Президенти ИМА Ҷо Байден гуфт, ки НАТО барои манфиатҳои ИМА «фавқулодда муҳим» аст ва талабот оид ба дифои ҳамдигарӣ “ӯҳдадории муқаддас” мебошад. Байден, ки рӯзи 14-уми июн барои ширкат дар ҷаласаи НАТО ба Брюссел рафт, гуфт, мехоҳад, ки Аврупо бидонад, ки ИМА дар тарафи он истодааст. “Моддаи 5 – як ӯҳдадории муқаддас аст”, гуфт Байден. Манзури ӯ ҳимояти дастаҷамъии кишварҳо аст, ки дар созишнома оид ба таъсиси НАТО зикр шудааст. “Мехоҳам, ки тамоми Аврупо бидонад, ки ИМА ба ин созиш пойбанд аст”, гуфт ӯ.

Ҳузури Байден дар ҷаласаи НАТО як бахше аз сафари аврупоии ӯ аст, ки баъди чор соли пуршебу фарози раёсатҷумҳурии Доналд Трамп ҳадафаш барқарории муносибатҳо ва ҳам тазмини шарикони фароатлантикии Вашингтон мебошад.

Як мулоқоти хусусии Байден бо президенти Туркия Раҷаб Тайиб Эрдуғон ҳам дар назар аст. Дар се соли охир, ки раҳбарони кишварҳои узв бо сабаби пандемияи коронавирус бо ҳам гуфтугӯи рӯбарӯ накардаанд ва дар ин муддат як бастаи масоили доғе ҷамъ шудааст, ки барои баррасии ҳама ҷонибҳо нигаронида шудааст. Дар миёни ин масъалаҳо ҳам Афғонистон ва хуруҷи нирӯҳо, ҳам Русия ва Чин ва ҳам хароҷоти дифоӣ ёд мешавад.

Йенс Столтенберг, дабири кулли НАТО зимни сӯҳбаташ бо журналистон рӯзи 14-уми июн гуфт, ки ҳеҷ Ҷанги сарде бо Чин вуҷуд надорад. Ӯ гуфт:

NC061403

“Мо ба аҳди Ҷанги нави сард бо Чин ворид намешавем ва Чин на рақиб ва на душмани мо аст. Вале ба ҳайси як эътилоф мо бояд ба таҳдидҳое, ки Чин ба амнияти мо эҷод мекунад, дар ҳамбастагӣ посух бидиҳем”.

Столтенберг гуфт, мавзӯъҳои мисли назорати силоҳ ва тағйироти иқлим аз масоили мавриди ҳамкорӣ бо Чин буда метавонад. Вале, ба гуфтааш, дар ин охирҳо ҳама шоҳиди тақвияти низомии ахири Чин ва сармоягузории ин кишвар ба тавонмандиҳои низомӣ, аз ҷумла ҳастаиаш мешаванд. “Инчунин Чин арзишҳои моро намепазирад, - гуфт раҳбари НАТО, ки – ин саркӯби эътирозҳои демократӣ... ва аққалиятҳо” мебошад.

Раҳбари барканоршудаи Мянмар Аун Сансуҷӣ рӯзи 14-уми июн дар аввалин мурофиаи додгоҳӣ ҳозир шуд. Мурофиа баъди панҷ моҳи кудатои низомӣ дар ин кишвари Осиёи Ҷанубӣ барпо мешавад, ки замоне низоми демократиро таҷриба кардааст. Мурофиаи Сансуҷӣ дар пойтахт, шаҳри Нейпйидо барпо мешавад ва иттиҳоми ӯ ин аст, ки дар давраи пандемияи коронавирус муқаррароти меҳдудкунандаро нақз карда, дастгоҳҳои мухобиротиро ба берун содир кардааст. Ин замоне буд, ки ҳизби ӯ Лигаи миллӣ барои демократия дар интихобот пирӯз шуд.

Сансуҷиро инчунин дар гуноҳҳои дигар ҳам гумонбар медонанд, аз ҷумла, ба қавли мақомоти низомии кишвар, ӯ тиллову пули нақдро ҳамчун пора қабул кардааст. Ҳамроҳ бо ӯ дар курсии айбдорӣ президент ва собиқ шаҳрдори барканоршуда ҳам нишастаанд.

Баъди он ки моҳи феврали имсол ҳунтаи низомӣ ҳукумати қонуниро барканор кард, Мянмар дар як бебандубории сиёсӣ қарор дорад.

