Пайвандҳои дастрасӣ

Хабари нав

Дар чанд ҷумла

Суханронии сафири Тоҷикистон дар Вошингтон

Фарҳод Салим 15 маи соли 2014 сафири Тоҷикистон дар ИМА таъин шуд

Дар ҷаласаи ахири гурӯҳи муштараки байниҳукуматии Вашингтон сафири Тоҷикистон дар ИМА Фарҳод Салим роҷеъ ба имкониятҳои сармоягузорӣ ба иқтисоди Тоҷикистон суханронӣ кард. Ин нишаст рӯзи 29 феврал дар бинои ба номи Роналд Рейган ва Маркази байналмилалии тиҷорат баргузор шуд. Дар як мусоҳибаи катбӣ бо радиои Озодӣ сафири Тоҷикистон дар ИМА Фарҳод Салим гуфт, дар суханронии худ дар бораи имкониятҳои сармоягузорӣ дар Тоҷикистон, ба вижа дар масоили захираҳои обӣ энергетикӣ, коммуникатсионӣ, сайёҳӣ ва бахши хоҷагии қишлоқ сӯҳбат кардааст. Вай гуфт, ба се ҳадафи стратегии Тоҷикистон, ки президент Эмомалӣ Раҳмон низ ба онҳо таъкид кардааст, таваҷҷӯҳи ҳозиронро ҷалб кард – ин таъмини истиқлолияти энергетикӣ, раҳоӣ аз бунбасти коммуникатсионӣ ва ҳифзи амнияти озуқаворӣ мебошад. Ба иттилои сафир, дар миёни ширкатдорони ин ҳамоиш намояндагони расмӣ, доираҳои тиҷоратӣ, таҳлилгарон ва коршиносоне, ки ба минтақа таваҷҷӯҳ доранд, иштирок карданд. Ин мулоқот дар ҳамкорӣ бо ташкилоти “The Washington Intergovernmental Professional Group” ва дафтари “Office for Trade Promotion” барпо гардид. Ӯ гуфт, ин чорабинӣ як иқдоми маъмулӣ аст ва дар соли гузашта дар сафорати Тоҷикистон дар Вашингтон бори аввал дар ҳамкорӣ бо ташкилоти “The Washington Intergovernmental Professional Group” барпо шудааст. Ҳадафи аслӣ, гуфт ӯ, ошноии бештари коршиносони амрикоӣ бо имкониятҳои сармоягузорӣ дар Тоҷикистон ва таҳкими тамосҳои бештари тиҷоратӣ ва фарҳангӣ мебошад.

Ҳамаи хабарҳои имрӯзро дар инҷо бихонед

Муаллифи "Ояҳои шайтонӣ" ба ҳуш омадааст

Салмон Рушдӣ, муаллифи китоби ҷанҷолии “Ояҳои шайтонӣ”.

Салмон Рушдӣ, муаллифи китоби ҷанҷолии “Ояҳои шайтонӣ”, ки рӯзи 12-уми август дар шаҳри Ню Йорки Амрико як ҳамлагар ба ӯ корд зада буд, ба ҳуш омадааст.

Пизишкон гуфтаанд, ки ӯ аз марг наҷот ёфт ва вазъи саломатиаш мӯътадил аст.

Атиш Тасир, нависанда ва ҳамкори ӯ дар саҳифааш дар Твиттер навишт, ки Рушдиро аз зери дастгоҳи нафаскашии сунъӣ берун кардаанд ва гап мезанад. Ба гуфтаи ӯ, ҳатто Рушдӣ шухӣ мекунад.

Наздикони Рушдӣ низ ин хабарро тасдиқ кардаанд, вале шарҳи бештар надодаанд.

Ҳамзамон, имрӯз нахустин мурофиаи Ҳодӣ Матар, нафаре, ки ба Салмон Рушдӣ ҳамла кард буд, баргузор шуд.

Додситонии Ню-Йорк мегӯяд, ки Матар Рушдиро 10 корд задааст. Ин ҷавон худро бегуноҳ донист.

Салмон Рушдӣ соли 1988 китобе бо номи “Ояҳои шайтонӣ” навишт, ки хашми мусалмонони ҷаҳонро барангехт.

Ба ӯ борҳо барои ин китобаш таҳдиди куштан кардаанд. Ӯ баъди фатвои Оятуллоҳ Алии Хумайнӣ, раҳбари Эрон, ки куштанашро “ҳалол” донист, дигар пинҳонӣ зиндагӣ мекард. Қарор буд, Салмон Рушдӣ дар Пажуҳишгоҳи Чаутаква, дар як маҳаллае дар ҷанубуғарби аёлати Ню Йорк суханронӣ кунад. Дар ин марказ, ки доир ба масоили мазҳабӣ маҳфилҳо сурат мегиранд, Салмон Рушдӣ қаблан ҳам суханронӣ кардааст.

Як фурӯшгоҳи бузург дар Ереван таркид

Фурӯшгоҳе дар пойтахти Арманистон таркид.

Дар фурӯшгоҳи бузурге дар Ереван, пойтахти Арманистон, таркиши сахт рух додааст.

Хабарнигори Радиои Озодӣ аз Ереван хабар дод, ки пас аз таркиши фурӯшгоҳи "Сурмалу" сӯхтор ба амал омадааст.

Бар асоси ҳисобҳои пешакӣ ҳафт захмиро ба бемористон интиқол доданд ва тахмин меравад, чанд нафари дигар дар дохили бино мондааст.

Дар шабакаҳои иҷтимоӣ навори лаҳзаи таркиш нашр шудааст, ки нишон медиҳад, аз фурӯшгоҳ дуди сиёҳе ба осмон печидааст.

Ҳанӯз сабаби таркиш маълум нест.

"Сурмалу", як фурушгоҳест, ки дар он ба таври яклухт молу маҳсулот мефурӯшанд.

Гузориши танқидӣ дар бораи артиши Украинаро месанҷанд

Amnesty International logo in English

Гузориши созмони Amnesty International дар бораи сӯистифодаи низомиёни украинӣ аз макотиб ва манзилҳои зисти сокинонро коршиносони байналмилалӣ месанҷанд.

Дар ин бора “Мавҷи Олмон” хабар додааст.

Ҳомиёни ҳуқуқ дақиқ карданианд, ки чаро ин гузориш вокуниши манфӣ ба бор овард. "Мо мехоҳем фаҳмем, ки чаро чунин шуд ва аз ин бояд дарс гирем,”—гуфтанд дар ин созмон.

Гузориши Amnesty International дар расонаҳои Русия зиёд бозтоб ёфт ва баъдан, созмон таасуф хурд, ки дар он гузориш таҷовузи Русияро маҳкум накардааст.

Дар гузориши ин созмон аз рӯзи 4-уми август гуфта мешуд, ки низомиёни украинӣ дар мактабу хонаҳои сокинон пинҳон мешаванд ва ҷони одамони одиро бо ин корашон дар хатар мегузоранд.

Ин гузориш хашми мансабдорони украиниро ба бор овард ва созмонро ба ҷонидори аз Русия муттаҳам карданд.

