Пайвандҳои дастрасӣ

Хабари нав

Дар чанд ҷумла

2018 - Соли Узбакистон дар Қазоқистон эълон шуд

Дар поёни сафари давлатии президети Қазоқистон ба Тошканд раҳбарон эълон карданд, ки соли 2018 – соли Узбакистон дар Қазоқистон ва соли Қазоқистон дар Узбакистон таҷлил мешавад. Ин изҳорот дар паи дидору гуфтугӯҳои баландпояи президентон Нурсултон Назарбоев ва Шавкат Мирзиёев дар Тошканд садо дод.

Назарбоев, аз ҷумла гуфт: "Омили асосии муносибатҳои дӯстонаи мо ин робитаҳои башардӯстонаву фарҳангии мост. Мо ба созиш расидем, ки соли 2018-ро дар Қазоқистон Соли Узбакистон эълон кунем. Масъалаи дар Узбакистон баргузор шудани Соли Қазоқистон низ баррасӣ шуд. Дар доираи Соли Узбакистон чандин чорабинӣ, ки муносибатҳои бародаронаи моро боз ҳам тақвият медиҳанд, баргузор хоҳад шуд".

Ин нахустин сафари кории президент Назарбоев ба Тошканд баъди сари президент Каримов дар соли гузашта мебошад. Дар ҷараёни ин сафар миёни Қазоқистону Узбакистон чанд санади ҳамкорӣ, аз ҷумла, созишномаи ҳамкориҳои стратегии миёни ширкатҳои миллии роҳи оҳан, созишномаи ҳамкории хадамоти гумрук ва вазоратҳои молия, ҳамкорӣ дар сатҳи низомиву фаннӣ ва ҳамкориҳо дар соҳаи энергетикаву саноати нафтӣ ба имзо расид.

Ба таври ҷудогона раҳбарони кишварҳо харитаҳои роҳро дар заминаи ҳамкорҳо дар умури об ва навсозии роҳҳои автомобилгарди воқеъ дарсаҳади ду кишвар ба имзо расониданд.

Президенти Узбакистон Шавкат Мирзиёв гуфт, ки дар равобити ду кишвар «як пешрафти ҷиддӣ» мушоҳида мешавад.

Ҳамаи хабарҳои имрӯзро дар инҷо бихонед

Сарбози рус дар додгоҳи украинӣ гуфт, марди 62-солаи мулкиро куштааст

Вадим Шишимарин, додгоҳи Киев. 13 маи соли 2022

Нахустин сарбози русе, ки барои ҷиноятҳои ҷангӣ дар як додгоҳи Киев посух медод, худро гунаҳгор эълон кард. Вақте дар мурофиаи рӯзи 18 май додрас аз сержант Вадим Шишимарин пурсид, ки оё ӯ худро дар куштори як шаҳрванди 62-солаи Украина гунаҳгор меҳисобад, ки бо дучархааш аз деҳаи Чупахивкаи минтақаи Суми убур мекард, сарбоз гуфт: “Бале”. Ба Шишимарин, ки зодаи минтақаи сибирии Иркутск мебошад, ҳукми ҳабси абад таҳдид мекунад. Куштор чанд рӯз баъди шурӯи ҷанги беасоси Русия алайҳи Украина рух додааст. Дар як видеое, ки аз ҷониби Хадамоти амнияти Украина нашр шуд, Шишимарини 21-сола, узви воҳидҳои тонкии Русияи боздоштшуда аз ҷониби украиниҳо ба гуноҳаш иқрор шудааст. Шишимарин дар тасвири ҳодисаҳои рӯзи 28-уми феврал гуфт: “Ба ман амр доданд, ки бикушам”. Ӯ афзуд: “Ман як дафъа тир кушодам. У афтод ва мо ба роҳамон давом додем”.

Ирина Венедиктова, додситони кулли Украина ҳуввияти 10 сарбози бригадаи 64-уми низомии нирӯҳои русиро мушаххас кард ва гуфт, ки ин нафарон “дар ваҳшоният алайҳи сокинони мулкӣ ва дигар ҷиноятҳои ҷангӣ” гумонбар мебошанд. Ӯ гуфт, ки таҳқиқи амалҳои содиркардаи онҳо дар шаҳри Буча идома дорад.

Баъди ақибнишинии нирӯҳои русӣ аз шаҳри Бучаву дигар шаҳракҳои атрофи Киев шаҳодати кушторҳои бераҳмона, гӯрҳои дастаҷамъӣ ва дигар ҷиноятҳо алайҳи сокинони мулкӣ ошкор шуд.

Рӯзи 12 май аъзои Шӯрои ҳуқуқи башари СММ дар як овоздиҳӣ якдидона қарори роҳандозии таҳқиқи мавридҳои қонуншиканиҳои нирӯҳои русиро дар минтақаҳое, ки муваққатан зери дасти онҳо буданд, дастгирӣ карданд.

Русия даҳҳо дипломати фаронсавию итолиёиро ихроҷ кард

Сафорати Фаронса дар Маскав. Акс аз соли 2017

Русия эълон кард, ки даҳҳо дипломати фаронсавӣ ва итолиёиро “дар посухи ҷавобӣ” ба айни чунин қарори аврупоиҳо дар робита ба ҷанги Русия дар Украина аз қаламраваш ихроҷ мекунад. Вазорати корҳои хориҷӣ рӯзи 18 май дар Маскав гуфт, ки 34 корманди “сохторҳои дипломатии Фаронса дар Русия” шахсони мамнӯъ-ул-вуруд номида шуда, бояд дар давоми ду ҳафта кишварро тарк кунанд. Бо айни чунин қарор 24 дипломати итолиёӣ ҳам амр гирифтанд, ки хоки Русияро тарк кунанд.

Нахуствазири Итолиё Марио Драги ин қарорро чун “як амали душманона” маҳкум кард, айни замон гуфт, ки ин кор набояд боиси пурра қатъ шудани иртиботи дипломатӣ шавад, чун, “тавассути ин шабакаҳо, агар мо муваффақ шуедм, сулҳ ба даст меояд ва ин ҳамон чизест, ки мо мехоҳем”. Фаронса, ки моҳи апрел 35 дипломати русро ихроҷ карда буд, рӯзи 18 май қарори Русияро маҳкум кард. Айни замон Рум Маскавро огоҳ кард, ки ба 30 дипломати рус гуфта шуд, ки “бо далелҳои амнияти миллӣ” хоки Итолиёро тарк кунанд.

Амрико назорати амниятӣ бар бинои сафорату консулгариҳои Афғонистонро дар ин кишвар ба дасти худ гирифт

Сафорати Афғонистон дар Вашингтон

Департаменти давлатии ИМА дар изҳороте рӯзи 17-уми май гуфт, ки ҳукумати ин кишвар назорат бар биноҳои сафоратхонаи Афғонистон дар Вашингтон ва ду бинои консулгарӣ дар иёлатҳои амрикоиро ба дасти худ гирифтааст. Дар изҳорот гуфта мешавад, ки Департаменти давлатӣ “танҳо масъули” амнияту барқарорсозии равобити дипломатӣ ва ҳам “муҷаҳҳазсозии дохили биноҳову бойгонӣ ва дороиҳои молии” он мебошад, аз ин рӯ ворид шудани дигарҳоро ба ин биноҳо иҷоза намедиҳад. Шурӯъ аз нисфирӯзии 16 май сафорат ва ду консулгариҳои Афғонистон, ки дар Литтл Неки Ню-Йорк ва Берверли Ҳиллзи Калифорния воқеъ ҳастанд, фаъолиятҳлои дипломативу консулиро қатъ карданд.

