Пайвандҳои дастрасӣ

Хабари нав

Хабарҳо

Ироқ оилаҳои ҷангиёни ДИИШ-ро ба Талкайф интиқол дод

Мақомоти Ироқ 1400 шаҳрванди хориҷиро, ки аксаран занону кӯдакони ҷангиёни гурӯҳи тундрави “Давлати исломӣ” ҳастанд, аз шаҳри Мосул ба шаҳри Талкайф интиқол додаанд. Дар миёни онҳо 31 хонавода аз Тоҷикистон низ ҳаст.

Шаҳри Талкайф дар вилояти Найнавои Ироқ ҳудуди даҳ километр дур аз Мосул ҷойгир аст ва моҳи январи имсол аз дасти ДИИШ озод шуда буд.

Шӯрои норвежӣ дар умури паноҳандагон рӯзи 18-уми сентябр бо ирсоли як баёнияи матбуотӣ ба Радиои Озодӣ дар ин бора хабар дод. Ин созмон аз ҳукумати Ироқ хостааст, макони нигаҳдории ин шаҳрвандонро барои созмонҳои байналмилалӣ дақиқ кунад ва сабаби интиқоли онҳоро низ шарҳ диҳад. Инчунин ин созмон аз мақомоти ироқӣ хостааст, то ба созмонҳои мадарасон иҷозаи кӯмак ба ин афродро диҳад.

"Ин занон ва кӯдакон хеле осибпазиранд. Новобаста ба он ки аъзоёни оилаи онҳо ба ҷиноят муттаҳам мешаванд, худи онҳо ҳақи ҳимоя ва кӯмак доранд", - мегӯяд Ҷулия Девидсон, муовини раиси Шӯрои норвежӣ дар умури паноҳандагон.

Зимнан, ин созмон аз ҳукуматҳои Туркия, Озарбойҷон, Русия ва Тоҷикистон хостааст, ки барои сарнавишти ояндаи ин шаҳрвандон зудтар амал кунанд.

Паноҳгоҳ барои ҳамсарон ва кӯдакони ҷангиёни ДИИШ, ки пас аз озодсозии минтақаҳои таҳти назорати ин гурӯҳи тундрав рӯзи 30-уми август дар канори Мосул сохта шудааст, аксаран хориҷиён нигаҳдорӣ мешаванд.

Ҳукумати Ироқ гуфтааст, ки мехоҳад аз роҳи сафоратхонаҳои кишварҳо паноҳандагонро дубора ба ватанашон фиристад, чунки тавони дурудароз нигаҳ доштани онҳоро надорад. Бовар меравад, ки падар ва ҳамсарони онҳо нопадид ё кушта шудаанд ва онҳое, ки зинда дастгир шудаанд, дар боздошт ба сар мебаранд.

Ҳамаи хабарҳои имрӯзро дар инҷо бихонед

Азсаргирии музокироти Арманистону Озарбойҷон барои созиши нави сулҳ 

Гурӯҳи Мински САҲА ва вазири хориҷаи Арманистон Зоҳраб Мнатсаканян дар Женева

Дипломатҳои баландпояи Озарбойҷону Арманистон дар Женева бо ширкати миёнҷиҳои байналмилалӣ ба баррасии шарту шароити созиши нави сулҳ пардохтанд, дар ҳоле, ки даргириҳо дар минтақаи ҷудоиталаби Қаробоғи Кӯҳӣ идома дорад ва се созиши қаблии оташбас бенатиҷа анҷомид. Ҷаласаи рӯзи 30-юми октябрро дар чаҳорчӯби Гурӯҳи Мински САҲА вазири хориҷаи Арманистон Зоҳраб Мнатсаканян шурӯъ кард. Ба ин гурӯҳ ИМА, Фаронса ва Русия шомил ҳастанд. Қарор аст баъди ин Ҷейҳун Байрамов, вазири хориҷаи Озарбойҷон бо дипломатҳои хориҷӣ гуфтугӯҳои ҷудогонае барпо кунад. Маълум нест, ки вазирони хориҷаи ду кишваре, ки дар ҳоли низоъ ҳастанд, бо ҳам мулоқоти рӯбарӯ барпо мекунанд ё на.

Қарор буд ин ҷаласа рӯзе аз ин пеш баргузор шавад, вале даргириҳои сарзада дар Қаробоғи Кӯҳӣ - минтақае дар дохили қаламрави Озарбойҷон, вале таҳти назорати арманитаборҳо ва дар иҳотаи низомиёни Арманистон – монеи ин музокирот шуд.
Даргириҳои ахир дар Қаробоғи Кӯҳӣ рӯзи 27-уми сентябр оғоз шуд ва чанд созиши оташбаси ҳосилшуда дар фосилаи кӯтоҳи баъдаш боз ҳам барҳадар рафт. Озарбойҷон рӯзи 29-уми октябр гуфт, ки ба Арманистон ҷасади 29 низомиро таслим кард, ки дар ин ҷангҳо кушта шуданд. Дар ҷараёни даргириҳои идомаёбанда шумори қурбониҳо афзоиш меёбад. Ҳарду ҷониб якдигарро дар нақзи созиши оташбас, ки бори охир бо миёнҷигии ИМА ҳосил шудааст, гунаҳкор мекунанд.
Гурӯҳи Минск гуфт, ки мулоқоти Женева бо ҳадафи “баррасӣ, дастёбӣ ба созиш ва шурӯи иҷрои он мутобиқ ба зарбулаҷали ҳосилшудаи тарафҳо то замони истиқрори пурраи сулҳ дар Қаробоғи Кӯҳӣ” баргузор мешавад.

Танишҳои қавмӣ дар минтақаи ҷойгир миёни арманиҳои масеҳӣ ва ҳамсояҳои мусалмонашон давоми даҳсолаҳо идома дорад. Қаробоғи Кӯҳӣ қаламрави эътирофшуда дар ҳудудҳои Озарбойҷон мебошад, вале арманитаборҳо, ки аксарияти сокинони ин минтақаи ҷудоиталабро ташкил медиҳанд, қонунҳои Озарбойҷонро қабул надоранд. Аз оғози солҳои 1990-ум, замоне, ки дар ин қаламрав низоъ бархост, дар Қаробоғи Кӯҳӣ аз рӯи қонунҳои худ пеш мераванд ва аз Арманистон пуштибонӣ мебинанд.
Президенти Озарбойҷон Илҳом Алиев талаб кардааст, ки Қаробоғи Кӯҳӣ ва ҳам ҳафт ноҳияи тарофи он, ки зери назари низомиёни арманӣ мебошанд, ба Озарбойҷон баргардонида шаванд.


Арманистон гуфтааст, ки ин қаламравро тарк намекунад, чун ин ҳама макон таърихан моли арманиҳо будааст, аҳолиаш ба ҳимоят ниёз дорад.


