Пайвандҳои дастрасӣ

Хабари нав

Хабарҳо

Шикояти шиканҷа шудани се сокини Раштро додситонии кулл месанҷад

Додгоҳи олии Тоҷикистон аз додситонии кулл дархост кард, ки шикояти се боздоштшуда аз шиканҷа шуданашон дар боздоштгоҳ санҷида шавад. Эътилофи зидди шиканҷа рӯзи 4 июн бо пахши изҳороте гуфт, ки Додгоҳи олӣ дар посух ба вакили дифои Маркази мустақили ҳуқуқи инсон (созмони узви Эътилофи зидди шиканҷа) гуфтааст, ки шикояти се сокини ноҳияи Рашт – Саидмурод Абдураҳмонов, Мададшо Ятимов ва Иброҳим Каҳҳоров санҷида мешавад.

Адвокат Ориф Султонов, ки аз ҳуқуқи ин се нафар ҳимоят мекунад, гуфт, додситонии ноҳияи Рашт 12 январи имсол нисбати ин се нафар аз рӯи иттиҳоми куштор ва бандитизм парванда боз кард. Гумонбарон гуфтаанд, ки дар ҷараёни баёнот ин се нафар аз ҷониби нозири минтақавӣ ва кормандони ҷустуҷӯи ҷиноии Шӯъбаи ВКД дар ноҳияи Рашт шиканҷа шудаанд. Гумонбарон гуфтаанд, ки онҳоро ба қисмати поини пой ва болои сарашон задаанд ва дар натиҷа яке аз гумонбарон Саидмурод Абдураҳмонов кар шудааст.

Гумонбарон аз рӯи куштори бознашудаи соли 1998 боздошт шуданд. Тафтишот гуфт, ки 19 сентябри он сол раҳбари фермаи деҳаи Ялдамичи ҷамоати Қалъанаи ноҳияи Рашт Акбар Маҳмадов аз ҷониби афроди ношинос кушта шуд. Вакили дифоъ Ориф Султонов гуфт, ки ин се нафар “таҳти шиканҷа гуноҳро ба гардан гирифтанд”. Вакили дифоъ гуфт, ки ҳуқуқшиносони Маркази мустақили ҳуқуқи инсон шиканҷа шудани гумонбаронро собит карда дар ин бора ба унвонии Ваколатдори ҳуқуқи инсон ва ВКД номаи шикоятӣ навиштанд.

Мавзӯи шиканҷа ба хотири гирифтани эътирофи гуноҳ дар муассисаҳои тафтишотии Тоҷикистон яке аз мушкилотест, ки онро ҳомиёни ҳуқуқи башар пайваста интиқод мекунанд. Ин мавзӯъ дар гузоришҳои ахири СММ низ зиёд ҳамчун масъалаи мавриди нигаронӣ таъкид шудааст.

Ҳамаи хабарҳои имрӯзро дар инҷо бихонед

Роҳбари ҳизби "Ота Макон": Қарори додгоҳ дар бораи маҳрум кардани ман аз вакилӣ сиёсист

Омурбек Текебоев, раиси ҳизби "Ота Макон".

Додгоҳи ноҳияи Якуми майи шаҳри Бишкеки Қирғизистон рӯзи 23 ноябр даъвои фаъоли шаҳрвандӣ Темирлан Ормуковро дар бораи бекор кардани мандати вакилии Омурбек Текебоев қонеъ кард.

Ин иттилоъро Омурбек Текебоев, раиси ҳизби "Ота Макон" тасдиқ кард. Текебоев гуфт, ки ин қарор сиёсист. "Бояд бигӯям, ки ин қарор сиёсист. Ҳолатҳое буд, ки роҳбарияти имрӯзаи кишвар дар пеши чашми роҳбарони фраксияҳои дигари порлумонӣ маро тарс медоданд, мегуфтанд, ки "даркор шавад, мандататро мегирем". Додгоҳҳо ҳамон фармоишҳои сиёсиро иҷро мекунанд", - гуфт Текебов.

Комисияи марказии интихоботии Қирғизистон ин хабарро ҳоло шарҳ надодааст.

Мандати вакилӣ ба раиси ҳизби "Ота Макон" рӯзи 15 октябри соли 2020 дода шуд. Он замон намояндаи ҳизб дар порлумон Содиқ Шерниёз аз мандат даст кашид ва ба ин тартиб, Текебоев ба порлумон роҳ ёфт.

Текебоев дар соли 2017 бо айби фасодкорӣ 8 сол зиндонӣ шуд. Додгоҳ моҳи августи соли 2019 ӯро аз зиндон ба ҳабси хонагӣ фиристод.

Барканории мудири мактаб дар Андиҷон баъди бо либоси тунук ба кӯча баровардани хонандагон

Мактаби рақами 43-и Андиҷон.

Дар шаҳри Андиҷони Узбекистон мудир ва муовини мудири мактаби №43 баъди он аз мақом барканор шуданд, ки хонандагонро дар ҳавои сард бо либоси тунук барои афроштани парчам ба кӯча бароварданд.

Дар бораи барканории мудир ва муовинаш рӯзи 23 ноябр Раёсати маорифи халқии вилояти Андиҷони Узбекистон хабар дод.

Дар хабари Раёсат омадааст, ки ҳодиса ба кӯча баровардани хонандагон рӯзи 19 ноябр сурат гирифтааст.

Гуруҳи корие, ки барои таҳқиқи ҳодисаи мазкур ташкил шудааст, хабар дод, кӯдакон ҳамагӣ 2-3 дақиқа дар берун қарор доштанд ва баъдан ба синфхонаҳо даромаданд.

Дар хабари расмӣ омадааст, ки волидон нисбати ин ҳодиса эътирозе накардаанд.

Аммо сарфи назар аз ин, мудир ва муовини мудири мактаби №43 аз мақом барканор шуданд.

Рӯзи 22 ноябр дар шабакаҳои иҷтимоӣ аксе нашр шуд, ки дар он хонандагон бо парчамҳои Узбекистон ва бо либоси нисбатан тунук дар ҳавои сард дар берун қарор доштанд. Дар канори хонандагон мардон ва заноне ҳам дида мешуданд, ки дар тан либоси зимистонӣ доштанд.

Ба ҳайати Украина иҷозат нашуд, бо сарвазири Қазоқистон мулоқот кунад 

Сарвазири Қазоқистон. Акс аз бойгонӣ.

Ҳайати ҳукумати Украина ба раҳбарии вазири зербиноии ин кишвар Владислав Криклий, ки дар доираи як сафар вориди шаҳри Нурсултон шуданд, натавонистанд бо сарвазири Қазоқистон Аскар Мамин мулоқот кунанд.

