Пас аз ду рӯзи таркиш дар кони ангишти "Шӯроб" маъмурияти корхона тафсилоти онро ошкор карданд.

Насим Каримов, мудири кулли ширкати “Ангишт, рӯзи 26-уми июл дар номае ба Радиои Озодӣ навишт: "Дарвоқеъ, соати 16-и рӯзи 24-уми июл аз зери замин гази СО-СО2 ихроҷ ва қисме аз коргарон заҳролуд шуданд. Аксар коргарон бо ёрии аввал наҷот ёфтанд, вале сардори ҳавза, Абдуманнон Тошбоеви 61-сола фавтид. Аз ӯ ду фарзанд монд."

Каримов дар суҳбат бо Радиои Озодӣ афзуд, ба оилаи Абдуманнон Тошбоев панҷ ҳазор сомонӣ ёрӣ кардаанд ва, қарор аст, давра ба давра беш аз 40 ҳазор сомонии дигар бидиҳанд.

“Ҳоло вазъи коргарони дигар хуб аст. Аллакай пайомадҳои садамаро бартараф кардем. Бо ризоияти муҳандисону нақбканон тасмим гирифтем корро аз рӯзи 27-уми июл шурӯъ кунем”, -- гуфт Насим Каримов. Вале ӯ дар мавриди зиёни молӣ маълумоти бештар надод.

ИНЧУНИН, БИХОНЕД:

Таркиш дар кони ангишти Шӯроб. Як нафар ҷон бохта, чанд каси дигар захмӣ шуданд

Ба гуфтаи масъулони корхона, рӯзона то 300 тонна ангишт истеҳсол мекунанд. Танҳо дар дохили нақб беш аз 50 ангишткан фаъолият мебаранд ва дар умум ҳудуди 500 коргар ба истеҳсолу фурӯши ангишт машғуланд.

Вале сокинону коргарони ин шаҳраки саноатӣ дар Исфара мегӯянд, садамаву ҳодисаҳои дигари нохуш дар кон тақрибан ҳар моҳ ба вуқуъ мепайвандад ва аз ин пеш дар соли 2019 як коргар бар асари заҳролудшавӣ фавтида буд.

Кони “Шӯроб” аз конҳои калонтарини истеҳсоли ангишт дар Тоҷикистон аст, ки асосан корхонаву муассисаҳои давлатиро бо маводи сӯхт таъмин мекунад.

Артиши Покистон гуфт, дар натиҷаи аз даст додани мавқеъҳои худ 46 сарбози артиши Афғонистон ба хоки Покистон ақибнишинӣ карда, аз ин кишвар паноҳандагӣ хостаанд.

Дар давоми ҳафтаҳои гузашта садҳо узви дигари артиши Афғонистон таҳти фишори Толибон ҳамингуна ба хоки Тоҷикистон, Эрон ва Покистон гузашта буданд.

Дар изҳороти артиши Покистон гуфта шудааст, ки низомиёни Афғонистон дар гузаргоҳи Читрол, воқеъ дар шимоли Покистон, паноҳ бурдаанд. Читрол макони марзиест, ки бо се минтақаи Афғонистон – Кунар, Бадахшон ва Нуристон – ҳаммарз мебошад.

Дар изҳороти мақомоти Покистон омадааст, сарбозон шаби гузашта аз марз гузаштанд ва дар миёни онҳо панҷ афсар ҳам мебошанд. Онҳо бо паноҳгоҳ, ғизо ва ёрии зарурии тиббӣ таъмин шудаанд.

Покистон гуфтааст, пас аз анҷоми тамоми муқаррароти зарурӣ, ин гурӯҳи низомиён ва 35 низомие, ки пештар ба Покистон гузашта буданд, дубора ба Афғонистон баргардонда хоҳанд шуд.

Ин ҳодиса дар ҳолест, ки равобити Исломобод ва Кобул дар вақтҳои охир пуртаниш шудааст. Дар як ҳодисаи чанд ҳафта пеш Кобул барои рабуда шудани духтари сафираш дар Покистон намояндаи дипломатиашро ба ватан бозхонд.

Дар гузашта Афғонистон Покистонро барои пешниҳоди кумакҳои пинҳонӣ ба Толибон муттаҳам кардааст. Исломобод ин иттиҳомотро ҳеч гоҳ напазируфтааст.

Ду хабарнигори бахши беларусии Радиои Озодӣ, ки дар фазои саркӯбҳои матбуоти озоду ҷомеаи шаҳрвандии раҳбари худкомаи ин кишвар Александр Лукашенко даҳ рӯз дар ҳабс буданд, озод шуданд.

Инна Студинская ва Алеҳ Ҳруздилович рӯзи 26-уми июл озод шуда, вале ҳамзамон огоҳӣ гирифтанд, ки дар кадом ҷинояти номаълуме гумонбар мемонанд.

Студинская давоми нӯҳ рӯз ва Ҳруздилович муддати се рӯз ба нишони эътироз аз ҳабси худ гуруснанишинӣ карданд.

Соли гузашта, дар авҷи маъракаи ҳукумат алайҳи мухолифон ва эътирозгарон, мақомот парвонаи кор ё аккредитатсияи Студинская, Ҳруздилович ва Дашчинскийро бекор карданд.

Хабарнигори дигари Радиои Озодӣ Алес Дашчинский рӯзи 23-юми июл озод шуд.

Ин се хабарнигор рӯзи 16-уми июл ҳамроҳ бо журналистони дигари мустақил ба ҳабс гирифта шуданд. Он рӯз полис ва ходимони амниятӣ хонаву дафтарҳои корӣ, аз ҷумла намояндагии Радиои Озодиро дар шаҳри Минск тафтиш карданд.

Дар таҳаввулоти ҷудогона журналисти телевизиони Белсат Иҳор Иляш низ баъд аз 10 рӯз аз ҳабс раҳо гардид.

Дар посух ба намоишҳои эътирозии сартосарӣ дар Беларус мақомот дар ин кишвар дари матбуоти зиёди мустақил, аз ҷумла 50 созмони ҷамъиятиро бастанд. Эътирозҳое, ки пас аз интихоботи моҳи августи соли гузашта тамоми Беларусро фаро гирифт, ба нишони норизоият бо натиҷаҳои ин сабқати сиёсӣ барпо шуд.

