Пайвандҳои дастрасӣ

Хабари нав

Хабарҳо

Нигаронии ҷиддии HRW аз бозҷӯии наздикони мухолифин дар Тоҷикистон

Созмони Дидбони ҳуқуқи башар ё Human Rights Watch ва Кумитаи норвегии Ҳелсинки аз таҳдид ва бозҷӯии наздикони 10 нафар аз мухолифини ҳукумати Тоҷикистон аз тарафи мақомот нигаронӣ кардаанд. Дар изҳороти муштараки ин ду созмон, ки рӯзи 18-уми июл нашр шуд, гуфта мешавад, ин кор дар остонаи ҳамоиши Дортмунди Олмон ва баъди он сурат гирифтааст.

Бар пояи ин гузориш, аз ҷумла наздикони мухолифин “дар мазҳари умум муҳокима шуда, аз сафар ба хориҷ манъ гардиданд ва таҳдид ба мусодираи молу мулк шуданд”.

Стив Свердлов
Стив Свердлов

Стив Свердлов, муҳаққиқи Созмони Дидбони ҳуқуқи башар дар умури Осиёи Марказӣ гуфтааст, маъракаи хушунатомез алайҳи наздикони мухолифин дар Тоҷикистон густурдатар мешавад.

Ин баёния ҳамзамон аз Амрико, Иттиҳодияи Аврупо ва кишварҳои аъзои он ва дигар шарикони байналмилалӣ хостааст, ки ба таври фаврӣ “ба афзоиши ҳамлаҳои интиқомҷӯёна” дар Тоҷикистон таваҷҷуҳ кунанд. Ин изҳорот мегӯяд, ки Брюссел ва Вашингтон ва дигар ҷонибҳо бояд он мақомоти тоҷик ва ниҳодҳои давлатиро, ки дар ин фишорҳо даст доранд, аз ҳаққи гирифтани виза маҳрум карда ва дороиҳои онҳоро мунҷамид созанд.

Ҳизби дар Тоҷикистон мамнӯи наҳзати исломӣ ҳафтаи гузашта бо пахши як изҳорот аз фишор болои хешутабор, тарафдорони аъзои ҳизб ва ширкатдорони ҳамоише бахшида ба 20-умин солгарди имзои Созишномаи сулҳ, ки дар шаҳри Дортмунди Олмон баргузор шуд, изҳори нигаронӣ карда буд. Аммо Вазорати умури дохилии Тоҷикистон дар вокуниш ба ин изҳорот гуфт, ин хабар бояд санҷида шавад, зеро то ҳол шикояте аз хешовандони тарафдорони ин ҳизб ба вазорат ворид нашудааст.

Нишасти мухолифин дар шаҳри Дортмунди Олмон рӯзи 9-уми июл баргузор шуд
Нишасти мухолифин дар шаҳри Дортмунди Олмон рӯзи 9-уми июл баргузор шуд

Додгоҳи олии Тоҷикистон фаъолияти ҲНИТ-ро соли 2015, баъди шӯриши мусаллаҳони муовини пешини вазири дифои кишвар мамнуъ эълон кард ва беш аз даҳ мақоми аршади онро бо иттиҳоми терроризм барои солҳои тӯлонӣ ба зиндон фиристод. ҲНИТ, ки то баста шуданаш ягона ҳизби исломӣ дар қаламрави Осиёи Марказӣ ба шумор меомад, иттиҳоми терроризмро рад мекунад ва мегӯяд, ки ҳадаф берун кардани ҳизб аз саҳнаи сиёсӣ буд.

Ҳамаи хабарҳои имрӯзро дар инҷо бихонед

Маҷмаи рӯҳониёни мусалмон дар 18 минтақаи Русия маркази ҳифзи ҳуқуқ мекушояд

Акс аз бойгонӣ

Маҷмаи рӯҳониёни мусалмон, як созмони динӣ дар Русия, тасмим гирифтааст, ки дар 18 минтақаи ин кишвар барои кумак ба муҳоҷирон марказҳои ҳифзи ҳуқуқ боз кунад. Ёрии ҳуқуқӣ ба муҳоҷирон, пешгирӣ аз ифротгароӣ ва ҷинояткорӣ дар миёни шаҳрвандони хориҷӣ яке аз ҳадафҳои ташкили марказҳои имдодӣ гуфта мешавад. Албир Крганов, раиси Маҷмаи рӯҳониёни мусалмон дар Русия, мегӯяд, дар бештари маврид муҳоҷиронро корфармоён истифода мебаранд ва шаҳрвандони хориҷӣ наметавонанд аз ҳуқуқи худ ҳимоят кунанд. Бинобар ин, ба марказҳои кумакрасон шаҳрвандон новобаста ба дину миллатшон метавонанд муроҷиат намоянд. Маҷмаи рӯҳониёни мусалмон дар Русия барои муҳоҷирон телефонҳои бовариро фаъол кардааст.

Шаҳрдори Маскав гуфт, ба зудӣ ба ваксинзании оммавӣ оғоз мекунанд

Сергей Собянин

Раиси шаҳри Маскав гуфтааст, ки ваксинзании оммавӣ ба зидди коронавируси нав дар моҳҳои “декабр ва январ” дар ин шаҳр оғоз мешавад.

Сергей Собянин дар ин бора рӯзи 19-уми октябр дар вебсайти расмии пойтахти Русия хабар дода, вале нагуфтааст, ки кадом ваксинаи тасдиқшударо ба мардум мегузаронанд.

Моҳи август Русия ваксинаи Спутник-Ви-ро барои истифодаи умумӣ дар қаламрави кишвар иҷоза дод ва нахустин кишваре шуд, ки ваксина ба зидди COVID-19-ро мавриди баҳрабардорӣ қарор медиҳад.

Аммо донишмандон ва доираҳои байналмилалии илмӣ гуфтанд, ки ваксинаи мазкур дуруст ва ба таври зарурӣ озмоиш нашудааст.

Русия баъд аз ин ваксинаи дувумро ҳам барои истифодаи умум иҷоза дод ва рӯзи 19-уми октябр ба озмоиши ваксинаи саввум оғоз кард. Дар Русия бештар аз 1 миллион 400 ҳазор нафар ба бемории COVID-19 гирифтор шудаанд ва кишвар аз назари сироят дар ҷаҳон дар мақоми 4-ум аст. Айни замон сирояти вирус дар Русия мисли дигар кишварҳои ҷаҳон суръат гирифтааст.

