Пайвандҳои дастрасӣ

Хабари нав

Хабарҳо

Ҳамоиши бузурги байнулмилалӣ дар Кобул

Нахустин бор дар пойтахти Афғонистон, Кобул, конфаронси байнулмилалии масъалаҳои ин кишвар баргузор мешавад. Интизор меравад, ки раисиҷумҳури Афғонистон, Ҳомид Карзай, аз шарикони байнулмилалии худ кӯмакҳои бештаре дархост хоҳад кард. Донорҳо ва саҳҳомон дар пайи тазминҳои назорат бар фасоданд. Намояндагони 70 кишвару созмон ва вазирони умури хориҷии 40 кишвар дар ин ҳамоиш ширкат хоҳанд кард. Интизор меравад, Дабири кулли Созмони Милал, Бан Ки-мун ва вазири умури хориҷии Иёлоти Муттаҳида Ҳилларӣ Клинтон низ дар ҷаласа ширкат кунанд. Ҳамоиш таҳти тадбирҳои шадиди амниятӣ ҷараён хоҳад ёфт.

Ҳамаи хабарҳои имрӯзро дар инҷо бихонед

Сокинони деҳаҳои наздимарзӣ хостори таъмини амнияти роҳҳо шуданд

Ҷамоати Ворух, Исфара

Бошандагони деҳоти ҳарду кишвар, ҳам Тоҷикистон ва ҳам Қирғизистон, аз мақомоти кишварҳои худ таъмини ҳаракат дар роҳҳои наздимарзӣ шудаанд.

Онҳо махсусан аз эҳтимоли даргириҳо дар роҳҳое нигаронанд, ки аз қаламрави ду кишвар ва ҳамчунин минтақаҳои баҳснок мегузаранд. Намояндагони ҳокимияти давлатии ду кишвар аз нимирӯзии 17-уми май то дери шаб ин масъаларо бо ҳам ва ҳамчунин бо аҳолӣ баррасӣ карданд, вале аз ҳеч гуна натиҷаи муҳиме хабар дода нашудааст.

Интизорӣ дар наздикии Оқсой

Сокинони Ворух мегӯянд, роҳи онҳо ба Исфара боз аст, вале амнияти ҳаракат дар он таъмин нест. Бо айни чунин иддао гуруҳе аз занони деҳаи Оқсойи Қирғизистон ба раиси вилояти Бодканд Абдукарим Алимбоев, ки ҳоло дар минтақа аст, муроҷиат кардаанд.

Саидҷон Ҷӯраев, ронандаи мусофирбари "Газел", шоми 17-уми май дар суҳбат бо Радиои Озодӣ гуфт, даҳҳо нафар дар маҳаллаи Сангтӯдаи Ворух ва дар рӯ ба рӯи деҳаи Оқсойи Қирғизистон мунтазир нишастаанд. Онҳо мунтазири онанд, ки бо замонат дода шудани амнияти роҳ ба самти Исфара ҳаракат кунанд.

"Дар мошини ман 9 нафар нишастааст. Дар миёнашон занону хурдсолон ҳам ҳастанд. Аз он тараф, онҳое, ки аз Исфара ба тарафи Воруху Чоркӯҳ меоянд, низ мунтазиранд", -- нақл кард ӯ.

Ҷӯраев афзуд, ба раиси ҷамоати Ворух тамос гирифтанд, вале ӯ гуфтааст, мунтазири натиҷаи музокироти намояндаҳои ҳарду ҷониб бимонанд.

Баҳодур Баҳоваддинзода, раиси шаҳри Исфара, низ бо баҳонаи он ки музокирот ҷараён дорад, дар ин бора суҳбат накард, аммо нагуфт, ки музокирот бар сари чист ва дар он аз ду тараф кадом мақомот ширкат доранд.

Нигаронии сокинон аз чист?

Нигаронии сокинон дар ҳоле аст, ки рӯзи 17-уми май мақомоти Тоҷикистону Қирғизистон аз боздошти сокинони якдигар дар қаламравҳояшон хабар доданд. Ин боздошт нахуст аз ҷониби қирғизҳо сар зада, дар посух тоҷикон низ шаҳрвандаони Қирғизистонро боздошт кардаанд. Дертар ҳарду тараф боздоштшудаҳоро ба ҳамдигар супурданд.

Зубайдулло Шомадов, сухангӯйи ҳукумати Исфара, гуфт, сокинони Қирғизистон се шаҳрванди Тоҷикистонро дар деҳаи Оқсой аз "Газел" фароварда, "гаравгон гирифтанд”. Кумитаи давлатии амнияти миллии Қирғизистон гуфт, шаҳрвандони Тоҷикистон замоне боздошт шуданд, ки дар ҳудуди Оқсой аз таксӣ берун омаданд. Ба иттилои ин ниҳод, роҳ аз Ворух ба Исфара транзитӣ аст ва мошинҳову мусофирон набояд дар он ҷо биистанд: “Савор шудану фаровардани одамон ва ё бор кардани мол дар роҳи транзитӣ манъ аст.”

Ҳалима Собитова, корманди “Тоҷикобдеҳот”-и Исфара, низ ба Радиои Озодӣ гуфт, роҳ аз тарафи Қирғизистон расман баста нест, вале сокинон аз бими он ки мавриди ҳамла қарор нагиранд, аз ин рҳ намегузаранд.

Ҳоло чашмҳо ба сӯйи мақомоти ду ҷониб дӯхта шудааст, ки амнияти роҳҳоро дар минтақаҳои баҳсӣ таъмин ва убури бемамониати сокинони ду тарафро кафолат диҳанд.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Тоҷикистону Русия барои бунёди шабакаи ягонаи дифои зиддиҳавоӣ созиш мебанданд

Владимир Путин ва Эмомалӣ Раҳмон

Владимир Путин, раиси ҷумҳурии Русия, дастур додааст, то мақомоти ин кишвар созишномаи бунёди шабакаи ягонаи мудофиаи зиддиҳавоиро бо Тоҷикистон омода карда, ба имзо расонанд.

Матни дастури Путин дар ин бора рӯзи 17-уми май дар пойгоҳи иттилооти ҳуқуқии ин кишвар нашр шуд.

Тибқи он Вазорати мудофиа ва Вазорати корҳои хориҷии Русия уҳдадор шудаанд, ки бо Тоҷикистон музокира пеш бурда, лоиҳаи созишномаро ба имзо расонанд.

Ин дар ҳолест, ки Тоҷикистон лоиҳаи чунин созишномаро бо Русия ҳанӯз моҳи сентябри соли 2020 тасвиб карда буд. Дар лоиҳаи санад гуфта мешавад, созишнома бо мақсади беҳбуди самарбахшии мудофиаи зиддиҳавоӣ дар минтақа баста мешавад.

Дар матни лоиҳаи созишнома, ки мақомоти Тоҷикистон онро ҷонибдорӣ кардаанд, гуфта мешавад, бо назардошти аз якдигар ҷудо будани қаламравҳои Тоҷикистону Русия, тарафҳо масъулияти ҳимояи қисматҳои фазои Тоҷикистонро муайян хоҳанд кард.

Гуфта шудааст, созишнома ба муҳлати панҷ сол баста мешавад, вале агар ҳеч яке аз тарафҳо нияти қатъи ин созишномаро надошта бошанд, амали он ба таври автоматӣ ба панҷ соли дигар дароз карда мешавад.

