Пайвандҳои дастрасӣ

Хабари нав

"Нигоҳи нав"-и Убайдулло Раҷабов ва Ислом Саломов


Убайдулло Раҷабов
Убайдулло Раҷабов

Чорумин ҷашнвора - озмуни театрии ҷавонон “Нигоҳи нав” ба ифтихори Рӯзи ҷавонони Тоҷикистон ва ба муносибати 75-солагии ҳунармандони маъруф – Убайдулло Раҷабов ва Ислом Саломов дар шаҳри Душанбе баргузор мешавад. Далери Эмомалӣ, раҳбари фарҳангии ҷашнвора - озмуни театрии “Нигоҳи нав” ба Радиои Озодӣ гуфт, ки “ҷашнвора шанбеи 16 май, соати 10 дар Театри давлатии драмавии русии ба номи Маяковский ифтитоҳ мешавад, ки то 20 май идома хоҳад кард.”

Ба гуфтаи ҷаноби Эмомалӣ, ин ду ҳунарманд ва коргардон дар рушди театри муосири тоҷик саҳму нақши босазо доранд. Ҳамсӯҳбати мо афзуд, ҷашнвора бо кумаку мусоидат ва ҳамкории вазорати фарҳанги Тоҷикистон, дафтари ҳамкориҳои Шветсария дар Душанбе, телевизиони “Сафина”, Иттиҳоди ходимони театрӣ ва чанд ширкати дигари ватанӣ баргузор мешавад, ки ҳадафи ин иқдом муаррифии театри муосири тоҷик бо диди нав ва тарзе, ки ҷомеаи ҷаҳонӣ тақозо дорад, мебошад.

Аз сӯи дигар Далери Эмомалӣ мӯътақид аст, ки баргузории ин ҷашнвора, ки дар солҳои ахир ба ҳукми анъана даромадааст, дар ҷиҳати дарёфти истеъдодҳои нав барои пешрафти театри тоҷик мусоидат хоҳад кард. Ба ин тартиб д чорчуби ҷашнвора намоишномаҳои 6 гурӯҳи театрӣ , аз ҷумла “Ману ман”-и Константин Фролов дар таҳияи Ватандор Шерованд, “Журналист” дар таҳияи Сом Ҷаводӣ, “Қотил”, “Ҳоли падар хуб аст”, “Дарси бераҳмона”, “Қатли орзуҳо” ва “Панҷаҳои Борбад” пешкаши мухлисони санъати театр хоҳад шуд.

Он гуна, ки далери Эмомалӣ гуфт, ҷашнвора дорои 10 ҷоиза, аз қабили “Шоҳҷоиза”, “Беҳтарин нақши зан”, “Беҳтарин нақши мард”, Беҳтарин нақши лаҳзавӣ”, “Коргардони беҳтарин” “Беҳтарин дараматургияи миллӣ” ва ғайар мебошад, ки дар поёни он ба беҳтаринҳо тақдим хоҳанд шуд. “Ҷашнвора – озмуни “Нигоҳи нав” аз соли 2012 баргузор мешавад ва то кунун се маротиба ин иқдом дар шаҳри Душанбе бо ташаббуси гурӯҳи ҷавонони эҷодкори тоҷик сурат гирифта аст.

XS
SM
MD
LG