ИМА ҳукумати Толибони Афғонистонро ба расмият намешиносад. Ин гурӯҳ баъди тарки Афғонистон кардани нирӯҳои амрикоиву байналмилалӣ, моҳи августи соли 2021 назорат бар тамоми кишварро ба дасти худ гирифт. Як мақоми дипломатӣ гуфт, ки тасмими таҳти назорати амниятии Амрико гузаштани сафорату консулгариҳои Афғонистон ба сиёсати Вашингтон дар Афғонистон ҳеҷ таъсире надорад.

Генерали калони покистонӣ музокира бо "Таҳрики Толибон"-ро назорат мекунад

Сарҳади Афғонистону Покистон, макони номаълум. Мулло Фазлуллоҳ (дар марказ), раҳбари "Таҳрики Толибони Покистон"

Як мақоми Радиои Озодӣ гуфт, ки аз ҷараёни музокироти миёни мақомоти Исломобод ва гурӯҳи тундрави “Таҳрики Толибони Покистон” як генерали артиши Покистон назорат мекунад. Мақомоти покистонӣ тасдиқ карданд, ки генерал-лейтенант Файз Ҳамид, ки масъули нирӯҳои покистонӣ дар минтақаи шимолуғарбии Хайбар Пахтунва мебошад, раҳбарии ҳайати Покистонро дар музокирот бо “Таҳрики Толибони Покистон” дар шаҳри Кобули Афғонистон ба ӯҳда дорад. Ин мақом гуфт, ки дар ин музокирот вазири корҳои дохилии Толибон Сироҷиддин Ҳаққонӣ ва раиси истихборот Абдулҳақ Қозиқ ба ҳайси миёнҷӣ иштирок мекунанд. Исломобод, ки гурӯҳи тундрави “Таҳрики Толибони Покистон”-ро дар куштори даҳҳо сарбозонаш дар соли гузашта гунаҳгор мекунад, дар талоши коҳиши хушунатҳо аст. Дар амри дастёбӣ ба созишу муомилаҳо Исломобод аз зиндонҳояш беш аз 100 узви ин гурӯҳ, аз ҷумла фармондеҳони калони онро озод кардааст.

Умедвории Украина ба табдили размандаҳои "Азовстал" бо зиндониҳои рус

Сарзбозони аз дохили корхона беруномада дар дохили автобусҳои русӣ
Дар ҳоле, ки муколама барои озод кардани размандагони “Азовстал” идома дорад, нирӯҳои Русия рӯзи 18-уми май мушаку бомбаборони ҳадафҳои низомиву сокинони мулкии Украинаро бас накарданд. Муовини вазири дифои Украина рӯзи 17 май изҳори умедворӣ кард, ки 264 размандаи аз дохили корхонаи “Азовстал”-и Мариупол беруномада бо маҳбусони ҷангии Русия табдил карда мешаванд. Изҳороти Ҳанна Маляр баъди як гуфтаи раиси Думаи давлатӣ Вячеслав Володин садо дод, ки сарбозони беруномадаро “ҷинояткор”-е номид, ки ба гуфтааш, “бояд ба ҷавобгарӣ кашида шаванд”. Интерфакс навишт, Володин гуфтааст, ин нафарон бояд набояд табдил шаванд. Маляр гуфт, ки гапҳои Володин тобиши сиёсӣ дошта, бо ҳадафи “пропагандаи дохилӣ” гуфта шудааст. Маляр гуфт, ки талошҳо барои аз дохили корхона берун овардани сарбозон ва ҳам музокира сари сарнавишти онҳое, ки аллакай берун баромаданд, ҷараён доранд. Вазорати дифои Украина гуфт, ки 264 разманда, аз ҷумла 53 нафарашон бо ҷароҳатҳои сангин аз корхона берун оварда шуда ба қаламрави зери назорати Русия интиқол ёфтаанд. Дақиқ маълум нест, ки дар таҳхонаҳои "Азовстал" чӣ микдор одам боқӣ мемонад.

НАТО аз майли Финляндия ва Шведсия ба узвияти паймон истиқбол кард

Йенс Столтенберг, дабири кулли НАТО гуфт, ки бо нигаронӣ аз ҷанги Русия дар Украина Финляндия ва Шведсия аризаи узвият дар ин паймони низомиро доданд. Столтенберг дар як нишасти хабарии 18-уми май гуфт, аризаи узвияти ин ду кишварро “гарм истиқбол мекунад” ва Финляндияву Шведсияро “шарикони наздиктарини мо” номид. Дар изҳороти НАТО дар Твиттер ин таҳаввулот чун “як рӯзи таърихӣ” ёд шудааст. Интизор меравад, ки ҷараёни таҳияи аризаи узвият дар НАТО аз ҷониби ин ду кишвар ду ҳафтаро дар бар мегирад. То ҳол танҳо Туркия дар баробари нияти узви НАТО шудани ин ду кишвар мухолифат кардааст. Агар мухолифатҳои Туркия бартараф шавад, эҳтимолан ҷараёни пурраи ба узвияти НАТО қабул шудани Финляндия ва Шведсия чанд моҳро дар бар гирад. Одатан ин ҷараён 12 моҳро талаб мекунад. НАТО хостори ин аст, ки дар шароити таҷовузи Маскав алайҳи Украина ин ду кишвар ба зудтарин фурсат аъзои паймон шаванд.

AP: Чин Шинҷонро ба зиндони бузург табдил медиҳад

Дар Уйғури Чин тақрибан ҳар 25-умин сокин бо айби терроризм ба зиндон маҳкум шудааст. Ба иттилои хабаргузории Associated Press (АР), ин болотарин сатҳи зиндонсозӣ дар дунё аст.

Рӯйхате, ки хабаргузорӣ дарёфт кардааст, номи бештар аз 10 ҳазор уйғуртабореро дар бар мегирад, ки дар маҳбаси Конашехери Шинҷон зиндонӣ шудаанд. Дар солҳои охир Чин уйғурҳо, ақалияти мусалмони Шинҷонро таъқиб мекунад ва ин таъқибҳоро мубориза бо терроризм меномад.

Баъди танқидҳои байналхалқӣ ҳукумати Чин дар соли 2019 эълом кард, ки урдугоҳҳои ғайрдидодгоҳиро мебандад. Уйғуртаборонро бидуни эъломи айб дар додгоҳ дар чунин урдугоҳҳо зиндонӣ мекарданд. Аммо коршиносон мегӯянд, ҳазорон уйғур бо айбҳои сохтаи терроризм даҳсолаҳо дар маҳбас мемонанд.

Конашехер - яке аз деҳаҳои ҷанубии Шинҷон аст. Дар ин деҳа бештар аз 267 ҳазор кас зиндагӣ мекунад. Бино ба рӯйхати нашркардаи хабаргузорӣ, зиёда аз 10 ҳазор сокини ин деҳаро аз 2 то 25 сол зиндонӣ кардаанд.

