Пайвандҳои дастрасӣ

Хабари нав

Хабарҳо

Наққошиҳои ҳамҷинсгароёни тоҷик – дар намоишгоҳе дар Австрия

Вена

Рӯзи 24-уми май дар Австрия намоишгоҳи ҳашт наққоши ҳамҷинсгаро аз Тоҷикистону Эрон ва Сурия ифтитоҳ шуд. Номи намоишгоҳ “Ҳунари муҳоҷирони узви гурӯҳҳои ҳамҷинсгаро” аст.

Ин намоишгоҳро созмони ҷамъиятии “Эътилофи Бандарҳои Шимолии афроди ҳаҷинсгаро” ташкил кардааст. Стив Ҳаррингтон, раиси ин созмон гуфтааст, наққошоне, ки маҳсули ҳунарии онҳо ба тамошо гузошта шуд, “аз фишору таъқиб ва хушунат фирор карда, ба ин ҷо омаданд ва олами зебоии ботинии худро аз роҳи ҳунар ба намоиш гузоштанд”.

Дар намоишгоҳ 80 наққошӣ ва дигар намунаҳои осори ҳунарие ба мисли меъмориву аксу видеоҳо ба тамошо гузошта шудааст. Бархе рассомон бо исми воқеӣ ва онҳое, ки аз таъқиб ҳамоно ҳарос доранд, бо номҳои мустаор муаррифӣ шудаанд.

Аз миёни муҳоҷирони ҳамҷинсгарои тоҷик дар ин намоишгоҳ як тарроҳи мӯд Х.Ҳ.-и 28-сола ва дӯсташ К.Р. ширкат мекунанд. Аксари наққошиҳо паёмҳои сиёсиву иҷтимоӣ доранд, ки бо ҳадафи кумаку пуштибони муҳоҷирон эҷод шудаанд.

Ҳамҷинсгароҳо дар Тоҷикистон аз таъқибу озор шикоят мекунанд. Мақомоти интизомӣ соли 2017 феҳристи беш аз 300 узви ҷомеаи ҳамҷинсгароҳоро тартиб дода гуфтанд, ки ин афрод ба “гурӯҳи хатар” ё риск шомил ҳастанд. Баъди онки ин феҳрист мавриди нигарониву маҳкумияти гурӯҳҳои ҳуқуқи башар қарор гирифт, мақомот гуфтанд, феҳристро бо ҳадафи таъмини амнияти онҳо тартиб додаанд.

Ҳамаи хабарҳои имрӯзро дар инҷо бихонед

Идомаи муҳокимаи эълони нобоварӣ ба Трамп дар Сенати Амрико

Доналд Трамп

Додситонҳои Маҷлиси Намояндагони Иёлоти Муттаҳидаи Амрико вазифадор шудаанд, ки рӯзи 22-юми январ далелҳои худро дар мурофиаи муҳиме дар Сенат барои аз вазифа сабукдӯш кардани президент Доналд Трамп пешниҳод кунанд.

Ҷумҳурихоҳон пештар аз ин ба қоидаҳои барои додгоҳи импечмент пешниҳодшуда аз тарафи Митч МакКоннелл, роҳбари аксарияти Сенат, овоз доданд.

Намояндагони маҷлиси Сенати Амрико тарҳи вобаста ба раванди нобоварӣ ба президенти ИМА Доналд Трампро қабул карданд. Ин тарҳ ба пешниҳоди Митч МакКоннелл, роҳбари аксарияти ҷумҳурихоҳон, бо 53 овози тарафдор ва 47 овози зид пазируфта шуд.

Аз рӯи тарҳ, аъзои кумитаи “нобоварӣ”-и Маҷлиси Намояндагон, ки ҳама аз ҳизби демократ ҳастанд, бояд дар се рӯз далелҳои худро барои “нобоварӣ” ба Доналд Трамп пешниҳод кунанд. Гурӯҳи вакилони Доналд Трамп ҳам бояд дар ҳамин муддат далелҳои худро барои пешгирии ин раванд ба миён гузорад.

Трамп, ки дар Форуми умумиҷаҳонии иқтисодии Давос (Швейтсария) иштирок мекунад, рӯзи 21-уми январ дар Твиттер навишт: “Матни гуфтугӯҳоро хонед!” Ишора ба матни гуфтугӯи телефонии ӯ дар 25-уми июли соли 2019 бо Владимир Зеленский, президенти Украина мебошад , ки дар ҷараёни он вай аз Киев хостааст, рақиби сиёсиаш, ноиби пешини президенти Амрико Ҷо Байденро таҳқиқ кунад.

Дуздии сандуқи хайрияи як масҷид дар ноҳияи Ашт

Ин лаҳза дар дурбини назоратии масҷиди деҳаи Бободархон сабт шудааст

Як шахси номаълум пулҳои сандуқи хайрияи масҷиди деҳаи Бободархони ноҳияи Ашти вилояти Суғдро дуздидааст.

Сокинон мегӯянд, ҳодиса шаби 6-уми январ иттифоқ афтода, то ба ҳол гумонбар дастгир нашудааст. Ба қавли онҳо, сандуқ чанд моҳ боз дар берун аз дарвозаи масҷид насб шуда, баъди аз Русия омадани сокинон пули зиёде ба он ворид шудааст. Маблағи умуми рабудашуда ҳанӯз маълум нест. Мақомоти умури дохилӣ мегӯянд, ҳодисаро таҳқиқ доранд.

Дар як наворе, ки дурбини назоратии масҷид сабт кардааст ва нусхаи он ба дасти Радиои Озодӣ расид, дида мешавад, шахсе ниқобпӯш сандуқи хайрияро бо табар шикаста ва пулҳоро гирифтааст.

Акбар Шарифов, сухангӯи Раёсати корҳои дохилии вилояти Суғд, рӯзи 22-юми январ ба Радиои Озодӣ гуфт, «6-уми январ ба Шӯъбаи корҳои дохилии ноҳияи Ашт дар бораи ин ҳодиса хабар расид. Мақомот чора меандешанд. Бо ошкор шудани шахси гумонбар мо ба матбуот маълумот медиҳем».

Мақомоти милиса намедонанд дар даруни сандуқи хайрияи масҷид чанд сомонӣ пул будааст, чун касе аз масъулони масҷид пулҳои дохили сандуқро ҳисоб накардааст.

Маъмулан имомхатибон ва ё намозгузорон бо пур шудани сандуқ онро меекушоянд ва пулҳои ҷамъшударо барои таъмири масҷид ва кумак ба дармондагон харҷ мекунанд.

Аммо ҳамсуҳбатони мо аз шумори сокинони Бободархон мегӯянд, ҳоло ки зимистон аст, аксар муҳоҷирон аз Русия баргашта ва дар хонаҳояшон қарор доранд ва ба сандуқи хайрияи масҷид аз дигар вақт дида бештар пул ворид мекунанд.