Як созмони бонуфузи муҳаққиқи силоҳ ҳушдор дод, ки зоҳиран тамоюли коҳиш дар силоҳи ҳастаӣ, ки аз охири Ҷанги сард шурӯъ шуд, хотима ёфт ва Русия ва ҳам ИМА дар сиёсати дифоии худ ба аҳамияти силоҳҳои ҳастаӣ таъкид мекунанд. Рӯзи 14-уми июн Пажӯҳишгоҳи таҳқиқоти байналмилалии сулҳи Стокҳолм (SIPRI ) гуфт, нӯҳ давлати дорои силоҳҳои ҳастаӣ – ИМА, Русия, Бритониёи Кабир, Фаронса, Чин, Ҳинд, Покистон, Исроил ва Кореяи Шимолӣ дар аввали соли 2021 дар маҷмӯъ 13080 силоҳи ҳастаӣ доштанд, ки дар қиёс бо соли 2020 коҳиши андак аст. Дар ин омор силоҳҳои қадима ҳам ҳастанд ва бидуни онҳо, ба қавли муҳаққиқон, шумори силоҳ аз 9,380 ба 9,620 афзоиш ёфтааст.

Ҳанс Кристенсен, мутахассиси калони SIPRI мегӯяд, ҳоло тамоюли умумии афзоиши кулоҳакҳои ҳастаӣ дар ҷаҳон мушоҳида мешавад. Дар маҷмӯъ, беш аз 90 дарсади силоҳҳои ҳастаии ҷаҳон дар ихтиёри Русия ва ИМА мебошад.

Додгоҳе дар Минск дархости шаҳрванди Русияро, ки ҳамроҳ бо дӯстписараш Раман Пратасевич аз дохили ҳавопаймои ба таври маҷбурӣ дар Минск фурудовардашуда ҳабс шуд, рад намуд. Рӯзи 14-уми июн додгоҳи ноҳияи Партизанский ҳукм кард, ки ҳабси София Сапега мутобиқ ба қонунҳои Беларус дуруст буд ва ӯ бояд дар боздоштгоҳи муваққатӣ бимонад. Александр Филанович, вакили дифои Сапега рӯзи 13-уми июн гуфт, ки шаҳрванди Русия дар нақзи Кодекси ҷиноии Беларус гумонбар мешавад. Ӯ бо баҳонаи ин ки додгоҳ барояш нашри ҷузъиёти парвандаро манъ кардааст, нагуфт, ки зерҳимояаш мушаххасан дар чӣ айбдор мешавад.

Маркази ҳуқуқи башари “Весна” гуфт, ки Сапегаро дар ташкил ва омодагӣ ба фаъолиятҳое айбдор мекунанд, ки боиси нақзи тартиботи ҷамъиятӣ шудааст.

Сапега ва Пратасевичро рӯзи 23-юми май аз дохили ҳавопаймои ширкати Ryanair берун оварда гуфтанд, ки иттилое дарёфт намуданд, ки гӯё дар дохили ҳавопаймои хатсайти Атен-Вилнюс бомба ҷойгузорӣ шудааст. Ин фарзия ҳеҷ гоҳ тасдиқ нашуд, вале ғарбу Аврупо Беларусро дар “роҳзании сатҳи давлатӣ” гунаҳгор карданд. Дар посух мақомоти беларусӣ бо таҳримҳои ҳадафмандона муҷозот шуданд. Ба илова, Аврупо парвоз ба Беларусро қатъ карда ба ҳавопаймоҳои беларусӣ нишастан дар фурудгоҳҳои ин қаламравро манъ намуд.

Мақомоти беларусӣ видеоҳои ҷудогонае нашр карданд, ки дар он зоҳиран эътирофҳои маҷбурии Сапега ва Пратасевич дар робита бо пӯшиши эътирозҳои зидди Лукашенко тавассути шабакаи мухолифон дар Телеграм пурсида мешавад.

Мақомот дар Чеченистон, як ҷумҳурие дар Қафқози Шимолӣ иддао карданд, ки ба хотири пешгирии "аз ҷониби фаъолони ҳуқуқ рабуда шудани” як зан, ӯро аз дохили паноҳгоҳи қурбониёни хушунати хонаводагӣ берун оварданд. Ҳалимат Тарамова, духтари як муттафиқи деринаи раҳбари Чеченистон Рамазон Қодировро полис рӯзи 10-уми июн бо зӯр аз дохили як паноҳгоҳе дар Махачқалъа, пойтахти Доғистон берун бурданд. Баъди ин Тарамова ба Чеченистон бурда шуд ва ҳоло, ба қавли фаъолони ҳуқуқ, ӯ метавонад як қурбонии “куштори номусӣ” шавад. Дар як видеое, ки ҳафтаи гузашта аз ҷониби фаъолон нашр шуд, Тарамова гуфт, ки хонаашро дар Чеченистон бо сабаби “латукӯбу таҳдидҳои зиёд” тарк кард. Дар ҳамин навор Тарамова дар муроҷиат ба мақомоти Чеченистон гуфтааст, ки ӯро ба феҳристи афроди нопадидшуда ворид накунанд.

Дар як изҳороти шабакаи ҳомии аққалиятҳои ҷинсӣ гуфта шуд, ки Тарамова ба хотири тамоюлҳои ҷинсиаш мавриди таъқиб қарор гирифтааст. Ба қавли фаъолон, Тарамова дар дохили паноҳгоҳ ҳамроҳ бо дӯстдухтараш Анна Манилова нигаҳдорӣ мешуд.