490 қазоқтабор Туркманистонро тарк мекунад

Акс аз бойгонӣ.

490 қазоқтабори Туркманистон ибтидои моҳи июн ин кишварро тарк ва ба Қазоқистон мекӯчанд. Дар ин бора расонаҳои Туркманистон хабар доданд.

Ҳукумати Қазоқистон барномаи махсусеро амалӣ месозад, ки бар асоси он қазоқтаборон аз саросари дунё метавонанд, ба Қазоқистон кӯчанд.

Охири моҳи феврали соли 2021 бештар аз 160 қазоқтабор аз Туркманистон ба Қазоқистон кӯчида буд.

Аз ибтидои соли ҷорӣ қариб 2 ҳазор қазоқтабор аз саросари дуён ба Қазоқистон кӯчидаанд. Бештари онҳо асосан дар вилоятҳои Алмато ва Мангистау зиндагӣ ихтиёр кардаанд.

Даргузашти рӯҳонии шинохта Ҳоҷӣ Исмоил Пирмуҳаммадзода

Исмоил Пирмуҳаммадзода.

Рӯҳони шинохтаи тоҷик Ҳоҷӣ Исмоил Пирмуҳаммадзода субҳи 18-уми май дар сини 70 солагӣ даргузашт. Яке аз хоҳарзодаҳои Пирмуҳаммадзода ба Радиои Озодӣ гуфт, ки ӯ аз дарди дил ранҷ мебурд ва ин субҳ хабари маргашро ба онҳо расонданд. Ба гуфтаи наздиконаш, маросими ҷанозаи ӯ имруз вақти намози пешин дар шаҳри Душанбе баргузор мешавад.

Исмоил Пирмуҳаммадзода дар доираҳои динӣ, илмӣ ва фарҳангии Тоҷикистон ҳамчун воиз ва ровӣ шинохта шуда буд. Ӯ аз соли 1991 ба ин тараф имом-хатиби Масҷиди марказии Ҳисор буд.

Ин рӯҳонӣ дар баробари фаъолиятҳои динӣ, дар чорабиниҳои фарҳангӣ низ фаъолона иштирок мекард. Бори охир, якшанбеи гузашта дар маҳфили "Боргоҳи сухан" иштирок ва суханронӣ карда буд.

Узви Иттифоқи журналистони Тоҷикистон, Аълочии матбуоти Тоҷикистон, барандаи ҷоизаи Иттифоқи журналистон ба номи Лоҳутӣ, Аълочии телевизион ва радиои Тоҷикистон Аълочии фарҳанги Тоҷикистон, дорандаи медали "100-солагии матбуоти тоҷик" буд.

Вокунишҳо аз берун ба ҳодисаҳои Хоруғ

Хоруғ, 16-уми майи 2022

Намояндаи Кумитаи норвежии Ҳелсинкӣ аз мақомоти Тоҷикистон хостааст, эътирозҳои сулҳомезро дар Вилояти Мухтори Кӯҳистони Бадахшон саркӯб накунанд.

Мариус Фассум рӯзи 17-уми май дар саҳифааш дар Твиттер навишт, “мақомот дар Тоҷикистон бояд ҳуқуқ ба гирдиҳамоии осоиштаро эҳтиром карда, амнияти тазоҳургарони осоиштаро дар Хоруғ замонат бидиҳанд ва саркӯби шадиди ҳаракати эътирозии осоиштаро фавран қатъ кунанд.”

Ду созмони мухолифини тоҷик дар Аврупо низ бархурди намояндагони мақомотро бо эътирозгарон дар Хоруғ накӯҳиш кардаанд.

Паймони миллӣ, эътилофи чаҳор созмони мухолифин, ки фаъолияташ дар Тоҷикистон мамнуъст, бо нашри изҳороте истифода аз силоҳ ва саркӯби тазоҳургаронро дар Хоруғ шадидан маҳкум намуд.

Кумитаи шаҳрвандии наҷоти гаравгонҳо ва зиндониёни сиёсии Тоҷикистон, қароргоҳаш дар Варшава, низ 17-уми май дар пайванд ба вазъияти Бадахшон “нигаронии амиқи худро” изҳор дошт.

Ҳарду созмон аз “кишварҳои дӯст ва созмонҳои таъсиргузор” хостаанд, “аз куштор ва саркӯби мардум дар Бадахшон пешгирӣ ва барои расидан ба хостҳои қонунии онҳо мусоидат кунанд”.

Рӯзи 16-уми май дар шаҳри Хоруғ гуруҳе аз сокинон эътироз карданд. Мақомот онро бидуни иҷоза ва ғайриқонунӣ дониста, бо истифода аз гази ашковару тирҳои резинӣ пароканда карданд.

Дар ин ҳодиса як сокини маҳаллӣ кушта ва ба иттилои арсмӣ се афсари милиса захмӣ шудаанд. Сокинон мегӯянд, дар миёни мардуми одӣ низ маҷруҳон ҳастанд.

Президенти Радиои Озодӣ ҳамла ба хабарнигоронро дар Душанбе маҳкум кард

Ҷейми Флай

Президенти Радиои Аврупои Озод/Радиои Озодӣ ҳамлаҳои ҷудогона ба хабарнигорони Радиои Озодӣ ва телевизиони “Настояшее Время”-ро дар Душанбе шадидан маҳкум кард.

Ҷейми Флай рӯзи 17-уми май дар изҳороте гуфт, “борҳо аз мақомоти Тоҷикистон хостем, ки фишорро алайҳи расонаҳои озод бас кунанд.”

“Бори охир, моҳи феврали имсол, дар номае ба вазири корҳои хориҷии Тоҷикистон Сироҷиддин Муҳриддин дар бораи ҳолатҳои аз парвонаи кор маҳрум шудан, озор ва таҳдидҳо ба зидди хабарнигорони Радиои Озодӣ муфассал навишта будам,” – афзудааст ӯ.

Президенти Радиои Озодӣ мегӯяд, “вақти он расида, ки ҳукумати Тоҷикистон кӯшиши халалдор кардани гузоришдиҳии мустақилро, ки ба нафъи мардуми тоҷик аст, бас кунад.”

Шахсони ношинос рӯзи 17-уми май ба хабарнигорону наворбардорони Радиои Озодӣ ва телевизиони "Настояшее Время" дар Душанбе ҳамла карда, дастгоҳи наворгирӣ ва телефонҳояшонро кашида гирифтанд.

Ҳодиса баъди он рӯй дод, ки хабарнигорон барои гирифтани шарҳи Улфатхонум Мамадшоева, яке аз фаъолони ҷомеаи мадании Бадахшон, ба хонааш дар пойтахт рафтанд.

Вазорати корҳои дохилии Тоҷикистон 17-уми май ӯро дар қатори Маҳмадбоқир Маҳмадбоқиров ва Алим Шерзамонов ба ташкили эътирози 16-уми май дар Хоруғ, ки дар натиҷа як нафар кушта ва чандин кас захмӣ шуданд, айбдор кард.

Ҳамлаварон нагуфтаанд, кӣ ҳастанд ва чӣ мехоҳанд, аммо ба қавли ҳамкорони мо, “журналистонро хуб мешинохтанд ва ҳадафмандона дурбину телефонҳоро мехостанд”.

