Калви дар Русия ба ҳайси як “сармоягузори қавӣ дар иқтисоди ин кишвар” маъруф буда, барои “ҷаззоб шудани бозори Русия” талошҳо кардааст. Песков инчунин гуфт, ки президенти Русия Владимир Путин дар гузашта бо Калви чандин бор дар чаҳорчӯби конфронсҳои тиҷоратӣ дидор карда, вале боздошти ӯ берун аз салоҳиятҳои Путин мебошад. Рӯзи 16 феврал додгоҳе дар Маскав қарор кард, ки Калви то 13 апрел дар боздошт мемонад.

Покистон ба шоҳзодаи Саудӣ ҷоизаи баландтаринро тақдим мекунад

Покистон гуфт, ки рӯзи 18 феврал шоҳзодаи Саудӣ ҷоизаи баландтарини мадании худро тақдим мекунад ва ин тасмим баъди он гирифта шуд, ки рӯзи 17 феврал Муҳаммад бин Салмон зери созишномаи ихтисоси 20 миллиард доллар сармоя ба Покистон имзо гузошт.

Қарор аст ҷоизаи “Нишони Покистон”-ро ба шоҳзодаи Саудӣ президент Ориф Алвӣ тақдим кунад. Дар идомаи сафари худ ба минтақа шоҳзодаи Саудӣ аз Ҳинд, рақиби деринаи Исломобод дидан мекунад. Покистон, ки мушкилоти ҷиддии иқтисодиро пушти сар мекунад, умедвор аст, ки 7 созишномаи мухталиф иқтисоди дучори мушкили ин кишварро зинда мекунад. Аксари ин созишномаҳо марбут ба бахши энержӣ мебошанд. Аз ҷумла яке аз онҳо бо арзиши 10 миллиард доллар эҳёи корхонаи нафту кимиёи шаҳри бандарии Гвадарро дар назар мегирад.

Қарор аст баъди боздид аз Ҳинд, Муҳаммад бин Салмон ба Чин ҳам сафар кунад.

Пули нави Узбекистон вориди муомилот мешавад

Бонки марказии Узбекистон (БМУ) тавассути саҳифаи худ дар Telegram хабар дод, ки сар аз 25 феврал дар ин кишвар пули нави 100-ҳазорсӯмӣ ба муомилот мебарояд.

Ба огаҳии бонк, пули 100-ҳазорсӯмӣ ба донишманди маъруфи ӯзбек Мирзо Улуғбек ва дастовардҳои ӯ дар бахши ситорашиносӣ бахшида шудааст.

Дар канори чапи пул расми муҷассамаи Мирзо Улуғбек тасвир гаштааст. Ҳамчунин дар он бо ранги сабз унсурҳое наққошӣ шудаанд, ки шахсони нобино метавонанд ба воситаи онҳо ҳаҷми пулро муайян кунанд.

Ёдрас мешавем, БМУ 15 январи соли равон хабар дода буд, ки Сенати Маҷлиси олии Узбекистон тарҳи пули 100-ҳазорсӯмиро тасдиқ кард. Мақомоти узбек он замон гуфтанд, ки пули нав ба хотири осон кардани кори сокинон ҳангоми истифода, нигаҳдорӣ ва интиқоли нақдина ба муомилот бароварда мешавад.

Вале чанд рӯз пас аз ин хабари БМУ манобеъ гуфтанд, ду дастгоҳи нашри асъори миллӣ дар ин кишвар шикастаанд ва эҳтимол дорад, пули нав нашр нашавад. Ба гуфтаи як манбаи огаҳ, дастгоҳҳо ба далели қатъи пайдарпайи нирӯи барқ корношоям шудаанд.

Дар Қазоқистон фаъоли боздоштшуда бистарӣ шуд

Дар шаҳри Уралски Қазоқистон фаъоли боздоштшуда Албек Ергазиев аз ошёнаи севуми идораи пулис фирор кард ва бо ҷароҳатҳои зиёд дар бемористон бистарӣ шуд. Ба навиштаи бахши Қазоқии Радиои Озодӣ, ин ҳодиса 17 феврал рух додааст.

Табибон ташхис карданд, ки чанд ҷои бадани вай шикаста ва сараш осеб дидааст. Дар ин бора хабарнигор Луқмон Ахмедёров дар саҳифаи Фейсбук хабар дод.

Ба гуфтаи вай, Албек Ергазиевро кормандони пулис ахиран дар назди манзилаш боздошт карданд. Вай мехост, ба мулоқоти ҳокими вилояти Қазоқистони Ғарбӣ равад.

Наздикони Ергазиев аз додситонии шаҳри Уралск талаб карданд, ки гунаҳкорони ин ҳодиса ҷазо дода шаванд.

Албек Ергазиев бори аввал рӯзи 13 феврал дар толори Хонаи фарҳанг боздошт шуда буд. Он рӯз ҳокими Уралск бо сокинон мулоқот дошт. Албек бо навиштаҳои "Ислоҳоти иқтисодӣ дар Қазоқистон талаб дорам" ва "Судяҳои бевиҷдон ба ҷавобгарӣ кашида шаванд" ба толор омада буд. Он рӯз Албек баъди се соати боздошт раҳо шуд.