Вале дар изҳороти рӯзи 13-уми июни вазири Чеченистон дар умури сиёсати дохилӣ, равобити байналмилалӣ ва иттилоот дар бораи ин қазия иттилои зиддунақиз нашр шуд. Дудаев иддао кард, ки “дар натиҷаи амалиёти ҳамоҳангшудаи полиси Чеченистону Доғистон “аз талоши рабудани” Тарамова пешгирӣ карданд. Дудаев гуфт, ки ҳеҷ қонуншикание аз ҷониби ходимони ҳифзи қонун ваё хонаводаи Ҳалимат Тарамова рӯй надодааст. Ӯ иддао кард, ки Тарамова гӯё мушкилоти саломатӣ дорад ва доимо зери назари табибон буд.

Дудаев бо ин ки ҳомиёни ҳуқуқ ва Ғарбро гунаҳгор кард, иддао кард, ки дар Чеченистон “ҳамҷинсгароӣ вуҷуд надорад”.

Рамазон Қодиров беш аз даҳ сол мешавад, ки раҳбарии Чеченистонро ба ӯҳда дорад ва пайваста дар одамрабоӣ, шиканҷа ва ҳам кушторҳои худсарона айбдор мешавад.

Президенти ИМА Ҷо Байден дар Брюссел дар ҷаласаи сарони кишварҳои узви НАТО ширкат мекунад. Баъди чор соли раёсатҷумҳурии пуршебу фарози Доналд Трамп сафари Байден ҳамчун аломати барқарор шудани равобити Вашингтон бо ҳамкорони фароантикиаш арзёбӣ мешавад. Байден ва ҳамаи сӣ раҳбари кишварҳои узви ин паймони низомӣ дар ҷаласа ширкат мекунанд.

Як мулоқоти хусусии Байден бо президенти Туркия Раҷаб Тайиб Эрдуғон ҳам дар назар аст.

Дар се соли охир, ки раҳбарони кишварҳои узв бо сабаби пандемияи коронавирус бо ҳам гуфтугӯи рӯбарӯ накардаанд, як бастаи масоили доғе ҷамъ шудааст, ки барои баррасии ҳама ҷонибҳо нигаронида шудааст. Дар миёни ин масъалаҳо ҳам Афғонистон ва хуруҷи нирӯҳо, ҳам Русия ва Чин ва ҳам хароҷоти дифоӣ ёд мешавад.

Йенс Столтенберг, дабири кулли НАТО зимни сӯҳбаташ бо журналистон рӯзи 14-уми июн гуфт, ки ҳеҷ Ҷанги сарде бо Чин вуҷуд надорад. Ӯ гуфт:

“Мо ба аҳди Ҷанги нави сард бо Чин ворид намешавем ва Чин на рақиб ва на душмани мо аст. Вале ба ҳайси як эътилоф мо бояд ба таҳдидҳое, ки Чин ба амнияти мо эҷод мекунад, дар ҳамбастагӣ посух бидиҳем”.

Столтенберг гуфт, мавзӯъҳои мисли назорати силоҳ ва тағйироти иқлим аз масоили мавриди ҳамкорӣ бо Чин буда метавонад. Вале, ба гуфтааш, дар ин охирҳо ҳама шоҳиди тақвияти низомии ахири Чин ва сармоягузории ин кишвар ба тавонмандиҳои низомӣ, аз ҷумла ҳастаиаш мешаванд. “Инчунин Чин арзишҳои моро намепазирад, - гуфт раҳбари НАТО, ки – ин саркӯби эътирозҳои демократӣ... ва аққалиятҳо” мебошад.

Баъди он ки рӯзи якшанбе парлумон аъзои ҳукумати нави эътилофии Исроилро тасдиқ кард, рӯзи 14-уми июн аъзои нави ҳукумат ба кор шурӯъ кард. Бо ҳамин, давраи нахуствазирии 12-солаи Бенямин Нетаняҳу дар Исроил ба охир расид. Рӯзи 13-уми июн аъзои Кнессет дар натиҷаи як овоздиҳии бисёр танготанг, бо бартарии 60 бар 59 овоз, ҳукумати навро тасдиқ карданд.

Нахуствазири нави Исроил Нафталӣ Беннетт раҳбари ҳизби миллатгарои “Ямина” 49 сол дорад ва шоми 13-уми июн ба мақоми нахуствазирӣ тасдиқ шуд. Субҳи душанбе таъини вазирони ҳукуматӣ оғоз гардид.

Баъди тасдиқи аъзои ҳукумати нави Исроил, президент Ҷо Байден гуфт, ки давлати яҳудӣ муттафиқи аслии ИМА аст ва ҳамеша як пуштибони амниятии Исроил боқӣ мемонад. Байден гуфт, ки бо ҳукумати Беннетт ҳамаҷониба ҳамкорӣ хоҳад кард. Беннетт 13-умин нахуствазири Исроил шуд.

Хабари аз сӯи вазорати мудофиаи Узбекистон харидани ду худкори тилоӣ, ки ҳар кадоме наздики 3 ҳазор доллар арзиш доранд, корбарони узбекистонии шабакаҳои иҷтимоиро ба баҳс кашид.