"Барои таъмини амнияти иштирокдорони вохӯриҳо дар шароити пандемия риояи қоидаҳои беҳдоштӣ, аз ҷумла доштани маълумотнома дар бораи мубтало нашудан ба коронавирус зарур аст. Бинобар ин, сарвазири Қазоқистон Аскар Мамин ба далели он ки муҳлати маълумотномаи ҳайати Украина дар мавриди мубтало набудан ба вирус сипарӣ шуда буд, натавонист бо Владислав Криклий мулоқот кунад",-иттилоъ додааст хадамоти матбуотии ҳукумати Украина.

Владислав Криклий бори нахуст нимаи аввали моҳи ноябр ба Қазоқистон рафта буд. Он замон миёни вазоратхонаҳои саноат ва зербиноии Қазоқистону Украина ёддошти ҳамкорӣ имзо шуда буд. Мулоқоти ӯ бо сарвазири Қазоқистон бояд 12 ноябр баргузор мешуд, вале ҳайати Украинаро ба ҷои сарвазир муовини ӯ Роман Скляр ба ҳузур пазируфт.

​Криклий ва атрофиёнаш гуфтанд, бо назардошти ин ки мулоқоти онҳо бо Аскар Мамин 10 ноябр баргузор мешавад, 6 ноябр аз санҷиши коронавирус гузаштанд. Вале баъди ворид шудани ҳайат ба Қазоқистон мулоқот ба рӯзи 12 ноябр гузошта шуд ва бинобар ин, муҳлати санҷиш аз вирус сипарӣ гашт.

Вазорат гуфт, рӯзи гузашта дар Тоҷикистон касе аз КОВИД-19 нафавтидааст

Дохили яке аз мошинҳои Ёрии таъҷилӣ дар Душанбе

Вазорати тандурустии Тоҷикистон рӯзи 23-уми ноябр эълон кард, ки шумораи афроди фавтида бар асари сироят ба коронавирус тағйир наёфтааст ва ин ниҳод сабаби марги танҳо 86 нафарро аз вируси нав тасдиқ мекунад.

Коршиносон ба омори расмӣ бовар надоранд ва мегӯянд, теъдоди фавтидаҳо ба маротиб бештар аст.

Ба иттилои расмӣ, дар шабонарӯзи охир дар Тоҷикистон 38 нафар ба бемории COVID-19 гирифтор шудаанд. Вазорати тандурустӣ гуфт, дар умум омори беморон то 23-уми ноябр ба 11 ҳазору 932 нафар расидааст. Ба иддаои Вазорати тандурустии Тоҷикистон, аз замони эътирофи мавҷудияти коронавируси нав дар кишвар беш аз 94 дарсади беморон шифо ёфтаанд. Аммо муттахасисон омори расмиро дар бораи беморони коронавируси нав ва маргу мир аз он дар Тоҷикистон зери шубҳа мегузоранд. Онҳо мегӯянд, миқёси беморӣ ва фавти одамон метавонад аз маълумоти расмӣ ба маротиб бештар бошад.

Дар Қирғизистон тарҳи Сарқонуни навро зидди ҳуқуқи инсон номиданд

Раҳпаймоии зидди лоиҳаи нави Қонуни асосии Қирғизисттон дар Бишкек. 22 ноябри соли 2020

Сардори Маркази пажӯҳишҳои башарии Академияи миллии улуми Қирғизистон Чопон Койчуманова 23 ноябр дар ҷаласаи Маҷлиси конститутсионӣ банди 23-и лоиҳаи Қонуни асосии нави ин кишварро ба баҳс кашид.

Дар ин банд омадааст, "фаъолияти расонаҳо, аз ҷумла чопӣ, электронӣ, телевизионӣ ва чорабиниҳои ҷамъиятие, ки хилофи арзишҳои ахлоқии эътирофшудаи умум, анъанаҳои мардуми Қирғизистон ва меъёрҳои байналмилалӣ мебошанд, манъ аст".

"Ҳар кас мафҳуми арзиш ва анъанаро ҳар хел мефаҳмад. Имрӯз кӣ муайян мекунад, ки арзишҳо ва анъанаҳо кадоманд? Онҳоро бояд дар қонун ҷой дод, вале ин корро касе намекунад, зеро арзишҳову анъанаҳо гуногунанд. Бар асоси ин банд, дилхоҳ одамеро, ки суханҳояш писанд намеоянд, метавон ба ҷавобгарӣ кашид. Ҷомеа ин бандро интиқод дорад. Он ихтилофҳои бузургеро ба бор хоҳад овард. Инҷо нақзи бузурги ҳуқуқи инсон мушоҳида мешавад", - изҳор дошт сардори марказ.

Иҷрокунандаи вазифаҳои президенти Қирғизистон Талант Мамитов 20 ноябр бо имзои фармоне Маҷлиси конститутсиониро таъсис дод. Онро мудири кафедраи ҳуқуқи конститутсионӣ ва байналмилалии Донишгоҳи словянии Қирғизистону Русия Бекбосун Борубашев раҳбарӣ мекунад.

Лоиҳаҳои Конститутсияи нав ва қонуни таъйини раъйпурсӣ дар рӯзи 10 январро сомонаи порлумони Қирғизистон 17 ноябр нашр кард. Лоиҳаи қонун баъди як моҳи баррасии умум ба порлумон пешниҳод мешавад.

Дар Конститутсияи нав салоҳиятҳои президент бештар ва таъсис шӯрои мардумӣ пешбинӣ шудааст. Тибқи он, президент раҳбари давлат ва мақомоти иҷроия аст.

Ду мансабдори баландпояи ҳукумати Ёвонро боздошт кардаанд

Даромадгоҳ ба ноҳияи Ёвон

Ду мансабдори баландпояи ҳукумати ноҳияи Ёвони вилояти Хатлон бо гумони даст доштан дар "хилофкорӣ ва тақсими нодурусти қитъаи замин барои бунёди манзили зист" боздошт шудаанд.

Қарори боздошти Аскар Набизода, муовини раиси ноҳияи Ёвон ва Хайриддин Саидмуродзода, роҳбари Идораи замини ин ноҳия пас аз санҷиши додситонии вилояти Хатлон содир шудааст.

Назари пайвандони боздоштшудаҳо маълум нест ва гуноҳи онҳо ҳанӯз исбот нашудааст.

Ду ҳамсуҳбати Радиои Озодӣ дар ҳукумати Ёвон рӯзи 23-юми ноябр ба ҳабси пешакӣ гирифта шудани ин ду мақомдорро тасдиқ карданд.

Ба гуфтаи онҳо, қабл аз ин, як ҳайат аз мақомоти додситонӣ дар вилояти Хатлон ба тафтиши қонунгузорӣ дар робита ба тақсиму ҳуҷатгузории замин ба ҳукумати Ёвон омада буданд.