Доналд Трамп сироятшиноси калони кишварро "аҳмақ" номид

Кохи Сафед. Доктор Энтони Фаучи, сироятшиноси аршади ҳукумати ИМА ва президент Доналд Трамп

Доналд Трамп, раиси ҷумҳури Амрико, ба мутахассиси баландмақоми ҳукуматаш Энтонӣ Фаучӣ дарафтода, ӯро «аҳмақ» номид. Ӯ рузи 19-уми октябр гуфт, раиси Маркази мубориза бо бемориҳои сироятӣ дар Амрико тавсияҳои нодурусте барои муқобила бо пандемияи коронавирус додааст.

Ӯ гуфт: “Амрикоиҳо аз шунидани Фаучӣ ва ҳамаи ин аҳмақҳо ва аҳмақҳое, ки нодуруст мефаҳманд, хаста шудаанд.”

Доналд Трамп дар ин бора ҳангоми суҳбати телефонӣ бо аъзои ситоди интихоботиаш сухан гуфта ва Энтонӣ Фаучиро “як мусибат” номидааст.

Раиси ҷумҳури Амрико дар ин бора баъд аз он суҳбат кард, ки Энтонӣ Фаучӣ дар як мусоҳибаи телевизионӣ гуфт, аз онки коронавирус ба Доналд Трамп сироят кард, ҳайрон нашудааст, чун ӯ як маросими бузурге баргузор карда буд ва дар он одамони зиёде ниқоби тиббӣ надоштанд ва фосилаи иҷтимоиро риоят намекарданд.

Дар айни суҳбати телефонӣ бо аъзои ситодаш, Доналд Трамп изҳори боварӣ кардааст, ки дар интихоботи рӯзи 3-уми ноябр пирӯз мешавад. Ӯ гуфтааст, маъракаи таблиғотиаш фавқуллода хуб мегузарад, бо вуҷуди онки назарсанҷиҳо нишон додаанд, Доналд Трамп аз назари маҳбубият дар байни мардум дар бисёре аз иёлатҳои муҳими Амрико аз рақиби демократаш Ҷо Байден ақиб мемонад.

Микрофонҳо хомӯш мешаванд. Навоварӣ дар дебати ояндаи президентии ИМА  

Огайо, дебати аввали Доналд Трамп ва Ҷо Байден

Дебат ё музоҳираи баъдии миёни президенти ИМА Доналд Трамп ва рақиби демократи ӯ Ҷо Байден дар баҳс ё мунозираи баъдии интихоботиашон аз рӯи қоидаи нав амал хоҳанд кард: ба ҳангоми изҳориназарҳои як нафарашон микрофони дигарашон хомӯш мешавад. Президенти комиссиюни дебатҳо рӯзи 19-уми октябр гуфт, ки ба хотири такрор нашудани ҳарфбуриҳои баҳси гузашта ва ҳам мушкилоти фанние, ки дар натиҷа боиси нофаҳмиву ҳамлаҳои лафзӣ мешаванд, қарор шуд дар ҷараёни баҳс бояд микрофон хомӯш шавад. Баҳси навбатии номзадҳои 22-юми октябр баргузор мешавад. Комиссиюн дар як изҳорот гуфт, ки умедвор аст номзадҳо “ба вақти ҳамдигар эҳтиром қоил мешаванд ва ин баҳс барои эҷоди як дебати маданӣ мусоидат мекунад”. Тими Трамп ба ин тағйирот мухолифат кард, вале гуфт, ки бо ин вуҷуд Трамп иштирок хоҳад кард. Микрофонҳои бастаи рақибон иҷоза медиҳад, ки ҳар номзад дар оғози баҳс 2 дақиқа вақтро барои изҳориназарҳои бемонеаи назарҳояш хоҳад дошт. Баъди ин ҳарду микрофон барои баҳси озод боз хоҳанд монд. Дебати навбатӣ охирин дар остонаи интихоботи 3-юми ноябр хоҳад буд.

Раҳимбек Матраимовро боздошт кардаанд

Раҳимбек Матраимов

Раҳимбек (Райимбек) Матраимов, муовини пешини раиси Хадамоти давлатии гумруки Қирғизистон, дастгир шудааст. Масъулони Кумитаи давлатии амнияти миллии Қирғизистон гуфтанд, ки ӯро дар доираи тафтиши фасодкорӣ дар соҳаи гумрук рӯзи 20-уми октябр боздошт карданд.

Кумитаи давлатии амнияти миллии Қирғизистон 17-уми октябри имсол аз оғози тафтиши фасодкорӣ дар Хадамоти гумруки ин кишвар хабар дода буд.

Ба гуфтаи масъулони кумита, дар Хадамоти гумруки Қирғизистон аз соли 2016 то ба ҳол бо иштироки Райимбек Матраимов ва мансабдорони масъули гузаргоҳҳои марзӣ нақшаи фасодкорие амал мекунад.

Номи Райимбек Матраимов, ки бо лақаби "Раим миллион" низ маъруф аст, дар силсилаи таҳқиқоти рӯзноманигории бахши қирғизии Радиои Озодӣ, OCCRP ва Kloop низ зикр шудааст.

Бино бар он, хонаводаи Матраимовҳо дар чанд соли охир зиёда аз 700 миллион долларро "ғайриқонунӣ" аз Қирғизистон ба хориҷ бурдаанд.

Баъд аз нашри силсилаи таҳқиқоти рӯзноманигорӣ, Райимбек Матраимов, бародараш, вакили порулмон Искандар Матраимов ва бунёди хайрияи “Исмоил Ата” ба зидди Радиои Озодӣ, хабарнигор Алӣ Токтакунов ва сомонаи Kloop ба додгоҳ шикоят карданд. Искандар Матраимов гуфта буд, ки таҳқиқот бо ҳадафи беобрӯ кардани онҳо нашр шудааст.

Узбекистон дар соли оянда барои мубориза бо коронавирус $290 млн ҷудо мекунад

Шавкат Мирзиёев, раиси ҷумҳури Узбекистон.

Дар соли 2021 Узбекистон барои бахши тандурустӣ бештар аз 1,9 млрд доллар ҷудо мекунад. Аз ҷумла наздики 290 млн доллар барои мубориза бо коронавирус ва қариб 174 млн доллар барои хариди дору ҷудо хоҳа шуд.

Дар ин бора рӯзи 19 октябр президенти он кишвар Шавкат Мирзиёев дар як ҷаласаи бахшида ба буҷаи соли ояндаи кишвараш иттилоъ дод.