Агнесс Каламар, раҳбари Amnesty International гуфт, ҳадафи онҳо чунин набуд, балки мехостанд, Русия ва Украина ҷони мардуми одиро дар хатар нагузоранд.

"Нон, кор, озодӣ." Толибон бо тирандозӣ занонро пароканда карданд

Занони афғонистонӣ соле боз зидди Толибон эътироз мекунанд.

Ҷангҷӯёни Толибон тазоҳуроти осоиштаи занонро дар Кобул, ки бо шиори “нон, кор, озодӣ” ба хиёбон баромада буданд, бо тирандозӣ ба ҳаво ва латукӯби эътирозгарон пароканда карданд.

Ҳудуди 40 зан рӯзи 13-уми август дар назди бинои Вазорати маорифи Афғонистон раҳпаймоӣ карданд.

Дар аксу наворе, ки дар шабакаҳои иҷтимоӣ нашр шуд, дида мешавад, ки ҷангҷӯёни Толибон тир мепарронанд ва ба занон ҳамла мекунанд. Ҳангоми фирор Толибон занонро думболагирӣ кардаанд ва бархеро бо дастаи автомат латукӯб кардаанд.

Анҷумани рӯзноманигорони мустақили Афғонистон хабар дод, ки Толибон се хабарнигори хориҷӣ ва як хабарнигори маҳалиро барои пӯшиши тазоҳурот боздошт кардаанд. Ду хабарнигори дигари маҳаллӣ аз зарби Толибон захмӣ шудаанд.

Ҳуҷатуллоҳ Муҷадидӣ, як узви Анҷумани рӯзноманигорон дар Кобул ба хабаргузориҳои хориҷӣ гуфтааст, ки хабарнигорони хориҷии боздоштшуда аз Олмон, Дания ва Норвегия будаанд.

Созмони Афви Байналмилал аз гузоришҳо дар бораи истифодаи "нирӯи аз ҳад зиёд"-и Толибон барои пароканда кардани эътирози занон нигаронӣ кард. Ин созмон дар Твиттер навиштааст, ки занҳо "ба таври осоишта эътироз карда, ҳуқуқи инсонии худро талаб мекарданд."

Дар наворе, ки гуфта мешавад аз ин раҳпаймоӣ гирифта шудааст, дида мешавад, занон бо талаби ҳуқуқи кор ва ҳузури сиёсӣ доштан дар ҷомеа шиор медиҳанд ва раҳпаймоӣ мекунанд.

Аксари эътирозгарон он либосе, ки Толибон аз занон мехоҳанд бипӯшанд, надоштанд.

Дар яке аз шиори дасти занон навишта шудааст, ки "15-уми август рӯзи сиёҳ аст." Дар ин рӯз, як сол пеш, Толибон Афғонистонро тасарруф крада буданд.

Ҳукумати Толибон ҳуқуқи занон ба кору таҳсилро маҳдуд намуда, ба духтарон иҷозаи таҳсил дар мактабҳоро намедиҳанд. Занон низ ҳақ надоранд, ки кор кунанд. Ҳамзамон, бар асоси қонунҳои ҳукумати Толибон, занон бояд чеҳраи худро комилан пушонанд ва бе ҳамроҳии мард ҳақи ба хиёбон баромадан надоранд.

Ҳукумати Толибонро то кунун ҳеҷ кишвари дунё ба расмият нашинохтааст. Шарти ҷомеаи ҷаҳонӣ аз Толибон ин аст, ки ҳукумати фарогир ташкил кунанд ва ба занону духтарон иҷозаи кору таҳсил бидиҳанд.

Тоҷикистон дар қаҳрамонии CAFA-2022 севум шуд

Мусобиқоти қаҳрамонии CAFA (Созмони футболи Осиёи Марказӣ)-2022

Мусобиқоти қаҳрамонии CAFA (Созмони футболи Осиёи Марказӣ)-2022 миёни дастаҳои мунтахаби ҷавонони то 19-сола, ки аз 5-ум то 12-уми август дар Варзишгоҳи марказии Душанбе баргузор шуд, бо пирӯзии тими Эрон ба поён расид.

Бозиҳои даври панҷум ва охирини мусобиқот шаби ҷумъаи 12-уми август доир шуданд. Нахуст дар Варзишгоҳи марказии Душанбе тимҳои ҷавонони Афғонистон ва Узбекистон рақобат карданд. Бозӣ бо ҳисоби мусовии 1:1 хотима ёфт.

Баъдан дар ин варзишгоҳ бозии ҳалкунанда миёни дастаҳои ҷавонони Тоҷикистон ва Эрон баргузор шуд. Футболбозони эронӣ ба дарвозаи мизбонон чаҳор голи беҷавоб заданд. Се голро дар нимаи аввали дидор Муҳаммад Амин Ҳазбавӣ (дақиқаи 10-ум), Сайид Саҳархезон (дақиқаи 15-ум) ва Амирризо Исломталаб (дақиқаи 25-ум) ба самар расониданд. Як голи дигарро Амир Шоҳим дар нимаи дувуми дидор, дар дақиқаи 82-юм, аз пеналти ё ҷаримаи 11-метрӣ ба дарвозаи мунтахаби Тоҷикистон ворид кард.

Дар мусобиқоти қаҳрамонии CAFA -2022 дар Душанбе панҷ дастаи мунтахаби ҷавонони то 19-сола аз Афғонистон, Қирғизистон, Тоҷикистон, Узбекистон ва Эрон ширкат карданд.

Баъди натиҷагирии ҳамаи панҷ даври мусобиқот дар қаҳрамонии CAFA-2022 мунтахаби Эрон, ки бо касби ҳашт имтиёз дар ҷадвал мақоми аввалро соҳиб шуд, бо Ҷоми қаҳрамонӣ ва медалҳои тило сарфароз гашт.

Дастаҳои Узбекистону Тоҷикистон бо касби шашимтиёзӣ мутаносибан дар ҷойҳои дувуму севум қарор гирифтанд. Таносуби тӯбҳои футболбозони ҷавони узбек хубтар аст, инчунин онҳо мунтахаби Тоҷикистонро бо ҳисоби 3:0 мағлуб карданд. Бинобар ин, мунтахаби ҷавонони Узбекистон бо медалҳои нуқра мукофотонида шуд. Мунтахаби ҷавонони Тоҷикистон барои ҷойи севум бо медалҳои биринҷӣ сарфароз гашт.

Мунтахаби Қирғизистон бо касби панҷ имтиёз ҷойи чаҳорумро азони худ кард. Мунтахаби Афғонистон бо касби як имтиёз дар зинаи охирин – панҷум - ҷойгир шуд.

Аз рӯи ҷамъбасти мусобиқот ҷоизаи «Fair Play», инчунин ҷоизаи вижа ба мунтахаби ҷавонони Афғонистон супурда шуд. Нимҳимоятгари мунтахаби Узбекистон Шаҳриёр Ҷабборов (3 гол) беҳтарин нишонзани мусобиқот гардид. Капитан ё сартими Эрон Муҳаммад Амин Ҳазбавӣ аз ҳама бозигари судманди мусобиқот эътироф шуд.