Низоъҳои бархоста хатари фаротар аз Қафқози Ҷанубӣ доман паҳн кардани хушунатҳоро бо ширкати эҳтимолии Туркия – як узви НАТО ва муттафиқи Озарбойҷон ва аз сӯи дигар Русия, ки бо Арманистон созиши низомӣ дорад, ба миён овардааст.
Туркия тақозо кард, ки нақши Гурӯҳи Минск, ки ба қавли Анкараву Боку давоми даҳсолаҳо масъалаи Қаробоғи Кӯҳиро канор гузошта буд, фаротар аз салоҳиятҳои имрӯзааш бошад. Вале на танҳо Туркия ба ҳайси як бозигари минтақавӣ ба ин низоъ дида дӯхтааст.

Эрон ҳам ҳушдор додааст, ки ҷонибҳои даргир ба қаламравҳои наздик ба минтақа осеб нарасонанд. Эрон ҳафтаи ҷорӣ гуфт, ки умедвор аст, аз роҳи роҳандозии нақшае дар марзҳои шимолуғарбаш метавонад дар хатми хушунатҳои Қаробоғи Кӯҳӣ саҳмгузор шавад.

Айни замон, Иттиҳоди Аврупо бар ин аст, ки тавсеаи хушунатҳо “ғайри қобили қабул аст” ва ҷонибдори роҳандозии музокироти сулҳ мебошад.

Намоиши эътирозии Бангладеш бо интиқод аз Макрон

Дар намози ҷумъаи 30-юми октябр мусалмонон дар Бангладеш ба бойкоти маҳсулоти Фаронса даъват карданд

Дар Бангладеш даҳҳо ҳазор мусалмонон дар намоиши эътирозӣ иштирок карда, президенти Фаронса Эммануэл Макронро “террористи калонтарини ҷаҳон” номиданд. Ин дар ҳолест, ки ҳимояти ҳукумати Фаронса аз карикатураҳои Муҳаммад Пайғамбар мояи нигаронии дигар ҷомеаҳои мусалмонӣ дар ҷаҳон шудааст. Фаронса, ки макони зисти як ҷомеаи калони мусалмонон мебошад, рӯзи 30-юми октябр дар ҳолати омодабоши амниятӣ қарор гирифт. Ин тасмим баъди он гирифта шуд, ки марде дар шаҳри Ниси Фаронса ба як калисо ҳамла кард ва бо зарби корд се нафарро кушт. Макрон ин ҳодисаро “ҳамлаи террористи исломгаро” номид. Ин ҳодиса ду ҳафта баъди он рух дод, ки дар канораҳои Париж омӯзгори мактабе, ки дар мавзӯи озодии баён ба шогирдонаш сӯҳбат карда, карикатураҳои Муҳаммад Пайғамбарро намоиш додааст, аз ҷониби як ҷавони 18-сола кушта шуд. Рӯзи 30-юми октябр эътирозгарон аз кӯчаҳои шаҳри Дака, пойтахти кишвари аксаран мусалмоннишини Бангладеш гузашт карда, ба бойкоти маҳсулоти сохтаи Фаронса даъват карда президент Макронро “террористи калонтарини ҷаҳон” номиданд. Макрон гуфт, кишвар “барои арзишҳо, салиқаи мо ба озодӣ ва тавони мо барои таъмини озодии мазҳаб дар ин сарзамин” мавриди ҳамла қарор гирифт. Макрон, дар ҳоле, ки дар беруни калисои мавриди ҳамла қарор гирифтаи шаҳри Нис сӯҳбат мекард, гуфт, “мо ҳеҷ заминае намедиҳем” ва аз мардумаш хост, ки “ба андешаҳо дар бораи ихтилофҳо дода нашаванд”.

Адахон Мадумаров мехоҳад номзад ба интихоботи президентии Қирғизистон шавад

Адахон Мадумаров, раиси ҳизби оппозитсионии “Бутун Қирғизистон”

Адахон Мадумаров, раиси ҳизби оппозитсионии “Бутун Қирғизистон” гуфт, ки номзадиашро ба интихоботи президентии кишвар пешбарӣ хоҳад кард. Дар як нишасти матбуотии рӯзи 30-юми октябр Мадумаров таъкид кард, ки номзадии ӯро на ҳизбаш, балки худаш пешбарӣ мекунад. “Ман аз роҳи худпешбарӣ иштирок хоҳам кард. Президенти Қирғизистон бояд номзадии ҳама қишрҳои аҳолӣ, гурӯҳҳои сиёсӣ ва иҷтимоии ҷомеаро намояндагӣ кунад. Ин чиз барои ҳифзи мустақилият аз гурӯҳҳои дигари сиёсӣ мусоидат мекунад”, гуфт Мадумаров. Ӯ гуфт, ки аризаашро дар ҳамин рӯз ба Комиссиюни марказии интихоботҳо медиҳад.

Рӯзи 24-уми октябр ин коммиссиюн қарор кард, ки интихоботи президентии Қирғизистон рӯзи 10-уми январи соли 2021 баргузор мешавад. Аввал шуда нияти ширкат дар интихоботро Содир Ҷабборов, нахуствазир ва иҷрокунандаи вазифаи президенти Қирғизистон баён кард.

Қонуни амалкунанда ба иҷрокунандаи муваққатии вазифаи президент ҳақ намедиҳад, ки дар интихобот номзад шавад, вале Ҷабборов гуфт, ки омода аст як моҳ пеш аз интихобот аз мақомаш канор биравад.

Дар Қирғизистон баъди интихоботи баҳсбарангези 4-уми октябр эътирозу беназмиҳо сар зад ва натиҷаҳои интихоботи парлумонӣ бекор шуд. Ҷабборов, ки бо кӯмаки тарафдорон аз зиндон озод гардид, дар овоздиҳии парлумон нахуствазир интихоб шуд ва президент Сооронбой Ҷеенбеков аз мақомаш канор рафт. Ҳамакнун дар Қирғизистон бояд ду интихоботи нав баргузор шавад, вале дар масъалаи таърихи баргузории интихоботи парлумонӣ ҳанӯз баҳсу баррасиҳо идома дорад.

Тафовути омори фавтидаҳо аз COVID-19 дар таҳқиқоти журналистони рус

Акс аз крематорий. Ҳинд, Деҳлии Нав. Корманди идораи сӯзондани ҷаноза дар назди як ҷасади қурбонии СOVID-19 истодааст

Вебсайти "Фонтанка" бо такя ба санадҳои як крематорий – идораи масъули сӯзондани ҷаноза дар шаҳри Санкт-Петербург менависад, ки аз 14-уми апрел то 27-уми октябр дар ин ҷо 5868 ҷасади афроди даргузашта аз СOVID-19-ро оташ задаанд. Бар асоси омори расмии ситоди фавқулодда, то ин рӯз дар шаҳри Санкт-Петербург шумори фавтидаҳо бар асари коронавирус 3674 нафар ҳисоб шудааст ва тафовут дар омор 2194 нафарро ташкил медиҳад.

