Пайвандҳои дастрасӣ

Хабари нав

Хабарҳо

Путин: "Дузд бояд дар зиндон бимонад"

Владимир Путин, сарвазири Русия, мутмаин аст, ки раҳбари пешини ширкати маъруфи ЮКОС Михаил Ходорковский бояд дар зиндон боқӣ бимонад. Дар ҷараёни гуфтугӯи мустақими телевизионӣ бо шаҳрвандони Русия ӯ дар посух ба суол дар бораи мурофиаи навбатии додгоҳии Ходорковский гуфт, ки "ҷиноёти ҷаноби Ходорковский дар додгоҳ собит шудаанд".
Владимир Путин афзуд, ки Михаил Ходорковский дар яғмои миллиардҳо рубл ва сарпечӣ аз пардохти андоз муттаҳам мешавад. Ба гуфтаи сарвазири Русия, барои ҳамин гуна ҷиноёт дар Амрико сармоядор Мэдофф барои 150 сол маҳкум ба зиндон шудааст.
Путин бо ишора ба норомиҳои ахир дар шаҳри Маскав изҳор намуд, ки мақомоти кишвар дар мубориза бо зуҳуроти ифотгароӣ бояд аз чораҳои шадид кор бигирад. Ба гуфтаи ӯ, шаҳрвандони Русия бояд дар ҳама гӯшаҳои кишвар худро амну роҳат эҳсос кунанд.
Ба иттилоъи Додситонии кулли Русия, дар робита ба бенизомиҳои ахир дар шаҳри Маскав 22 парвандаи ҷиноӣ боз шудааст.

Ҳамаи хабарҳои имрӯзро дар инҷо бихонед

Баъди мулоқоти Путину Байден президенти ИМА дар нишасти хабарӣ танҳо ҳозир мешавад

Шаҳри соҳилии Корнволии Бритониё. Президенти ИМА Ҷо Байден бо хонумаш Ҷилл

Кохи Сафед гуфт, ки ҳафтаи оянда баъди гуфтугӯи аввалини президенти ИМА бо раиси ҷумҳурии Русия Владимир Путин – Ҷо Байден дар нишасти хабарӣ танҳо иштирок хоҳад кард. Ин хабарро ҳамчун аломати таниши идомаёбанда дар равобити миёни Маскав ва Вашингтон шарҳ медиҳанд.

Як намояндаи маъмурияти Кохи Сафед гуфт, ки ҳузури танҳои Байден дар нишасти матбуотӣ “як шакли қабулшудаи муошират бо матбуот дар заминаи мавзӯи сӯҳбатҳо ба ҳисоб меравад”. Мусоҳиби хабаргузории Ройтерс гуфтааст, ки чунин шакли сӯҳбат бо матбуот дар масоиле, ки мавриди мувофиқат ваё ихтилофи ду ҷониб мебошад, қабулшуда аст.

Тасмими ширкати танҳо дар нишасти хабарӣ ҳамчун ба чолиш кашидани Путин аз ҷониби Байден ҳам арзёбӣ мешавад, чун дар ин сурат бояд дар паҳлӯи ӯ биистанд, дар ҳоле, ки чанде пеш тахмин кард, ки шояд Путин “қотил” бошад. Мулоқоти мазкур тафовути рӯшани миёни мулоқоти соли 2018-и миёни Путин ва президенти собиқи ИМА Доналд Трамп дар шаҳри Ҳелсинкиро ба намоиш мегузорад.

Баъди мулоқоти пушти дарҳои баста Трамп дар назди хабарнигорон пайдо шуду аз Русия дар робита бо арзёбиҳои хадамоти кашфи Амрико оид ба дахолати ин кишвар ба интихоботи президентии соли 2016-и Амрико ҳимоят кард.

Байден, ки имрӯзҳо дар ҷаласаи Гурӯҳи Ҳафтгона иштирок мекунад, қарор аст 16-уми май ба Женева барои мулоқот бо Путин биравад.

Дар Техас марде 13 нафарро маҷрӯҳ кард

Дар паи як тирандозӣ дар шаҳри Остини аёлати Техас рӯзи 12 июн дастикам 13 нафар маҷрӯҳ шуданд. Ҳамлагар дар озодӣ ба сар мебарад. Ба иттилои полис, ду маҷрӯҳ дар ҳолати сангин мебошанд ва иттилое дар бораи кушташудаҳо нест. Ба гузориши матбуоти амрикоӣ, як мард соатҳои якуними шаб дар як маҳалли тафреҳии Остин оташ кушод. Полис гуфт, ки ҳанӯз сабаби тирандозӣ барои онҳо маълум нест. Ходими полис гуфт, бо сабаби ин ки ҳамлагар дар озодӣ аст, хатар аз байн нарафтааст.

Дар ҳаҷҷи имсола 60 ҳазор зоири эмшуда аз Арабистони Саудӣ роҳ меёбанд

30 июли соли 2020, маросими ҳаҷҷ дар давраи пандемия

Мақомот дар Арабистони Саудӣ гуфтанд, ки соли ҷорӣ ба 60 ҳазор зоири эмшуда ҳақ медиҳанд, ки маросими ҳаҷро иҷро кунанд. Мақомот инчунин тасдиқ карданд, ки имсол ҳам бо сабаби идомаёбии пандемияи коронавирус афроде, ки сокини ин кишвар нестанд, барои ширкат дар ин маросими бисёр муҳими мусалмонӣ роҳ дода намешаванд. Дафтари матбуоти вазорати ҳаҷҷи Саудия рӯзи 12 июн гуфт, ки “ширкат дар маросим барои шаҳрвандон ва сокинони шоҳигарӣ дар ҳаҷми на бештар аз 60 ҳазор нафар иҷоза дода мешавад”. Дар изҳорот таъкид шудааст, дар маросими имсола афроди аз 18 то 65-солаи бидуни бемориҳои музмим ва эмшудаҳо иштирок хоҳанд кард. Дар давраи то пандемия дар маросими ҳаҷ то 2 миллион нафар иштирок мекард ва аз Тоҷикистон ҳам солҳои охир шумори зоирон то 6 ҳазор нафар мерасид. Имсол маросими ҳаҷ аз 17 то 22-юми июл баргузор мешавад.