"Дар маҷлиси охири ҳукумати ноҳия эълон карданд, ки Аскар Набизода бинобар талаботи ҷойивазкунии кадрҳо (ротатсия) аз вазифаи муовини раиси ноҳия сабукдӯш карда шуд. Хайриддин Саидмуродзода низ дар маҷлисҳо ҳузур надорад, чун гуфта мешавад, ӯ дар рухсатии меҳнатист", ‑‑афзуд ҳамсуҳбати мо.

Ба гуфтаи онҳо, Аскар Набизода ва Хайриддин Саидмурозода тақрибан ду ҳафта пеш боздошт шудаанд.

Дар Додситонии вилояти Хатлон аз ифшои ҷузъиёти боздошти ин ду мансабдор ба далели халал ворид нашудан ба тафтишот худдорӣ варзиданд.

Боздошти ин ду мансабдори ноҳияи Ёвон дар ҳолест, ки солҳои охир ҳодисаҳои ришватхорӣ ҳангоми тақсими замин ва хилофкориҳо дар ин замина афзоиш ёфтаанд.

Президенти Тоҷикистон ду сол қабл дар як суханронӣ аз афзоиши ҳолатҳои заминфурӯшии мансабдорон изҳори нигаронӣ карда, гуфта буд, ки ин мушкил ба "як дарди бедаво" табдил шудааст. Ба назар мерасад, ин таъкид таъсир надошт, ки шумори парвандаҳои заминфурӯшӣ ҳамоно рӯ ба афзоиш аст.

Сокинони Тоҷикистон мегӯянд, тамаъҷӯии мансабдорон зиёдтар аз ҳама ҳангоми тақсими замин барои бунёди хона ва замин барои кишоварзӣ рух дода, рӯзгори онҳоро табоҳ кардааст.

Созмони ҳамкориҳои иқтисодӣ ва рушд (OCED) ҳам дар гузориши охирини худ дар робита ба муборизаи зидди коррупсия дар Тоҷикистон менависад, "хавфи аз ҳама зиёди ришватхорӣ дар ҷараёни тақсими порчаҳои замин вуҷуд дорад".

Кумитаи давлатии замин мегӯяд, дар давоми 28 соли истиқлол бо қарорҳои ҳукумат ҳудуди 130 ҳазор гектар заминро барои бунёди манзилҳои истиқоматӣ ба як миллиону 400 ҳазор оила тақсим кардааст.

Дар Маскав ҳайкали Иосиф Кобзонро месозанд. Ба 52 млн рубл

Аз чап ба рост: сароянда Иосиф Кобзон ва президенти Русия Владимир Путин, акс аз соли 2017

Шаҳрдории Москва мехоҳад, бо харҷи 52 миллион рубл муҷассамаи овозхони замони Шӯравӣ, арбоби ҷамъиятӣ, ҳунарманди мардумии Иттиҳоди Шӯравӣ Иосиф Кобзонро дар маркази пойтахти Русия насб кунад.

Нақшаи насби пайкараи ҳунармандро раиси комиссияи Маҷлиси шаҳрии Москва дар умури фарҳангӣ ва иртибототи умум Евгений Герасимов дар суҳбат бо "Эхо Москава" тасдиқ кард.

Ба гуфтаи вакили маҷлиси ноҳиявии Твер ва раиси кумитаи сохтмони давлатӣ Кетеван Хараизде гуфт, тасмими ниҳоии бунёди муҷассама аз натиҷаи раъйгирӣ дар шӯрои вакилони ноҳияи Твер вобастааст.

Дар баробари овозхонӣ, Кобзон ҳамчунин дар Донишгоҳи омӯзгории мусиқӣ дарс мегуфт. Ӯ соли 1990 намояндаи мардумӣ дар Шӯрои олии СССР ва аз соли 1997 депутати Думаи давлатии Русия буд.

Моҳи марти соли 2014 Кобзон бо иншои як муроҷиатнома ба шахсиятҳои фарҳангӣ аз сиёсати Владимир Путин дар робита ба Қрим пуштибонӣ намуд ва борҳо ба ҷумҳуриҳои худхондаи Донетск ва Луҳанск сафар ва аз ҷудоиталабии онҳо ошкоро ҳимоят кард.

Ӯ охирҳои моҳи августи соли 2018 дар 81-солагӣ фавтид. Соли 2005 табибон дар ҷисми Кобзон бемории саратонро ташхис карда буданд.

Дар Чита додгоҳи сарбозе шурӯъ шуд, ки 8 ҳамхидматашро куштааст

Рамил Шамсуддинов дар додгоҳи Чита

Дар шаҳри Читаи минтақаи Сибири Русия мурофиаи додгоҳии сарбозе шурӯъ шуд, ки моҳи октябри соли 2019 ҳашт ҳамхидматашро дар як қисми ҳарбии минтақаи Забайкале аз тири туфанг ба қатл расонид. Рамил Шамсуддинов дар он муттаҳам мешавад, ки дар ҳодисаи рӯзи 25-уми октябри порсол ҳашт нафар, аз ҷумла ду афсарро ба қатл расонд. Шамсуддинов баъдан ба тафтишот гуфт, ки ӯро дар хидмат азият мекарданд. Дар вазорати дифоъ баъдан тасдиқ карданд, ки воқеан ҳам яке аз афсарон ин сарбозро озор медод ва бар асоси ин аз рӯи моддаи “меҳтарсолорӣ” (ба русӣ “дедовшина”) парванда боз карданд. Рӯзи 23-юми сентябр дар Кумитаи тафтишоти Русия гуфтанд, ки Рамил Шамсуддинов дар куштори ҳамхидматҳои худ иқрор шудааст. Вакилонаш гуфтанд, ки куштор дар ҳолати аффект ваё асабонияти шадиде, ки берун аз назорат мемонад, анҷом шудааст.

Рӯзи 23-юми ноябр инчунин ба як сарбози дигаре, ки дар марги се нафар ҳамхидматаш гумонбар мешавад, айб эълон шуд. Антон Макаров дар он гунаҳгор мешавад, ки дар фурудгоҳи низомии Воронеж аввал силоҳро дуздида баъдан чанд нафарро куштааст. Дар вазорати дифоъ гуфтанд, ки ин куштор ҳам дар ҳолати асабонияти шадид рух додааст, вале вуҷуди азияту озори сарбозро эътироф накарданд.