Вебсайти хабарӣ бо такя ба дафтари қайди нобудкунии ҷасадҳо мегӯяд, ки омори сӯзондани ҷасадҳои фавтидаҳо аз СOVID-19 ба таври ҷудогона сабт шудааст.

Вебсайти "Медиазона" бо такя ба иттилои расмӣ мегӯяд, ки дар фосилаи аз 14-уми апрел то 27-уми октябр дар шаҳри Санкт-Петербург аз коронавирус 5885 нафар ҷон додаанд.

Дар Русия маркази федеролии мубориза бо коронавирус мегӯяд, ки то ҳол беш аз 27 ҳазор нафар аз ин беморӣ ҷон додаанд. Ба ин омор танҳо онҳое ворид шудаанд, ки сирояти коронавирусӣ ҳамчун манбаи аслии марги инсон то колбадшикофии ҷасадҳо сабт шудааст. Вале омори бар асари COVID-19 даргузаштани инсон баъди колбадшикофӣ болотар аст. Санҷидани сабаби марги инсон аз роҳи колбадшикофӣ як қоидаи ҳатмӣ дар беморхонаҳои Русия мебошад ва Росстат ё идораи омори Русия ин оморро хеле болотар – 45,662 нафар арзёбӣ кардааст.

ВКД Тотористон дар бораи кушта шудани ҳамлагари 16-солаи полис хабар дод

Идораи полисе дар шаҳри Кукмори Тотористон

Вазорати умури дохилии Тотористон як навраси 16-соларо, ки ба қавли ин сохтор, ба як идораи полиси шаҳри ивоқеъ дар марзи Тотористону вилояти Киров ҳамла кард, тир холӣ намуд. Вазорат дар изҳороте гуфт, ки ҳодиса соати 00:30-и шаби 30-юми октябр рух дод. Наврас гӯё ба сӯи таваққуфгоҳи мошинҳои идораи полиси ВКД-и Тотористон дар ноҳияи Кукмор ду шишаи дорои “эҳтимолан маҳлули тарканда” партофт. “Вақте ходимони полис ба хомӯш кардани оташ шурӯъ карданд, ба самти онҳо як шишаи дигар партофта шуд”. Ходимони полис наврасро таъқиб карданд ва гӯё ӯ яке аз онҳоро бо корд захмӣ кардааст. Дар паи ин полис ба сӯи ӯ тир холӣ кард.

Дар ҳамин ҳол, телеграм-канали Mash хабар медиҳад, ки гӯё ҷавони кушташуда пеш аз маргаш паёме гузошта ҳангоми ҳамла суханҳои “Аллоҳу Акбар!”-ро ба забон овардааст. Радио Свобода мегӯяд, ки парвандаи ҷиноии бозшуда дар Кумитаи тафтишоти Русия ин қазияро ҳамчун “сӯиқасд ба амали террористӣ” арзёбӣ мекунад.

Озариҳо ҷасадҳои низомиёни арманиро таслим карданд

Степанакерт, 28-уми октябр

Озарбойҷон ба ҷониби Арманистон ҷасади 29 низомии куштшуда дар ҷангҳои Қаробоғи Кӯҳиро таслим кард. Дар паи мавҷи нави задухӯрдҳо дар ин минтақаи ҷудоиталаб талафоти инсонӣ афзоиш меёбад. Интиқоли ҷасадҳоро ҳам Боку ва ҳам Ереван тасдиқ карда баробар бо ин бори дигар ҳамдигарро дар нақзи оташбаси бо миёнҷигии ИМА ҳосилшуда гунаҳгор карданд. Шушан Степанян, сухангӯи вазорати дифои Арманистон гуфт, ки интиқоли ҷасадҳо бо миёнҷигии Федератсияи Русия ва бо кӯмаки кормандони САҲА ва Кумитаи байналмилалии Салиби Сурх имконпазир шуд. Степанян гуфт, ки Арманистон омодагиашро барои таслими ҷасади низомиёни озарбойҷонӣ дар қаламрави Артсах (исми армании Қаробоғи Кӯҳӣ) баён мекунад.

Ҳикмат Ҳоҷиев, як ёвари президенти Озарбойҷон Илҳом Алиев ба журналистони хориҷӣ гуфт, ки таслими ҷасадҳо бо ташаббуси Боку ва ёрии Русия имконпазир шуд.

Беларус марзашро бо ҳама ҳамсояҳо, ҷуз Русия, баст.

28-уми октябр, гузаргоҳи марзии Новая Хута бо Литва баста аст

Александр Лукашенко, ки баъди дуюним моҳ эътирозҳои мардумӣ алайҳи натиҷаҳои баҳсбарангези интихоботи президентӣ дар фикри хатми ин ҳама намоишҳову раҳпаймоиҳо аст, ахиран ба ҷуз Русия, марзҳои Беларусро бо дигар ҳамсояҳояш баст. Кумитаи марзбонии Беларус рӯзи 29-уми октябр гуфт, ки бастани марзҳо бо Латвия, Литва, Полша ва Украина ба “вазъи эпидемиологӣ” ва паҳншавии пандемияи коронавирус бастагӣ дорад. Ин изҳорот дар ҳоле нашр мешавад, ки мақомоти Беларус давоми моҳҳои зиёд хатари пандемияро кам нишон дода иддао кардаанд, ки кишварҳои ҳамсоя дар фикри бесубот кардани ин кишвар мебошанд. Таҳаввулоти ахир, аз ҷумла, ба мақомҳои калидӣ дар сохторҳои амниятӣ таъйин кардани афроди дигари наздик ба Лукашенко, бахусус дар шаҳри Минск, ки макони баргузории аксар эътирозҳои серҷамъияти мухолифон мебошад, дар бораи тақвияти тадбирҳои амниятӣ гувоҳӣ медиҳад. Кумитаи марзбонӣ гуфт, ки танҳо шаҳрвандони Беларус ва мошинҳои борбар иҷозаи ворид шудан ба хоки Беларусро доранд. Рустамас Лиубайевас, раҳбари идораи марзбонии Литва гуфт, ки мошинҳои ба самти Беларус ҳаракаткунанда аз ҳақи вуруд маҳрум шуданд ва ба қавли ӯ, тағйирот дар марз бидуни огаҳии пешакӣ сурат гирифт.

Беларус марзашро бо ҳама ҳамсояҳо, ҷуз Русия, баст.