Лориҷонӣ хост, ки радди бақайдгирии номзадиашро дар интихобот шарҳ диҳанд

Алии Лориҷонӣ як сиёсатмадори бонуфуз боқӣ мемонад

Сиёсатмадори бонуфуз ва собиқ раиси маҷлиси Эрон Алии Лориҷонӣ аз мақомот талаб кард, ки қарори ба интихобот роҳ надодани ӯро ба ҳайси номзади курсии президентӣ шарҳ диҳанд. Шӯрои нигаҳбон – як ниҳоди муҳофизакор дар ҳукумати Эрон чанд ҳафта пеш аризаи садҳо нафарро, ки мехостанд ба ҳайси номзади интихоботи президентӣ сабтином шаванд, рад кард ва танҳо ба ҳафт нафар иҷоза дод, ки барои ширкат дар интихобот роҳ дода шаванд. Ҳасани Рӯҳонӣ, президенти амалкунандаи Эрон дигар ҳақи ширкат дар интихоботро надорад. Дар миёни номзадҳои ба интихобот роҳёфта ҳеҷ як нафарашон мунаққиди воқеии режими раҳбари олии Эрон Оятулло Алии Хоманеӣ нест. Лориҷонӣ дар як изҳороташ дар Твиттер хостааст, ки мақомот ба ӯ шарҳ диҳанд, ки дар кадом ҳолат ӯ дар аризааш ҳарфи ғайривоқеӣ гуфтааст.

Интихоботи президентии Эрон рӯзи 18-уми июн барпо мешавад ва феълан маълум нест, ки оё ҳарфи Лориҷонӣ чӣ таъсире хоҳад дошт.

Хоманеӣ, ки дар оғоз интиқоди номзадҳои радшударо рад кард, баъдан дар як даъвати ғайримунтазира аз Шӯрои нигаҳбон хост, ки қарорашро дигар кунад. Лориҷонӣ як сиёсатмадори мӯътадили муҳофизакор буда, аз оилаи сиёсатмадорони бонуфуз намояндагӣ мекунад. Ӯ дар гузашта раиси ҳайати музокироти Эрон бо қудратҳои ҷаҳонӣ дар сари барномаи ҳастаии Эрон буд.

Имкони гуфтугӯҳои рӯбарӯи раҳбарони G7

Президенти ИМА Ҷо Байден, раиси ҷумҳурии Фаронса Эммануэл Макрон, президенти Комиссиюни Аврупо Урсула вон дер Лейен, президенти Шӯрои Аврупо Шарл Мишел, нахуствазири Итолиё Марио Драги ва нахуствазири Канада Ҷастин Трюдо дар соҳил гардиш мекунанд

Баъди тахминан ду сол раҳбарони кишварҳои узви Гурӯҳи ҳафтгона (G7) шоми 11-уми июн тавонистанд аввалин бор дар мулоқоти рӯбарӯ бо ҳамдигар гуфтугӯ кунанд. Дар маркази таваҷҷӯҳи ҷаласаи серӯзаи раҳбарони кишварҳои пешрафта, ки дар Инглистон барпо мешавад, мавзӯи дастрасии аҳолии нодори сайёра ба воксина ва эҷоди иқтисоди одилонатар баъди пандемияи COVID-19 қарор дорад. Ба гурӯҳи кишварҳои пешрафтаи саноатӣ Бритониё, Канада, Фаронса, Олмон, Итолиё, Япония ва ИМА шомил мешаванд. Нахуствазири Бритониё Борис Ҷонсон дар остонаи нишаст гуфт, ки ҳадафи онҳо ҳамоҳанг кардани иқдомҳои ҳамдигарӣ дар давраи пандемия мебошад, то ки паёмадҳои он ба “ҷои захми давомдор” табдил нашавад. Интизор меравад, ки аъзои G7 барои таъмини кишварҳои нодор бо 1 миллиард дона воксинаи зидди COVID-19 омодагӣ нишон диҳанд. Танҳо ИМА ва президент Ҷо Байден ваъда додааст, ки 500 миллион дона воксинаи сохтаи ширкати Pfizer-ро то соли оянда хайр мекунад.

Як фаъоли демократии Ҳонгконг аз зиндон раҳо шуд

Агнес Чоу ба ҳангоми боздошт. Акс аз августи соли 2020

Рӯзи 12 июн як фаъоли маъруфи ҳуқуқи инсон дар Ҳонгконг дар солгарди дуюми эътирозҳои сартосарии демократӣ алайҳи саркӯбгариҳои ҳукумати Чин аз зиндон озод шуд. Агнес Чоу 24 сол дошта, бо нимтанае бо навиштаҷоти “Корат фавқулодда аст” ба назди хабарнигорон баромад, вале аз сӯҳбат худдорӣ намуд. Чоу барои ширкаташ дар намоиши эътирозии зиддиполис дар соли 2019 ба шаш моҳи зиндон маҳкум шуд. Ҳонгконг, ки собиқ мустамликаи Бритониё мебошад, бар асоси қонунҳо, минтақаи дорои ҳукумат ва низоми мустақили иқтисодӣ ба ҳисоб меравад. Пекин ду сол пеш қонуни тақвияти низоми амниятиро ҷорӣ кард ва бо ин амалаш мояи эътирозҳои сокинони Ҳонконг шуд. Агнес Чоу ҳамроҳ бо дигар фаъолони ҳаракатҳои демократии ҷавонон ба ҳабс рафт, онҳо ҳанӯз дар зиндон мемонанд. Бисёр кишварҳои ғарбӣ, ки саркӯбҳои Чинро маҳкум карданд, ба Пекин ёдовар шуданд, ки бояд сиёсати ваъдагии “як кишвар ду низом”-ро дар нисбати Ҳонгконг риоя ва эҳтиром кунад. Бархе кишварҳои ғарбӣ барои саркӯбҳои нирӯҳои демократӣ Пекинро таҳрим карданд.

Путин фош кардани иттилои хусусии ходимони амниятро ба ҷиноят баробар кард

Зане дар Русия тавассути YouTube мустанади Алксей Навалний бо номи "Қасри Путин"-ро тамошо мекунад

Президенти Русия тарҳи қонунеро имзо кард, ки барои фош кардани иттилои хусусии ходимони ҳифзи қонун ва наздикони онҳо муҷозот пешбинӣ мекунад. Ин тасмим, ба қавли коршиносон, боиси афзоиши фасод ва аз ҷавобгарӣ дур мондани ин гурӯҳи нафарон мешавад. Дар миёни муҷозот ҳукми зиндон, ҳабси хонагӣ, кори маҷбурӣ ва ҷарима дар ҳаҷми то 18 маош пешбинӣ мешавад.

