Боридани жола ва омадани сел шаби 14 ба 15-уми июн боис ба тахриби се пул, роҳҳо ва осеб дидани боғу полезҳо шудааст. Иқбол Тешаев, сухангӯи ҳукумати шаҳри Исфара, дар суҳбат бо Радиои Озодӣ гуфт, бар асари боридани жола ва боришоти зиёд се купрӯк дар ҷамоати Лаккон фурӯ рафта, пойгоҳҳои обкашонӣ дар ҷамоатҳои дигар аз кор баромаданд.
"Сел дар ҷамоатҳои Лаккон, Навгилем, Кӯлканд, Чилгазӣ ва деҳаҳои Хонаобод ва маҳаллаҳои навбунёди 13, 14 ва Сомониён ва худи шаҳри Исфара осеб расонд. Сел канори роҳҳоро тахриб карда полези помидор ва ҳосили зардолузоро нобуд кард", - гуфт Тешаев.
Ҳамсуҳбати мо гуфт, раиси ноҳия Сиҷоуддин Саломзода ҳамроҳ бо масъулони дигар ҳоло, деҳаву ҷамоатҳоро аз назар мегузаронанд, ки ба куҷо чи қадар хисорот расидааст. Тешаев гуфт, барои бартараф кардани оқибатҳои сел дар назди мақомот комиссияи махсус ташкил шуда, ҳама кормандон дар кор ҳастанд.
“Ҳоло барои ҳисоб кардани зиёни расондани сел ба хоҷагии Исфара Орифҷон Хоҷазода, муовини раиси вилоят ҳамроҳ бо раиси Идораи ҳолатҳои фавқулодаи вилоят ба шаҳри Исфара меоянд”, - гуфт Иқбол Тешаев.