Вируси нав дар Чин 440 танро мубтало кард ва 9 нафарро кушт

Комисияи миллии ҳифзи тандурустии Чин рӯзи 21-уми январ хабар дод, ки 440 тан дар 13 вилояти он кишвар гирифтори вируси нав шудаанд.

Ҳамчунин аз марги нуҳ тан бар асари мубтало шудан ба ин вирус хабар дода шуд. Гуфта мешавад, ки ин вирус аз одам ба одам мегузарад.

Ли Бин, муовини мудири ин комисия рӯзи 22 январ гуфт, ки ба шаҳри Вуҳан, шаҳре дар Чини Марказӣ даровардани ҳайвонҳо манъ шудааст. Маҳз дар ин шаҳр нахустин ҳолати мубтало шудан ба вируси нав ба қайд гирифта шудааст. Вай афзуд, санаде дар бораи "паҳнсозандаи фавқулода" будани ин вирус мавҷуд нест.

Як рӯз пеш мақомоти ИМА тасдиқ карданд, ки нахустин ҳолати гирифторӣ ба вируси нав дар ин кишвар ба қайд гирифта шудааст. Бемор сокини аёлати Вашингтон аст, ки рӯзи 15 январ аз шаҳри Вуҳани Чин баргаштааст. Марди 30-сола рӯзи 19 январ ба бемористон муроҷиат кард. Вазъи ин мард айни ҳол муътадил арзёбӣ мешавад.

Қарор аст, Созмони ҷаҳонии тандурустӣ вазъи паҳншавии вируси навро баррасӣ кунад. Ин созмон хатарҳои бемории фарогирро баҳо хоҳад дод.

Ҷанҷол дар идораи "Казахмис": худкушиву маҷрӯҳшавии коргарон

Дар идораи коргоҳи "Казахмис" дар шаҳри Жезкангани Қазоқистон занозанӣ рух дод. Ба иттилои пулис, як коргар худкушӣ кардаву ду тани дигар маҷруҳ шудаанд. Ба иттилои мақомот, низоъе, ки рӯзи 21-уми январ дар утоқи мудири коргоҳ рух дод, ба фоҷеа анҷомид.

"Раиси иттиҳоди коргарони "Казахмис" Тоғузбой Тажбенов дар рафти ин ҷанҷол бо корд ба пушти мудири корхона Амангелдӣ Минигулов ва ба қафаси синаи Собирҷон Тембоев, коргари дигари ин корхона зарба задааст. Тажбенов баъди ин худкушӣ кардааст. Минигулов ва Тембоев бистарӣ шудаанд",-хабар медиҳанд расонаҳо.

Айни ҳол тафтиши ҳодиса идома дорад.

Боздошти гумонбарон дар нигаҳдории духтари 16-сола дар Бишкек

Пулиси Қирғизистон се гумонбарро дар нигаҳдории духтари 16-сола дар ғуломии шаҳвонӣ боздошт кард. Дар ин бора мақомоти Қирғизистон хабар доданд.

Пештар расонаҳо навиштанд, ки моҳи ноябри соли 2019 мардони ношинос ин духтарро аз шаҳри Қаракул рабудаанд. Давоми ду ҳафта ин духтарро дар фоҳишахонае дар Бишкек иҷборан нигаҳ доштаанд.

Ба иттилои мақомоти Қирғизистон, се марди соли таваллудашон 1996, 1987 ва 1996 боздошт шудаанд. Ба дари фоҳишахонае, ки духтар онҷо нигаҳдорӣ мешуд, айни ҳол муҳр зада шудааст.

Мақомот дар пайи ин ҳодиса бо моддаҳои "Ҷалб кардан ба фоҳишагӣ" ва "Одамрабоӣ" парванда боз карданд.

Дар Узбекистон рӯйхати нави адабиёту сомонаҳои мамнуъ тасдиқ шуд

Кумитаи умури дини Узбекистон рӯйхати нави матлабҳои дорои хусусияти диниеро тасдиқ кард, ки нашр ва паҳни онҳо дар ҳудуди ин кишвар манъ аст.

Дар кумита гуфтанд, ки санад 25-уми декабри соли 2019 тасдиқ ва ба Вазорати умури дохилии ин кишвар фиристода шудааст. Вале аз ироаи ҷузъиёти бештар худдорӣ карданд. Як манбаъ дар мақомоти ҳифзи ҳуқуқи Узбекистон гуфт, санад аз 40 саҳифа иборат аст.

Дар рӯйхат номи мавъиза, китоб, саҳифаҳое дар шабакаҳои иҷтимоӣ оварда шудааст, ки ба гуруҳу созмонҳои фаъолияташон мамнуъ дар ҳудуди Узбекистон, аз ҷумла ҳаракатҳои мамнуи "Ҳизб-ут Таҳрир", "Нурҷулар", "Таблиғи ҷамоат" ва "Ҷабҳат Ан-Нусра" оварда шудааст.

Ҳамчунин маъвиза, шеър, наворҳои видеоию садоӣ ва матлабҳое шомил шудаанд, ки аз сӯи афроди номаълум таҳия шуда, дорои хусусияти сиёсӣ-динӣ мебошанд. Ба рӯйхат ҳамчунин китоби "Ин рӯзҳо"-и нависандаи маъруфи дигарандеши узбек Нурулло Муҳаммад Рауфхон ва муроҷиатномаи видеоии имоми пешини узбек Фазлиддин Парпиев ба президенти Узбекистон Шавкат Мирзиёев шомиланд.

Ба гуфтаи манбаъ, зидди узбекистониҳое, ки бо ҷурми нашру паҳни матлабҳои мазкур боздошт мешаванд, бар асоси бандҳои "Таҳия, ҳифз ва паҳни матлабҳое, ки ба амният ва тартиботи ҷомеа хатар доранд" ва "Қочоқи матлабҳое, ки тундгароии динӣ ва ғояҳои ҷудоихоҳиро таблиғ мекунанд", парвандаи ҷиноӣ боз карда мешавад.

Қатъи ҳаракат дар шоҳроҳи Душанбе-Рашт. Роҳрӯбону ронандагон якдигарро айбдор мекунанд

Гурӯҳе аз ронандагони мошинҳои боркаш аз он шикоят мекунанд, ки ду рӯзи ахир дар шоҳроҳи Душанбе-Рашт банд монданд ва касе ба додашон намерасад. Ин ронандаҳо, ки байни онҳо тоҷирони қирғиз ҳам ҳастанд мегӯянд, ба далели барфрезии зиёд дар масири наздик ба деҳаи Алигалабон дар ҳудуди ноҳияи Нуробод дармондаанд. Аммо мақомот мегӯянд, ки роҳ бо айби ронандаи як мошини борбар банд шудааст.

Гурӯҳе аз ронандагон рӯзи 22-юми январ бо Радиои Озодӣ тамос гирифта ва гуфтанд, ки дар қисматҳои мухталифи ин шоҳроҳ ҳудуди 20 мошини боркаш банд мондааст. Ба гуфтаи ронандаҳо, баландии барф дар ин роҳ аз 40 то 50 сантиметр расидааст.