Дар умум, ба иттилои хабарнигорони Радиои Озодӣ ва “Настояшее Время” аз онҳо ҳафт телефон ва як дастгоҳи наворгириро гирифтаанд. Мақомот то ҳанӯз дар ин бора хабаре надоданд.

Пас аз як рӯзи эътироз. Дар маркази Бадахшон чӣ гузашт? ВИДЕО

Хоруғ пас як рӯзи эътироз
лутфан мунтазир бошед
Embed

Феълан кор намекунад

0:00 0:02:58 0:00

Бино ба хабарҳои дарёфтӣ, гуруҳе аз занон рӯзи 17-уми май хостаанд, дар майдони марказии Хоруғ ҷамъ шаванд, аммо низомиён бо истифода аз гази ашковар пароканда кардаанд.

Ба сабаби он ки пас аз эътирози 16-уми май интернет дар вилояти Бадахшон дастнорас шуда, хатти телефон мушкил пайдо кардааст, гирифтани аксу навор муяссар нашуд. Мақомот чизе намегӯянд.

Манобеи Радиои Озодӣ гуфтанд, 17-уми май дари аксар идораву мактабҳо баста буда, Далер Ҷумъа, вазири энергетика ва захираҳои оби Тоҷикистон, дар раъси як ҳайат ба Хоруғ рафтааст. Ӯ дар нооромиҳои моҳи ноябри соли гузашта дар Роштқалъаву Хоруғ низ дар мулоқот бо мардум иштирок дошт.

“Низомиён мошинҳоеро, ки имрӯз аз Душанбе ба Хоруғ расиданд, дар назди фурудгоҳ дошта, ба дохили шаҳр роҳ надоданд,” – гуфт як ҳамсуҳбати мо дар Хоруғ, ки нахост номаш зикр шавад.

Мақомот дар Бадахшон ба зангҳои мо посух намедиҳанд. Вазорати корҳои дохилии Тоҷикистон рӯзи 17-уми май гуфт, дар эътирози як рӯз пеш дар Хоруғ як сокини маҳаллӣ кушта ва се маъмури милиса захмӣ шудаанд.

Сокинон мегӯянд, дар бархӯрди мақомот бо эътирозгарон, ки аз гази ашковару тирҳои резинӣ истифода шудааст, чандин нафар маҷруҳ шуданд, вале мақомот чизе нагуфтанд.

Ин ҳодиса пас аз он рӯй дод, ки мақомот баррасии чанд талаби сокинони норозӣ, аз ҷумла дар бораи истеъфои ду мансабдори маҳаллиро напазируфтанд.

Вазъият дар Бадахшон аз моҳи ноябри соли 2021 ба ин сӯ печида аст.

Тоқаев ба Путин гуфт, Нурсултон ҳампаймони Маскав мемонад

Қосимҷомарт Тоқаев ва Владимир Путин

Президенти Қазоқистон Қосимҷомарт Тоқаев рӯзи 16-уми май дар мулоқот бо президенти Русия Владимир Путин дар Кремл гуфт, “ҳеҷ асосе барои нигаронӣ дар мавриди ҳамкориҳои тиҷориву иқтисодӣ ва сиёсӣ миёни кишварҳои мо вуҷуд надорад".

"Русия барои Қазоқистон шарики калидӣ дар бахши тиҷорату иқтисод аст. Бинобар ин, ман дар назди ҳукумати Қазоқистон вазифа гузоштам, ки на танҳо ин сатҳи ҳамкорӣ, табодули мол ва сармоягузорӣ нигаҳ дошта шавад, балки сарфи назар аз ҳама мушкилот ва воқеиятҳои муосири геополитикӣ ҳамкориҳо тавсеа бахшида шаванд", - изҳор доштааст Тоқаев.

Ба огаҳии Кремл, Путин дар вохӯрӣ бо Тоқаев хабар додааст, ки ширкатҳои русӣ дар Қазоқистон 17 миллиард доллари амрикоӣ сармоягузорӣ кардаанд.

Ба гуфтаи ӯ, вазъ дар умум сарфи назар аз мушкилоти пешомада дар ҳоли рушд аст, “аммо бо вуҷуд, “миёни ду кишвар дар бахши амният масъалаҳое ҳастанд, ки бояд дар доираи Созмони Паймони Амнияти Дастаҷамъӣ баррасӣ шаванд.

Улфатхонум Мамадшоева ба изҳороти ВКД вокуниш кард

Улфатхонум Мамадшоева

Улфатхонум Мамадшоева, яке аз фаъолони ҷомеаи шаҳрвандии Вилояти Мухтори Кӯҳистони Бадахшон, ки мақомот ӯро ба ташкили эътирозҳо дар Хоруғ айбдор донистанд, вокуниш кард.

Ӯ рӯзи 17-уми май дар изҳороти кӯтоҳе дар Фейсбук навишт, "ҳомии ҳуқуқ ва рӯзноманигори мустақил аст" ва афзуд, "ба ҷуз виҷдони пок ва дилсӯзӣ нисбат ба мардуми кӯчаки худ – помириҳо – гуфтании дигар надорам."

Вазорати корҳои дохилии Тоҷикистон дар нооромиҳои 16-уми май дар Хоруғ дар баробари Маҳмадбоқир Маҳмадбоқиров, яке аз сарони ғайрирасмии Бадахшон ва Алим Шерзамонов, муовини раиси созмони дар Тоҷикистон мамнӯи Паймони миллӣ, Улфатхонум Мамадшоева, фаъоли ҷомеаи шаҳрвандиро низ айбдор кард.

Изҳороти вазорат дар шабакаҳои иҷтимоӣ бо вокунишҳои зиёд рӯбарӯ шуд. Хабарнигори тоҷик, Рамзия Мирзобекова, дар Фейсбук навишт, Улфатхонум Мамадшоева бештар ҷонибдори муколама аст ва гузашта аз ин "беш аз як ҳафта боз дар Душанбе аст".

Дар ҳодисаи 16-уми май дар Хоруғ, ба иттилои расмӣ, як сокини маҳаллӣ кушта ва се афсари пулис захмӣ шудаанд. Сокинон мегӯянд, аз ҳисоби мардуми одӣ низ чандин нафар маҷруҳ шудаанд, вале мақомот аз онҳо ном набурданд.

Нооромӣ пас аз он сар зад, ки як гуруҳ аз эътирозгарон баъди иҷро нашудани талабҳояшон (аз мансаб рондани раиси вилояти Бадахшону раиси шаҳри Хоруғ, таҳқиқи одилонаи марги Гулбиддин Зиёбеков ва раҳоии боздоштшудаҳо) аз сӯи мақомот аз маҳаллаи Бархоруғ ба маркази шаҳри Хоруғ раҳсипор буданд. Онҳо дар роҳ, дар маҳаллаи Чинак, бо сафи нерӯҳои интизомӣ рӯбарӯ гаштанд. Дар ин ҳодиса аз гази ашковар ва тирҳои резинӣ истифода шудааст.