28-уми октябр, гузаргоҳи марзии Новая Хута бо Литва баста аст

Александр Лукашенко, ки баъди дуюним моҳ эътирозҳои мардумӣ алайҳи натиҷаҳои баҳсбарангези интихоботи президентӣ дар фикри хатми ин ҳама намоишҳову раҳпаймоиҳо аст, ахиран ба ҷуз Русия, марзҳои Беларусро бо дигар ҳамсояҳояш баст. Кумитаи марзбонии Беларус рӯзи 29-уми октябр гуфт, ки бастани марзҳо бо Латвия, Литва, Полша ва Украина ба “вазъи эпидемиологӣ” ва паҳншавии пандемияи коронавирус бастагӣ дорад. Ин изҳорот дар ҳоле нашр мешавад, ки мақомоти Беларус давоми моҳҳои зиёд хатари пандемияро кам нишон дода иддао кардаанд, ки кишварҳои ҳамсоя дар фикри бесубот кардани ин кишвар мебошанд. Таҳаввулоти ахир, аз ҷумла, ба мақомҳои калидӣ дар сохторҳои амниятӣ таъйин кардани афроди дигари наздик ба Лукашенко, бахусус дар шаҳри Минск, ки макони баргузории аксар эътирозҳои серҷамъияти мухолифон мебошад, дар бораи тақвияти тадбирҳои амниятӣ гувоҳӣ медиҳад. Кумитаи марзбонӣ гуфт, ки танҳо шаҳрвандони Беларус ва мошинҳои борбар иҷозаи ворид шудан ба хоки Беларусро доранд. Рустамас Лиубайевас, раҳбари идораи марзбонии Литва гуфт, ки мошинҳои ба самти Беларус ҳаракаткунанда аз ҳақи вуруд маҳрум шуданд ва ба қавли ӯ, тағйирот дар марз бидуни огаҳии пешакӣ сурат гирифт.

Рекорди нави олудашавиҳо дар ИМА

Дар ИМА дар остонаи интихоботи президентии 3-юми ноябр бо сабаби пандемияи коронавирус овоздиҳӣ чанд рӯз пеш шурӯъ шудааст. Мардум дар навбати овоздиҳӣ

Дар ИМА рекорди нави олудашавӣ ба коронавирус дар як рӯз ба қайд гирифта шудааст. Гурӯҳи муқобила бо COVID-19 дар Кохи Сафед баъди эълони ин ки дар 24 соати гузашта дар ИМА беш аз 91 ҳазор ҳодисаи нави олудашавӣ ба қайд гирифта шуд, гуфт, кишвар дар баробари хатари “эҳёи муҷаддади" вируси нав қарор дорад. Рекорди қаблии якрӯза, ки 23-юми октябр сабт шуда буд, 84,169 ҳодисаро ташкил дод. Аз замони шурӯи пандемия дар ИМА то ҳол 8,9 миллион сокини кишвар ба вируси нав олуда шуда, 228 ҳазор нафар ҷон додаанд. CNN бо такя ба гузоришҳое, ки ба ҳукумат мерасанд, гуфт, мақомоти муқобилакунанда бо COVID-19 ба раҳбарияти ИМА машварат доданд, ки бояд муқаррароти сахту сангини маҳдудкунанда ҷорӣ ва аз паҳншавии вирус ҷилавгирӣ шавад. Дар сӯҳбат бо Reuters як мақоми беҳдошт гуфтааст, ки “дар ИМА вазъият хеле ва хеле бад аст”.

Дар Аврупо, аз ҷумла Фаронса мақомот маҳдудиятҳоро сахттар карданд ва Олмон гуфт, ки аз 2-юми ноябр карантин ҷорӣ мекунад.

Дар Фаронса полис ба ҳолати омодабош оварда шудааст

29-уми октябр баъди ҳамла ба калисои "Нотрдам"-и шаҳри Нис, президент Эммануэл Макрон аз маҳалли ҳодиса дидан кард

Баъди куштори се нафар дар як калисои шаҳри Нис рӯзи 30-юми октябр ходимони амниятӣ дар Фаронса ба ҳолати омодабош оварда шудаанд. Президент Эммануэл Макрон ҳодисаи рӯзи 29-уми октябрро “як ҳамлаи террористи исломгаро” номид. Нахуствазири Фаронса Жан Кастекс ҳолати омодабош дар кишварро боло бурд ва ходимони полис атрофи калисои Нисро, ки рӯзе пеш мавриди ҳамла қарор гирифт, иҳота карданд. Вазорати хориҷаи Бразилия гуфт, ки яке аз қурбониҳо – модари 44-солаи се кӯдак буд ва дар Фаронса зиндагӣ мекард. Маълум нест, ки оё ӯ инчунин шаҳрвандии Фаронсаро дошт ё на. Ин зан, ки чанд зарбаи корд хӯрд, бо ҷароҳатҳои сангин тавонист ба наздиктарин бар фирор кунад, вале баъдан ҷон дод. Дар фоҷеае, ки тахминан ним соат давом кард, ҳамлагар ба зани бразилиягӣ чанд дафъа корд зада, як зани 60-солаи дигарро гардан бурид - ба қавли мақомоти Фаронса -"дар асл ӯро бесар кард". Қурбонии сеюм як корманди 55-солаи калисо буд, ки зоҳиран дар паи ҳамла бо корд ба ноҳияи гарданаш ҷон дод. Мақомоти Фаронса гуфтанд, ҳамлагар, ки аз ҷониби полис бо зарби тири туфанг кушта шуд, пеш аз маргаш “Аллоҳу Акбар” гуфтааст.

Паёмҳои мутафовити Доналд Трамп ва Ҷо Байден ба овоздиҳандагон

Пурсишҳои афкори умум маҳбубияти Байденро назар ба Трамп як каме болотар нишон медиҳанд

Президенти ИМА Доналд Трамп ва номзад аз ҳизби демократ Ҷо Байден дар маъракаҳои интихоботӣ, ки рӯзи 29-уми октябр дар Флорида доир шуд дар бораи пандемияи короновирус паёмҳои комилан мухолифи ҳам доданд. Ҳазорон нафар аз ҷонибдорони Доналд Трамп дар шаҳри Тампаи Флорида дар маъракаи тарғиботӣ, ки дар фазои бозе ташкил шуда буд, ҷамъ омаданд ва аксари онҳо ниқоб надоштанд. Чанд соат баъд Байден ҳам дар ин шаҳр маъракаи пешазинтихоботии худро доир кард, ки дар он одамон аз дохил ва ё назди дари мошинҳои худ истода ширкат карданд ва бастани ниқоб аз онҳо тақозо мешуд. Маъракаҳои ду номзад дар Флорида 5 рӯз қабл аз интихоботи президентӣ на танҳо ду усули мутавофити маъракаҳои тарғиботиро аён кард, балки муҳим будани аёлати Флоридаро низ ба намоиш гузошт, ки ҳарду номзад онро барои соҳиб шудан ба курсӣ дар Қасри сафед фавқулодда муҳим медонанд.

ВКД: "Як сокини Ваҳдат ду мошини борбарро дар ҳолати мастӣ оташ задааст"

Акс аз бойгонӣ.