"Туркменховаёлларӣ" барои ислоҳи вазъи худ аз коршиносони олмонӣ кумак хост

Ширкати миллии ҳавопаймоии Туркманистон (Туркменховаёлларӣ) барои бартараф кардани мушкилиҳо ва мутобиқсозии худ ба меъёрҳои байналмилалии амнияти ҳавоӣ аз ширкати "Lufthansa Consulting" кумак хостааст.

"Чанде пеш "Туркменховаёлларӣ" дар робита ба иҷрои талаботи Оҷонси амнияти ҳавонавардии Аврупо (EASA) бо мушкил рӯбарӯ шуд. Ширкат камбудиҳои худро эътироф мекунад ва ҳоло тасмим гирифтааст, дар ҳамкорӣ бо коршиносони ҳавоии олмонӣ онҳоро бартараф кунад", - омадааст дар изҳороти муштараки "Туркменховаёлларӣ" ва "LufthansaConsulting" аз 13 феврал.

EASA 4 феврал "Туркменховаёлларӣ"-ро ба рӯйхати сиёҳ ворид карда, парвози ҳавопаймоҳояшро ба Аврупо боз дошт. Оҷонсӣ гуфт, ҷониби Туркманистон бояд риояи меъёрҳои байналхалқии амниятиро тасдиқ кунад. Аммо дақиқ нагуфт, ки ширкат кадом меъёрҳоро вайрон кардааст.

Сафорати Амрико дар Туркманистон низ 7 феврал бо нашри як изҳорот аз кормандонаш хост, ки аз хадамоти ширкати ҳавопаймоии ин кишвар истифода накунанд.

Ба огаҳии сомонаи расмии "Туркменховаёлларӣ", ҳавопаймоҳои ин ширкат дар дохили Туркманистон рӯзона то 5 ҳазор мусофирро интиқол дода, дар як сол дар масирҳои дохиливу минтақавӣ ба ҳудуди 3 миллион нафар хидмат мерасонанд.

Дар Узбекистон мехоҳанд, созишномаи никоҳро ҳатмӣ кунанд

Мақомоти вилояти Намангони Узбекистон пешниҳод карданд, ки тавассути Кодекси оила шартномаи никоҳ ҳатмӣ карда шавад. Дар ин бора вазорати адлияи Узбекистон хабар дод. Дар ин пешниҳод гуфта шудааст, онҳое, ки шартномаи никоҳ надоранд, мақомоти САҲШ никоҳи онҳоро сабт накунанд. Пештар аз ин роҳбари шуъбаи такмили санадҳои меъёриву ҳуқуқӣ дар бахши тақвияти институти оила Гулнора Ишанханова гуфта буд, ки замони бозбинии меъёрҳои Кодекси оилаи Узбекистон фаро расидааст. Вай пешниҳод карда буд, ки созишномаи никоҳ ҳатмӣ шавад. Ба гуфтаи Ишанханова, танҳо бо ҳамин роҳ мешавад, аз дахолати шахси севум ба ҳаёти хонаводаҳо пешгирӣ кард ва тақсими одилонаи амволу дороиро баъди талоқ ба роҳ монд. Ба иттилои расмӣ, дар соли 2018 аз 311,4 ҳазор никоҳ, ки дар мақомоти нотариалии Узбекистон ба қайд гирифта шуд, ҳамагӣ 219 шартномаи никоҳ сабт гардидааст.

Навраси қазоқ ду кӯдакро аз сӯхтор наҷот дод

Мақомоти ҳолатҳои изтирории Қазоқистон мегӯяд, дар маҳаллаи Курсайи Чимкент як навраси 13-сола ду кӯдакро аз сӯхтор наҷот дод.

Ба огаҳии департамент, шаби шанбеи 16 феврал дар яке аз манзилҳои зисти кӯчаи Жанакурилиси Курсай сӯхтор ба амал омад, ки дар дохилаш се кӯдак ҳузур доштанд. Кӯдаки калонӣ аз ҳамсояҳо кумак хостааст. Дар натиҷа навраси 13-солаи ҳамсоя то омадани кормандони оташнишонӣ ду кӯдаки 5 ва 3-соларо наҷот додааст. Манзили зист ба масоҳати 60 метри мураббаъ пурра ба коми оташ фурӯ рафтааст.

Кормандони оташнишонӣ сӯхторро дар давоми ду соат хомӯш кардаанд. Вазъи кӯдакони наҷотёфта муътадил арзёбӣ мешавад.

Гумонбарони дуздии маснуоти заргарӣ дар марзи Узбекистону Қирғизистон боздошт шуданд

Раёсати марзбонии Қирғизистон дар вилояти Ҷалолободи ин кишвар ҳамроҳ бо кормандони милиса гумонбарони дуздии маснуоти заргариро боздошт карданд. Дар ин бора рӯзи 17 феврал Хадамоти марзбонии Қирғизистон иттилоъ додааст.