Мирзиёев дар ҷаласа гуфтааст, ки ҳангоми банақшагирии буҷаи соли оянда бояд идомаи коронавирус ва уфти иқтисоди ҷаҳонӣ ба эътибор гирифта шавад.

Ба иттилои маркази матбуотии президенти Узбекистон, Мирзиёев гуфтааст, ки дар шароити вабо дар соли 2021 харҷи соҳаи иҷтимоӣ нисбати соли ҷорӣ бояд 15 дарсад афзоиш дода шавад.

Пашинян ва Алиев барои "гуфтугӯ омодаанд", вале шартҳои худро доранд

Раиси ҷумҳури Озарбойҷон Илҳом Алиев (аз рост) бо сарвазири Арманистон Никол Пашинян. Акс аз бойгонӣ

Сарвазири Арманистон Никол Пашинян гуфт, омодааст бо президенти Озарбойҷон Илҳом Алиев барои ҳалли низои Қарабоғи Куҳӣ дар шаҳри Москваи Русия гуфтугӯ кунад.

Арманистон ҳамзамон ҳалли мақоми Қарабоғи Куҳиро шарт гузоштааст. Пашинян дар ин бора дар суҳбат бо хабаргузории русии ТАСС изҳори назар кард. Дар Ереван исрор мекунанд, ки ба мардуми Қарабоғи Куҳӣ ҳаққи худмуайянкунӣ дода шавад.

Илҳом Алиев низ дар суҳбат бо ТАСС аз омодагии худ барои гуфтугӯи ҳалли низои Қарабоғи Куҳӣ хабар дод. "Мо ҳам сулҳро мехоҳем. Вале бар хилофи Арманистон, минтақаҳоеро низ мехоҳем, ки ба мо тааллуқ доранд", - изҳор дошт президенти Озарбойҷон.

Ба навиштаи "Новая газета", артиши Ҷумҳурии эътирофнашудаи Қарабоғи Куҳӣ хабар додааст, ки дар натиҷаи даргириҳо 729 сарбози арманӣ кушта шудааст. Озарбойҷон талафоти худро ошкор намекунад. Алиев гуфт, маълумот дар бораи талафотро баъди хатми задухурдҳо эълом мекунанд.

Дар Қазоқистон тафтиш дар фурудгоҳҳо сахттар ва дари синамоҳо боз шуд

Акс аз бойгонӣ.

Дар Қазоқистон сар аз 26 октябр иҷозат доданд, ки синамоҳо дари худро боз кунанд. Аммо аз онҳо талаб шудааст, ки толорро на бештар аз 30 дарсад пур кунанд ва аз муштариҳо риояи фосила ва пӯшидани ниқобро талаб кунанд.

Ин қарорро Комисияи байниидоравии пешгирӣ аз паҳншавии вабои коронавируси Қазоқистон қабул кардааст.

Ҳамзамон гуфта шудааст, ки ин қарор дар айни ҳол ба шаҳру вилоятҳои Нурсултон, Алмато, Мангистау, Қазоқистони Ғарбӣ, Қазоқистони Шарқӣ ва Атирау дахл дорад. Ин ҳам дар ҳолест, ки сар аз 19 октябр чораҳои карантинӣ дар Нурсултону Алмато ва Қарағандаву Атирау сахттар шудааст.

Синамо ба бахши иншооти тиҷорӣ шомил мешавад, ки фаъолияти онҳо аз оғози воридшавии вабои коронавирус ба Қазоқистон аз нимаҳои моҳи марти соли ҷорӣ манъ шудааст. Ба иттилои мақомоти он кишвар, зиёни иқтисодии синамоҳои Қазоқистон дар ин давра ба 20 миллиард танга расидааст.

Ба ҷуз ин, мақомоти Қазоқистон тасмим гирифтанд, ки чораҳои беҳдоштиву эпидемиологӣ дар гузаргоҳҳои марзии кишварро сахттар кунанд. Ба ин тартиб, шуруъ аз 26 октябр парвозҳои байналхалқӣ кам карда хоҳад шуд ва ҳамаи касоне, ки вориди Қазоқистон мешаванд, ба таври ҳатмӣ аз ташхиси коронавирус хоҳанд гузашт.

Ин дар ҳолест, ки дар Қазоқистон фаъолияти муассисаҳои томактабӣ, саққобозӣ ва толори бозиҳои компютерӣ, муассисаҳои тафреҳӣ, толори тую маъракаҳо ва клубҳои шабона ҳанӯз манъ аст.

Дар як рӯзи охир дар Қазоқистон 102 ҳолати нави гирифторӣ ба вабои коронавирус сабт шудааст. Дар маҷмуъ дар он кишвар аз 13 март ба ин тараф 109 ҳазору 508 сокин ба ин вабо мубтало шудааст.

Дар Минск ҳазорон нафар бо талаби истеъфои Лукашенко дигарбора ба хиёбонҳо рехтанд

Даҳҳо ҳазор нафар аз мардуми Белорус дигарбора ба хиёбонҳои шаҳри Минск рехтанд ва истеъфои Александр Лукашенкоро талаб карданд. Таҳдиди мақомот барои истифодаи аслиҳаи оташфишон ҳам монеи онҳо нашуд.

Рӯзи панҷшанбе сардори Раёсати мубориза бо ҷиноятҳои муташаккилона ва ришвахорӣ дар Белорус, тазоҳургаронро бандитҳо номид ва гуфт, ки "албатта мо ба зидди онҳо аз аслиҳа, аз ҷумла аслиҳаи оташфишон истифода мебарем ва ба шакли инсонӣ".

Хабаргузории "Интерфакс" навишт, ки дар тазоҳурот 30 ҳазор нафар ширкат кардаанд. Ба гуфтаи созмони ҳомии ҳуқуқи "Весна", бештар аз 100 нафар дастгир шудаанд.

Тазоҳуроти оммавӣ дар Белорус ҳафтаҳост, ки идома дорад, баъди аз интихоботи президентии рӯзи 9-уми август шуруъ шуд. Мақомот гуфтанд, Александр Лукашенко, ки аз соли 1994 Белорусро раҳбарӣ мекунад, 80 дарсади раъйи мардумро ба даст овардааст.