Вазорати мудофиаи Узбекистон дар шарҳи хабар навишт, худкор (ручка)-ҳо бо маблағи буҷаи вазорат харида мешаванд.

Ойбек Турсунов, мақомдори дастгоҳи президент ва ҳамзамон домоди президенти Узбекистон Шавкат Мирзиёев низ бо маблағи буҷаи он кишвар дар ивази 6221 доллари ИМА ду дона худкори навъи Montblanc харидааст.

Ин худкорҳо 15 октябри соли 2018 харида шудаанд.

Худкорҳои харидаи домоди Мирзиёев гаронарзиштар аз худкорҳое ҳастанд, ки вазорати мудофиаи Узбекистон рӯзи 9 июни соли ҷорӣ харидааст.

Залмай Халилзод, намояндаи вижаи ИМА дар умури Афғонистон дар як нишасти маҷозии рӯзи 13 июн ҳадафи сафарашро ба Қазоқистон шарҳ дод.

Халилзод дар Қазоқистон бо мақомоти баландпояи расмӣ мулоқот ва "раванди сулҳ дар Афғонистон, хуруҷи неруҳои амрикоӣ, инчунин рушди ояндаи робитаҳои минтақа, тиҷорату ҳамкориро баррасӣ мекунад".

Рӯзи 15 апрели соли ҷорӣ нашрияи New York Times навишт, ки мақомоти расмии ИМА бо мақомоти Қазоқистон, Узбекистон ва Тоҷикистон тамос гирифта, дар мавриди ҷойгирсозии пойгоҳи низомии амрикоӣ дар минтақа гуфтугӯ кардаанд.

Намоянди вижаи Амрико гуфт, ҳанӯз дар мавриди таъсиси пойгоҳи низомӣ дар минтақа ба хулосае нарасидаанд.

Халилзод дар мавриди ояндаи Афғонистон гуфт, "артиши амрикоӣ хориҷ мешавад, аммо Амрико мемонад". Вай илова кард, ки беҳтарин роҳи ҳалли низоъ дар Афғонистон роҳи ҳалли сиёсист, на низомӣ.

Залмай Халилзод 21 сентябри соли 2018 намояндаи вижаи ИМА дар умури Афғонистон таъйин шуд.

Як нашрияи Қазоқистон гуфт, ки ходимони ҳифзи қонун ахиран ҳашт шаҳрванди Узбекистон ва Тоҷикистонро дар як вилояти Қазоқистон “аз ғуломӣ озод карданд”. Пойгоҳи хабарии “Деловой Казахстан” ахиран навишт, ки ин нахустин амалиёти муваффақи раҳоии хориҷиён аз асорат мебошад. Соли гузашта дар Қазоқистон 16 нафарро аз чанги ғуломӣ халос карда буданд. Ба гуфтаи ҳомиёни ҳуқуқ, дар Қазоқистон бештар аз ҳама маҳз тоҷикон ва узбекҳо ба ғуломӣ меафтанд. Аксаран ғуломони муосирро дар хоҷагиҳои хусусӣ ва сохтмонҳо кор мефармоянд. Дар беҳтарин ҳолат ба онҳо хӯрок ва ҷои хоб дода мешавад. Раҳбари созмони ҷамъиятии “Майрим” ба хабарнигорон гуфтааст, ки онҳо умедворанд, президени Қазоқистон Қосимҷомарт Тоқаев қонун дар бораи чораҳои минбаъда дар бахши ҳуқуқи инсонро ба имзо мерасонад. Интизор меравад, ки қонуни мазкур ба шаҳрвандони хориҷӣ барои дарёфти кӯмак ва ҳимояти ҳуқуқ мусоидат хоҳад кард.

Пас аз 15-уми июн мӯҳлати имтиёз барои муҳоҷирон дароз намешавад. Вале фармоне нашр мегардад, ки барасмиятдарории муҳоҷиронро соддатар мекунад. Дар ин бора Вадим Коженов, раҳбари Федератсияи муҳоҷирон дар Русия дар сӯҳбат бо радиои “Говорит Москва” баён доштааст. Раиси федератсияи муҳоҷирон аз он нигаронӣ кард, ки агар ин қарор то 15-уми июн имзо нашавад, кормандони мақомоти интизомӣ имкон пайдо мекунанд, ки дар давоми чанд рӯз шаҳрвандони хориҷиро ҷарима баставу онҳоро ихроҷ намоянд. Аммо пас аз нашри фармони нав муҳоҷирон барои бекор кардани қарори ҷаримаву ихроҷ ба суд муроҷиат хоҳанд кард. Қарор аст мӯҳлати таъйиннамудаи Вазорати корҳои дохилии Русия барои қонунӣ кардани ҳузури хориҷиён рӯзи 15-уми июн ба поён мерасад. Бо назардошти он ки парвози доимӣ миёни Душанбеву Маскав аз 1-уми апрел шурӯъ шуд, муҳоҷирони тоҷик то 30-юми июн ҳаққи дуруст кардани сандаҳояшонро доранд. Ихроҷи муҳоҷирони ғайриқонунии тоҷик баъди 30-юми июн дар назар аст. ​

Дар Исроил ҳайати ҳукумати нав таъйин шуд. Ин маънои поёни сарвазирии 12-солаи Бинямин Натаняҳуро дорад. Сарвазири ҳамакнун пешини Исроил ин кишварро панҷ давра - бештар аз ҳар сарвазири дигар роҳбарӣ кард.