Маҳмуд Саидов, яке аз ин ронандаҳо дар сӯҳбат бо Радиои Озодӣ гуфт, "роҳ пурра баста аст. Мо дар мошин хобем. Баъзеҳо 3 рӯз боз дар роҳ ҳастанд. Фақат як одам дар роҳ бо бел қуму рег рехта истодааст. Раҳбари ДЭУ-ро гуфтам, мегӯяд 800 сомонӣ маош дорад ва имкони аз ин беш кор карданро надорад. Роҳ пур аз барф ва ях аст".

Дар наворе, ки ронандаҳои дармонда ба Радиои Озодӣ фиристоданд, роҳу пур аз барф ва қатори мошинҳои борбар дида мешавад, ки аз ҳаракат бозмондаанд.

Дилшод Хоҷаев, ронандаи дигари мошинҳои боркаш, ки бояд аз ноҳияи Лахш ба Ёвон 14 тонна картошка мебурд, ҳоло дар нимароҳ дармондааст. Ин соҳибкор аз он ташвиш дорад, ки маҳсулоташ дар сардӣ вайрон мешавад. Ба гуфтаи ӯ, агар роҳ тоза нашавад ӯ зарари калон мебинад.

"Бо вуҷуди ин, ки занҷир бастем, ҳама корро кардем, вале нашуд. Роҳ беҳад мушкилгузар аст ва онро тоза намекунанд. Ман таваккал карда, хостам ҳамон нишебиро поин шавам, аммо ях мошинро партофт ва наздик буд ба дарё афтем".

Ба гуфтаи ронандаҳо масъулини роҳ фақат як маротиба булдозер оварда кӯшиш карданд ҷодаро тоза кунанд, аммо барф дубора роҳро пур кард ва муроҷиаташон ба масъулин бенатиҷа аст.

Мақомоти ноҳияи Нуробод, ки масъулияти нигаҳбонии ин қисмати роҳро доранд, дар сӯҳбат бо Радиои Озодӣ гуфтанд, ки дар воқеъ чанд мошини борбар дармондаанд, вале ба гуфтаи онҳо, роҳ на дар пайи ҷамъшавии барфи зиёд, балки бо айби ронандаи як мошини калонҳаҷми борбар баста шудааст.

Зафар Ҳисориев, як масъули ҳукумати ноҳияи Нуробод, рӯзи 22-юми январ дар сӯҳбат бо Радиои Озодӣ гуфт, ин мошини борбар қоидаҳои бехатариро риоя накарда, дар байни роҳ аз ҳаракат мондааст. Ҳисориев афзуд, ниҳоди масъул 3 рӯзи ахир ба тозакунии ин роҳ машғул аст ва лаҳзаҳои наздик боз мешавад.

Ҳамин тавр бархе аз корбарони дигари Радиои Озодӣ ҳам аз банд мондани мошинҳояш дар ноҳияи Лахш хабар доданд.

Боришоти барф дар минтақаҳои кӯҳии кишвар беист идома дорад ва Кумитаи ҳолатҳои фавқулодда бо нашри як эълон аз сокинони минтақаҳои куҳӣ хостааст "дар ҳоли ях бастани роҳҳо хеле эҳтиёткор бошанд, қоидаҳои ронандагиро ҷиддан риоя кунанд. Аз сафарҳои безарурат худдорӣ намоянд".

Бино ба иттилои Оҷонсии ҳавосанҷии Тоҷикистон, то охири ҳафтаи ҷорӣ ҳаво сардтар, барф дар кӯҳҳо шадид ва ҳаракат дар роҳҳои кӯҳи мушкил хоҳад шуд. Дар ин рӯзҳо эҳтимолӣ яхбандӣ ва лағзиши тарма зиёд будааст.

Манобеъ 6 млн будани аҳолии Туркманистонро рад мекунанд

Мақомоти Туркманистон дар бораи шумори аҳолии ин кишвар маълумоти нав нашр карданд.

Маълумоти нав дар бораи аҳолии Туркманистон чанд рӯз пеш дар сомонаи марбут ба конфронси байналмилалии "Сиёсати бетарафӣ ва нақши он дар таъмини амният, субот ва рушди устувори байналмилалӣ", ки қарор аст моҳи декабри соли 2020 баргузор гардад, нашр шуд. Масъулони сомона гуфтанд, ки шумори аҳолии Туркманистон ба 6,2 миллион нафар расидааст.

Шумораи дақиқи аҳолии Туркманистон аз соли 1995 ба ин сӯ эълом нашуда буд. Ҳамчунин маълумоти ахир ба ҷуз аз сомонаи мазкур, дар расонаҳои дигари расмӣ, аз ҷумла дар сомонаи Кумитаи омори Туркманистон нашр нашудааст.

Муаллифони матлаб низ ҳангоми ироаи ин маълумот ба манбаи дақиқ ва муътамаде истинод накардаанд. Аҳолии Туркманистон бори ахир соли 2012 ҳисоб, вале натиҷааш пинҳон нигаҳ дошта мешуд ва қарор буд, ҳисоби навбатии аҳолии ин кишвар соли 2022 сурат бигирад.

Соли 1995 аҳолии Туркманистон 4 миллиону 481 нафар гуфта шуд ва соли 1991, пеш аз пошхӯрии СССР ин рақам ба 3,7 миллион нафар мерасид.

Ибтидои соли гузашта як манбаъ дар ҳукумати Туркманистон гуфта буд, бар асоси иттилои Кумитаи омор, аз соли 2008 то 1 январи соли 2019 1 миллиону 879 ҳазор шаҳрвандони ин кишвар ба хориҷ рафтаанд.

Манобеъ дар ҳукумати Туркманистон гуфтанд, шумори аҳолии ин кишвар дар моҳи январи соли гузашта 3,3 миллион нафарро ташкил медод.

Шахсияти муҳоҷирони ҳалокшуда дар Томск эълом шуд

Шахсияти 10 муҳоҷири корие, ки шаби 20 ба 21 январ дар натиҷаи оташсӯзӣ дар як хона дар вилояти Томски Русия ҷон бохтанд, эълом карда шуд.

Ба огаҳии мақомоти ҳолатҳои фавқулодаи Русия, ин муҳоҷирони корӣ аз ноҳияи Қизилтеппаи вилояти Навоии Узбекистон буда, дар миёни онҳо бародарон низ ҳастанд.

Кумитаи тафтишотии Русия гуфт, корфармо, ки шаҳрванди Чин аст, ҳадафи пайгарди қонунӣ қарор дода шудааст.

Мақомоти ҳолатҳои фавқулодаи Узбекистон мегӯянд, муҳоҷирони ҳалокшуда дар бинои якошёна зиндагӣ ва барои ширкати "Гринвуд" кор мекарданд. "10 муҳоҷир дар ҷои ҳодиса ҷон бохта, ба 2 тани дигар ёрии тиббӣ расонида шудааст",-афзуд манбаъ.