Як сокини шаҳри Ваҳдат ба иттиҳоми ба оташ кашидани ду автомашинаи борбар боздошт шудааст. Дафтари матбуоти Вазорати умури дохилии Тоҷикистон рӯзи 30-юми октябр хабар дод, ки ҳодиса шаби гузашта дар ҷамоати деҳоти Раҷаб Исмоилов рух додааст.

Ба иттилои манбаъ, Ҳамроҳиддин Раҷабови 50-сола дар ҳолати мастӣ бинобар 9 моҳ напардохтани маблағи таваққуфгоҳи "Пахта", ду мошини борбари тамғаи "Дулан" ва "Мерседес"-и Илҳом Зеваровро ба оташ кашидааст. Манбаъ мегӯяд, ки ба ин ду мошини борбар зарари техникӣ расидааст.

Ҳамроҳиддин Раҷабов аз сӯи маъмурони пулис боздошт шуда ва ҳамакнун тафтишот идома дорад.

Назари Ҳамроҳиддин Раҷабов ва наздиконаш дар робита ба ин ҳодиса то ба ҳол маълум нест.

Қирғизистон аз Қазоқистон хост, кӯмаки моливу техникӣ расонад

Парчамҳои Қазоқистон ва Қирғизистон.

Вазири корҳои хориҷии Қирғизистон Руслан Казакбоев аз Қазоқистон дархост кард, ки вазорати тандурустии Қирғизистонро бо дору ва васоили муҳофизатӣ таъмин кунад.

Дар ин бора аз вазорати корҳои хориҷии Қирғизистон хабар доданд.

Руслан Казакбоев рӯзи 29 октябр бо ҳамтои қазоқи худ Мухтор Тлеубердӣ дар шаҳри Нурсултони Қазоқистон мулоқот кард. Ду вазир дар бораи ҳамкориҳои сиёсӣ, иқтисодиву тиҷорӣ, фарҳангиву башарӣ ва бахши муҳоҷират гуфтугӯ карданд. Вазирон ҳамчунин муборизаи муштарак зидди вабои коронавирусро баррасӣ карданд.

"Бо назардошти вазъи иҷтимоиву иқтисодии кишвар Руслан Казакбоев аз ҷониби Қазоқистон хост, ки ба Қирғизистон кӯмаки моливу техникӣ расонад", - омадааст дар хабари вазорати корҳои хориҷии Қирғизистон.

Дар Намангон парчами Фаронсаро аз назди як меҳмонхона канданд

Меҳмонхонаи "Grand Sherdor" дар Намангон.

Дар назди меҳмонсарои "Grand Sherdor"-и шаҳри Намангони Узбекистон дар эътироз ба изҳороти президент Эммануэл Макрон парчами Фаронсаро даронданд.

Фаъоли ҷамъиятии Намангон, ки дар ин бора дар шабакаи иҷтимоии Фейсбук хабар дод, навишт, "парчами Фаронса ба нишони эътироз канда шуд ва барои парчами ин кишвар дар шаҳри мо ҷой нест".

Ахиран дар шабакаҳои иҷтимоӣ видеое паҳн шуд, ки дар он марде бо номи Муҳаммад Икром аз шаҳри Намангон дар болои расми президенти Фаронса ва ҳамсараш рост истодааст.

Намояндагони вазоратҳои умури дохиливу хориҷии Узбекистон ва маъмурияти Намангон ин қазияро шарҳ надоданд.

Ин амалҳо дар ҳоле сурат мегирад, ки ҳудуди 10 рӯз қабл Самуэл Пати, устоди 47-солаи фанни таърих ва ҷуғрофия дар Фаронса, баъд аз намоиши карикатура ё тасвирҳои танзомези пайғомбар Муҳаммад ба шогирдонаш, дар канори шаҳри Порис кушта шуд. Мақомоти Фаронса рӯзи 17-уми октябр гуфтанд, ки ҳамлавар ҷавони 18-солаи чечен аз шаҳри Маскав аст ва ҳангоми амалиёт ба ҳалокат расид.

Ин масъала вокунишҳои ҷаҳониро дар пай дошт. Раиси ҷумҳури Фаронса дар Твиттер рӯзи 25-уми октябр навишт, "мо ҳаргиз таслим нахоҳем шуд. Мо суханони тавҳиномезро қабул надорем ва аз баҳси мантиқӣ дифоъ мекунем".

Изҳороти раиси ҷумҳури Фаронса дар шуморе аз кишварҳои исломӣ бо вокунишҳои тунд рӯбарӯ шуд. Покистон рӯзи 26-уми октябр аз "маъракаи исломситезӣ" дар Аврупо эътироз кард, Эрон Порисро ба рӯған андохтан ба оташи "экстремизм" муттаҳам намуд ва раиси ҷумҳури Туркия ба таҳрими маҳсулоти фаронсавӣ даъват кард.

Белорус марзҳояшро бо Латвия, Литва, Лаҳистон ва Украина баст

Марзи Белорус бо Литва.

Белорус бидуни огоҳии қаблӣ марзашро бо Латвия, Литва, Лаҳистон ва Украина баст.

Дар Кумитаи давлатии марзбонии Белорус баста шудани марзҳоро ба вабои коронавирус рабт доданд. Як рӯз пеш аз баста шудани марзҳо Александр Лукашенко гуфт, артиши Белорус омода аст, дар сурати ҳамла аз ин кишварҳо онро пас гардонад.

Расонаҳо менависанд, дар гузаргоҳҳо бо марзҳои кишварҳои зикршуда ҷамъшавии мошинҳо мушоҳида мешавад. Белорусиҳо шикоят доранд, ки наметавонанд, ба кишварашрон баргарданд. Айни замон танҳо ба мошинҳои дипломатӣ ва борбар иҷозаи вуруд дода мешавад. Ин ҳам дар ҳолест, ки фурудгоҳи шаҳри Минск бидуни маҳдудият фаъолият дорад.

Рӯзи панҷшанбе Александр Лукашенко аз суҳбаташ бо котиби давлатии ИМА Майк Помпео хабар дод. "Ман ӯро огоҳ кардам: агар аз ҷониби Лаҳистон, Литва ё Украина ҳамлае сурат гирад, мо посух хоҳем дод". Ҳамон рӯз Лукашенко дастур дод, ки ҳифзи марз бо ин се кишвар пурзур карда шавад.