Зимнан, қаҳрамонии CAFA-2022 дар Душанбе марҳилаи муҳими омодагии дастаи мунтахаби ҷавонони Тоҷикистон (U-19) бо роҳбарии сармураббӣ Аҳлиддин Турдиев ба бозиҳои интихобии Ҷоми Осиё-2023 маҳсуб мешуд, ки моҳи сентябри имсол дар Душанбе баргузор мешавад. Рақибони футболбозони тоҷик дар мусобиқоти интихобии Ҷоми Осиё-2023 дастаҳои мунтахаби Лубнон, Сингапур ва Камбоҷа мебошанд.

Мусобиқоти қаҳрамонии CAFA-2022 миёни дастаҳои мунтахаби ҷавонони то 19-сола дар Душанбе

Даври 1-ум

Узбекистон – Эрон – 2:2

Қирғизистон – Афғонистон 1:0

Даври 2-юм

Қирғизистон Узбекистон 0:0

Афғонистон Тоҷикистон 1:4

Даври 3-юм

Эрон – Афғонистон – 4:0

Тоҷикистон – Қирғизистон – 3:1

Даври 4-ум

Эрон – Қирғизистон 2:2

Тоҷикистон Узбекистон 0:3

Даври 5-ум

Тоҷикистон – Эрон – 0:4

Голҳо: Муҳаммад Амин Ҳазбавӣ, 10 (0:1). Саид Саҳархезон, 15 (0:2). Амирризо Исломталаб, 25 (0:3). Амир Шоҳим, 82 – аз пеналти (0:4).

Тоҷикистон: Сафармад Ғаффоров, Содиқҷон Қурбонов (Абдулло Шарипов, 46), Меҳрубони Абдурауф, Рӯзимуҳаммад Абдураҳмонов, Фахриддин Аҳтамов, Фатҳулло Олимзода (Аббос Андалебов, 81), Кабир Салимшоев (Амирҷони Фаррухзод, 81), Бежан Нишонбойзода (Салоҳиддин Эргашев, 85), Иброҳим Зокиров, Салам Ашӯрмамадов (Далер Шарипов, 63), Суннатулло Азизов (Асадбек Ҷӯрабекзода, 63).

Беҳтарин бозигари дидор: Муҳаммад Амин Ҳазбавӣ (Эрон).

12-уми август. Душанбе. Варзишгоҳи марказии ҷумҳуриявӣ. 6200 тамошобин.

Афғонистон – Узбекистон -1:1

Голҳо: Аслиддин Турсунпӯлодов, 8 (0:1). Ҳасибуллоҳ Аҳадӣ, 18 (1:1).

Беҳтарин бозигари дидор: Файсал Саид (Афғонистон).

12-уми август. Душанбе. Варзишгоҳи марказии ҷумҳуриявӣ. 100 тамошобин.

Мавқеи дастаҳо дар ҷадвали мусобиқот

Ҷ

ДАСТАҲОИ МУНТАХАБ

Б

Ғ

М

Б

Т/Т

И

1

Эрон

4

2

2

0

12-4

8

2

Узбекистон

4

1

3

0

6-3

6

3

Тоҷикистон

4

2

0

2

7-9

6

4

Қирғизистон

4

1

2

1

4-5

5

5

Афғонистон

4

0

1

3

2-10

1

Варзишгарони тоҷик дар бозиҳои ҳамбастагии исломӣ медал гирифтанд

Илдар Аҳмадиев дар ҷаҳиш ба дарозӣ бо натиҷаи 7 метру 86 сантиметр дувум шуд.

Варзишгарони тоҷик дар Бозиҳои V ҳамбастагии исломӣ, ки бо иштироки беш аз 4000 варзишгар аз 56 кишвари ҷаҳон дар шаҳри Қунияи Туркия ҷараён дорад, дар панҷ рӯзи рақобатҳо се медал (1 нуқра ва 2 биринҷӣ) ба даст оварданд.

Илдар Аҳмадиев дар ҷаҳиш ба дарозӣ бо натиҷаи 7 метру 86 сантиметр дувум шуд ва бо медали нуқра сарфароз гашт. Асламҷон Азизов дар вазни то 55 кило ва Фирӯз Мирзораҷабов дар вазни то 63 кило, ҳарду дар риштаи гуштии юнонию румӣ, медалҳои биринҷӣ гирифтанд. Ҳамин тариқ, мунтахаби Тоҷикистон аз рӯи ҳисоби медалҳо дар ҷойи 31-ум қарор дорад.

Дар Бозиҳои V ҳамбастагии исломӣ баъди натиҷагирии панҷ рӯзи рақобатҳо дар ҳисоби дастаӣ мизбонон мақоми аввалро касб кардаанд. Мунтахаби Туркия 137 медал (48 тило,48 нуқра ва 41 биринҷӣ) гирифтааст.

Мунтахаби Эрон бо касби 56 медал (22 тило, 18 нуқра ва 16 биринҷӣ) дар мақоми дувум қарор дорад. Мунтахаби Узбекистон бо касби 53 медал (18 тило, 14 нуқра ва 21 биринҷӣ) мақоми севумро азони худ кардааст.

Ба даҳгонаи аввал, инчунин Қазоқистон - 36 медал (12 тило, 5 нуқра ва 19 биринҷӣ), Озарбойҷон бо касби 35 медал (9 тило, 12 нуқра ва 14 биринҷӣ), Марокаш - 35 медал (9 тило, 6 нуқра ва 20 биринҷӣ), Баҳрайн - 18 медал (9 тило, 6 нуқра ва 3 биринҷӣ), Индонезия - 18 медал (8 тило, 4 нуқра ва 6 биринҷӣ), Алҷазоир - 15 медал (4 тило, 5 нуқра ва 6 биринҷӣ) ва Қирғизистон бо касби 9 медал (3 тило, 4 нуқра ва 2 биринҷӣ) дохиланд.

Умуман, то ҳоло варзишгарони 39 кишвар барандагони медалҳои Бозиҳои V ҳамбастагии исломӣ гардидаанд, аз он ҷумла намояндагони 26 кишвар бо медалҳои тило сарфароз шудаанд.

Аз байни кишварҳои Осиёи Марказӣ, инчунин Туркманистон бо касби 8 медал (1 тило, 2 нуқра ва 5 биринҷӣ) дар ҷойгоҳи 17-ум қарор дорад. Мунтахаби Тоҷикистон дар миёни кишварҳои Осиёи Марказӣ дар ҷойи охирин аст.

Ба барномаи бозиҳо 20 намуди варзиш дохил аст. Варзишгарони тоҷик, ки 48 нафаранд, дар ҳашт намуд – варзиши сабук, камонварӣ, ҷудо, каратэ-до, тенниси рӯи миз, таэквондо, вазнабардорӣ ва гуштии варзишӣ сабқат мекунанд.

Бо иштироки варзишгарони тоҷик рӯзҳои 10-13 август мусобиқаи гуштии озод ва гуштии юнонию румӣ, 11-15 август - вазнабардорӣ, 13-15 август - тенниси рӯи миз миёни варзишгарони имконияташон маҳдуд, 15-18 август - камонварӣ, 15-17 август - ҷудо ва 17-18 август мусобиқаи каратэ-до доир мешавад.