Мурофиаи созмонҳои Навалний моҳи июн барпо мешавад

Як қароргоҳи Навалний дар минтақаи дурдасти Русия. Акс аз сентябри соли 2020

Додгоҳе дар Русия муҳокимаи парвандаи зидди созмонҳои сиёсатмадори мунаққиди Кремлин Алексей Навалнийро дар робита бо “экстремистӣ” унвон шудани онҳо ба мӯҳлати дигар гузошт. Қарор буд, ки додгоҳи шаҳри Маскав рӯзи 17-уми май талаби додситониро дар бораи дар фаъолиятҳои экстремистӣ гунаҳгор кардани Бунёди зидди коррупсия, Бунёди ҳимоят аз ҳуқуқи шаҳрвандон ва қароргоҳи минтақавии Навалний баррасӣ мекард. Вале, ба иттилои Komanda 29, ки аз тими Навалний ҳимоя мекунад, дар оғози мурофиа додситонҳо боз шаш бастаи дигари санадҳоро ба парванда ҳамроҳ карданд. Ин ба он маъност, ки акнун тими Навалний барои омӯхтани мӯҳтавои ин санадҳо фурсат хоҳад дошт. Дар қарори додгоҳ гуфта шуд, ки мурофиа то 9-уми июн боздошта мешавад.

Додситонҳо гуфтанд, ки ин ташкилот “таҳти шиорҳои либералӣ шароитро барои бесубот кардани вазъи иҷтимоӣ ва иҷтимоиву сиёсӣ фароҳам мекунанд”. Фаъолони ҳуқуқ ин амали додситониро ҳамчун талоши “моҷароҷӯёна” барои хомӯш ва саркӯб кардани мухолифону дигарандешон дар кишвар маҳкум карданд. Муттафиқи Навалний Леонид Волков дар як изҳороташ моҳи апрел гуфт, дар сурати аз талаби додситонӣ ҷонибдорӣ кардани додгоҳ интизор меравад, ки ҳар нафари дахил дар ин амалҳо “билофосила аз рӯи иттиҳоми экстремизм муҳокима мешавад ва ин амал бо ҳукми зиндон меанҷомад”. Бар асоси қонунҳои Русия, афрод ё созмонҳои маҳкумшуда барои “экстремизм” бо ҳукми то 10 соли зиндон рӯбарӯ мешаванд.

 UNICEF  аз кишварҳои доро хост, ки ба кишварҳои нодор воксина хайр кунанд

Ба Украина аз роҳи барномаи  COVAX бастаи навбатии воксинаҳо ворид шуд. Апрели соли 2021

Раҳбари UNICEF рӯзи 17-уми май аз кишварҳои узви Гурӯҳи Ҳафтгона (G7) ва Иттиҳоди Аврупо хост, ки ба барномаи тақсими ройгони воксинаҳои COVAX-и СММ ба хотири коҳиши шиддати коронавирус воксина хайр кунанд. Ҳенриетта Фор, раҳбари иҷроияи UNICEF гуфт, ки тақдими воксинаҳо “як чораи камтарин, зарурӣ ва оҷил аст, ки ҳамин ҳоло бояд сурат гирад”. Дар изҳороташ Фор гуфт, ки G7 ва Иттиҳоди Аврупо агар моҳҳои июн, июл ва август ҳадди аққал 20 дарсади захираҳои воксинаҳои худро ҳам бидиҳанд, ин 153 миллион дона мешавад. Ба гуфтаи ӯ, бо ин кор онҳо ба барномаи эмкунии кишварҳои худ ҳеҷ осебе намерасонанд.

Тоҷикистон як узви барномаи COVAX-и Созмони ҷаҳонии тандурустӣ буда, то ҳол даҳҳо ҳазор адад воксина ба ин кишвар ворид шудааст.

Ин даъват дар ҳоле садо дод, ки Бритониё маҳдудиятҳои боқимондаи марбут ба пандемияи COVID-19 дар кишвар сабук кард. Шурӯъ аз 17-уми май дар ин кишвар дубора тарабхонаву кинотеатрҳо боз шуданд ва сокинон то 30-нафарӣ метавонанд дар як ҷо нишинанд.

Дар Ҳинд дар 24 соати гузашта шумори олудашавиҳои нав ба коронавирус беш аз 281 ҳазор ҳолат ва марг бар асари COVID-19 - 4106 ҳолатро ташкил дод.

Дар маҷмӯъ дар ин кишвари Осиёи Ҷанубӣ шумори олудашудаҳо 24,97 миллион нафарро ташкил додааст, ки аз назари омор баъди ИМА дуюмин кишвар дар сайёра мешавад.

Соҳиби анбори силоҳи таркида як рӯз пеш аз таркиш дар наздикиҳои ҷосусони рус буд

Маҳалли анбори силоҳи таркида. Декабри соли 2014

Ду расонаи чехӣ – “Радиои чехӣ” ва маҷаллаи “Респект” рӯзи 17-уми май навиштанд, соҳиби анбори силоҳи IMEX Group Пётр Бернатик як рӯз пеш аз таркиши ин муасиса дар шаҳри Острава, дар наздикии меҳмонхонаи

Corrado қарор дошт. Дар ин меҳмонхона ду ҷосуси эҳтимолии рус Александр Петров ва Руслан Боширов хона иҷора гирифта буданд. Расонаҳо бо такя ба маълумоти телефонҳои мобили Бернатик маълум кардаанд, ки як рӯз пеш аз таркиши анбор дар деҳаи Врбетитсе рӯзи 15-уми октябри соли 2014 ин соҳибкор дар наздикиҳои меҳмонхона қарор дошт. Дар ҳамин рӯз, ба иттилои матбуот, кормандони ширкати IMEX ногаҳон амре гирифтанд, ки дар он гуфта мешуд, ки ҳама бояд як рӯзи истироҳат гиранд. Бернатик танҳо нафаре буд, ки як рӯз пеш аз таркиш ба дохили анбор даромада буд. Таркишро, ба қавли мақомот ва тафтишоти Чехия, Петров ва Боширов амалӣ карданд.

Маълум нест, ки Бернатик он замон дар шаҳри Острава чӣ мекард ва чаро дар назди меҳмонхона қарор дошт. Вакили ӯ ба журналистон гуфтааст, ки соҳибкор метавонист он замон савори мошинаш аз назди меҳмонхона гузарад ва дар чорроҳа мошинро нигаҳ дошт. Вакили ӯ гуфт, ки зерҳимояаш ҳеҷ гоҳ дар дохили меҳмонхонаи Corrado набуд ва ҳеҷ гоҳ бо шаҳрвандони Русия мулоқот накардааст. Журналистон маълум кардаанд, ки Бернатик давоми 40 дақиқа дар маҳаллаи назди меҳмонхона буд. Манбаъҳо дар хадамоти амнияти Чех ба таври махфӣ ба журналистон тасдиқ карданд, ки полис ҳаракати Бернатикро дар рӯзи 15-уми октябри соли 2014 бо ёрии телефони мобили ӯ нақшакашӣ кардаанд.

Баъди исташ дар Острава Бернатик ба деҳаи Врбетитсе рафтааст. Шоҳидон гуфтанд, ки вақте ӯ ба анбор дохил мешуд, танҳо буд. Ин воқеият ҳамкоронашро дар тааҷҷуб гузоштааст, чунки одатан соҳибкор ҳамроҳ бо Людек Петржик ҳамроҳ рафтуомад мекард. Петржик яке аз ду кормандони IMEX аст, ки дар таркиш кушта шуд.

Маълум шудааст, ки Бернатик тахминан се соат дар дохили анбор буд. Дар дохил он соатҳо ҳеҷ касе аз кормандон ҳузур надоштанд, чунки ҳамаро ба истироҳат фиристоданд.