Як шаҳрванди Австралия дар Тоҷикистон марафони дав баргузор мекунад

Мина Гули, шаҳрванди Австралия, тасмим гирифтааст, дар Тоҷикистон бахшида ба Даҳсолаи байналмилалии амал “Об барои рушди устувор” (солҳои 2018-2028) ва Конфронси Созмони Милали Муттаҳид оид ба об дар соли 2023 марафони дав баргузор кунад, хабар медиҳад сомонаи Кумитаи миллии олимпии Тоҷикистон.

Ба иттилои манбаъ, муҳлати марафони дав дар Тоҷикистон аз 15-ум май то 10-уми июнро дар бар мегирад. Дар ин муддат Мина Гули дар 11 марафони дав 458,2 километрро тай карда, аз захираҳои оби Тоҷикистон, аз ҷумла кӯли Сарез, пиряхи Федченко, неругоҳҳои барқи обии “Роғун” ва “Норак” ва маконҳои сайёҳии Тоҷикистон дидан мекунад ва дар Конфронси 2-юми байналмилалии сатҳи баланд оид ба Даҳсолаи байналмилалии амал “Об барои рушди устувор”, солҳои 2018-2028 (6-8-уми июн) ширкат меварзад.

Мина Гули ва ҳамроҳонашро 15-уми май дар сарҳади Тоҷикистон бо Узбекистон дар шаҳри Панҷакент масъулони Вазорати энержӣ ва захираҳои об, Вазорати нақлиёт, Кумитаи миллии олимпии Тоҷикистон, Кумитаи рушди сайёҳӣ ва мақомоти иҷроияи ҳокимияти давлатӣ дар шаҳри Панҷакент истиқбол карданд.

Субҳи 16-уми май марафони аввали шаҳрванди Австралия дар Тоҷикистон дар самти Панҷакент – Айнӣ – Душанбе, дар масофаи 42 километр, оғоз гардид.

Мина Гули як зани тоҷири австралиягӣ буда, дар бахши муҳити зист фаъол аст. Мудири кулли Бунёди “Thirst” («Ташнагӣ») мебошад, ки дар самти таблиғи сарфаи об фаъолият мекунад.

Мина Гули дар канори шаҳри Мелбурни Австралия таваллуд шудааст ва дар Донишгоҳи Мелбурн таҳсил кардааст. Соли 1993 президенти Иттифоқи донишҷӯёни Донишгоҳи Монаш интихоб шудааст.

Пас аз хатми мактаб дар бахши хусусии соҳаҳои энержӣ ва инфрасохтор ба ҳайси ҳуқуқшинос кор кардааст. Соли 1999 дар биржаи фючерсҳои Сидней, дар рушди бозорҳои партобҳои карбон дар Австралия иштирок кардааст. Соли 2002 аз ӯ хоҳиш карданд, ки ба Бонки ҷаҳонӣ ҳамроҳ шавад ва дар таҳияи лоиҳаҳои тиҷорати карбон дар Чин, Ҳиндустон, Непал ва Индонезия кӯмак кунад. Соли 2005 ба бахши хусусӣ баргашт ва кори худро дар бахшҳои энержии барқароршаванда ва тағирёбии иқлим дар Чин идома дод.

Мина Гули соли 2012 Бунёди “Thirst”-ро таъсис дод, ки ба ҷавонон сарфаи обро тарғиб мекунад.

"Хатлон" дар мусобиқаи лигаи олии футболи Тоҷикистон пешсафи ягона шуд

Дастаи «Хатлон»-и Бохтар, ки дар даври ҳафтуми мусобиқаи лигаи олии футболи Тоҷикистон дар меҳмонӣ тими «Регар-ТадАЗ»-и Турсунзодаро бо ҳисоби 1:0 мағлуб кард, дар ҷадвали мусобиқа пешсафи ягона шуд.

Дар ин бозӣ, ки 15-уми май дар варзишгоҳи «ТАЛКО - Арена»-и шаҳри Турсунзода бо ҳузури 2 ҳазор тамошобин баргузор шуд, голи ягонаро Нуриддин Ҳамроқулов дар охири бозӣ (90+3) аз пеналти ба ҳадаф расонд.

Ҳамин тариқ, футболбозони шаҳри Бохтар бо роҳбарии сармураббӣ Аслиддин Ҳабибуллоев дар чаҳор бозӣ пирӯз шуда, се бозиро мусовӣ карда, бо 15 имтиёз дар ҷадвали мусобиқаи қарамонии Тоҷикистон мақоми аввалро касб кардаанд.

Дар бозии дигари даври ҳафтуми мусобиқа КМВА (Клуби марказии варзишии артиш)-и Душанбе ғайричашмдошт дар майдони худ аз тими “Эсхата”-и Хуҷанд бо ҳисоби 1:4 шикаст хӯрд. Бо вуҷуди бохт низомиён дар ҷадвал бо 12 имтиёз дар ҷои дуюм қарор доранд.

Дастаи «Равшан»-и Кӯлоб, ки тими меҳмон - «Истаравшан»-и шаҳри Истаравшанро бо ҳисоби 1:0 шикаст дод, дар ҷадвали мусобиқа бо 11 имтиёз ҷои сеюмро азони худ кардааст.

Дастаи «Истиқлол»-и Душанбе дувумин бозиашро дар мусобиқаи имсолаи лигаи олии футболи Тоҷикистон боз ҳам бо натиҷаи мусовӣ анҷом дод. Бозии қаҳрамони Тоҷикистон дар Варзишгоҳи марказии Душанбе бо «Хуҷанд»-и шаҳри Хуҷанд бо ҳисоби 1:1 ба поён расид.

Дар бозии дигар “Файзканд”-и ноҳияи Восеъ бар тими мизбон - “Равшан”-и Зафаробод - бо ҳисоби 3:1 ғолиб омад.

Бозиҳои даври ҳаштуми мусобиқаи қаҳрамонии футболи Тоҷикистон миёни дастаҳои лигаи олӣ рӯзҳои 18-ум ва 22-юми май баргузор мешаванд: Рӯзи чоршанбе “Хуҷанд” бо “Истаравшан”, «Хатлон» бо «Равшан» (Зафаробод), «Файзканд» бо КМВА ва «Истиклол» бо «Регар-ТадАЗ» бозӣ мекунанд. Рӯзи якшанбе бозӣ миёни дастаҳои «Эсхата» ва «Равшан» (Кӯлоб) барпо мегардад.

Мусобиқаи қаҳрамонии Тоҷикистон-2022

Лигаи олӣ. Даври 7-ум

«Равшан» (Зафаробод) – «Файзканд» – 1:3

Голҳо: Амирҷон Сафаров, 4 (0:1). Шавкати Ҳотам, 73 (0:2). Шавкати Ҳотам, 85 (0:3). Бахтовар Зокиров, 90+2 (1:3).

14-уми май. Хуҷанд. Варзишгоҳи «Спартак». 800 тамошобин.

КМВА – «Эсхата» – 1:4

Голҳо: Дилшод Бозоров, 9 (0:1). Дилшод Бозоров, 55 (0:2). Шарафҷон Солеҳов, 72 (1:2). Санҷар Рихсибоев, 77 – аз пеналти (1:3). Дилшод Бозоров, 83 (1:4).

14-уми май. Душанбе. Варзишгоҳи КМВА-и Вазорати мудофиаи ҶТ. 500 тамошобин.