Ҳукумати навро вазири пешини мудофиаи Исроил, сиёсатмадори ростгаро Нафталӣ Беннет роҳбарӣ мекунад. Дар ҳайати ҳукумати эътилофӣ ҳизби марказгаро бо роҳбарии Яир Лапид шомил шудааст. Ҷонибҳо созиш ҳосил карданд, ки ду сол Беннет сарвазир мемонад ва баъдтар Лапид сари қудрат меояд.

Беннет дар остонаи интихоб шудан ба мақоми сарвазирӣ дар порлумони он кишвар суханронӣ ва аз хизматҳои Натаняҳу ба ҳайси роҳбари Исроил сипосгузорӣ кард.

Фиристодаи хоси ИМА дар умури Афғонистон Залмай Халилзод мегӯяд, нерӯҳои мусаллаҳи ИМА имсол аз хоки Афғонистон берун мешаванд, вале Амрико ин кишварро тарк намекунад. Рӯзи 13-уми июн дар шаҳри Нурсултони Қазоқистон Халилзод дар бораи раванди оштӣ дар Афғонистон тафсилот дод. Тибқи барнома то 11-уми сентябр нерӯҳои эътилофи байналмилалӣ қаламрави Афғонистонро тарк мекунанд. Афзоиши хушунат ва бунбаст дар музокироти сулҳи ҳукумат ва гурӯҳи шӯришии Толибони суолҳои зиёдеро дар мавриди сарнавишти ояндаи Афғонистон халқ кардааст. Президенти Ҷо Байден мегӯяд, барномаи кумаки башарӣ ба Афғонистон идома мекунад. Чанде пеш Департаменти давлатии ИМА эълон кард, ки ба Афғонистон ба маблағи 266 миллион доллар ёрӣ фиристодаанд. Департаменти давлатӣ хотирнишон кардааст, ки сар аз соли 2002-ум то кунун ИМА ба Афғонистон ба маблағи тахминан 3 миллиарду 900 миллион доллар ёрӣ расонааст.

Пайвандони Иззат Амон кӯшиш доранд ашё ва пулҳои ӯро, ки зимни бурданаш ба Тоҷикистон дар шӯъбаи пулиси вилояти Маскав мусодира кардаанд, баргардонанд. Ба гуфтаи наздикон, телефону ноутбук ва 3 ҳазору 400 доллари Иззат Амон нопадид шудаанд. Ҳамсари ӯ барои бозгардонидан ба шӯъбаи пулиси Железнодорожниии вилояти Маскав муроҷиат кардааст, вале бенатиҷа. Гузашта аз ин, то ба ҳол, мақомоти интизомии Русия ба ҳеҷ як дархости вакилони Иззат Амон посух надодаанд. Аз ин пештар Шӯъбаи корҳи дохилӣ дар ноҳияи Печатникии Маскав барои кушодани парвандаи ҷиноятӣ вобаста ба рабудани ин ҳуқуқшинос ҷавоби рад дода буд.

Иззат Амон аз охири моҳи май дар боздоштгоҳи муввақатии Вазорати адлияи Тоҷикистон нигаҳдорӣ мешавад ва ба гуфтаи наздиконаш, то ҳол бо ӯ дар боздоштгоҳ дидор накардаанд. Зимнан охири ҳафтаи гузашта пулиси Маскав ду нафар аз тарафдорони Иззат Амонро барои пӯшидани либос бо акси ӯ боздошт ва баъди чанд соат раҳо намуд. Вале парвандаашон бо иттиҳоми "вайрон намудани тартиботи баргузории митинг" ба додгоҳ ирсол шудааст.

Иззат Амон 25-уми марти соли ҷорӣ дар Маскав нопадид шуд ва ду рӯз баъдан дар як боздоштгоҳи шаҳри Душанбе пайдо шуд. Мунаққидон мегӯянд, фаъоли ҷамъияти тоҷиконро рабуда ба Тоҷикистон истирдод карданд.

Бо гузашти ду рӯз аз куштори бераҳмонаи як оила дар ноҳияи Ҷайҳун (собиқ Қумсангир), то ҳанӯз Вазорати корҳои дохилии Тоҷикистон дар бораи ин ҳодиса шарҳе надодааст. Аҳлиддин Маҳмадов , падари 39-солаи хонавода бо се фарзандаш дар ҳодисаи шаби 12-уми июн кушта шуданд, Латофат Азизова - ҳамсари ӯ дар ҳолати кома қарор дорад. Писари 11-солаи ин оила низ дар бемористон аст.