Ба иттилои ин ниҳод, дуздӣ аз Фурушгоҳи марказии Ҷалолобод сурат гирифтааст. Панҷ гумонбар ҳангоми убури гузаргоҳи марзии "Маданият" дар сарҳади Қирғизистон бо Узбекистон боздошт шуданд.

"Ҳангоми тафтиш аз онҳо маснуоти заргарӣ - зару зевари тило пайдо шуд. Баъди тартиб додани ҳуҷҷатҳо боздоштшудаҳо ба ихтиёри мақомоти милисаи вилояти Ҷалолобод супорида шуданд", - хабар медиҳад Хадамоти марзбонии Қирғизистон.

Ҳайати Толибон аз сафар ба Исломобод худдорӣ кард

Акс аз бойгонӣ.

Толибон даври навбатии музокироти сулҳ дар Покистонро боздоштанд ва гуфтанд, ки аксари аъзои ҳайати музокиротӣ, ки таҳти таҳрими ИМА ва СММ мебошанд, сафар карда наметавонанд. Изҳороти мазкур рӯзи 17 феврал - як рӯз пеш аз сафари барномарезишудаи гурӯҳ ба Исломобод нашр шуд. Қарор буд ҳайати Толибон дар пойтахти Покистон бо нахуствазир Имрон Хон ва мақомоти амрикоӣ дидору гуфтугӯ мекарданд. Ҷузъиёти бештари ин мавзӯъ дар даст нест.

Ин ҳам дар ҳолест, ки ҳукумати Афғонистон ба Шӯрои амнияти СММ аз сафари аъзои гурӯҳи Толибон ба Покистон номаи эътирозӣ ирсол кард. Дар номае, ки дастраси бахши покистонии Радиои Озодӣ шуд, гуфта мешавад, ки ташкили музокироти Толибон ва Покистон ба истиқлолияти миллии Афғонистон осеб мерасонад.

Дар нома аз он изҳори нигаронӣ шудааст, ки даъвати ҳайати Толибон аз ҷониби Имрон Хон барои музокирот ба Покистон баробар бо эътирофи расмии ин гурӯҳи мусаллаҳ ва таҳдидкунанда ба амнияту суботи Афғонистон мебошад, дар ҳоле, ки аъзои ин гурӯҳ мувофиқ ба муқаррароти Кумитаи таҳримҳои Шӯрои амнияти СММ аз соли 1988 таҳрим шудаанд.

Толибон дар Давҳа, пойтахти Қатар дафтар доранд ва то ин замон ин музокирот дар ҳамин ҷо баргузор мешуд. Вале ба узвияти гурӯҳ ҳадди аққал панҷ собиқ зиндонии Гуантанамо ва дигар афроди марбут ба гурӯҳҳои ҷангӣ шомил мебошанд.

Ҳаракат дар шоҳроҳи Душанбе-Хуҷанд муваққатан қатъ шуд

Ҳаракати мошинҳо дар роҳи мошингарди Душанбе-Хуҷанд муваққатан қатъ шудааст. Дар ин бора 18-уми феврал Далери Абдуллоҳ, сухангӯи намояндагии ширкати IRS дар Тоҷикистон хабар дод.

Ба гуфтаи вай, "бинобар зиёд гардидани тармафароӣ ва давомдор будани боришоти барф айни замон ҳаракати воситаҳои нақлиёт муваққатан боздошта шуд". Аз аввали соли ҷорӣ ин бори севум аст, ки ҳаракат дар ин ҷодаи мошингард, ки марказ ва шимоли Тоҷикистонро ба ҳам мепайвандад, барои муддате қатъ мешавад.

Ба иттилои Далери Абдуллоҳ, танҳо аз аввали моҳи феврал дар ин масир 185 тарма фаромадааст. Ҳафтаи қаблӣ як корманди ин ширкат зери ин тармаҳо дар наздикии нақби "Истиқлол" ҷони худ аз даст дод. Аз соли 2009 то ба ҳол 9 корманди ширкати IRS зимни тоза кардани ин роҳи мошингард аз барфу тарма ҷони худро аз даст додаанд.

Покистон сафирашро аз Ҳиндустон бозхонд

Дар паи афзоиши таниш дар миёни ду ҳамсояи ҳастаӣ, Покистон сафири худро аз Ҳинд бозхонд. Дар ин бора рӯзи 18 феврал вазорати хориҷаи Покистон хабар дод. Ин таҳаввулот баъди он рух дод, ки даҳҳо ниманизомии ҳиндӣ ва ду сарбози артиш дар ҳамлаҳои ҷудогонаи ахир кушта шуданд. Дар ҳодисаи ахир, дар минтақаи таҳти контроли Ҳинди Кашмир дар бархӯрд бо шӯришиён дасти кам чор сарбози ҳиндӣ, аз ҷумла як афсари калон ва як фарди мулкӣ кушта шуданд. Ин ҳодиса чанд рӯз баъди як ҳамлаи интиҳорӣ рух дод, ки дар он 41 ниманизомӣ дар минтақаи баҳсии Кашмир кушта шуд. Мақомоти маҳаллӣ гуфтанд, задухӯрд дар маҳаллаи Пинглани минтақаи Пулвана рух дод ва сарбози дигаре дар ин ҳодиса шадидан маҷрӯҳ шудааст. Матбуоти ҳиндӣ гузориш дод, ки задухӯрдҳо замоне сар шуд, ки ҷангиёни “Ҷаиши Муҳаммад” ба сӯи кормандони амниятӣ оташ кушоданд. Матбуоти ҳиндӣ гуфт, ки ҷустуҷӯи ҳамлаварон идома дорад, вале сарнавишти онҳо то ҳол маълум нест.