Вазорати умури хориҷии Узбекистон ному насаби ҳалокшудаҳоро эълом кард:

- Боймуродов Келдиёр Кандиёрович, соли таваллудаш 1987;
- Ғайбуллоев Рамзиддин Меҳриддин (1998);
- Закиров Маммадалӣ Закир уғлӣ (1998);
- Муминов Хуршед Мехриддин уғлӣ (1997);
- Муртазоев Шаҳзод Санжар уғлӣ (1999);
- Норов Меҳриддин Ғайбуллоевич (1966);
- Ҳасанов Бунёд Карим уғлӣ (1994);
- Ҳасанов Умед Каримович (1979);
- Элмуродов Темур Дамир уғлӣ (1994);
- Эргашев Ҳошимжон Уткир уғлӣ (1999).

Ҷасадҳои муҳоҷирон дар ҳоли ҳозир дар яке аз сардхонаҳои вилояти Томск қарор доранд. Вазорат афзудааст, ки барои интиқоли онҳо ба ватан омодагӣ дида мешавад.

Додгоҳи Душанбе шикояти Нилуфар Раҷабоваро рад кардааст. ВИДЕО

Нилуфар Раҷабова

Додгоҳи шаҳри Душанбе шикояти кассатсионии Нилуфар Раҷабова, сокини пойтахт ва духтари Раҳматулло Раҷабов, узви зиндонии ҳизби дар кишвар мамнӯи наҳзати исломиро бетағйир гузоштааст.

Рӯзи 18-уми декабри соли гузашта Додгоҳи ноҳияи Синои пойтахт Нилуфар Раҷабоваро бар асоси шикояти Раъно Абдуллоева, мудири шуъбаи кор бо занон ва оилаи ҳукумати ноҳияи Синои пойтахт бо гуноҳи "майдаавбошӣ" 550 сомонӣ ҷарима баст. Вале ин зани ҷавон мегӯяд, гуноҳе надорад ва баръакс аз ҷониби маъмурони милиса ва намояндаи Идораи занон барои сатр доштанаш боздошт ва таҳқирқ азият шуд.

Баррасии шикояти ӯ рӯзи 22-юми январ зери раёсати додрас Хуршед Азизматзода дар Додгоҳи шаҳри Душанбе баргузор шуд. Раъно Абдуллоева дар мурофиа иштирок надоштааст.

Вазорати умури дохилӣ рузи 19-уми декабри соли 2019 бо нашри хабаре дар торнамояш навишт, парвандаи Нилуфар Раҷабова бар пояи шикояти "шаҳрванд Раъно Абдуллоева" барои "суханони қабеҳи таҳқиромез" ба додгоҳ ирсол шуд.

Ин вазорат гуфт, Нилуфар Раҷабова ба гуноҳаш пурра иқрор карда, ҷаримаро ихтиёран пардохтааст. Аммо ин зани ҷавон рӯзи 22-юми январ дар сӯҳбат бо Радиои Озодӣ гуфт, то ҳанӯз ҷаримаро напардохтааст, чун дар ҷое кор намекунад ва нафақаи 540-сомоние, ки барои ду кӯдаки бемораш мегирад, ҳатто барои табобати онҳо кофӣ нест.

Нилуфар Раҷабова қаблан аз хушунат ва озор аз сӯи пулис ба Додситонии кулли Тоҷикистон шикоят бурда буд. Аммо ӯ рӯзи 22-юми январ ба Радиои Озодӣ гуфт, то ҳанӯз нисбат ба ин шикояти ӯ аз сӯи мақомот чораандешӣ нашудааст. Ба ҷуз инки ӯ як дафъа ба додситонӣ даъват ва дар бораи ин қазия бозпурсӣ шудааст.

Ҳафтаи пеш Нилуфар Раҷабова ҳамчунин ба унвонии Озода Раҳмон, раиси дастгоҳи иҷроияи президенти Тоҷикистон нома навишта, хостори мудохилаи ӯ дар ин қазия шуда буд.

Нилуфар Раҷабова духтари Раҳматуллоҳи Раҷаб, яке аз 13 узви раёсати олии ҳизби дар Тоҷикистон мамнӯи наҳзати исломӣ аст, ки соли 2015 боздошт ва ба 28 соли зиндон маҳкум шуд.

Ин зани ҷавон дар ҳоле барои доштани рӯсарӣ ба идораи пулис бурда шудааст, ки мақомоти Тоҷикистон ҳамеша вуҷуди ҳамагуна амалиёту боздошт барои пӯшидани сатрро рад мекунанд.

Додгоҳи Душанбе шикояти Нилуфар Раҷабоваро рад кард
лутфан мунтазир бошед

Феълан кор намекунад

0:00 0:00:50 0:00

Дар бемористонҳои Тошканд беморонро дар долон бистарӣ мекунанд

Ба далели гирифтории сартосарӣ ба бемории зуком дар беморхонаҳои Тошканд камбуди бистар мушоҳида мешавад. Дар натиҷа табибон маҷбур шудаанд, ки бархе аз беморонро дар долони беморхона бистарӣ кунанд.

"Дар бемористони №1 ноҳияи Юнусободи шаҳри Тошканд шумораи кӯдакони бемор хеле зиёд аст. Дар беморхона ҳатто як курсии холӣ боқӣ намондааст. Модарон барои сиҳатии фарзандонашон ба ҳама чиз омодаанд. Онҳо аз табибон хоҳиш мекунанд, ки ҳадди ақал як курсӣ диҳанд. Долонҳо сарданд, модарон дар бистари фарзандонашон хоб мераванд",-нақл кард як шоҳиди ҳодиса.

Як намояндаи Раёсати тандурустии шаҳри Тошканд тасдиқ кард, ки бархе аз бемористонҳо чунин ҳолат доранд. Ба гуфтаи вай, айни ҳол дар Тошканд ҳамагӣ панҷ бемористони кӯдакона амал мекунад ва дар маҷмӯъ 1267 бистар доранд.

Ин намоянда мегӯяд, соли аввал нест, ки барои афзоиши шумори бистарҳо дар бемористонҳо талош карда мешавад, аммо барои шаҳре, ки 2,5 миллион аҳолӣ дорад, ин талошҳо нокифоя ҳастанд.

GeorgiaToday: Маскав ба Тошканд фишор меорад, ки ба Иттиҳоди иқтисодии Авруосиё шомил шавад

Нашрияи сиёсии GeorgiaToday рӯзи 20-уми январ мақолае бо номи "Динамика Иттиҳоди иқтисодии Авруосиё дар соли 2020" нашр кард.

Дар мақола омадааст, ки ҳадафи асосии Кремл дар соли 2020 шомил кардани Узбекистон ба Иттиҳоди иқтисодии Авруосиё аст.

