Бар асари ҳамлаи ситезаҷӯён ба як идораи пулис дар шимолуғарби Покистон дасти кам 6 нафар кушта шудаанд. Ба гуфтаи мақомоти расмӣ, ин ҳамла рӯзи душанбе дар ноҳияи Какӣ дар шаҳри Бану сурат гирифт, ки дар натиҷа се афсари пулис ва ҳам афроди оддӣ ҳалок шуданд. Бино ба гузориши бахши покистонии Радиои Озодӣ, ду бомбгузори маргталаб худро дар назди идораи пулис тарконида ва ситезаҷӯёни дигар ба сӯи ин қароргоҳ норинҷак андохтаанд. Толибони Покистон масъулияти ин ҳамларо бар дӯш гирифтанд.