Боздошти афсари баландрутбаи милиса дар Душанбе

Акс аз бойгонӣ

Мақомоти интизомии Тоҷикистон як афсари баландрутбаи вазорати умури дохилиро, ки ба шиканҷа ва сӯистифода аз мақом муттаҳам мешуд, дастгир кардаанд.

Дар Додситонии кулли Тоҷикистон рӯзи 18-уми феврал ба Радиои Озодӣ гуфтанд, ки подполковник Фарҳод Нурхонов, афсари Раёсати умури дохилии шаҳри Душанбе рӯзи 16-уми феврал дар Душанбе боздошт шуд.

Фарҳод Нурхонов, муовини сардори Шӯъбаи кофтукови ҷиноӣ дар раёсати умури дохилии Душанбе ва Аваз Сабзаеву Икромиддини Аҳлиддин - кормандони идораи мазкур ба он гумонбар мешаванд, ки бо ифтитоҳи парвандаи сохта ба зидди як сокини Душанбе, аз ӯ ҳазорон доллар ришва хостаанд.

Як муфаттиши дигарро дар ин қазия ба ришваситонӣ муттаҳам мекунанд. Се корманди милисаро моҳи январ дастгир карданд, вале Фарҳод Нурхонов аз замон барои посух додан ба суолҳои тафтишот ҳозир намешудааст.

Ҳамза Солеҳов, ҷабрдида дар ин парванда аз ин пештар ба Радиои Озодӣ гуфт, ки афсарони милиса ӯро азобу шиканҷа дода хостанд, ки иттиҳоми ҳифз ва қочоқи маводи мухаддиро бар дӯш бигиранд.

Дар Додситонии кулл гуфтанд, ки Фарҳод Нурхонов рӯзҳои наздик бо ҷабрдида рӯ ба рӯ карда мешавад. Ҷузъиёти парванда инҷост.

Эрон талаби Амрико аз қудратҳои Аврупоро танқид кард

Муҳаммадҷавод Зариф

Вазири корҳои хориҷии Эрон талоши Вашингтонро барои фишороварӣ болои муттаҳидони аврупоиш танқид кард. Амрико аз кишварҳои аврупоӣ даъват дорад, ки аз созиши ҳастаии соли 2015 бо Теҳрон берун шаванд.

Муҳаммадзариф Ҷавод рӯзи якшанбе дар суханрониаш дар нишасти амниятии Мюнхен гуфт, "муовини раиси ҷумҳури Амрико “густохона” хостааст, то Аврупо ба Амрико ҳамроҳ шуда, ваъдаашро бишканад."

Ин изҳорот як рӯз баъди он садо дод, ки Майк Пенс, муовини Доналд Трамп аз Олмону Фаронса ва Бритониё хост, аз тавофуқномаи атомӣ бо Эрон хориҷ шаванд.

Бар асоси ин созиш, ки моҳи майи соли 2015 байни Эрон ва қудратҳои бузурги ҷаҳон сурат гирифт, Теҳрон дар ивази маҳдуд кардани барномаи ҳастаиаш баъзе аз имтиёзҳоро ба даст меовард.

Амрико дар моҳи майи соли гузашта аз ин тавофуқнома хориҷ шуд ва таҳримҳои иқтисодиро дубора алайҳи Эрон ҷорӣ кард.

Рӯҳонӣ: Ҷонибдори беҳбуди равобит бо кишварҳои Ховари Миёна ҳастем

Ҳасан Рӯҳонӣ

Ҳасан Рӯҳонӣ, раиси ҷумҳури Эрон, гуфт, Теҳрон мехоҳад равобитро бо кишварҳои Ховари Миёна (Шарқи Миёна) беҳбуд бахшад.

Эрон солҳо боз бо Арабистони Саудӣ ва баъзе кишварҳои дигари минтақа дар “ҷанг” аст. Рӯҳонӣ рӯзи 17-уми феврал дар як суханронии телевизионӣ гуфт, Теҳрон омодааст, барои ҳифзи субот дар Ховари Миёна бо ҳама кишварҳои минтақа равобиташро тавсеа бахшад.

Аммо раиси ҷумҳури Эрон Иёлоти Муттаҳидаи Амрико ва Исроилро муттаҳам кард, ки ба гуфтаи ӯ ба ҷудоии байни эрониҳо доман мезананд. Вай гуфт, Эрон ба фишорҳои Амрико ва Исроил сар фурӯ нахоҳад овард.