Матбуот: Нетаняҳу пинҳонӣ ба Арабистони Саудӣ сафар кард

Нахуствазири Исроил Бенямин Нетаняҳу

Чандин матбуоти исроилӣ хабар доданд, ки нахуствазири кишвар Бенямин Нетаняҳу рӯзи 22-юми ноябр ба таври пинҳонӣ ба Арабистони Саудӣ сафар карда, бо раҳбари воқеии ин кишвар ва ҳам котиби давлатии ИМА Майк Помпео, ки дар ин кишвар меҳмон буд, дидан кардааст. Телевизиони давлатии “Kan”-и Исроил рӯзи 23-юми ноябр бо такя ба мақомоти беном хабар дод, ки Нетаняҳу ва раҳбари оҷонсии иктишофии “Моссад” Ёсӣ Коҳен бо шоҳзода Муҳаммад Бин Салмон ва дипломати аршади амрикоӣ дар шаҳри Неоми Арабистони Саудӣ, ки дар соҳилҳои баҳри Сурх ҷойгир аст, дидору гуфтугӯ анҷом дод. Ин хабарро чандин матбуоти дигар ҳам нашр кардааст. Дафтари Нетаняҳу ва сафорати ИМА дар Байтулмуқаддас барои шарҳи ин хабар дастрас набуданд. Агар ин хабар ҳақиқат дошта бошад, пас ин аввалин сафари нахуствазири Исроил ба Арабистони Саудӣ мебошад. Мулоқоти мазкур дар ҳоле баргузор мешавад, ки Исроил чанде пеш созиши таърихии оддӣ шудани муносибатҳо бо ду кишвари муттафиқи Саудия дар минтақаи Халиҷи Форс – Имороти Муттаҳидаи Арабӣ ва Баҳрайнро имзо кард. Нақши миёнҷиро дар ин муносибатҳо маъмурияти президенти ИМА Доналд Трамп иҷро кардааст.

Ин таҳаввулот дар ҳолест, ки аксар кишварҳои минтақа дар қиболи Эрон мавзеи муштарак доранд. Арабистони Саудӣ ба таври ошкор гуфтааст, ки ба қавлаш дар баробари Лигаи кишварҳои араб пойбанд мемонад, ки то замони ҳал шудани низоъ дар Фаластин бо Исроил наздик нахоҳад шуд. Бо ин вуҷуд, саудиҳо ба ҳавопаймоҳои исроилӣ иҷоза доданд, ки аз ҳарими ҳавоии онҳо убур кунанд.

Воксинаи ширкати AstraZeneca  зидди COVID-19  90 % муфид будааст

Озмоишгоҳи назди донишгоҳи Оксфорди Бритониё

Ширкати AstraZeneca гуфт, озмоишҳои воксинаи нави ин ширкат дар муқобили COVID-19 90 дарсад муассир будааст. Ин озмоишҳо дар Бритониё, дар назди донишгоҳи Оксфорд ба роҳ монда шудаанд. Ин натиҷаҳо дар ҳоле эълон мешаванд, ки дар ҷаҳон шумори олудашудаҳо ба коронавирус аз 58 миллион нафар гузашта 1,4 миллион нафар ҷон додаанд. Хабари мазкур дар ҳоле нашр мешавад, ки дар ИМА рақибони донишмандони бритониёӣ аз ширкатҳои Pfizer ва Moderna дар бораи муассирияти 90 дарсадии воксинаҳои сохтаи онҳо хабар доданд. Ба марҳилаи ниҳоии озмоишҳо ширкатҳои дигари мисли Johnson & Johnson ва Sanofi-GSK ҳам наздик мешаванд.

Русияву Чин гуфтанд, ки воксинаҳои худро пешниҳод мекунанд, вале дар заминаи амният ва муассирияти онҳо ҳанӯз суол зиёд аст. Мутахассисони тиб дар ҷаҳон мегӯянд, ки барои мубориза бо COVID-19 воксинаи зиёд лозим мешавад.

Барқкушӣ ба соҳибкорони Узбекистон даҳҳо ҳазор доллар зиён овардааст

Симҳои барқ. Акс аз бойгонӣ.

Дар ноҳияи Яккабоғи вилояти Қашқадарёи Узбекистон дар пайи се рӯзи хомӯш кардани неруи барқ 6 ҳазор мурғи як соҳибкори маҳаллӣ талаф шудааст.

Дар ноҳияи Каттақурғони вилояти Самарқанди он кишвар як кишоварз ба далели сармо задани ниҳолҳои гармхонааш 35 ҳазор доллар зиён дидааст. Дар ин бора корбарони шабакаҳои иҷтимоӣ дар Узбекистон рӯзи 22 ноябр хабар додаанд.

Блогнависи узбекистонӣ Комил Фахриддинов хабар дод, ки аз 18 то 20 ноябр дар ноҳияи Яккабоғ неруи барқро хомӯш кардаанд. Дар натиҷа 6 ҳазор чӯҷаи мурғи соҳибкор Абдунабӣ Ғиёсов талаф ёфтааст.

Корбарони шабакаҳои иҷтимоӣ ҳамчунин аз хомӯш шудани неруи барқ дар зоишгоҳ ё таваллудхонаи ноҳияи Тошканди вилояти Тошканд хабар дода, онро танқид карданд.

Вазорати энержии Узбекистон мегӯяд, ки дар натиҷаи фаро расидани сардиҳо талабот ба неруи барқ афзуда ва ин боиси аз кор мондани хатҳои барқ шудааст.

Байден ёвари собиқадори худ Энтони Блинкенро ба мақоми Котиби давлатӣ баргузид

Энтони Блинкен дар сурати мувофиқати Сенат дар ҳукумати президенти мунтахаб Ҷо Байден Котиби давлатии ИМА мешавад

Матбуоти амрикоӣ рӯзи 22-юми ноябр хабар дод, ки президенти мунтахаб Ҷо Байден ёвари дарозмуддати худ ва дипломати собиқадор Энтони Блинкенро ба мақоми котиби давлатии ИМА баргузидааст. Дар сурати мувофиқати Сенат, Блинкен масъули таҳрири сиёсати хориҷии ИМА бо ҷаҳон баъди сиёсати чорсолаи Трамп мешавад, ки гуфта буд, “Амрико дар ҷои аввал аст”. Ин сиёсат боиси то ҷое фосила гирифтани ИМА аз шарикони байналмилалӣ, ихтилофҳои дидгоҳӣ ва ҳам то ҷое ба рақобат бо шарикони суннатии худ гузаштани Вашингтон гардид. Эълони исми номзади курсии котиби давлатии ИМА рӯзи 24-уми ноябр сурат мегирад. Дар миёни номзадҳо ба мақомҳои дигар исми Ҷейк Салливан, ки як ёвари наздики собиқ котиби давлатӣ Ҳилларӣ Клинтон буд, ба мақоми мушовири амнияти миллӣ пешниҳод шудааст. Корҳо дар самти таъини мақомдорони ҳукумати ояндаи ИМА дар ҳоле идома доранд, ки президент Доналд Трамп то ҳол талош дорад натиҷаҳои овоздҳии 3-юми ноябрро бозбинӣ бикунад ва дар ҷараёни марҳилаи гузариш, ки аз рӯи қонун тақозо мешавад, бо тими Байден ҳамкорӣ намекунад.