Рафтори ин соҳибкор мавриди таваҷҷӯҳи тафтишот шуд. «Радиои чехӣ» менависад, ки моҳи феврали имсол Бернатик давоми 48 соат дар боздошт буд ва хонаашро кофтукоб карданд. Муфаттишон ӯро аз назари эҳтимоли пинҳон кардани иттило дар бораи таркиш бозпурсӣ кардаанд.

Мақомоти чех 17-уми апрели имсол гуфтанд, ки ҷосусони низомии русро дар ташкили таркиш дар анбори силоҳи Врбетитсе гумонбар медонанд. Раҳбарони Чех, ба истиснои президент Милош Земан, пойфишорӣ мекунанд, ки дар заминаи ҳодисаи таркиши анбори силоҳ танҳо як фарзия вуҷуд дорад ва он ҳам даст доштани Русия мебошад. Тахмин меравад, ки ҳадафи таркиш нобуд кардани муҳимоти ҷангӣ ва аслиҳа мебошад, ки барои хориҷа, эҳтимолан Украина, пешбинӣ мешуд.

Баъди ин Ҷумҳурии Чех 18 корманди сафорати Русияро аз хокаш берун кард. Баъди чанд иқдоми ҷавобӣ, Маскаву Прага ба мувофиқа расиданд, ки шумори кормандони намояндагии дипломатии ҳарду кишвар дар қаламравашон баробар мешавад. Русия ҳама гуна иттиҳом дар заминаи ташкили таркиш дар Чехро рад кардааст.

Нишони нуқраи паҳлавони ҷавони тоҷик дар Ҷоми Осиё оид ба ҷудо дар Қазоқистон

Суннатулло Лоиқов, паҳлавони тоҷик.

Суннатулло Лоиқов, паҳлавони тоҷик, дар Ҷоми Осиё миёни навҷавонон оид ба ҷудо (Junior Asian Judo Cup Almaty 2021), ки рӯзҳои 14-16-уми май дар шаҳри Алмаатои Қазоқистон баргузор шуд, медали нуқра ба даст овард.

Ба иттилои Федератсияи ҷудои Тоҷикистон, дар ин мусобиқа, ки дар Маҷмааи варзишии ба номи Балуан Шолак доир гардид, беш аз 150 варзишгар аз 4 кишвари Осиёи Марказӣ – Қазоқистон, Қирғизистон, Тоҷикистон ва Узбекистон - ширкат варзиданд.

Ба ҳайати дастаи мунтахаби Тоҷикистон шаш варзишгар шомил буд: Муҳаммадсолеҳ Қувватов (-60 кг), Қурбоналӣ Бозоров (-73 кг), Ғаниҷон Ғаниев (-73 кг), Суннатулло Лоиқов (-81 кг), Ҳайдаралӣ Шоев (-90 кг) ва Эмомризо Анварзода (-100 кг).

Аз миёни онҳо танҳо Суннатулло Лоиқов медал ба даст овард. Вай дар вазни то 81 кило дар даври аввал Бекзот Таугалиеви қазоқро мағлуб кард ва ба даври чорякниҳоӣ роҳ ёфт. Дар чорякфинал бар варзишгари дигари мизбон – Ботирхон Сакенов - пирӯз гашт. Дар даври ниманиҳоӣ Абдулло Ҷалолиддинови қирғизро шикаст дод ва ба даври ниҳоӣ роҳ пайдо кард. Вале Лоиқов дар мубориза барои нишони тиллои мусобиқа аз қаҳрамони ҷаҳон миёни ҷавонон дар соли 2019 Аян Бойғозӣ аз Қазоқистон ноком шуд ва дар натиҷа барандаи медали нуқра гардид.

Ҳамзамон рӯзҳои 14-16-уми май дар Алмаато Ҷоми Осиё миёни наврасон оид ба ҷудо (Cadet Asian Judo Cup Almaty 2021) доир гардид. Дар ин мусобиқа Тоҷикистонро 5 варзишгар - 4 писар: Самиршо Муҳаббатов (-60 кг), Акбарҷон Ниёззода (-60 кг), Бахтиёр Ғафуров (-73 кг), Муҳаммадҷон Афғонов (-90 кг) ва як духтар – Меҳронаи Маҳмадзода (-57 кг) - намояндагӣ карда, аз медалҳо бенасиб монданд.

СММ аз Туркманистон хост, дар бораи рӯзноманигори маҳкумшуда иттилоъ диҳад

Нурлгелдӣ Холиқов.

Чанде аз кормандони СММ аз мақомоти Туркманистон дархост карданд, ки дар бораи рӯзноманигори маҳкумшудаи туркманистонӣ Нургелдӣ Холиқов иттилоъ диҳанд. Дар ин бора расонаҳои марбут ба Туркманистон хабар медиҳанд.

Моҳи феврали соли ҷорӣ чанд масъули ниҳодҳои марбут ба СММ бо ирсоли як номаи даҳсаҳифаӣ аз мақомоти Туркманистон хостанд, ки дар бораи ҳукми Холиқов маълумот диҳанд. Ба навиштаи расонаҳо, Холиқови 26-соларо барои ирсоли акси сафари ҳайати Созмони ҷаҳонии беҳдоштӣ ба Туркманистон 4 сол зиндонӣ кардаанд.

Дар номаи масъулони СММ омадааст, ки Холиқов рӯзи 12-уми июли соли 2020 ба рӯзноманигорони мустақил акси ҳайати СҶТ-ро ирсол кардааст. Рӯзи баъд рӯзноманигорро мақомоти ҳифзи ҳуқуқи Туркманистон ба бозпурсӣ даъват кардаанд. Рӯзи 26 июл Холиқов дар суҳбат бо расонаҳо гуфт, ки ӯро дар барнагардонидани қарз дар ҳаҷми 5 ҳазор доллар муттаҳам мекунанд, ки гӯё ибтидои соли 2020 гирифтааст. Холиқов моҳи сентябри соли 2020 бо иттиҳоми "қаллобӣ" 4 сол зиндонӣ шуд.

Дар бораи ҳукми Холиқов ба хешовандонаш танҳо дар моҳи декабри соли 2020 хабар доданд. Мақомот ҳамзамон ваъда доданд, ки вай дар доираи қонуни авф озод хоҳад шуд. Вале Холиқов то кунун дар зиндон боқӣ мондааст.

Масъулони СММ дар номааш гуфтаанд, ки муҳокимаи парвандаи Холиқов хилофи меъёрҳои адолати додгоҳӣ ва меъёрҳои байналхалқии риояи ҳуқуқи инсон сурат гирифтааст.

Дар Беларус ду журналист то 20-рӯзӣ ҳабс шуданд

Додгоҳи минтақавии Могилёв

Дар Беларус ду гузоришгар, аз ҷумла як хабарнигори расонаи олмонии Deutsche Welle бо иттиҳоми гӯё ширкат кардани онҳо дар намоишҳои эътирозии ғайриқонунӣ ба мӯҳлати то 20-рӯзӣ ҳабс шуданд. Ҳукме, ки 15-уми май содир шуд, яке аз даҳҳо қазиҳои додгоҳӣ дар Беларус алайҳи журналистон аст. Баъди интихоботи баҳсбарангези президентии августи порсол ва эътирозҳои сартосарӣ дар Беларус мақомот аз шеваи саркӯбҳои шадид кор гирифта, аз ҷумла журналистонро ҳам, ки дар пӯшиши хабарии ин таҳаввулот кор мекарданд, ба ҷавобгарӣ кашиданд.