"Давоми соли гузашта оид ба шомил кардани Тошканд ба Иттиҳоди иқтисодии Авруосиё гуфтугӯҳои зиёд сурат гирифт. Дар расонаҳои русӣ ва хориҷӣ дар бораи тасмиме хабар дода шуд, ки соли 2020 гирифта хоҳад шуд",-омадааст дар мақола.

Нашрия аҳамияти шомилсозии Узбекистонро ба ин иттиҳодия зикр мекунад, зеро, ба бовари муаллифони мақола, Русия талош дорад, ҳудуди созмони навро ба марзҳои пешини СССР наздик кунад.

"Макони ҷойгиршавӣ ва сарвартҳои фаровони табиии Узбекистон ба ин кишвар имкон медиҳад, ки ба фишорҳои Русия муқобилат нишон диҳад. Бархеҳо то кунун бовар доранд, ки Узбекистон ба ин иттиҳодия шомил нахоҳад шуд",-омадааст дар мақола.

Иттиҳоди иқтисодии Авруосиё соли 2001 таъсис шуд ва барои таъсиси Созмони ҳамкориҳои иқтисодии Авруосиё замина гузошт ва Узбекистон аз соли 2001 то соли 2008 узви ин созмон буд.

То ин замон Қирғизистон, Арманистон, Белорус, Қазоқистон ва Русия узви ин созмон ҳастанд.

Раҳбари пешини Интерпол барои ришвахорӣ 13,5 сол зиндонӣ шуд

Додгоҳи Чин раҳбари пешини "Интерпол" ё худ Пулиси байналмилалӣ Мэн Ҳонгвейро бо ҷурми фасодкорӣ 13,5 сол зиндонӣ кард. Дар ин бора хабаргузории Reuters иттилоъ дод.

Мэн Ҳонгвей, ки аз соли 2016 раҳбари Интерпол буд, моҳи сентябри соли 2018 ҳангоми сафараш ба Чин нопадид шуд. Дертар мақомоти Чин хабар доданд, ки вайро бо гумони ришвагирӣ боздошт карданд.

Мэн моҳи июни соли 2019 дар додгоҳ эътироф кард, ки беш аз ду миллион доллар ришва гирифтааст. Ҳизби коммунистии Чин гуфт, ӯ бо сӯистифода аз мақом пулҳои давлатро сарф карда, қарори ҳизбро иҷро накардааст. Мэн аз сафи ҳизб хориҷ карда шуда буд.

​Мэн то раҳбари Интерпол таъйин шудан муовини вазири амнияти ҷамъиятии Чин буд. Ҳамсари ӯ мегӯяд, парвандаи шавҳараш ангезаи сиёсӣ дорад. Вай "Интерпол"-ро ба додгоҳ кашидааст. Ба гуфтаи ҳамсари Мэн, "Интерпол" натавонист хонаводаи онҳоро ҳимоят кунад.

Қазоқтаборони фирорӣ ба Чин истирдод намешаванд

Додгоҳи ноҳияи Зайсан қазоқтаборон Кастер Мусохонулӣ ва Мурагер Алимулиро бо ҷурми "барқасдона ғайриқонунӣ гузаштан" аз марзи Қазоқистон як солӣ зиндонӣ кард. Онҳо муҳлати ҷазоро дар зиндони сукунатӣ адо мекунанд.

"Онҳо ҳаққи мулоқот бо наздиконашонро доранд ва ҳамчунин бар асоси қонун, як рӯзи нигаҳдорияшон дар боздоштгоҳ ду рӯз, яъне се моҳу се рӯзи ҳабсашон шаш моҳу шаш рӯз ҳисоб мешавад ва бояд 5 моҳу 24 рӯзи дигар дар зиндон бимонанд",-гуфт додрас Шинор Оспанова.

Мусохони 30-сола ва Алимулии 25-сола гуфтанд, рӯзи 1-уми октябри соли гузашта марзи давлатии Чинро убур ва 5 рӯз дар минтақаи байни сарҳади ду давлат боқӣ монданд. Танҳо дар рӯзи 6-уми октябри соли 2019 муваффақ шуданд, ки вориди Қазоқистон шаванд.

Кастер Мусохон гуфт, баъди он аз Чин фирор кард, ки "наздики чаҳор солу ҳашт моҳи охир дар урдугоҳ нигаҳдорӣ мешуд". Мусохон мегӯяд, дар урдугоҳ ба ӯ фишор меоварданд ва латту кӯб мекарданд. Алимулӣ низ аз фишору латту кӯби мақомоти Чин нақл кард.

Бонки миллии Қирғизистон аз интиқолҳои шубҳаноки пулии Саймаитӣ хабар додааст

Раиси Бонки миллии Қирғизистон Толкунбек Абдигулов.

Бонки миллии Қирғизистон мегӯяд, аз соли 2012 то соли 2018 дар мавриди интиқоли шубҳаноки пул аз сӯи шаҳрвандони Чин, ба Хадамоти мубориза бо ҷиноятҳои иқтисодӣ ва Кумитаи амнияти миллии ин кишвар 16 нома фиристодааст.

Раиси Бонки миллии Қирғизистон Толкунбек Абдигулов гуфт, дар 14 тои ин номаҳо номи соҳибкори кушташуда Айеркен Саймаитӣ ва ширкати "Абдироз" зикр шудаанд.

"Вақте 29 майи соли 2019 таҳқиқот нашр шуд, мо ба бахши қирғизии Радиои Озодӣ муроҷиат кардем, то барои омӯзиши бештар нусхаи санадҳои бонкии дар таҳқиқот овардашударо диҳанд, вале мутаассифона посухе нагирифтем",-афзуд ӯ.

Бахши қирғизии Радиои Озодӣ моҳи майи соли 2019, баъди нашри қисми аввали таҳқиқот дар бораи "шустушӯи садҳо миллион доллар тавассути Қирғизистон" санадҳои лозимиро ба Хадамоти мубориза бо ҷиноятҳои иқтисодии он кишвар фиристод.

21-уми ноябри соли 2019 дар порлумони Қирғизистон барои баррасии куштори соҳибкори чинӣ Айеркен Саймаитӣ дар Туркия комиссияи муваққатӣ ташкил шуд. Вакилон робитаи ӯ бо Қирғизистон ва иштирокашро дар нақшаи ғайриқонунӣ бурдани 700 миллион доллар аз ин кишвар меомӯзанд.

Саймаитӣ 10-уми ноябри соли гузашта, пас аз сӯҳбат бо рӯзноманигорон ва додани маълумот дар бораи берун бурдани миллионҳо доллар аз Қирғизистон дар шаҳри Истамбул кушта шуд. Дар робита ба куштори ӯ 4 кас боздошт шудаанд.

Ҳалокати чор нафар аз вируси роҳи нафас дар Чин

Пекин, Чин. Рӯзи 21-уми январи соли 2020

Аз сар задани як вируси роҳи нафас дар Чин то кунун чор нафар мурдаанд. Аз рӯи гузоришҳо, то ба ҳол 220 нафар ба ин вирус гирифтор шуда ва он дар Таиланд, Ҷопон ва Кореяи Ҷанубӣ паҳн шудааст.