Мухолифон ва Ғарб гуфтанд, ки дар асл барандаи интихобот на Александр Лукашенко, балки Светлана Тихановская аст. Лукашенкоро дар сохтакории натиҷаҳои интихобот гунаҳкор мекунанд.

Бисёре аз намояндагони мухолифон, агар ҳабс нашуданд, кишварро тарк карданд. Ғарб, ки гуфтааст, натиҷаҳои интихоботи Беларусро намепазирад, дар чандин ҳолат Лукашенкои 66-сола, аъзои оилааш, мақомдорони калидӣ ва афроди дигари дастдошта дар саркӯбу азияти мухолифону эътирозгаронро таҳрим кард.

Дар пайи маҷбуран дар хоки Минск фуруд овардани ҳавопаймои тиҷоратии аврупоиву ҳабси блогери мунтақиди ҳукумат Иттиҳоди Аврупо ҳам таҳримҳои иловагӣ ҷорӣ кард.

Оҷонси мубориза бо фасод дар минтақаи Кӯлоб ба зидди чаҳор афсари милиса парванда кушода, баъзе аз онҳоро ба додгоҳ фиристодааст.

Ба иттилои расмӣ, афсарони милиса ба қаллобиву камомад, ришвагирӣ ва тасарруфи маблағ гумонбаранд. Назари онҳо ва наздиконашон дастрас нест.

Ҷамшед Гулмаҳмадзода, раиси Идораи зиддифасод дар минтақаи Кӯлоб, ҳафтаи гузашта гуфт, "тафтиши парвандаи сарваколатдори гурӯҳи махсус дар РКД-и Кӯлоб, Зафар Икромов, анҷом шуда, ба суд рафтааст. Вай ҳангоми гирифтани пора ба маблағи 51 ҳазор сомонӣ дастгир шуд."

Ба қавли ӯ, алайҳи Нуриддин Неъматов, муфаттиши Идораи умури дохилии ноҳияи Фархор, бо гумони порагирӣ парванда кушоданд.

Умед Ҳомидов, корманди фаврии Идораи корҳои дохилии ноҳияи Шамсиддин Шоҳин ба қаллобӣ ва Ҷумъахон Сафаров, корманди идораи шиносномадиҳӣ дар ноҳияи Муъминобод, барои камомади пулӣ муттаҳам будаанд.

Наворро дар инҷо бинед:

Embed ба дигарон фиристед

Парванда ба зидди чаҳор афсари милиса дар Кӯлоб

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:57 0:00

Соли 2020 дар минтақаи Кӯлоб нисбат ба 7 маъмури милиса парванда боз карда буданд.

Номи милиса, ҳомии ҳуқуқу масъули тартибот, дар солҳои охир борҳо дар қазияҳои марбут ба фасоди молӣ ва шиканҷа зикр шудааст. Дар як пурсиши афкори умум, ки соли 2015 Оҷонси зиддифасод анҷом дода буд, таъкид мешавад, сокинони зиёди Тоҷикистон ходимони ҳифзи ҳуқуқ ва милисаҳоро ба фасодкорӣ гумонбар медонанд.

Баъзе аз коршиносон мегӯянд, аз он замон то кунун, зоҳиран, вазъ тағйири ҷиддӣ накардааст. Ба қавли онҳо, стратегияи ислоҳоти милисаи тоҷик дар он сурат натиҷа хоҳад дод, ки худ риояи қонунро дуруст иҷро кунанд ва маошу даромади расмиашон ба ҳадде боло равад, ки ҷое барои ришвату фасод намонад.

Ин дар ҳолест, ки моҳи ноябри соли 2020 раиси ҷумҳури Тоҷикистон дар изҳороте саҳми милисаҳои тоҷикро барои мубориза бо ҷинояткорӣ дар кишвар муҳим донист.

Дар ҳоле ки гурӯҳи шӯришии Толибон дар остонаи берун рафтани нирӯҳои амрикоӣ аз Афғонистон аз "дастовардҳояш" дар майдони ҷанг мегӯяд, як генерали амрикоӣ гуфт, Иёлоти Муттаҳида ба нишони пуштибонӣ аз нирӯҳои Афғонистон ба ҳамлаҳои ҳавоӣ идома хоҳад дод.

Чанд ҳафтаи охир юриши Толибон дар минтақаҳои мухталифи ин кишвар идома меёбад. То ҳол қаламравҳои зиёд, аз ҷумла, посгоҳҳои марзиву манотиқи шаҳрнишин зери назари шӯришиён гузаштаанд ва бисёриҳо аз сустиву нотавонии артиши Афғонистон сӯҳбат мекунанд.

Генерал Кеннет МакКензи, ки раҳбарии фармондеҳии марказии ИМА-ро ба ӯҳда дорад, гуфт, "Амрико чанд рӯзи охир ҳамлаҳои ҳавоии худро ба нишони пуштибонӣ аз нирӯҳои Афғонистон афзоиш додааст. Дар сурате, ки Толибон ҳамлаҳои худро идома бидиҳанд, Амрико омода аст, дар ҳафтаҳои наздик ироаи кумакҳоро идома диҳад."

Ба қавли генерали амрикоӣ, низомиёни ин кишвар баъд аз 31-уми август ҳам ба нирӯҳои ҳавоии Афғонистон ёрии худро идома медиҳанд, вале аз додани посухи мушаххас дар бораи ин ки оё баъд аз рафтан нирӯҳои амрикоӣ ба ҳадафҳои Толибон ҳамлаҳои ҳавоии мустақим анҷом медиҳанд ё на, худдорӣ кард.

Тибқи гузоришҳо, ҳоло Толибон тақрибан нисфе аз 421 ноҳияи Афғонистонро зери назар доранд ва ба қавли МакКензи, ҳукумати Афғонистон дар рӯзҳои оянда “бо имтиҳони ҷиддие” рӯбарӯ мешавад. Айни замон ӯ таъкид кард, ки пирӯзии Толибон як чизи ногузир нест ва ҳалли сиёсӣ яке аз роҳи ҳалҳо мемонад.