Душанбе дар соли 2021 пойтахти фарҳангии ИДМ хоҳад буд

Маркази Душанбе

Душанбе дар соли 2021 пойтахти фарҳангии Иттиҳоди давлатҳои мустақил эълон шуд ва ин мақоми рамзӣ ба пойтахти Тоҷикистон аз Шимкенти Қазоқистон гузашт. Дар маросими ба Душанбе эъто шудани мақоми пойтахти фарҳангӣ, ки бо сабаби пандемия ба таври онлайнӣ баргузор шуд, шаҳрдори Шимкент Мурат Айтенов тугмаи рамзии пойтахти фарҳангии ИДМ-ро ба раиси шаҳри Душанбе Рустами Эмомалӣ тақдим кард. Дар маросиме, ки ҳафтаи гузашта баргузор шуд, консули генералии Тоҷикистон дар Алмаато Баҳодур Назир аз номи шаҳрдори Душанбе инчунин корвони рамзиро бо 2200 китоб ва 2200 пиёзаки гули лола қабул кард, ки рамзи аз роҳи Абрешим гузар карда ба Душанбе рафтани он мебошад. Дар чаҳорчӯби соли рамзии пойтахти фарҳангии ИДМ будани Душанбе қарор аст дар пойтахти Тоҷикистон барномаҳои зиёд, аз ҷумла, сафарҳои ҳунарии театрҳову ҳунармандон, намоишгоҳу муаррифии китобҳо ва дигар маъракаҳо ташкил шавад.

Эълони Душанбе ба унвони пойтахти фарҳангии ИДМ дар ҳолест, ки Тоҷикистон ва дигар ҳама кишварҳои ИДМ дар ҳолати пандемияи коронавирус қарор доранд ва ҳамарӯза дар Тоҷикистон каму беш 40 нафар ба вирус олуда мешавад. Омори расмии гирифторӣ дар кишварҳои дигари ИДМ ба маротиб бештар аст ва маълум нест, ки оё барномаҳои фарҳангиву ҳунарии соли 2021-ро шаҳрдории Душанбе ба чӣ шакл роҳандозӣ мекунад.

Пойтахти фарҳангии ИДМ эълон шудани ин ё он шаҳри кишварҳои узв тағйири ҷиддие дар эътибори ин шаҳрҳо ба бор намеорад, вале барои Шимкент ин унвон вижагие дошт, ки он ҳамчун яке аз шаҳрҳои қаторӣ дар соли 2020 ба пойтахти як бахши аъзами Ҷануби Қазоқистон табдил ёфт. Гумон намеравад, ин унвон ба ҷойгоҳи Душанбе, ки пойтахти яке аз давлатҳои узви ИДМ аст, таъсири амиқе гузорад.

ИДМ як созмони дигари зери назари Русия буда, баъди пошхӯрии Иттиҳоди Шӯравӣ дар соли 1991 таъсис шуд. Ба узвияти он Русия, Арманистон, Озарбойҷон, Беларус, Қазоқистон, Қирғизистон, Тоҷикистон, Молдова ва Узбекистон шомил ҳастанд. Ҷумҳуриҳои дигари шӯравии собиқ, мисли Украинаву Гурҷистон бо далели фосилагирӣ аз сиёсати Маскав ва тамоюл ба Ғарб дар солҳои мухталиф аз узвияти ин созмон берун шудаанд.

UNICEF: Соли оянда 2 миллиард воксинаи зидди COVID-19-ро ба кишварҳои ниёзманд мебарем

Озмоишгоҳи воксина дар Ҳолливуди ИМА

UNICEF – дафтари СММ дар умури кӯдакон рӯзи 23-юми ноябр эълон кард, ки ният дорад 2 миллиард дона воксинаи зидди COVID-19-ро дар чаҳорчӯби, ба гуфтааш, “як амалиёти густарда” ба 92 кишвари дар ҳоли рушд тақсим кунад. Ин амалиёт соли 2021 тавассути роҳҳои ҳавоиву заминӣ ва кӯмаки ширкатҳои лоҷистикӣ анҷом мешавад. UNICEF мегӯяд, ки ин як амалиёти бесобиқаву сареъ аст, ки ҳадафаш дастрас кардани воксинаи зидди вируси ҳамагир ба наздики 100 кишвари ҷаҳон мебошад. Ба навиштаи Этлева Кадилли, раҳбари бахши захираҳои UNICEF, баробар бо воксина ин созмон ба ирсоли маводи дигари тиббии ҳифозатӣ аз COVID-19, инчунин ҳароратсанҷҳо, сарулибоси тиббӣ ва маводи дорувор идома хоҳад дод. UNICEF гуфт, ки ҳамчун як узи барномаи COVAX, ки таъминоти ҷаҳон бо воксинаи зидди COVID-19-ро ҳадаф қарор додааст, мехоҳад ҳукуматҳоро аз нияти захира кардани воксинаҳо боздораду қишрҳои осебпазир дар баробари коронавирусро дар навбати аввал бо ин давои зидди вирус таъмин кунад.

Чунин изҳорот дар ҳолест, ки нигарониҳо аз захира кардани воксина аз ҷониби кишварҳои сарватманд то рафт зиёд мешавад. Дар саросари ҷаҳон ҳоло беш аз 58 миллион нафар ба коронавирус олуда шуда, 1,4 миллион нафар аз COVID-19 ҷон додаанд.

Ҳукумати Туркманистон, сарфи назар аз зилзилаҳо, дар Ишқобод 35-ошёна месозад

Ишқобод дар рӯзи 20 ноябри соли 2020

Ҳукумати Туркманистон тасмим гирифтааст, ки дар шаҳри Ишқобод бинои 35-ошёна бунёд кунад. Коршиносон мегӯянд, шаҳри Ишқобод зилзилахез аст ва бунёди бино ба ин баландӣ хатар дорад.

Дар бораи сохтмони бинои 35-ошёна рӯзи 19 ноябр Мурод Непесоп, як масъули вазорати сохтмони ва меъмории Туркманистон хабар дод.

Непесов гуфт, бинои 35-ошёна дар ҳудуди маҷмаи "Ишқобод-ситӣ" бунёд мешавад.

Қурбонгулӣ Бердимуҳаммадов, президенти Туркманистон соли гузашта аз бунёди маҷмааи тиҷории "Ишқобод-ситӣ" хабар дода буд.

Бино ба тарҳи таҳияшуда, майдони маҷмаа аз 744 га замин иборат буда, бештар аз 200 бино, аз ҷумла 180 бинои истиқоматӣ бо баландии аз 12 то 35 ошёна дар он бунёд мешавад.

Сармоягузории чандинмиллионии давлатӣ дар тарҳҳои сохтмонӣ дар ҳолест, ки он кишвар дар даврони истиқлолаш бадтарин буҳрони иқтисодиро пушти сар мекунад ва ин буҳрон дар даврони вабои коронавирус амиқтар шудааст.

