Ӯ афзуд, «мо албатта, ҳама хонаводаҳоеро дарк мекунем, ки зиндагияшон бесарусомон шудааст ва тайи рӯзҳо ва шояд ҳафтаву моҳҳои оянда бояд инро таҳаммул кунанд. Муҳимтарин паёми ман барои онҳо ин аст, ки Амрико бо шумост. Мо аз шумо пуштибонӣ мекунем ва мехоҳем ҳама корро анҷом диҳем, ки ба шумо барои дубора сари по истодан кӯмак кунем».
Митт Ромнӣ, рақиби Обама аз Ҳизби ҷумҳурихоҳон дар интихоботи президентии рӯзи 6-уми ноябр, низ баъзе аз маъракаҳои таблиғотии худро лағв кард.
Дар ҳамин ҳол теъдоди қурбониёни тӯфони “Сэнди” дар Амрико то 45 нафар афзоиш ёфт. Мири Ню-Йорк Майкл Блумберг гуфт, ки дар ин шаҳр аз офати табиӣ 18 нафар ҷон бохтанд. Дар минтақаҳои офатзада корҳои ҷустуҷӯиву наҷотбахшӣ идома доранд ва аз ин рӯ шояд теъдоди қурбониён афзоиш ёбад.
Нигористон
Тӯфони Сэндӣ ва шаби фоҷеабори амрикоиҳо
Тӯфони "Сэнди", ки ба соҳилҳои шимолу шарқи ИМА ва Канада ҳуҷум кардааст, чордаҳ нафарро ба ҳалокат расондааст. Барак Обама, раисиҷумҳури ИМА, дар як паём аз паёмадҳои фалокатбори “Сэнди” ҳушдор дода, онро як фоҷеаи азими табиӣ арзёбӣ кардаст. Ҳудудан шаш миллион аҳолӣ аз нирӯи барқ маҳрум шудаанд.
Дар Ню-Йорк метро ва нақбҳо зери об мондаанд. Ба гуфтаи Майкл Блумберг, ҳаракати қаторҳо дар метро шояд баъд аз чаҳор-панҷ рӯз аз сар гирифта шавад. Дар шаҳр беш аз 20 сӯхтор рӯй дод, ки аз он даҳҳо бино осеби ҷиддӣ дидааст. Дар аёлати Ню-Ҷерсӣ ба хотири таъмини амният кори реакторҳо дар чанд нерӯгоҳи ҳастаӣ мутаваққиф карда шуд. Тӯфон беш аз 6 миллион сокинони шарқи Амрикоро бебарқ гузошт ва тақрибан миллион нафарро маҷбур сохт, ки тарки манзил кунанд.
Рӯзи сешанбе ҳам дари Биржаи саҳҳоми Ню-Йорк баста буд. Бори ахир ин Биржа дар охирҳои соли 80-уми қарни 19, ва он вақт ҳам бар асари ҳавои номусои тайи ду рӯз корашро таътил карда буд.