Муҳиддин Кабирӣ карикатураҳо ва ҳамлаҳо дар Фаронсаро маҳкум кард

Муҳиддин Кабирӣ, раиси Паймони миллии Тоҷикистон дар Аврупо

Муҳиддин Кабирӣ, раиси Паймони миллии Тоҷикистон, як эътилофи созмонҳои мухолиф, ки фаъолияташ дар Тоҷикистон мамнуъст, рӯзи 29-уми октябр дар як паёми видеоӣ куштори омӯзгори фаронсавиро барои нишон додани карикатураҳои масхараомези зидди паёмбари ислом ҳангоми дарс дар мактаб, ҳамлаи рӯзи панҷшанбе ба калисои Нотр-Дами шаҳри Ниси Фаронса ва қатли се нафари дигарро дар ин ҷо маҳкум кард ва таҳқиру тавҳини арзишҳои диниро як амали ғайри қобили қабули номид. Вай густариши ҳамлаҳои лафзӣ ва хушунатҳои ахирро нишонаи ба ду даста тақсим шудани ҷаҳон дар робита ба карикатураҳо донист ва гуфт, “вақти он расидааст, ки марзҳои озодии баён ва таҳқири арзишҳои муқаддаси инсонҳо муайян карда шаванд.”

Кабирӣ афзуд, ки ӯ ва пайравонаш дар ҳизби ҳоло дар Тоҷикистон мамнуи наҳзати исломӣ ҳанӯз дар соли 2014 мунташир шудани карикатураҳои паёмбари исломро маҳкум карда буд. Вай гуфт, таҳқири муқаддасоти мазҳабӣ набояд озодии баён дониста шавад.

Рӯзи ҷумъаи 16-уми октябр Самюэл Патӣ, устоди 47-солаи таърих ва ҷуғрофия дар Фаронса, баъд аз намоиш додани карикатура ё тасвирҳои танзомези пайёмбар Муҳаммад ба шогирдонаш, дар канори шаҳри Порис кушта шуд. Мақомоти Фаронса рӯзи 17-уми октябр гуфтанд, ки ҳамлавар ҷавони 18-солаи чечен аз шаҳри Маскав аст ва ҳангоми амалиёти боздошт ба ҳалокат расидааст.

Президенти Фаронса Эммануэл Макрон омӯзгор Патиро "қаҳрамони сокит" ва куштори ӯро "ҳамлаи террористии исломӣ" номид. Вай сокинони кишварашро ба ҳифзи арзишҳои дунявӣ ва ҳимояти Фаронса аз "исломи ифротӣ" даъват кард. Ин изҳорот дар як қатор кишварҳои мусулмон вокунишҳоеро ба миён овард ва сабаби ҳамлаи лафзии президенти Туркия ба Макрон шуд.

23-юми октябр карикатураҳои чанд сол пеш нашркардаи маҷаллаи “Шарли Ҳебдо” дар бинои ҳукумати Фаронса намоиш дода шуданд ва ин ҳодиса мояи хашми ҷаҳони ислом шуд. Дар посух ба пуштибонии Макрон аз карикатураҳо, молу маҳсулоти сохти Фаронса дар бархе аз кишварҳои мусалмоннишини ҷаҳони Араб таҳрим шуданд. Макрон посух дод, ки “Фаронса ҳеҷ гоҳ аз ин карикатураҳо даст намекашад”.

Сайидмукаррам Абдулқодирзода, раиси Шӯрои уламои Тоҷикистон низ гуфт, ки куштори омӯзгори фаронсавӣ аз ҷониби як ҷавони 18-солаи мусулмон қобили қабул нест, вале ҳамзамон рафтори омӯзгор, ки ба шогирдон аксҳои тавҳиномези паёмбари исломро нишон дод, маҳкум мекунад.

Вай афзуд: “Як инсон ҳам ҳақ надорад, ки пешвои тақрибан ду миллиард инсонро, ки паёмбарашонро аз падару модар, ҳатто аз ҷонашон зиёдтар дӯст медоранд, дашному тавҳину таҳқир ва масхара кунад. Ин кор оқибати баде дорад, чӣ ҳоло ва чӣ дар ояндаи наздик, чӣ дар гузаштаҳо”.

Бо гузашти ду ҳафта аз қатли омӯзгори фаронсавӣ баҳси ин мавзӯъ кам нашудааст. Дар пайи ҳамлаҳои лафзӣ, муносибати Туркия ва Фаронса, ду ҳампаймони созмони низомии НАТО ба сардӣ гароид.

Маҳмудҷон Дадобоев дар 51-солагӣ даргузашт

Маҳмудҷон Дадобоев

Маҳмудҷон Дадобоев, рӯзноманигори шинохтаи тоҷик, рӯзи 29-уми октябр дар 51-солагӣ даргузашт. Сабаби расмии марги ӯ ҳанӯз эълон нашудааст, вале чанде аз дӯстонаш дар шабакаҳои иҷтимоӣ иллати фавти ӯро ба бемории ҳамагир рабт доданд.

Мӯъминҷон Дадобоев, бародари Маҳмудҷон Дадобоев дар сӯҳбати видеоӣ бо хабарнигори Радиои Озодӣ гуфт, ки "бародараш рӯзи ҷумъаи ҳафтаи гузашта бо таби баланд ва нишонаҳои коронавирус дар Бемористони сироятии шаҳри Хуҷанд бистарӣ гардида буд. Ду рӯзи охир ҳолаш бад мешавад ва рӯзи гузашта бо нафастангии шадид дар беморхона вафот мекунад. Ҳоло ҳамсараш Муяссарахон Дадобоева низ бо нишонаҳои ин беморӣ дар бемористон аст".

Дар назар аст, ки ҷасади Маҳмудҷон Дадобоевро мустақиман аз бемористон ба оромгоҳи Муродбахши кӯчаи Пахтакори шаҳри Хуҷанд бурда ва ба хок супоранд.

Маҳмудҷон Дадобоев моҳи ноябри соли 1968 дар шаҳри Хуҷанд таваллуд шудааст. Аз охири солҳои 90-ум то 2003 мудири ширкати телевизион ва радиои Симои мустақили якум ва як муддат сардабири нашрияи "Суғд" буд.

Ҳамчун мудири кулли ширкати телевизионии "Ҷаҳоноро" ва намояндаи Анҷумани миллии расонаҳои мустақили Тоҷикистон дар вилояти Суғд кор кардааст. Сухангӯи шаҳрдори Хуҷанд низ буд, вале соли 2017 аз ин мақом бо хоҳиши худ канор рафт. Солҳои ахир дар давраҳои омӯзишӣ ба хабарнигорон шеваҳои нави бозтоби мавзуъҳоро дарс медод.

Илҳоми Ҷамолиён, раиси дафтари Иттиҳоди журналистони Тоҷикистон дар Суғд шоми 29-уми октябр дар Фейсбук навишт, "ӯ аз ҷумлаи пешоҳангони рушди расонаҳои мустақил, бахусус расонаҳои электронии мустақили Тоҷикистон ва аз ҷумлаи ТОП-менеҷерони муваффақе ба шумор мерафт ва дар ин самт соҳибмактаб буд."

