Пайвандҳои дастрасӣ

Хабари нав

Хабарҳо

Ҷасади як корманди "Лото-Спорт"-ро аз оғил пайдо карданд

Ҷасади Абдумалик Ғафуров, сокини 50-солаи ноҳияи Фархор, рӯзи 7-уми март дар оғилаш пайдо шуд. Абдумалик Ғафуров дар ширкати "Лото-Спорт" кор мекард.

Як манбаъ дар мақомоти интизомии Фархор рӯзи 9-уми март ба Радиои Озодӣ гуфт, ки дар бадани ӯ 12 зарби кордро ошкор кардаанд. Ӯ гуфт, "ин сокини деҳаи Себи сурхро дар мактаби кушта, сипас, дар оғилаш гузоштаанд."

Додситонии ноҳияи Фархор дар робита ба қатли Абдумалик Ғафуров парванда боз карда, тафтишотро пеш мебарад. Дар Додситонӣ ба Радиои Озодӣ гуфтанд, ҳанӯз ба ин суол посух нагирифтаанд, ки то куҷо куштор ба кори Ғафуров дар "Лото-Спорт" рабт мегирад.

Илҳом Қуватов, раиси ҷамоати Ватани ноҳияи Фархор, дар сӯҳбат бо Радиои Озодӣ аз Абдумалик Ғафуров тавсиф кард ва гуфт, ин хонавода дар деҳаи Себи сурх (30-солагии собиқ) оилаи намунавӣ буданд ва яке аз бародаронаш низ раиси ҳамин деҳот аст. Хонаводаи Абдумалик Ғафуров нахостанд, ки дар ин маврид сӯҳбат кунанд. Аз ин хонавода гуфтанд, тафтишот муайян хоҳад кард, ки дар ин кор кӣ даст дорад.

Ҳодисаи қатли ин сокини Фархор дар ҳолест, ки рӯзи 20-уми феврал дар кӯчаи Чармгарони Поёни Кӯлоб ду бародар сокини ин шаҳр Бахтиёр Раҷабови 34-соларо куштанд. Аз ин қабл, моҳи майи соли гузашта ба ҷони Муҳиддин Юлаев, корманди 25-солаи Кумитаи давлатии амнияти миллии Тоҷикистон дар маҳалли Исмоили Сомонии шаҳри Кӯлоб сӯиқасд сурат гирифт ва ӯро бо 24 зарби корд маъюб карданд. Баъдан Вазорати корҳои дохилӣ хабар дод, ки як гурӯҳро бо гумони ҳамла ба Юлаев боздошт карданд.

Ҳукми ин афрод бегоҳи 10-уми октябр содир шуд. Додгоҳи минтақаи Кӯлоб Ҷамолиддин Камолов ва Азамати Собир, ду нафареро, ки аз онҳо ҳамчун ташкилкунандаи ҳамла ном мебаранд, ба 18 соли зиндон маҳкум кард. Комил Тоштемуров ва Наврӯз Розиқов, ки дар ин ҳамла шарик буданд, ба 17 соли зиндон маҳкум шуданд. Тоҳир Тоштемиров ва Сайфиддин Юсупов барои шарикӣ дар ҷиноят 16 сол аз озодӣ маҳрум шуданд.

Ҳамаи хабарҳои имрӯзро дар инҷо бихонед

Поёни нишасти муҳими СММ бе қабули қарори калидӣ

Музокироти дуҳафтаинаи Созмони Милал дар бораи тағйири иқлим дар шаҳри Мадрид рӯзи 15-уми декабр ба поён расид, вале тарафҳо натавонистанд, дар бораи қарори асосии нишаст, яъне тартиби додугирифти меъёри ихроҷи гази карбон ба мувофиқа бирасанд.

Намояндагони 200 кишвар аз ҷумла Тоҷикистон дар нишаст ширкат доштанд ва сари шеваҳои мубориза бо гармоиши курраи Замин ба мувофиқа расиданд. Дар ин нишаст тарафҳо сари эъломия барои коҳиши бештари газҳои гулхонаӣ ва кӯмак ба кишварҳои камбизоате, ки аз оқибатҳои тағйири иқлим ранҷ мекашанд, ба созиш расиданд. Аммо бо вуҷуди якуним рӯз дарозтар кардани нишасти Мадрид мувофиқа сари қарори асосӣ ҳосил нашуд ва бояд як сол баъд дигарбора барои қабули он баргарданд.

Масъала қимати ихроҷи гази карбон, яке аз олудакунандаи аслии ҳаво аст. Кишварҳои ҷаҳон барои ихроҷи ин газҳо саҳм доранд ва агар камтар аз меъёри пешбинишуда хориҷ мекунанд, метавонанд саҳми худро ба ширкатҳо, ё кишвари дигар бифурӯшанд. Ҳадаф аз ин навъи муомила мусоидат ба рушди технологияҳоест, ки ҳаворо кам олуда мекунанд.

Эрон мегӯяд, ду ҳамлаи кибернетикиро беасар кард

Дохили яке аз таъсисоти атомии Эрон дар шаҳри Қум.

Як мақоми баландпояи ҳукумати Эрон мегӯяд, кишвараш дуввумин ҳамлаи кибернетикӣ дар зарфи як ҳафтаи ахирро “хунсо” ва ё беасар кардааст. Ҷавод Озари Ҷаҳромӣ рӯзи 15-уми декабр дар Твиттер навишт, ҳамларо “сипари амнияти кибернетикӣ ташхис ва хунсо кард.”

Ба гуфтаи ӯ, ҳадафи ин рахнагарӣ “ҷосусӣ аз паси хадамоти иттилоотии Эрон будааст.” Ҷавод Озари Ҷаҳромӣ аз ин бештар шарҳ надода, вале навиштааст, ки “серверҳои ҷосусиро ташхис ва рахнагаронро радёбӣ кардаанд.”

Вазири эронӣ рӯзи 11-уми декабр ба хабаргузории давлатии ИРНА гуфт, ҳадафи ҳамлаҳои “бузург” ва “ҳукуматӣ” зербунёдҳои электроникии Эрон ҳам будааст. Рӯзи 10-уми декабр Ҷаҳромӣ гузоришҳо дар бораи рахнагарӣ дар бонкҳои эрониро рад кард, аз ҷумла гузоришҳои расонаҳои дохилиро, ки гуфтанд, ҳисобҳои бонкии миллионҳо мизоҷи бонкҳо рахна шудаанд.

Эрон баъд аз соли 2000-ум зербунёдҳои зиёди кишварро аз Интернет ҷудо кард. Дар он сол вируси Стакснет, ки бовар меравад, офаридаи Амрикову Исроил буд, кори сентрифугаҳои ғанисозии ураниум дар Эронро ба ҳам зад.