Мақомоти интизомӣ то кунун бештар аз 13 ҳазор нафар, аз ҷумла чанд фаъоли мухолифонро, ки дар кишвар монданд, дастгир кардаанд. Светлана Тихановская, пешвои мухолифон, ки ба Литва гурехт, аз Лукашенко хостааст, ки то 25-уми октябр истеъфо бидиҳад, дар акси ҳол мардум ба коршикании оммавӣ оғоз мекунанд.

Мирзиёев ба як рӯзноманигори мунтақид хона тӯҳфа кард

Бобомурод Абдуллоев, рӯзноманигори узбекистонӣ.

Бобомурод Абдуллоев, рӯзноманигори узбекистонӣ, ки чанде пеш аз шаҳри Бишкеки Қирғизистон ба Тошканд истирдод шуд, аз номи президенти Узбекистон Шавкат Мирзиёев хонаи сеҳуҷрагӣ тақдим карданд. Дар ин бора Абдуллоев дар саҳифаи Фейсбук рӯзи 18 октябр хабар дод.

"Рӯзи 8 сентябри соли ҷорӣ президенти Узбекистон Шавкат Мирзиёев ба ман хонаи нави сеҳуҷраӣ бо ҳамаи ҷиҳозаш дар маҷмаии истиқоматии "Green Park"-и шаҳри Тошканд тақдим кард. Мо рӯзи 5 октябр ба ин хона кӯчидем. Алҳамдулиллоҳ! Сипос ба президент Шавкат Мирзиёев! Худо аз вай розӣ бошад!", - навишт рӯзноманигор.

Бобомурод Абдуллоевро ибтидои моҳи августи соли ҷорӣ дар шаҳри Бишкеки Қирғизистон боздошт ва рӯзи 22 август ба Узбекистон истирдод карданд.

Вай рӯзи 22 август баъди бозпурсии ҳаштсоата аз сӯи мақомоти Узбекистон дар шаҳри Тошканд, озод шуд.

Мақомоти Узбекистон расман хабар надоданд, ки Абдуллоевро дар робита ба кадом парванда бозпурсӣ кардаанд.

Худи рӯзноманигор ҳанӯз дар шаҳри Бишкек гуфта буд, ки ӯро дар навиштани мақолаҳои зиддиҳукуматӣ бо имзои мустаори "Қора Мерган" айбдор мекунанд.

Абдуллоев ин айбро рад карда буд.

Ин рӯзноманигор дар соли 2017 бори аввал бо гумони сарнагун сохтани сохти конститутсионии Узбекистон боздошт ва моҳи майи соли 2018 озод шуда буд.

Пешниҳоди ҷамъоварии маблағ аз мардум дар Қирғизистон барои пардохти қарзи Чин

Акс аз бойгонӣ.

Дар Қирғизистон пешниҳод доранд, ки барои пардохти қарзи давлатӣ аз Чин маъракаи ҷамъоварии маблағ аз сокинон роҳандозӣ шавад. Дар ин бора рӯзи 18 октябр вакили порлумони Қирғизистон Айнура Олтибоева хабар дод.

"Мо шароит фароҳам меоварем, ки ин раванд шуруъ ва идома пайдо кунад. Ҳоло чорабиниҳои омодагӣ идома доранд, шароити таъсиси суратҳисоби бонкӣ ҳал шудааст. Баъди гуфтугӯ бо вазорати молия масъалаи кушодани суратҳисобро ҳал мекунем. Раванди ҷамъоварии маблағ шаффоф хоҳад буд", - гуфт Олтинбоева.

Моҳи сентябри соли ҷорӣ вазири корҳои хориҷии Чин Ван И ба Қирғизистон омада буд. Вай бо президенти пешини Қирғизистон Сооронбой Ҷеенбеков аз ҷумла дар мавзуи тамдиди муҳлати баргардонии қарзҳои Чин суҳбат кард.

Ба иттилои расмӣ, қарзи хориҷии Қирғизистон 4 миллиарду 169,6 миллион долларро ташкил медиҳад. Аз ин миқдор 1 млрд 776,29 млн доллар аз Чин аст.

Варзишкорони қазоқ бинобар КОВИД-19 аз сафарҳои хориҷӣ маҳрум шуданд

Акс аз бойгонӣ.

Вазорати тандурустии Қазоқистон ба далели густариши коронавирус варзишкорони кишварро аз сафар ба хориҷ маҳрум кард.

"Дар робита ба болоравии омори беморӣ дар саросари дунё, бо ҳадафи назорати ҷиддии марзҳо ба варзишкорон иҷозат дода намешавад, ки дар мусобиқаҳо ширкат кунанд. Ҳамзамон парвозҳо бо Украина, Имороти Муттаҳидаи Арабӣ, Олмон ва Белорус кам карда шаванд",-омадааст дар хабари Вазорати тандурустии Қазоқистон.

Тими мунтахаби футболи Қазоқистон, бошгоҳи баскетболи "Остона" ва бошгоҳи хоккейи "Барис" тибқи ҷадвали аз қабл муайншуда мусобиқа доранд. Эҳтимол дорад, ки ба сафари ин тимҳо ба таври истисно иҷозат дода шавад.

Бино ба иттилои мақомоти он кишвар, рӯзи 18 октябр 102 ҳолати мубталошавӣ ба коронавирус сабт гардида, ба ин тартиб шумораи умумии мубталоён дар он кишвар ба 109 ҳазору 508 кас расидааст.

Муаллифи смайлики "Чашмони Назарбоев" дар Алмато кушта шуд

"Смайлик" бо акси Нурсултон Назарбоев.

Дар шаҳри Алмато Собит Сирахон (Bisen), тарроҳ ва муаллифи "смайлик" бо акси президенти нахустини Қазоқистон Нурсултон Назарбоев дар натиҷаи латтукӯби шадид ҷон бохт.

Дар ин бора дӯстони тарроҳ дар шабакаҳои иҷтимоӣ хабар доданд. "Ноодамон дӯсти маро зери мушту лагад қарор дода, ягон узвашро солим нагузоштаанд. Ӯро аз пойафзолҳояш шинохтем",-навиштааст рэпер Бекболат Кайдаров дар Инстаграм.

Департаменти пулиси Алмато рӯзи душанбе хабар дод, ки дар робита ба куштори тарроҳ бародари дӯстдухтари Сирахон дастгир шудааст. Гумонбар ҳангоми бозпурсӣ эътироф кардааст, ки "ҳарифашро ба хотири муносибатҳои номуносиб" латтукӯб кард.

Ба иттилои пулис, гумонбар боздошт ва ба ҳабси пешакӣ гирифта шудааст.