Бояд гуфт, ки варзишгарони тоҷик дар Бозиҳои ҳамбастагии исломӣ ҳамагӣ 6 медал (як тилло, як нуқра ва 4 биринҷӣ) ба даст овардаанд. Дилшод Назаров дар гурзандозӣ бо медали тилло ва Насҳиддин Ворисов дар риштаи таэквондо WT бо медали нуқра мукофотонида шудаанд. Ҳарчор медали биринҷиро варзишгарони тоҷик дар риштаи варзишҳои зӯрхонаӣ гирифтаанд.

Зеленский ба низомиёни рус ҳушдор дод

Владимир Зеленский, президенти Украина

Владимир Зеленский, президенти Украина, гуфт, ҳар сарбози русе, ки ба сӯи нерӯгоҳи атомии Запарожей тир мепаронад, мавриди ҳамлаи онҳо қарор хоҳад гирифт.

Нерӯгоҳи атомии Запарожейи Украина зери назорати русҳост.

Зеленский гуфт, агар сарбозони рус бо сӯистифода аз дохили нерӯгоҳ тир мепаронанд, донанд, ки ҷосусони мо онҳоро пайдо мекунанд.

Ҳафтаи гузашта Ожонси Байналмилалии Энержии Атомӣ (МАГАТЭ) Русия ва Украинаро ҳушдор дод, ки аз тирпаронӣ ба самти ин нерӯгоҳ худдорӣ кунанд. Ин созмон гуфт, чанд ҳолати тирпаронӣ ба сӯи неӯгоҳи атомиро сабт кардааст, ки агар давом кунад, эҳтимол фоҷеи башариро ба бор орад.

Дар сурати таркидани ин нерӯгоҳ миллионҳо одам заҳролуд шуда, муҳити зист хароб мешавад.

Русия ва Украина ҳамдигарро барои тир парондан ба сӯи ин нерӯгоҳ айбдор мекунанд.

Муҳокимаи панҷ хориҷӣ дар Донетск шуруъ мешавад

Айден Аслин , Шон Пиннер ва Саъдудин Иброҳим моҳи июн ба қатл маҳкум шуданд.

Ҷудоиталабони таҳти ҳимояти Русия дар вилояти Донетски Украина санаи муҳокимаи 5 хориҷиро, ки дар сафи неруҳои Украина меҷангиданд, таъйин кардаанд.

Раҳбарони Ҷумҳурии Худхондаи Донетск рӯзи 12-уми август гуфтанд, ки муҳокимаи Матиас Густавсон аз Шветсия, Вйекослав Пребег аз Хорватия, Ҷон Ҳардинг ва Дилан Ҳилӣ аз Бритониёро рӯзи 15-уми август оғоз мекунанд.

Ба гуфтаи ҷудоиталабон, панҷ нафар ба зархаридӣ, омодагӣ ба амалҳои террористӣ, талош барои ғасби қудрат муттаҳам мешаванд. Дар сурати гунаҳкор донистан, мумкин аст, ҳамаи онҳоро ба қатл маҳкум кунанд.

Вазорати умури хориҷии Бритониё моҳи гузашта ва пас аз боздошти Ҳардинг ва Ҳилӣ, ҷудоиталабонро ба “истифодаи” асирони ҷангӣ ва мардуми ғайринизомӣ барои ҳадафҳои сиёсӣ танқид кард. Пол Ури, ки ҳамроҳи ин ду нафар дастгир шуд, моҳи июл дар боздоштгоҳ фавтид.

Аввали моҳи июн ду бритониёии дигар Айден Аслин ва Шон Пиннерро ҳамроҳ бо Саъдудин Иброҳим аз Марокаш бо гуноҳи зархаридӣ ба қатл маҳм карданд. Ҳарсе мегӯянд, ки вақти хидмат дар сафи неруҳои мусаллаҳи Украина ва ҷанг бо неруҳои Русия аз тарафи ҷудоиталабон дастгир шуданд.

Зеленский мехоҳад, шаҳрвандони Русияро ба Аврупо роҳ надиҳанд

Владимир Зеленский

Владимир Зеленский, раиси ҷумҳури Украина дигарбора аз кишварҳои Иттиҳоди Аврупо хост, ба шаҳрвандони Русия раводиди сафар надиҳанд.

Владимир Зеленский дар муроҷиати видеоии шабонаи худ дар рӯзи 12-уми август гуфт, роҳ надодани шаҳрвандони Русия ба кишварҳои узви Иттиҳоди Аврупо зарурист, то ба онҷо ба “супермаркет”-и ҳар каси дорои имконият табдил наёбад.

Ӯ афзуд: ”Бояд кафолати он вуҷуд дошта бошад, ки одамкушони рус ва шарикони давлати террор раводиди Шенгенро истифода накунанд.” Ҳар фарде, ки раводиди Шенген дорад, метавонад, ба истиснои 5 кишвари узв, озодона ба 22 кишвари дигари Иттиҳоди Аврупо сафар кунад.

Баъзе кишварҳои Иттиҳоди Аврупо аз ҷумла се кишвари соҳили Балтика ва Чехия додани раводиди кору сафар ба шаҳрвандони Русияро маҳдуд кардаанд, вале даъват барои манъи комили додани раводид ба шаҳрвандони Русия дар байни кишварҳои узви Иттиҳоди Аврупо тарафдори зиёде пайдо накардааст.

Вазири тоҷик бо намояндаи фаластиниён ҳамкориҳоро баррасӣ кардааст

Сироҷиддини Муҳриддин бо намояндаи Фаластиниён доир ба ҳамкориҳои дуҷониба суҳбат кардааст.

Сироҷиддини Муҳриддин, вазири умури хориҷии Тоҷикистон бо як ҳайати фаластинӣ ҳамкориҳои дуҷониба ва иҷрои тарҳҳои иқтисодиро баррасӣ кардааст.

Вазорати корҳои хориҷӣ рӯзи 12-уми феврал бо нашри як баёнияи кутоҳи расмӣ гуфт, дар ҷараёни мулоқот бо ҳайати фаластинӣ, ки онро Имод Зуҳайрӣ мудири Оҷонси ҳамкориҳои байналмилалии Давлати Фаластин раҳбарӣ мекард, “вазъи кунунии Фаластин ва минтақа, ҳамкории дуҷониба ва бисёрҷониба дар доираи созмонҳои байналмилалӣ, инчунин ҳамкорӣ дар самти иҷрои лоиҳаҳои муштараки иқтисодӣ ва кишоварзӣ бо ҳимояти ниҳодҳои байналмилалии молиявӣ мавриди баррасӣ қарор гирифт. “

Дар баёния аз ин бештар чизе гуфта нашудааст, вале мулоқот баъди муноқишаҳои ҷиддӣ байни фаластиниён ва Исроил сурат мегирад. Дар даргириҳои се рӯза дар ҳафтаи гузашта даҳҳо нафар фаластинӣ кушта шуданд ва даҳҳо тани дигар аз Исроил ҷароҳат бардоштанд.

Аз хонаи Доналд Трамп 11 бастаи асрори давлатиро пайдо кардаанд

Доналд Трамп ду рӯз баъд аз ҷустуҷӯи хонааш дар Флорида.