Чунин муҷозот пеш аз ҳама алайҳи таҳқиқоти фошкоронае равона шудааст, ки раҳбари мухолифони Русия Алексей Навалний ва дигар муҳаққиқон барои урён кардани ҳолатҳои фасодхориҳои мақомот дар мустанадҳои худ анҷом додаанд. То замони боздошташ Навалний чандин мустанаде нашр кард, ки дороиҳои ҳангуфти президент Путин ваё собиқ президент Дмитрий Медведевро фош мекард. Танҳо як филме бо номи “Қасри Путин” дар YouTube беш аз 100 миллион тамошобин дорад. Муаллифи он – Бунёди зиддикоррупсияи Навалний тавонистааст бо ҷузъиёти тамом хароҷоти бемислеро тасвир кунад, ки дар сохтмони қаср истифода шудааст. Ахиран ин созмонро мақомот “экстремистӣ” ва мамнӯъ номиданд.

Ваъдаи кӯмаки 150 миллиондолларии Пентагон ба Украина

Дар машқҳои низомие, ки 25-уми май дар минтақаи Ровеншинаи Украина барпо шуд, сарбозон инчунин кори маҷмааҳои мушакии «Ҷавелин» (Javelin) ва ҳавопаймоҳои бесарнишини Bayraktar TB2-ро истифода карданд

Вазорати дифои ИМА рӯзи 11 июн эълон кард, ки ба Украина як бастаи ёриҳои низомӣ тақдим мешавад. Ин баста бо арзиши 150 миллион доллар барои тақвияти кори нирӯҳои Украина равона шудааст. Дар миёни ин кӯмакҳои дифоӣ радарҳои зиддитӯпхонаӣ, дастгоҳҳои мухобиротиву электронӣ, системаи зиддидрон ва дигар кӯмакҳо ҷой доранд. Аз соли 2014, замоне, ки Русия ба таври ғайриқонунӣ нимҷазираи Қрими Украинаро ишғол кард, ИМА ба ин кишвар дар ҳаҷми 2,5 миллиард доллар кӯмакҳои амниятӣ ироа кардааст. Дар низоъҳое, ки аз он замон то кунун дар шарқи Украина идома дорад, беш аз 13 ҳазор нафар аз ҷониби тарафдорон ва ҳам ҷудоиталабони ҳукумати расмии Киев кушта шудаанд.

Интизор меравад, ки дар мулоқоти рӯзи 16 -уми июни президентони ИМА ва Русия – Ҷо Байден ва Владимир Путин дар Женева мавзӯи Украина дар маркази гуфтугӯҳо қарор бигирад. Байден президенти Украина Владимир Зеленскийро барои гуфтугӯ ба Вашингтон даъват кард.

Куштори чор узви як оила дар Ҷайҳун

Деҳае дар ноҳияи Ҷайҳун

Дар ноҳияи Ҷайҳун (Қумсангири собиқ) дастикам чор узви як оила, ки се нафарашон кӯдак будаанд, кушта шуданд. Рӯзи 12-уми июн дар Шуъбаи корҳои дохилии ноҳияи Ҷайҳун ба Радиои Озодӣ гуфтанд, ҳодиса субҳи имрӯз 12-уми июн рух додааст. Манбаъ афзуд, ки ҳамаи онҳо узви як хонавода будаанд. Мақомот тафсилоти дигар намедиҳанд. Сухангӯи ВКД Тоҷикистон ҳам гуфт, ки аз ин хабар огаҳӣ дорад, вале ҷузъиёти бештар дертар нашр мешавад.

Бино ба иттилои манбаъҳои ғайрирасмӣ, шумори кушташудаҳои куштори имрӯза эҳтимолан бештар аст. Ба иттилои корбарони Радиои Озодӣ, ҳодиса дар деҳаи Тарғоқи ноҳияи Ҷайҳун рух додааст ва ҳанӯз сабаби куштори мудҳиш маълум нест. Ба иттилои тасдиқношуда, ҳамаи онҳоро бо табар куштаанд. "Марди хонавода 39 сол дошта, ба деҳқонӣ машғул будааст", гуфт як манбаи Радиои Озодӣ, ки аз ин ҳодиса огаҳ шудааст. Ӯ навишт, ки "дар деҳа милисаборон аст, касеро дохил ва берун шудан намемонанд".

Ноҳияи Ҷайҳун дар 161-километрии ҷануби Тоҷикистон дар ҳудуди вилояти Хатлон ва наздик ба сарҳади давлатии Тоҷикистон ва Афғонистон ҷойгир аст. Аксар сокинонаш аз роҳи кишоварзӣ рӯзии худро таъмин мекунанд.

Тафсилоти бештар соатҳои наздик нашр мешавад.

Путин дар бораи Байден ва иттиҳоми "қотил" сӯҳбат кард

Президенти Русияи Владимир Путин

Президенти Русияи Владимир Путин дар як мусоҳибааш гуфт, ки равобит бо ИМА ба поинтарин сатҳ фаромадааст. Дар сӯҳбате, ки пеш аз мулоқоти ӯ бо ҳамтои амрикоиаш Ҷо Байден барпо шуд, Путин ба саволҳои зиёд, аз ҷумла, ба иттиҳоми “қотил” номида шуданаш ҳам посух дод. Мулоқоти ду раҳбар 16-уми июн дар Женева барпо мешавад ва порае аз сӯҳбатҳои Путин рӯзи 11-уми июн пахш шуд. Путин дар ин сӯҳбаташ президенти собиқ Доналд Трампро як раҳбари “фавқулодда” ва Байденро “карйерист” номид ва айни замон, изҳори умедворӣ кард, ки ҳамкории онҳо натиҷабахш мешавад.

Дар ин мусоҳиба аз Путин инчунин дар бораи мухолифони Кремлин суол карданд, ки кушта шудаанд ва ҳам тахмини садододаи Байден дар моҳи март, ки гуфт, Путин метавонад “як қотил” бошад. Путин гуфт: “Дар замони раҳбариам ба ҳамлаҳо - бо ҳар баҳона, сабаб ва ҳам ба ҳар навъ ва шакл одат кардаам. Аз ин чиз ҳайрон намешавам”.