Дар оғози моҳи октябри имсол хабарнигори дигари шинохта Мавлуда Рофиева дар 56-солагӣ даргузашт. Ӯ пештар бо нишонаҳои "илтиҳоби шуш" дар шифохонаи вилоятии Суғд бистарӣ шуда буд.

ИМА дар Аврупо мушакҳои миёна ва дурпарвоз ҷойгир мекунад

Мушовири президенти Амрико дар умури амнияти миллӣ Роберт О'Брайен

ИМА омодааст, дар сурати зарурӣ барои боз доштани Русия дар Аврупо мушакҳои мофавқи садоии кутоҳ ва дурпарвозро ҷойгир кунад. Дар ин бора мушовири президенти Амрико дар умури амнияти миллӣ Роберт О'Брайен иттилоъ дод. Тавре "Садои Амрико" гузориш медиҳад, О'Брайен афзуда, ки ИМА омодааст, барои боз доштани Чин дар минтақаи Уқёнуси Орому Ҳинд низ ин гуна иқдомро рӯи даст гирад. Пештар Пентагон хабар дод, ки ИМА мушакҳои мофавқи садоии болдорро коркард дорад, ки тавассути ҳавопаймоҳои нерӯҳои дарёии ин кишвар метавонанд партоб шаванд. Интизор меравад, мушакҳои мазкур то охири соли 2028 сохта шаванд. Чанде пеш президент Владимир Путин гуфт, Русия омодааст, аз ҷойгиркунии мушакҳои 9М729 дар қисми аврупоияш худдорӣ кунад. Ба гуфтаи Вашингтон, хусусияти мушаки мазкур талаботи созишномаи ИМА ва Русия дар бораи мушакҳои кутоҳу дурпарвозро нақз мекунад. Ду кишвар соли 1987 созиш карда буданд, ки муҷтамаъҳои мушаки кутоҳу миёнапарвози худро маҳв хоҳанд кард ва мушаки 9М729 сабаби асосии бурунрафти Амрико аз созишнома шуд..

Додгоҳи Нурсултон ду касро барои "тазоҳуроти ғайриқонунӣ" ҳабс кард

Эътирози фаъоли маданӣ Аскар Каирбек зидди нуфузи Чин дар Қазоқистон, Нурсултон, 18 августи соли 2019

Додгоҳе дар шаҳри Нурсултони Қазоқистон 28 октябр фаъоли маданӣ Аскар Каирбек 15 рӯз ва модари серфарзанд Фирӯза Ордабековаро 10 рӯз ҳабси маъмурӣ кард. Ин ҳар ду дар даъват ба "тазоҳуроти ғайриқонунӣ" айбдор шуданд. Маъмурони пулиси пойтахти Қазоқистон 27 декабр манзили зисти Каирбекро бозҷӯӣ карда, ӯро бо худ ба шуъба бурданд. Ба огаҳии додгоҳи Нурсултон, Каирбек дар нақзи "тартиби ташкили ҷамъомадҳои осоишта" айбдор дониста шуд.

Каирбеки 43-сола борҳо зидди қарорҳои сиёсии ҳукумати Қазоқистон баромад ва озодии маҳбусони сиёсиро талаб карда буд. Ӯ моҳи январ бо ҷурми "итоат накардан ба пулис" 5 рӯз ҳабс шуда буд.

Фирӯза Ордабековаро кормандони пулис шаби 27 октябр бо гумони "даъват ба тазоҳуроти ғайриқонунӣ" тавассути паёмакрасони WhatsApp, боздошт карданд ва додгоҳи Нурсултон вайро 10 рӯз ҳабс намуд. Ордабекова 23 сентябри соли равон ҳам бо гумони "майдаавбошӣ" панҷ рӯз ҳабс шуда буд.

Ҳомиёни ҳуқуқ Бақидҷон Торегожин ва Галим Агелеуов тасмим доранд, 31 октябр бо талаби ислоҳоти сиёсӣ ва қатъи таъқибҳои сиёсӣ дар шаҳри Алмато тазоҳурот баргузор кунанд. Ҳарчанд мақомоти Алмато ба баргузории он аллакай иҷозат додаанд, вале ҳомиёни ҳуқуқ мегӯянд, дар арафаи ин тазоҳурот фишор ба фаъолони маданӣ афзоиш ёфтааст.

Роҳи ҳавоии Душанбе-Тошканд то соли оянда боз намешавад

Манзарае аз фурудгоҳи байнулмилалии Тошканд

Мақомоти расмии Тоҷикистону Узбекистон ҳанӯз санаи дақиқи барқарории парвозҳо байни Тошканду Душанберо муайян накардаанд. Миёнаи моҳи октябр ҷонибҳо барқарории парвозҳоро аз 1 ноябр баррасӣ карда буданд, аммо баъдтар ин сана ба 1 декабр кӯчид. Ҳоло санаи нав - аз 1 январи соли 2021 - мавриди баррасӣ аст. Расонаҳо менависанд, ноустувории вазъи беҳдоштии ду кишвар ба далели паҳншавии вабои коронавирус имкон намедиҳад, ки дар мавриди барқарории парвозҳо тасмими қатъӣ қабул шавад. Дар ҳамин ҳол, Оҷонси авиатсияи шаҳрвандии Тоҷикистон ба барқарории парвозҳо бо Тошканд иҷозат додааст, аммо санаи парвози нахустин ҳамоно норушан аст. Парвозҳо байни Узбекистон ва Тоҷикистон 16 марти соли ҷорӣ дар робита ба вабои коронавирус қатъ шуданд.

Президенти Туркия маҷаллаи "Charlie Hebdo"-ро ба додгоҳ кашид

Президенти Туркия Раҷаб Эрдуғон

Президенти Туркия Раҷаб Эрдуғон зидди маҷаллаи фаронсавии "Charlie Hebdo" барои нашри карикатураи худ ба яке аз додгоҳҳои кишвараш шикоят бурдааст.

Ба навиштаи хабаргузории “Анадолу”, вакили дифои Эрдуғон гуфтааст, маводи маҷалла туҳмат буда, ҷавобгарии ҷиноӣ дорад ва ба озодии баён марбут нест”. Ба ҷуз ин, Додситонҳои турк бо банди таҳқири президент парванда боз кардаанд.

Charlie Hebdo карикатураи Эрдуғонро рӯзи чоршанбе нашр кард. Президенти Туркия дар он қадаҳе дар даст рӯи курсие нишаста, домани бонуи ҳиҷобпӯшеро боло мекунад ва мегӯяд, "Оҳ паёмбар!". Дар шарҳи карикатура навишта шудааст, "Эрдуғон дар ҳаёти шахсия ишвагар аст".

Маводи "Charlie Hebdo" дар пасманзари сард шудани муносибатҳои Анқара ва Порис баъди куштори омӯзгор Самюэл Патӣ нашр шуд. Ин омӯзгор ҳангоми баррасии масъалаи озодии баён дар дарс карикатураҳои паёмбар Муҳаммадро нашр кард ва 16 октябр кушта шуд.