Яке аз корҳои маъруфи Сирахон логотипи "Чашмони Назарбоев", истинод ба Нурсултон Назарбоев мебошад. Сирахонро ҳамчунин тарроҳи бренди маъруфи "streetwear" меноманд.

Кумитаи амнияти Қирғизистон 40 "шарик"-и Матраимовро муайян кардааст

Райимбек Матраимов.

Кумитаи давлатии амнияти миллии Қирғизистон мегӯяд, тафтиши парвандаи фасодкорӣ дар Хадамоти гумруки ин кишвар аз сӯи муовини раиси пешини хадамот Райимбек Матраимов ва мансабдорони дигар идома дорад.

Ба огаҳии кумита, тафтишот шахсияти 40 нафареро муайян кардааст, ки бо Матраимов робита ва дар нақшаи фасодкории ӯ даст доштаанд.

"Дар ҳоли ҳозир маҳалли будубоши ин шахсон маълум аст. Корҳо дар самти муайянсозии даст доштанашон дар нақшаи мазкури фасодкорӣ фаъолона идома доранд",-афзудааст кумита.

Ҳамчунин гуфта мешавад, дар доираи парвандаи фасодкорӣ дар Хадамоти гумруки Қирғизистон ҳаҷми хисороти расида ба давлат низ муайян карда хоҳад шуд.

Кумитаи давлатии амнияти Қирғизистон аз оғози тафтиши фасодкорӣ дар Хадамоти гумруки ин кишвар 17 октябри соли равон хабар дода буд. Ба гуфтаи масъулони кумита, дар Хадамоти гумруки Қирғизистон аз соли 2016 то ба ҳол бо иштироки Райимбек Матраимов ва мансабдорони масъули гузаргоҳҳои марзӣ нақшаи фасодкорие амал мекунад.

Номи Райим Матраимов, ки бо лақаби "Раим миллион" низ маъруф аст, дар силсила таҳқиқотҳои рӯзноманигорӣ зикр шудааст. Ба навиштаи расонаҳо, хонаводаи Матраимовҳо дар чанд соли охир зиёда аз 700 миллион долларро "ғайриқонунӣ" аз Қирғизистон ба хориҷ бурдааст.

Сафари Доктор Абдулло ба Эрон

Теҳрон, 18-уми октябр. Мулоқот Абдулло Абдулло бо вазири хориҷаи Эрон Ҷавод Зариф

Абдулло Абдулло, раҳбари ҳайати музокиротии Афғонистон рӯзи 18-уми октябр ба Эрони ҳамсоя сафар кард, то давоми се рӯз бо мақомоти эронӣ дидору гуфтугӯ анҷом диҳад. Ин дар ҳолест, ки дар шаҳри Давҳаи Қатар музокироти сулҳи ҳукумати Афғонистон ва раҳбарияти гурӯҳи шӯришии Толибон идома дорад ва ҷонибҳо то ҳол дар масъалаи сохтори музокираҳое, ки ҳадафаш хатми ҷангҳои 19-солаи Афғонистон аст, ба мувофиқа даст наёфтаанд. Эрон бозигари муҳими минтақавӣ ба шумор меравад. Доктор Абдулло дар Твиттераш навишт, ки дар мулоқот бо мақомоти эронӣ роҷеъ ба сулҳи Афғонистон ва дигар масоили марбут ба ҳамкориҳои дарозмуддати дуҷониба сӯҳбат мекунад. Рӯзи 18-уми октябр расонаҳо аз мулоқоти ӯ бо вазири хориҷаи Эрон Ҷавод Зариф хабар доданд.

Қабл аз ин ӯ бо айни чунин барнома дар Покистон буд. Муносибатҳои Эрони ғолибан шиамазҳаб бо гурӯҳи шӯришии аксар аъзояш суннимазҳаби Толибон печида аст. Эрон расман бо Толибон дар ихтилоф аст, вале коршиносон мегӯянд, ки Теҳрон ба ҷангиён ва гурӯҳҳои ҷудоиталаби дохили ин гурӯҳ кӯмакҳои муайяни низомӣ мекунад.

Тадбирҳои бештари полиси Фаронса баъди қатли як омӯзгор

Мардум дар сӯги омӯзгори кушташуда дар пушти дари мактаб ҷамъ шудаанд

Мақомоти Фаронса гуфтанд, ки баъди қатли як омӯзгори маҳаллӣ бо дасти як тундрави исломӣ тадбирҳои бештари амниятиро рӯидаст гирифтааст. Омӯзгори таърих Самуэл Пати рӯзи 16-уми октябр дар беруни мактабе, ки кор мекард, сар бурида шуд. Ин корро ҷавони 18-солае анҷом дод, ки дар паи таъқиби полис ба қатл расид. Ҳамлагар як ҷавон чечентабори дар Русия таваллудшуда буд, ки дар шаҳри Эврёи шимолуғарби Париж зиндагӣ мекард. Исми ӯ аз ин пеш ба ходимони амният ошно набуд. Куштори омӯзгор мавриди эътирози бисёр сокинони Фаронса ва маҳкумияти президент Эммануэл Макрону раҳбарони ҳизбҳои сиёсӣ шуд. Вазири умури дохилӣ Жерал Дарманин рӯзи 19-уми октябр гуфт, ки ҳоло тахминан 80 тафтише ба роҳ монда шудааст, ки бадгӯӣ дар Фаронсаро таҳқиқ мекунад. Дарманин инчунин гуфт, ки мақомот ин масъаларо баррасӣ доранд, ки барои таблиғи хушунату бадбинӣ дар Фаронса шояд бархе гурӯҳҳои ҷомеаи мусалмонӣ баста шаванд. Дарманин гуфт, ки падари як хонандаи мактаб ва як ҷангҷӯи исломӣ қатли Патиро тақозо карда буданд. Куштори муаллим Фаронсаро такон дод ва ба ёди ҳамлаи панҷ сол пеш ба идораи маҷаллаи ҳаҷвии “Шарли Эбдо” бурд, ки карикатураҳои Муҳаммад Пайғамбарро нашр карда буд.