Вакили мудофеи тоҷик дар Русия аз боздошт раҳо шуд, "вале парванда ба додгоҳ рафт"

Шӯҳрат Қудратов бо як ҳамроҳи дигараш

Полиси Маскав Шӯҳрат Қудратов, вакили мудофеи тоҷик ва як ҳамроҳашро, ки барои пӯшидани либос бо акси Иззат Амон дар Маскав боздошт карда буд, ба "вайрон кардани тартиботи баргузории митинг" муттаҳам намудааст.

Қудратов ва Раҳматулло Ҷалолов рӯзи 11-уми июн замоне боздошт шуданд, ки пас аз адои намози ҷумъа, дар берун аз масҷиди хиёбони "Мир"-и ин шаҳр қарор доштанд.

Пас аз чанд соати боздошт кормандони полиси ноҳияи Мишанский онҳоро озод карда, вале парвандаашонро бар асоси моддаи 20.2 қисми 5-и Кодекси ҳуқуқвайронкунии маъмурӣ, яъне "вайрон намудани тартиботи баргузории митинг" ба додгоҳи ҳамин ноҳияи Маскав фиристодааст. Ин банди қонун аз 10 то 20 ҳазор рубл ҷарима ё 40 соат кори маҷбуриро пешбинӣ мекунад.

Қудратов гуфт, “дар Шуъбаи корҳои дохилии ноҳияи Мишанский ёдрас карданд, ки баъд аз содир шудани қарор моро дар ҷараён мегузоранд.”

"Рӯзи панҷшанбе дар метрои "Сухаревская" либосеро бо акси Иззат Амон мефурӯхтанд. Ҳамроҳи як нафари дигар ду дона харидем. Инро дар баёноти худ дар Шуъбаи корҳои дохилӣ низ зикр кардем", -- афзуд ӯ.

Ба нақли вакили тоҷик, "дар Шӯъбаи пулис ба акси пироҳани мо ишора карда, гуфтанд, ӯро мешиносед? Гуфтем, як ҳомии ҳуқуқи муҳоҷирон буд. Гуфтанд, ӯро барои кадом амалаш ба Тоҷикистон истирдод кардаанд?"

Иззат Амон, ҳомии ҳуқуқи шинохта ва раиси "Маркази тоҷикон" феълан дар Боздоштгоҳи муввақатии Вазорати адлияи Тоҷикистон дар Душанбе нигаҳдорӣ мешавад. Ӯ рӯзи 25-уми марти имсол дар Маскав нопадид ва баъд аз ду рӯз дар Тоҷикистон "пайдо шуд".

Мақомот гуфтанд, ӯро бар асоси шикояти чанд нафар дастгир карданд. Парвандаи ба зидди Иззат Амон бар асоси "қаллобӣ ба миқдори махсусан калон" таҳқиқ мешавад. Ин модда ҷарима ва ё то 12 сол зиндонро пешбинӣ мекунад.

Тарафдоронаш бовар доранд, ки боздошти Иззат Амон ва иттиҳоми ба зидди ӯ дар асл дорои ангезаҳои сиёсист. Мақомот мегӯянд, қазияи Иззат Амон сиёсӣ нест, балки ба шикояти чанд нафар аз сокинон рабт дорад.

Баҳси Қриму Украинаро ба Ҷоми Аврупо кашиданд

Иттиҳоди футболи Украина ду шиореро, ки дар рӯйи нимтанаҳо навишта шудаанд, нигоҳ медорад. Пештар UEFA гуфта буд, бо сабаби ин ки ин навиштаҳо паёми сиёсӣ доранд, бояд аз рӯйи либоси футболбозон бардошта шаванд.

Президенти Иттиҳоди футболи Украина Андрей Павелко дар Фейсбук навишт, ки шиорҳои “Зинда бод, Украина” ва “Зинда бод, қаҳрамонҳо” рӯзи 11-уми июн дар остонаи бозиҳои Ҷоми Аврупо-2020 тасдиқ шуд. Шурӯи бозиҳо шоми 11-уми июн аст.

Андрей Павелко
Андрей Павелко

Навиштаҳову наққошии рӯйи либоси тими миллии футболи Украина баёнгари ихтилофҳо бо Маскав аст, чун дар рӯйи он хатҳои қаламрави Украина бо шумори нимҷазираи Қрим ифода шуда, инчунин, ду шиор дорад.

Русия соли 2014 нимҷазираи Қримро ишғол кард ва баъд аз ин барои “сафед” кардани худ як ҳамапурсӣ барпо кард, ки аз ҷониби бисёриҳо ҳамчун сохтакорӣ арзёбӣ шуд. Ин овоздиҳӣ, ки таҳти чораҳои шадиди низомӣ барпо шуд, бар асоси Конститутсияи Украина ғайриқонунӣ номида шуд ва ҳам натиҷаҳои онро аксар кишварҳои ҷаҳон напазируфтанд.

Иттиҳоди футболи Аврупо (UEFA), ки бо талаби Русия мавзӯи футболкаҳои тими миллии Украинаро ба муҳокима кашид, рӯзи 10-уми июн дар ҳукме гуфт, харита ҳеч мушкил надорад, вале шиорҳои “Зинда бод, Украина” ва “Зинда бод, қаҳрамонҳо” сирф паёми сиёсӣ дорад. Павелко гуфт, либосҳоро ба ҳамон шакле, ки буданд, тасдиқ кард ва ҳам афзуд, баҳсашро бо UEFA идома медиҳад.

Александр Ҳливинский, котиби матбуотии тими футболи миллии Украина, ба журналистон гуфт, намуди футболкаҳо ба ҳамон шакле, ки буд, мемонад ва мақомоти Иттиҳоди футболи Украина дар Рум баррасии ин мавзуъро бо UEFA идома медиҳанд.

Ӯ афзуд: “Онҳо аз ҷониби UEFA тасдиқ шуданд. Ҳама чиз аз ҷониби UEFA тасдиқ шудааст. Ҳама рамзҳо аз ҷониби UEFA қабул шудааст ва раиси Федератсияи футболи Украина ҳоло дар Рум бо UEFA дар ин бора гуфтугӯ мекунад”.

Бо сабаби пандемияи коронавирус рақобатҳои Ҷоми Футболи Аврупо аз соли гузашта ба имсол гузаронида шуданд ва, қарор аст, аз 11-уми июн то 11-уми дар 11 шаҳр, аз ҷумла Санкт-Петербуги Русия баргузор шаванд. Эҳтимол дорад, дар дориаи бозиҳои чорякниҳоӣ тими Украина дар Русия ҳам ҳозир шавад. Нахустин бозии тими украиниҳо 13-уми июн дар Амстердам дар муқобили Нидерландия ба нақша гирифта шудааст.