Маъмурони амниятии Хадамоти Таҳқиқоти Федеролии Амрико, ки аввали ҳафта хонаи раиси ҷумҳури собиқ Доналд Трампро ҷустуҷу карданд, аз онҷо 11 бастаи санадҳои махфӣ, аз ҷумла санадҳои бисёр муҳимеро берун овардаанд.

Дар ин бора вазорати адлияи Амрико рӯзи 12-уми август хабар дод. Вазорат ҳамчунин гуфт, ки ҷустуҷуи хонаи Доналд Трамп ба сабаби риоят накардани эҳтимолии Қонун дар бораи ҷосусӣ аст, ки ҳифзи ғайриқонунӣ ва ё берун овардани асрори амнияти миллӣ аз муассисаҳои давлатии Амрикоро манъ кардааст.

Маъмурони амниятӣ рӯзи 8-уми август ва бо дастури додрас хонаи Доналд Трамп дар аёлати Флоридаро ҷустуҷу карданд. Вазорати адлия ба додгоҳ гуфтааст, эҳтимолан Доналд Трамп Қонун дар бораи ҷосусиро помол кардааст ва барои ҳамин бояд иҷоза бидиҳад, то хонаи ӯро кофтуков кунанд.

Маъмурони Хадамоти Таҳқиқоти Федеролии Амрико аз қароргоҳи Мар-а-Лагои Доналд Трапм дар умум 20 қуттиро берун овардаанд. Баъзе санадҳо муҳри комилан махфӣ, доштаанд, ки бояд дар муассисаҳои пӯшида нигаҳ дошта шаванд. Доналд Трамп рӯзи 12-уми август гузориши Вашингтон Постро “бофта” номид, ки навишт, баъзе санадҳо дар бораи аслиҳаи атомӣ будаанд.

Ҳузури камназири Назарбоев дар байни мардум

10 январи соли 2021. Нурсултон Назарбоев баъди овоздиҳӣ дар интихобот бо матбуот сӯҳбат мекунад

Зимни ифтитоҳи масҷиди наве дар пойтахти Қазоқистон президенти собиқ Нурсултон Назарбоев ҳам, ки муддатҳост дар мазҳари ом дида намешавад, дар ҳалқаи ёваронаш ҳозир шуд. Ҳузури Назарбоев дар масҷиди нав сеюмин ҳолати баъди хушунатҳои моҳи январ дар миёни мардум дида шудани раҳбари собиқи инак 82-солаи Қазоқистон мебошад.

Дар як суханронии мухтасараш Назарбоев дар бораи сохтмони ин муассиса чанд ҷумла гуфт. Назарбоев баъди раҳбарии сисола дар Қазоқистон соли 2019 ба истеъфо рафт ва ба ҷои худ Қосимжомарт Тоқаевро пешбарӣ кард. Он замон ӯ мақоми раҳбарии Шӯрои амният ва унвони “Элбосӣ” ё пешвори миллатро ҳифз кард.

Моҳи январи имсол бо сабаби якбора гарон шудани нархи сӯзишворӣ дар кишвари нафтхези Қазоқистон эътирозу ошӯб бархост, ки зуд дар аксар қаламравҳои кишвар паҳн шуд. Бисёриҳо маҳз норизоият аз сиёсати Назарбоевро далел оварданд.

Дар ин ҳодисаҳо, ба иттилои расмӣ, беш аз 200 нафар куштаву садҳо нафар ҳабс шуд. Дар авҷи ин ҳодисаҳо президент Тоқаев Назарбоевро аз мақоми раиси Шӯрои амният маҳрум кард ва ин мақомро худ ба ӯҳда гирифт. Чандин хешу наздикону шарикони Назарбоев аз мақомҳояшон барканор шуданд, баъзе бо иттиҳоми ришват ҳабс шуданд.

Моҳи июн дар паи референдуме, ки онро Тоқаев барпо кард, мақоми “Элбосӣ”-ии Назарбоев аз матни Конститутсияи кишвар ҳазф шуд.

Вале мунаққидон мегӯянд, ки бисёр ташаббусҳои Тоқаев сатҳӣ ва рӯякӣ буд ва табиати худкомаи низоми сиёсии Қазоқистон, ки инчунин олуда ба хешутаборбозию коррупсия аст, аз байн бурда нашуд.

Назарбоев масҷидеро боз кард, ки пеш аз истеъфояш санги асоси онро гузошта буд

Нурсултон Назарбоев.

Рӯзи 12-уми август дар шаҳри Нурсултони Қазоқистон аз масҷиди навсохте парда пардоштанд, ки калонтарин масҷид дар Осиёи Марказӣ унвон мешавад. Ин масҷидро Нурсултон Назарбоев, президенти пешини Қазоқистон ифтитоҳ бахшид.

"Масҷид дар майдони 10 га сохта шуда, баландии гумбазаш 83,2 ва қутри он 62 метрро ташкил медиҳад. Масҷид чаҳор манора дорад, ки баландии ҳар кадомаш 130 метрро ташкил медиҳад", - хабар доданд расонаҳои Қазоқистон. Масҷид дар як вақт ғунҷоиши бештар аз 30 ҳазор касро дорад.

Санги асоси ин масҷид моҳи марти соли 2019 - як рӯз пеш аз истеъфои Назарбоев аз мақоми президентӣ - гузошта шудааст.

Президенти пешини Қазоқистон дар маросими кушодашавӣ гуфт, масҷид аз ҳисоби "шаҳрвандони алоҳида ва сармоягузорон" сохта шудааст.

"Дар 30 соли истиқлолият, албатта, шаҳрвандони алоҳидаи мо ба чунин сатҳи дороӣ расиданд. Ва ман гуфтам: бояд сохтмони масҷидро дастгирӣ кард. Дороии давлат сарф нашудааст. Ба ҳамаи онҳое, ки дар сохтмони масҷид саҳм гузоштанд, сипос мегӯям", - гуфт Назарбоев.

Ин нахустин зуҳури Назарбоев дар чорабинии оммавӣ, бо ҳузури бархе аз мақомдорони амалкунандаи Қазоқистон, аз ибтидои соли ҷорӣ аст.

Баъди ҳодисаҳои моҳи январ мавқеи Назарбоев коста гардид: вай дигар раиси Шӯрои амният нест, наздикону пайвандонаш аз мақомҳои худ барканор шуданд, чанде аз аъзои хонаводааш бо айби ғорати дороии давлат ҳабс шудаанд.

Вакили мудофеъ: вазъи сиҳатии президенти пешини Қирғизистон бад шудааст

Алмосбек Отамбоев (аз рост), президенти пешини Қирғизистон

Вазъи сиҳатии Алмосбек Отамбоев, президенти пешини Қирғизистон дар зиндон бад шудааст. Дар ин бора Замир Жоошев, вакили мудофеи вай хабар дод.

"Се рӯз пеш ман аз Хадамоти иҷрои ҷазо дархост карда будам, ки ба Отамбоев иҷозаи сафари табобатӣ ба Русияро диҳад. Ташхиси бемории Отамбоев дар Русия имконпарзир аст. Ҳамкори ман Отамбоевро дар зиндон дид, вазъаш хеле бад аст: хеле лоғар шудааст, фишораш ба 60/80 расидааст. Агар табобат нагирад, мумкин аст, оқибати нохуше сар занад", - гуфт Жоошев.