“Ҳама дар хоб буд.” Даҳҳо кушта ва захмӣ дар сӯхтори Бангладеш

Акс аз бойгонӣ

Дар натиҷаи сӯхтор дар Бангладеш дастикам ҳашт нафар ҷони худро аз даст додаанд. Ба қавли мақомоти ин кишвар, сӯхтор беш аз 200 хонаи сокинонро ба коми худ фурӯ бурд.

Алӣ Аҳмад, раиси Хадамоти оташнишонии Бангладеш, ба хабаргузории DPA-и Олмон гуфтааст, сӯхтор субҳи барвақти 17-уми феврал, замоне рух дод, ки бисёре аз сокинон ҳанӯз дар хоб буданд.

Ба қавли Алӣ Аҳмад, дар натиҷаи сӯхтор ҳадди ақал 50 тани дигар захмӣ шудаанд.

Ҳар сол дар пайи воқеаҳои ногувор дар кишвари фақири Бангладеш садҳо нафар ҳалок мешаванд. Дар соли 2013 дар натиҷаи фурӯ рафтани бинои корхонаи "Rana Plaza" беш аз сад коргар ҷон бохта буданд.

Туркия қасд дорад, аз Русия системаи дифоии S-400 бихарад

Раиси ҷумҳури Туркия гуфтааст, кишвараш бо вуҷуди фишори Амрико, қасд дорад, аз Русия системаи дифоии S-400 бихарад.

Раҷаб Таййиб Эрдуғон рӯзи шанбе дар сӯҳбат бо расонаҳо дар Анкара гуфт, муомилаи хариди системаи S-400 миёни ин кишвар ва Русия анҷом шудааст ва Туркия наметавонад аз он даст кашад.

Қаблан Амрико аз Туркия, ки узви паймони НАТО аст, хоста буд, системаи дифоиро аз ин кишвар метавонад ба арзиши панҷ миллиард доллар бихарад. Амрико ба Туркия ба ҷойи S-400-и Русия системаи дифоии "Патриот"-ро пешниҳод карда буд.

Муҳлати ғайрирасмӣ барои посух гуфтан ба ин пешниҳод рӯзи 15-уми феврал ба поён расид.

Раиси ҷумҳури Туркия гуфтааст, кишвараш ҳанӯз ҳам барои хариди системаи дифоии “Патриот” аз Амрико омода аст, вале Вашингтон шарт гузоштаст, ки бояд Анкара муомиларо бо Маскав рад кунад.

Вашингтон гуфтааст, системаи дифоии Русия наметавонад дар қаламрави кишварҳои узви паймони НАТО насб шавад.

Ҳезер Нойерт аз мақоми сафири Амрико дар СММ даст кашид

Ҳезер Нойерт

Ҳезер Нойерт, ки аз тарафи раиси ҷумҳури Амрико сафири ин кишвар дар Созмони Милали Муттаҳид интихоб шуда буд, мегӯяд, аз ин мақом даст кашидааст. Вазорати корҳои хориҷии Амрико ин хабарро тасдиқ кард.

Нойерт рӯзи 16-уми феврал дар баёнияи расмӣ гуфт, ба нафъи худу хонаводааш медонад, ки аз пазируфтани ин мақом сарфи назар кунад.

Шуморе аз мунтақидон дар мавриди номзадии Ҳезер Нойерти 49-сола ба мақоми сафири Амрико дар Созмони Милал суолҳоеро матраҳ карда буданд. Онҳо иддао доштанд, ки ӯ дар мавриди дипломатияи хориҷӣ ва сиёсатсозӣ таҷриба надорад ва шароиташ барои гирифтани чунин як курсӣ мусоид нест.

Ҳезер Нойерт дар гузашта ба ҳайси муҷрӣ ва хабарнигор дар телевизиони “Фокс Нюз” кор мекард. Вай соли 2017 сухангӯи Вазорати умури хориҷии Амрико таъйин шуд.

Қарор буд ӯ ба ҷои Никкӣ Ҳейлӣ ба ҳайси сафири Амрико дар Созмони Миллали Муттаҳид кор кунад, вале ин симатро напазируфт.

Лавров вазири дифои Бритониёро “вазири ҷанг” хитоб кард

Сергей Лавров

Сергей Лавров, вазири корҳои хориҷии Русия, рӯзи шанбе дар суханони худ вазири дифои Бритониёро "вазири ҷанг" хитоб кард.

Ӯ рӯзи 16-уми феврал гуфт, "агар ба гапи баъзе одамон ба мисли вазири ҷанг, ё бубашед, вазири дифои Бритониё гӯш диҳед, ин тасаввур ҳосил мешавад, ки ҳеч кас ба ғайр аз НАТО ҳақ надорад, ба ҷуз аз марзҳои худ дар ҷои дигаре бошад."

Як рӯз пеш аз он, Гевин Уилямсон, вазири дифои Бритониё гуфта буд, Русия талош дорад, ки "Ғарбро таҳрик диҳад".

Уилямсон дар суханрониаш дар нишасти байналмилалии Мюнхен рӯзи ҷумъа гуфт, "Русия талош дорад, Ғарбро дар як мусобиқаи таслиҳотии нав дахил кунад, ки ҳеч ба он алоқа надорад". Ӯ ҳамчунин Русияро ба анҷоми фаъолиятҳои, ба гуфтааш ғайриқонунӣ дар замину баҳр муттаҳам кард.