Шӯҳрат Қудратов гуфт, ӯро барои пӯшидани либос бо акси Иззат Амон дастгир кардаанд

Шӯҳрат Қудратов бо як ҳамроҳи дигараш

Шӯҳрат Қудратов, вакили мудофеи тоҷик дар Русия, гуфт, ӯву ҳамроҳаш, Раҳматулло Ҷалоловро барои пӯшидани либосе, ки дар он акси Иззат Амон, ҳомии боздоштшудаи муҳоҷирон буд, дастгир кардаанд.

Ба нақли Қудратов, боздошти онҳо рӯзи 11-уми июн, пас аз адои намози ҷумъа, дар берун аз масҷиди хиёбони "Мир" дар Маскав сурат гирифтааст.

"Моро ба Шуъбаи корҳои дохилии ноҳияи Мишанский оварданд. Ба акси пироҳани мо ишора карда гуфтанд, ӯро мешиносед? Гуфтем, як ҳомии ҳуқуқи муҳоҷирон буд. Гуфтанд, ӯро барои кадом амалаш ба Тоҷикистон истирдод кардаанд?", -- хабар дод ӯ.

Вакили мудофеи тоҷик мегӯяд, ҳоло ҳамроҳ бо Раҳматулло Ҷалолов дар идораи пулис қарор доранд. Ба қавли ӯ, пулис шиносномаҳои онҳоро гирифта, талаб кардааст, ки баёнот бинависанд.

Иззат Амон, ҳомии ҳуқуқи шинохта ва раиси "Маркази тоҷикон" феълан дар Боздоштгоҳи муввақатии Вазорати адлияи Тоҷикистон дар Душанбе нигаҳдорӣ мешавад. Ӯ рӯзи 25-уми марти имсол дар Маскав нопадид ва баъд аз ду рӯз дар Тоҷикистон "пайдо шуд".

Мақомот гуфтанд, ӯро бар асоси шикояти чанд нафар дастгир карданд. Парвандаи ба зидди Иззат Амон бар асоси "қаллобӣ ба миқдори махсусан калон" таҳқиқ мешавад. Ин модда ҷарима ва ё то 12 сол зиндонро пешбинӣ мекунад.

Тарафдоронаш бовар доранд, ки боздошти Иззат Амон ва иттиҳоми ба зидди ӯ дар асл дорои ангезаҳои сиёсист. Мақомот мегӯянд, қазияи Иззат Амон сиёсӣ нест, балки ба шикояти чанд нафар аз сокинон рабт дорад.

Муттафиқи Навалний гуфт, ки саломатии ӯ беҳтар шудааст

Алексей Навалний дар мурофиаҳои додгоҳӣ аз дохили зиндон тавассути тамоси видеоӣ иштирок мекунад

Раиси Бунёди зидди коррупсия (ФБК), ки ҳафтаи гузашта мамнӯъ ва экстремистӣ унвон шуд, гуфт, ки ҳоло саломатии Алексей Навалний беҳтар шудааст ва ӯ аз паёмадҳои гуруснанишинӣ ба худ меояд. Дар як сӯҳбаташ бо “Эхо Москвы” рӯзи 11 июн Иван Жданов гуфт, ки Навалний вазъияти атрофи ФБК-ро аз хабарҳову иттилои ҳуқуқшиносонаш пайгирӣ мекунад. Қаблан Жданов аз вазъи саломатии Навалний изҳори нигаронӣ карда буд, чун мунаққиди зиндонии Кремлин моҳҳои марту апрел давоми 24 рӯз даст ба гуруснанишинӣ зада буд. Ӯ гуфт, ки эътирозаш ба маҳрум шудани ӯ аз ёрии муносиби тиббӣ рабт мегирад, чун мақомоти зиндонҳо нагузоштанд, ки табибони мустақил барои муоинаву табобати дарди миён ва мушкили дарди поҳояш ба наздаш роҳ дода шаванд.

Алексей Навалний як мунаққиди бисёр шадидлаҳни Кремлин аст ва соли гузашта бар асари заҳролудшавӣ бо заҳри навъи низомии “Новичок” дар Олмон табобат гирифт. Вақте 17-ми январи имсол ба Маскав баргашт, боздошт шуд ва чанд ҳафта баъд бо қарори додгоҳ ба 2,5 соли зиндон маҳкум гардид. Мақомот гуфтанд, ки Навалний қарори додгоҳ аз соли 2014-ро дар бораи ҳабси шартӣ вайрон кард. Худи Навалний дар заҳролудкунии худ президент Владимир Путинро гунаҳгор кард. ФСБ ва Кремлин ин иттиҳомотро рад кардаанд. Бар асоси тағйирот ба қонунгузории Русия, ки онро ҳафтаи гузашта Путин имзо кард, афроди марбут ба созмонҳое, ки тамғаи экстремистӣ гирифтаанд, дар интихобот иштирок карда наметавонанд. Ин қонун амалан ба мақомот имкон медиҳад, ки ҳама гуна мухолифон ва дигарандешонро аз имкони ширкат дар интихобот маҳрум кунанд.