«Равшан» (Кӯлоб) – «Истаравшан» – 1:0

Гол: Коуасси Инносент, 27.

15-уми май. Кӯлоб. Варзишгоҳи марказӣ. 7000 тамошобин.

«Регар-ТадАЗ» – «Хатлон» – 0:1

Гол: Нуриддин Ҳамроқулов, 90+3 – аз пеналти.

15-уми май. Турсунзода. Варзишгоҳи «ТАЛКО-Арена». 2000 тамошобин.

«Истиқлол» – «Хуҷанд» – 1:1

Голҳо: Ҷаҳонгир Эргашев, 26 (0:1). Манучеҳр Ҷалилов, 81 (1:1).

15-уми май. Душанбе. Варзишгоҳи марказии ҷумҳуриявӣ. 2700 тамошобин.

Мавқеи дастаҳо дар ҷадвали мусобиқа

Ҷ

ДАСТАҲО

Б

Ғ

М

Б

Т/Т

И

1

«Хатлон» (Бохтар)

7

4

3

0

9-4

15

2

КМВА (Душанбе)

6

4

0

2

9-8

12

3

«Равшан» (Кӯлоб)

6

3

2

1

6-5

11

4

«Файзканд» (Восеъ)

6

3

1

2

8-9

10

5

«Регар-ТадАЗ» (Турсунзода)

7

2

1

4

7-8

7

6

«Эсхата» (Хуҷанд)

6

2

1

3

11-12

7

7

«Хуҷанд» (Хуҷанд)

7

1

4

2

5-4

7

8

«Равшан» (Зафаробод)

7

1

3

3

8-14

6

9

«Истаравшан» (Истаравшан)

6

1

1

4

7-6

4

10

«Истиқлол» (Душанбе)

2

0

2

0

2-2

2

Рӯйхати голзанҳои пешқадам: Дилшод Бозоров, Шарафҷон Солеҳов (КМВА) – 5-тӯбӣ, Мбеке Сиябатчу Деудони («Истаравшан»), Санҷар Рихсибоев («Эсхата») – 4-тӯбӣ, Фатҳулло Фатҳуллоев («Регар-ТадАЗ»), Абдухалил Боронов («Равшан» Кӯлоб), Бахтиёр Зарипов («Равшан» Зафаробод), – 3-тӯбӣ.

Даври 8-ум

18-уми май (чоршанбе)

Оғози бозиҳо – соати 17:00

«Хуҷанд» – «Истаравшан»

«Хатлон» – «Равшан» (Зафаробод)

«Файзканд» – КМВА

Оғози бозӣ – соати 18:00

«Истиқлол» – «Регар-ТадАЗ»

22-юми май (якшанбе)

Оғози бозӣ – соати 18:00

«Эсхата» – «Равшан» (Кӯлоб)

"Азия-Плюс" зери фишор аз бозтоби рӯйдодҳои Хоруғ даст кашид

Хабаргузории “Азия-Плюс” эълон кард, ки бино бар фишори мақомот аз бозтоби воқеаҳои ахир дар Вилояти Мухтори Кӯҳистони Бадахшон худдорӣ мекунад. Он рӯзи 17-уми май дар изҳороте гуфт, нашри хабарҳо аз Бадахшон метавонанд, сабаби баста шуданаш гарданд.

"Қабл аз ин, "Азия-Плюс" огоҳиномаи расмии Прокуратураи генералӣ ва огоҳиҳои ғайрирасмӣ аз ниҳодҳои дигарро дар мавриди он дарёфт карда буд, ки идораи мо ҳаводиси ВМКБ-ро "якҷониба" инъикос мекунад ва "вазъи кишварро ноором месозад". Ба "Азия-Плюс" дастур шуда буд, ки "камбудиҳо бартараф карда шаванд", дар ғайри сурат идораи моро хатари бастан таҳдид мекунад,”-омадааст дар изҳороти "Азия-Плюс".

Назари мақомот дар ин бора маълум нест ва дақиқ нест, ки манзури онҳо аз "ислоҳи камбудиҳо" чист.

Мақомоти Тоҷикистонро борҳо ба хотири маҳдуд кардани озодии баён ва фишор ба расонаҳои мустақил танқид мекунанд. Мақомот ҳамвора ин танқидҳоро рад кардаанд.

Шоми 16-уми май шаҳри Хоруғ дигарбора шоҳиди эътирози сокинон шуд. Ба гуфтаи Вазорати корҳои дохилӣ, дар ин ҳодиса як сокини мулкӣ ба ҳалокат расида, 3 афсари пулис ҷароҳат бардоштанд.

Хабаргузории "Азия-Плюс" яке аз маъруфтарин расонаҳои маҳаллии Тоҷикистон аст, ки бо забонҳои русӣ, тоҷикӣ ва англисӣ хабару гузоришҳо пахш мекунад. Пештар хабарҳо расида буд, ки мақомоти Тоҷикистон бозтоби вазъи ВМКБ ва Украинаро барои расонаҳои маҳаллӣ манъ кардаанд.

Эътирозҳо дар шаҳри Хоруғ пас аз он сар зад, ки мақомот гуфтанд, талабҳои ду рӯз пеши норозиёнро баррасӣ намекунанд. Даҳҳо сокини Вилояти Мухтори Кӯҳистони Бадахшон талаб карданд, ки раиси вилоят ва раиси шаҳри Хоруғ аз мақомашон барканор карда шаванд. Мақомот ин талабҳоро ғайриқонунӣ донистанд. Дар талоши баргузории як тазоҳурот як нафар кушта ва даҳҳо тан захмӣ шуданд.

Дар Ереван бештар аз 90 иштирокчии роҳпаймоии мухолифинро боздошт карданд

Ереван. 16 май, 2022.

Дар шаҳри Еревани Арманистон 91 тан аз иштирокдорони роҳпаймоии мухолифинро боздошт карданд. Дар ин бора расонаҳо иттилоъ медиҳанд.

Дар Ереван аз миёнаҳои моҳи апрел гирдиҳамоии мухолифон бо талаби истеъфои сарвазир Никол Пашинян идома дорад. Ин эътирозҳо баъди он шуруъ шуданд, ки Пашинян гуфт, ҷомеаи ҷаҳонӣ аз Арманистон интизор дорад, талабҳояшро дар мавриди мақоми Қарабоғи Куҳӣ коҳиш диҳад. Ба бовари мухолифин, ҳукумати Арманистон тасмим дорад, ба Озарбойҷон гузашт кунад.

Роҳпаймонии мухолифон дар чаҳор ноҳияи Ереван шуруъ шуд. Қатори мошинҳо мебоист, ба маркази шаҳр мерафт ва танбашавӣ ё роҳбандиро ба бор меовард. Аммо пулис ҳамаи роҳҳои ҳаракати қатори мошинҳои эътирозгаронро баст ва иштирокчиёнро боздошт кард.

Собиқ вазири мудофиаи Қазоқистонро то 15 сол зиндон таҳдид мекунад

Мурод Бектанов, собиқ вазири дифои Қазоқистон.

Мурод Бектанов, вазири пешини мудофиаи Қазоқистон, ки баъди ҳаводиси моҳи январи соли ҷории он кишвар боздошт шуд, мумкин аст, аз 7 то 15 сол зиндонӣ гардад.