Як манбаи Радиои Озодӣ дар ВКД исми аъзои хонаводаи Маҳмадовҳоро ирсол кард. Инҳо:

Маҳмадов Аҳлиддин Рустамович, соли таваллуд 1982

Азизова Латофат Азизовна, соли тавалуд 1985

Маҳмадова Гулрухсор

Маҳмадова Саломатхон Аҳлидиновна, соли таваллуд 2007

Маҳмадова Саодат, соли таваллудаш 2008

Ҳодиса рӯзи 12 июн дар деҳаи Тарғоқ рух дода ҳанӯз сабаби куштори мудҳиш маълум нест. Ба иттилои тасдиқношуда, афроди номаълум аъзои оиларо бо табар ба қатл расондаанд. Мақомоти ноҳияи Ҷайҳун ба Радиои Озодӣ гуфтанд, ки тафтишот идома дорад, сокинони деҳа ба бозпурсӣ даъват шудаанд. Пайвандони кушташудаҳо гуфтанд, феълан дар робита ба ин ҳодиса ҳеҷ кас боздошт нашудааст. Ноҳияи Ҷайҳун дар 161-километрии ҷануби Душанбе ва наздик ба сарҳади давлатии Тоҷикистон ва Афғонистон ҷойгир аст. Аксар сокинонаш аз роҳи кишоварзӣ рӯзии худро таъмин мекунанд.

Ҷасади Қандилҷон Воҳидов, сокини ноҳияи Ёвон ва сарбози як қисми марзбонӣ дар ноҳияи Рӯшонро баъд аз даҳ моҳи ғарқшавияш пайдо намуда, ба пайвандонаш расондаанд. Қандилҷон Воҳидов ҳамроҳ бо ҳамхидматаш Сироҷиддин Ятимов, 29-уми сентябри соли гузашта зимни талоши наҷоти як хонандаи мактаб аз худкушӣ дар рӯдхонаи Бартанг, ғарқ шуда буданд. Кумитаи ҳолатҳои фавқулода хабари дарёфти ҷасадро тасдиқ намуд,вале ҷузъиёт надод. Аммо шоҳидон ва корбарони Радиои Озодӣ гуфтанд, пас аз шиносоӣ шуданаш ҷасади сарбозро ҳафтаи гузашта дар ноҳияи Ёвон ба хок супоридаанд. Дар бораи тақдири Сироҷиддин Ятимов, чизе гуфта намешавад. Ин ду сарбоз дар ҳоле ғарқ шуданд, ки то анҷоми мӯҳлати хидматашон ҳамагӣ чанд рӯзи дигар монда буд. Дар ҳамин ҳол дирӯз, ҷасади Ардаршери Амриддини 8-соларо баъди 4 рӯзи ҷустуҷӯ 200 метр поёнтар аз маҳалли ғарқ шуданаш пайдо ва дафн карданд. Писарбача рӯзи 9 уми июн дар канали деҳаи Меҳнатободи ноҳияи Хуросон ғарқ шуда буд. Барои дарёфти ҷасад сокинони маҳаллӣ даст ба кор шуданд ва танҳо баъд аз кам кардани оби канал онро ёфтанд.

Пас аз 15-уми июн мӯҳлати имтиёз барои муҳоҷирон дароз намешавад. Вале фармоне нашр мегардад, ки барасмиятдарории муҳоҷиронро соддатар мекунад. Дар ин бора Вадим Коженов, раҳбари Федератсияи муҳоҷирон дар Русия дар сӯҳбат бо радиои “Говорит Масква ”баён доштааст.

Раиси Федератсияи муҳоҷирони Русия аз он нигаронӣ кард, ки агар ин қарор то 15-уми июн имзо нашавад, кормандони мақомоти интизомӣ имкон пайдо мекунанд, ки дар давоми чанд рӯз шаҳрвандони хориҷиро ҷарима баставу онҳоро ихроҷ намоянд. Аммо пас аз нашри фармони нав муҳоҷирон барои бекор кардани қарори ҷаримаву ихроҷ ба суд муроҷиат хоҳанд кард.

Рӯзи 15-уми июн мӯҳлати таъйиннамудаи Вазорати корҳои дохилии Русия барои қонуни кардани ҳузури хориҷиён ба поён мерасад. Бо назардошти он, ки парвози доимӣ миёни Душанбеву Маскав аз 1- уми апрел шурӯъ шуд, муҳоҷирони тоҷик то 30-юми июн ҳаққи дуруст кардани сандаҳояшонро доранд. Ихроҷи муҳоҷирони ғайриқонунӣ баъди 30-юми июн дар назар аст.