Бори аввал нест, ки Сергей Лавров ва Гевин Уилямсон ба ҷанги лафзӣ мепардозанд. Соли гузашта Уилямсон гуфта буд, ки "Русия бояд дур биравад ва хомӯш бошад". Лавров дар вокуниш ба Уилямсон гуфта буд, "эҳтимол ӯ бетарбия аст".

Доналд Трамп: ДОИШ дар ҳоли нобуд шудан аст

Доналд Трамп

Доналд Трамп, раиси ҷумҳури Амрико, эълон кард, ки гурӯҳи тундрави “Давлати исломӣ” ё ДОИШ дар ҳоли нобуд шудан аст.

Ӯ рӯзи 16-уми феврал дар “Твиттер” навишт, “Амрико аз Бритониё, Фаронса, Олмон ва муттаҳидони дигари аврупоӣ мехоҳад, то беш аз 800 ҷангҷӯи ДОИШ-ро, ки дар Сурия дастгир шудаанд, муҳокима кунанд.”

Бино ба гузоришҳо, садҳо тан аз шаҳрвандони кишварҳои аврупоӣ ба Ховари Миёна рафтаанд, то аз ҷангҷӯёни гурӯҳҳои ифротӣ ҳимоят кунанд.

Доналд Трамп гуфт, Амрико баъди пирӯзии комил дар баробари ДОИШ аз Сурия берун хоҳад шуд.

Рӯзи шанбе яке аз фармондеҳони нерӯҳои демократии Сурия низ гуфт, онҳо дар остонаи фатҳи охирин сангари ҷангҷӯёни ДОИШ дар Сурия ҳастанд. Вай гуфт, дар чанд рӯзи оянда, яъне муддати хеле кӯтоҳ, хабари хуби поёни ДОИШ-ро дар ҷаҳон мунташир хоҳанд кард.

Ба ин тартиб “хилофат”-е, ки соли 2014 аз тарафи Абубакри Бағдодӣ эълон шуда буд, ба поёни худ наздик расидааст.

Бағдодӣ он сол дар масҷиди мутааллиқ ба даврони асрҳои миёна дар шаҳри Мавсили Ироқ худро “халифа” номид ва гуруҳи тундрави “Давлати исломӣ”-ро бунёд гузошт. Ин гуруҳ сарзаминҳои густардаеро аз шимоли ғарби Сурия то наздикии Бағдод бо ду миллион ҷамъият таҳти итоат дошт.

Ироқ соли гузашта аз пирӯзии комили худ ба ҷангҷӯёни гурӯҳи тундрави “Давлати исломӣ” хабар дод ва ҳоло охирин даргириҳо бо ДОИШ дар Сурия идома дорад.

Писари Гулнора Каримова аз Мирзиёев хост, бепарво набошад

Ислом Каримоваи хурдӣ бо модараш Гулнора Каримова

Набераи президенти пешини Узбекистон Ислом Каримови хурдӣ мегӯяд, вазъи сиҳатии модараш Гулнора Каримова, ки дар ҳабси хонагӣ аст, бад шудааст ва ӯ ба кумаки тиббӣ дастрасӣ надорад.

Каримови 26-сола рӯзи 14-уми феврал ба воситаи саҳифаи худ дар "Инстаграм" аз президенти Узбекистон Шавкат Мирзиёев дархост кард, ки ба қазия ва вазъи модари ӯ таваҷҷуҳ карда, садои ӯву хоҳарашро шунавад.

"Бо сабабҳои ғайриинсонӣ ба модарам фишор меоранд ва ҳатто духтуронро ба наздаш роҳ намедиҳанд. Миёни ҷонибҳо созишҳо буд, вале талошҳои ошкоро ва эҷоди ҳангомаҳои кӯчак нишон медиҳанд, ки касе намехоҳад, қазияи мо ором ҳал шавад. Нерӯҳое талош доранд, раҳбариятро бадном карда, зидди модару хоҳарам шӯронанд", - навиштааст писари Гулнора Каримова.

"Аз президент, ҳамчун шахсе, ки аз кӯдакӣ ӯро чун нафари бовиҷдон ва шогирди бобоям мешиносем, дархост мекунам, ба қазияи модарам таваҷҷуҳ карда, садои ману хоҳарамро шунавад. Хоҳарам маҷбур буд, ин рӯзҳо ҳамроҳи модарам бошад. Дилаш дардманд шудааст, вале ҳатто дар ин ҳолат низ табибонро ба назди ӯ роҳ намедиҳанд. Аз вазъи модару хоҳарам нигаронам", - афзудааст Ислом Каримови хурдӣ.

Вале Додситонии кулли Узбекистон иддаои набераи Ислом Каримовро рад мекунад. "Ба Гулнора Каримова ҳеч гуна фишор оварда намешавад. Суханҳои писари ӯ беасосанд", - гуфт намояндаи додситонӣ дар шарҳи муроҷиати Каримови хурдӣ ба Мирзиёев.