Бино ба иттилои Додситонии кулли Қазоқистон, нисбати Бектавон бо моддаи "Берун рафтан аз ҳадди салоҳиятҳои хидматӣ дар вазъияти ҷангӣ" парванда боз шудааст.

Қосимҷомарт Тоқаев, президенти Қазоқистон пештар гуфта буд, ки неруҳои мусаллаҳ ҳангоми ҳодисаҳои моҳи январ "ба далели нобоварӣ ва беамалии роҳбарон натавонистанд, вазифаҳои дар наздашон гузошташударо ба дурустӣ анҷом диҳанд".

"Вазир Бектанов ташаббуси фармондеҳӣ надошт. Бо доштани артише, ки ҳангоми машқҳо натиҷаҳои хуб нишон дода буд, мо натавонистем, аз зарфияти он дар ҳолати изтирорӣ истифода барем ва маҷбур шудем, ки аз хориҷ кӯмак дархост кунем", - гуфта буд Тоқаев.

Мурод Бектанови 56-сола 20 феврали соли ҷорӣ боздошт шуд. Вай моҳи августи соли 2021 ба мақоми вазирӣ таъйин гардида буд.

Дар Узбекистон бо пешниҳоди президент мехоҳанд Конститутсияро тағйир диҳанд

Шавкат Мирзиёев, раиси ҷумҳури Узбекистон.

Ҷиноҳи Ҳизби либерол-демократии Узбекисистон дар Палатаи қонунгузории Шӯрои олии он кишвар пешниҳод кард, ки ҷараёни воридсозии тағйирот ба Конститутсия шуруъ шавад. Ин масъала дар ҷаласаи рӯзи 16 майи Шӯро баррасӣ гардид.

Дар ҷиноҳи Ҳизби либерол-демократӣ аз пешниҳоди президенти Узбекистон ёдовар шуданд, ки "дар Рӯзи Конститутсия аз зарурати ислоҳи Конститутсия" гуфта буд.

Дар изҳороти расмии ҳизби мазкур омадааст, баъди ислоҳот дар Узбекистон зарурати воридсозии тағйирот ба Қонуни асосӣ пайдо шудааст.

Конститутсияи Узбекистон 8 декабри соли 1992 қабул ва то кунун ба он 16 тағйирот ворид шудааст. Баъди сари қудрат омадани Шавкат Мирзиёев низ ба Конститутсия тағйироту иловаҳо ворид карданд.

Аз ҷумла соли 2017 барои таҷдиди низоми додгоҳӣ ва соли 2019 барои "демократисозии ҳукумат ва ҳисоботдиҳанда будани он" ба Конститутсияи Узбекистон тағйирот ворид шудааст.

Манобеъ: Дар ҳодисаи маркази Бадахшон "як кас кушта шуд"

Хоруғ, 16-уми майи 2022

Бино ба хабарҳои расида, дар пайи эътирози сокинону тирандозии нерӯҳои интизомӣ дар Хоруғ, Замир Назаршоев, соли таваллудаш 1992, бошандаи маҳаллаи Гулакен, кушта шудааст. Ҳодиса 16-уми май рӯй дод.

Дастикам чаҳор манбаъ хабарро ба Радиои Озодӣ тасдиқ карданд.

Маҳмадбоқир Маҳмадбоқиров, яке аз чеҳраҳои маъруф дар минтақа, ки мақомот ӯро ба ташкили эътирозҳо айбдор медонанд, шоми 16-уми май гуфт, "Назаршоев ҳангоми тазоҳурот кушта шудааст". Тафсилоти дигар дар даст нест.

Мақомот ба таври расмӣ чизе нагуфтаанд.

Издиҳоми ҷавонон рӯзи 16-уми май, пас аз он ки мақомот гуфтанд, талабҳои ду рӯз пеши норозиёнро баррасӣ намекунанд, хостори баргузории тазоҳурот дар назди бинои ҳукумат шуд, вале дар роҳ, дар маҳаллаи Чинак, бо сафи нерӯҳои интизомӣ рӯ ба рӯ гашт.

Сокинони норозӣ ду рӯз пеш, 14-уми май, истеъфои раиси вилояти Бадахшону раиси шаҳри Хоруғ, таҳқиқи одилонаи ҳодисаҳои моҳи ноябр ва озодии боздоштшудаҳоро тақозо карда, гуфта буданд, дар сурати беэътиноии мақомот дубора тазоҳурот мекунанд. Мақомот онҳоро ғайриқонунӣ дониста, баррасӣ накарданд.

Бино ба наворҳое, ки дастраси Радиои Озодӣ шуданд, рӯзи 16-уми май ба зидди ҷавонон аз воситаҳои парокандакунӣ истифода шудааст. Сокинон гуфтанд, ки аз гази ашковар ва тирҳои резинӣ истифода шудааст.

Ду манбаъ дар шаҳри Хоруғ рӯзи 16-уми май ба Радиои Озодӣ гуфтанд, се нафари захмиро ба шифохонаи Оқохон, дар маҳаллаи Бархоруғ, бурдаанд. Баъзе аз манобеъ шумораи захмиёнро бештар мегӯянд.

Дар ҳоле ки эътирози сокинон дар Хоруғ ҷараён дошт, телевизиони Бадахшон изҳороти додситони вилоятро гаштаву баргашта пахш кард, ки дар он аз сокинон хостааст, ба тазоҳурот ҳамроҳ нашаванд, чун ҷавобгарӣ дорад.

Вазъият дар Вилояти Мухтори Кӯҳистони Бадахшон аз моҳи ноябри соли 2021, кушта шудани сокини Роштқалъа Гулбиддин Зиёбеков ва эътирози чаҳоррӯза дар Хоруғ, ба ин сӯ печида аст. Эътирозгарон он замон пас аз мувофиқати "Комиссияи 44" (иборат аз намояндагони ҷомеаи шаҳрвандӣ) бо ҳукумат пароканда гаштанд.

Шартҳо ин буд, ки ҳукумат дастрасиро ба интернет дар Бадахшон дубора барқарор мекунад, эътирозгаронро ба ҷавобгарӣ намекашад ва омилони қатли Гулбиддин Зиёбековро ба ҷавобгарӣ мекашад. Танҳо пас аз чор моҳ интернет бо суръати суст дар Бадахшон барқарор шуд, вале масъулони "Комиссияи 44" мегӯянд, мақомот ваъдаҳои дигари худро иҷро накарданд.

Вазири тандурустии Қирғизистон гуфт, ки амниятиҳо аз ӯ чӣ пурсиданд

Вазири ҳифзи тандурустии Қирғизистон

Олимқодир Бейшеналиев, вазири ҳифзи тандурустии Қирғизистон, рӯзи 16-уми май гуфт, ки кормандони Кумитаи давлатии амнияти миллии Қирғизистон ду маротиба ӯро бозпурсӣ кардаанд.

Рӯзи 12-уми май кормандони КДАМ як гумонбарро ба порагирӣ боздошт ва вазирро ҳам бозпурсӣ кардаанд.