Хабарнигори Deutsche Welle Александр Буряков ва журналисти мустақил Владимир Лаптсевич рӯзи 12 май дар шаҳри Могилёв боздошт шуданд. Дар ин шаҳри воқеъ дар 200-километрии шарқи Минск ин ду журналист бо пӯшиши хабарии додгоҳи Певел Северинетс, як сиёсатмадори мухолифи ҳукумати Александр Лукашенко машғул буданд. Полиси Беларус дар далели боздошти онҳо гуфт, ки ин журналистон “такроран дар намоишҳои эътирозии ғайриқонунии соли ҷорӣ иштирок карданд”. Вале гурӯҳи ҳомии ҳуқуқи MayDay гуфт, ки рӯзи 12 май дар муқобили додгоҳи шаҳри Могилёв ҳеҷ намоиши эътирозӣ баргузор нашудааст. Раҳбари кулли Deutsche Welle Питер Лимбург аз мақомоти Беларус озодии билофосилаи журналистонро тақозо кард.

Шиддатёбии ихтилофҳои Қирғизистон ва  Centerra Gold барои назорат аз кони Қумтор  

Макони кони Қумтор. Акс аз соли 2017

Дар Қирғизистон ихтилофҳо барои назорат аз болои Кони Қумтор пуршиддат мешавад. Ахиран як комисссиюни давлатӣ пешниҳод кардааст, ки назорати ин кон муваққатан аз дасти ширкати канадаии Centerra Gold ба ҳукумат гузарад. Дар навбати худ, Centerra Gold гуфт, ки аз болои Бишкек барои талоши дубораи миллисозии ин ширкат ба додгоҳ шикоят кардааст. Қумтор яке аз калонтарин конҳои тилло дар Осиёи Марказӣ ба шумор меравад.

Оқилбек Ҷабборов, раиси комиссиюни давлатии Қирғизистон рӯзи 17-уми май гуфт, аъзои ин ниҳод ба хулосае омаданд, ки бо сабаби “фасод ва вайрон кардани қоидаҳои амниятиву муҳитзистӣ” созиши ба ихтиёри Centerra Gold додани кон бояд бекор шавад. Оқилбек Ҷабборов гуфт: “Комиссиюни давлатӣ ошкор кард, ки созишномаҳои дар солҳои 1992, 2003, 2009 ва 2017 имзошуда дар заминаи фаъолияти Қумтор ҷавобгӯи манфиатҳои миллии Қирғизистон нест. Онҳо меъёрҳои марбут ба ҳифзи тамомияти арзии Қирғизистонро вайрон мекунанд ва бар пояи ғаризаҳои фасодкоронаи мақомоти вақт имзо шудаанд”.

Ин изҳорот як рӯз баъди он пахш шуд, ки ширкати канадаии Centerra Gold алайҳи Бишкек ба додгоҳи мунсифа шикоят карда қонунгузории ахиран қабулшуда дар бораи муваққатан зери назари давлат гузаштани кони тиллоро ба чолиш кашидааст. Дар шикоят ширкат гуфта шудааст, ки ин қонун “фазои сармоягузорӣ” дар заминаи истихроҷи тиллоро вайрон мекунад.

Блинкен ва Қурайшӣ вазъи Афғонистон ва хуруҷи нирӯҳоро баррасӣ карданд

Шоҳ Маҳмуд Қурайшӣ, вазири корҳои хориҷии Покистон

Энтонӣ Блинкен, вазири корҳои хориҷии Амрико ва ҳамтои покистониаш Шоҳ Маҳмуд Қурайшӣ дар як тамоси телефонӣ ҷараёни сулҳи Афғонистон ва ҷанги зидди терроризмро баррасӣ кардаанд.

Президенти Амрико Ҷо Байден моҳи апрел гуфт, ки то 11-уми сентябри имсол 2500 низомии амрикоиро аз хоки Афғонистон берун мебаранд.

Тавофуқи маъмурияти президенти собиқи Амрико бо Толибон ин буд, ки то 1-уми майи имсол нирӯҳои амрикоӣ хоки Афғонистонро тарк мекунанд. НАТО гуфт, бо айни ҳамин нақша кор карда, беш аз 7 ҳазор нирӯҳои эътилофиашро аз Афғонистон берун мебарад.

Департаменти давлатии Амрико шоми 16-уми май бо пахши изҳороте гуфт, дар сӯҳбати телефонӣ Блинкен ва Қурайшӣ ба "зарурати идомаи ҳамкорӣ дар ҷараёни сулҳи Афғонистон, пешрафти Покистон дар муқобила бо терроризм, инчунин, тавсеаи имконбахши ҳамкориҳо дар бахши тиҷорату савдо ва ҳам беҳтар кардани иртибототи минтақавӣ дар Осиёи Ҷанубӣ" таъкид карданд.

Берун рафтани нирӯҳои хориҷӣ аз Афғонистон нигаронии баъзе аз кишварҳои минтақаро ба бор овардааст, ки дар сурати набудани созиши сулҳ бо Толибон оё нирӯҳои Афғонистон мустақилона тавони муқобила бо ин гурӯҳи шӯришиҳо хоҳанд дошт ё на.

Низомиёни исроилӣ аз анҷоми як силсила ҳамлаҳои ҳавоӣ гузориш доданд

16 май, Ғазза. Ҷустуҷӯи бозмондаҳои баъди бомбаборони як бино идома дорад

Низомиёни исроилӣ гуфтанд, ки субҳи 17-уми май ҳавопаймоҳои ҷангии ин кишвар як силсила ҳадафҳоро дар Навори Ғазза зарба заданд ва дар натиҷа 15 километр туннел ё роҳҳои зеризаминии ҷангиён ва ҳам манзили нӯҳ фармондеҳи эҳтимолии Ҳамосро хароб карданд.

Сокинони як бинои сетабақа дар Ғазза, ки хеле осеб дидааст, гуфтанд, даҳ дақиқа пеш аз ҳамла низомиёни исроилӣ онҳоро хабар карданд ва аз ин хотир ҳама аз хонаҳо берун шуда буданд.

Дар робита бо зарбаҳои ҳавоии ахир феълан миқдори хисорот гуфта нашудааст, вале хабарҳо аз қатъ шудани барқ ва хароб шудани садҳо бино мерасад.

Низомиён гуфтанд, дар амалиёти ахир 35 “макони террористӣ”, аз ҷумла, туннелҳои ҷангиён ҳадаф қарор гирифтанд. Ин туннелҳоро “метро” ҳам меноманд ва онҳо барои эмин мондан аз ҳавопаймоҳои ҷангӣ истифода мешаванд.

Онҳо мегӯянд, ҷангиён шабонгоҳ тахминан 60 мушакро ба сӯи шаҳрҳои исроилӣ партоб карданд. Ин шумор дар қиёс бо ду шаби гузашта, ки 120 ва 200 мушак истифода шуд, камтар мебошад.

Мавҷи ҳамлаҳои ҳавоӣ рӯзи 16-уми май беш аз 90 ҳадафро дар ин минтақаи соҳилӣ осеб расонд. Ин ҳафтаи дуюми низоъҳо мебошад. Вазорати беҳдошт гуфт, дар яке аз ин ҳамлаҳо 42 фаластинии сокини Ғазза, аз ҷумла 8 кӯдак ва ду табиб кушта шуданд ва ин пурқурбонитарин ҳодисаи бомбаборонҳои ахир мебошад.