Чор узви тими Бабарика ба зиндон маҳкум шуданд

Чор узви тими интихоботии номзади президентӣ дар Беларус бо иттиҳоми омодагӣ ба “тазоҳуроти оммавӣ” ба мӯҳлати то панҷ соли зиндони низомаш сангин маҳкум шуданд. Дар ҳукми рӯзи 10 июни додгоҳи шаҳри Минск гуфта шудааст, ки Игор Ермолов, Дмитрий Канапелка, Владислав Коретски ва Николай Сасу ба зиндон маҳкум мешаванд, ҳарчанд ба иттилои гурӯҳҳои мухолифон ва ҳомиёни ҳуқуқ, далели воқеии гунаҳгор будани онҳо собит нашуд. Созмони ҳомии ҳуқуқи “Весна” ин нафаронро зиндонии сиёсӣ номидааст. Ин нафарон барои омодагӣ ба ташкили эътирозҳои баъди интихоботи порсолаи президентӣ, ки дар он Александр Лукашенко пирӯз номида шуд, гунаҳор дониста шуданд. Додситонӣ гуфт, ки ҳар нафари онҳо “ният дошт, ки дар ошӯбҳо шахсан иштирок кунад”, вале ба хотири ин ки ходимони ҳифзи қонун “барои саркӯби вайронкунандаҳои интизоми ҷамъиятӣ аз пеш иқдом карда онҳоро боздошт намуданд”, ба ҳадаф нарасиданд. Ермолаев ба ҳангоми боздошт сахт латукӯб шуд, устахонҳояш шикаст ва давоми як ҳафта барои табобати захмҳояш дар бемористон буд. Ин чор нафар ба таври ихтиёрӣ дар тими таблиғотии Виктор Бабарика кор карданд. Собиқ раиси “Белгазпромбанк” пеш аз интихоботи моҳи августи соли 2020 ба ҳайси номзади калидии интихоботӣ арзёбӣ мешуд. Дар остонаи интихобот мақомот назорат бар ин бонкро ба дасти худ гирифта Бабарикаро ҳабс карданд. Ӯро барои интиқоли ғайриқонунии миллионҳо доллар ба ҳисобҳо дар Латвия гунаҳгор мекунанд.

Матбуот: Русия дар талоши таъмини Эрон бо маҳвораи пешрафта аст

Маркази фазоии маҷозии Эрон

Нашрияи Washington Post дар нақли қавл аз мақомоти собиқ ва амалкунандаи ИМА ва Ховари Миёна навишт, ки Русия ба таъмини Эрон бо системаи пешрафтаи маҳвораӣ омодагӣ мебинад, чун ин система ба Эрон тавони беҳтари назорат аз минтақа ва фаротар аз онро фароҳам хоҳад кард. Дар ин гузориш гуфта шудааст, ки маҳвораи навъи Kanopus-V ва ҳам дурбинҳои бисёр пурқудраташ дар давоми чанд моҳи дигар насб мешаванд.

Ин хабар дар ҳоле нашр шуд, ки талошҳои байналмилалӣ барои дубора ба иҷрои ӯҳдадориҳои байналмилалӣ водор кардани Эрон идома дорад. Рӯзи 16-уми июн дар Женева қарор аст инчунин нахустин гуфтугӯи президенти ИМА Ҷо Байден ва раиси ҷумҳурии Русия Владимир Путин барпо шавад.

Байден, ки аллакай сафари аврупоии худро шурӯъ кардааст, аз нуфуз ва фаъолиятҳои Русия ҳамчун таҳдид ба низом ва амнияти байналмилалӣ ҳушдор дод. Washington Post навишт, ки вазорати хориҷаи Русия ба дархости шарҳи ин хабарҳо посух надод.

Низомиёни эронӣ дар талоши ин ҳастанд, ки як таҷҳизоти бисёр қавиро ба мадор бароранд. Ин дар ҳолест, ки соли гузашта маҳвораи “Нур-1” бомуваффақият ба мадор баромад.

ИМА аз таҳрим озод шудани бархе мақомоти эрониро шарҳ дод

Нед Прайс, сухангӯи  Департаменти давлатӣ

Ҳукумати ИМА се мақомдори эрониву ду ширкатро, ки бо тиҷорати маҳсулоти нафтӣ мушғул аст, аз таҳрим озод кард. Қарори мазкур 10-уми июн эълон шуд ва дафъатан суолҳоеро дар заминаи ин ки то куҷо ин тасмимҳо ба ҷараёни музокироти бозгашти ИМА ба созиши ҳастаӣ бо Эрон аз соли 2015 марбут аст, эҷод кард. Нед Прайс, сухангӯи Департаменти давлатӣ гуфт, ки ба ин музокирот рабте надорад ва ин як бахши маъмулии кор аст. Дар изҳороти Идораи назорат аз дороиҳои хориҷии ИМА гуфта шуд, ки аз феҳристи таҳримшудаҳо хориҷ кардани ин шахсону ширкатҳо натиҷаи “тағйири рафтор ё мақоми ин ҷонибҳо ва ҳам намоиши ӯҳдадории ҳукумати ИМА ба бекор кардани таҳримҳо дар ҳолати тағйири рафтор кардани таҳримшудаҳо мебошад”.

Прайс инчунин гуфт, ки тими музокиротии ИМА ба даври шашуми гуфтугӯҳо ба Вена бармегардад. Ӯ гуфт, ки пешравиҳо ҳастанд, вале ҳамоно баъзе масъалаҳо ҷонибҳоро ба ду тақсим кардааст. Музокиракунандаҳо аз Бритониё, Фаронса ва Олмон ва ҳам дигар қудратҳо аз моҳи апрели имсол ба гуфтугӯ пардохтаанд, то ки дубора ИМА ба созиш баргардад ва Эрон ҳам аз ҷониби худ ба иҷрои тааҳҳудоти ҳастаиаш пойбанд шавад.

Ишораи раҳбари "Моссад" ба ҳамлаҳои Натанзи Эрон

Ёсӣ Коҳен, раҳбари "Моссад" базудӣ корашро дар ин мақом ба анҷом мерасонад

Раҳбари хадамоти иктишофии “Моссад”, ки аз мақомаш меравад, ишора кард, ки Исроил дар ҳодисаҳои ахири ҳамла ба муассисаҳои ҳастаии Эрон даст дорад. Вале айни замон ӯ ба таври кушоду рӯшан масъулиятро ба дӯш нагирифт. Ёсӣ Коҳен, ки рӯзи 10 июн дар телевизиони исроилии Channel 12 сӯҳбат мекард, ишора кард, ки донишмандони эроние, ки дар муассисаҳои ҳастаӣ кор мекунанд, эҳтимолан мавриди ҳадаф қарор мегиранд. Суханронии Коҳен бо рӯзҳое рост омад, ки ҳукумати нахуствазир Бенямин Нетаняҳу дар ҳоли мушкил қарор дорад. Дар овоздиҳии 13 июн эҳтимолан ҳизби ҳокими Исроил аз қудрат канор меравад. ИМА гуфтааст, ки эҳтимоли бозгашт ба созиши соли 2015-и ҳастаӣ бо Эронро баррасӣ дорад. Вашингтон се сол пеш аз ин созиш хориҷ шуд, вале Исроил ҳоло мухолифи бозгашти ИМА ба созишномаи ҳастаии қудратҳо бо Эрон мебошад. Дар мусоҳибааш Коҳен аз корхонаи Натанз ва ҳам паёмадҳои ду таркиш дар ин муассиса тасвири хеле муфассал бо ҷузъиёташ дод. Коҳен ҳамчунин дар бораи куштори Муҳсин Фахризода, як донишманди эронӣ дар моҳи ноябр ҳам сӯҳбат кард. Бовар меравад, ки ин донишманд даҳсолаҳо пеш дар барномаи ҳастаии Эрон саҳм гирифтааст.