Тунисиҳое, ки аз гурӯҳҳои рақиби сиёсӣ ҷонибдорӣ мекунанд, баъди бо қарори президент Қайс Саид ба истеъфо фиристода шудани ҳукумат ва боздошта шудани кори парлумон, рӯзи 26-уми июл дар назди бинои маҷлис ба сӯи ҳамдигар сангандозӣ карданд. Шоҳидон гуфтанд, ки чандин нафар ҷароҳат бардоштанд. Қарори президентро мунаққидонаш “табаддулоти давлатӣ” номида, дарҳол дар беруни бинои парлумони ин кишвари воқеъ дар Африқои Шимолӣ чандсад нафар таҷаммӯъ карданд. Қайс Саид дар як изҳороти телевизиониаш 25-уми июл гуфт, ҳукумати нахуствазир Ҳишом Машиширо ба истеъфо мефиристад ва худаш раҳбарии иҷроияи ҳукуматро ба ӯҳда мегирад.

Таҳаввулоти ахир дар ҳолест, ки чанд соат пеш аз ин дар саросари кишвар эътирозҳо бо талафи истеъфои ҳукумат ва пароканда шудани парлумон шурӯъ шуд. Саид, ки дар гузашта профессори ҳуқуқи донишгоҳ будааст, гуфт, ки тадбирҳои ҷорикардаи ӯ ба хотири ҳифзи Тунис ва ҳимояти кишвар бар асоси конститутсияи ин давлат гирифта шудааст. Ӯ гуфт, “мо лаҳзаҳои бисёр ҳассосро дар таърихи Тунис пуштисар мекунем, вале ин лаҳзаҳо бисёр хатарнок ҳастанд”. Ба нишони пуштибонӣ аз президент издиҳоми калони мардум ба кӯчаву хиёбонҳои шаҳру манотиқи мухталифи Тунис сарозер шуд. Иқдомҳои ахири Саид ба низоми ҳассоси демократии Тунис як чолиши калоне баъди инқилоби соли 2011 гардид, ки сарчашмаи Баҳори Араб ва эътирозҳо дар саросари Ховари Миёна будааст.

Дар Гурҷистон рӯзи 26-уми июл машқҳои муштараки азими нирӯҳои дифоии Гурҷистон ва артиши ИМА дар Аврупо ва Африқо (U.S. Army Europe and Africa) шурӯъ шуд, ки дар он 2500 низомӣ аз 15 кишвари муттафиқ ва шарик иштирок хоҳанд кард. Машқҳое, ки то 6 август идома меёбанд, дар панҷ минтақаи тамринии Гурҷистон барпо хоҳанд шуд. Маросими ифтитоҳи машқҳо 26 июл дар пойгоҳи ҳавоии Сенаки барпо шуда, 6 август дар машқгоҳи Орфоло натиҷагирӣ мешаванд. Ин машқҳои 10-уми зери унвони “Рӯҳи чолок” аст, ки бо ҳадафи тақвияти амнияти минтақавӣ ва қобилияти низомии нирӯҳои муштарак баргузор мешаванд. Бори аввал ин машқҳо соли 2011 баргузор шуданд ва баъди он ҳар сол як дафъа бо ширкати низомиёни гурҷиву амрикоӣ ташкил мешаванд. Ҳар сол шуморим низомиёни ширкатдори машқҳо тағйир меёбад. Аз Гурҷистон дар ин машқҳо 700 ва аз кишварҳои ҳамкору шарик 250-нафарӣ низомиён ҷалб шудаанд.

Гурӯҳе аз муҳоҷирони тоҷик дар Олмон барои бартараф кардани паёмадҳои офати табии ахир ба сокинони маҳаллӣ кӯмак мерасонанд. Ба нақли ин панҷ зодаи вилояти мухтори кӯҳистони Бадахшон ва сокини гӯшаҳои гуногуни Олмон, онҳо як ҳафта инҷониб барои тоза кардани хонаҳои мардум дар ноҳияи Шулд ихтиёран даст ба кор шудаанд. Ба иттилои мақомоти олмонӣ, ин ноҳияи воқеъ дар қаламрави вилояти Рейнланд-Пфалтс, яке аз осебдидатарин нуқтаҳо дар паи обхезиҳои ду ҳафта пеш ба шумор меравад.

Дар ин минтақаи Олмон дар натиҷаи фаромадани сел дар рӯзи 15 уми июл, даҳҳо манзил вайрон шудаанд. Дар маҷмӯ сел ба беш аз 20 шаҳри Олмон харобӣ оварда роҳҳо, манзилҳои зист ва иншооти давлатиро хароб кард. Беш аз 130 нафар ба ҳалокат расида, даҳҳо тани дигар беному нишон шуданд.

Охири ҳафтаи гузашта дар шаҳри Ургути вилояти Самарқанди Ӯзбекистон барои пароканда кардани мардуми норозӣ аз низомиён ва нерӯҳои Омон истифода кардаанд. Бино ба иттиллои бахши узбекии Радиои Озодӣ, беназмиҳои сокинон баъди он сар задааст, ки рӯзи 21-уми июл як сокини 32-солаи Ургут дар ҳолати мастӣ мардуми деҳаи Ғусро таҳқир намуда, наворро дар шабакаи итҷимоӣ ҷой додааст. Баъдтар ин мард барои гуфтаҳояш узр пурсид, вале аллакай мардуми зиёди норозӣ дар назди хонаи ӯ ҷамъ омада буданд. Мард фирор кард. Дар наворҳое, ки корбарон ба бахши узбекии Радиои Озодӣ фиристодаанд, дида мешавад, ки сокинон бо талаби муҷозоти ӯ дар назди бинои ҳукумати ноҳия гирд омаданд. Ба нақли шоҳидон, дар пайи ин ошӯб даҳҳо нафар боздошт шудаанд. Раёсати корҳои дохилии вилояти Самарқанд гуфтааст, пас аз тазоҳурот, бар асоси моддаи "Таҳқир" нисбати марди таҳқиргар парвандаи ҷиноӣ боз кардааст.

Бинобар маҳдудиятҳои COVID-19 ҳудуди 3 ҳазор муҳоҷирони кории Тоҷикистону Узбекистон дар ҷумҳурии Абхозистон банд мондаанд. Хабаргузории русии Интерфакс менависад, Рамин Габлай, раҳбари Хадамоти давлатии муҳоҷирати Абхозистон гуфтааст, тоҷикону узбекҳо бо сабаби баста будани марз имкони бозгашт ба ватанҳояшонро надоранд. Абхозистон соли 2008 аз ҳудуди Гурҷистон ҷудо шуд ва худро кишвари мустақил эълон кард, вале аксар кишварҳо, аз ҷумла Тоҷикистон истиқлолияти онро ба расмият намешиносад. Бо ин вуҷуд, барои садҳо шаҳрвандони ҷӯёи кори Тоҷикистон Абхозистони рӯ ба Русия як минтақаи дигаре барои кору даромад шудааст.