Энтони Блинкен бо мақомоти Дания мулоқот мекунад

Қароргоҳи нахуствазири Дания дар Мариенборг, 17-уми май. Котиби давлатии ИМА Энтони Блинкен бо нахуствазири Дания Метте Фредериксен гуфтугӯ мекунад

Рӯзи 17-уми май котиби давлатии ИМА дар сафари аврупоии худ бо мақомоти Дания дидору гуфтугӯ хоҳад кард. Ҳадафи аслии сафари Энтони Блинкен ба Аврупо ширкат дар ҷаласаи Шӯрои Арктика дар Исландия мебошад ва қарор аст дар ҳошияи он нахустин сӯҳбати рӯбарӯи Блинкен ва вазири корҳои хориҷии Русия Сергей Лавров баргузор шавад. Ин аввалин мулоқоти ду раҳбар баъди дар Вашингтон сари кор омадани маъмурияти президент Ҷо Байден хоҳад буд. Рӯзи душанбе, ба навиштаи Департаменти давлатии ИМА, Блинкен дар шаҳри Копенҳаген бо нахуствазири Дания Метте Фредериксен ва вазири хориҷаи ин кишвар Йеппе Кофод дар мавзӯи «муқобила бо бӯҳрони муҳитзистӣ» ва «манфиатҳои дуҷониба дар тақвияти равобити фароатлантикӣ» дидору гуфтугӯ хоҳад кард.

Департаменти давлатӣ гуфт, ки Блинкен ӯҳдадории ИМА ба технологияҳои сабз ва ҳифзи суботи муҳитзистӣ дар Арктикаро таъкид хоҳад кард. Баъди ин мулоқот 17-уми май ӯ ба Исландия парвоз мекунад ва дар он ҷо бо президент, нахуствазир ва вазири хориҷаи ин кишвар мулоқот мекунад. Ин мулоқот дар остонаи Шӯрои Арктика барпо мешавад, ки рӯзи 19-уми май дар шаҳри Рейкявик оғоз мешавад. Рӯзи 20-уми май мулоқоти ӯ бо Лавров дар назар аст.

Як мақоми баландпояи Департаменти давлатӣ дар роҳ ба Копенҳаген ба хабарнигорон гуфт, ки Блинкен ва Лавров сари масоиле тамаркуз мекунанд, ки Вашингтону Маскав дар онҳо манфиати муштарак доранд.

Акси парчами Исроил дар девори як меҳмонхонаи Тошканд баҳсбарангез шуд

Акси парчами Исроил дар девори меҳмонхонаи "Узбекистон" дар шаҳри Тошканд баҳсҳои зиёдеро дар шабакаҳо ба бор овард.

Як моҳи пеш, рӯзи 14 апрел, ба муносибати 73-солагии истиқлоли Исроил девори меҳмонхонаи "Узбекистон" бо акси парчами Исроил оро дода шуд. Масъулони меҳмонхона гуфтанд, мунъакис шудани парчами Исроил дар девори меҳмонхона бо ҳаводиси кунунии Шарқи Наздик рабте надорад.

Як масъули меҳмонхона гуфт, бо сафорати Исроил дар Узбекистон созишнома баста шудааст. "Мо акси парчамеро мунъакис кардаем, ки Узбекистон бо он муносибатҳои дипломатӣ дорад. Ин амал дар доираи қонун сурат мегирад", - гуфт масъули меҳмонхона.

Хушунати Исроил бо Фаластин панҷ рӯз аст, ки идома дорад. Аз рӯзи душанбе то ин замон бештар 170 фаластинӣ кушта шудааст. Кушташудаҳо миёни исроилиҳо ба 10 кас мерасад.

Боздошти шаш муҳоҷири тоҷик баъд аз занозании гурӯҳӣ дар Санкт-Петербург

Шаҳри Санкт-Петербург

Баъд аз занозании гурӯҳии эҳтимолан шаҳрвандони Осиёи Марказӣ дар шаҳри Санкт-Петербурги Русия, нисбат ба 6 муҳоҷири тоҷик парвандаи ҷиноӣ кушодаанд.

Ба қавли хабаргузориҳои русӣ, муноқиша шоми 14-уми май дар ноҳияи Приморск рух додааст, вале сабаби занозанӣ нашр намешавад. Гуфта мешавад, ки тақрибан сад нафар бо ҳам занозанӣ карда, баъзеи онҳо аз калтакҳои чӯбиву оҳанӣ истифода кардаанд. Матбуоти Русия навишт, ки 45 нафарро ба идораи полис бурдаанд.

Хабаргузории "Фонтанка" навори амалиётеро аз сохтмонҳои Санкт-Петербург нашр кард ва дар он дида мешавад, ки зоҳиран кормандони Вазорати корҳои дохилӣ ва Росгвардия бо сагҳояшон ҷойи хоби муҳоҷиронро тафтиш мекунанд.

Мақомот гуфтанд, дар умум, ҳуҷҷатҳои 130 шаҳрванди хориҷӣ тафтиш шуда, нисбат ба яке аз онҳо барои қалбакӣ будани санадҳояш парвандаи ҷиноӣ боз шудааст.

Дар гузашта ҳам гоҳе занозании гурӯҳӣ миёни зодаҳои Осиёи Марказӣ бо далелҳои мухталиф, аз ҷумла, барои дастрасӣ ба кору даромад рух додааст. Шаш шаҳрванди Тоҷикистон, ки нисбат ба онҳо парванда боз шудааст, ба навиштаи матбуоти русӣ, кормандони як ширкати сохтмонӣ буданд.

Машварати мақомоти тоҷик ба муҳоҷироне, ки будубошашон дар Русия ғайриқонунист

Маркази "Сахарово" барои хориҷиҳои ҷӯёи кор дар Русия патент медиҳад

Намояндагии Вазорати меҳнат ва муҳоҷирати Тоҷикистон дар Русия бо нашри як эълон ба муҳоҷирони тоҷик гуфтааст, рӯйхати шаҳрвандоне, ки дар қаламрави Русия ғайриқонунӣ қарор доранд, дар ин ниҳод ва сохторҳои он мавҷуд аст. "Барои дарёфти маълумот барои қонунӣ кардани ҳузури худ дар ин кишвар, хоҳишмандон метавонанд ба кормандони намояндагӣ дар минтақаҳои гуногуни Русия муроҷиат намоянд", -- омадааст дар эълон. То анҷоми қарори президенти Русия Владимир Путин дар мавриди сабукӣ ба шаҳрвандони хориҷӣ дар шароити пандемия барои қонунӣ кардани будубошашон дар ин кишвар камтар аз як моҳи дигар мондааст. Бо наздик шудани санаи 15-уми июн шумори муҳоҷирон ҳам дар назди маркази “Сахарово” барои дарёфти патент ва қонунӣ кардани ҳуҷҷатҳояшон ҳамарӯза меафзояд.

Тоҷикистону Қирғизистон аз боздошти шаҳрвандони якдигар дар марз хабар доданд

Марзи Тоҷикистону Қирғизистон

Намояндагони Тоҷикистону Қирғизистон аз боздошти шаҳрвандони худ дар қаламравҳои якдигар хабар доданд.

Манобеъ дар мақомоти интизомии шаҳри Исфара гуфтанд, ки ҷониби Қирғизистон рӯзи 17-уми май се нафар, ду сокини одӣ ва як маъмури интизомиро дар роҳи Ворух - Хоҷаи Аъло (дар ҳудуди деҳаи Оқсой) дастгир кардааст.

Абдукарим Алимбоев, раиси вилояти Бодканд, ба бахши қирғизии Радиои Озодӣ боздошти се сокини Тоҷикистонро тасдиқ кард, вале айни замон гуфт, ҷониби Тоҷикистон низ се шаҳрванди ин кишварро дастгир намудааст.