Тарҳи таҳримот ба зидди Русия баррасӣ мешавад

Русия ҳоло чанд тарҳи азими интиқоли газ ба Аврупоро амалӣ мекунад ва баъзе аз онҳо низ мумкин аст, ҳадафи таҳримот қарор бигиранд.

Гуруҳе аз вакилони амрикоӣ ҳафтаи оянда тарҳи санадеро ба баррасӣ мегиранд, ки эъмоли таҳримоти сахт ба зидди Русияро дар назар дорад. Кумитаи равобити хориҷии сенат тарҳи санади Муҳофизати амнияти Амрико аз амалҳои таҷовузкоронаи Русияро баҳс хоҳад кард, ки онро Линдси Граҳам вакили ҷумҳурихоҳ, “қонуни таҳримоти дӯзахвор” номидааст. Тарҳ рӯзи 18-уми декабр мавриди баррасӣ қарор мегирад.

Бар асоси санади мазкур ки онро ДАСКА номидаанд, бояд ба зидди Русия барои дахолаташ ба ҷараёнҳои демократӣ дар кишварҳои хориҷӣ ва амалҳои “бадхоҳона” -аш дар Сурия ва Украина таҳримоти иқтисодӣ эъмол карда шавад.

Дар ин санад аз ҷумла баъзе бонкҳои Русия, тарҳҳои содироти гази моеъ дар хориҷ ҳадаф гирифта шудаанд, ки ба гуфтаи муаллифонаш ба талошҳои ҳукумати Русия барои “ба хатар андохтани ҷараёнҳои демократӣ дар кишварҳои хориҷӣ” кӯмак мекунанд.

Қонуни мазкур ҳамчунин таъсиси Дафтари фазои кибернетикӣ ва иқтисоди рақамӣ дар вазорати умури хориҷии Амрикоро дар назар дорад. Боб Менендез, вакили демократ ва яке аз муаллифони тарҳ гуфтааст, ки дафтари нав “талошҳои дипломатӣ барои амнияти байналмилалии кибернетикӣ, дастрасӣ ба Интернет, иқтисодӣ рақамӣ, ҷиноятҳои интернетӣ, пешгирӣ ва вокуниш ба хатарҳои кибернетикиро раҳбарӣ мекунад.”

Эълони коҳиши эҳтимолии сарбозони Амрико дар Афғонистон

Сарбозони Амрико дар вилояти Лугар

Бино ба гузориши телевизиони Си Эн Эн, мумкин аст, Иёлоти Муттаҳида ба зудӣ сеяки нерӯҳояшро аз Афғонистон хориҷ кунад. Ин телевизиони амрикоӣ аз қавли як мақоми ҳукумати раиси ҷумҳур Доналд Трамп навишт, шояд ҳамин ҳафта дар бораи берун овардани 4 ҳазор сарбоз аз Афғонистон эълон диҳанд. Иёлоти Муттаҳида айни замон дар ҳамсоякишвари Тоҷикистон тақрибан 13 ҳазор сарбоз дорад.

Нерӯҳои Амрико баъди оғози амалиёт ба зидди Толибон дар соли 2001 дар Афғонистон ҷойгир шуданд. Доналд Трамп моҳи августи имсол гуфт, мехоҳад, теъдоди сарбозонро кам карда, то 8600 нафар бирасонад.

Гузориш дар бораи коҳиши нерӯҳо дар ҳоле нашр шуд, ки қарор аст, ҳукумати Амрико стратегияи наваш барои кишварҳои Осиёи Марказиро ба зудӣ муаррифӣ кунад. Кишварҳои ин минтақа аз ҷумла Тоҷикистон барои хотима додан ба ҷанги тӯлонӣ дар Афғонистон ва аз ҷумла аз роҳи музокирот бо гуруҳи тундрави Толибон бо Иёлоти Муттаҳида ҳамкорӣ доранд.

Додгоҳ раиси ҷумҳури собиқи Судонро ба зиндон маҳкум кард

Ҳангоми муҳокима дар рӯзи 19-уми август.

Умар Башир, раиси ҷумҳури собиқи Судонро бо гуноҳи фасодкорӣ ба 2 соли зиндон маҳкум карданд. Муҳокимаи ӯ дар шаҳри Хартум рӯзи 14-уми декабр сурат гирифт ва додрас гуфт, бо назардошти синни Умар Башир, ки 75-сола аст, ӯ ҳукмашро на дар зиндон, балки муассисаи ислоҳӣ барои пиронсолон адо мекунад.

Додгоҳ ӯро ба ғайриқонунӣ нигаҳ доштани асъори хориҷӣ, ба даст овардани пул аз хориҷ ва шустушӯи даромадҳои ғайриқонунӣ гунаҳкор донист. Додгоҳ ҳамчунин амр дод, тақрибан 7 миллион евро, бештар аз 350 ҳазор доллар ва 5 миллиону 700 ҳазор фунти судониро, ки дар хонаи Умар Башир ёфтанд, ба нафъи давлат мусодира кунанд.

Умар Башир моҳи апрели имсол зери фишори тазоҳуроти мардумӣ аз мақомаш барканор шуд. Тазоҳурот аввал бо талабҳои иқтисодӣ оғоз ёфт, вале баъдан ба тазоҳуроти зидди ҳукумат ва бо даъватҳо барои истеъфои раиси ҷумҳур табдил ёфт. Ба зидди раиси ҷумҳури собиқи Судон ду парвандаи дигари ҷиноӣ боз шудааст. Ӯро ба нақш доштан, дар қатли тазоҳургарон ва ҳам табадуллоти низомии соли 1989 муттаҳам мекунанд, ки Умар Баширро ба қудрат расонд.

Додгоҳи Байналмилалии Ҷурму Ҷиноят низ амр додааст, ки раиси ҷумҳури собиқи Судонро, ки ба наслкушӣ ва ҷиноятҳои ҷангӣ дар муноқишаи вилояти Дарфур муттаҳам мешавад, барои муҳокима дар ин додгоҳ дар Гаага боздошт кунанд.

ИМА барои кишварҳои Осиёи Марказӣ стратегияи нав эълон мекунад

Дафтари президенти ИМА Доналд Трамп тасмим дорад, стратегияи нави Амрикоро дар мавриди Осиёи Марказӣ эълон кунад.

Осиёи Марказӣ минтақаест, ки Чин ва Русия дар он нуфуз доранд.

Таҳияи стратегияи нави Амрико барои панҷ кишвари Осиёи Марказиро як мақоми аршади Вазорати хориҷии ИМА, ки номаш зикр нашудааст, иброз кардааст.

Ин мақом рӯзи 13-уми декабр гуфтааст, ИМА робитаи дипломатии дуҷонибааш бо панҷ кишвари Осиёи Марказиро имсол қавитар мекунад.