Ба бовари коршиносон, яке аз сабабҳои асосии уфти иқтисоди Туркманистон "тарҳҳои бешумори гаронбаҳо ва нолозим"-е аст, ки бевосита бо ташаббуси президент амалӣ мешаванд.

Сокинони маҳаллӣ мегӯянд, меҳмонхонаҳои гаронбаҳое, ки бо ташаббуси президенти Туркманистон сохта шудаанд, дар айни ҳол холӣ ҳастанд.

Бунёди бинои 35-ошёна дар Туркманистон дар ҳолест, ки дар соли 1948 дар шаҳри Ишқобод заминларза рух дод. Он замон шаҳр тақрибан ба куллӣ аз байн рафта буд ва дар он ҳодиса бештар аз 100 ҳазор кас фавтид.

Боздошти беш аз 350 эътирозгар дар Минск ва шаҳрҳои дигари Белорус

Минск, 22 ноябри 2020.

Як ниҳоди назорат аз ҳуқуқи башар дар Белорус мегӯяд, беш аз 350 эътирозгар рӯзи якшанбеи 22-юми ноябр дар пойтахт Минск ва даҳҳо тани дигар дар шаҳрҳои дигари ин кишвар дар ҷараёни эътирозҳо алайҳи Александр Лукашенко боздошт шуданд.

Боздоштҳо дар Минск дар ҳоле сурат гирифт, ки эътирозгарон талош доштанд, гирдиҳамоиашонро ба гурӯҳҳои хурдтар тақсим кунанд.

Онҳо шиорҳои "Зинда бод Белорус" сар дода ва парчамҳои сурх ва сафед дар даст доштанд. Ташкилкунандагони ин эътирозҳо аз мардум хоста буданд, то дар нуқтаҳои мухталиф ҷамъ шаванд, то пулис натавонад онҳоро назорат намояд.

Мақомоти расмӣ то кунун дар бораи омори боздоштшудаҳои ба таври расмӣ маълумоте ироа накардаанд.

Дирӯз 106-умин рӯзҳои эътироз дар Белорус буд. Дар пайи натиҷаҳои интихоботи нуҳуми август, дар Белорус мардум ба хиёбонҳо баромаданд ва ҳукуматро ба тақаллуби густурда муттаҳам карданд.

Дар ин интихобот Александар Лукашенко, ки аз 24 сол ба ин тараф қудратро дар Белорус дар даст дорад, бо ба даст овардани 80 дарсад раъйҳо, баранда эълон шуд. Аҳзоби сиёсӣ натиҷаҳоро қабул накарданд ва гуфтанд, ки интихобот олуда бо тақаллуб буд.

Сарони кишварҳои G20 гуфтанд, зидди COVID-19 якҷо мубориза мебаранд

Ҳамоиши раҳбарони кишварҳои G20 онлайнӣ сурат гирифт.

Роҳбарони кишварҳои "Бистгонаи бузург" (G20) дар поёни саммите, ки бо ташаббуси Арабистони Саудӣ ташкил ва тариқи онлайн сурат гирифт, эъломияи зарурати ҳамкорӣ дар мубориза бо хатарҳои ҷаҳониро қабул карданд.

Роҳбарон вабои коронавирус ва оқибатҳои онро низ аз ҷумлаи хатарҳои ҷаҳонӣ эътироф карданд.

Қисмати бештари эъломияи қабулшуда ба мубориза зидди COVID-19 бахшида шудааст. Роҳбарон ба созиш расиданд, ки то нимаҳои соли 2021 ба кишварҳои фақир дар баргардонии қарзҳояшон фурсат диҳанд.

Дар эъломия ҳамзамон зикр шудааст, бояд талош карда шавад, ки ҳамаи аҳолии курраи замин ба васоили ташхис ва табобати COVID-19 ва дар оянда ба воксини зидди он дастарсӣ пайдо кунанд.

Роҳбарон ҳамчунин дар мавриди пуштибонии иқтисодии кишварҳо фақир ва баргузории Бозиҳои олимпӣ дар Токио ба созиш расиданд. Бозиҳои олимпии Токио мебоист, тобистони соли ҷорӣ баргузор шаванд, аммо ба далели густариши вабои коронавирус ба таъхир гузошта шуданд.

Тазоҳургарон дар Ереван истеъфои нахуствазир Никола Пашинянро талаб карданд

Тазоҳургарон дар Ереван, 21 ноябр, 2020.

Дар майдони Озодии шаҳри Ереван бори дигар гирдиҳамоӣ барпо шуд. Дар рӯзи гирдиҳамоӣ ҳайати ҳукумати Русия дар Арманистон қарор дошт.

Ҳайати Русия аз вазири умури хориҷӣ Сергей Лавров, вазири мудофиа Сергей Шойгу, вазири ҳолатҳои фавқулода Евгений Зиничев ва чанд вазири дигар иборат буд.

Шойгу ва Лавров бо сарвазири Арманистон Никол Пашинян мулоқоти як ба як доштанд. Мавзуи асосии ин гуфтугӯҳо вазъи Қарабоғи Куҳӣ буд.

Лавров гуфт, ба Ереван бо барномаи бузурги барқарории зиндагии осоишта дар Қарабоғи Куҳӣ омадааст. Вай хабар дод, вазъ комилан зери назорати неруҳои посдори сулҳи Русия аст. Неруҳои Русия дар Қарабоғ 23 дидбонгоҳ таъсис додаанд.

Ҳайати Русия аз Арманистон ба Озарбойҷон рафт.

Садҳо одам дар маркази шаҳри Ереван роҳҳои мошингардро баста, истеъфои сарвазир Никол Пашинянро талаб карданд.

Расонаҳо менависанд, ки пулис роҳбандонро боздошт мекунад.

Эътирозҳо дар Ереван шаби 10 ноябр, билофосила баъди имзои созишномаи қатъи ҷанг дар Қарабоғи Куҳӣ ташкил шуданд. Бино ба созишнома, Арманистону Озарбойҷон мавқеъҳоеро ҳифз мекунанд, ки дар замони бастани созишнома неруҳояшон қарор доранд.

Мухолифон истеъфои Пашинян ва бекорсозии созишномаро талаб доранд. Рӯзи 12 ноябр бештар аз 10 роҳбари мухолифон бо айби ташкили эътирозҳои ғайриқонунӣ боздошт шуд.

Вазъ дар Қарабоғи Куҳӣ субҳи 27 сентябри соли равон якбора шиддат гирифта буд. Дар ин минтақа амалиёти низомӣ шуруъ гашт. Дар Арманистону Озарбойҷон вазъи низомӣ эълом карданд.