Вазир гуфт, пизишкони ноҳияи Ҷет-Оғузи вилояти Иссиқкӯл барои як чорабинӣ довталабона 1200 доллар ҷамъ овардаанд. Кумитаи

"Бигзор маро боздошт кунанд, агар мехоҳанд. Ман гуноҳе надорам. Барои чӣ зиндонӣ мекунанд - барои он ки духтаракро ба волидонаш расонидам? Ё барои он ки он 1200 долларро нагирифтам?" - гуфт вазир.

Бейшеналиев афзуд, кормандони кумита дар ноҳияи Ҷети-Оғуз ӯро дар назди мардум таҳқир кардаанд.

Вазир гуфт, ки айни замон дар Олмон дар як сафари хидматӣ қарор дорад ва то рӯзи 1 июн барнамегардад.

Украина ба ҳамлаи нави Русия дар Донбасс омода мешавад

Мақомоти Украина гуфтанд, ки нерӯҳои русиро дар минтақаи Харков то марз ақиб ронданд ва ин нишонаи муваффақияти афзояндаи нерӯҳои украинӣ дар шимол-шарқи ин кишвар аст. Харков дувумин шаҳри калони Украина ба шумор меравад.

Владимир Зеленксий, раисҷумҳури Украина, шаби 15-уми май дар паёми худ гуфт, кишвараш барои ҳамлаи нави Русия дар Донбасс омода мешавад.

Вай афзуд, "ишғолгарон то ҳанӯз намехоҳанд бипазиранд, ки ба бунбаст расидаанд". Ба гуфтаи Зеленский, ончӣ Русия "амалиёти вижа" мехонад, бо шикаст рӯбарӯ шудааст.

Мушовири президенти Украина Алексей Арестович гуфт, нерӯҳои русӣ пас аз хуруҷ аз Харков роҳашонро ба тарафи Донбасс тағйир додаанд. Ба гуфтаи ӯ, Русия дар пайи ҳамлаи нерӯҳои украинӣ маҷбур шуданд, роҳи худро дигар кунанд.

Дар ҳамин ҳол, мақомоти ғарб гуфтаанд, ҳамлаи бедалали Русия бо муқовимати сахт дар Украина рӯбарӯ шудааст ва акнун сарбозони русӣ бо камбуди шадиди таҷҳизот рӯбарӯ шудаанд.

Дабири кулли НАТО рӯзи якшанбе дар нишасте дар Берлин гуфт, ҷанг дар Украина бар асоси ончи, ки Русия тарҳрезӣ карда буд, пеш намеравад.

Вай афзуд, Украина метавонад дар ин ҷанг баранда шавад. Ҳамзамон аз муттаҳидони Украина хост, ба ҳимояти низомӣ аз Украина идома диҳанд.

Рӯзи 16-уми май вазирони корҳои хориҷии 27 кишвари узви Иттиҳоди Аврупо дар Брюссел ҷамъ меоянд, то вазъи Украина ва масъалаи таҳримҳоро зидди Русия баррасӣ кунанд. Дар ин нишаст вазири корҳои хориҷии Украина Дмитро Кулеба ҳам иштирок мекунад.

Пирӯзии бародарон аз Тоҷикистон дар мусобиқае дар Маскав

Пирӯзии ду наврас аз Тоҷикистон дар мусобиқае дар Маскав

Ду бародари наврас аз Тоҷикистон дар мусобиқаи "Eurasia 2022 Jiu-Jitsu Gi+No-Gi" дар Маскав медали тилло ба даст овардаанд.

Ин мусобиқа дар навъи варзиши ҷиу-ҷитсу бо ширкати даҳҳо варзишгар аз кишварҳои осиёӣ рӯзи 15-уми май баргузор шуд.

Бародарон, Муниси 10-сола дар вазни 27-30 кило ва Абубакри 9-сола дар вазни 24-27 кило ба рақибони худ пирӯз шуданд.

Аваз Каримов, падари ин ду наврас, ба Радиои Озодӣ гуфт, дар ин мусобиқа Мунис 60-умин медали тилои худ ва Абубакр 47-умин медали тилои худро ба даст оварданд.

Ба гуфтаи падар, писаронаш то кунун дар ягон мусобиқа шикаст нахӯрдаанд.

Хонаводаи ин ду варзишгари наврас солҳост, дар Русия зиндагӣ мекунанд, аммо дар ҳама мусобиқаҳо бо парчами Тоҷикистон ширкат мекунанд.

Ин ду наврас дар назди Расул Боқиев, варзишгари шинохтаи тоҷик тамрин мекунанд.

Раҳмон ва Путин навсозии артиши Тоҷикистонро баҳс карданд

Владимир Путин ва Эмомалӣ Раҳмон дар нишасти сарони кишварҳои узви СПАД. Маскав, 16-уми майи 2022

Эмомалӣ Раҳмон, раисҷумҳури Тоҷикистон, бо ҳамтои русаш Владимир Путин, ки се моҳ боз даргири ҷанг дар Украина ва дучори таҳримҳои зиёди байнулмилалист, дар Маскав мулоқот кардааст.

Бино ба хабари Кремлин, ӯ 16-уми май гуфтааст, мехоҳад, ҷараёни иҷрои таҷдид ё азнавсозии нерӯҳои мусаллаҳи Тоҷикистон ва вазъ дар сарҳади Афғонистонро баррасӣ кунад.

Русия соли 2012, пас аз дароз кардани муҳлати истодани Пойгоҳи 201-ум навсозии артиши Тоҷикистонро ба уҳда гирифта буд.

"Ҳамчунин тайёрам, дар бораи масъалаҳои муҳими байнулмилалӣ ва минтақаӣ суҳбат кунам," – гуфтааст Раҳмон ба Путин, вале тафсилоташ дастрас нест, ки ду ҷониб ба чӣ натиҷа расиданд.

Хадамоти матбуоти президенти Тоҷикистон дар бораи мулоқот кӯтоҳ гуфтааст, ки тарафҳо "авзои сиёсии ҷомеаи ҷаҳонӣ ва минтақа, вазъи сиёсии кишвари ҳамсоя – Афғонистон, ҳамкорӣ дар соҳаи амният ва масъалаҳои дигари мавриди таваҷҷуҳро баррасӣ намуданд."

Раисҷумҳури Русия кишварашро ҳамоно шарики муҳими Тоҷикистон номида, аз афзоиши додугирифту Душанбеву Маскав ситоиш намудааст.

Путин ҳамзамон гуфтааст, "албатта, чанде пеш телефонӣ дар бораи вазъи минтақа суҳбат доштем. Вазъ мураккаб мемонад. Мехоҳам, фикри Шуморо донам, ки дар ояндаи наздик барои таҳкими амният дар минтақа чӣ кор кардан зарур аст."

Суҳбат дар ҳошияи нишасти сарони кишварҳои узви СПАД (ОДКБ) ва ҳафтае баъд аз он сурат гирифт, ки шохаи "Хуросон"-и гуруҳи тундрави "Давлати исломӣ" ё ДОИШ эълон кард, ба хоки Тоҷикистон ҳафт мушак сар додааст.

Мақомоти расмӣ гуфтанд, тирҳо тасодуфан ба хоки Тоҷикистон гузаштаанд, аммо нерӯҳои марзбониро ба ҳоли омодабоши пурраи ҷангӣ дароварданд.

Ёфтҳои бештар

XS
SM
MD
LG