Ин ҳарф пас сафари вазири корҳои хориҷии Қазоқистон Мухтор Тлеубердӣ ба ИМА садо додааст. Ин мақомдори Қазоқистон дар Амрико қарор дорад.

Як ҳайати Амрикоӣ дар моҳи июл бори аввал дар чор соли ахир ба Қазоқистон сафар карда буданд ва моҳи ноябр вазорати хориҷаи Амрико мизбони вазири хориҷии Туркманистон низ буд.

Вазорати хориҷиии Амрико дар баҳори соли оянда дар нишасти солона аз мақомҳои Узбекистон ва Тоҷикистон мизбонӣ хоҳад кард.

Афзоиши робитаи дипломатии Амрико бо кишварҳои Осиёи Марказӣ дар ҳоле аст, ки нуфузи иқтисодӣ ва сиёсии Чин дар ин минтақа густариш меёбад.

Кумитаи амнияти Қирғизистон ба журналистони таҳқиқгар кафолати таъмини бехатариашонро дод

Дар робита ба парвандаи қатли тоҷири чинӣ Айеркен Саймаитӣ Кумитаи давлатии амнияти миллии Қирғизистон Айбек Қамчибеков ва Марлиса Осмонбекова, собиқ афсарони марзбониро барои бозпурсӣ даъват кардааст.

Онҳо то соли 2018 дар гузаргоҳи марзии фурудгоҳи «Манас» кор мекарданд.

Ҳамзамон Кумитаи давлатии амнияти миллӣ намояндагони расонаҳоро ба сӯҳбат даъват кардааст. Кумита эълон кард, ки кафолати бехатарии рӯзномнигорон ва наздикони онҳоро дар Қирғизистон медиҳад.

Дар бораи кафолати бехатарии марзбонон Кумитаи амният чизе нагуфтааст.

Дар Кумитаи давлатии амнияти миллӣ қайд карданд, ки барои додани баёнот ҳама тарафҳое, ки дар таҳқиқоти рӯзноманигорӣ номашон зикр шудааст, даъват мекунанд.

Қаблан, кафолати амнияти рӯзноманигоронро худи президент Ҷеенбеков дода буд.

Яке аз чеҳраҳои калидии таҳқиқот – тоҷири уйғур аз Чин Айеркен Саймаитии 37-сола – рӯзи 10-уми ноябри имсол дар шаҳри Истанбули Туркия кушта шуд.

Вай пештар дар бораи фасоди густарда дар Хадамоти гумруки Қирғизистон далелҳои зиёдро дар ихтиёри хабарнигорон гузошта, мақоми пешини ин идора Раҳимбек Матраимов ва як шабакаи соҳибкорони уйғурро барои бо роҳҳои ғайриқонунӣ ба кишвар ворид кардани мол, ба даст овардани миллионҳо доллар ва гурез аз андоз муттаҳам карда буд.

Трамп гуфт, Чин ба шартҳояш розӣ шудааст

Иёлоти Муттаҳида ва Чин ба баъзе пешшартҳо дар марҳилаи аввали гуфтугӯ дар мавриди созишномаи тиҷоратӣ миёни ду кишвар ба мувофиқа расидаанд.

Ба ин хотир, Доналд Трамп, президенти Амрико қарори пешинаашро, ки бояд аз 15-уми декабр ба бархе молу маҳсулоти воридотии Чин боҷи молии бештар илова мекард, амалӣ намекунад.

Тавре Трамп дар саҳифаи Твиттери худ навиштааст, ки Чин ба харидории молу маҳсулоти кишоварзӣ ва саноатии Амрико дар ҳаҷми бузург розӣ шудааст.

Президенти Амрико навиштааст, ки боҷи гумрукии бархе молҳои воридотии Чинро ду баробар камтар мекунад.

Ба гуфтаи Трамп, Чин дар соли 2020 дар ҳаҷми 50 миллиард доллар молу маҳсулоти кишоварзии Амрикоро мехарад, ки назар ба соли пеш ду баробар бештар аст.

Дар Чин ҳанӯз мулоқот ва созишро расман тасдиқ накардаанд.

Аммо Чин низ гуфтааст, ки аз 15-уми декабр дар баробари молҳои воридотии амрикоӣ боҷи бештар ҷорӣ нахоҳад кард.

Гуфтугӯ миёни ИМА ва Чин беш аз як сол пас аз он оғоз шуд, ки Трамп гуфт, агар Чин қарордоҳои тиҷоратиро бозбинӣ накунад, ба молҳои воридотиаш боҷи бештар ҷорӣ мекунад.

ИМА аз нобаробарии тиҷоратӣ бо Чин нигарон аст.

Трамп гуфтааст, марҳилаи дуюми гуфтугӯ бо Чин оғоз шудааст.

Пирӯзии муҳофизакорҳо боиси тарки Иттиҳоди Аврупо кардани Бритониё мешавад

Ҳизби муҳофизакори ҷонибдори Брекзит барандаи интихоботи Бритониё шуд. Натиҷаҳои расмии интихоботи парлумоние, ки рӯзи 13 декабр эълон шуд, ҳокист, ки нахуствазир Борис Ҷонсон метавонад акнун ваъдаи худ барои берун кардани кишвараш аз узвияти Иттиҳоди Аврупоро амалӣ кунад. Дар паи шумориши қариб тамоми овозҳо маълум шуд, ки ҳизби Борис Ҷонсон 364 курсии маҷлиси иборат аз 650 курсиро бурдааст. Ҷонсон гуфт, ки баъди пирӯзии қотеи муҳофизакорҳо, Бритониё метавонад мувофиқи нақшаи қаблӣ, рӯзи 31 январ Иттиҳоди Аврупоро тарк кунад.

Ҷонсон гуфт:

“Бо чунин салоҳият ва аксарият билохира мо чӣ мекунем? Дуруст фаҳмидед. Ин интихобот ба маънои он аст, ки Брекзит мешавад ва ин қарори ғайриқобили инкору муқовимат аст ва тасмими бидуни баҳс барои мардуми Бритониё аст. Бо ин интихобот дигар таҳдиди баргузории референдуми дуюм оид ба Брекзит ҳам аз байн меравад”.

Соли 2016 дар раъйдиҳии аввали мардуми Бритониё оид ба Брекзит, 52 дарсад тарафдор ва 48 дарсад мухолифи тарки узвияти Иттиҳоди Аврупо кардани Бритониё овоз доданд. Ҳамакнун, дар сурати иҷро шудани ин қарор, давраи гузариш то 31 декабри соли 2020 идома мекунад.