Мақомоти Чин пазируфтанд, ки ин вирус ба 15 коркуни соҳаи тандурустии кишвар гузаштааст.

Як марди 89-сола чорумин нафаре, ки дар Вуҳан, маркази Чин аз ин вирус вафот кард, аз ҷое ҳаст, ки аввалин бор моҳи декабри соли 2019 дар бораи сар шудани ин вирус гузориш шудааст.

Гирифтор шудани 15 коркуни тиб нишон медиҳад, ки ин беморӣ аз он чи тасаввур мешуд, хеле тезтар паҳн мешавад. Нигарониҳо дар бораи паҳншавии ин беморӣ бештар мешавад, зеро 25-уми январ Соли Нави Чин аст ва мардуми бисёре дар рӯзҳои истироҳатӣ сафар мекунанд.

Созмони ҷаҳонии тандурустӣ рӯзи 22-юми январ дар бораи ин мавзуъ нишасти фавқуллода баргузор хоҳад кард.

Эрон тасдиқ кард, ки ҳавопаймои украиниро бо ду мушак задааст

Созмони ҳавопаймоии Эрон тасдиқ кард, ки ҳавопаймои мусофирбари Украина рӯзи 8-уми январ, пас аз чанд лаҳзаи парвоз аз фурудгоҳи байналмилалии Теҳрон, бо ду мушак зада шуд.

Ин созмон дар гузориши дувуми худ дар бораи ин фоҷиа, ки боис ба кушта шудани 176 мусофир шуд, гуфт, ҳанӯз фоҷиаро таҳқиқ мекунанд.

Дар ин гузориш омадааст: “Пажуҳишгарон ёфтаанд, ки ду мушаки Tor-M1 ... ба сӯи ҳавопаймо сар дода шудааст".

Роҳбарони Эрон гуфтанд, системаи муҳофизати ҳавоӣ пас аз ҳамлаи мушакии Эрон ба пойгоҳҳои низоми Амрико дар Ироқ дар ҳолати омодабош буданд ва “нохост” мушакҳои зидди ҳавопаймоиро ба сӯи ҳавопаймои Boeing 737-800 сар доданд.

Акнун муайян шудааст, ки дастгоҳи фиристонандаи паём бо зада шудани мушаки аввал аз кор баромадааст ва сипас аз зарбаи мушаки дуюм, ки 23 сония пас рӯй медиҳад ҳавопаймо сарнагун мешавад.

Созмони ҳавопаймоии Эрон дар гузориши худ эълом карда, ки хотираи асосии дастгоҳи сабти овози халабон аз зарбаи мушак аз дастгоҳи асосӣ ҷудо шудааст.

Музаффар Ашӯриён ба ҷои Рустами Шоҳмурод вазири адлия шуд

Рустами Шоҳмурод бо фармони раиси ҷумҳур аз симмати вазири адлия барканор шуд.

Музаффар Ашуриён, вазири нави адлияи Тоҷикистон таъйин шуд. Дар ин бора фармони раисҷумҳур Эмомалӣ Раҳмон рӯзи 21-уми январ содир шуд.

Музаффар Ашуриён, вазири нави адлияи Тоҷикистон то омадан ба ин мақом муовини якуми роҳбари Дастгоҳи иҷроияи Президент буд.

Бар асоси як фармони дигар, Рустами Шоҳмурод аз мақоми вазири адлия барканор шуд. Ахирӣ аз ҷониби Ҳизби халқӣ демократии Тоҷикистон ба вакилии Маҷлиси намояндагон пешбарӣ шудааст.

Рустами Шоҳмурод дақиқан 8 сол пеш 5-уми январ вазири Вазорати адлияи Тоҷикистон таъин шуда буд. Дар даврони раҳбарии ӯ "Қонун дар бораи иттиҳодияҳои динӣ" қабул шуд. Ҳамчунин вакилони дифоъ мегӯянд, ки дар солҳои ахир фаъолияти адвокатҳо зери назорати ин вазоратхона рафт.

Ҷустуҷӯи 6 нафар бо гумони иштирок дар муноқиша дар марзи Тоҷикистону Қирғизистон

Ҷониби Қирғизистон хабар дод, ки мақомоти Тоҷикистон 6 шаҳрванди кишварро барои иштирок дар муноқишаҳои марзӣ таҳти ҷустуҷӯ қарор додаанд. Тарафи Тоҷикистон то ҳол дар ин бора хабар надодааст. Ду ҳафта пеш чаҳор шаҳрванди Қирғизистон бо гумони иштирок дар низоъҳои марзӣ дастгир шуда буданд.

Мирлан Каниметов, муовини вазири корҳои дохилии Қирғизистон, рӯзи 21-уми январ дар ҷаласаи порлумони ин кишвар гуфт: "Маълумоти тасдиқшудае нест, ки ин 6 шаҳрванди Тоҷикистон узви гуруҳҳои ҷиноӣ ҳастанд, аммо дар муноқишаҳо иштирок кардаанд."

Муовини вазири корҳои дохилии Қирғизистон илова кард, "мақомоти интизомии Тоҷикистон чанд шаҳрванди худро, ки ба сӯи шаҳрвандони қирғиз санг партофта ва талош карданд хонаро оташ зананд, таҳти пайгард қарор додаанд". Ҷониби Тоҷикистон то ҳол дар ин бора изҳори назар накардааст.

Канибек Имоналиев, вакили порлумони Қирғизистон, гуфтааст, дар доираи шартномаҳо миёни кишварҳои узви Созмони Паймони Амнияти Дастҷамъӣ (ОДКБ) имкони иваз кардани шахсоне, ки ҷиноят содир кардаанд, вуҷуд дорад. Ӯ пешниҳод кард, масъалаи мазкур дар ҷараёни гуфтушунидҳои марзӣ баррасӣ шавад.

Шаби 9 ба 10-уми январи имсол дар марзи Тоҷикистону Қирғизистон муноқиша сар зад, ки дар ҷараёни он садои тир ҳам шунида шудааст. Мақомот гуфтанд, сокинони деҳаҳои наздимарзӣ ба сӯи якдигар санг партофтаанд. Ҷонибҳо дар шурӯи ҳодиса якдигарро гунаҳкор карданд.

Дар пайи муноқиша ҳайатҳои Тоҷикистону Қирғизистон, рӯзи 14-уми январ, бо роҳбарии муовинони нахуствазирони ду кишвар гуфтугӯ карда, масъалаи иваз кардани қитъаҳои марзиро баррасӣ намуданд.

Аз 976 километр марзи Тоҷикистону Қирғизистон беш аз 400 километраш муайяну аломатгузорӣ нашудааст. Ду тараф барои ҳалли масъала роҳҳои гуногун ва харитаҳои гуногунро пешниҳод мекунанд.