Соли ҷорӣ сафорати Тоҷикистон дар Русия даҳҳо муҳоҷири тоҷикро аз ҳудуди Абхозистон берун карда, барои бозгашташон ба Тоҷикистон кӯмак намуд.

Баъди камтар аз се ҳафтаи як зилзилаи пурқурбонӣ, шабонарӯзи гузашта дар ноҳияи Рашт боз як заминҷунбии дигар сабт шудааст. Кумитаи ҳолатҳои фавқулодда мегӯяд, заминларза нимашаби 25-уми июл ба амал омада, маркази он дар 165-километрии шимолу шарқи шаҳри Душанбе ва 21-километрии шимоли ноҳияи Рашт будааст. Қувваи зилзила дар марказаш 3-4 балл аз рӯи ҷадвали 9-баллии Риҳтер ва дар ноҳияи Тоҷикобод 3 баллро ташкил додааст. Заминҷунбии сахте, ки дар минтақаи Рашт рӯзи 10-уми июли имсол рух дод, боиси харобии даҳҳо манзил ва ҳалокати 5 нафар шуд. Ба гуфтаи кумита, дар натиҷаи заминларзаи ахир хисорот ва талафоти ҷонӣ ба қайд гирифта нашудааст.

Тоҷикистон ва кишварҳои атрофи он минтақаи зилзилахез ба шумор меравад ва дар гузашта шоҳиди заминҷунбиҳои пурталафоту фоҷеабор шудааст.

СММ гуфт, дар моҳҳои май ва июни соли ҷорӣ дар Афғонистон 2400 сокини мулкӣ кушта ваё захмӣ шуданд ва ин омор дар қиёс бо ҳамин ду моҳи баъди соли 2009 рекордӣ будааст. Дар гузориши СММ инчунин омадааст, ки дар шаш моҳи соли ҷорӣ аксари қурбониҳои ҳамлаҳо дар миёни афроди мулкӣ занону кӯдакон мебошанд. Гузорише, ки рӯзи 26 июл аз ҷониби UNAMA – Дафтари кӯмаки СММ барои Афғонистон нашр шуд, мегӯяд, дар моҳҳои январ то июни соли 2021 дар Афғонистон 5183 ҳодисаи осеб дидани сокинони мулкӣ ба қайд гирифта шудааст ва аз ин омор 1659 ҳолаташ бо марги инсонҳо анҷомидааст. Ин 47 дарсад бештар назар ба ҳамин марҳилаи соли гузашта мебошад.

Баъди он ки президенти ИМА Ҷо Байден дар бораи то 31-уми август анҷом додани маъракаи хуруҷи нирӯҳо хабар дод, низоъҳои мусаллаҳонаи миёни Толибон ва нирӯҳои ҳукуматии Афғонистон афзоиш ёфт. Нирӯҳои амрикоиву байналмилалӣ 20 соли охир дар Афғонистон барои муқобила бо гурӯҳҳои шӯришӣ ва террористӣ ба ҳукумат ва артиши Афғонистон кӯмак мекарданд.

Ин дар ҳолест, ки ҳафтаҳои ахир дар Қатар музокироти сулҳи ҳукумат ва шӯришиён идома дорад, вале аз замони оғози ин музокираҳо дар моҳи сентябр то ҳол пешрафти қобили мулоҳизае ҳосил нашудааст.

Гузориши СММ мегӯяд, ки занону кӯдакони қурбонии ҳамлаҳои ним соли ахир 46 дарсади кулли қурбониҳоро ташкил медиҳанд. Дар маҷмӯъ, дар ин муддат 468 кӯдак куштаву 1214 нафарашон маҷрӯҳ шудаанд, талафоти занон дар шаш моҳ 219 ва маҷрӯҳшудаҳо 508 ҳолатро ташкил додааст. UNAMA гуфтааст, “ин ҳолат фавқулодда такондиҳанда аст, ки нисфи қурбониён дар миёни сокинони мулкиро занон, писарон ва духтарон ташкил медиҳанд”.

Порлумони Фаронса қонунеро қабул кард, ки бар асоси он эмкунӣ ба зидди COVID-19 барои ҳама кормандони соҳаи тиб ҳатмӣ шуда, рӯйхати маконҳое, ки бояд бо иҷозати тиббӣ амал кунанд, афзоиш дода мешавад.

Тағйирот ба қонун дар пасманзари эътирозҳои сартосарӣ аз муқаррароти нав қабул карда шуд. Президент Эммануэл Макрон қасд дорад, эмкуниро ба силоҳи асосии зидди COVID-19 табдил диҳад.

Ҳукумати Макрон гуфтааст, чунин чораҳо ба он хотир заруранд, ки қишрҳои осебпазир ҳимоят шаванд ва беморхонаҳо аз ҳад зиёд пур нашаванд.

Ин дар ҳолест, ки Фаронса мисли кишварҳои дигари аврупоӣ бо навъи бисёр сангини “Делта”-и коронавирус дастбагиребон аст. Дар оғози моҳи июл мавридҳои гирифторӣ рӯзона аз 4 ҳазор ба 22 ҳазор нафар афзоиш ёфтааст.

Мақомот дар Олмон гуфтанд, дар сурати дар моҳҳои наздик афзоиш ёфтани шумори гирифторон барои шахсони эмнашуда маҳдудиятҳои нав ҷорӣ мегардад. Маҳдудиятҳо метавонад аз роҳ надодани чунин нафарон ба тарабхона, кинотеатр ва варзишгоҳҳо иборат шавад.

Амрико ҳам дар талоши ин аст, ки шумори шахсони эмшударо бештар кунад. Доктор Энтони Фаучи, сироятшиноси калони ҳукумати Амрико, дар суҳбат бо CNN гуфт, чунин зарурат ба он хотир аст, ки афроди эмнашуда вазъи кишварро бо мушкилоти бештар рӯ ба рӯ накунанд.