Сафорати Чин дар Лондон изҳороти муштараки сарони кишварҳои узви Гурӯҳи Ҳафтгонаро рад карда гуфт, ки ин кори онҳо мудохила ба умури дохилии Чин аст ва интиқоди Пекин аз вазъи ҳуқуқи инсон дар Шинҷону Ҳонгконгро ҳамчун «дасткориҳои сиёсӣ» танқид кард. Бо сабаби сиёсати Пекин дар Шинҷон - ҳукумати Чин мавриди интиқоди афзояндаи байналмилалӣ аст, ИМА тарзи муносибати ҳукумат ба уйғурҳо, ки аз аққалиятҳои бумии мусалмон мебошанд, бо истилоҳи «наслкушӣ» маҳкум кардааст. Дар изҳороти муштараки Гурӯҳи Ҳафтгона омадааст: «Мо арзишҳои худ, аз ҷумла, аз роҳи даъвати Чин ба эҳтироми ҳуқуқи инсон ва озодиҳои бунёдӣ, ба вижа дар робита бо Шинҷон ва ҳуқуқу озодиҳо ва мухторияти сатҳи баланди Ҳонгконгро эҳтиром мекунем».

Президенти ИМА Ҷо Байден имрӯз дар Брюссел аст. Рӯзи 14-уми июн ин ҷо ҷаласаи сарони кишварҳои узви НАТО барпо мешавад ва сафари Байден баъди чор соли раёсатҷумҳурии пуршебу фарози Доналд Трамп ҳамчун аломати барқарор шудани равобити Вашингтон бо ҳамкорони фароатлантикиаш арзёбӣ мешавад. Дар ҷаласа Байден ва ҳамаи сӣ раҳбари кишварҳои узви ин паймони низомӣ ширкат хоҳанд кард. Як мулоқоти хусусии Байден бо президенти Туркия Раҷаб Тайиб Эрдуғон ҳам дар назар аст. Дар се соли охир ду раҳбар бо сабаби пандемияи коронавирус бо ҳам гуфтугӯи рӯбарӯ накардаанд, аз ин рӯ як бастаи масоили доғе дар равобити дуҷонибаву бисёрҷониба ҷамъ шудааст. Дар миёни ин масъалаҳо ҳам Афғонистон ва хуруҷи нирӯҳо, ҳам Русия ва Чин ва ҳам хароҷоти дифоӣ ёд мешавад.

Ин ҳодиса рӯзи 8 июн рух дод. Нозири ҷангал дар обанбори Шардарини вилояти Туркистони Қазоқистон шикорчиёни ғайриқонуниро мушоҳида кард. Мардони ниқобпӯш тавассути неруи барқ аз обанбор моҳӣ шикор мекарданд.

Шикорчиён ҷангалбононро бо оҳанпора латту кӯб ва аз ҷои ҳодиса фирор кардаанд. Ҷабрдидаҳо пулисро ба ҷои ҳодиса даъват карданд. Яке аз ҷангалбонон дар бемористон бистарӣ шудааст.

Ҷангалбонон мегӯянд, шикорчиёни ғайриқонунӣ дар як қаиқ тавассути неруи барқ наздики 60 кг моҳӣ шикор кардаанд. Ба гуфтаи нозирони ҷангал, дар Қазоқистон бо неруи барқ шикор кардани моҳӣ манъ аст.

Пулиси Қазоқистон хабар дод, ки гумонбари латту кӯби ҷангалбонҳо боздошт шудаанд. Дар сурати исботи айб, ҳамлагаронро то 10 соли зиндон таҳдид мекунад.

Жипарис Рисбекова, ваколатдори ҳуқуқи кӯдак дар Қирғизистон гуфт, ки марги хонандаи ятимхонаи вилояти Чуйро зери назорат гирифтааст.

Барои таҳқиқи марги хонанда аз ҳисоби чанд вазорат ва ниҳодҳои масъули Қирғизистон комисия ташкил шудааст.

"Комисия ҳолати марги наврасро дар ятимхона ҳамаҷониба меомӯзад", - гуфт Жипарис Рисбекова.

Мақомоти Қирғизистон гуфтанд, соати 11 шаби 1 июн наврас Игор Якунин, соли таваллудаш 2008 фавтидааст. Якунинро хонаводае аз ИМА мехост. ба фарзандӣ қабул кунад.

Вакили мудофеи ин хонавода аз беамалии мақомоти Қирғизистон дар мавриди тафтиши марги Якунин шикоят кардааст.

Як зани 34-солаи сокини Бухорои Узбекистон як мардро ба Вируси норасоии маснуияти бадан (ВИЧ) сироят кардааст.

Мақомоти Бухоро хабар доданд, ки ҳарчанд зан медонист, гирифтори ВИЧ аст, вале бо марде бе доштани василаҳои муҳофизатӣ алоқаи ҷинсӣ кардааст.

Дар натиҷа марди ҳамхобаи ӯ ба ВИЧ сироят ёфтааст. Мақомот гуфтаанд, ки аз ин пеш ин занро борҳо, ҳатто дар шакли хаттӣ огоҳ карда буданд, ки набояд бе рифола бо марде ҳамхоба шавад.

Ҳоло нисбат ба ин зан парвандаи ҷиноятӣ боз шудааст.