Cокинони Жанаозени Қазоқистон бо талаби шуғл ба кӯча баромаданд

Наздики 200 сокини шаҳри Жанаозени Қазоқистон рӯзи 20-уми январ бо талаби кори доимӣ пушти дари ҳукумати маҳаллӣ ҷамъ шуданд. Дар ин бора Нурсултон Нурумов, як сокини маҳаллӣ хабар дод. Ин сокин низ дар баробари дигарон пушти дари ҳукумат рафта буд. "Муроҷиатҳои мо ба ҳукумати маҳаллӣ нодида гирифта мешаванд",-гуфт Нурумов.

Яке аз муовинони раиси ноҳия бо ҷамъомадагон мулоқот кард ва аз онҳо хост, ки барои ҳалли мушкилашон як моҳ муҳлат диҳанд. Аммо сокинон гуфтанд, ки посухи мақомот онҳоро қонеъ накардааст ва сокинон тасмим доранд, ки то замони ҳал шудани мушкилашон ҳамарӯза пушти дари ҳукумат ҷамъ мешаванд.

"Мо то охир хоҳем рафт. Соли 2019 монеаҳои зиёде эҷод карданд, аммо ин садди роҳи мо нашуд. Чи гунае ки талаб мекардем, ҳамон гуна давом хоҳем дод",-гуфт сокини Жанаозен.

Максат Ибагаров, ҳокими Жанаозен дар сӯҳбат бо расонаҳо гуфт, ки намояндаи ҳукумат бо сокинон мулоқот ва рӯйхати онҳоро тартиб дод.

Мақомоти Қазоқистон ба ҳама гуна дигарандешӣ ва ё гирдиҳамоӣ дар Жанаозен бархурди ҳассос нишон медиҳанд. Зеро дар ин шаҳр дар соли 2011 эътирози нафткашҳо бераҳмона пахш шуд. Дар он ҳодиса 17 кас кушта ва бештар аз 100 каси дигар маҷруҳ шуда буданд.

Блогнависи узбек баъди рухсат ёфтан аз бемористон ба хориҷ рафт

Нафосат Оллашукурова, блогнависи узбекистонӣ, ки соли гузашта ҳудуди се моҳ бо қарори додгоҳ дар бемористони касалиҳои руҳӣ табобат гирифт, ахиран Узбекистонро тарк кард. "Ҳамватанони азиз, ман маҷбур будам, ки кишварро тарк кунам. Аммо ман намехоҳам, ки шумо ин иқдоми маро тарсӯӣ ё фирор баҳо гузоред",-навишт вай дар саҳифаи Фейсбук.

Оллашукурова менависад, баъди рухсат ёфтан аз бемористон мақомот талош карданд, ки ӯро дар қайди бемористони касалиҳои руҳии шаҳри Тошканд гузоранд ва ба ин тартиб тавонанд, ки ӯро дар ҳар лаҳза дубора ба бемористон интиқол диҳанд. "Дӯстони азиз, ман ба хулоса расидам, ки блогнависон дар Узбекистон наметавонанд, озодона амал кунанд ва ба ҳамин хотир ман маҷбур будам кишварро тарк кунам",-навишт вай.

Нафосат Оллашукурова, ки пайваста аз фаъолияти мақомоти давлатии Узбекистон интиқод мекард, дар тирамоҳи соли гузашта дар бемористони бемориҳои равонӣ бистарӣ шуд. Додгоҳи вилояти Хоразми Узбекистон 30 сентябр Нафосат Оллашукуроваро баъди 10 рӯзи адои ҳукми маъмурӣ, ба беморхонаи бемориҳои равонӣ иҷборан фиристод.

Нафосат Оллашукурова дар шабакаҳои иҷтимоӣ мавзуъҳое амсоли фасодкорӣ ва тахриби ғайриқонунии манзилу амволи сокинонро аз сӯи мақомот инъикос мекунад.

Пештар Созмони ҳомии ҳуқуқи рӯзноманигорон "Кумитаи ҳифзи рӯзноманигорон" (CPJ) аз Ӯзбекистон хоста буданд, блогнавис Нафосат Оллашукуроваро фавран озод кунад.

Дар ҷаласаи шӯрои СММ пешниҳоди озодии Азимҷон Аскаров садо дод

Қирғизистон дар ҷаласаи Шӯрои СММ дар умури ҳуқуқи инсон ҳисобот дод ва аз аъзои дигари СММ пешниҳод гирифт.

Намояндаи Ирландия аз Қирғизистон хост, ки ҳомии ҳуқуқи зиндонӣ Азимҷон Аскаровро озод кунад. Аскаров бо айби ташкили бетартибиҳо ва иштирок дар куштори корманди милиса дар соли 2010 ба ҳабси абад маҳкум шудааст.

Дар ҷараёни ҷаласаи дар Шӯрои СММ ҳамчунин кишварҳои дигар аз Қирғизистон хостанд, ки фаъолияташро дар бахшҳои ҳамкорӣ бо ҷомеаи шаҳрвандӣ, озодиҳои динӣ, озодии баён, ҳифзи ҳуқуқи занону кӯдакон беҳбуд бахшад.

Ҳайати Қирғизистонро муовини вазири корҳои хориҷии он кишвар Нуран Ниёзалиев роҳбарӣ кард. Вай гуфт, ки дигарандешӣ ва озодии баён, ки солҳои охир Қирғизистон ба он даст ёфтааст - аз вижагиҳо ва ифтихороти Қирғизистон ҳастанд.

Азимҷон Аскаров баъди ҳодисаҳои моҳи июни соли 2010 бо гумони ташкили бетартибиҳо дар ҷануби Қирғизистон ва иштирок дар куштори корманди милиса боздошт шуд. Бо қарори тамоми зинаҳои додгоҳӣ вай ба ҳабси умрбод маҳкум шудааст.

Моҳи апрели соли 2016 Кумитаи ҳуқуқи инсони СММ аз мақомоти Қирғизистон даъват кард, ки парвандаи Аскаровро бозбинӣ кунанд.

Додгоҳи вилояти Чуйи Қирғизистон 30 июли соли гузашта парвандаи Аскаровро дубора баррасӣ карда, ҳукми ҳабси якумрии ӯро бетағйир гузошт. Ҳарчанд вакили дифои Аскаров ба бегуноҳии шахси зери ҳимояи худ исрор карда, гуфт, вазъи саломатиаш бад шудааст.

Иҷозаи кор ба 4 корманди Радиои Озодӣ баъд аз муроҷиатҳои батакрор

Барот Юсуфӣ

Вазорати корҳои хориҷии Тоҷикистон баъд аз муроҷиатҳо ва пойфишориҳои пайваста ба чаҳор хабарнигор ва корманди фаннии Радиои Озодӣ барои ним сол аккредитатсия ё парвонаи кор дод. Ин дар ҳолест, ки бар асоси муқаррарот дар Тоҷикистон аккредитатсия ба хабарнигорони доимӣ барои 1 сол дода мешавад.