Вазорати тандурустӣ эълон кард, ки эҳтимол навъи "Делта" (Delta)-и коронавирус дар Тоҷикистон вуҷуд дорад. Ғафур Муҳсинзода, муовини аввали Вазири тандурустии Тоҷикистон рӯзи 26-уми июл зимни нишасти хабарӣ гуфт, бо назардошти ин, ки "Делта" дар кишварҳои ҳамсоя ошкор шудааст, дар Тоҷикистон ҳам вуҷуд доштани он рад намешавад. Ӯ афзуд, "навъи санҷишҳои беморон барои ташхиси тиббӣ ба як озмоишгоҳи Лондон фиристода шудааст."

Дар ҳоли ҳозир шумораи гирифторон ба КОВИД-19 дар саросари ҷаҳон, аз ҷумла Тоҷикистон рӯ ба афзоиш аст. Яке аз сабабҳои афзоиши гирифторонро Созмони ҷаҳонии тандурустӣ дар навъи "Делта"-и коронавирус мебинад.

Навъи "Delta", ки бори аввал дар Ҳиндустон кашф шуд, ҳоло ҳадди аққал дар 111 кишвар мавҷуд аст ва боиси рӯ задани мавҷи нави сироятҳо дар чанде аз кишварҳо шуд. Ин навъи короновирус назар ба ҳамаи навъҳои дигар бо суръати бештар сироят мекунад.

Аз ибтидои вабои коронавирус дар саросари дунё бештар аз 187 миллион кас ба КОВИД-19 мубтало шуда, бештар аз 4 миллион кас фавтидаанд.

Тибқи иттилои расмӣ, то рӯзи 25-уми июл дар Тоҷикистон 14592 нафар ба COVID-19 гирифтор шуда, 117 нафар фавтидаанд. Аммо бархе мутахассисон мегӯянд, теъдоди воқеии гирифторшудагон аз омори расмӣ бештар аст.

Президенти пешини Қирғизистон Алмосбек Отамбоев ба ташкили беназмиҳои оммавӣ дар шаҳри Бишкек, дар моҳи октябри соли 2020, гумонбар мешавад.

Ба иттилои тафтишот, Отамбоев ба маҳзи ин ки дар моҳи октябри соли 2020 аз боздоштгоҳ раҳо шуд, талоши ғасби қудратро кардааст. Аз рӯи моддаи мазкур ӯро то 10 сол зиндон таҳдид мекунад. Ин шашумин парвандаи ҷиноӣ ба зидди президенти пешин аст.

Тафтишот мегӯяд, Отамбоев бо сарвазири пешини он кишвар Омурбек Бабанов ва мансабдорони дигари баландпоя забон як карда, "миёни тарафдоронашон хашму бадбиниро афзоиш додаанд". Ба иттилои тафтишот, ин боис ба занозании гуруҳӣ ва беназмии оммавӣ шудааст.

9-уми октябр - ҳамон рӯзи ҳодисаҳо дар шаҳри Бишкек ҳолати изтирорӣ эълом шуда, қуюди шабгардӣ ҷорӣ гардид ва ба шаҳр техникаи низомӣ ворид шуд. Отамбоев 10-уми октябр боздошт шуд.

Отамбоев солҳои 2011-2017 президенти Қирғизистон буд. Вай моҳи июни соли 2020 дар доираи парвандаи ғайриқонунӣ озод кардани як маҳбус ба 10 сол зиндон маҳкум шуд. 30-юми ноябри соли 2020 Додгоҳи олии Қирғизистон ҳукми зинаҳои поёниро бекор ва парвандаро ба баррасии иловагӣ фиристод.

Нисбат ба Отамбоев чанд парвандаи дигар, аз ҷумла ташкили беназмиҳои оммавӣ, хушунат нисбат ба корманди мақомоти давлатӣ, фасодкорӣ ва ғайра боз шудааст.

Сафорати Қирғизистон дар Русия изҳороти вакили порлумони Қирғизистон Ойбек Осмоновро дар бораи ихроҷи гуруҳии қирғизистониҳо аз Русия рад кард.

Ба иттилои сафорат, дар давоми моҳи июл аз тамоми минтақаҳои Русия ҳамагӣ 18 шаҳрванди Қирғизистон ихроҷ шудааст.

Ба ҷуз ин, 65 шаҳрванди Қирғизистон дар яке аз боздоштгоҳҳои махсуси Москва нигаҳ дошта мешаванд. Ин шаҳрвандон баъди занозании гуруҳии рӯзи 12 июл боздошт шудаанд.

Сафорати Қирғизистон хабар дод, ки "барои ҳифзи ҳуқуқҳои онҳо талош карда мешавад".

Дар Русия наздики як миллион қирғизистонӣ муҳоҷири меҳнатӣ ҳастанд.

Танзимгари аврупоии васоили доруӣ иҷоза дод, ки наврасони аз 12 то 17-сола ваксинаи "Moderna" бигиранд.

Наврасонро низ ба тартиби калонсолон - ду воя дар фосилаи чаҳор ҳафта - ваксина мезананд.

Моҳи майи имсол танзимгари мазкур иҷоза дода буд, ки кӯдакони аз 12 то 15-сола ваксинаи Pfizer/BioNTech бигиранд.

Бино ба омори расмӣ, дар Иттиҳоди Аврупо бештар аз нисфи аҳолии болиғ ваксина гирифтаанд.

Владимир Путин, раиси ҷумҳурии Русия, дар парад ё гашти бузурги киштиҳои ҷангӣ дар Санкт-Петербург аз қудрат ё тавоноии баҳрии кишвараш ситоиш кард.

Вай рӯзи 25-уми июл гуфт, “имрӯз нерӯи баҳрии Русия ҳама чизеро, ки барои кафолати ҳифзи кишвар ва манфиатҳои миллии мо зарур аст, дорад."

Президенти Русия афзуд, "мо метавонем душманони зериобӣ, рӯйизаминӣ ё ҳавоиро ошкор кунем ва дар сурати зарурат зарбаи марговар бизанем".

Дар шаҳри Санкт-Петербург ва минтақаҳои дигари Русия бо сабаби мавҷи шадиди бемории ҳамагир баргузории чорабиниҳои оммавӣ манъ аст. Бо вуҷуди ин, расонаҳои маҳаллӣ гузориш доданд, ки ҳазорон нафар барои тамошои киштиҳо рафта, бисёре аз онҳо ниқоби тиббӣ надоштанд.

Чунин манзара дар шаҳри бандарии Севастополи Қрим низ мушоҳида шудааст. Флоти Баҳри Сиёҳи Русия дар онҷо парад баргузор кард.