Ҳизби кор, ки хостори азсаргирии музокирот дар заминаи тарки Иттиҳоди Аврупо кардани Бритониё аст, дар натиҷаи овоздиҳии 12 декабр барандаи 203 курсии маҷлис шуд. Ин 59 курсӣ камтар назар ба маҷлиси ҳоло амалкунанда мебошад. Ҷеремӣ Корбин, раиси ҳизб баробари шунидани ин қарор гуфт, ки ба истеъфо меравад. Президенти Шӯрои Аврупо Чарлз Мишел гуфт, ки ин ниҳод умедвор аст парлумони Бритониё базудӣ нақшаҳои худро дар заминаи Брекзит мушаххас мекунад.

Президенти ИМА Доналд Трамп бо паёме дар Твиттер пирӯзии ҳизби Ҷонсронро табрик гуфт. Айни замон, сухангӯи Кремлин Дмитрий Песков гуфт, ки Русия ҳамеша умедвор аст, ки интихобот онҳоеро сари қудрат меорад, ки ҷонибдори “равобити хуб” бо Русия ҳастанд, вале дар заминаи муҳофизакорони Бритониё мутмаин нест, ки чунин мешавад.

Отамбоевро дар куштори афсари амниятӣ муттаҳам карданд

Собиқ президенти Қирғизистон Алмосбек Отамбоев дар куштори як афсари амният дар ҷараёни муноқишаи байни нирӯҳои интизомиву тарафдоронаш дар моҳи август гумонбар дониста шуд. Қошғар Ҷунушалиев, вазири умури дохилии Қирғизистон рӯзи 13 декабр гуфт, ки Отамбоев ба таври расмӣ огоҳонида шуд, ки дар куштори полковник Усенбек Ниёзбеков, падари шаш фарзанд, ки рӯзи 7 август дар рейди ҳавлии Отамбоев дар деҳаи Кой Таши канораҳои Бишкек аз тири туфанг ба ҳалокат расид, айбдор мешавад. Ҷунушалиев гуфт, санҷиши баллистикӣ собит кард, ки Ниёзбеков аз тире, ки ба қафаси синааш аз ҷониби силоҳи снайперӣ зада шуд, ҷон дод ва ин силоҳ ба номи Отамбоев сабтином шудааст. Худи Отамбоев рӯзи 8 август ба хабарнигорон гуфт, ки ӯ танҳо нафаре дар дохили ҳавлӣ буд, ки силоҳ дошт ва ӯ танҳо касе буд, ки дар муноқишаи рӯйдода силоҳро ба кор бурд.

Отамбоев се даъвати қаблӣ барои ҳозир шудан ба вазорати умури дохилиро нодида гирифт ва рӯзи 7 август афсарони амниятӣ ба ҳавлии ӯ бо ҳадафи ба тафтишот ҳозир кардани ӯ рафтанд. Отамбоевро аз рӯи парвандаи озодшавии ғайриқонунии як ҷинояткор дар соли 2013 гумонбар карданд. Баъди ду рӯзи муноқиша, ниҳоят Отамбоев рӯзи 8 август худро ба полис таслим кард ва ӯ расман ба ҳабс гирифта шуд. Ӯро барои хушунат алайҳи намояндаи давлат, ташкили бенизомиҳои ҷамъиятӣ, талоши ташкили куштор, гаравгонгирӣ ва фасод гумонбар медонанд.

Сенати ИМА куштори арманиҳоро "наслкушӣ" эътироф кард

Қатъномае, ки аз ҷониби аъзои Сенати Амрико якдилона қабул шуд, қатли арманиҳо аз ҷониби имперотурии Усмониро наслкушӣ эътироф мекунад. Нахуствазири Арманистон овоздиҳӣ дар Сенатро «пирӯзии адолат ва ҳақиқат» номид. Қатъномае, ки бо ташаббуси сенатори демократ Боб Менендез қабул шуд, эътироф мекунад, ки дар хушунатҳои солҳои 1915-1923-и замони императории Усмонӣ 1,5 миллион арманиҳоро қатл кардаанд.

Никол Пашинян, нахуствазири Арманистон дар вокуниши худ тавассути Твиттер гуфт, ки «аз номи тамоми арманиҳо дар ҷаҳон ба Сенат барои қабули чунин як муқаррароти муҳим ташаккур баён мекунам”. Охири моҳи октябр Маҷлиси намояндагон қатъномаи худро дар ин замина қабул кард. Дар вокуниш ба ин ду қатънома намояндаи дастгоҳи президенти Туркия Фахриддин Алтун гуфт, “ин иқдомҳои бемасъулият ва носозор” мебошанд ва “ба равобити ду кишвар таъсири харобиовари дарозмуддат мерасонад”.

Баъди ҳамла ба Багром музокироти Халилзод бо Толибон боздошта шуд

Назди пойгоҳи Баграм, 11 декабр

Фиристодаи ИМА дар Афғонистон Залмай Халилзод рӯзи 12 декабр гуфт, баъди он ки гурӯҳи шӯришӣ алайҳи пойгоҳи низомии ИМА ҳамла анҷом дод, музокироти сулҳ бо Толибон муваққатан боздошта мешавад. Рӯзи чоршанбе ҷангҷӯёни Толибон дар наздикии пойгоҳи низомии Багром ҳамла анҷом доданд, ки дар натиҷа, ду шаҳрванди мулкии Афғонистон кушта ва беш аз 70 нафар, аз ҷумла, панҷ низомии гурҷӣ маҷрӯҳ шуданд. Ҳамлае, ки аз ҷумла бо ширкати як мошини бомбгузоришуда рух дод, як ҳафта баъди азсаргирии музокираҳо бо Толибон рух дод. Се моҳ пеш президенти ИМА Доналд Трамп музокираҳо бо гурӯҳи шӯриширо, ки ҳадафаш хатми ҷанги 18-сола дар Афғонистон аст, ногаҳон қатъ кард. Дипломати амрикоии зодаи Афғонистон Залмай Халилзод дар саҳифаи худ дар Твиттер навишт: «Вақте ман имрӯз Толибҳоро дидам, хашми худро дар робита бо ҳамлаи дирӯза ба Багром баён кардам. Дар ин ҳодисаи бераҳмона ду нафар кушта ва даҳҳо мулкӣ маҷрӯҳ шуданд». Халилзод гуфт, Толибон бояд нишон диҳанд, ки майлу ирода ва тавони барқарории сулҳро доранд. Ӯ афзуд, «мо танаффусе гирифта бо раҳбарон машваратҳо доир мекунем».