Ёдрас мешавем, набераи Ислом Каримов миёнаҳои моҳи декабри соли гузашта хабар дода буд, ки модараш Гулнора Каримова тасмим гирифтааст, дубора ба ҳаёти иҷтимоӣ баргардад.

Мақомоти Узбекистон то ҳол намегӯянд, ки Гулнора Каримова дар кадом вазъ қарор дорад ва дар куҷо нигаҳдорӣ мешавад. Як манбаъ дар ҳукумати Узбекистон гуфта буд, ки Каримова тобистони соли гузашта аз маҳбас ба яке аз хонаҳои худ дар шаҳри Тошканд интиқол дода шудааст.

Додситонии кулли Узбекистон 28-уми июли соли 2017 хабар дод, ки Каримова 21-уми августи соли 2015 панҷ сол аз озодӣ маҳрум шуда, тафтиши парвандаҳои дигари ӯ идома дорад.

Марги шубҳабарангези сарбози 20-сола дар Роғун. ВИДЕО

Илҳомҷон Худойбердиев чанд акс бо либоси низомӣ дар саҳифааш дар Одноклассники гузоштааст.

Дар ноҳияи Деваштич Илҳомҷон Худойбердиев, як сарбози вазорати мудофиаи Тоҷикистонро дафн карданд, ки дар воҳиди низомиаш дар ноҳияи Роғун ба ҳалокат расидааст.

Ҷасади сарбози 20-соларо рӯзи 16-уми феврал дар зодгоҳаш деҳаи Работи ноҳияи Деваштич (Ғончии собиқ) ба хок супурданд. Бародараш Муродҷон Худойбердиев ба Радиои Озодӣ гуфт, сабабҳои марги Илҳомҷон ҳоло маълум нест.

Дар видеое, ки як сокини деҳа ба Радиои Озодӣ фиристод, бурдани тобуте дида мешавад, ки ба гуфтаи ҳамин сокин тобути сарбози ҷавонмарг аст.

Марги шубҳабарангези сарбози 20-сола дар Роғун
лутфан мунтазир бошед
### Эмбед ###

### Феълан кор намекунад ###

0:00 0:00:16 0:00

Бародари сарбоз гуфт, онҳо азм доранд, маълум кунанд, бо Илҳомҷон чӣ рух додааст. “Мо то ҳол намедонем, ки чӣ ҳодиса шудаст, аммо то ба умқи он мерасем” афзуд ӯ.

Дар Вазорати мудофиаи Тоҷикистон дар суҳбат бо Радиои Озодӣ марги ин ҷавонро тасдиқ карда гуфтанд, айни замон қазияи марги сарбоз тафтиш мешавад ва то ду рӯзи дигар шарҳи расмӣ дар бораи марги Илҳомҷон Худойбердиев омода хоҳад шуд.

Ҳамдеҳагони Худойбердиев, ки дар маросими дафни сарбоз ҳузур доштанд, ба Радиои Озодӣ гуфтанд, ки дар бадани ӯ осори захми як тир мушоҳида мешуд.

Илмҳоҷон Худойбердиев, якуним сол қабл ба сафи артиши Тоҷикистон ҷалб шудааст. Ӯ дар яке аз қисмҳои ҳарбии ноҳияи Роғун хизмат мекард ва то анҷоми хизматаш ҳамагӣ 6 моҳи дигар боқӣ монда буд. Дар саҳифаи ӯ дар шабакаи Одноклассники чанд акс бо ҳамхидматонаш низ вуҷуд дорад. Дар маросими дафни ин ҷавон раиси ноҳияи Деваштич ширкат кардааст.

Дар Тоҷикистон худкушии сарбозон ва ё дар натиҷаи тасодуфу муноқиша ба ҳалокат расидани онҳо дар гузашта мушоҳида шудааст. Бадрафторӣ бо сарбозонро яке аз сабабҳои аслии чунин ҳодисаҳо медонанд.

Додситон хост, шарики собиқи Трамп ҷазои сахт бигирад

Пол Манафорт

Роберт Мюллер, додситони вижаи Амрико гуфтааст, ки Пол Манафорт, раиси собиқи ситоди интихоботии раиси ҷумҳур Доналд Трамп сазовори ҳукми тулонии зиндон аст.

Роберт Мюллер, ки парвандаи эҳтимоли дахолати Русия ба интихоботи президентии соли 2016-ро тафтиш мекунад дар ин бора рӯзи 15-уми феврал суҳбат кард.

Ба гуфтаи Роберт Мюллер, Пол Манафорт, ки як замон мушовири Виктор Янукович, раиси ҷумҳури собиқи Украина буд, барои ҷиноятҳои иқтисодӣ аз ҷумла тақаллуби молӣ, пинҳон кардани даромад ва сарпечӣ аз пардохти молиёт сазовор аст, ки аз 19 то ба 24 сол аз озодӣ маҳрум карда шавад.