Баҳодур Усмонов, муштзани маъруфи тоҷик, ки 25-уми июл дар Олимпиадаи Токио дар даври муқаддамотӣ дар вазни то 63 кило бар Леонел Сантоз Нунез аз Доминикан бо ҳисоби 4:1 пирӯз шуд, дар даври баъдӣ бо Элнур Абдураимов, варзишгари қазоқтабори узбекистонӣ, рақобат хоҳад кард.

Ба иттилои сомонаи olympics.com қувваозмоӣ миёни Баҳодур Усмонови 23-сола (либоси сурх) ва Элнур Абдураимови 27-сола (либоси кабуд) рӯзи 31-уми июл соати 12:51 бо вақти маҳаллӣ (8:51 бо вақти Душанбе) шуруъ мешавад.

Муштзани узбекистонӣ ҳам рӯзи якшанбе дар рақобати аввалини худ бар Чинзонг Баатарсух аз Муғулистон бо ҳисоби 4:1 пирӯз шуд.

Элнур Абдураимов барандаи медали биринҷии қаҳрамонии ҷаҳон дар соли 2015 дар Қатар мебошад. Ӯ соли 2017 дар қаҳрамонии ҷаҳон дар Ҳамбурги Олмон мақоми панҷумро соҳиб шудааст. Элнур соли 2017 дар қаҳрамонии Осиё дар Тошканд бо медали тило сарфароз шуд. Имсол дар қаҳрамонии Осиё дар Имороти Муттаҳидаи Араб соҳиби медали биринҷӣ гардид.

Баҳодур Усмонов соли 2019 дар Бангкоки Тайланд ба унвони қаҳрамони Осиё даст ёфт. Ӯ дар қаҳрамонии ҷаҳон соли 2019 дар Екатеринбурги Русия мақоми нӯҳумро касб кард, имсол дар қаҳрамонии Осиё дар Дубай медали биринҷӣ гирифт.

Қади Баҳодур Усмонов 1 метру 75 сантиметр аст, ки нисбат ба рақибаш Элнур Абдураимов 5 сантиметр баландтар аст. Ҳарду муштзани номдору пуртаҷриба, ки дар мусобиқаи интихобии олимпии Осиёву Уқёнус моҳи марти соли 2020 дар шаҳри Умони Урдун соҳиби роҳхат ба Олимпиадаи Токио шудаанд, мақсад доранд медали олимпӣ ба даст биёранд.

ИНЧУНИН, БИХОНЕД:

Пирӯзии муштзани тоҷик, Баҳодур Усмонов, дар рақобати нахустинаш дар Олимпиадаи Токио

Дар бораи варзишгарони дигари тоҷик

Рӯзи якшанбе муштзани дигари тоҷик Шаббос Неъматуллоев дар вазни то 81 кило аз Даксианг Чен аз Чин бо ҳисоби 0:4 шикаст хӯрд ва аз ҳаққи ширкат дар даври баъдӣ маҳрум гашт.

Боз як муштзани тоҷик Сиёвуш Зуҳуров рӯзи 29-уми июл дар вазни беш аз 91 кило қувваозмоӣ мекунад. Рақибаш Мурод Алиев аз Фаронса мебошад.

Аз байни паҳлавонони тоҷик нахустин шуда Сомон Маҳмадбеков рӯзи 26-уми июл ба сабқат сар хоҳад кард. Баъдан Акмал Муродов 27-уми июл ба рақобат мепардозад. Комроншоҳи Устопириён 28-уми июл ва Темур Раҳимов 30-юми июл вориди рақобат мешаванд.

Сомон Маҳмадбеков дар вазни то 73 кило дар даври аввал бо Аҳмад Аликай аз тими паноҳандагон рақобат мекунад. Дар радабандии ҷаҳонӣ Сомон дар зинаи 16-ум ва Аҳмад дар зинаи 251-ум қарор доранд. Дар ин вазн ҳамагӣ 36 нафар номнавис шудаанд.

Рақиби Акмал Муродов дар вазни то 81 кило дар даври аввал Ҷоштер Эндрю аз Гуам мебошад. Дар радабандии ҷаҳонӣ Акмал дар зинаи 53-юм ва Ҷоштер дар зинаи 145-ум қарор доранд. Теъдоди варзишгарон дар ин вазн 35 нафарро ташкил медиҳад.

Комроншоҳи Устопириён дар вазни то 90 кило ба рақобат аз даври дувум мепардозад. Рақибаш Аксел Клергет аз Фаронса аст, ки дар феҳристи ҷаҳонӣ нисбат ба Комроншоҳ панҷ зина болост (ҷойи 17-ум). Дар ин вазн 33 гуштигир барои ҷоизаҳо талош мекунанд.

Темур Раҳимов дар вазни беш аз 100 кило дар даври аввал бо Энди Гранда аз Куба қувваозмоӣ хоҳад кард. Энди дар феҳристи ҷаҳонӣ нисбат ба Темур се зина поён аст (20-ум). Дар ин вазн 22 нафар сабти ном шудаанд.

Дар намуди дигар - шиноварӣ ба масофаи 50 метр бо тарзи озод Анастасия Тюрина ва Олимҷон Ишонов 30-юми июл ба рақобат мепардозанд. Илдар Аҳмадиев оид ба варзиши сабук дар давидан ба масофаи 100 метр миёни мардон рӯзи 31-уми июл рақобат хоҳад кард.

Кӣ чӣ гирифт?

Дар ҳамин ҳол дар Олимпиадаи Токио варзишгарони 35 кишвар медал ба даст овардаанд. Аз рӯи ҳисоби медалҳо бо дарназардошти сифати онҳо (аввал тилло, баъдан нуқра ва биринҷӣ) мунтахаби Чин дар мақоми аввал аст. Намояндагони ин кишвар 11 медал (6 тилло, 1 нуқра ва 4 биринҷӣ) гирифтаанд.

Мақоми дувумро мунтахаби Ҷопон бо касби 6 медал (5 тилло ва 1 нуқра) азони худ кардааст. Мунтахаби Иёлоти Муттаҳидаи Амрико (ИМА) бо касби 10 медал (4 тилло, 2 нуқра ва 4 биринҷӣ) дар мақоми севум қарор дорад.