Низои Озарбойҷону Арманистон бар сари Қабароғи Куҳӣ аз охирин солҳои мавҷудияти Иттиҳоди Шӯравӣ идома дорад. Минтақаи мазкур, ки бештари бошандагонаш арманӣ ҳастанд, дар соли 1991 эълом кард, ки аз Озарбойҷон ҷудо ва мустақил мешавад. Аммо ҳеч кадом давлати дунё ин минтақаро эътироф накард.

Дар Узбекистон тестҳои COVID-19 ду баробар гарон шудаанд

Андиҷон, Узбекистон. Мардум дар интизори натиҷаҳои озмоишҳои худ.

Доруфурӯшиҳои хусусии Узбекистон дар давраи пандемияи коронавирус нархи доруҳои зиддивирусиро боло бурда, арзиши санҷиши коронавирус ё COVID-19-ро ду баробар - аз 250 то 400 ҳазор сӯм (24-38 доллар) гарон кардаанд.

Дар ин бора 3670 нафаре хабар доданд, ки моҳҳои маю июни соли равон дар назарпурсии Маркази пажӯҳишҳои иқтисодӣ ва ислоҳот иштирок карданд.

Бар асоси назарпурсӣ, дар давраи пандемия пеш аз ҳама даромади пурсидашудаҳо (74%) кам шуда, бархе (58%) кори худро аз даст додаанд. Бештари зарардидагон (80%) сокинони пойтахти Узбекистонанд.

Иштирокдорони пурсиш гуфтаанд, дар давраи пандемия бо мушкилиҳои зерин рӯбарӯ шудаанд:

  • дарёфти хадамоти маишӣ (36%)
  • таҳсилоти томактабӣ (32%);
  • таҳсилоти мактабӣ (31%);
  • болоравии нархи маҳсулоти ғизоӣ (23%);
  • қарздорӣ аз пули хадамоти коммуналӣ (15%);
  • нигаронӣ ва руҳафтодагӣ (9%);
  • болоравии нархи маҳсулоти ғайриғизоӣ (7%);
  • камчин шудани маҳсулот дар фурӯшгоҳҳои наздик (6%).

Беш аз чаҳоряки пурсидашудаҳо (25,4%) аз бад шудани некуаҳволии сокинон шикоят кардаанд.

Тазоҳуроти сокинони Алмато ба ҷонибдорӣ аз ҳайвонҳо

Қазоқистон. Акс аз бойгонӣ.

Даҳҳо сокини шаҳри Алматои Қазоқистон 21 ноябр бо талаби сахттар кардани ҷазои хушунат ба ҳайвонҳо ва қабули қонуни нав дар бораи масъулияти нигаҳдории онҳо гирди ҳам омаданд.

Ҳамоиши эътирозӣ дар боғи ба номи Маҳатма Гандӣ баргузор шуда, дар он ҳудуди 50 нафар иштирок доштанд. Бархе аз ҷамъшудаҳо бо фарзандону сагҳои худ иштирок доштанд. Рафти таҷаммуъро рӯзноманигорон ва афроди "ношинос" назорат мекарданд.

Иштирокчиён дар даст лавҳаҳоеро бо навиштаҳои "Онҳо ба ҷуз ту касеро надоранд!", "Онҳо чӣ гуноҳ доранд?", "Моро аз бераҳмон ҳимоят кунед!", "Ҳайвонҳо бозича нестанд-шарм бод ба Қазоқистон!", "Қазоқистон ба қонун дар бораи ҳимояти ҳайвонҳо ниёз дорад"-ро доштанд.

Яке аз созмондиҳандагони таҷаммуъ Наталя Шамсуддинова гуфт, ӯ ва ҳамфикронаш зидди харҷ шудани пулҳои буҷаи давлат ба хадамоте ҳастанд, ки ҳайвонҳои бесоҳибро дар кӯчаву хиёбонҳо дастгир мекунанд.

Созмондиҳандагони таҷаммуъ гуфтанд, шаҳрдории Алмато танҳо баъди дархости севумашон ба баргузории ҳамоиши осоишта иҷозат дод.

Кишварҳои аврупоӣ пеш аз Соли Нав бархе маҳдудиятҳоро лағв мекунанд

Кишварҳои аврупоӣ зоҳиран ба коҳиши маҳдудиятҳо, ки аз нимаи фасли тирамоҳ ҷорӣ шудааст, омодагӣ мегиранд.

Иқтисод ва тиҷорати хурд пас аз маҳдудиятҳо зиён дидааст ва идомаи он метавонад зарарро бештар кунад.

Эмануэл Макрон, президенти Фаронса ҳафтаи оянда суханронӣ хоҳад кард ва эҳтимол аз сабуктар кардани маҳудиятҳои ҷоришуда хабар диҳад, ки аз 30-юми октябр ҷорӣ шудааст.

Эҳтимол аз нав мағозаҳои басташуд, мисли маконҳои фуруши либосу бозича боз шаванд.

Жан Кстек, сарвазири Фаронса рӯзи 21-уми ноябр гуфт, ки ин "давоми чанд рӯзи оянда" амалӣ хоҳад шуд.

Дар Британияи Кабир низ аз лағви маҳдудиятҳо, ки то 2-юми декабр пешбинӣ шудааст, хабар доданд.

Мақомоти Полша хабар доданд, ки аз 28-уми ноябр ба боз шудани маконҳои савдо иҷозат хоҳанд дод.

Адвокати тоҷик дар Русия ба КОВИД-19 сироят ёфтааст

Шуҳрат Қудратов, вакили дифоъ

Шуҳрат Қудратов, адвокати шинохтаи тоҷик бо нишонаҳои сироят ба КОВИД-19 дар як беморхонаи Маскав бистарӣ шудааст.

Ин адвокати шинохта, ки наздики чор сол дар Тоҷикистон зиндонӣ буд, пас аз озодӣ барои кор ба Русия рафт.

Дар як тамоси катбӣ ӯ ба Радиои Озодӣ навишт, ки ҳафтаи гузашта баъди танг шудани нафаскашиаш ва то 40 дараҷа боло рафтани ҳарорати баданаш кормандони тиб ӯро ба беморхона интиқол додаанд.

Ӯ гуфт, ки пас аз муоинаи пизишкон андаке саломатиаш беҳ шудааст.

“Рузи 6 уми ноябр табам баланд шуд ва нафаскашиам мушкил гардид. Пизишкон гуфтанд, ки дучори КОВИД-19 шудаам”,-гуфт, Шуҳрат Қудратов.

Шӯҳрат Қудратов дар моҳи июни соли равон ба Радиои Озодӣ гуфта буд, ки “баъд аз раҳоӣ аз маҳбас зери фишори мақомот қарор гирифт ва ночор кишварро тарк кард".

Ӯ ба Русия омад ва баъди дарёфти ҳаққи адвокатӣ дар ин кишвар ба фаъолияташ идома дод.