Исроил истифода аз маҳсулоти пӯстиро манъ кард

Акс аз бойгонӣ

Исроил фурӯши маҳсулоти пустиро манъ кард. Дар ин бора вазири ҳифзи муҳити зисти он кишвар Гила Гимлиэл қарореро ба имзо расонд.

Бино ба навиштаи The Jerusalem Post, ҳамин тариқ Исроил нахустин кишваре дар ҷаҳон шуд, ки фурӯши маҳсулоти пустиро дар саросари кишвар манъ кард.

Қарори манъи фурӯши маҳсулоти пустӣ аз моҳи декабри соли 2021 ба иҷро хоҳад даромад. Вале истифодаи он бо ҳадафҳои омӯзишию илмӣ ва дар маросимҳои динии Исроил ҳамоно иҷозат аст.

Барои нақзи қарор то 75 ҳазор шекел (1,6 миллион рубли русӣ) ҷарима ва ё 1 соли зиндон пешбинӣ шудааст.

Ҳомиёни ҳайвонҳо аз соли 2009 ба ин сӯ даъват доштанд, ки фурӯши маҳсулоти пустӣ дар Исроил манъ карда шавад.

Мулоқоти раҳбарони ИМА ва Бритониё дар остонаи G7

10 июн, Бритониё. Нахуствазири Бритониё Борис Ҷонсон ва ҳамсараш Керрӣ Ҷонсон бо президенти ИМА Ҷо Байден ва ҳамсараш Ҷилл Байден

Нахуствазири Бритониё Борис Ҷонсон ва президенти ИМА Ҷо Байден дар мулоқоти рӯбарӯяшон рӯзи 10 июн тааҳҳуд карданд, ки ҳамкориҳои дарозмуддати миёни ду кишварро тақвият медиҳанд. Мулоқот дар остонаи ҷаласаи Гурӯҳи Ҳафтгона (G7) баргузор шуд, ки қарор аст 11 июн шурӯъ ба кор кунад. Дар меҳвари ҷаласаи ду раҳбар мавзӯъҳои тағйироти иқлим, пандемияи COVID-19 ва амният қарор дошт. Ҷонсон баъди ин ҷаласа гуфт, “тахминан 1 соату 20 дақиқа сӯҳбат кардем. Ин як ҷаласаи тӯлонӣ ва хеле хуб буд. Мо бисёр масоилро баррасӣ намудем”.

Байден нахустин бор дар мақоми президенти ИМА аз Бритониё дидан мекунад. Дар қиёс бо президенти пешин Доналд Трамп, ки гуфтааст, “Аввал Амрико аст”, Байден ба сиёсати хориҷӣ таваҷҷӯҳи зиёд дорад.

Гурӯҳи Ҳафтгона 1 млрд воксина ба кишварҳои нодорро баррасӣ мекунад

Воксинаҳои истифодашудаи ширкати Pfizer-BioNTech

Интизор меравад, ки дар ҷаласаи серӯзаи сарони кишварҳои узви Гурӯҳи Ҳафтгона, ки 11-уми июн шурӯъ мешавад, ба кишварҳои нодор тақдим кардани 1 миллиард дона ё воя воксинаи зидди COVID-19 ваъда мешавад. Дар ин бора рӯзе пеш нахуствазири Бритониё Борис Ҷонсон изҳорот дод, вале ба ҷузъиёт нарафт. Ҳадафи асосӣ ин аст, ки то охири соли 2022 як нақшаи тақсим ва маблағгузорӣ ба эмкунии кишварҳои нодор таҳия ва иҷро шавад. Аз ин пеш президенти ИМА Ҷо Байден гуфт, ки кишвараш то соли оянда 500 миллион дона воксинаи ширкати Pfizer-ро ба барномаи COVAX хайр мекунад. Тоҷикистон ҳам дар миёни 92 кишвари нодору миёнаҳол узви ин барномаи СММ мебошад. Бритониё гуфт, ки то соли оянда 100 миллион дона воксинаро хайр мекунад.

Дар ҷаласаи гурӯҳи кишварҳои Ҳафтгона Бритониё, Фаронса, Олмон, Япония, Итолиё, Канада ва ИМА иштирок хоҳанд кард.

Даъвати Парлумони Аврупо ба таҳримҳои сахт алайҳи режими “ҷиноии” Беларус

Александр Лукашенко, раҳбари худкомаи Беларус

Дар посух ба саркӯбҳои шадид, фуруди маҷбурии ҳавопаймову ҳабси фаъоли мухолифон Раман Пратасевич Парлумони Аврупо ба таҳримҳои шадид ва тадбирҳои дигар алайҳи Беларус даъват кард. Дар қатъномае, ки 10-уми июн қабул шуд, ба ҷорӣ кардани таҳримҳои иқтисодӣ дар саноати коркарди нафт, калий, пӯлод ва чӯби Беларус даъват шудааст. Қонунгузорони аврупоӣ гуфтанд, бар асоси ин таҳримҳо, ҳамкориҳо бо бонкҳои давлатӣ қатъ шуда, Беларус аз пайвастшавӣ ба низоми бонкии SWIFT маҳрум мешавад.

Иттиҳоди Аврупо дар се даври таҳримҳо 88 шахс ва ҳафт ширкати беларусӣ, аз ҷумла худи президент Александр Лукашенкоро таҳрим кард, ки иддаои ӯ дар заминаи пирӯзӣ дар интихобот боиси эҷоди эътирозҳои сартосарӣ шуд. Пеш аз он ки рӯзи 23-уми май Минск ҳавопаймои ширкати Ryanair-ро фуруд овард, Иттиҳоди Аврупо дар андешаи ҷорӣ кардани бастаи чоруми таҳримҳо буд. Дар қатъномаи нашршуда режими Беларус “ғайриқонунӣ ва ҷиноӣ” номида шудааст.