Мақомоти Тоҷикистон расман хабар надоданд, аммо манобеъ дар мақомоти интизомии Исфара боздошти ду ронандаи қирғизро таъйид карданд. Мусоҳиби мо гуфт, "ҳоло мақомот талош доранд, ки музокира кунанду масъаларо ҳал кунанд."

Абдукарим Алимбоев ба бахши қирғизии Радиои Озодӣ гуфтааст, ҳоло қазияро таҳқиқ доранд, ки шаҳрвандонро марзбонҳо дастгир кардаанд ва ё мардуми маҳаллӣ.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

АП: Нархи билетҳои "Уралские авиалинии" боло рафт

Душанбе, як нуқтаи билетфурӯшӣ. Акс аз соли 2016

Хабаргузории «Азия-Плюс» аз боло рафтани нархи билети парвозҳои чартерии ширкати «Уральские авиалинии» ба самти Русия хабар додааст. Ба қавли манбаъ, ширкат билетҳоро барои моҳи май бо нархи 13 то 14 ҳазор сомонӣ пешниҳод мекунад. Барои нимаи дуввуми моҳи июн нархи билет 8 ҳазору 850 сомонӣ то 9 ҳазору 300 сомонӣ будааст. Пайдо кардани билетҳо барои парвозҳои маъмулии ғайричартерӣ бо сабаби камии шуморашон имкон надорад. Чунин вазъият боиси он шудааст, ки талабгорони сафар ба Русия бо умеди билети арзон ба доми қаллобон меафтанд. Аз ҷумла, ду сокини ноҳияи Ёвон ба он гунаҳкор мешаванд, ки бо ваъдаи дарёфти билети арзон ба самти Кӯлоб-Маскав 16 сокини Тоҷикистонро фиреб додаанд. Вазорати корҳои дохилӣ мегӯяд, сокинон Неъматулло Холов ва шарики ӯ Комил Расулов «ба бовари сокинон даромада, аз онҳо дар маҷмӯъ 128 ҳазор сомонӣ ба даст оварданд ва ба манфиати худ истифода бурданд». Мақомот гуфтанд, ки Неъматулло Холов шудааст, вале Комил Расулов фирор намудаву таҳти ҷустуҷӯ қарор дорад.

Моҳи апрел парвозҳои қатъшуда ба самти Русия бо сабаби пандемияи коронавирус дубора барқарор шуданд, вале шумори каму нокофии онҳо талаботи ҳама хоҳишмандони сафарро бароварда намекунад. Русия макони аслии кору даромади то як миллион шаҳрванди Тоҷикистон мебошад.

Таҳдиди "экстремистӣ" эълон шудани созмонҳои Навалний дар додгоҳи Маскав

26 март, шаҳри Санкт-Петербург. Намоиши эътирозии зидди коррупсия

Додгоҳе дар Русия дар мурофиаи рӯзи 17-уми май масъалаи “экстремистӣ” унвон шудани шабакаи созмонҳои сиёсатмадори мухолифи ҳукумат Алексей Навалнийро баррасӣ мекунад. Мурофиаи додгоҳи шаҳри Маскав бо талаби додситонӣ барпо мешавад, ки хостааст, Бунёди зидди коррупсия, Бунёди ҳимоят аз ҳуқуқи шаҳрвандон ва қароргоҳи минтақавии Навалний “экстремистӣ” эълон шаванд. Додситонҳо гуфтанд, ки ин ташкилот “таҳти шиорҳои либералӣ шароитро барои бесубот кардани вазъи иҷтимоӣ ва иҷтимоиву сиёсӣ фароҳам мекунанд”. Фаъолони ҳуқуқ ин амали додситониро ҳамчун талоши “моҷароҷӯёна” барои хомӯш ва саркӯб кардани мухолифону дигарандешон дар кишвар маҳкум карданд. Муттафиқи Навалний Леонид Волков дар як изҳороташ моҳи апрел гуфт, дар сурати аз талаби додситонӣ ҷонибдорӣ кардани додгоҳ интизор меравад, ки ҳар нафари дахил дар ин амалҳо ва кормандони ин созмонҳо “билофосила аз рӯи иттиҳоми экстремизм муҳокима мешавад ва ин чиз бо ҳукми зиндон меанҷомад”. Бар асоси қонунҳои Русия, афрод ё созмонҳои маҳкумшуда барои “экстремизм” бо ҳукми то 10 соли зиндон рӯбарӯ мешаванд.

Амалиёти ҳавопаймоҳои ҷангии Исроил дар Ғазза

Ғазза. Субҳи 17-уми май

Бо вуҷуди даъватҳо ба хатми хушунатҳо, рӯзи 17-уми май ҳавопаймоҳои ҷангии Исроил силсилазарбаҳои сангинеро дар чанд нуқтаи шаҳри Ғазза анҷом доданд. Хушунатҳо ҳафтаи гузашта шуруъ шуданд.

Хабаргузориҳо мегӯянд, субҳи душанбе даҳҳо ҳамлаҳои ҳавоӣ шаҳрро такон дод. Нирӯҳои дифоии Исроил гуфтанд, "ҳавопаймҳои ҷангии ин ниҳод ҳадафҳои террористиро дар Навори Ғазза зарба заданд".

Рӯзи якшанбе дар Ғазза мавҷи ҳамлаҳо ба роҳ монда шуд ва Исроил гуфт, беш аз 90 маконро дар шаҳр ҳадаф қарор дод. Ба ин тартиб, инак, ҳафтаи дуюми хушунатҳо дар Ғазза шуруъ шуд.

Нахуствазири Исроил Бенямин Нетаняҳу гуфт, ки ҳамлаҳо “ба тамоми қудраташ” идома мекунад ва “вақт мегирад”. Ӯ дар як изҳороти телевизионӣ гуфт, “Исроил мехоҳад, Ҳамос нархи гаронеро пардохт кунад”.

Аз замони шурӯи хушунатҳо то ҳол дар миёни фаластиниҳо дар Ғазза 197 ва дар Исроил 10 нафар кушта шуданд. Президенти Амрико Ҷо Байден гуфт, маъмурияти ӯ бо фаластиниҳову исроилиҳо ба хотири дастёбӣ ба оромиши давомдор кор мекунад.

Энтони Блинкен, вазири корҳои хориҷии Амрико, мавзӯи хушунатҳои ахири Ғаззаро бо Қатар, Миср ва Арабистони Саудӣ баррасӣ кард.

Дар ҳамлаи артиши Мянмар ба мухолифон 5 кас ҷон бохт

Дар шаҳри Миндати Мянмар дар натиҷаи задухӯрд бо низомиён панҷ кас кушта, даҳ тан захмӣ ва панҷ каси дигар ҳабс шуданд. Дар ин бора расонаҳои байналмилалӣ иттилоъ доданд.

Аз 13-уми май дар шаҳри Миндат вазъи низомӣ эълом шудааст. Дар ин шаҳр, ки 40 ҳазор сокин дорад, ҳаракати шӯришгарона ташкил шудааст. Аъзои шӯриш бо силоҳҳои худсоз муҷаҳҳаз ҳастанд.

Рӯзи шанбе ҷангҷӯёни шӯриши зидди низомиёни давлатӣ монеи вуруди ҳарбиён ба шаҳр шуданд. Низомиёни давлатӣ бо истифода аз силоҳи вазнин сафи шӯришиёнро шикаста, вориди шаҳр гардиданд.