Отамбоев дар асоси чанд парванда гумонбар дониста мешавад. Дар доираи парванди озодсозии ғайриқонунии соҳибнуфузи ҷиноӣ аз зиндон Азиз Батукаев, Отамбоевро 11 сол зиндонӣ кардаанд.

Дипломатҳои тоҷик дар маркази "Сахарово" бо гурӯҳи муҳоҷирони боздоштшуда вохӯрданд

Tajik migrants on Sakharovo

Масъулини Сафорати Тоҷикистон дар Русия бо шароити нигаҳдории муҳоҷирон дар Боздоштгоҳи мувақатии "Сахарово" шинос шуданд. Сафорати Тоҷикистон дар Маскав дар як хабаре гуфт, ки як дипломати тоҷик рӯзи 10-уми август зимни боздид аз маркази нигаҳдории муваққатии шаҳрвандони хориҷӣ дар деҳаи Сахаровои вилояти Маскав бо муҳоҷирони тоҷик дидору мулоқот кардааст.

Дар хабарномаи сафорати Тоҷикистон гуфта нашудааст, ки дар ин марказ чӣ теъдод муҳоҷирон нигаҳдорӣ мешавад, аммо таъкид шудааст, ки масъули сафорат зимни боздид аз шароити муҳоҷирон бо муовини сардори боздоштгоҳи муваққатӣ Сергей Полежаев масъалаи интиқоли ҳарчи зудтари муҳоҷирон ба Тоҷикистонро баррасӣ кардааст.

Дар маркази "Сахарово" маъмулан он гурӯҳи шаҳрвандони хориҷӣ нигаҳдорӣ мешаванд, ки бо далели нақзи муқаррароти будубош ё қонунҳои маъмурӣ бояд ба ватан ихроҷ ё депортатсия шаванд. Ҳолатҳое, ки чунин қарорҳо ноодилона содир мешаванд, кам нест.

Дар хабари расмӣ ҷузъиёти дидору гуфтугӯҳои дипломатҳо ва муҳоҷирон нашр намешавад.

Дар Русия беш аз як миллион муҳоҷири тоҷик кору зиндагӣ мекунад. Бисёри муҳоҷирон аз боздоштҳои бесабабу шароити номуносиби нигаҳдорӣ дар боздоштгоҳу марказҳои муваққатӣ шикоят мекунанд. Мақомоти тоҷикро ҳам борҳо барои таваҷҷуҳи зарурӣ накардан ба муҳоҷирон дар Русия танқид кардаанд.

Сабаби марги Фаридун Хайруллозода, раҳбари "Авторадио Тоҷикистон" нашр намешавад

Фаридун Хайруллозода 27 сол дошт. Акс аз саҳифаи Фейсбуки журналист

Шаби 11 ва 12-уми август дар Душанбе наттоқи шинохта Фаридун Хайруллозода фавтид. Сабаби маргаш маълум нест. Ба гуфтаи наздиконаш, шаби гузашта ӯ дар як чорабинӣ будааст. Ҷузъиёти марги ӯ феълан нашр намешавад.

Фаридун Хайруллозода 27 сол дошта, муассиси “Авторадио Тоҷикистон” буд. Фаъолияташро ҳанӯз аз наврасӣ дар телевизиони бачагонаи “Баҳористон” шурӯъ карда, баъдан дар телевизиони “Сафина” ва радиоҳои “Ватан”-у “Лаврадио” ҳам кор кардааст.

Солҳои ахир Фаридун Хайруллозода раҳбари кулли «Авторадио» буд ва бо роҳандозии тарҳҳои мухталифи тафреҳиву фарҳангӣ дар шабакаҳои иҷтимоӣ шинохта мешуд. Фаридун Хайруллозода оиладор ва соҳиби як фарзанд аст.

Эълони хатсайри нав миёни Уфа ва Душанбе

Фурудгоҳи шаҳри Уфа, пойтахти Бошқирдистон

Миёни Уфа ва Душанбе як хатсайри нави мунтазам роҳандозӣ мешавад, ки онро як ширкати русӣ анҷом медиҳад. Ширкати ҳавопаймоии Utair аз Оҷонсии федералии нақлиёти ҳавоӣ барои ташкили парвозҳои иловагии байналмилалӣ аз фурудгоҳи пойтахти Бошқирдистон аз ҷумла парвозҳо ба Тоҷикистон иҷоза гирифтааст. Ҳанӯз маълум нест, ки мусофиркашонӣ дар ин масир кай оғоз мешавад. Қаблан Оҷонсии федеролии нақлиёти ҳавоӣ муддати се моҳ парвозҳо аз Омск ба Хуҷанд ва Душанберо иҷозат дода буд.

Русия кишвари асосии муҳоҷирпазир барои тоҷикистониҳо буда, аксари шаҳрвандони Тоҷикистон ба ҷумҳурии мусалмоннишини Бошқирдистон ҳам барои кору даромад мераванд

Пешбинии фаромадани сел дар ду рӯзи оянда

Маи соли 2021, сел дар Кӯлоб

Рӯзҳои 12 то 14-уми август дар ноҳияҳои кӯҳӣ ва баландкӯҳ ба истиснои қисмати шарқии ВМКБ, омадани сел пешгӯӣ мешавад. Оҷонсии обуҳавошиносии кишвар хабар медиҳад, ки дар ин рӯзҳо бар асари ноустувории обуҳаво ва бо дарназардошти борони шадид дар доманакӯҳҳо ва навоҳии кӯҳӣ эҳтимоли омадани селҳои хавфнок вуҷуд дорад.

Дар ҳамин ҳол Кумитаи ҳолатҳои фавқулодаи Тоҷикистон аз аҳолӣ даъват кардааст, ки аз эҳтиёт кор бигиранд ва ҳушёриро аз даст надиҳанд. Аз ҷумла, аз қабл чораву тадбирҳо андешанд, то селҳо натавонанд ба манзилҳои истиқомативу заминҳои кишташон зарар расонанд. КҲФ ҳамчунин аз сокинон хостааст аз ҷамъоварии ҳезум, моҳигирӣ, чарогоҳ ва шикор дар мавзеъҳои хатарнок худдорӣ намоянд.

Қатли Раҳимулло Ҳаққонӣ дар ҳамла ба мадрасааш дар Кобул

Раҳимулло Ҳаққонӣ аз таблиғгарони режими Толибон буд

Дар таркише дар Кобул рӯзи 11-уми август як рӯҳонии маъруфи мактаби Ҳанафӣ ва тарафдори Толибон кушта шуд. Билол Каримӣ, муовини сухангӯи ҳукумати Толибон гуфт, Раҳимулло Ҳаққонӣ дар “ҳамлаи душмани тарсу” ба мактаби динии ӯ кушта шуд.

Намояндагони ҳукумати Толибон аз ин зиёд шарҳе надоданд. Ба навиштаи бархе манбаъҳо, Ҳаққонӣ замоне кушта шуд, ки як маргталабе дар дохили мадрасаи Ҳаққонӣ бомбаро ба кор андохт. Сухангӯи полиси Кобул инчунин гуфт, ки дар ин ҳамла яке аз бародарони Ҳаққонӣ ҳам кушта шуда се нафари дигар маҷрӯҳ гардид.