Пол Манафорт ба додситони вижа ваъда дода буд, ки дар ивази сабуктар кардани ҳукм тамоми ҳақиқатро ошкор мекунад, вале ба гуфтаи додситон баъди ин ваъда ҳам ба муфаттишон иттилои дурӯғ додааст. Роберт Мюллер дар санади пешниҳодиаш гуфтааст, “Пол Манафорт дар муддати бештар аз 10 сол тавре амал кард, ки худро болотар аз қонун медонист ва мақомоти федеролӣ ва дигар ниҳодҳои молиро аз миллионҳо доллар маҳрум кард.”

Пол Манафорт, ки ба зудӣ ҳукмаш содир мешавад, ҳамчунин бояд ба мақомоти Амрико 55 миллион доллар ҷарима бисупорад. Иттиҳомот ба зидди раиси собиқи ситоди интихоботии Доналд Трамп ба дахолати эҳтимолии Русия ба интихоботи Амрико иртиботи мустақим надоштааст.

Ҷозеф Вотел гуфт, 1000 сарбоз Афғонистонро тарк мекунанд

Ҷозеф Вотел

Фармондеҳи қувваҳои Марказии Амрико дар Ховари Миёна мегӯяд, ки кишвараш шояд беш аз ҳазор сарбози худро аз Афғонистон хориҷ кунад. Генерал Ҷозеф Вотел - фармондеҳи баландрутбаи амрикоӣ рӯзи 15-уми феврал дар сӯҳбат бо хабаргузории “Ройтерз” гуфтааст, ки хуруҷи ин сарбозон ба талошҳои ҷорӣ барои сулҳ дар Афғонистон рабт надорад.

Ба гуфтаи ӯ, ин тасмим бар асоси пешниҳоди Скот Миллер, фармондеҳи НАТО ва Амрико дар Афғонистон гирифта шудааст. Скот Миллер моҳи сентябри соли 2018 фармондеҳии нерӯҳои НАТО ва Амрикоро дар Афғонистон ба уҳда гирифт.

Ба гуфтаи генерал Вотел, нақшаи коҳиши теъдоди сарбозон дар Афғонистонро Скот Миллер пас аз таъйин шуданаш ба ин мақом омӯхт ва пешниҳод кард. Генерали амрикоӣ дар бораи замони хуруҷи ҳазор сарбоз чизе нагуфт.

Амрико дар Афғонистон дар ҳоли ҳозир 14 ҳазор сарбоз дорад, ки дар амалиётҳо ба сарбозони Афғонистон кӯмак мекунанд ва низомиёни афғонро омӯзиш медиҳанд.

Дар Афғонистон бештар аз 30 сол аст ҷанг давом дорад. Гуруҳи Толибон аз мухолифони аслии ҳукумат аст. Феълан, аз ҷониби Амрико, Русия ва худи ҳукумати Афғонистон талош барои сулҳ бо ин гурӯҳ дар ҷараён аст.

Вазири Эрон партоби бенатиҷаи мушакро тасдиқ кард

Партоби нокоми моҳвора дар моҳи январ дар Эрон

Вазири умури хориҷии Эрон гуфт, дар воқеъ партоби як моҳвораи кишвар ба мадори Замин дар аввали моҳи феврал бо нокомӣ анҷомидааст. Дар муддати ду моҳи гузашта, ду талоши Эрон барои партоби моҳвора натиҷа надод.

Муҳаммадҷаводи Зариф дар мусоҳиба бо телевизиони “NBC News” рӯзи 15 феврал гуфт, сабабҳои ба мадор нарасидани моҳвораҳо рӯшан нест, вале афзуд, ки мумкин аст, “харобкории эҳтимолии Амрико”-ро ҳам таҳқиқ кунанд.

Аз ин пештар нашрияи Ню Йорк Таймс дар рӯзи 13-уми феврал гузориш дод, ки ҳукумати Амрико барномаи махфии харобкорӣ дар мушакҳои Эронро суръат бахшидааст. Муҳаммадҷавод Зариф гуфт, мақомот сабабҳои нокомӣ дар партоби мушакҳоро таҳқиқ мекунанд, вале баъди гузориши “Ню Йорк Таймс” ба таҳқиқи “мушаххасоти дигар” шуруъ кардаанд. “Эҳтимоли харобкорӣ вуҷуд дорад, вале мо бояд онро боэҳтиёт таҳқиқ кунем” – гуфт, ӯ.

Намояндаи Шӯрои Амнияти Миллии Амрико ба дархостҳо дар ин замина ҳануз шарҳе надодааст. Муҳаммадҷавод Озари Ҷаҳромӣ, вазири мухобироти Эрон моҳи январ гуфт, мушаке, ки дар ин моҳ партоб карданд, дар марҳилаи саввуми ҳаракат, “суръати зарурӣ”- ро нагирифт. Амрико Эронро барои партоби мушакҳо интиқод карда ва гуфтааст, ки “Беэътиноии ошкори Эрон ба меъёрҳои байналмилалиро таҳаммул намекунад.”

Ёфтҳои бештар

Гузоришҳои видеоӣ

Баъди театру варзиш афсарони милиса бояд китобхон ҳам шаванд
лутфан мунтазир бошед

### Феълан кор намекунад ###

0:00 0:02:08 0:00
XS
SM
MD
LG