Ба гуфтаи мақомот, дар бадани ӯ ҳанӯз соли 2019 ВИЧ ошкор шуда буд ва ӯ дар қайди беморхона қарор дошт.

Вируси норасоии масъунияти бадан (ВИЧ) аз роҳи алоқаи ҷинсӣ ва хун ба инсон сироят мекунад.

Дар Бритониё нишасти кишварҳои “Ҳафтгонаи бузург” рӯзи 13-уми июн ба поён расид.

Ин бори аввал буд, ки раҳбари ҳафт кишвар пас аз оғози пандемияи коронавирус бо ҳам дидор мекунанд. Мубориза бо пандемияи коронавирус низ яке аз мавзуҳои аслии ин нишаст буд.

Раҳбарони “Ҳафтгонаи Бузург” ваъда карданд, ки ба кишварҳои ҷаҳон на камтар аз миллиард вояи воксини зидди коронавирус тақдим мекунанд, ки нисфи он аз ҷониби Иёлоти Муттаҳидаи Амрико хоҳад буд.

Дар ин нишаст ҳамзамон тағйирёбии иқлим низ баҳс шуд. ИМА пешниҳод кард, ки барои рақобат бо Чин бояд дар кишварҳои рӯ ба рушд инфрасохторҳои наву пешрафта сохта шавад.

Ин пешниҳод вокуниши Чинро ба бор овард ва Вазорати корҳои хориҷаи ин кишвар гуфт, ки “набояд як гуруҳ кишварҳои хурд дар мавриди ояндаи ҷаҳон тасмим бигиранд.”

Ҷо Байден, президенти Амрико бо Ангела Меркел, садри аъзами Олмон мавзуи хатти гази Русия ба Олмонро низ баҳс карданд.

Ин хатти газро Олмон пуштибонӣ мекунад, вале ИМА мухолифи он аст.

Нишасти кишварҳои “ҳатфгонаи Бузург” аз соли 2014 баргузор мешавад ва дар он Канада, Фаронса, Олмон, Италия, Ҷопон, Британия Кабир ва Иёлоти Муттаҳидаи Амрико мавзуҳои байналмилалиро баҳс мекунанд.

Додгоҳи ноҳияи Исмоили Сомонӣ як марди 64-солаи сокини пойтахтро барои харид ва фурӯши силоҳ ба шаш соли зиндон маҳкум кардааст.

Дар сомонаи додгоҳи ноҳияи И. Сомонӣ гуфта мешавад, ки Маматқул Надиров соли 2011 яроқи шикорӣ ва дар соли 2014 бо арзиши чор ҳазор доллари амрикоӣ панҷ адад тапончаи тамғаи “Макаров” бо тиру тирдонаш харидорӣ карда, қасди бо маблағи бештар фурӯхтани онҳоро дошт.

Назари пайвандон ва адвокати маҳкумшуда маълум нест. Додгоҳ гуфтааст, ки Надиров ҳарчанд гуноҳи худро пурра эътироф накард, вале ҷинояти ӯ бо далелҳо собит шуд.

Ба гуфтаи манбаъ, Надиров рӯзи 4-уми декабри соли гузашта боздошт шуд. Ду таппонча аз манзили зисти ӯ ва се таппончаи дигар аз хонаи хоҳараш пайдо шудааст.

Дар гузашта мақомот аз боздошти сокинон барои нигаҳдории яроқи шикорӣ хабар дода буданд, вале мавриди нигаҳдории силоҳи ҷангӣ дар дасти сокинон кам иттифоқ меафтад.

Ҳукумати Озарбойҷон хабар дод, ки 15 низомии асири Арманистонро бо харитаи майдони минкоришуда дар мавзеи баҳсӣ миёни ду кишвар дар Қарабоғи Кӯҳӣ иваз кардааст.

Никол Пашиниян, сарвазири Арманистон низ рӯзи 12-уми июн ин хабарро тасдиқ кард.

Дар Вазорати корҳои хориҷии Озарбойҷон гуфтанд, ки ин харита макони ҷойгиршавии 100 ҳазор минаро дар ноҳияи Агдами Қарабоғи Кӯҳӣ нишон медиҳад.

Низомиёнро дар марзи Гурҷистон бо Озарбойҷон бо ширкати мақомоти гурҷӣ ба Арманистон супурданд.

Шумораи низомиёни асир ва дигар шаҳрвандони боздоштшудаи Арманистон аз ҷониби Озарбойҷон дар низои охири соли гузашта миёни ду кишвар маълум нест.

Моҳи март Додгоҳи аврупоии ҳуқуқи башар, ки ба он волидайни низомиёни асир муроҷиат кардаанд, гуфта буд, ки дар Озарбойҷон 249 шаҳрванди Арманистон дар асорат қарор доранд.

Пештар мақомоти Арманистон гуфта буданд, ки 69 низомии асир ба онҳо супурда шудааст.

Дар низои моҳи сентябр ва ноябри соли 2020 миёни Озарбойҷон ва Арманистон даҳҳо нафар кушта ва даҳҳо нафари дигар нопадид шудаанд.