Полиси Маскав: ҷинояткории хориҷиҳо коҳиш ёфтааст

Як мақоми полиси Маскав гуфт, ки соли 2019 мизони ҷинояткорӣ дар миёни хориҷиҳо коҳиш ёфтааст. Оҷонсии Интерфакс бо истинод ба Дмитрий Сергиенко, як мақоми муҳоҷирати ВКД-и шаҳри Маскав навишт, ки шаҳрвандони хориҷӣ тақрибан 5,5 ҳазор ҷиноят содир кардаанд, ки 16,7 дарсад камтар назар ба соли гузашта будааст. Инчунин, мизони ҷиноятҳои сангине, ки аз ҷониби хориҷиҳо дар шаҳри Маскав содир шудааст, 23 дарсад коҳиш ёфтааст, гуфт Сергиенко дар як мизигирди Палатаи ҷамъиятӣ. Ӯ гуфтааст, ки 96 дарсади ҷиноятҳоро шаҳрвандони Узбекистон, Қирғизистон ва Тоҷикистон содир кардаанд.

Мавзӯи ҷинояткорӣ дар миёни хориҷиҳо яке аз масоилест, ки пайваста мавриди истифодаи афрод ва гурӯҳҳои сиёсӣ дар Русия қарор мегирад. Дар гузашта таҳлилгарон гуфтаанд, дар ҳоле, ки мизони ҷиноятҳои аз ҷониби хориҷиҳо содиршуда дар қиёс бо қонуншиканиҳое, ки худи шаҳрвандони Русия содир кардаанд, ба маротиб камтар аст, дар ҳолатҳои зарурӣ давлатмардони рус омори ҷиноятҳоро барои фишороварӣ ба кишвари ҳамкор истифода мекунанд. Аз сӯи дигар, ҳомиёни ҳуқуқ мегӯянд, ки ҳодисаҳои бепояву асос дар ҷиноят муттаҳам шудани муҳоҷирон дар Русия кам нест ва омори ҷиноятҳои муҳоҷирон баёнгари вазъи воқеии ҷинояткорӣ буда наметавонад.

Беш аз 35 ҳазор шаҳрванди Тоҷикистон соҳиби шиносномаи Русия шуданд

Як мақоми вазорати умури дохилии Русия гуфт, ки соли 2019 шумори хориҷиҳои соҳиби шаҳрвандии ин кишваршуда аз 270 ҳазор то 360 ҳазор нафар афзоиш ёфтааст. Дар миёни онҳо шаҳрвандони Тоҷикистон ҳам мебошанд.

Валентина Казакова, сардори раёсати умури муҳоҷирати ВКД Русия дар сӯҳбат бо ТВ "Россия-24" гуфт, ки баъди соли 2013 майли хориҷиҳо барои гирифтани шаҳрвандии Русия бештар мешавад. Ӯ гуфт, ки қисмати зиёди онҳоро украиниҳо ташкил медиҳанд ва соли ҷорӣ 130 ҳазор шаҳрванди Украина соҳиби шиносномаи Русия шудаанд. Казакова гуфтааст, ки як далели чунин афзоиш дар қонуни федеролӣ аст, ки ба президент салоҳияти «бо ҳадафҳои башарӣ» ба гурӯҳҳои муайяни нафарон тақдим кардани шаҳрвандии Русияро имконпазир кардааст. Дар ҷои дуюм шаҳрвандони Қазоқистон ва дар ҷои сеюм – тоҷикистониҳо қарор доранд. Ӯ гуфт, ки соли 2018 - 35 ҳазору 732 шаҳрванди Тоҷикистон соҳиби шиносномаи русӣ шуд, дар ҳоле, ки соли 2017 шумори онҳо 29 ҳазору 39 нафарро ташкил дода буд. Бар асоси қонуни душаҳрвандӣ, шаҳрвандони Тоҷикистон ҳақ доранд, ки баробар бо ҳифзи шаҳрвандии ватани худ табааи Русия ҳам шаванд. Бар асоси оморҳои солҳои охир, дар маҷмӯъ беш аз 250 ҳазор нафар соҳиби мақоми душаҳрвандии Тоҷикистону Русия мебошанд.

Интиқоди HRW аз Русия барои "айбномаҳои сохта" дар парвандаи бомбгузории метро

Созмони Дидбони Ҳуқуқи Башар ё HRW мегӯяд, нокомии мақомоти Русия дар таҳқиқи айбномаҳои сохтакорӣ дар парвандаи бомбгузории метро дар шаҳри Санкт Петербург дар соли 2017, таҳқири қурбониҳо ва аъзои оилаҳои онҳо мебошад. Дар ин робита 11 нафаре, ки ба солҳои тӯлонии зиндон маҳкум шуданд, исрор меварзиданд, ки тавассути сохтакории шаҳодатҳо ва шиканҷа ин ҷиноятро ба гардан гирифитанд.

Изҳороти Таня Локшина, намояндаи Ҳюман Райтс Вотч дар Аврупо ва Осиёи Марказӣ 11- уми декабр нашр шуд. Як рӯз пеш аз он Додгоҳи шаҳри Санкт-Петербург 11 фарди муттаҳам, аз ҷумла як шаҳрванди Тоҷикистонро аз 19 сол то ба ҳабси абад маҳкум кард. Ҳамаи онҳо исрор меварзанд, ки узви гурӯҳи террористӣ нестанд, фаъолиятҳои террористиро дастгирӣ намекунанд ва дар тавлиду фурӯши маводи тарканда саҳм надоранд.

Ҳамла дар метрои Санкт-Петербург рӯзи 3-юми апрели соли 2017 дар яке аз вагонҳо ҳангоми ҳаракати он дар байни истгоҳҳои "Майдони Сенная" ва "Донишкадаи Технологӣ" ба вуқуъ пайваст. Дар натиҷаи он 16 нафар кушта ва даҳҳо тани дигар маҷруҳ шуданд. Бино ба хулосаи тафтишот таркишро террористи маргталаб, шаҳрванди 22-солаи қирғизтабори Русия Акбарҷон Ҷалилов анҷом додааст. Ҷалилов дар ҷои ҳодиса ҷон бохт.

Нақлиёти ройгон барои сокинони Хоруғ дар рӯзи мавлуди Шоҳзода Карим Оқохон

Имрӯз, 13-уми декабр Шоҳзода Карим Оқохон, раҳбари исмоилиёни ҷаҳон 83-сола шуд. Дар Тоҷикистон беш аз 200 ҳазор пайрави мазҳаби исмоилия зиндагӣ мекунанд ва бахши аъзами онҳо дар вилояти Бадахшон ҳастанд ва ин санаро бо баргузории барномаҳои мухталиф таҷлил мекунанд.

Ба ин муносибат имрӯз дар Маркази ислоилияи шаҳри Хоруғ ва Литсейи Оқохон дар ин шаҳр, чорабиниҳои фарҳангӣ доир мешавад. Ҳамчунин дар ин рӯз, нақлиёти ҷамъиятӣ дар Хоруғ барои сокинон ройгон хизмат мекунанд. Баргузории намоишгоҳе низ дар ин шаҳр назар аст.