Президенти Фаронса Эммануэл Макрон куштори омӯзгорро "ҳамлаи террористии исломӣ" номид ва гуфт, Ислом дар вазъи буҳронӣ қарор дорад. Ин гуфтаҳои ӯ нигарониҳоеро дар кишварҳои мусулмоннишин ба бор оварда, Эрдуғон вайро "бемори равонӣ" номид. Дар натиҷа Порис сафири худро аз Анқара бозхонд кард.

Бародари домоди Мирзиёв дар ВКД Узбекистон мақоми нав гирифт

Улуғбек Турсунов дар ҷаласаи ВКД Узбекистон

Улуғбек Турсунов, сарҳанги 53-сола муовини сардори Раёсати мубориза бо гардиши ғайриқонунии маводи мухаддири вазорати корҳои дохилии Узбекистон таъйин шуд. Улуғбек Турсунов бародари Ойбек Турсунов, домоди калонии президенти Узбекистон Шавкат Мирзиёев аст. Рӯзноманигорон менависанд, номи Турсунов дар садҳо ҷанҷоли марбут ба ситонидани хонаҳои сокинон бо баҳонаи "таъсиси фоҳишахона" зикр шудааст. Сомонаи AsiaTerra навиштааст, Турсунов дар ғасби тиҷоратҳо, қитъаҳои замин ва фишор овардан ба тоҷирон даст дорад.

Фаронса, Олмон, Ҳинд ва кишварҳои дигар карантини нав эълон карданд

Эълони маҳдудиятҳои нав барои коҳиши гирифторӣ ба COVID-19 дар Фаронса

Дар Фаронса аз 29 октябр гирифта, тарабхона, бар, қаҳвахона ва дигар муассисаҳои тиҷоратӣ баста буда, ҳукумат барои пешгирӣ аз сирояти бештари коронавируси нав маҳдудиятҳои саросарии гаштугузор ва фаъолиятҳои иқтисодиро эълон кард. Эммануэл Макрон, раиси ҷумҳури Фаронса рӯзи 28-уми октябр гуфт, ки эълони маҳдудиятҳо зарур буд, чун шифохонаҳои кишвар зери фишори фавқулодае мондаанд. Рӯзона дар Фаронса даҳҳо ҳазор нафар ба СОVID-19 мубтало мешаванд. Ба қавли Макрон, “мавҷи нави сирояти коронавирус, ки зоҳиран аз мавҷи аввалаш мушкилу маргбортар мешавад”, кишварашро ба қавле “зӯр овардааст.” Чанд соат пештар аз изҳороти раиси ҷумҳури Фаронса, Ангела Меркел, садри аъзами Олмон низ эълон кард, аз рӯзи 2-уми ноябр дар кишвараш дигарбора гаштугузор ва фаъолиятҳои иқтисодӣ маҳдуд мешавад. Дар Олмон баъди он рӯз тамоми бару ресторан, марказҳои тафреҳӣ толорҳои консертӣ, театрҳо ва варзишгоҳҳоро барои чаҳор ҳафта мебанданд. Мағозаҳо боз ҳастанд, вале бояд бо меъёрҳои сахти беҳдоштӣ ва риояти фосилагирии ҷисмонӣ кор кунанд. Баъди ин хабар қимати саҳҳом дар бозорҳои молии Аврупо ва Амрико 3 дар сад коҳиш ёфт. Амрико гуфт, ки рӯзи 28-уми октябр 73 ҳазор мавриди нави сирояти коронавируси навро сабт кардааст ва тақрибан 1000 нафари дигар аз ин беморӣ талаф ёфтаанд. Дар Ҳинд ба гуфтаи мақомот теъдоди умумии гирифторон то рӯзи 29-уми октябр аз 8 миллион нафар гузаштааст.

Ҳиндустон ба кишварҳои Осиёи Марказӣ 1 миллиард доллар кумак мекунад

Муколамаи Ҳиндустон ва кишварҳои Осиёи Марказӣ, 28 октябри соли 2020

Дар дидори онлайнӣ ё бархатти Гуфтугӯи Ҳинд ва Осиёи Марказӣ, ки рӯзи 28 октябр баргузор гашт, масъалаҳои амниятӣ ва сиёсӣ баррасӣ шуда, Ҳиндустон барои рушди тарҳҳои бартариятдори энержӣ, дурпайвандӣ, маориф, тандурустӣ, фанновариҳои иттилоотӣ ва кишоварзӣ дар кишварҳои минтақа 1 миллиард доллар қарзи боимтиёз ваъда кард. Дар ин нишаст гуфта шуд, ки ширкаткунандагони он барои маҳви зербиноҳо, паноҳгоҳ ва сармоягузории терроризм ҳамкорӣ хоҳанд кард ва нахоҳанд гузошт, ки қаламрави яке аз ин давлатҳо барои ҳамлаи террористӣ ба кишвари дигар истифода шавад. Дар ҳамоиш вазирони умури хориҷии кишварҳои Осиёи Марказӣ, Ҳиндустон ва афғонистон ширкат карданд. Ҳиндустон солҳост, талош дорад, ки минтақаи Осиёи Марказӣ ҷойгоҳ ва нуфузи муҳимтарерор соҳиб шавад. Ин дар ҳолест, ки Русия, Чин, ИМА, ИА ва ҳамчунин Туркия, Эрон, Покистон ба анозаҳои гуногун дар минтақа нуфуз доранд.

Шумораи қурбониёни СОVID-19 дар Тоҷикистон ба 82 тан расид

Яке аз бемористонҳои Тоҷикистон.

Вазорати тандурустӣ аз фавти боз як шаҳрванди Тоҷикистон аз бемории СOVID-19 хабар медиҳад. Шумораи умумии қурбониёни аз ин беморӣ аз 30-уми апрел то ба 28-уми октябр расман ба 82 нафар расид.

Ба гуфтаи вазорат, дар шабонарӯзи охир дар кишвар гирифторшавии 40 нафари дигар ба ин беморӣ ошкор шуд ва дар маҷмӯъ шумораи гирифторон дар мамлакат ба 10900 нафаранд.

Ҳамзамон, дар 24 соати охир 61 нафар пас аз табобат ба хонаҳояшон рухсат дода шуда, дар маҷмӯъ шумораи шифоёфтагон аз ин беморӣ дар Тоҷикистон ба 10070 (92,4%) расид.

Коршиносони мустақил ба омори расмӣ дар мавриди маргу мир аз КОВИД-19 ва ҳам сироятёбӣ ба короновирус дар Тоҷикистон бо чашми шубҳа менигаранд ва мегӯянд, эҳтимол шуморАи фавтидагон ва сироятёфтагон ба беморӣ ба маротиб аз омори расмӣ бештар бошад.

Ёфтҳои бештар

XS
SM
MD
LG