Занозании дипломатҳои чиниву тайванӣ дар Фиҷи

Харитаи Тайван

Вазорати хориҷаи Тайван бо нашри изҳороте рӯзи 19-уми октябр гуфт, ки дар маросими таҷлил аз Рӯзи миллии Тайван дар кишвари Фиҷи миёни дипломатҳои чинӣ ва кормандони ҳукумати Тайван як занозанӣ рух дод. Ҷоанн Оу, сухангӯи вазорати хориҷаи Тайван дар як изҳороти хаттиаш гуфт, “вазорати хориҷа кори кормандони сафорати Чин дар Фиҷиро ба шиддат маҳкум мекунад, чун рафтори онҳо бо қонун ва меъёрҳои рафтори маданӣ дар ихтилоф аст”. Пекин дар талоши ин аст, ки ҳукуматҳои дигар кишварҳоро водор бикунад, ки аз Тайван дурӣ биҷӯянд. Баъди як ҷанги шаҳрвандии соли 1949 ҷазираи Тайван аз Чин ҷудо шуд, вале Чин инро эътироф намекунад. Ахиран Чин ба наздикиҳои ҷазираи демократии Тайван ҳавопаймоҳои ҷангии худро фиристод. Вазорат гуфт, ки ҳодисаи заноназанӣ шоми 8-уми октябр дар маросими ташкилкардаи намояндагии расмии Тайван дар пойтахти Фиҷи – шаҳри Сува рӯй дод. Ду дипломати чинӣ талош карданд, ки аз меҳмонҳои ҷамъшуда аксу маълумот ҷамъоварӣ кунанд. Ба ин маърака инчунин бархе сиёсатмадорон ҳам даъват шуда буданд. Вале вақте дипломатҳои тайванӣ талош карданд онҳоро аз ворид шудан ба меҳмонгоҳ пешгирӣ кунанд, хушунат бархост. Дар натиҷа, як дипломати тайванӣ бо ҷароҳатҳои сар ба беморхона интиқол ёфт. Полиси Фиҷи дипломатҳои чиниро аз маърака берун кард.

Эътирози зидди маҳдудиятҳои марбут ба пандемия дар Прага

Майдони Шаҳри Кӯҳнаи Прага рӯзи 18-уми октябр ба макони бархӯрди эътирозгарон бо полис табдил шуд

Маҳдудиятҳои нав дар паи нигаронӣ аз паҳншавии бештари коронавирус боиси як задухӯрди ҳаводорони варзиш дар Прага ва полиси маҳаллӣ шуд. Рӯзи 18-уми октябр дар Прага 2 ҳазор ҳаводори футбол ва ҳоккей дар раҳпаймоии эътирозӣ алайҳи ҷоришавии маҳдудиятҳои нави дуҳафтаинаи марбут ба пандемия ҷамъ шуданд. Маҳдудиятҳо маъракаҳои варзишии байналмилалиро сарфи назар мекунад. Дар маркази шаҳри Прага эътирозгарон ба сӯи полис шишаву дигар мавод партофтанд ва дар ниҳоят полис барои пароканда кардани эътирозгарон аз маркази шаҳр аз бобмаҳои дудзо, оташафрӯз ва лӯлаҳои об истифода кард. Дар ин ҳодиса чанд нафар, аз ҷумла ходимони полис маҷрӯҳ шуданд. Полис гуфт, ки эътирози серҷамъият муқаррароти маҳдудкунандаи давраи пандемияро нақз мекунад, чун дар як ҷо дар хиёбон ҷамъ шудани беш аз 500 нафар манъ аст. Дар Ҷумҳурии Чех мисли дигар нуқоти Аврупо ҳодисаҳои олудашавии рӯзона ба коронавирус дар ҳоли афзоиш аст.

Дар Аврупо омори марги инсонҳо аз COVID-19 аз 250 ҳазор гузашт

Фаронса. Кӯдакон пеш аз ворид шудан ба синфхона дастонашонро мешӯянд

Рӯзи 18-уми октябр шумори афроди бар асари вируси нав даргузашта дар саросари Аврупо аз 250 ҳазор нафар гузашт. Дар ин қора дар ҳафтаҳои охир ҳодисаҳои ошкоршавии ҳодисаҳои нави гирифторӣ ба вирус якбора афзоиш ёфтааст. Айни замон, дар Исроилу Австралия мақомот аз сабуктар шудани маҳдудиятҳо ва коҳиши суръати гирифторшавиҳои нав ба коронавирус хабар медиҳанд. Дар Аврупо афзоиши ҳодисаҳои нави гирифторӣ дар як ҳафтаи охир 44 дарсадро ташкил дода, бархе кишварҳоро водор кардааст, ки маҳдудиятҳои нав ҷорӣ кунанд.

Дар Амрикои Шимоливу Ҷанубӣ ҳам мубориза бар зидди коронавирус шиддат гирифтааст. Дар ИМА рӯзи 17-уми октябр 52 ҳазор ҳодисаи нави олудагӣ ба қайд гирифта шуд ва ин дар қиёс бо 2 ҳафтаи аз ин пеш 28 дарсад бештар будааст. Ҳодисаҳои фавт 679 адад бештар шуда, ба 220 ҳазор нафар наздик мешавад. Дар Бразилия вазири беҳдошташ рӯзи 17-уми октябр гузориш дод, ки дар 24 соати гузашта беш аз 24 ҳазор ҳодисаи нави олудагӣ ва 461 ҳодисаи марг бар асари COVID-19 ба қайд гирифта шудааст. Дар Исроил дар паи маҳдудиятҳои бисёр сахту сангин, аз ҷумла манъи ҳақи сафар дар фосилаи беш аз 1 км аз хона тавонистанд дар ҷилавгирии бештар аз паҳншавии беморӣ муваффақ шаванд.

Халилзод гуфт, хушунатҳои идомаёбанда созиши сулҳро бо хатар рӯбарӯ мекунад

Залмай Халилзод, фиристодаи ИМА барои Афғонистон

Залмай Халилзод, фиристодаи хоси Амрико барои Афғонистон рӯзи 18-уми октябр гуфт, ки идомаи ҳамлаву хунрезӣ метавонад музокироти сулҳ дар кишварро аз роҳаш берун кунад. Ӯ дар ин бора баъд аз бомбгузории маргбор дар шаҳри Ғур суҳбат кард, ки дар натиҷаи он 14 нафар кушта шуданд. Айни замон намояндагони ҳукумати Афғонистон ва Толибон дар Қатар барои поён додан ба ҷанги 19-сола дар кишвар гуфтугӯ доранд. Залмай Халилзод дар Твиттер навишт, ки хушунат муддатҳои дароз афғонҳоро думболагирӣ кардааст ва фоҷиа дар Ғур, ки дар назди қароргоҳи пулис сурат гирифт, яке аз намунаҳои нави он аст. Ӯ ҳушдор додааст, ки боварӣ ба он ки бо зӯроварӣ касе метавонад тарафи дигарро ба гузашт водор кунад, “бисёр хатарнок” аст, зеро ба қавли Залмай Халилзод, раҳбарони Афғонистон дар гузашта бо ҳамин бовар хато кардаанд. Дипломати амрикоӣ хост, тамоми муқаррароти созише, ки қабл аз оғози музокироти сулҳ дар Қатар ба имзо расид, риоят шавад. Рӯзи 18-уми октябр дар натиҷаи таркиши бомб дар шаҳри Фирӯкуҳ, маркази вилояти Ғур 14 нафар кушта шуданд ва 119 тани дигар ҷароҳат бардоштанд. Раиси вилоят гуфт, ки бомбгузорӣ кори дасти Толибон аст.