Дар Маркази исмоилияи Душанбе ба Радиои Озодӣ гуфтанд, ки бинобар рӯзи муқаррарии корӣ, ба ин муносибат имрӯз барномае дар назар гирифта нашудааст.

Раиси Вилояти Мухтори Кӯҳистони Бадахшон Ёдгор Файзов ҳам дар паёме ба ин муносибат, аз Шоҳзода Карим Оқохон "чун ҳомии кулли исломи ноб, шахсияти сулҳпарвар ва ободкору инсондӯст", ёд кардааст. Дар ин паёми Ёдгор Файзов, ки дар сафҳаи "Фейсбук"-и мақомоти Вилояти Мухтори Кӯҳистони Бадахшон нашр шуд, ҳамчунин аз ҳамкориҳои хуби Шабакаи Оқохон ва Ҷамоат бо ҳукумати Тоҷикистон ёддоварӣ шудааст.

Карим Оқохон ё Оқохони чаҳорум рӯзи 13-уми декабри соли 1936 ба дунё омадааст. Ӯ имоми 49-уми исмоилиёни ҷаҳон мебошад ва пас аз бобояш Оқохони севум дар соли 1957 ба имомат расид. Ӯ дар риштаи таърихи ислом дар Донишгоҳи Ҳарвард таҳсил кардааст. Оқохони чаҳор аз сарватмандарин шахсиятҳои мусалмон низ ба шумор меравад.

Пайравони шохаи исмоилияи мазҳаби шиа умдатан дар Покистон, Афғонистон, Тоҷикистон, Сурия, Танзания, Ҳиндустон ва дигар кишварҳо ба сар мебаранд. Пайравони ин равия дар Тоҷикистон асосан дар вилояти Бадахшону шаҳри Душанбе ва баъзе аз минтақаҳои дигари кишвар зиндагӣ мекунанд.

Пас аз истиқлоли Тоҷикистон, Оқохони чаҳор чанд дафъа ба Тоҷикистон сафар кард ва бо пайравонаш мулоқот дошт.

Дархости таҳримҳо зидди Қазоқистон "барои риоя нагардидани ҳуқуқи инсон"

Гуруҳи шашнафарии фаъолон, ки аз худ ба унвони ҳаракати "405" барои ҳимоят аз ҳуқуқи инсон ном мебаранд, рӯзи 12 декабр назди сафорати ИМА дар шаҳри Нурсултони Қазоқистон ҷамъ омаданд. Онҳо аз ИМА хостанд, ки дар ивази бастани созишнома бо Нурсултон, зидди масъулони Қазоқистон таҳрим ҷорӣ кунанд.

Фаъолон мегӯянд, Қазоқистон фишори қазоқтаборонро дар минтақаи Шинҷони Чин нодида мегирад, ҳуқуқи инсонро дар дохили кишвар риоя намекунад ва ба ҳамин далел бояд таҳрим шавад. Фаъолон дар даст шиорҳои "Қазоқтаборон дар Шинҷон ҳастанд!", "Ба поймолкунандагони қонун - таҳрим, на созишнома!" доштанд.

Ин фаъолон талабҳояшонро ба намояндаи сафорати ИМА дар Қазоқистон таслим карданд. Иқдоми фаъолон дар Қазоқистон дар ҳоле сурат мегирад, ки эҳтимол дорад, вазири корҳои хориҷии ин кишвар Мухтор Тлеубердӣ рӯзҳои наздик дар Вашингтон бо котиби давлатии ИМА Майк Помпео мулоқот кунад.

Баъди як соати анҷоми иқдоми фаъолон пулиси шаҳри Нурсултон чанде аз иштирокдорони иқдомро боздошт кард.

Дар чанд ҳафтаи охир фаъолони шаҳри Нурсултон бо талаби риояи ҳуқуқи инсон ва озодии зиндониёни сиёсӣ бештар аз 10 маротиба гирдиҳамоӣ баргузор карданд. Чанде аз иштирокдорон ин гуна иқдомҳо боздошт ва ҳабси маъмурӣ шуданд.

Қирғизистон ҳисоби бонкии Радиои Озодиро баъди нашри таҳқиқот ҳабс кард

Вакили порлумони Қирғизистон Жанар Акаев аз Додгоҳи шаҳрии Бишкек хост, қарори Додгоҳи ноҳияи Свердловро дар бораи ҳабси ҳисоби бонкиии бахши қирғизии Радиои Озодӣ, рӯзноманигор Алӣ Токтакунов, сомонаҳои 24.kg ва Kloop.kg-ро бекор кунад.

"Матраимовҳо зидди се расона ба додгоҳ шикоят кардаанд. Онҳо ҳақ доранд, ки ба додгоҳ шикоят карда, ҳуқуқи худро талаб кунанд. Вале Додгоҳи ноҳияи Свердлов пас аз қабули шикоят зуд ҳисобҳои бонкии расонаҳоро ҳабс кардааст. Ин нодуруст аст",-гуфт вакил 12 декабр дар порлумони Қирғизистон.

Вакили дигари порлумони Қирғизистон Мирлан Жээнчороев қарори Додгоҳи Свердловро ҳамчун монеъ шудан ба кори расонаҳо арзёбӣ кард.

Хонаводаи Матраимовҳо 9 декабр барои ҳифзи обрӯй ва шарафи худ зидди бахши қирғизии Радиои Озодӣ, рӯзноманигор Алӣ Токтакунов, сомонаҳои 24.kg ва Kloop.kg ба додгоҳ шикоят бурданд. Додгоҳ рӯзи дигар ҳисобҳои бонкии расонаҳо, ҷамъан ҳудуди 859 ҳазор долларро ба ҳабс гирифт.

Бахши қирғизии Радиои Озодӣ дар якҷоягӣ бо Маркази таҳқиқоти фасодкорӣ ва ҷиноятҳои созмонёфта (OCCRP) ва сомонаи Kloop.kg қисмати дувуми таҳқиқоти рӯзноманигориро дар бораи ба хориҷ бурдани 700 миллион доллар аз Қирғизистон нашр карданд.

Рӯзи 10 ноябр дар шаҳри Истамбули Туркия яке аз чеҳраҳои калидии таҳқиқоти рӯзноманигорӣ - тоҷири чинӣ Айэркен Саймаитӣ кушта шуд. Вай дар суҳбат бо рӯзноманигорон иқрор шуда буд, ки хонаводаи муовини пешини раиси Хадамоти гумрук Раимбек Матраимов дар фасодкорӣ даст дорад.

Матраимов дар навбати худ гуфт, дар интиқоли ғайриқонунии 700 миллион доллар аз Қирғизистон ба хориҷ даст надорад ва маълумоти рӯзноманигорон дар таҳқиқот дурӯғ аст. Ӯ афзуд, ки дар ин бора ба додгоҳ шикоят бурдааст. Ба гуфтаи Матраимов, ӯ барои ба додгоҳи байналмилалӣ кашидани Радиои Озодӣ омодагӣ мебинад.