Дар Телеграм-канали гурӯҳи ДОИШ иддао шудааст, ки ин ҳамла кори дасти ин гурӯҳ аст. Гурӯҳи иттилоотии SITE менависад, ки Ҳаққонӣ яке аз “тарафдорони маъруфи Толибон ва ҳам ташвиқкунандаи муҳими ин гурӯҳ ба ҷанг” буд.

Як манбаъ ба радиои “Афғонистони озод” гуфт, ки ҳамларо марди маъюбе анҷом дод ва дар баробари қатли Ҳаққонӣ шаш нафари дигар кам кушта шуд. Рейтерс мегӯяд, ки ҳамлагар марди якпое буд, ки маводи таркандаро дар протези пластикиаш пинҳон карда буд.

Ваъдаи 1,5 миллиард евро кӯмаки низомии ғарб ба Украина

Мортен Бодсков, вазири дифои Дания

Кишварҳои ғарбӣ дар як конфронси донорҳо ӯҳдадор шуданд, ки ба шакли пули нақд, таҷҳизот ва тамрин ба Украина дар ҷанг алайҳи Русия дар ҳаҷми 1,5 миллиард евро кӯмак мекунанд.

Мортен Бодсков, вазири дифои Дания ба журналистон гуфт, ки дар конфронси Копенҳаген, ки бо ширкати 26 вазири дифои Аврупо баргузор шуд, сари ироаи кӯмак ба Украина мувофиқа ҳосил шуд.

Ин пулҳо барои таъмини силоҳ, мушак, муҳимоти дигари низомӣ, афзоиши истеҳсоли силоҳ барои Украина, тамрини сарбозони украинӣ ва аз минаҳо поккорӣ кардани дигар минтақаҳои ин кишвар равона мешаванд.

Зеленский аз мақомоти украинӣ хост, ки ҷузъиёти нақшаҳои низомиро фош накунанд

Владимир Зеленский, президенти Украина. Акс аз сӯҳбатҳои видеоии рӯзи 11 август

Владимир Зеленский дар ҳоле сӯҳбат мекард, ки шубҳаву гумонҳо дар бораи сабабҳои як силсила таркишҳо болои пойгоҳи ҳавоии Русия дар минтақаи ишғолшудаи Қрим боло мегирад. Дар паи ин таркишҳо дасти кам ҳашт ҳавопаймои ҷангии русӣ нобуд карда шуд ва ҳам русиягиҳои истироҳаткунанда дар соҳилҳои Баҳри Сиёҳи нимҷазираи Қримро ҳаросон кард.

Бар асоси аксу наворҳои маҳвораӣ, дар фурудгоҳи ҳавоии Саки дар шаҳри ғарбии Новофедоровкаи Қрим харобиҳои зиёде мушоҳида мешавад. Русия тахмин кард, ки ин ҳодиса дар натиҷаи бепарвоӣ рух додааст. Вале мақомоти беноми украинӣ дар сӯҳбат бо нашрияҳои амрикоӣ гуфтанд, ки ин кори дасти нирӯҳои украинӣ буд.

Зеленский дар суханронии шабонгоҳиаш 11-уми август гуфт, “ҷанг ба ҳеҷ сурат фурсати ғурур ё изҳороти баланд нест”. Ӯ афзуд, “шумо ҳар қадар камтар дар бораи ҷузъиёти нақшаҳои дифоии мо сӯҳбат кунед, ҳамон қадар барои иҷро шудани ин нақшаҳо кӯмак мешавад”. Зеленский дар идома гуфт, “агар шумо бихоҳед, ки хабарсоз шавед, гапи дигар аст, вале ростӣ, ин бемасъулиятӣ аст”. “Агар шумо хоҳони пирӯзии Украина ҳастед, чизи дигар аст ва шумо бояд дар бораи масъулият барои ҳар як калимае андешед, ки дар бораи нақшаҳои ҳукумат дар самти дифоъ ё муқовимат хабар медиҳад”.

Дар як навиштааш дар Фейсбук Ҳанна Маляр, муовини вазири дифои Украина гуфт, ки хадамоти амният ҳоло хабарро таҳқиқ мекунад, ки оё ба матбуот дар бораи таркишҳо кӣ метавонист хабар диҳад. Ӯ гуфт, ки “берун рафтани хабар дар бораи нақшаҳои қувваҳои мусаллаҳои Украина барои душман дастак мешавад, то ки хабарро ба муқобили мо истифода кунад”.

Дар таҳаввулоти дигар Туркия гуфт, ки рӯзи 11 август аз соҳилҳои украинии Баҳри Сиёҳ ду киштии дигаре ҳаракат кард ва то ҳол бар асоси созише, ки таҳти сарпарастии СММ ҳосил шудааст, 14 киштӣ бо ғаллаву дигар маҳсулоти кишоварзии украинӣ аз ин кишвар берун шуд.

Созиши содироти ғаллаву донагӣ аз Украинаи дар ҳоли ҷанг рӯзи 22 июл дар Туркия имзо шуд. Ин қарор барои содироти 22 миллион тонна ҷувориву ғаллаи истеҳсоли Украина роҳ кушод. Украина истеҳсолкунандаи азими ғалладонаву ҷуворимакка аст ва ҳуҷуми беасоси Русия ба ин кишвар дар моҳи феврали имсол боиси эҷоди бӯҳрони ғизо дар сайёра шуд.

Ду шаҳрванди Тоҷикистон ба иттиҳоми "ҳамла" ба пулиси Маскав зиндонӣ шуданд

Пулиси Маскав. Акс аз бойгонӣ.

Ду шаҳрванди Тоҷикистон ба иттиҳоми ҳамла ба пулиси Маскав ба мӯҳлати 3,5 ва 2,5 соли зиндон маҳкум шуданд. Мақомоти Русия гуфтанд, бародарон, Саидакрами 21-сола ва Умари 18-сола, рӯзи 17-уми феврали имсол дар истгоҳи метрои "Тулская" ба кормандони пулис дарафтоданд.

Хабаргузории ТАСС бо такя ба дафтари матбуоти додситонии Маскав хабар додааст, ки Умари Расулҷонзода ва Саидакрам Ҳамроевро тибқи моддаи 318 қисми 1 Кодекси ҷиноятии Русия, яъне, (истифодаи зӯроварӣ нисбати намояндаи мақомот, ки барои ҳаёташ хатарнок нест), гунаҳкор дониста шудаанд.

Гуфта мешавад, ки додгоҳ Умари Расулҷонзодаро ба 3 солу 6 моҳ ва Саидакрам Ҳамроевро ба 2 солу 6 моҳ бо адои ҷазо дар муассисаи ислоҳии низомаш умумӣ, аз озодӣ маҳрум кардааст.

Назари пайвандони ин ҷавонони тоҷик ба ин ҳукми додгоҳ дастрас нест ва ҳамчунин маълум нест онҳо бозбинии ҳукмро талаб мекунанд ё не.