Идораи марзбонии Қирғизистон аз Тоҷикистон хост, "аз нашри маълумоти нодуруст пешгирӣ кунад"

Марзи Тоҷикистон ва Қирғизистон.

Хадамоти давлатии марзбонии Қирғизистон дар робита ба паҳншавии наворе дар шабакаҳои иҷтимоӣ изҳорот нашр кард.

Ба иттилои ин ниҳоди Қирғизистон, рӯзи 14-уми май марзбонони қирғиз ҳангоми иҷрои вазифа мушоҳида кардаанд, ки "дар наздикии хати шартии марз манзили як шаҳрванди Тоҷикистон месӯзад". "Дар рафти гуфтугӯи телефонӣ мақомоти Тоҷикистон аз марзбонони Қирғизистон хостаанд, ки бо ҳадафи пешгирӣ аз ташаннуҷи вазъ низомиёни қирғиз аз хатти шартии марз дуртар бурда шаванд", - хабар медиҳанд мақомоти Қирғизистон.

Рӯзи 15-уми май дар минтақаи Қараи ноҳияи Бодканди Қирғизистон мулоқоти намояндагони ду тараф баргузор шуд. Мақомоти Қирғизистон гуфтанд, ин мулоқот барои баррасии хабари расонаҳо дар бораи буридани дарахтони мевадиҳанда дар наздикии хати марз ташкил шуд.

"Дар рафти мулоқот ҷониби Тоҷикистон натавонист, ки далели бурида шудани дарахтонро исбот кунад", - хабар медиҳад Хадамоти марзбонии Қирғизистон. Дар робита ба ин ниҳоди мазкур аз мақомоти Тоҷикистон даъват кардааст, ки "оташсӯзии манзили зистро бетарафона таҳқиқ ва аз паҳншавии хабарҳои беасосро дар бораи даст доштани шаҳрвандони Қирғизистон дар тахрибкорӣ пешгирӣ кунад".

Ҷониби Тоҷикистон ин изҳоротро ҳанӯз шарҳ надодааст.

Гуруҳе аз сокинони як деҳаи сарҳадии ноҳияи Исфара мегӯянд, ки афроди ношинос аз тарафи Қирғизистон гузашта, як хонаеро дар деҳаи онҳо оташ задаанд. Марзбонони қирғиз ин иддаоро беасос хонда, ба Радиои Озодӣ гуфтанд, ки чунин ҳодисаеро сабт накардаанд. Шавкат Қаюмов, раиси маҳаллаи Лангари Хайробод дар ҷамоати Чоркӯҳ, рӯзи 15-уми май ба Радиои Озодӣ гуфт, ҳодиса шаби 14-уми май сурат гирифтааст ва дар натиҷа хонаи Баҳром Ғафуров, сокини деҳа сӯхта ва чаҳор ҳуҷраи он нобуд шудааст.

Айни замон, ба гуфтаи ӯ, шахсони номаълум садҳо навниҳол дар мавзеи Сиёҳкӯҳро аз реша кандаанд. Ҳангоми ҳодиса касе дар хона набудааст ва ҳеч касе осеб надидааст. Дар Хадамоти марзбонии Қирғизистон дар Бишкек ва раёсати он дар вилояти Ботканд дар суҳбати телефонӣ ба Радиои Озодӣ гуфтанд, ки чунин хабаре дар онҳо нест ва "ингуна ҳодиса дар марзро сабт накардаанд".

Зубайдулло Шомадов сухангӯи ҳукумати шаҳри Исфара бо нашри акс ва видеои хонаи сӯхта ва навниҳолҳо канда дар саҳифааш дар Фейсбук навиштааст: “Соати тақрибан 20: 10 дақиқаи 14-уми май манзили зисти Баҳром Ғафуров сокини маҳаллаи Лангари Хайробод оташ зада шуд, ки дар натиҷа чаҳор утоқи ин манзил нобуд шудааст”. Ӯ навиштааст, ки ин хона 100 метр дуртар аз минтақаи баҳсбарангези сарҳад қарор дорад.

Шавкат Қаюмов гуфт, ҳукумати шаҳри Исфара ваъда додааст, ки хонаи Баҳром Ғафуровро барқарор мекунад ва ҳамдеҳагон низ бо ҳашар дар таъмири хона кумак мерасонанд.

Пас аз муноқишаи охир моҳи апрел дар сарҳади Тоҷикистону Қирғизистон чунин ҳодиса то кунун сабт нашуда буд. Дар ин муноқиша, ки рӯзҳои 28 ва 29-уми апрел рух дод, аз ҳарду ҷониб даҳҳо нафар куштаву садҳо кас захмӣ шуданд. Ба иттилои мақомоти қирғиз, дар Бодканд, 78 хона сӯхт, 189 кас маҷруҳ шуд ва 36 кас, аз ҷумла ду кӯдак, ҷон бохтаанд. 15 ҳазор нафар ба ҷойи амн куч дода шуд.

Ҳукумати Тоҷикистон расман аз кушта шудани 19 нафар ва захмӣ шудани 87 нафар дар ин муноқишаи марзӣ хабар дод. Ҳамчунин ба иттилои Тоҷикистон дар ин даргириҳо 20 хонаи тоҷикон вайрон шудааст.

Шавкат Мирзиёев дар сафараш ба Тоҷикистон аз Хуҷанд боздид мекунад

Эмомалӣ Раҳмон ва Шавкат Мирзиёев. Акс аз бойгонӣ.

Шавкат Мирзиёев, раиси ҷумҳури Узбекистон, рӯзи 10-уми июн ба Тоҷикистон сафар мекунад. Хабаргузории "Азия-Плюс" аз қавли манобеаш дар ҳукумат навишт, ки сафари Мирзиёев ба Тоҷикистон то 12-уми июн идома хоҳад дошт.

Ба навиштаи хабаргузорӣ, раиси ҷумҳури Узбекистон дар ҷараёни боздидаш аз Тоҷикистон ба шаҳри Хуҷанд меравад. Манбаъ мегӯяд, Шавкат Мирзиёевро дар Хуҷанд раиси ҷумҳури Тоҷикистон Эмомалӣ Раҳмон ҳамроҳӣ хоҳад кард.

Дар назар аст, дар ҷараёни сафари Мирзиёев ба Тоҷикистон чанд созишнома миёни Душанбе ва Тошканд имзо шавад. Ба ҳамин тартиб, дар давраи раёсатҷумҳурияш ин бори чаҳорум мешавад, ки президенти Узбекистон аз Тоҷикистон дидан мекунад.

Нахустин сафари президенти Узбекистон Шавкат Мирзиёев ба Душанбе 9-уми марти соли 2018 сурат гирифт ва оғози давраи нави ҳамкориҳои миёни Узбекистон ва Тоҷикистон дониста шуд.

Расонаҳо роҳҳои сарватандузии хеши президенти Туркманистонро ошкор карданд

Раиси ҷумҳури Туркманистон.

Як таҳқиқоти рӯзноманигории сомонаҳои Turkmen.news, Gundogar ва OCCRP ошкор кардааст, ки хоҳарзодаи Қурбонқулӣ Бердимуҳаммадов, президенти Туркманистон, бо истифода аз буҳрони ғизоии ин кишвар сарвати бештар ҷамъ меорад.

Ба иттилои рӯзноманигорон, Ҳоҷимурод Раҷабови 39-сола бо ташкили ширкати бритониёии Greatcom Trade шартномаҳои давлатии воридоти ғизоро ба Туркманистон соҳиб шудааст.