Ба даҳгонаи аввал, инчунин дастаҳои мунтахаби Кореяи Ҷанубӣ (2 медали тилло ва 3 биринҷӣ), Русия (1 медали тилло, 4 нуқра ва 2 биринҷӣ), Италия (1 медали тилло, 1 нуқра ва 3 биринҷӣ), Австралия (1 медали тилло, 1 нуқра ва 1 биринҷӣ), Фаронса (1 медали тилло, 1 нуқра ва 1 биринҷӣ), Маҷористон ва Тунис (ҳар кадом 1 медали тилло ва 1 нуқра) дохиланд.

Аз кишварҳои Шӯравии собиқ ба ҷуз аз Русия, Узбекистон як медали тилло, Гурҷистон як медали нуқра, Қазоқистон ва Украина дутоӣ медали биринҷӣ, Эстония як медали биринҷӣ гирифтаанд.

Дар Бозиҳои ХХХII тобистонаи олимпӣ Тоҷикистонро даҳ варзишгар намояндагӣ мекунад. Се нафари онҳо – паҳлавон Комроншоҳи Устопириён, шиноварон Анастасия Тюрина ва Олимҷон Ишонов бори дуюм аст, ки ба ҳаққи ширкат дар Бозиҳои олимпӣ мушарраф шудаанд. Ҳарсе дар Олимпиадаи Рио-2016 иштирок карда буданд. Ҳафт нафари дигар бори аввал дар Бозиҳои олимпӣ ширкат меварзанд.

Дар асоси низомномаи Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ ба варзишгароне, ки дар Бозиҳои олимпӣ ҷойҳои аввал, дувум ва севумро сазовор мешаванд, мутаносибан 300 000 сомонӣ, 250 000 сомонӣ ва 200 000 сомонӣ супурда мешавад.

Инчунин шаҳрдори Душанбе Рустами Эмомалӣ ба варзишгароне, ки дар Олимпиадаи Токио медал ба даст меоранд, дар пойтахти кишвар хона туҳфа мекунад. Аз ҷумла, барои медали тилло хонаи чорҳуҷрагӣ, барои медали нуқра хонаи сеҳуҷрагӣ ва барои медали биринҷӣ хонаи дуҳуҷрагӣ тақдим мегардад.

Бозиҳои тобистонаи олимпӣ дар Токио, ки 23-юми июл шуруъ шуд, то 8-уми август идома хоҳад кард. Олимпиада мебоист соли гузашта баргузор мешуд, аммо ба иллати пандемияи коронавирус барои як сол мавқуф гузошта шуд.

Мақомоти интихоботии Русия як номзади бонуфузи Ҳизби коммунистро аз ширкат дар интихоботи порлумонии моҳи сентябр маҳрум карданд.

Кумисюни марказии интихобот рӯзи 24-уми июл гуфт, номи Павел Грудинин аз рӯйхати ҳизбӣ берун карда шуд, чун Додситонӣ дороиҳои ӯро дар хориҷа ёфтааст.

Грудинин дар интихоботи президентии соли 2018 дар Русия яке аз рақибони Владимир Путин буд ва бо дарёфти дувоздаҳ дарсад ройи мардум дар ҷойгоҳи дувум қарор дошт.

Ӯ пас аз интихобот зери тозиёнаи расонаҳои тарафдори Кремл афтид; тиҷораташ ба мушкилоти ҳуқуқӣ рӯ ба рӯ шуд ва аз мандати вакилӣ дар шӯрои шаҳри Видное, дар наздикии Маскав, маҳрум гардид.

Грудинин дороиҳояшро дар хориҷа рад кард.

Раҳбари Ҳизби коммунисти Русия, Геннадий Зюганов, қавл дод, ки аз рӯйи ин қарор шикоят мекунанд ва афзуд, "Грудинин дар рӯйхати номзадҳои ҳизб дар ҷойи сеюм хоҳад монд".

Чанде аз чеҳраҳои дигари оппозиситюн, ки аксарашон бо созмони мунтақиди зиндонии Кремл Алексей Навалний иртибот доштанд, аз иштирок дар интихоботи моҳи сентябр манъ карда шуданд.

Туркия мегӯяд, ду низомияш дар шимоли Сурия кушта ва ду тани дигар захмӣ шудаанд. Вазорати мудофиаи Туркия рӯзи 24-уми июл гуфт, ҳарбиёнаш замоне куштаву маҷруҳ шудаанд, ки корвони онҳо ҳадафи як инфиҷор (таркиш) қарор гирифт. Ба гуфтаи масъулони вазорат, пас аз ин ҳодиса нерӯҳои амниятии Туркия амалиёти низомиро ба роҳ монданд ва то ҳанӯз идома дорад. Касе ё гуруҳе масъулияти ин ҳодисаро расман ба уҳда нагирифтааст.

Додситонии ноҳияи Рашт Раҷабалӣ Ҳомидов, гумонбари дувум дар қатли Алиризо Худоёрови 21-соларо дастгир кардааст. Худоёров дар аввали моҳи июл дар як занозанӣ бо зарби корд кушта шуд. Наздиконаш ҳодисаро «аз пеш тарҳрезишуда» ва «кори дасти камаш панҷ нафар» медонанд. Муфаттишон мегӯянд, ҳанӯз барои қазоват кардан барвақт аст.

Як муфаттиши Додситонии ноҳияи Рашт 25-уми июл гуфт, боздошти Раҷабалӣ Ҳомидов се рӯз пеш сурат гирифт. «То замоне ки соҳиби асосии корд рӯшан карда нашавад, суолҳои зиёде барои тафтишот мемонад ва гумонбарон дастгиру бозпурсӣ мешаванд», -- афзуд ӯ.

Аз ин пеш мақомот сокини ноҳияи Рашт Зафари Насриддинро бо гумони даст доштан дар қатли Алиризо Худоёров дастгир карда буданд. Мадина Худоёрова, аммаи Алиризо Худоёров, мегӯяд, дар рӯзи ҳодиса Раҷабалӣ Ҳомидов ва Зафари Насриддинро якҷоя дида буд ва онро ба муфаттишон ҳам нақл кард.

Вале пайвандони Зафари Насриддин ӯро "мубталои бемории рӯҳӣ" ва ҳодисаро "тасодуфӣ" меноманд.

Ҷониби даъвогар мариз будани гумонбарро инкор намекунанд, аммо кушторро "аз пеш тарҳрезишуда" ва кори дасти камаш панҷ нафар медонанд, ки "дар паси Зафари Насриддин пинҳон шудаанд". Ҷунайдулло Худоёров, амаки Алиризо, рӯзи 20-уми июл гуфта буд, "онҳо мехоҳанд, Зафари Насриддин гуноҳро ба гардан гирад, баъд барои бемориаш афв шавад."