Навалний гуфт, бо вуҷуди мухолифати мақомот, ба Русия бармегардад

Алексей Навалний. Акс аз шабакаҳои иҷтимоӣ

Алексей Навалний, пешвои мухолифони Русия мегӯяд, ҳукумат ҳаматарафа саъй дорад, монеи бозгашташ ба Маскав шавад, вале бо ин вуҷуд ӯ бархоҳад гашт. Алексей Навалний дар як суҳбате бо телевизиони Си Би Эс-и Амрико, ки рӯзи 18-уми октябр нашр шуд, гуфт, азм дорад, баъд аз чанд моҳ ба Русия баргардад ва кори нотамомашро идома бидиҳад. Ӯ дар шаҳри Берлин бо Си Би Эс суҳбат кардааст, ки онҷо баъди заҳролуд шуданаш аз моддаи кимиёвии кушанда аз гуруҳи "Новичок" муолиҷа мегирифт. Алексей Навалний, ки моҳи август дар дохили ҳавопаймо бемор шуд, иддао дорад, ки заҳролуд карданаш кори дасти мақомоти Маскав аст. Ӯ мегӯяд, ки ҳар рӯз барои дармон ба шифохона меравад ва ҳанӯз ҳам эҳсоси карахтӣ дорад. Алексей Навалнийро рӯзи 22-уми сентябр баъди 32 рӯзи муолиҷа аз шифохонае дар Берлин ҷавоб доданд. Ӯ дар мусоҳибааш мегӯяд, ки баъди даст расондан ба зарфи пластикии об заҳролуд шудааст. Ба қавли Навалний, заҳри қотил на дар дохили оби нӯшиданӣ, балки дар бадани худи зарфи он будааст.

Эътирозҳои Беларус бо вуҷуди таҳдид ба саркӯби хунин идома ёфт

18-уми октябр, Минск

Дар шаҳри Минск бо вуҷуди таҳдиди вазорати умури дохилӣ ба истифодаи нирӯи сангин алайҳи эътирозгарон даҳҳо ҳазор сокини Беларус бо талаби истеъфои Александр Лукашенко раҳпаймоӣ намуданд. Мақомот дар пойтахт мошинҳои низомиву обпошҳоро ҷойгир карданд, вале дар эътирозҳои 18-уми октябр боз ҳам полис аз истифодаи ин васоил барои пароканда кардани эътирозгарон худдорӣ намуд. Гурӯҳи ҳомии ҳуқуқи “Весна” гузориш дод, ки рӯзи якшанбе дар Минск дастикам 200 нафар ва дар шаҳрҳои дигар беш аз 30 нафар дастгир шудааст. Як рӯз пеш аз эътирозҳо муовини аввали вазири дохилӣ Геннадий Казакевич таҳдид кард, ки “агар зарур буд”, барои пароканда кардани эътирозгарон “аз силоҳҳои марговар” ҳам истифода хоҳад шуд. Мақомот эътирозҳоро ғайриқонунӣ меноманд. Ин аввалин бор аст, ки мақомот дар Беларус ба истифодаи силоҳ алайҳи эътирозгарон таҳдид мекунанд. Баъди дар интихоботи президентии 9-уми август пирӯз эълон шудани Александр Лукашенко, ки аз соли 1994 сари қудрат аст, мардум дар Беларус пайваста эътироз мекунанд.

Оҳангсози тоҷик Диловари Зуҳуриён дар садамаи нақлиётӣ ба ҳалокат расид

Диловари Зуҳуриён дар пайи як садамаи автомобилӣ даргузашт.

Диловари Зуҳуриён, оҳангсози тоҷик шаби гузашта дар пай як садамаи нақлиётӣ ҷон бохт. Аз Дафтари матбуоти Вазорати умури дохилии Тоҷикистон ба Радиои Озодӣ гуфтанд, ки садама соати 24:30 дақиқа дар шоҳроҳи Данғара-Ваҳдат дар деҳаи Чиртак рух додааст.

Ба иттилои манбаъ, оҳангсози тоҷик бо автомашинаи тамғаи "Мерседрс"-и худ муқобили самти ҳаракат баромада, ба як боркаши "Чакман" бархӯрдааст. Манбаъ мегӯяд, ӯ ва як мусофираш дар ҷои ҳодиса ба ҳалокат расидаанд. "Аз автомашинаи боркаш касе зарар надидааст",-афзуд манбаъ.

Ба гуфтаи Шоираи Раҳимҷон, шоира ва таронанависи тоҷик, маросими видоъ бо ин оҳангсоз дар зодгоҳаш ноҳияи Данғара баргузор шуд. Як манбаи дигар гуфт, Диловари Зуҳуриён як рӯз пеш аз ин ҳодиса, барои бори дуввум издивоҷ кардааст.

Дар шабакаҳои иҷтимоӣ аз Диловари Зуҳуриён як оҳангсозӣ касбӣ ном бурдаанд. Баъзе аз дӯстонаш марги ӯро талафоти бузург барои санъати эстрадаи кишвар арзёбӣ намуданд.

Чанде аз оҳангҳои бо тозагӣ эҷоднамудаи ин ҳунарманд то ҳанӯз пешкаши мухлисонаш нашудааст. Сафаргул Юсуфова, сарояндаи тоҷик дар сӯҳбат ба Радиои Озодӣ гуфт, Диловар барои ӯ чаҳор оҳанг навишта буд, ки ҳанӯз дастрасӣ мардум нашудааст. Ба қавли ӯ, яке аз ин оҳангҳо дар мавриди аз ғаму ғуссаи таъсири пандемияи коронавирус берун овардани мардум аст.