Моҳи марти соли 2016 Бердимуҳаммадов бо содир кардани як фармон ҳукуматро вазифадор карда буд, ки танҳо тавассути ширкати Greatcom Trade аз хориҷ ғизо биоранд. Ин ширкат бояд аз хориҷ шакару гӯшти мурғ ва равған биорад. Маблағи шартнома 27,5 миллион долларро ташкил медиҳад.

Ин дар ҳолест, ки дар Туркманистон буҳрони шадиди ғизоӣ ҳукмфармост. Сокинон иҷоза доранд, ки танҳо бо меъёр ва аз мағозаҳои наздики манзилашон ғизо бихаранд.

Вабои коронавирус ин буҳронро амиқтар кард. Ҳанӯз маълум нест, ки мақомоти Туркманистон ба таҳқиқоти рӯзноманигорӣ вокуниш кардаанд ё не.

Яҳудиёни бухороӣ Юлдуз Усмоноваро дар яҳудиситезӣ айбдор карданд

Юлдуз Усмонова, овозхони маъруфи Узбекистон

Ҷамъияти яҳудиёни бухороӣ дар Амрикову Исроил ба изҳороти овозхони узбекистонӣ Юлдуз Усмонова дар бораи низои Исроил бо Фаластин вокуниш нишон доданд. Намояндагони ҷамъиятҳои мазкур аз Усмонова талаб доранд, ки аз мардуми Исроил "барои ҳарфҳои яҳудиситезонааш" узр пурсад.

Усмонова рӯзи 13-уми май дар Инстаграм Исроилро "ғосиб" номид ва илова кард, ки "Исроилро давлат намеҳисобад". Ин овозхон ба мардуми Фаластин изҳори ҳамдардӣ кард ва гуфт, "дар сурати зарурат омодааст, барои Фаластин биҷангад".

"Мо мардуми Исроил мегӯем, ман онро давлат намеҳисобам. Зеро худашон хуб медонанд, ки ғосиб ҳастанд... Инсон дар зиндагӣ танҳо як маротиба мемирад. Агар зарур шавад, агар даъват кунанд, пас, мо ба ҷанг меравем. Бигзор ин фикрро надошта бошанд, ки мо танҳо машғули худ ҳастем. Агар зарур шавад, мо муттаҳид мешавем. Фаластиниҳо - қаҳрамонони мо ҳастанд. Онҳо он замин ҳифз ва барои он меҷанганд", -- навишт Усмонова.

Дар посух ба ин ҳарфҳо соҳибкор Алекс Бараев, ки дар Исроил зиндагӣ дорад, дар саҳифаи "Фейсбук" навишт, борҳо ба Усмонова кумак кардааст. Вай бо ёдоварӣ аз ёриҳояш аз Усмонова хост, ки аз мардуми Исроил узр пурсад.

Намояндаи дигари яҳудиҳои бухороии муқими Исроил Ефим Миратов навишт, ки президенти Узбекистон Шавкат Мирзиёев бояд Юлдуз Усмоноваро барои ин ҳарфҳояш аз унвони овозхони мардумӣ маҳрум созад.

Наргиза Шабанова, яҳудии бухороии дигар, ки дар Амрико зиндагӣ дорад, дар шабакаҳои иҷтимоӣ навишт, ки барои вай "Юлдуз Усмоноваи овозхон вуҷуд надорад".

Вазъ дар Шарқи Наздик рӯзи 10-уми май бад шуд. Аз замони шурӯи хушунатҳо то ҳол дар миёни фаластиниҳо дар Ғазза 197 ва дар Исроил 10 нафар кушта шуданд. Президенти Амрико Ҷо Байден гуфт, маъмурияти ӯ бо фаластиниҳову исроилиҳо ба хотири дастёбӣ ба оромиши давомдор кор мекунад. Бенямин Нетаняҳу, сарвазири Исроил гуфт, амалиёти низомии Исроил дар Навори Ғазза "ҳар чи қадаре, ки зарур шавад, идома мекунад".

Ҳамлаҳои Исроил идома доранд, Шӯрои Амният низоъро баррасӣ мекунад

Тахриби бино дар натиҷаи зарбаҳои ҳавоии Исроил дар Навори Ғазза

Дар Навори Ғазза бо зарбаҳои ҳавоии Исроил рӯзи 16 май 26 фаластинӣ кушта шуда, хонаи раҳбари Ҳамос тахриб гаштааст. Ин дар ҳолест, ки Шӯрои Амнияти Созмони Милал зимни афзоиши изтироб дар саросари ҷаҳон интизор меравад, шиддат ёфтани низоъро дар Ховари Миёна баррасӣ кунад.

Бо он ки фаластиниён мегӯянд, дар Ғазза ба камияш 174 нафар, аз ҷумла 47 кӯдаки онҳо ва исроилиҳо бар инанд, ки 10 исроилӣ кушта шудаанд, рӯйдодҳои ахир хунинтарин марҳилаи низоъ аз соли 2014 ба ин сӯ шумурда мешавад. Сарвазири Исроил Бенямин Нетаняҳу рӯзи 15 май гуфт, ки сарфи назар аз даъватҳои Вашингтон ва Созмони Милал ба қатъи низоъ, маъракаи ҷории зидди ҷангиёни фаластинӣ "то он даме ки лозим аст, идома хоҳад ёфт." Ин изҳороти Нетаняҳу рӯзи 15 май пас аз чандин ҳамлаи ҳавоии исроилиён садо дод, ки гуфта мешавад, раҳбарон ва фармондеҳони аршади Ҳамосро ҳадаф гирифта буданд. 16 май артиши Исроил гуфт, хонаи Яҳё Синвор, раҳбари ҷиноҳи сиёсии Ҳамосро дар Навори Ғазза бомбаборон кард. Дар бораи зинда ё мурдаи ӯ хабар дода нашудааст.

"Дар байни ҳадафҳои задашуда манзилҳои Яҳё Синвор, раиси Дафтари сиёсии Ҳамос дар Ғазза ва инчунин бародари ӯ Муҳаммад Синвор, мудири таъминот ва нерӯҳои башарии Ҳамос ҳастанд", омадааст дар изҳороти артиши Исроил, ки ҳамроҳи он видеое низ пахш гашт, ки дар он таркишу дуди ғазиз ва вайронии сахт дида мешавад. Ҳамлаҳои ҳавоии Исроил пештар, рӯзи 15 май як бинои баландошёнаи шаҳри Ғаззаро тахриб карданд, ки дар он расонаҳои хабарии байналмилалӣ, аз ҷумла Алҷазира ва Ассошиэйтед Пресс ҷойгир буданд. Низомиёни Исроил гуфтанд, ки тахриби ин бино қонунӣ буд, зеро дар он дороиҳои низомии марбут ба Ҳамос вуҷуд доштанд. Исроил дар бораи зарба пешакӣ огоҳӣ дод, то хабарнигорон аз ин бино кӯчонида шавад. Хабаргузории Ассошиэйтед Пресс ин ҳамларо маҳкум кард ва аз Исроил хоҳиш кард, ки далелҳо пеш орад. "Мо ҳеҷ нишонае надоштем, ки Ҳамос дар ин бино буд ва ё дар он коре мекард", гуфта шудааст дар изҳороти Ассошиэйтед Пресс. Дабири кулли СММ Антонио Гутерриш аз шумораи қурбониёни мулкӣ дар ҷангҳои Ғазза изҳори нигаронӣ кард ва аз зарбаи Исроил ба бинои дорои дафтарҳои кормандони расонаҳо "шадидан нороҳат шуд".

Ёфтҳои бештар

XS
SM
MD
LG