Қазоқистон 11,6 ҳазор гектар замини Байконурро аз Русия бозпас мегирад

Сенати порлумони Қазоқистон рӯзи панҷшанбе тағйиру иловаҳо ба созишнома бо Русияро дар бораи иҷораи маҷмааи "Байконур" тасвиб кард, ки бозпас гирифтани чаҳор қитъаи заминро ба масоҳати 11,6 ҳазор гектар аз Русия пешбинӣ мекунад.

"Ду қитъаи замин ба масоҳати 1 740 ҳектар барои тавсеаи маҳаллаи Торетами ноҳияи Қармақшии Қазоқистон ва ду қитъаи замини дигар ба масоҳати 9 950 ҳектар барои бунёди долони транзитии Аврупои Ғарбӣ - Чини Ғарбӣ, роҳи оҳани Алмато - Москва, лӯлаи Бейнеу - Чимкент гирифта хоҳанд шуд",-гуфт муовини вазири кишоварзии Қазоқистон Айдарбек Сапаров.

Ба гуфтаи Сапаров, Русия дар умум 650 ҳазор гектар заминро аз Қазоқистон ба иҷора гирифтааст ва гирифтани 11,6 ҳазор ҳектар замин ба нархи иҷора таъсире нахоҳад расонд.

Маҷмааи "Байконур" аз истгоҳи парвози киштиҳои кайҳонӣ ва шаҳри Байконур иборат буда, онро Русия аз Қазоқистон ба иҷора гирифтааст. Иҷорапулии ҳамасолаи он, ки тибқи қарордод мӯҳлати он то соли 2050 муайян шудааст, 115 миллион доллар мебошад.​

Дар Узбекистон қаллобон аз корбарони сомонаҳои фаҳш "ҷарима" меситоданд

Вазорати корҳои дохилии Узбекистон тафтиши ҳолатҳои қаллобиеро шуруъ кард, ки ба ситонидани ҷарима аз корбарони сомонаҳои фаҳш рабт дорад. ВКД аз ҳамлаи рахнагарони интернетӣ ё ҳаккероне хабар дод, ки ҳадафашон таҳдиди корбарони интернет аст.

"Вақтҳои ахир ҳангоми тамошои бархе аз махзанҳои интернетӣ (аксу навори фаҳш) аз сӯи корбарон, ҳолатҳое мушоҳида мешавад, ки ба таври худкор дар саҳифаи корбар "Огоҳии шуъбаи мубориза бо ҷиноятҳои киберии ВКД Узбекистон" пайдо мегардад. Дар огоҳӣ навишта мешавад, ки корбар ба далели тамошои саҳифаҳои мамнуъ ҳудуди 30 доллар ҷарима шудааст. Корбар ин ҷаримаро бояд тариқи низоми пардохти «Webmoney» пардозад. Дар ҳолати саркашӣ кардан иттилоъ дар бораи корбар дастраси истифодабарандагони интернет хоҳад шуд",-омадааст дар хабари ВКД.

Вазорати корҳои дохилии Узбекистон хабар дод, ки шуъбае бо номи "мубориза зидди ҷиноятҳои киберӣ" дар вазорат мавҷуд нест ва ба илова вазорат низоми пардохти «Webmoney» низ надорад. Вазорат аз сокинон хост, ки ба таҳдиди қаллобон дода нашаванд.

Тақдири Гулнора Каримоваро духтари Мирзиёев "муайян" мекунад

Дар шаҳри Тошканд имрӯзҳо тафтиши парвандаи нав зидди духтари калонии президенти пешини Узбекистон Гулнора Каримова ҷараён дорад. Дар ин бора чанде пеш Додситонии кулли Узбекистон иттилоъ дод.

Мақомоти Узбекистон Гулнора Каримоваро, ки дар анҷоми чандин ҷиноят гумонбар аст, ин бор дар раҳбарии гуруҳи ҷиноӣ айбдор мекунанд.

Тафтиши парвандаи навро муфаттиш оид ба парвандаҳои махсуси Идораи мубориза бар зидди ҷиноятҳои муташаккил ва коррупсияи Додситонии кулли Узбекистон Расул Юлдошев раҳбарӣ мекунад.

12 декабр дар саҳифаи духтари Гулнора Каримова - Имон Каримова қарори Юлдошев аз 1 ноябри соли равон нашр шуд. Дар қарори муфаттиш омадааст, ки парвандаи духтари калонии президенти пешини Узбекистон бо ҷалби мутахассисон аз идораҳои гуногуни давлатӣ ташхиси фарогир гузаронида шавад.

Ташхис бояд муайян кунад, ки дар натиҷаи моҷарои фасодкории марбут ба Каримова Узбекистон чи қадар зарари маънавӣ ва иқтисодӣ дидааст.

Муфаттиш дар қарори худ дастур додааст, ки ташхиси мазкурро Оҷонси иттилоотӣ ва иртибототи назди президенти Узбекистон анҷом диҳад. Бояд гуфт, яке аз раҳбарони ин оҷонс Саида Мирзиёева, духтари президенти Узбекистон Шавкат Мирзиёев аст.

Дар қарор ҳамчунин омадааст, ки ба раванди ташхис мутахассисон аз вазоратхонаҳои энержӣ, саноат, сармоягузорӣ, савдои хориҷӣ, умури дохилӣ ва Иттифоқи нависандагону Маркази омӯзиши афкори ом ҷалб карда шавад.

"Яъне, тақдири Гулнора Каримова ва ба анҷоми кадом ҷиноятҳо айбдор шудани ӯро духтари президенти Узбекистон муайян хоҳад кард. Ин на танҳо бархурди манофеъ, балки нишонаи он аст, ки парвандаи Гулнора Каримова комилан ангезаи сиёсӣ дорад ва ҳадафи ниҳоӣ маҳви Гулнора Каримова аст",-навишта шудааст дар саҳифаи Имон Каримова.

Баҳси нобоварӣ ба Трамп дар Маҷлиси намояндагони Амрико

Доналд Трамп, раиси ҷумҳури Амрико

Кумитаи адлияи Маҷлиси намояндагони Амрико рӯзи 12-уми декабр баҳсҳоро дар бораи лоиҳаи нобоварӣ ба президент Доналд Трамп идома медиҳад.

Баҳс ва гуфтугӯҳо дар ин кумита рӯзи 11-уми декабр дар Вашингтон пеш аз он ки дар бораи лоиҳа овоздиҳӣ шавад, оғоз шуд. Интизор меравад гуфтугӯҳо то субҳи рӯзи дигар давом ёбанд. Пас аз гуфтугӯҳо Кумитаи адлияи Маҷлиси намояндагон дар бораи идомаи раванди нобоварӣ дар рӯзҳои баъдӣ овоздиҳӣ хоҳад кард.