Дар гузашта падари онҳо ба Радиои Озодӣ гуфта буд, муноқиша пас аз он бархостааст, ки маъмурони пулис талош кардаанд, дасти шикастаи Саидакрамро тоб диҳанд ва ӯ тоқат накарда сахт дод задааст.

Қазияи ду бародар дар шабакаҳои иҷтимоӣ баҳс эҷод кард. Бисёриҳо пулиси Русияро барои рафтори бераҳмона нисбати муҳоҷирон танқид карданд. Корбарони шабакаҳои иҷтимоӣ аксаран навиштанд, ки кормандони пулиси Маскав бо муҳоҷирон рафтори дурушт мекунанд ва ё ба торҳои асабашон нохун мезананд.

Дар Русия беш аз як миллион шаҳрванди Тоҷикистон кору зиндагӣ мекунанд. Муҳоҷирон ва ҳомиёни ҳуқуқ пайваста аз рафтори нохуби кормандони пулис шикоят доранд. Мақомоти Русия дар навбати худ муҳоҷиронро ба поймол кардани қоидаҳои будубош ва ҷинояткорӣ муттаҳам мекунанд.

Иштироки ҳашт варзишгари тоҷик дар Ҷоми Осиё оид ба ҷудо дар Қазоқистон

Варзишгарони тоҷик дар Ҷоми бози ҷудои Осиё (Aktau Asian Open 2022) ба хотираи Турар Жолдибоев, тоҷири машҳури қазоқ, ки рӯзҳои 13-14-уми август дар шаҳри Оқтов баргузор мешавад, иштирок мекунанд.

Ба иттилои Федератсияи ҷудои Тоҷикистон, ба ин мусобиқа ҳашт гуштигири ҷавон сафарбар шудааст: Акбаралӣ Кенҷаев (-60 кг), Аҳмадҷон Аюбов, Абубакр Шеров (ҳарду дар вазни то 66 кило), Наврӯз Каримзод, Маҳмудҷон Раҳимов (ҳарду дар вазни то 73 кило), Ҳайдар Саидкабирзода (-81 кг), Кароматулло Ҳакимов (-90 кг) ва Амирҷони Насимҷон (-100 кг).

Рақобатҳо аз рӯи 14 вазн (7 вазн миёни мардон ва 7 вазн миёни занон) байни 197 ҷудокор (135 мард ва 62 зан) аз шаш кишвари Осиё (Қазоқистон, Муғулистон, Тоҷикистон, Узбекистон, Ҳонконг, Чин,) сурат мегирад.

Мусобиқаи мазкур рейтингӣ мебошад. Барои мақоми аввал - 100 имтиёз, дуюм – 70 ва сеюм - 50 имтиёз дода мешавад.

Барномаи мусобиқа:

13-уми августанбе)


10:00. Марҳилаи муқаддамотӣ
16:30. Марҳилаи ниҳоӣ
Занон: -48 кг, -52 кг, -57 кг, -63 кг;
Мардон: -60 кг, -66 кг, -73 кг;

14-уми августкшанбе)

10:00. Марҳилаи муқаддамотӣ
17:00. Марҳилаи ниҳоӣ

Занон: -70 кг, -78 кг, +78 кг;
Мардон: -81 кг, -90 кг, -100 кг, +100 кг;

Замони оғози рақобатҳо – бо вақти Душанбе

Навалний аз таъсиси эътилофи коргарон дар зиндон хабар дод

Алексей Навалний.

Алексей Навалний, мухолифи зиндонии Русия аз таъсиси иттифоқи касабаи зиндониён ва кормандони Хадамоти федеролии иҷрои ҷазо хабар дод, ки дар маҳбасҳо кор мекунанд. Дар ин бора вай, ки дар маҳбаси №6 дар вилояти Владимири Русия адои ҷазо мекунад, тавассути шабакаҳои иҷтимоӣ хабар дод.

Ба гуфтаи Навалний, вай дар бораи таъсиси иттифоқи касаба бо номи "Промзона" сардори маҳбас ва мудири Хадамоти федеролии иҷрои ҷазоро огоҳ кардааст. Навалний менависад, ҳарчанд аз ин иқдом маҳбусон "тарсиданд" ва "маъмурияти маҳбас бештар аз маҳбусон тарсидаанд".

Маҳбусон аз Навалний даъват кардаанд, ки фаъолияти сиёсиашро қатъ кунад, зеро мумкин аст, ба ин баҳона маҳбусонро "ҳаргиз озод накунанд". Ба ҳамин далел, Навалний эътироф мекунад, ки "дар иттифоқи касаба ба ҷуз худи вай каси дигар узв нест". Сиёсатмадор ҳамчунин тасдиқ мекунад, ки "барои ин кор дар зиндон мумкин аст, одамро кушанд".

"Ҳоло нисбати ман комисияи махсус ҳамарӯза огоҳӣ содир мекунад. Ба зами ин маро расман "ҳушдор" доданд, ки ман ба содир кардани ҷиноят омода мешавам", - навишт мухолифи зиндонии ҳукумати Русия.

Бо ин вуҷуд Навалний навишт, ки иттифоқи касаба нахустин пирӯзиашро ба даст овардааст: бо талаби иттифоқ ва кӯмаки ҳуқуқшиносони сиёсатмадор маъмурияти маҳбас курсиҳои бахши дузандагии маҳбасро иваз кардааст.

Алексей Навалний, мунтақиди сарсахти раисиҷумҳури Русия, Владимир Путин, соли 2021 дар Маскав, пас аз бозгашташ аз Олмон, ки дар он ҷо аз заҳролудшавӣ муолиҷа мегирифт, боздошт ва сипас ба зиндон маҳкум карда шуд. Вай Путинро ба суиқасд ба ҷонаш муттаҳам кард. Кремл ин иддаоро борҳо рад намудааст.

Мақомоти Русия соли 2021 сохтор ва тарҳҳои марбут ба сиёсатмадори мухолиф Алексей Навалнийро тундгаро эълон карданд. Додгоҳ рӯзи 23-юми марти имсол ӯро ба гуноҳи қаллобӣ ва таҳқири додрас ба 9 сол ҳабс маҳкум кард.

Бо сармояи Туркманистон дар Узбекистон 174 корхона сохта шудааст

Як корхонаи саноатӣ дар Узбекистон. Акс аз бойгонӣ.

Нашрияи давлатии "Туркменпротал"-и Туркманистон хабар дод, ки бо сармояи ин кишвар дар Узбекистон 174 корхона сохта шудааст.

Шакли моликияти корхонаҳо ва ҳаҷми сармоя хабар дода намешавад.

Ба навиштаи расонаҳои Узбекистон, дар маҷмуъ дар он кишвар 1700 корхонаи муштараке фаъолият дорад, ки бо сармояи кишварҳои ҳамсоя сохта шудааст.

Дар соли 2021 ҳаҷми тиҷорати дуҷонибаи Узбекистон бо Туркманистон 902 млн долларро ташкил додааст, ки нисбати соли 2020 67,6% бештар арзёбӣ мешавад.

Дар ҳамин ҳол, маълум нест, ки чанд ширкат дар Туркманистон бо сармояи Узбекистон сохта шудааст.

Ёфтҳои бештар

XS
SM
MD
LG