Мақомоти вазорат рӯзи 21-уми январ гуфтанд, Барот Юсуфӣ (Бароталӣ Назаров), Орзуи Карим (Орзу Бедимоғов), Абдуғанӣ Баротов ва Салоҳиддин Мирзоев то 21-уми июни имсол ҳаққи кор кардан доранд. Ҳоло 7 корманди дигари Радиои Озодӣ дар Душанбе ва минтақаҳои дигари кишвар аз ҳаққи кор маҳруманд.

Вазорати корҳои хориҷии Тоҷикистон рӯзи 26-уми июни соли гузашта парвонаи кори Барот Юсуфиро, ки муҳлати анҷомшавиаш то моҳи апрели соли 2020 буд, бозхонд кард. ​

Раҳбарияти Радиои Озодӣ аз мақомоти Тоҷикистон хостааст, ки ба ҳамаи кормандони Радиои Озодӣ аккредитатсия дода шавад, то онҳо битавонанд, вазифаҳои худро анҷом диҳанд.

Дидбони Ҳуқуқи Башар (Human Rights Watch), созмони муътабари ҳомии ҳуқуқ, рӯзи 14-уми январ ҳукумати Тоҷикистонро барои маҳдуд кардани озодии баён ва маҳрум кардани дастрасӣ аз манобеи хабарӣ танқид кард. Созмон дар гузорише навишт, "Радиои Озодӣ аз моҳи октябр... зери фишори зиёд қарор гирифт."

Радиои Озодӣ яке аз чанд расонаи ангуштшуморе дар Тоҷикистон аст, ки ахбори дуруст ва бетарафона нашр мекунад ва бинандаву хонандаи зиёде дорад. Вебсайти Радиои Озодӣ аз вебсайтҳои асосии хабарӣ ва пурхонанда дар Тоҷикистон аст. Канали Радиои Озодӣ дар Ютуб бо тақрибан 900 ҳазор пайрав маҳбубтарин канал дар кишвар ба ҳисоб меравад.

Рӯзноманигори қирғиз Турсунбек Бейшенбеков боздошт шуд

Муҳаррири сомонаи хабарии Chyndyk.kg Турсунбек Бейшенбеков боздошт шуд.

Пештар рӯзноманигор хабар дода буд, ки ӯро дубора барои бозпурсӣ ба Додситонии низомии Қирғизистон даъват карданд. Баъди бозпурсӣ ба боздоштгоҳи муваққатӣ интиқол ёфтааст.

Бино ба хабари расонаҳо, Бейшенбеков дар доираи парвандаи ҷиноии муовини пешини вазири умури дохилии Қирғизистон Курсан Асанов бозпурсӣ ва боздошт шудааст.

Турсунбек Бейшенбеков 16-уми январ низ ба додситонӣ даъват шуда буд, вале он замон нагуфт, ки дар доираи кадом парванда бозпурсӣ шуд.

Муовини вазири умури дохилии Қирғизистон Курсан Асанов 13-уми августи соли гузашта, баъди амалиёти боздошти президенти пешини ин кишвар Алмосбек Отамбоев бо ҷурми "хиёнат ба манофеи милисаи Қирғизистон" аз мақом барканор шуд.

Мақомоти додситонӣ хабар доданд, ки парванда бо моддаи "Сӯистифода аз мақом" ба он хотир боз шудааст, ки Асанов: ҳангоми ҳамла дастурҳои вазири корҳои дохилиро нодида гирифта; худсарона амал карда; ҳангоми ҳамла ҳайати шахсиро беназорат гузошта ва бо ин рафтораш кормандони милисаро дар хатар гузоштааст.

Тағйирот ба Конститутсияи Русия. Путин чӣ пешниҳод дорад?

Президенти Русия Владимир Путин рӯзи душанбе лоиҳаи қонуни ворид кардани тағйиру иловаҳо ба Конститутсияи ин кишварро ба Думаи давлатӣ пешниҳод кард. Дар ин бора сухангӯи президенти Русия Дмитрий Песков иттилоъ дод.

Ба огаҳии сомонаи Дума, қарор аст, ба банди 22-уми Конститутсияи Русия тағйирот ворид карда шавад. Аз ҷумла, пешниҳод шудааст, ки ниҳоди нави давлатӣ -- Шӯрои давлатӣ таъсис ёбад. Ин шӯроро президенти Русия бо ҳадафи таъмини фаъолият ва ҳамкории ҳамоҳангшудаи ниҳодҳои давлатӣ, таъйини самтҳои асосии сиёсати хориҷӣ ва дохилии Русия, самтҳои афзалиятноки рушди иҷтимоӣ ва иқтисодии давлат таъсис доданист.

Ҳамчунин Думаи давлатӣ бояд ҳаққи тасдиқи номзадии раиси ҳукуматро бо пешниҳоди президент ва номзадии муовинони сарвазир ва вазиронро, ба ҷуз аз раҳбарони ниҳодҳои қудратӣ бо пешниҳоди сарвазир дарёфт кунад. Раҳбарони ниҳодҳои қудратиро президент дар машварат бо Шӯрои федеролӣ тасдиқ хоҳад кард.

Бар асоси лоиҳаи қонун, калимаи "пайиҳам" аз банди Конститутсия дар бораи давраҳои президентӣ ҳазф хоҳад шуд: "Як одам наметавонад беш аз ду давра Русияро раҳбарӣ кунад". Ин маънои онро дорад, ки Путин баъди соли 2024 дигар президенти Русия шуда наметавонад.

Тибқи ваъда, Путин барои вакилони порлумон, аъзои Шӯрои федеролӣ, вазирон ва додрасҳо маҳдудиятҳоеро ҷорӣ мекунад. Ин афрод ҳаққи дарёфти шаҳрвандӣ ё иҷозати будубоши доимӣ дар кишвари хориҷиро надоранд. Президенти Русия шахсе интихоб хоҳад шуд, ки дасти кам 25 соли ахир дар ин кишвар зиндагӣ кардаааст ва дар гузашта шаҳрвандӣ ё ҳаққи иҷозати доимӣ дар кишвари хориҷиро надошта бошад.

Президенти Русия 15 январ ҳангоми ироаи паёмаш гуфта буд, ки мехоҳад Конститутсияи кишвараш тағйир дода шавад. Ба иттилои РБК, раъйпурсии умумӣ дар ин бора 12 апрел баргузор хоҳад шуд.

Ёфтҳои бештар

Гуфтугӯ бо Умед Бобохонов, муассис ва сардабири "Азия-Плюс"
лутфан мунтазир бошед

Феълан кор намекунад

0:00 0:16:08 0:00
Гузоришҳои радиоӣ
ПОДКАСТ
Гуфтугӯ бо Умед Бобохонов, муассис ва сардабири "Азия-Плюс"
Гузоришҳои радиоӣ

Гузоришҳои видеоӣ

20 соли "Азия-Плюс". Гуфтугӯ бо Умед Бобохонов
лутфан мунтазир бошед

Феълан кор намекунад

0:00 0:14:21 0:00
XS
SM
MD
LG