Додгоҳи Маскав "Фейсбук" ва "Телеграм"-ро барои пок накардани матлабҳои "мамнуъ" ҷарима баст

Додгоҳе дар шаҳри Маскав рӯзи 10-уми июн шабакаҳои иҷтимоии "Фейсбук" ва "Телеграм"-ро бинобар пок накардани муҳтавое, ки аз сӯи давлат мамнуъ эълон шудааст, ҷарима баст.

Як шуъбаи Додгоҳи Маскав, бинобар "қонуншикании маъмурӣ", шабакаи иҷтимоии "Фейсбук"-ро 17 миллион рубл (муодили 235 ҳазор доллар) ва шабакаи иҷтимоии "Телеграм"-ро 10 миллион рубл (муодили 137 ҳазор доллар) қарздор кард.

Ҳукумати Русия иддао кардааст, ки ҳадаф аз ҷорӣ кардани назорати сахттар бар шабакаҳои иҷтимоӣ, тақвияти "истиқлол"-и интернет дар кишвар аст. Вале мунтақидон ба ин бовар ҳастанд, ки бо наздик шудани санаи баргузории интихоботи порлумонӣ ва коҳиши маҳбубияти ҳизби ҳокими "Русияи воҳид", ҳукумат бо чунин иқдомҳо ният дорад дигарандешон ва мухолифонро хомуш кунад. Интихобот моҳи сентябри имсол баргузор хоҳад шуд.

Фаъолиятҳои шабакаҳои иҷтимоӣ дар Русия ба сабабҳои гуногун мушкилофар шуда, ин ширкатҳо аз амалкарди ҳукумат интиқод кардаанд.

Яке аз охирин иттиҳоми ҳукумат ба зидди шабакаҳои иҷтимоӣ ин аст, ки шахсони зери синни қонуниро ба ширкат дар тазоҳурот ба тарафдорӣ аз раҳбари зиндонии мухолифон Алексей Навалний ташвиқ кардаанд.

Ниҳоди нозир ба фаъолияти расонаҳо дар Русия рӯзи 24-уми май шабакаи "Гугл"-ро таҳдид кард, ки агар матлабҳои дорои муҳтавои "ғайриқонунӣ"-ро пок накунад, дастрасӣ ба ин сайтро маҳдуд хоҳад кард.

Ҳукумати Русия аз чанд вақт ба ин тараф бинобар пок накардани бархе матлабҳо дар шабакаи иҷтимоии "Твиттер", суръати гардиши маълумот дар ин шабакаро кунд кардааст.

Моҳи гузашта ҳамин шуъбаи Додгоҳи Маскав "Фейсбук"-ро ба ҳамин иттиҳом ҳудуди 360 ҳазор ва "Гугл"-ро ҳудуди 82 ҳазор доллар ҷарима карда буд.

Дар моҳи апрел низ шабакаи "Твиттер"-ро бинобар пок накардани "маводи мамнуъ" дар умум 120 ҳазор доллар ҷарима кард. Шабакаи иҷтимоии "Тик-Ток" низ дар аввали имсол бо чунин иттиҳом ҷаримаи нақдӣ шуда буд.

Размкори тоҷик Лоиқ Раҷабов рақибаш аз Русияшро шикаст дод

Лоиқ Раҷабов. Акс аз бойгонӣ.

Лоиқ Раҷабов, варзишгари шинохтаи тоҷик, дар мусобиқаи Лигаи касбии муҳорибаҳои омехта ё PFL рақиби русаш Ахмед Алиевро шикаст дод. Сабқати Раҷабов бо Алиев шоми 10-уми июн дар Амрико баргузор шуд. Варзишгари тоҷик дар раунди аввал дар 22 сония размкори доғистониро шикаст дод. Бо ин ғалаба Лоиқ Раҷабов ба даврии баъдии мусобиқаи PFL роҳ меёбад ва имкон пайдо мекунад, ки барои як миллион доллар муборизаро давом диҳад. Сабқати баъдии Лоиқ Раҷабов дар назар аст, ки моҳи август баргузор шавад. Размкори тоҷик дар сабқати пешини Лигаи касбии муҳорибаҳои омехта бо Алекс Мартинес аз Парагвай вохурд ва доварон ғалабаро ба Мартинес доданд. Лоиқ Раҷабов тасмими ҳакамонро ноодилона хонд ва аз натиҷаи қувваозмоӣ ба PFL эътирознома навишт. Ҳанӯз маълум нест, ки ин натиҷаи ин шикоят чӣ шуд. Лоиқ Раҷабов соли 2019 дар финали Гран-прии мусобиқаи PFL ширкат карда буд. Лоиқ Раҷабов соли 2019 ба рӯйхати 10 размкори беҳтарини ММА аз кишварҳои Иттиҳоди Давлатҳои Мустақил дохил шудааст. Ин рӯйхат аз рӯи пурсиши нашрияи "ТурСтат"-и Русия тартиб дода шудааст.

Марде, ки Макронро шаппотӣ зад, 4 моҳ ҳабс шуд

Дамиан Тарел, шаҳрванди Фаронса, ки рӯзи 8 июн ба рӯи Эммануэл Макрон, президенти он кишвар шаппотӣ зад, аз сӯи додгоҳ ба 18 моҳи зиндон маҳкум шуд.

Вай 4 моҳро дар ҳабс пушти сар мекунад ва 14 моҳи дигар шартан дар озодӣ мемонад. Моддае, ки Тарел бар асоси он муҳокима шуд, то 3 соли зиндон ва ё ҷаримаро пешбинӣ мекунад.

Ҳодисаи шаппотӣ задани президент дар ҷанубу шарқи Фаронса рух дод. Макрон назди ҳаводоронаш баромад. Он лаҳза Тарели 28-сола, ки миёни мардум буд, президентро шаппотӣ зад. Дар наворҳо дида мешавад, ки Тарел ҳамзамон фарёд мезанад: "Нест бод макронизм". Вай дар додгоҳ гуфт, аз кардааш пушаймон нест. Тарел ҳамчунин дар додгоҳ гуфтааст, ки Макрон "кишварро заъиф" месозад.

Макрон ба ин ҳодиса таваҷҷуҳи чандоне накардааст. Вай гуфтааст, ба мулоқотҳояш бо интихобкунандагон идома медиҳад. Бисёре аз сиёсатмадорони фаронсавӣ, аз ҷумла рақибони Макрон ҳодисаи шаппотӣ задани ӯро маҳкум карданд.

Ёфтҳои бештар

XS
SM
MD
LG