"Ду оҳанги дигараш дар мавзӯи баҳор ва яке дигар оҳанги ошиқона мебошад. Ташвиши хонадоршавияш имкон надод, ки ин оҳангҳо ба пуррагӣ ба анҷом расанд. Танзим шудаанд, вале сабти овоз мондааст, умедворем ба наздикӣ пурра омода шуда, пешкаши мардум мегарданд".

Баъзе огоҳони санъати тоҷик бар ин назаранд, ки Диловари Зуҳуриён бо фарқ аз оҳангсозони дигар вижагиҳои худро дошт ва ҳунари ӯ барои ҳамеша дар қалби мухлисонаш мемонад.

Қурбоналӣ Абдуллоев, сарояндаи дигари тоҷик дар сӯҳбат ба Радиои Озодӣ гуфт, Диловари Зуҳуриён бисёр ҷавони эҳсосотӣ ва ҳунарманди хуб буд. Абдуллоев афзуд, соли 2000-ум вақте ки Диловар ба саҳнаи калони санъати тоҷик қадам гузошт, як навоварию тозагие ба ҳамроҳаш овард.

"Қариб бо ҳамаи ҳунармандон ҳамкорӣ дошт, аз ҷумла бо ман низ. Ӯ бисёр мутриби олӣ буд ва ҳангоми фаҳмонидани ҳунарманд, овозхон бисёр серталаб буд, то дараҷаи комил нозукиҳои корашро медонист. Ӯ худ дар баробари оҳангсоз будан, хонандаи хуб ҳам буд. Фикр мекунам марги ӯ як зарбаи қавӣ ба санъати имрӯзи мо аст”.

Исми Диловари Зуҳуриёни 46-сола ҳанӯз аз солҳои 2000-ум бо оҳангҳои маъруфе, ки барои Манижа Давлатова, Садриддин Наҷмиддин ва дигар овозхонони номдори тоҷик навиштааст, шинохта шуд.

Вай муаллифи оҳангҳои маъруфи "Дили дардманд", "То ҳастаму ту ҳастӣ"-и Манижаи Давлат, таронаи "Модар" ва "Гӯшаи бом"-и Сироҷиддини Фозил аст. Худаш дар як мусоҳибаи имсолаш гуфта буд, ки тақрибан 500 оҳанг эҷод кардааст. Диловари Зуҳуриён чанд моҳи ахир ба ҳайси оҳангсози дастаҳои ҳунарии Кумитаи телевизион ва радио фаъолият мекард.

Ду "фирорӣ аз Чин" дар Қазоқистон паноҳандагӣ дарёфт карданд

Кастер Мусохонулӣ ва Мурагер Олимулӣ, ду қазоқтабор аз Чин.

Ду қазоқтабори чинӣ - Кастер Мусохонулӣ ва Мурагер Олимулӣ барои як сол дар Қазоқистон паноҳандагӣ пайдо карданд. Дар ин бора вакили мудофеи онҳо Абдулло Бакберген хабар дод. Ин ду қазоқтабор нахустин фирориёни чинӣ ҳастанд, ки дар Қазоқистон расман паноҳандагӣ дарёфт кардаанд.

Мусохонулӣ ва Олимулӣ моҳи октябри соли 2019 аз Шинҷони Чин фирор ва бо убури марз вориди Қазоқистон шуданд. Ба маҳзи ворид шудан ба Қазоқистон, онҳо нишасти хабарӣ баргузор ва сабабҳои фирорашон аз Чинро нақл карданд. Ба гуфтаи Мусохонулӣ ва Олимулӣ, мақомоти Чин уйғурҳо, қазоқтаборон ва дигар мардуми бумии Шинҷонро, ки асосан пайрави ислом ҳастанд, таъқиб мекунанд.

Мақомоти Қазоқистон ин ду фирориро боздошт ва барои убури ғайриқонунии марз яксолӣ зиндон кард. Додгоҳ онҳоро ба Чин истирдод накард. Охири моҳи июн баъди бештар аз ҳашт моҳи ҳабс ду қазоқтабори фирорӣ аз зиндон озод шуданд.

Чин ба хотири нигаҳдории иҷбории беш аз як миллион уйғур, қазоқтабор ва намояндаи ақалиятҳои дигари мусулмон дар "марказҳои бозтарбия"-и Шинҷон аз соли 2017 ба ин сӯ мавриди интиқоди ҷомеаи байналмилалӣ қарор дорад. Худи Пекин иттиҳомро рад карда, урдугоҳҳоро "марказҳои омӯзишӣ"-е меномад, ки гӯё ба хотири мубориза бо терроризму экстремизм таъсис дода шудаанд.

Фавти маҳбусон дар зиндони занонаи Туркманистон

Яке аз зиндонҳо дар ғарби Туркманистон. Акс аз бойгонӣ.

Дар зиндони занонаи Туркманистон давоми рӯзҳои ахир чанд маҳбус фавтидааст. Як манбаъ 16 октябр гуфт, маҳбусон бар асари коронавирус фавтидаанд.

Наздикони се маҳбуси зиндони занонаи вилояти Дашоғуз, ки бо Узбекистон ҳаммарз аст, фавти пайвандони худро дар суҳбат бо бахши туркмании Радиои Озодӣ тасдиқ карданд.

Ба гуфтаи ҳамсуҳбатони мо, мақомот ҷасади маҳбусонро ба наздиконашон надодаанд.

Як манбаи огаҳ аз қазия гуфт, шумораи мубталоён дар зиндон "хеле зиёд" буд. Ба гуфтаи ӯ, дар ҳудуди зиндон макони махсус барои карантин ташкил шуда, дар он беш аз 200 маҳбус нигаҳдорӣ мешуд ва баъзе аз онҳо дар ҳолати вазнин буданд.

"Ин вазъ аввалҳои моҳи сентябр рух дод. Вале раҳбарияти зиндон зоҳиран мехост, онро пинҳон кунад. Вале вақте вазъ мушкилтару мақомоти болоӣ аз он огаҳ шуданд, ба зиндон дастгоҳҳои озмоишиву ташхисӣ оварданд. Дар натиҷа маълум шуд, ки вирус ба шуши садҳо маҳбус сироят кардааст",-изҳор дошт як манбаъ ба шарти ифшо нашудани номаш.

Ин дар ҳолест, ки мақомоти Туркманистон ҳанӯз ҳам ба мавҷуд набудани коронавирус дар ин кишвар исрор мекунанд.

Ёфтҳои бештар

XS
SM
MD
LG