Ин дар ҳолест, ки Рухшона Исмонова, хоҳарбузурги Зафари Насриддин, рӯзи 19-уми июл дар суҳбати телефонӣ бо Радиои Озодӣ иддао кард, "Худоёровҳо мегӯянд, дар куштани Алиризо панҷ нафар, ба ӯ ҳамла кардаанд, ин нодуруст аст."

Пештар хонаводаи Худоёровҳо номи шахсонеро, ки ба бовари онҳо дар қатли Алиризо даст доранд, дар шабакаҳои иҷтимоӣ эълон карда буданд. Онҳо иддао доранд, ки бо ин афрод ва наздиконашон бар сари қитъаи замин баҳс доштанд ва эҳтимол муноқишаи охир ҳосили ҳамон ҷанҷол аст.

Шуъбаи корҳои дохилии Рашт дар аввал бо гумони куштори Алиризо Худоёров чаҳор ҳамдеҳаи ӯро дастгир карда буд, аммо дертар бо шарти берун нарафтан аз маҳалли зист се касро ҷавоб дод.

Ҷасади Алиризо Худоёров, донишҷӯйи Донишгоҳи Раштро субҳи 13-уми июл дафн карданд. Ӯ бародарзодаи Фарҳод Худоёров, раиси Ҳизби сотсиал-демократ дар ноҳияи Рашт ва Ҷунайдулло Худоёров, фаъоли шабакаҳои иҷтимоӣ аст.

Фарҳод Худоёров ва Ҷунайдулло Худоёров борҳо аз кори мақомот дар ноҳияи Рашт интиқод карда, ба гуфтаи худашон, зери фишор ҳастанд. Саъдулло Худоёров, бародари онҳо, моҳи гузашта дучори ҳамла шуда буд. Раёсати минтақавии Вазорати корҳои дохилӣ дар аввал нисбат ба ҳамлагарон бо иттиҳоми “авбошӣ” парванда кушода, ӯро ҷабрдида эътироф кард, аммо чанде нагузашта нисбат ба худи ӯ парванда боз кард.

Даҳҳо ҳазор кас дар кӯчаҳои чанд шаҳри Аврупо алайҳи қоидаҳои эмкунӣ ва роҳҳои пешгирӣ аз коронавирус эътироз карданд.

Тазоҳуроти калонтарин дар Фаронса баргузор шуд. Дар онҷо тақрибан 160 ҳазор кас иштирок карданд. Онҳо ба зидди лоиҳаи қонуне раҳпаймоӣ карданд, ки барои ворид шудан ба тарабхона ва ҷойҳои дигари ҷамъиятӣ «гузарнома» мепурсад. Мардум ҳамзамон аз эмкунии ҳатмии ҳамаи кормандони тиб норозиянд.

Эътирозҳо асосан осоишта буданд, аммо дар Порис (Париж) касе аз издиҳом бо шиори "Озодӣ!" ба сӯи як корманди полис курсӣ партофт. Полис дар ҷавоб аз обпошҳо истифода кард.

Тарҳе, ки дар Фаронса алайҳи он эътироз карданд, барои боздид аз осорхонаву кинотеатрҳо ва маконҳои сайёҳӣ, аз ҷумла тарабхонаҳо «гузарнома» талаб мекунад. Яъне, одамон бояд ё эм карда шаванд, ё озмоиши манфӣ нишон дошта бошанд ва ё исбот кунанд, ки аз COVID-19 сиҳат ёфтаанд.

Ҳазорон эътирозгар инчунин дар Рум ва шаҳрҳои дигари Итолиё ҷамъ омада, алайҳи қарори ҳукумат дар бораи талаб кардани "гузарнома" барои дастрасӣ ба варзишгоҳҳо, кинотеатрҳо ва ҷойҳои дигари ҷамъиятӣ эътироз намуданд.

Масъулони Боғи ҷонварони Сан-Диего дар Калифорния гурӯҳи бабрҳоро, пас аз он ки санҷиши коронавируси яке аз онҳо мусбат баромад, ба "карантин" гирифтаанд. Онҳо гуфтанд, бабри барфии 9-сола, Рамил, сулфа мекунад ва оби бинияш меравад. Онро дар аввали ҳафта санҷиш карданд. Кормандони Боғи ҳайвонот тахмин мезананд, ки се паланги дигар ба бемории ҳамагир гирифтор шудаанд. Дар изҳороти Боғи ҳайвонот аз 23-юми июл омадааст, бабрҳо зери назорати байторон ҳастанд ва намоиши онҳо муваққатан боздошта шудааст. Маълум нест, беморӣ чӣ гуна сироят кардааст.

Ҷасади Ҳабиб Ёқубови 19-сола, қурбонии селро дар Панҷакент, пас аз се рӯзи ҷустуҷӯ ёфтаанд. Намояндагони Кумитаи ҳолатҳои фавқулода гуфтанд, ӯ 23-юми июл дафн карда шуд. Аммо, ба гуфтаи онҳо, то ба ҳол ҷустуҷӯйи ҷасади Нозима Исмоилова, қурбонии дигари сел дар Панҷакент, "натиҷа надодааст".

Рӯзи 19-уми июл бар асари омадани сел дар Панҷакент дувоздаҳ нафар ҷон бохтанд. Аз ин шумора ҳафт кас аъзои як оила буда, ба иттилои мақомот, "ҳангоми борони шадид дохили хаймаҳои хеш паноҳ бурданд, вале сели шадид онҳоро ҳамроҳ бо хаймаҳояшон бурд."

Дар он рӯз сел ба ба роҳу хонаҳои мардум ва хатти обу барқ дар ноҳияҳои Деваштичу Айнӣ ва Кӯҳистони Мастчоҳ низ зарар расонд. Масъулони Идораи ҳолатҳои фавқулодаи Суғд гуфтанд, дар ноҳияи Айнӣ як нафар ба ҳалокат расидааст.

Тоҷикистон яке аз кишварҳои осебпазир дар баробари фалокатҳои табиист. Аз аз соли 1992 то соли 2020, обхезиву селу заминларза ва лағжиши хок ба 7 миллион нафар осеб ва ба иқтисоди кишвар тақрибан 2 миллиард доллар зарар расондааст.