Дар моҳи июли соли равон Шуҳрат Қудратов, аз фаъоли ҷомеъа Қадам Исматов ҳимоят кард. Исматов пас аз боздошташ дар Русия хатари истирдод ба Тоҷикистон таҳдид мекард. Аммо бинобар бардурӯғ будани маълумоти пулиси Саратов нисбати номбурда дар зинаи аввали додгоҳӣ пирӯз шудаанд.

Мақомот Шуҳрат Қудратовро соли 2014 бо иттиҳоми ришвахорӣ дастгир карданд. Додгоҳи шаҳри Душанбе моҳи январи соли 2015 ӯро ба нӯҳ соли зиндон маҳкум кард, вале баъдан Додгоҳи олӣ ҳукмро тағйир дод ва то 3 солу 8 моҳ поин овард.

Бисёре аз ҳомиёни ҳуқуқ ва тарафдоронаш он замон аз амалкардҳои ҳукумат интиқод карданд, ки Шуҳрат Қудратовро барои дигарандешиаш ба зиндон андохтаанд. Созмонҳои байналмилалии ҳомии ҳуқуқ ва аз ҷумла Порлумони Аврупо ҳам аз мақомоти Тоҷикистон хостаанд, ки Шуҳрат Қудратовро аз зиндон озод кунад.

Шуҳрат Қудратов, рӯзи 23-юми августи соли 2018 пас аз поёни мӯҳлати адои ҷазо аз зиндон озод шуд.

Шӯҳрат Қудратов аз ҷумлаи вакилони дифоест, ки дар қазияҳои пурсарусадо, ба мисли қазияи Зайд Саидов, Ёқуб Салимов, Диловаршо Қосимов ва Ҷӯрабек Охунов, аз ҳуқуқи онҳо дар додгоҳ ҳимоят кардааст.

Раҳбарони Арманистон ва Озарбойҷон аз нақши Русия дар мавриди Қарабоғ гуфтаанд

Сергей Шойгу бо Никол Пашиниян

Дафтари матбуотии сарвазири Арманистон аз қавли Сергей Лавров, вазири корҳои хориҷии Русия гуфтааст, ки арманиҳо дар ҷанг “ҳамеша дастгирии Русияро эҳсос мекарданд”.

Ба гуфтаи манбаъ, ин ҳарфро Лавров замони сафар ба Арманистон гуфтааст.

Сергей Лавров, вазири корҳои хориҷӣ ва Сергей Шойгу, вазири дифои Русия, бо Никол Пашинян, сарвазири Арманистон рӯзи 21-уми ноябр мулоқот кардаанд.

Никол Пашиниян пас аз имзои созиши оташбас дар мавриди Қаробоғи Кӯҳи зери фишори мухолифон қарор дорад.

Мақомҳои баландпояи Русия пас аз Арманистон ба Озарбойҷон сафар кардаанд. Илҳом Алиев, президенти Озарбойҷон дар мулоқоташ бо ин ҳайат аз "нақши шахсӣ" -и Путин таъкид карда, гуфтааст, ӯ ба хатми низоъ мусоидат кардааст.

Барқарории оташбас миёни Арманистону Озарбойҷон рӯзи 10-уми ноябр ва бо миёнравии Русия сурат гирифт. Даргирӣ миёни ду тараф шаш ҳафта идома кард. Аз кушта шудани ҳазорҳо кас гузориш шудааст. Русия бо фиристодани нерӯҳои ҳофизи сулҳаш дар минтақаи Қаробоғи Кӯҳӣ гуфтааст, ин нерӯҳо барқарории оташбасро назорат хоҳанд кард. Қаробоғи Кӯҳӣ ҳамчун бахше аз Озарбойҷон ба расмият шинохта шуда, аммо бахши зиёди аҳолии он арманиҳо ҳастанд ва ҳокимияти Озарбойҷонро дар онҷо напазируфтаанд.

Помпео аз Толибон даъват кард, ки оташбаси доимӣ кунанд

Майк Помпео дар Қатар

Майк Помпео, вазири корҳои хориҷии Амрико аз раҳбарони Толибон даъват кардааст, ки дар бораи поён додани ҷанг ва оташбаси доимӣ дар Афғонистон музокира кунанд.

Ин мақомдори амрикоӣ рӯзи 21-уми ноябр ба Қатар сафар карда буд.

Сухангӯи Вазорати корҳои хориҷии Амрико дар як изҳорот гуфт, ки Помпео бо Мулло Абдулғанӣ Бародар, муовини раҳбари Толибон ва дигар аъзои гуруҳи музокиротӣ мулоқот карда, ба коҳиши хушунат даъват кард.

Ба гуфтаи сухангӯ, Помпео даъват кардааст, ки зудтар ба хушунатҳо поён дода шавад.

Вазорати корҳои хориҷии Амрико 20-уми нобяр хабар дода буд, ки Помпео қасд дорад ба таври ҷудогона бо намояндагони давлати Афғонистон ва ҳайати Толибон дар Доҳа, ки ба маркази дипломатии ин гуруҳ табдил шудааст, дидор кунад.

Даъвои ситоди интихоботии Трампро "беасос" номиданд

Доналд Трамп, президенти ИМА

Додгоҳи федеролии Пенсилвания даъвои Ситоди интихоботии Доналд Трампро барои бекор кардани натиҷаи интихобот рад кард.

Мэтю Бранн, як додрас дар Пенсилвания шикояти тақаллуб дар интихоботро "беасос ва тахминӣ" унвон кард.

Дар қарори додгоҳ омадааст, ки ситоди Трамп дар ин бора ҳаққи такроран муроҷиат карданро надоранд.

Қаблан, Ситоди Трамп иддао карда буд, ки ҳангоми овоздиҳӣ тариқи почта дар ин аёлат қонуншиканӣ шудааст. Онҳо гуфта буданд, ки 700 ҳазор варақаи овоздиҳӣ бояд бекор карда шаванд.

Интихоботи президенти дар Иёлоти Муттаҳидаи Амрико рӯзи 3-юми ноябр баргузор шуд. Бар асоси натиҷаҳои пешакӣ Ҷо Байден, номзади Демократҳо пирӯз шудааст.

Пенселвания, як аёлати муҳим барои пирӯзии номзадҳои интихоботи президентӣ ба ҳисоб меравад. Дар ин ҷо Ҷо Байден пирӯз дониста шудааст.

Дар Амрико ҳануз натиҷаҳои расмии интихоботро эълон накардаанд, вале бар асоси арзёбиҳои расонаҳои Иёлоти Муттаҳида Ҷо Байден 306 раъй ва Доналд Трамп 232 раъйи ҳайатҳои интихоботиро ба даст овардааст.

Барои раиси ҷумҳур шудан дар Амрико 270 раъйи ҳайатҳои интихоботӣ кофист.

Ёфтҳои бештар

XS
SM
MD
LG