Намояндагони демократи Маҷлиси Намояндагон дар лоиҳаи нобоварӣ, раиси ҷумҳур Доналд Трампро ба суистифода аз қудрат ва монеа эҷод кардан ба таҳқиқоти Конгресс муттаҳам кардаанд.

Иттиҳомот вобаста ба муносибатҳои ӯ бо Украина вобаста аст, ба вижа ба ин масъала, ки оё Доналд Трамп додани 391 миллион доллар кумаки низомиро ба Киев барои таҳқиқи рақибони сиёсии ӯ, аз ҷумла ноиби пешини президент Ҷо Байден ҳамчун фишор истифода мекард ё не.

Дар бораи иттиҳоми монеа ба таҳқиқи Конгресс Трамп айбдор мешавад, ки ҳазорҳо ҳуҷҷатҳои дархостшударо пешниҳод накард ва садди роҳи гувоҳ додани кормандони давлатӣ шуд, ки дар бораи муносибатҳои ӯ бо Украина маълумоти дасти аввал доштанд.

Трамп ин иттиҳомотро рад карда, таҳқиқи импичментро "фиреб" ва "шикори ҷодугарон" номид ва мурофиаҳои Конгрессро "додгоҳи кенгуру" тавсиф кард.

Сӯхтор дар Саратоғи ноҳияи Айнӣ. ВИДЕО

Шаби 11-уми декабр як бинои истиқоматӣ дар деҳаи Саратоғи ноҳияи Айнии вилояти Суғд ба коми оташ рафтааст.

Корбаре ба Радиои Озодӣ аз лаҳзаҳои оташ гирифтани ин бино видеое фиристод ва гуфт, "ин мактаби деҳа аст ва шабона оташ гирифт ва то субҳ хокистар шуд".

Дар навор дида мешавад, алангаи оташ ба ҳаво мепечад ва касе барои хомӯш кардани он талош намекунад. Солҳои охир бисёриҳо аз шеваи кори оташнишонҳо танқид мекунанд, ки ба ҷойи ҳодиса дер мерасанд ва агар расанд ҳам, ё об надоранд ва ё мушкили техникӣ доранд.

Мақомоти оташнишонии вилояти Суғд гуфтанд, аз ин ҳодиса хабар надоштанд ва сокинон низ ба онҳо занг назадаанд.

Бахтиёр Умарзода, сардори идораи оташнишонии вилояти Суғд, рӯзи 12-уми декабр ба Радиои Озодӣ гуфт, аз ҷойи ҳодиса то нуқтаи оташнишонӣ 93 километр роҳ аст, "вале агар сокинон хабар медоданд, ҳатман ба онҷо мерафтем."

Мақомоти тафтишотии ноҳияи Айнӣ сабаби сӯхторро дар бинои собиқи мактаби деҳаи Саратоғ расиши ноқилҳои барқ гуфтанд, аммо зарари расида ҳанӯз муайян нашудааст.

Як сокини деҳаи Саратоғ гуфт, ҳуҷраҳои ин бино дар солҳои пеш ба ҳайси синфхона истифода мешуд, аммо вақтҳои ахир дар онҷо на касе дарс мехонд ва на зиндагӣ мекард.

Муллоғиёс Шарифзода, мудири идораи маорифи ноҳияи Айнӣ низ дар суҳбат бо Радиои Озодӣ гуфт, дар гузашта дар онҷо хонандагон то синфи 9-ум таҳсил мекарданд, аммо бо бунёди мактаби нав дар деҳа, солҳо боз касе ба онҷо намерафт.

Сӯхтор дар ноҳияи Айнӣ
лутфан мунтазир бошед
Embed

Феълан кор намекунад

0:00 0:00:51 0:00

Дар Исроил дар як соли охир бори севум интихоботи порлумонӣ баргузор мешавад

Дар Исроил дар як соли охир бори севум интихоботи порлумонӣ баргузор хоҳад шуд. Ҷиноҳҳои порлумонии Исроил натавонистанд, эътилоф ташкил кунанд ва ба ин далел, вакилон тасмим гирифтанд, ки порлумонро пароканда эълом кунанд. Дар ин бора расонаҳои Исроил хабар медиҳанд.

Интихоботи ахири порлумонӣ дар он кишвар 17 сентябр барпо шуда буд. Ҳизби "Ликуд" дар порлумон соҳиби 31 курсӣ, ҳизби "Кахол-Лаван" соҳиби 33 курсӣ шуд. Порлумони Исроил дар маҷмуъ 120 курсӣ дорад.

Бинямин Натаняҳу, сарвазири Исроил 21 октябр гуфт, ки натавонист, дар муҳлати муқарраршуда ҳукумат таъсис диҳад. Ба ин далел, ҳаққи таъсиси ҳукумат ба роҳбари мухолифон дода шуд, аммо роҳбари мухолифон ҳам дар навбати худ аз уҳдаи таъсиси ҳукумат набаромад.

Моҳи май бори аввал дар таърихи Исроил интихоботи такрории порлумонӣ эълом шуд. Он замон низ сарвазири Исроил натавонист, эътилоф ташкил кунад. Ҳамакнун интихоботи нави порлумонӣ дар таърихи 2 марти соли 2020 таъйин гардидааст.

Марги ду халабон бар асари суқути чархболи низомӣ дар Русия

Шаби 11 ба 12 декабр дар кишвари Краснодари Русия чархболи низомии Ми-28 суқут кард, ки боиси марги ду халабони он шуд. Дар ин бора расонаҳои Русия бо такя ба вазорати мудофиаи он кишвар хабар доданд. Ба навиштаи расонаҳо, кушташудаҳо муовинони фармондеҳи полки ҳавоӣ ҳастанд.

Гуфта мешавад, халабонҳои кушташуда таҷрибаи кофии идораи чархболро доштаанд. Бино ба фарзияи пешакӣ, мумкин аст, ҳавои туман ё меғолуд, боиси суқути чархбол шудааст. Чархбол ба маҳзи аз замин канда шудан суқут кардааст.

Ми-28Н - чархболи тирандозест, ки дар нируҳои мудофиаи Русия, Ироқ ва Алжир истифода мешавад. Ин навъи чархбол ду ҷои нишаст дорад - халабон ва тирандоз. Чархбол бо тӯпи 30-миллиметрӣ муҷаҳҳаз аст ва ҳамзамон метавонад, мушакҳои идорашавандаву идоранашавандаро ҳамл диҳад. "Чархболи дар Краснодар суқуткарда бидуни лавозимоти ҷангӣ буд"-, хабар медиҳад вазорати мудофиаи Русия.

Ёфтҳои бештар

Гузоришҳои видеоӣ

XS
SM
MD
LG