Невӣ Пиллай-кумиссари ҳуқуқи башари вобаста ба СММ даъват кард, ки барои ҳимояти мардуми Сурия аз саркӯбии нируҳои ҳукуматӣ ва пешгирӣ аз тирандозӣ дар маҳаллоти аҳолинишин дар шаҳри Ҳумс бояд маҳофили байналмиллалӣ ба таври фаврӣ кӯмак кунанд. Шаҳри Ҳумс маркази эътирозҳо бар зидди режими президент Башор Асад дониста мешавад. Ин изҳороти Невӣ Пилай рӯзи чаҳоршанбе дар Женева пахш шуд. Нируҳои ҳукумати Сурия тақрибан як ҳафта ин шаҳрро ба муҳосира гирифтаанд ва тирандозӣ аз тӯпу тонк ба он идома дорад. Бино ба хабарҳо, дар рӯзи ахир дар ин шаҳр 47 нафар ба қатл расиданд.
