Пайвандҳои дастрасӣ

Вазорат: Шамсия ба зудӣ ба Тоҷикистон бармегардад.CАДО


Шамсия Асаналишоева

Вазорати умури хориҷии Тоҷикистон гуфт, ки Шамсия Асаналишоева аз “асорати” кордиҳандааш дар Арабистони Саудӣ раҳо шудааст ва, қарор аст, ӯро ба Тоҷикистон баргардонанд.

Дар ҷараёни суҳбат дар сафорат маълум шуд, ки Шамсия Асаналишоева дар шароити бисёр вазнини корӣ фаъолият ва зиндагӣ намудааст.

Департаменти иттилоот, матбуот, таҳлил ва тарҳрезии сиёсати хориҷии вазорат рӯзи 31-уми май дар посухи расмӣ ба Радиои Озодӣ гуфт, вазъи сиҳатии Асаналишоева хуб аст ва дар сафорати Тоҷикистон дар Риёз, “барояш шароити хуби маишӣ ва истироҳатӣ фароҳам оварда шудааст.” Вазорати умури хориҷӣ мегӯяд, дипломатҳои тоҷик дар Арабистони Саудӣ аз рӯзи 19-уми май пайваста аз аҳволи Шамсия Асаналишоева бохабар буданд ва барои ҳалли фаврии мушкилоти ӯ бо ширкати кордиҳандаи Холид Ал-Уътейбӣ “Awail Office for Services” гуфтӯгуи зиёде анҷом додаанд.

Бинои Вазорати умури хориҷии Тоҷикистон
Бинои Вазорати умури хориҷии Тоҷикистон

Шамсия Асаналишоева ду рӯз пештар аз ин дар сӯҳбат бо Радиои Озодӣ аз шаҳри Риёз шикоят кард, ки кордиҳандааш дар Арабистон ӯро азобу шиканҷа додааст ва баъди муроҷиати ӯ ба пулис, мақомоти интизомӣ ӯро аз хонае, ки кор мекард, озод карда бурданд. Шамсия гуфт, хонуме, ки барои ӯ кор мекард, бадрафторӣ намуда ва то ним соат ӯро ба “электрошок” мондааст.

Асаналишоева аксҳоеро дар ихтиёри Радиои Озодӣ гузошт, ки доғҳои сиёҳ дар рӯй, даст ва пояшро нишон медиҳад. Ба гуфтаи Шамсия, ин осори электрошок аст.

Гузоришҳо дар бораи бадрафторӣ бо хидматгорон дар Арабистони Саудӣ бисёр зиёд аст ва бахусус бадрафторӣ бо хидматгорон аз Ҳинду Филлиппин ва Бангладеш, ки мардумаш ба инҷо барои кор меоянд.

Худи Шамсия рӯзи 31-уми май ба Радиои Озодӣ гуфт, ки воқеан дар сафорати Тоҷикистон аст. Вай аз дипломатҳои тоҷик ва консули кишвар дар Риёз бисёр сипосгузор аст, ки ба ӯ кумак карданд. Вазорати умури хориҷӣ дар номаи худ ба Радиои Озодӣ гуфтааст, ки шиносномаи Шамсия Асаналишоева шоми 30-юми май аз кордиҳандааш гирифт ва худи ӯро ба сафорат овард.

Шамсия Асаналишоева, ки соли гузашта барои кор ба Арабистони Саудӣ рафтааст, ба Радиои Озодӣ гуфт, азбаски бар хилофи қарордод ба ӯ кори зиёд мефармуданд, хост, корро бас кунад, аммо соҳиби хона бо талаби баргардондани 2 ҳазор долларе, ки барои ба кор гирифтани ӯ сарф кардааст, ӯро зери азобу шиканҷа гирифт.

Дар номаи вазорат ҳам омадааст, “дар ҷараёни суҳбат дар сафорат маълум шуд, ки Асаналишоева дар шароити бисёр вазнини корӣ фаъолият ва зиндагӣ намудааст. Тибқи гуфтаҳои ӯ корфармо маоши ӯро тибқи шартнома ҳар моҳ саривақт пардохт намекардааст. Дар баробари ин, муносибати дағалонаи корфармо ва аъзои оилаи ӯро доимо эҳсос мекардааст.”

Осори "электрошок" дар рӯи Шамсия Асаналишоева
Осори "электрошок" дар рӯи Шамсия Асаналишоева

Мақомоти Вазорати умури хориҷӣ гуфтанд, сафорат бо корфармо масъалаи бозпас фиристодани Шамсияро баррасӣ дорад. Онҳо гуфтанд, “бо назардошти онки будубоши муҳоҷирати меҳнатиро дар Арабистони Саудӣ низоми раводиди кафолат ба танзим медарорад, бозпас фиристодани ӯ вақтро талаб мекунад. Бо вуҷуди ин, сафорат аз корфармо талаб намуд, ки дар кӯтоҳтарин фурсат ҳама санадҳои заруриро барои бозпас фиристодани шаҳрвандамон омода намуда, аз натиҷа сафоратро огоҳ намояд.”

Гузоришҳо дар бораи бадрафторӣ бо хидматгорон дар Арабистони Саудӣ бисёр зиёд аст ва бахусус бадрафторӣ бо хидматгорон аз Ҳинду Филлиппин ва Бангладеш, ки мардумаш ба инҷо барои кор меоянд. Аммо бори аввал аст, ки як шаҳрванди Тоҷикистон, ба далели бадрафторӣ бо ӯ ба мақомоти пулиси Арабистони Саудӣ ва дипломатҳои тоҷик муроҷиат кардааст.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

Машваратдодашуда

XS
SM
MD
LG